LESSON 7 *November 11 – 17 Ka Veengte Kiang Mission Sepna

 LESSON 7        *November 11 – 17

Ka Veengte Kiang Mission Sepna

 

SABBATH NITAAK

 

Tu Kaalsung Simding: Luka 10:25–37; 2 Tim. 3:16; James 2:17–22; Matt. 22:37–40; Gal.5:14; Micah 6:6–8.

 

Kamngah: Amah in, “Na Topa Pasian na lungsim khempeuh, na nuntakna khempeuh, na hatna khempeuh, le na pilna khempeuh tawh na it inla, nangmah na ki-it bangin na veengte na it in,” ci-in kigelh hi, ci-in a dawng hi. (Luka 10:27)

 

Na nuntakna khempeuh, na thahatna khempeuh, na pilna khempeuh tawh na Topa Pasian na it ding hi,” cih thupiak i thei hi (Luke 10:27). Tua hi-a kambek tawh Pasian a itte in Ama sawl mang nuam lo uh hi. Pasian a it taktak mite in a nuntakna-ah tua itna a kilanghsak uh hi. Pasian i it takpi le Ama hong sawlna khempeuh i mang nuam hi; i lungsim, i ngaihsutna, i hatna, i pumpi le i nuntakna khempeuh tawh Topa Pasian i it’ ding kisam hi. Mi khatpeuh in “Pasian ka it hi,” ci-in a pulaak hangin Ama thupiakte a manglo mite in itna taktak a neilo mi ahi hi.

Tua hi-in Pasian i itna in hoih hi; thupi hi. Amah it ding hongdeih bek tham lo-in midangte zong i it ding hongdeih hi. Pasian i itna in midangte zong itna hong neisak hi. Johan 4:20 pulaak bangin “Pasian ka it hi, ci napi, a sanggam khat a mudah mi in thuman a gen kei hi.” Amuh theih a sanggampa it keileh, a kimu theilo Pasian bangci-in it thei ding hiam?” Paul in a pulaak bangin Galati 5:14 sungah Thukham khempeuh a kicinna in kammal khat hi: Nang le nang na ki-it bangin midangte zong na it in.”

Tukaalsung i sin ding thu in bangci bangin Pasian itna nei-in midangte zong it ding i hiam, cih thu i kikum ding hi.

 

SUNDAY                     November 2

Dotna Khempeuh Tungah Dotna

 

Kua i hiam? Bang hangin nungta i hiam? I sih ciangin bang suak ding i hiam? Tawntung sihna maw, tawntung nunna sung tung ding i hiam? Hih thute in lampi tuamtuam tawh kidawn thei a, a thupi bel in a si thei mihingte in i nuntakna mitphiat kalin bei thei ahihlam phawk in (Kepte le ak cihte in si ding ahihlam uh theithei lo uh hi). Tua hi-a Luka sunga kigelh bangin Zeisu kiangah mi khat hong pai-in dotna khempeuh lakah a thupi pen dotna khat a nei hi.

 

Simin: Luka 10:25. Thukham hilhsia pa in bang dotna nei hiam? Bang hangin dong hiding hiam?

_____________________________________________________________________

 

Hih dotna in bangzahin thupi hiam, cih ngaihsun in. Lai Siangtho honghilh bangin kician takin tua mipa in Zeisu sittel dingin a kiangah vapai hi. Khat veivei ciangin mi kimkhat in uplahna, muanlahna tawh Lai Siangtho thute hong dongh kha thei uh hi; tua bang ciangin amaute dotnate i thupi simsak kholkei hi. Tua bang mite nusiat theih omlo-in amaute tungah hotkhiatna thuman thutak i gen veve ding hi. Zeisu in thukham hilh siapa tungah Ama thuman a pulaak hi; thukham hilh siapa thu dotna in a lungsim takpi, theihlohna tawh a dot ahihlohna Zeisu in thei himah taleh, thuman a hilh veve hi. Thukham hilhsiapa ngaihsutna in thuman hilo hi mah taleh, tua bangin Zeisu a dot ciangin thukham hilhsiapa le tua dotna a za mipite lungsim kikhel ding deihna tawh Zeisu in thu a dongh hi. Thukham hilh siapa lungsim ngaihsutna khempeuh theikhin himah taleh Zeisu in amah a nial kei hi; thusim lohna zong a nei kei hi.

