LESSON 9 *November 25 – December 1 Ukna Neite Tungah Mission Sepna

LESSON 9         *November 25 – December 1

Ukna Neite Tungah Mission Sepna

 

SABBATH NITAAK

 

Tu Kaalsung Simding: Daniel 4; 2 Kum.5:1–19; Johan 3:1–12; 7:43–52; 19:38–42; Matt. 19:16–22.

 

Kamngah: “Mi khatpeuh in hih leitung khempeuh a ngah hangin a nuntakna bulpi suplawhleh bang phattuamna om ahi hiam? A nuntakna bang tawh leikik thei nawn ding ahi hiam? (Matthai 16:26)

 

Lai Siangtho a kigelh khit kum tultampi cing khin himah taleh, tuni dongin Lai Siangtho in Pasian Kammal ahihna kiptawntung hi. Lai Siangtho in Pasian kiangpan thuman thute honglak hi. Tua bangin a honghilh thute lakah mihing pianzia honglak hi. Kum zalom guk hunlai mite le kum zalom 21 Brazil mite in kibang hiam cih a kipan: mi khempeuh in mawhnei mi hi-in Pasian hehpihna kisam ihi hi.

Hih sungah a hau a zawng kihelkim hi. Lai Siangtho sunga mihau le ukna neite in tuhun hauhna le ukna neite tawh kilamdanglo hi. A diakdiakin ah neih-le-lamh tawh kisai, min ngahna ding tawh kisai mihing in huaiham tawntungin kicing cih hun nei ngeilo hi. Midangte nengniamna tungtawnin neih-le-lamh hauhna kizong ciat hi. Ahi zongin Pasian in tua bangin nenniam thuakte, a zawng mi gentheite ahi-a, a hau, ukna neite in hotkhiatna sung a tun ding uh deihsakna lianpi a nei hi. Lai Siangtho sungah hauhna, liatna nei mi thupi tampi om hi. Tua bang mite in midangte tungah thupha a suak thei uh hi: Abraham, Isaac, Job, Solomon, le Joseph cihte in hauhna liatna nei hi-in midangte adingin thupha suak uh hi, cih kimu thei hi.

Tu kaalsungin i thusin ding thute in hauhna, liatna neite tungah Pasian mission nasepna thute i pulaak ding hi. Seventh-day Adventist pawlpi in hih bang mite tungah teci ahi dingin sapna ngah ihih i phawk tawntung ding kisam hi.

 

*December 2, Sabbath a ding kiginkholhna in tukaal lesson sim in.

 

SUNDAY                     November 26

Nebuchadnezzar

 

Seventh-day Adventist thu-um mi ihihna-ah “ciangtan omlo mawhmai-na” cihthu pawlpi in i pom hi. Hih in Khristian mi kimkhatte pulaak thu tawh kibanglo hi. Khristian sungah “mi khempeuh adingin Khrih in sihna hong thuak hi. Mi kim khat bek hilo-in mi khempeuh adingin hotkhiatna sung a tung dingin hongseh khin hi, ci uh hi. Banghang hiam cihleh Pasian in “mi khempeuh in hotkhiatna ngahin thuman thutak theihtelna ngah dingin hongdeih hi” (1 Tim. 2:4), Zeisu in amah le amah hong kipia-in “mawhmai-na i ngah nadingin eite ading bek thamlo-in leitung minam khempeuh mawhmai nadingin sihna a hong thuak hi (1 Johan 2:2). Tua hangin kuamah in Pasian a um kei zongin “Leitung pianma pekin Ama sungah teltuam ngah khin ihi hi (Efe. 1:4). Tua hangin Pasian hotkhiatna sungah i tungkim hi, ci uh hi.

 

Simin: Daniel 4. Kumpipa tungah bang piang hiam? Hih in vangliatna tawh kidim leitung ukna khat tungah hotkhiatna hong tunna thu bang honghilh hiam?

