LESSON 8 *November 18 – 24
Tasamte
Tungah Mission Sepna
SABBATH NITAAK
Tu Kaalsung Simding: Luka 5:17–26, Johan 5:1–9, Thkna. 10:19, Siam. 23:22, Matt. 25:34–40, Johan 15:13.
Kamngah: “Tua
ciangin Kumpipa in amaute kiangah, ‘Note kiangah kong genin-ah: Hih ka
sanggamte a neupen khat nangawn na limbawl uh ciangin kei tungah a hongbawl na
hi uh hi,’ ci-in a dawng ding hi.” (Matthai 25:40)
Luke
5:17–26 sung a thute in Pasian in kisapna neite a honghuhzia
honghilh hi. Khat veivei ciangin Pasian in a honghuhna-ah midangte zangin Ama
huhna hongpai hi. Hih bangin midangte huhding thupiak in hamsa i sa kha thei
hi. Ahi zongin tua bangin mi huhnate in hamphatna lianpi hongtun hi. Huhna
kisamte i huhna tungtawnin Khrih nasepna sungah a kihel mi i suak thei hi. Khat
veivei ciangin huhna kisamte huhding hi, ci-in pulaakna in hamsalo hi; khat
veivei ciangin i pulaak bangin gamtat ding hamsa zel hi. Khat veivei ciangin
kua in huhna kisam hiam, ci-in i theih ding hamsa hi. Bangbang dinmun hitaleh
eite in huhna kisam mite a huh dingin sapna ngah ihi hi; bangbang dinmun ahi
zongin huhna kisam ahihnak leh i huh ding ahi hi.
Lai
Siangtho in khual mite paisanlo-a i huhding hong hanthawn hi. Tua bangin i huhna
tungtawnin amaute in i pulaak thute mu thei-in Zeisu sungah hotkhiatna ngahna
lampi hongsuak thei hi.
Tu
kaalsung i lesson thulu om bang mahin “Kitangsamte tungah Mission Sepna” Pasian
in huhna kisam mi khempeuh tungah thupha hongpiakna kimu thei hi. Mihingte
kitangsapnate pumpi taksa kisapna, lungsim kisapna, sum le paai kisapna, khat
le khat kizopna-ah kisapna, nawlkhin thuak kisa-in a om mite tungah i huh theih
bangbangin i huhding kisam hi. Bangbang kisapna hitaleh a huh thei dingin
kigingkhol tawntung ding kisam hi. Hih in Khristian thu zuihna-a a-bulpi khat
hi; i mission sepding zong hih thu mah kihel hi.
SUNDAY November 19
A Lawmte Upna
Gospel
Bute sungah a vanglian mahmah thukhat kipulaak hi. Huhna kisam mi khat ii lawm
le gual kimkhat in damna ngah ding lametna tawh Zeisu kiangah vapaipih uh hi.
Hih thupiang in huhna kisamte huhna in hamsa mahmah khat himah taleh honghilh
thute in i nuntakpih ding thu manpha ahi hi.
Simin: Luke
5:17–26 (Matt. 9:1–8, Marka 2:3–12). Hih thupiang in mission le mission
nasepzia ding honghilh hilo hiam?
_____________________________________________________________________
Zeisu
kiangah hong paipihna tungtawnin tua mite in a lawmpa kitangsapna a huh thei uh
hi. Hih thupiang bang mahin huhna kisamte i huh ding Pasian in eite zong
hongsam hi. Huhna kisam mi khatpeuh Zeisu kiang i va tunpih thei hi. Hih bangin
sepna-ah upna, sepna, lungduai-na le sepnopna lungsim kisam hi; mun
khatkhatte-ah mihing in piangthei kenteh a kici phial zongin i huh veve ding
kisap hun omthei hi. Amaute in huhna kisam a lawmpa uh nuam takin Zeisu kiangah
hong paipih theilo uh hi. Ahi zongin amaute in lungkialo uh hi. Tua hi-in huhna
kisam a lawmpa uh Zeisu kiangah a tunpih theih nading lampi khat hongzong tawm
uh hi. Inn tung zangah kahto-in Zeisu mailian ah a lawmpa uh khiasuak uh hi.