A tawpkhakna-ah hih dotna sangin a thupi zaw dotna bang om nawn ding hiam? Tawntung nunna ka luah nadingin bang semding kahi hiam? Bang bang biakna i pia zongin tuate khempeuh khit ciangin i dot ding a thupi mahmah dotna hong suak hi. Hih dotna tawh kibanglo thu in tuikhu bangin tawmvei sungin a mangthang thei i nuntakna-ah (James 4:14). Tawntung nunna simloh bangin thupi ding hiam? Bangci bangin tawntung nunna luah thei ding ka hiam, ci-in dotna simloh a thupi zaw dang bang om nawn ahiam?

 

Simin: 1 Kor. 15:30–32. Hih thu-ah Paul in tawntung nunna a thupi-na bang pulaak hiam?

_____________________________________________________________________

 

Thukham hilh siapa in thu upna neilo himah taleh Zeisu in ahih theihzahin thukham hilh siapa kikhel nadingin lampi a zong hi; a mangthang ding thukham hilh siapa nuntakna pamaih sa hi.

Deihhuailo dinmun hiphial taleh koi bangin a mangthang ding mite tungah hotkhiatna teci pulaak thei ding i hiam? Tua bang hun manpha khahsuah khak loh ding thupi hilo hiam?

 

MONDAY                   November 13

Zeisu Sepzia le A Dawnkikzia

 

Thukham hilhsiapa in Zeisu sittel dingin hongpai hi, ci-in Lai Siangtho in pulaak hi. Ahi zongin Zeisu in ama lungsim tawng a om thute a theikhol khin hi. A taktakin Pasian in i lungsim ngaihsutna sangin i gamtatna hong en zaw hi. Midangte lungsim ngaihsutna i thei khiazo kei hi.

Khat veivei ciangin midangte’n i thu upna hong dongthei zel uh hi. Gentehna-in i lawmte Muslim khat in i thu upna thu hongdong uh hileh “Lai Siangtho bang munah Zeisu in Pasian kahi hi, ci-in pulaak hiam, ci-in hongdong thei hi. Ahih keileh “Pa, Tapa le Kha Siangtho pumkhat i upna sungah, bang hangin Pasian khatbek om hi, ci thei i hiam? Hih dotnate in a dothuai thu, kinial kiselna a piangsak thei dotnate himahleh tua bangin hong dongh mi khat peuh in Zeisu theih nopna lungsim takpi tawh hongdong zong hithei veve hi. Tua hong dongte lungsim ngaihsutna theilo, zong theih a kisam hilo hi. Tuahi-a i hih theihzah sitlo-in amaute in hotkhiatna thu amuh zawh nadingun i hilh i pulaak ding kisam hi.

Simin, Matthai 26:56; Sawl. 17:11; 1Kor. 15:3 le 2 Tim. 3:16. Bangci bangin hihte in, Luka 10:26 sung a kigelh thukham hilhsiapa dotna Zeisu in a dawnkikna hong hilh hiam? Luka 10:26?

Tua bangin i thu upnate hong dongte tungah i dawnkik nop hangin i dawnkik dan ding i theih khakloh hun zong kituakkha thei hi. Zeisu in hih bangin gen hi: “Thukham sungah bang kigelh hiam? Koi bangin na sim hiam? (Luka 10:26), ci-in a dawngkik hi. Zeisu in mihingte nuntakna-ah a thupi bel a pulaak hi. Midangte gen thute ngaih ding sangin Pasian hong hopihna Ama Kammal (Lai Siangtho) i simding kisamzaw hi. Lai Siangtho ah mihingte dotna khempeuh a dawnna kimu thei hi. Kha Siangtho in i sungah na hongsep ciangin i gending thute i sepding thute i theithei ding hi.

Pasian in a Kammal hongpia khin hi. Tua hi-in thuman i theih nop khempeuh Lai Siangtho in honghilh hi. Nuntak khuasakzia ding a kipan mi tawh kizopzia ding a kipan tawntung nunna i luah theihzia dingte honghilh khin hi. Honghilh ding laihilhsia kisam mah hi; Pasian nasemte in honghilh ding uh kisam mah hi. Ahi zongin a tawpna-ah ei mahmah in thuman thutak i zon ding kisam hi. “Na Kammal in ka pai-na lampi-ah meivek hi-a, ka lampi-ah hong vaksak hi” (Late 119:105). Hih Late 119:105 in lakam bek thamlo-in Pasian kiangpan hongpai thu hi. Hihthu Pasian Kammal honglak hi; thu-um mite nuntakna-ah a thupi mahmah lamlahna hong suak hi.