_____________________________________________________________________

 

Ukna nei vangliatna tawh kidim kumpite tungah hotkhiatna thu a tun theihna khat in Nebuchadnezzar tungtawnin kimu thei hi. Amah in a masa-in Pasian upna neilo hi. Pasian thukhenna a thuak kumpi khat hi. Ama thuak bangin Israel kumpite in zong a thuak uh hi (2 Khang. 32:25, 26; 1 Kum. 14:21–31; 1 Samuel 28). Lai Siangtho pulaak Nebuchadnezzar thu tawh kisai-in kumpipa in a thu theihna hong ngahkik ciangin Piangsak Pa Pasian theihtelna hong ngah hi. Hihin Pasian in cimawh dongtuak a gentheite a hehpih bangmah in leitung ukna, liatna neite tungah zong hehpihna nei ahihna kimu thei hi. Aneu 37 pulaak bangin leitungah kei sangin vanglianzaw kua om hiam? ci-in a pulaak bangin “Tu-in Kei, Nebuchadnezzar in vantung Kumpipa pahtawi-in Amin ka phat hi. A khut tawh na sepna khempeuh in thuman thutang hi. Kiphatsakna tawh a nungta mi in siatna sung tung ding hi” (Dan. 4:37). Hauhna, ukna nei khempeuh in hihthu theitelta uh hen.

Hih thupiang panin bang thu na mu thei hiam? Khatna-ah Pasian in thu-um mite’n Daniel bang mahin thu-umlo mite tawh kizopna nei dingin hongdeih hi. Nihna-ah Pasian in tua bangin thu-umlo hauhna liatna neite tawh kizopna-ah Amah mahin na hongsem thei ahihna i phawk ding kisam hi. Nebuchadnezzar in Pasian ukna nuai-ah a kiniamkhiat thei hi. Hihin a lamdang thupiang hong hilhnop thu in bangzahin hauhna liatna tawh a kidim mite zong Pasian in niamkhiat thei hi, cih honghilh hi.

Leitung ah hauhna, liatna nei ihih loh hangin, tua bangin kiphatsakna, kiliatsakna cihte sungah i om khak lohding kidop huai hilo hiam? Bang hangin tuabang lungsim in siatna sung hong tunpih thei ziau hiam?

 

Naaman

Khrih in mi khempeuh adingin sihna hongthuak hi; hauhna, liatna, minam, kampau bangmah deidanlo-in mi khempeuh adingin a nuntakna hongpia hi. Pasian in Khristian upna a nei nailo liatna, hauhna neite zong niallo-in amaute in zong hotkhiatna sung a lut nadingun nasem tawntung hi. Tua bang mite tungah i ngah khuavak i vapuak ding kisam hi. (Ellen G. White, The Acts of Apostles, p. 416).

Simin: 2 Kum.5:1–19. Topa kiangah mite tunpih ding tawh kisai bang thu mu thei i hiam?

 

2 Kum. 5:17–19 sungah Naaman thu kimu thei hi. Naaman in phaak natna pan damna a ngah khitciangin a pulaak ngeilo thu nih a pulaak kimu thei hi. Amasa-in a nungta Pasian a biak theih nadingin Naaman in Israel leitang lomkhat puakhia dingin Syria gamah ciahpih dingin ngen hi. Hih bangin Naaman in a pulaak hi: “Tua ahihleh kong thum hi, na nasempa tungah la-sakol nih puakkhop leitangh hongpia in. Banghang hiam cihleh tu a kipanin na nasempa in meihal biakna ahi a, biakpiakna ahi zongin pasian dangte khat peuhpeuh tungah pialo in Topa’ tung bekah piading hi.” (2 Kum. 5:17). Nihna-ah, kuamah in kumpipa a biak loh uh hangin Naaman in kumpi pa mai-ah kun dingin a ngen hi.

Tu-in Naaman in a nungta Pasian bia mi hongsuak hi. Tua bang hi napi-in, amah in dawi biakna sungah a nungtalai hi. Israel gam panin leitangh la-in, tua leitangh tungah biaknatau khat lamin Pasian bia ding cih a ngaihsutna in, a Piangsak Pasian theihtelna neilo ahihna kilangh hi. Leitung pasian tuamtuamte bangin a nungta Pasian in mun-le-mualte nuai-ah omin ciangtan nei hi, ci-in Naaman in a ngaihsun hi. A biak ngei pasian a upna le a nungta Pasian a theihna thu kihelh ziau hi. Naaman taangthu in tuhun adingin Khristian lo mite tungah Khrih thu pulaakzia ding honghilh hi. Naaman tangthu in i khuamuhzia, i ngaihsutnate kikhel thei ahihna hong musak hi.