Luka pulaak bangin Zeisu in amaute gamtatna bangmah mawhsakna kampau lo hi (Luka
5:20).
Zeisu
in tua huhna kisam a lawmpa uh Ama kiang hong tunpih ding uh a deih hi. Lai
Siangtho honghilh bangin Zeisu in Zatote damna Mangpi Pa hi-in, Amah in mawhna
maisak nuamin gimna thuakte tawldamna pia nuam hi.
Ellen
G. White in cimawhte huh dingin hongto hi. “Na sepding hong kigen dong ngakin om kei in. Na mit
vaksakin na kiim na paam-a om huhna kisamte huh in. Cimawh dongtuakte, a
kinengniamte huh in. Amaute mai panin kihemkhia kei in. Amaute kisapnate a mulo
kineih kei in. James pulaak bangin biakna mantak a neite bang mahin angsung
zonglo-in, mawhna siatnate pelhin a nungta mite bangin nungta ding hilo na
hiam? Hotkhiatna
nasepna khempeuhah a kihel a lunghimawhte na huh theih bangin na huh ding hi.” Testimonies
for the Church, vol. 2, p. 29.
Zeisu
mahmah in cimawhte huh hi. Amah bangin eite’n zong cimawhte i huh ding kisam
hi. Amasa-in amaute lawmte i hi masa ding hi; tua hileh amaute kisapnate i
theithei ding hi. A tawpna-ah Zeisu kiangah i tunpih thei ding hi. Zeisu in
amaute kisapna khempeuh a huh thei, a pia Pa hi. Tua mite in a lawmpa kisapna a
huh uh hi; tua bang mahin eite in zong huhna kisam mite i huh ding ahi hi.
Hotkhiatna hongpia thei Zeisu kiangah amaute i tunpih ding kisam hi.
Na
kimnai-ah huhna kisam mi a om hiam? Tua bang mite adingin bang na sem thei
hiam?
MONDAY November
20
Khrih Nasepzia Bek
Anuai-a thute
in bang hong hilh uh hiam? Huhna kisamte tungah nasepzia ding bang hong hilh uh
hiam?
Johan 5:1–9 _________________________________________________________
Marka 1:23–28 _______________________________________________________
Ellen
G. White in Zeisu nasepzia dawl (5) bangin honghilh hi. “Khrih sepzia bekin
hotkhiatna nasepna-ah zawhna hong ngahsak ding hi. Honpa in mihingte lakah hong
teengin mihingte hoih nading bek a lunggulh hi. Amah in lainatna nei-in amaute
kisapnate huhin mihingte muanna a ngah thei hi. Tua khitciangin Ama nungzui
dingin a sam hi. “Amaute kisapnate a huh khitciangin “Ka nung hongzui-in” ci-in
a sam hi.” The Ministry of Healing, p. 143.
Amasa-in
cimawhte
tawh kikholhna, kilawmtatna kisam hi. Amau tawh kituahna tungtawnin amaute
kisapnate i theithei ding hi. Amaute hoih nadingin i huh i panpih thei zawding
hi. Bual gei-a pumzaw mipa tunga Zeisu sepna ngaihsun in. Zeisu in tua munah
vatung hi. Mihonpite lakah cinate, mittawte, khebaite le pumzaw tampi a om uh
hi” (Johan 5:3).
Nihna-ah lainatna
i neihding kisam hi. Lainatna neihding pen hamsa mah mah thei hi. Banghang hiam
cihleh khat-le-khat kimuanlahna in hongdal hi. Khat veivei ciangin mi kim’khat
in hehpihna nei napi, a khuanungah mite muanna a ngah khit uh ciangin a bawlsia
mawk uh hi. Bangbang ahi zongin ngahkik ding bangmah lametna neilo-in cimawhte
dongtuakte i huh ding kisam hi.