Zeisu in, Pasian in mi hong suahna hi; Amah in Pasian Kammal hi. Zeisu in Lai Siangtho kimakaih sakin hong nungta hi. Hih thu in Lai Siangtho a thupi-na honghilh hilo hiam? Bang hangin leitung pilna, mihingte ngaihsutnate i nial ding kisam hiam? Lai Siangtho muanna a kiamsak thei ngaihsutnate le Lai Siangtho thuthuk kante pulaak thute i nial ding kisam hilo hiam?

 

 

TUESDAY                             November 14

Tawntung Nunna Luah Nading

 

Simin: Luka 10:27, 28. Thukham hilhpa dotna in ama dotna dawnna bang pulaak hiam?

_____________________________________________________________________

_____________________________________________________________________

 

Thukham hilhsiapa in Zeisu a thudotna-ah amah mah in a dawnkikna a pulaak hi. “Na Topa Pasian na lungsim khempeuh tawh na itding hi, Nang na ki-it bangin midangte zong na it kikding hi” (Luka 10:27).

Zeisu in tua dotna bangci dawnkik hiam? Zeisu in hih bangin a dawngkik hi: “Nang mahin mantakin na dawng hi” (Luka 10:28). Thukham hilhsiapa in kalkhat suanbeh dingin Zeisu in hih bangin a pulaak hi: “Hih bangin sem lecin na nungta ding hi” (Luka 10:28).

Thu-um mi a tamzawte in thu upna, thu zuihnate muanlahna bangmah nei lo-in um thei muang thei uh hi. Hih bang mite in Thuman thutak in bang hi, ci-in thei a, a up thute sungah a nungta uh hi. Mi tampi in hotkhiatna ngah dingin theihna neikhin uh hi; a theih uh thuman a nuntakpih loh manin a mangthang ding uh hi. Hihthu in bang zahin siahuai hiam? Itna tawh kidim Pasian theihna le na veengte itding theihna in kicinglo hi. Theihna bek hilo-in theihna bangin nuntak kalsuan ding kisam hi.

 

Simin: James 2:17–22. Hih in koi bangin Zeisu in thukham hilhsiapa tungah a gen thu tawh kibatna nei hiam?

_____________________________________________________________________

_____________________________________________________________________

 

Pasian i it takciangin Ama Kammal simnopna i neiding hi; thungetna i nei ding hi; Ama thupiakte i nuntakpih nuam ding hi. I lungsim khempeuh tawh Ama thupiakte i nuntakpih ding hi. “Midangte ka it hi” ci-in pulaak napi-in pawlpih mite khat zong kin’lo-in na om a, midangte kitang sapna huh thei ding dinmun ah om napi-in na huh keileh, na upna in bang kimanna nei hiam? Khristian upna in a thutuam khat thu upna hilo-in, nunzia hizaw hi.

“Ka sanggamte khat in puansilh ding neilo-in gilkial dangtakin om a, ‘Na gilvah hen, na khualum hen, ci-in bangmah huhna nei kei lecin, pumpi kitangsap na huhlo-in om hilecin, na upna in bang khiatna nei ding hiam? (James 2:15, 16).

Midangte kitangsapnate bangzahin lung himawh na hiam? Koi bangin Paul honghilh thute na nuntakpih hiam? “Nangma phattuam nading bek ngaihsun kei inla, midangte kitangsapnate zong huh dingin hanciam in” (Fili. 2:4). Pasian hehpihna tawh koi bangin midangte kisapnate na huh thei hiam?

 

WEDNESDAY November 15

Eima Pumpi I Ki-it Bangin Midangte Zong Itna

 

Simin: Matthai 22:37–40. Koi bangin Zeisu dawnkikna in thukham hilhsiapa pulaak thu in kibatna nei hiam? Luka 10:27, 28.