Thumna-ah ama nget thu-in lungbuai-na a piangsak ngetna hi. Bang hangin Naaman in kumpipa mai-ah kun dingin ngen hiding hiam? Tua khitciangin Pasian kiangpan mawhmai-na ngen hiding hiam? Kamsangpa in hih bangin a dawngkik hi: “Lungnuamin pai in” (2 Kum.5:19). Syria gamah ukna nei mi khat ahih bang mahin, Naaman in amuh thak upna-ah to-na a ngah hi. Thu-um mi thakte adingin upna thu-ah kalsuanzia ding lamlahnate kimu thei hi, cihthu in a thupi mahmah khat hi. Pasian uplohna panin ngei-na tuamtuam panin kikheelin a nungta Pasian upna-ah kikheelna lianpi kimu thei hi, cih honghilh hi.

Naaman in a nungta Pasian bialo gam a-omlai-in phaak natna tawh kidimin om himah taleh, damna ngahin a nungta Piangsak Pasian nungzui mikhat hong suak thei hi. Hihbang upna sungah a kalsuanna-ah khangcing dingin kalsuan hong kipan thei suak hi. Hih bangin a nuntak nadingin hun kisam hi.

Khristian upna nei nailo mite in Khristian upna sung honglut uh ciangin thakhat thu-in nawh sep theih thu hilo hi, cih honghilh hilo hiam?

 

TUESDAY          November 28

Pilna Neite Tungah Teci Hihna: Nicodemus

 

Nicodemus pen pilnanei mipil khat hi. Lai Siangtho in amah pen Jewte tungah ukna nei mi khat hi, ci-in pulaak hi (Johan 3:1). Zeisu in Israelte tungah laihilhsia khat hi, ci hi (Johan 3:10). Amah in Lai Siangtho theihtelna nei-in Topa a lunggulh tawntung mipil khat hi. Mihing ngaihsutna-ah amah pen Pasian a zuizui mi khat hi. Thukham khempeuh a zui mipa hi. Tua manin Jewte lakah a kizahtak mahmah khat hongsuak hi. Amah pen ukna nei khat hi-in, huzaap lianpi a nei khat hi. Neih-le-lamh zong kicing takin a nei mihau khat hi. Jew mi tampi in amah pen Pasian thupha tampi a sang mipa hi, ci-in ciamteh uh hi. Tua bangin mite pi’muh milian mi thupi khat himah taleh, hihte khempeuh in puatham hoihna bek hi.

 

Simin: Johan 3:1–12. Hih in Nicodemus kitangsap thu bang pulaak hiam? Koi bangin Zeisu in a dawngkik hiam?

 

Nicodemus in Zeisu kiang zuanin hongpai ciangin, ama dinmun mah kheng in vapai veve hi. Ahi zongin Pasian in Nicodemus lungsim ngaihsutna a theikhin hi. Tua bang mahin Pasian in ahau, alian a kuama khempeuh i ngaihsutna mu-in thei hi. Nicodemus in Zeisu kiang vazuan in Zeisu thu hilhnate zong a sang thei pah hi. Ama kiphatsakna lungsim in Zeisu in Topa hi, ci-in kilangh tangin a pulaak ngam kei hi. Ahi zongin tua zanin Zeisu tawh a kimuhna panin a tawntungin a kikhel mi hongsuak hi. Zeisu in Pasian Tapa hi, ci-in a sankhit ciangin zong Zeisu Khrih nungzui mi khat ahihna kuamah a theisak nuam kei hi; a simthamin Nungzui mi khat a suak hi.

 

Simin: Johan 7:43–52 le Johan 19:39. Hihte in Nicodemus le Zeisu thu bang pulaak uh hiam?

________________________________________________________________

 

Hih thute in Nicodemus nunzia honghilh hi; Zeisu tawh a kimuh a kipan a nunzia hong kikhel hi, cih kimu thei hi. Zeisu nunna huu-in dal dingin a ngaihsun hi. Zeisu a sih ciangin zong a luang a zahtak mi khat hongsuak hi. Zeisu in Nicodemus khel hi, cih muanmawh nading omlo hi. Amah in theihna, pilna nei himah taleh Nicodemus in Honpa kisam ahihna kimu hi.

“Thuman i nei, i thei hi” ci-in, tua bang theihna in hotkhiatna sung hong tunpih lo ahihna, bang hangin tua bang ngaihsutna kidop huai hiam? Mi bangzahin theihna nei napi, vantungmi thumte thupuak theihna nei himah taleh a mang thangte lakah kihel ding hiam?