Thumna-ah amaute
kisapnate tungtawnin mission nasep i semding hi. Hih bangin nasepna-ah kampau bek thamlo-in gamtatna kihel
hi. Mi
khual’ khat ahi a, i lawm i gualte khat ahi zongin huhna kisam mi khat i huh i
panpih ding kisam hi. Zeisu in pumzaw mipa a hopih hi. Bang kisam na hiam,
ci-in dongh a, tua khitciangin a damsak hi. “Dawivei mipa” a damsakna-ah Zeisu
in dawi veipa sep zawhloh khempeuh a huh a panpihna kimu hi.
Lina-ah amaute
muanna i ngah ding kisam hi. Midangte i huh ciangin, amaute kisapnate i huh
ciangin amaute muanna i ngah thei hi. I gen thute hong ngai thei uh a, Zeisu
thu i gen bangbang hong um thei ding uh hi. Tua bangin amaute kisapnate i huh
ciangin a lungsim kongkhak hong kihong ding a, Zeisu thute hongsang thei uh hi.
Zeisu in pumpi taksa damna ngah ding bek thamlo-in amaute in tawntung nunna a
ngah ding uh deihna tawh cimawh dongtuakte a huh a panpih hi (Johan 10:10).
A
nunung penah Zeisu kiang i tunpih ding ksam hi. Hihin ahuh mi tungpan upna a
kisap bang mahin huhna ngah mi in zong a up ding kisam hi.
Zeisu bawl na lamdangte eite in i bawl thei kei hi. Ahi
zongin huhna kisamte i huh thei hilo hiam?
TUESDAY November
21
Gambeelte le Peemtate
Gambeelte
le peemtate tawh kisai kitot kiselna tampi piang ngei khin hi. Banghang hiam
cihleh tuhunin tua bang mite hong khang semsem hi. Tualgal ahi-a, gam sung
buai-na tuamtuam (Tuiciin tung, zinlinnna) te hangin a nuamzaw gam kizuan ciat
hi. Tua bang dongtuak mi tulza tampi om
hi. Hih mite in huhna kisam mahmah uh hi.
Matthai
2:13, 14 sungah Zeisu in gambeel khatin om hi. A pa Joseph le a nu
Mary in Bethlehem panin taikhia dingin sawlna a ngah uh hi. Tua hi-a amaute in
zan khuamial sungin Egypt gamah Herod gitlohna pan kihemkhia-in a-om uh hi. Lai
Siangtho in Egypt gama a thuak uh gimnate bangmah pulaakna neilo hi. Tuhun
bangmahin hamsa mahmah ding ahihlam i ngaihsun thei hi. Tulai gambeelte
bangmahin gimna a thuak uh hi. Zeisu-te’ innkuan in gamdang mun khatah tua
bangin gambeelin a omna uhah gimna lianpi a thuak uh hi. Tuhunin zong Muslim,
Buddhist, Hindus, Christians mi tampi in gambeelin om uh a, hamsatna lianpi
tawh a nungta uh hi.
A tangpi-in kampau kibatpihte ngei-na kibatte tawh
kikholh ol hi. Banghang hiam cihleh kibatna tampi omkhin hi. Khangualte tawh
zong kikholh hamsalo hi. Banghang hiam cihleh kibatpih omkhin hi. Ahi zongin ei
tawh kibanglo, kampau ngei-na kibatpih lohte tawh kikholhna hamsa hi. Banghang
hiam cihleh kibatna tawm bek om hi. Kampau, ngei-na biakna kibanglo ahih manin
kibatna tawm hi. Annek tuidawn a kipan kibatpih tam hetlo hi.
Ahi zongin gospel in tua bangin namdangte tawh kizopna nei dingin hongsawl hi.
Eima nopsaknate paisan in kampau ngei-na biakna kibatpih lohte kiangah
hothiatna thu vapuak dingin sawlna ngah ihi hi.