_____________________________________________________________________

_____________________________________________________________________

 

Matthai 22:37–40 pulaak bangin Zeisu in nisim nuntak khuasakna in hih thukhamte tungah kinga hi. Luka 10:27, 28 in mikhat in tawntung nunna luah nadingin thu nih sem dingin sawlna hiam? “Itna in vantung ki-ukna Pasian ukna bulpi hi. Itna in Khristian thu-um mi khat zia-le-tong bulpi ding hi. Itna bek mahin hong kipsak thei hi. Itna bek mah in zia-etna siatnate tungah zawhna hong ngahsak ding hi.” Ellen G. White, Christ’s Object Lessons, p. 49.

 

Simin: Galati 5:14; Micah 6:6–8; le 1 Johan 4:20, 21. Koi bangin hih thute in Zeisu hong sawl thute sungah nungta dingin hong hilh phapha uh hiam?

_____________________________________________________________________

_____________________________________________________________________

_____________________________________________________________________

 

Paul genna-ah “Thukham khempeuh kammal khat tawh kipulaak thei hi: ‘Nang le nang na ki-it bangin midangte zong na itding hi” (Gal. 5:14). Paul adingin Pasian i itna in midangte i itna tungtawnin kilangh khia thei hi. “Midik in upna tawh a nungta ding hi” ci-in pulaak himah taleh a nungta upna in a kiselcip hilo hi; kimu ding hi” (Rom 1:17); a kiselcip hilo hi; gamtat zia-le-tong tungtawnin kimu thei hi. Paul, Micah, le Johan in hih thu kitel takin honghilh uh hi. Upna i cih in i nuntakna-ah a kimu thei ahi hi.

1 Korin 13 sungah Paul in itna nei mi nunzia honghilh hi. Thu theihna khempeuh nei-in, na lian pipi sem zo-in, upna lian nei kici-in nuntakna nangawn piakhia ngam zah dongin upna nei himah taleh itna om keileh “a ging thei daalthuah sangin kimanna omlo hi” (1 Korin 13:1).

A tunga Ellen G. White laigelh ngaihsun in: Itna bek in kip tawntung ding ahihna, siatna le zia-etna tungah zawhna hongpia ahihna thu ciamteh in.

Koi bangin hih thu in gamtatna tawh hotkhiatna kingah hi lo a, Zeisu sungah itna le upna tawh nuntakna tawh hotkhiatna kingah ahihna thu hong hilh hiam?

 

THURSDAY                         November 16

Tuhun Samaritan Mi Hoihpa

 

Thukham hilhsiapa dotna a dawnkikna-ah Zeisu in “Hih bangin na zuih le na nungta ding hi” ci-in dawngkik hi (Luka 10:28), Tua hi-a Zeisu in mi khempeuhte lungsim bulpi lawngkha hi. Thukham hilhsiapa a dawnkikna-ah tua dawnna in kum 2000 bang valkhin himah taleh tuni tuhun adingin mi tampite tungah thu hilhna mah suak veve lai hi. Thukham hilhsiapa in Zeisu thaang’ a siah hi; ama theihna pholak khia ding a ngaihsun hi. Tua hi-in dotna khat a dotbeh hi. “Kua in ka veengte hiam? (Luka 10:29), a ci hi.

 

Simin: Luka 10:30–37. Bangci bangin hih thupiang in Zeisu pulaak thute pulaak hiam?

_____________________________________________________________________

_____________________________________________________________________

_____________________________________________________________________

 

Na kiim na paamah thutan lohna hangin gim thuak mi a om hiam? Tua bang mite na huh ngei hiam? Khat veivei ciangin Pastorte, Upate le Pawlpi mite in tua bang mite huhlo-in om uh hi. Khat veivei ciangin pawl dangte khat peuh in huh thei zawsop uh hi. Hehpihna nei ding ci-in kihan thawnthawn napi hang in ahi zongin huhna kisamte huhlo-in om lehang i gen thute in bang khiatna nei nawn ding hiam? Upna nei takpi ihih le huhna kisamte i huh loh phamawh hi.

Zeisu in a thukhupna-ah Samaritan mi hoihpa thu a pulaak hi. Dongtuak mipa a dingin a veengte in kua hiding hiam? ci-in a dong hi. “Tua hi-in, ka veengte in kua hiding hiam? cih dotna a kidawngkhin suak hi. Khrih in i veengte cih in i inn gei-a a teengte bek hilo ahihna, i pawlpi mite bek hilo ahihna honghilh khin hi. Veengte cihin kuamah deidan neilo hi; minam, pau le ngei-na tuam tuamte in dal lo hi. I huhna kisam mi khatpeuh in i veengte hong suak hi. Galpa in a sukliam mi khatpeuh i veengte hongsuak hi. I veengte in Pasian tanu tapa mah hi, ci-in i theihding kisam hi.” Ellen G. White, The Desire of Ages, p. 503.