 

WEDNESDAY                     November 29

A Haute Tungah Mission Sepna

 

Simin: Matthai 19:16–22. Hih thupiang panin bang pilna thu kimu thei hiam? Nicodemus tawh kibanglo-in Zeisu a sang lote tawh bang kilamdanna kimu thei hiam?

________________________________________________________________

________________________________________________________________

 

Zeisu in ukna nei a hau tangvalpa tawh a kimuhna-ah hauhna in lauhuai mahmah ahihna kimu thei hi. Hih kammalte ngaihsun in: “Pasian ukna sungah mihau khat a lut ding sangin phimbil vang sungah kalaoh khat a lutding baihzaw lai hi,” a ci hi (Matt. 19:24). Hihin a haute in hotkhiatna sung tunglo ding uh hi, cihna hilo hi. Hauhna in hotkhiatna tawh hong kigamla sak thei hi, cih hong hilhna hizaw hi. Hauhna neih le lamhte in hotkhiatna nasepna-ah muibun takin nasem thei hi.

A tawpna-ah a haute le a zawngte tuah ding kibang hi. A silo ding kuamah a om kei hi. Tua hi-in a haute in a zawngte bang mahin hotkhiatna kisam uh hi. Sum in na tampi leithei himah taleh sih nading panin hong honkhia theilo hi. Sihna tawh kipelh theihna in Pasian hong piakkhong bek hi. Zeisu in hongpiak khong hi-in upna tawh i sang ding hi. ‘Tua ciangin Zeisu in, “Keimah in a sisa mite thosakin a hingsak theipa kahi hi. Kei hong um mi peuhmah a sih hangin nungta ding hi” (Johan 11:25).

 

Simin: Luka 19:1–10. A hau ukna nei tangvalpa tawh kibat lohna bang thu kimu thei hiam?

________________________________________________________________

________________________________________________________________

 

Zacchaeus in Zeisu a dawnkikna-ah a hau tangval sungah a kimulo thu khat hi. Zeisu in a hau tangvalpa tungah a sawl bangin Zacchaeus tungah a neihsateng zuakin mizawngte pia dingin sawllo hi. Zeisu in tua hauhna in a hau tangvalpa hencip ahihna thu a thei hi. Tua hangin a hau tangvalpa in a neihsate zuak ding sawlna a ngah hi. Zeisu in Zacchaeus inn ah bang thuteng gen hiding hiam, cih i thei kei zongin, Zacchaeus in a nuntakna khempeuh tawh Zeisu sang thei ahihna kimu thei hi. A hauhna in Zeisu tawh kizopna a khaktan kei hi.

“Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? A nuntakna bang tawh leikik thei nawn ding ahi hiam?” (Matt. 16:26). Hih thu in bang hong gen hiam?

 

Ukna Neite Tungah Mission Sepna

 

Zeisu in ukna neite tawh kilawmtatna a nei hi. Tua bang mi tampi in Zeisu zahtak mahmah uh hi. Tua zah khat mahin tua bang mi tampi mah in Zeisu a nial uh hi. Ukna neite Zeisu kiangah hongpaite tungah Zeisu in hehpihna nei-in amaute a lung himawh hi. A hau, ukna nei mi tampi in Zeisu a sangthei kei uh hi. Ahi zongin tuabang mite mah in Zeisu in Pasian Tapa hi, cih a santheih hun hong om veve ahihna kimu thei hi. Tua bangte lakah Nicodemus le Arimathea khua mi Joseph zong kihel uh hi.

 

Simin, Matthai 27:57–60 (Marka 15:43–47; Luka 23:50–53 le Johan 19:38–42). Topa in a hau tangval a zawh nadingin Zeisu in bangthu tawh thuzawh hiam?

________________________________________________________________

________________________________________________________________

 

Arimathea khua mi Joseph thu kipulaak laitakin a hau tangvalpa thu hong suak hi. Hih in genkholhna a tangtunna khat hongsuak hi. Pasian in Ama geelna a tangtun nadingin leitung mihaute zang hi, cih kimu thei hi. Tua ahih manin eite in zong mihau, ukna neite tungah hotkhiatna thu i vapuak ding kisam hi.

Ukna neite tawh kizop zawh ding cihthu in a hamsa thu khat hi. A tangpi-in ukna neite tawh kizopna pat vet loh zong a hoih zawkna khat om hi. Amaute-in nang kiang hong zuanzaw uh hen. Zeisu in zong tua bangin nasem hi. Amaute’n Zeisu thu teci pang mite hong suak thei uh hi. Amaute-in Zeisu in Pasian Tapa hi takpi hi, cih a sang thei uh hi.