Simin: Thkna.10:19,
Late 146:9, Rom 12:13 le Siam. 23:22. I phawk ding bang thu guipi pulaak ciat
uh hiam?
_____________________________________________________________________
Koi
bangin gambeelte le peemtate tungah hotkhiatna thu pulaak thei ding i hiam? Gam
khatkhatte-ah hotkhiatna thugen ding hamsa mahmah hi. Banghang hiam cihleh gam
sung ki-ukna in tua bang thugen ding phallo hi. Tuabang gam a a teengte tawh
kizopna neihkhak ding zong a hamsa mahmah thukhat hongsuak hi. Tua himah taleh
i hih thei bangbang, hun i ngah bangbang tawh kizui-in i hih bangbang i hih
ding kisam hi.
Tua
bangin na huh theih nadingin thungetna tawh kipan in. Tua khitciangin amau tawh
kisai theihhuai thute kankhia in. Mun tampi-ah tua bangin gambeelte le peemtate
a huh kipawlna lianpipi om hi. Tua bang mite a huh kipawlna khat peuhpeuh ahih
keileh, na pawlpi sunga Sabbath School in tua bang mite huh dingin nasep kipan
thei ahihna phawk in. Sum mal-in a tam loh hangin gambeel le peemtate in thei
ciat uh hen.
WEDNESDAY November
22
“A Na Thuakte Huhna”
Eite lakah leitung hamsatnate a thuak kha ngeilo kua om
hiam? Hauhna le nopsakna tawh a nungta gamte-ah zong gentheihna gimna natna
satna a thuak khalo kuama omlo hi. Mihingte in gimna nam khat peuhpeuh tawh i
nungta hi. Nuntak khuasak nadingin hanciam kul a, gimna hamsatnate i kantan
ding kisam hi. Gentehna-in i muh theih thu khat in zan ihmu theihlohna
hangin zatui tawh a ihmu theite a kipan leitung nopsak theih nadingin
sum-le-paai kizeek kizanghte ngaihsun in. Tua bangin sum-le-paai,
neih-le-lamte in lungnop khamuanna hong pia theilo hi.
“Kha
Siangtho in ka tungah hongtung hi; banghang hiam cihleh Amah in mizawngte
tungah lungdamna thupuak dingin sathau hong kinilhkhin hi. Lungsim kitamzante a damsak dingin kei hong kisawl khin
hi. Koltangte’n suahtakna a ngahding uh le mittawte in khuamuhna a ngah
nadingun suahtakna thu a pulaak dingin sawlna ka ngah khin hi (Luka 4:18).
Hihin
Zeisu sepna hong hilh hi. Tua bang mahin eite in zong a sem dingin hongdeih hi.
I kiim i paamah a om huhna kisamte i huhding hongdeih hi.
Huhna kisam mi khempeuh ahuh dingin Pasian in hongsam hi.
Tua
bang mite in bang hun ciangin Zeisu sangding hiam, cih i theihloh hangin, amaute
kisapnate a huh dingin hong kisawl hi. Mission sepna bulpi in tua bang mite in
Zeisu amuh nading uh himah taleh huhna kisamte i huh ding ahi hi. Banghang hiam
cihleh amaute in huhna kisam uh hi. Huhna kisamte i huh thei hi. Banghang hiam
cihleh eite in Zeisu pen i Topa-in i sang hi. Ama hongsawl khempeuh i sem zo
ding hi.
Huhna
kisamte huhna-ah eite etteh dingin Zeisu nasepna hi. Zeisu huh mi in Amah a
sang hiam a nial hiam cihthu bangmah i theikei hi. Huhding kisamte i huhna-ah,
amaute kisapnate zong i theih ding kisam hi. Mun tuamtuam ah ngei-na tuamtuam
kinei ciat a, munkhat le munkhat tatzia zong kibanglo hi. India gamah mi khat
in lengla khatpeuh a neih uh ciangin nek theih dawn theih khat peuhpeuh pia uh
hi. A dah a kap mi khat hehnep ding sangin i theih ngeiloh mi khat sumtang tawh
huh ding baihzaw kha thei ding hi. Tua bangin na lawmte khat kitangsap in
sum-le-paai sangin kisapna hikha thei hi. Tua bangin lainatna tawh na huhna
khatpeuh in supna lianpi a tuak kha mite in noptuamna tampi ngah thei uh hi.