 

To-na: Nang tawh kibanglo mi khatpeuh adingin thu ngetsak kipan in. Na zia-le-tong kibatpih loh mi khat hi thei hi.

 

To-na bangin Kalsuanna: SDA hilo na meltheihte mi thumte min gelh in; amaute kitaang sapna (lungsim, taksa le kizopna khatpeuh hithei hi); koi bangin amaute kisapnate huh thei-in panpih ding na hiam, cih ngaihsun in. Mai kaal sungin kipankhia pah in.

 

FRIDAY                      November 17

Ngaihsutbeh Ding: Ellen G. White “The Good Samaritan,” pp. 497–505; The Desire of Ages simin. Leitung ah tu-in gilkial dangtaak mi, huhna kitangsam mi tampi om hi; bawlsiatna a thuak mi tampi om hi. Gentham cinglo na sak hangin, tua bang mite na huh theihna khat teitei om ding hi. Zeisu hongpai masiah leitung buai-na i beisak thei kei ding hi. Leitung buai-na a vengsak dingin hong sawlna ngah i hi kei hi. Zeisu hong paikik dongin tua bangin dongtuak mi khat peuh i huh theihte i huh ding, nek ding nei lote an pia-in, puansilh nikteen nei lote i huh thei hi. Ahih keileh thuman lo-in gim thuakte, kilang neihna a thuakte a suahtak nading i huh theih omkha thei ding hi.

“Topa Pasian mai-ah paubaanna omlo, a deihhuai biakna in hih hi: ‘Tagahte le meigongte keemin a kitangsapnate uh huhna hi; huhna kisam mite taisanlo-in huhin panpihna hi.’ Gah hoih a gah dingin Khrih in hong kun hi. Tua gah hoih in hehpihna tawh kidim kampau-nate, diktatna, hehpihna, lai-natna, a kitangsamte huhin panpihna hi. I lungsim in mi hehpih theihna tawh a kidim ciangin a lungkhamte, a lungkia-te huhin a panpih nuam ding hi. Guaktangin a omte puan silh a guan ding hi. Gilkial dangtakte an pia ding hi. Zindo a hanciam ding hi. Tua bang mite kimkot ah vantungmite in naai takin a-om uh hi. Amaute thungetnate vantung in dawnglo-in a-om kei hi. Thuman nasepna, hehpihna, diktatna khempeuh in vantungah la ngaih mahmah a suak hi. Tua ciangin vantung Pa Pasian in a tokhom panin hong mu-in a manpha a mi-in hongsim hi. ‘Amaute in keima neihsa hiding uh hi, ci-in vantung Ukpipa in a pulaak hi. Amaute in ka kham lukhu ahiding uh hi.’ A cimawh dongtuakte hehpihna tawh sepna khempeuh in Zeisu tungah a kibawl mah hipah hi. Cimawh dongtuak mi khat na huh na panpih ciangin a kinenniam khat na hotkhiat ciangin, tagah meigong khat na lawmbawl ciangin Zeisu tawh a kinai zaw semsem na hi hi.” Ellen G. White, Testimonies for the Church, vol. 2, p. 25.

 

Kikupding Dotnate:

 

1.       Koi bangin Pasian i itna le midangte i itna in gamtatna tawh hotkhiatna ngah ding hilo ahihna thu telthei ding i hiam? Zeisu in kua hiam, cih thu i ngaihsut ciangin Amah in singlamteh tungah mawhneite adingin a nuntak na hongpia Pa hi, ci-in i thei hi (Phil. 2:5–8), bang hangin hihthu in gamtatna tawh hothiatna ngah ding lametna in khialhna lianpi ahihna honghilh hiam? Koi bangin gamtatna pha tawh hotkhiatna ngahding lametna le Zeisu sunga i neih thute nuntakpihna in kibanglo ahihna mu thei ding i hiam?

2.     Ei tawh kibang lote deidan khentuam lo-in kalsuan thei ding i hiam?

3.     Tukaalsung i thusinnate simloh bangthu dangdangte in hehpihna, lainat na kisamte tungah hehpihna lainatna nei dingin honghuh theiding hiam?