Ukna neite in hotkhiatna nasepna-ah kihel nuamin lampi a kankan mi tampi om hi. Amaute’n mihingte nunzia kihelna-ah nahoih tampi a semnuam uh hi. Tua bangin amaute a kihel nuam uh hi. A kilangh tangin a pulaak loh uh hangin a haute le ukna neite in zong hotkhiatna kisam uh hi.

A thunihna-ah lungsim takpi tawh a haute kiangah hotkhiatna nasep theih nading Topa in lampi hong honsak ding hi. Na kiim na paam a mite kiangah hotkhiatna nasem dingin na hun zang in.

 

To-na: Na thungetna sungah a hau, ukna neite ading thunget sakna zong hel in. Thu-um nailo ahih uh le zong thu upna sung hong tun zawh nadingun hanciam in. Damdamin amaute in thuman thutak hong um thei ding uh hi.

 

To-na Bangin Kalsuanna: A hau ukna neite tungah laikhak gelh in. Na theih ngei loh ahih hangun amaute ading thu na ngetsakna zong amaute theisak in.

 

FRIDAY                                December 1

Ngaihsutbeh Ding: Ellen G. White, “Ministry to the Rich,” The Ministry of Healing, pp. 209–216; “Captive Maid Shows Concern for Naaman,” Reflecting Christ, p. 337 simin.

Zeisu in a hau, a zawng, a kuama ciat tungah a hong itna kibang hi. Amah in kumpipa adingin sihna hongthuak bang mahin a zawng penpen adingin zong hong si hi. Zeisu in mihingte lungsim ngaihsutna khempeuh hongmu hongthei hi. Hih bangin hong vauhilh khol hi: ‘Pasian’ ukna sungah mihau khat a lutding sangin phimbil vang sungah kalaoh khat a lut ding baihzaw lai hi,” a ci hi (Marka 10:25). A hau, ukna neite tungah Zeisu Khrih hong hotkhiatna thu tawh i vaphak ding sapna ngahciat ihi hi. Midangte bang mahin amaute in zong hotkhiatna kisam uh hi. Neih-le-lamhte in hotkhiatna sung hong tunpih theilo hi; Khrih sungah khamuanna hong ngahsak theilo hi, cihthu i tel mahmah ding kisam hi.

“Nektawm zong mite tungah masuan tampi i neih bang mahin neih le lamh hauhna tawh a kidimte tungah zong a neuzaw tuanlo masuan i nei ciat hi. Mi tampi in tua bang mite lamet bei bangin ngaihsun uh hi. Neih-le-lamh a hau mi tul tampi in vauhilh kholhna zalo-in hanmual tung uh hi. Vantung thute lunglutlo bangin nungta uh himah taleh hauhna liatna neite tungah hotkhiatna thu i vapuak ding kisam mahmah hi.” Ellen G. White, The Ministry of Healing, p. 210.

 

Kikupding Dotnate:

 

1.    Zeisu in a hau le a zawng kideidan nate a hemkhia hi. Tua banah tua bang mite tungah hotkhiatna na hongsem hi. Koi bangin Adventist pawlpi in hihthu pulaak i hiam? I kiim i paamah a hau a zawng kideidanna mu i hiam?

2.   Zeisu in hih bangin a pulaak hi: ‘Lingbulsum omna leilakah a tu khaicite pen Pasian’ thu zanapi-in amau nuntakna sung uhah leitung lung hihmawhna le hauh nopnate in Pasian’ thu vuknelh ahih manin bangmah a suakkhia zo lote a cihnopna ahi hi” (Matt. 13:22). “Hauhna hong khemna” cihthu koi bangin na tel hiam? Bang hangin hauhna hong khemna sung hi tun khak lohding thupi hiam?

3.   Thursday ni-a dotna na, Thuman theihna le thuman thutak in hotkhiatna sung hong tunpih hi, cihthu kibanglo ahihna na lawmte tawh kikum in. Bang hangin tua bangin a kilamdanna in thupi hiam? Thuman theihna in hong honkhia theilo ahihleh thuman theihna in khiatna nei nawn ding hiam?

4.  Bang hangin a hau tangvalpa in Zeisu nial napi-in Zacchaeus in Zeisu sang thei hiding hiam?