Zeisu
in midangte a huhna-ah amaute tungah angsung khual lo-in a huh hi. Hih in a
thupi mahmah thu khat hongsuak hi. Huhna i piakma-in amaute kisap lianbel in
bang hiam cih i theih ding kisam hi. Amaute kisapnate i huh theih ding bek
thamlo-in amaute in Zeisu nungzui uh hiam? hilo hiam cih thu zong i thei kei
hi.
Simin: Matthai
25:34–40. Eite ading bang thupuak kigelh hiam?
THURSDAY November
23
A Lianzaw Itna
I
theihsa bangmahin kisapnate bei ngeilo ding hi. Midang khat na huh nop ciangin
huh theih nading lampi na mu thuahthuah ding hi. Na lawmte ahi a, gambeel mi
ahi zongin huhna kisamte i huh theih bangbang tawh i huh i panpih ding kisam
hi. Zeisu in a nasepna khempeuh ah cimawh dongtuakte a huh a panpih tawntung
hi. Mun khatkhatte-ah Zeisu in vahuh masa zaw hi; cimawh dongtuakte kiangah
vapai-in amaute kisapna ahuh hi; mun khatkhat ah huhna kisamte in Zeisu kiangah
vazuan uh hi. Pumzaw mipa in inntung
khum panin Zeisu mai-ah va tung thei hi. A lawmte hanciamna tawh tua
bang huhna a ngah thei hi.
A lawmte adingin
a nuntakna a piakhia itna sangin a lianzaw itna omding hiam? (Johan 15:13). Koi
bangin hihthu in midangte huhzia ding honghilh hiam?
_____________________________________________________________________
Missionary
a sem innkuan khat in Trinidad le Tobago gamah kum 6 sung nasemin om uh hi. Kum
thum sung Hindu le Muslim lakah teeng uh hi. Hindu thu-um mi tampi in Khristian
upna thu sangnuamlo uh hi. Lungdam koh biakpiak na kikhopna-ah sapna ngah uh
hitaleh kuamah va kikhawm nuamlo uh hi. Ni khat Khristian thu-um mi kimkhat in
hih bangin Lungdam kohna kikhopna-ah Hindu a lawmte khat kikhawm dingin va zawn
hi. Zeisu ettehin tua bangin kalsuan uh hi. A lawmte kiangah va hawhin tua
bangin kikhopna munte-ah zong kikhawm dingin va zawn zelzel hi. Hinduism
upna-ah tua bangin zin-le-leeng neihna in thupha ngahna khat hi, ci-in pom uh
hi.
Tu
kaalsung thusinna tungtawnin huhna kisam mi khatpeuh huh ciat dingin i
kihanthawn hi. Amasa-in tua bangte thu kantel masa in. A teenna khua, amau
kiim-le-paam thute kantel in. Na kiim na paamah gambeel galtai a om hiam? Na
veeng na paam ateeng mite na thei hiam? Amaute na theitel hiam? Bangbang dinmun
ah na om zongin na theih ngeiloh mi khat tawh kitheih ding pen hamsa mahmah hi.
Topa tungah thungen inla, Ama huhna na ngen ding hi. Topa
Pasian in mimal khempeuh hong theitel hi. I theih ngeiloh khual mite tawh
kilawmtat theih nading lampite zong Amah in a thei hi. Kilawm tatna nei-in, tua
khitciangin Topa kiangah tunpih ding cih phawk in.
To-na: Na
teenna khua sungah khualmi ahi-a, Khristian hilo mite thu kantel in. Hih bang
thute kician takin na kannopleh Joshuaprojects.org ah ki-en thei hi.
To-na Bangin Kalsuanna: Huzaap
na neih theih mi khat tel in. Ama adingin thungetna kipan in. Hih anuai-a
dotnate na dawnna zui-in thunget kipan in.
● Hih mipa/minu in ka lawm hiam? Zeisu ettehin kilawmtatna
na ka nei hiam?
● Ama nunzia ka theitel hiam?
● Koi bangin damna ngah dingin Zeisu kiang ka tunpih thei
ding hiam?
FRIDAY November
24
Ngaihsutbeh Ding: Arthur
White, “A Few Days at Long Point,” Ellen G. White: The Australian
Years: 1891–1900, vol. 4, pp, 100–104 sim in.
Gospel
Bu gelhte in namdangte tawh kizopzia ding Ama nunzia mahmah tawh honghilh hi.
Zeisu in tua bangin kizopna a neihna-ah amaute in hotkhiatna sung a tun nading
uh ngimna lianpi nei hi (Matt. 8:28–34, Marka 5:1–20). Tua bang mahin eite in zong nasem dingin sapna ngah ihi
hi. Midangte tawh kilawmtatna nei dingin sawlna i ngah hi. Khrih sihna in mi
khempeuhte ading hi-in, kuamah deidan omlo, mi khempeuhte adingin sihna a
hongthuak hi. Hihthu i mangngilh khak lohding kisam mahmah hi. “Tua Zeisu
hangin eite’ mawhna hong kimaisak a, eite a’ding bek hilo-in leitung mi
khempeuh’ mawhna zong a mai nading ahi hi.” (1 Johan 2:2).
“Mihingte in Pasian geelna le ngimna bangin a tangtungsak
zo kei uh hi. Innkuan sungah khat-le-khat ki-itna om himah taleh amaute huh thei
ding mite, huhna kisamte a hemkhia khazel uh hi.” “Topa in midangte tungah
thuhoih bawl ding hongsawl ciangin, ei innkuan khat-le-khat kizopna kisia ding,
innkuan sungah siatna hongtung ding hilo hi. Innkuan pihte, meltheih sanggam
u-le-naute tungah itna khiam ding hongsawl hilo hi. Banghang hiam cihleh
innkuan sung bek thamlo-in midangte tungah lainatna nei ding hongdeih hi. Innkuan
sung bekah itna omding hilo hi. Pasian hongpiak thuphate midangte tungah zong a
hawmsawn dingin hongdeih hi. Tua bangin innkuan sung, meltheih sanggam
u-le-naute bek thamlo-in midangte tungah zong thupha bawlin itna, lainatna i
neih ciangin vantung thupha i sang zaw semsem ding hi.” Ellen G. White, The
Advent Review and Sabbath Herald, Oct. 15, 1895. I tungah hong kisuan mabante
in ei nopsaknate nusia-in midangte tungah thupha a suah ding kisam hi. Tua bang
masuanna in midang khat peuh ahih keileh huhna kisam a cimawh a dongtuak mi
zong hithei hi. Zeisu Khrih hongpiak tua masuan awlmawhloh theih loh thu ahi hi
(Sawl. 1:8, Marka 11:17).
Kikupding Dotnate:
1. Na khenlah na nopsakna in bang hiam? Bang
hangin tua bang nopsaknate nusiat ding kisam hiam?
2. Zeisu
in “Anhai pa, zu kham pa, mawhneite tawh kikhawl pa, ci-in kosiatna a
thuahna-ah bang khiatna nei hiam?” (Matt. 11:19)? Tua bangin kosiatna a thuak
ciangin Zeisu in bangci dawn hiam? Tua in mission thu bang hong hilh hiam?
3. Khristian
khat in thu-umlo mite tawh bangci ciang kizopna nei thei hiam? Koi bangin
Khristian khat in Lai Siangtho thuman panin lampial lo-in thu-um lote tawh
kizopna nei thei ding hiam?
