LESSON 6 *November 4 – 10 Mission Nasepna Dingin Thapiakna le Kiginkholhna

 LESSON 6       *November 4 – 10

Mission Nasepna Dingin Thapiakna le Kiginkholhna

 

SABBATH NITAAK

 

Tu Kaalsung Simding: Luka 24:1–12; 24:36–49; Sawl.1:12–26; 2:1–41; Heb. 10:24, 25; 1 Kor. 11:1.

 

Kamngah: Tua ciangin Zeisu in amaute kiangah, “Tu-a thupiang khempeuh pen note tawh kong omkhawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi. (Luka 24:44)

 

Paul in Filippi pawlpi a laikhakna-ah “Mi pawlkhatte in ahihleh hong hazatna le hong langpan’ nopna tawh Khrih thuhilh uh a, ahi zongin mi pawlkhatte in lungsim hoihtak mah tawh a hilh uh hi. Hih bang mite in, Pasian’ hong sawlna tawh lungdamna thu ka hutna hangin thongkia ka hihna thu thei-in, itna lungsim tawh Pasian’ thu a hilh uh hi. Pawlkhatte in ahihleh lungsim hoih tawh hilo-in ka thongkiatna-ah na kasak semsem theih nadingin kei hong demna-in Khrih thu a hilh uh hi. Ahi zongin phamawh kasa kei hi. Lungsim hoih tawh a kihilh a, lungsim khem tawh a kihilh ahi zongin, bangbang hitaseleh Khrih’ thu gen uh ahih nungsang, kei ka lungdam hi.” (Filippi 1:15–18)

Vanglian kammalte! Paul in a pulaakna-ah “Kineihna tawh thugen mite hi taleh thuman thutak tawh thugen mite hitaleh” Khrih thu a kihilhna khempeuh in thupi hi, ci hi. Topa in Ama hong hotkhiatna thu i genna-ah i sepna khempeuh in itna le thuman thutak tawh i sepding i gending hongdeih hi; angsung huaiham nate, kitot kiselna, hazatna lungsim cihte tawh i sep khak loh ding kisam hi.

 

Tua hi-in Khrih thu i genna-ah bangin hong tawsawn hiam? Bang in tha hong guan hiam? Tua bangin Khrih nasepna-ah kihel zawh nadingin bangci bangin kigingkhol thei ding i hiam? Tukaalsung i kikup ding thu in pawlpi masate nasepzia in hotkhiatna nasepna lam honglak hiam?

 

SUNDAY                     November 5

Gensawn Ding Lungdamna Thu

 

Simin: Luka 24:1–12. Khrih in sihna pan a thawhkikna thu a za mite in bangci bangin dawngkik uh hiam?

_____________________________________________________________________

 

Zeisu a kithah khit Sunday ni zingsang tungin numei kimkhat in han ah vapai uh hi, ci-in Luka in pulaak hi. Amaute’n paknamtuite tawi-in vapai uh hi. Sabbath ni beikhin ahih manin Zeisu luang zutdingin a vapai uh ahi hi. Amaute’n hankhuk kikhak mu dingin a pai uh hi-a ahi zongin amaute telzawhloh thu khat a tuakkha uh hi. Amaute-in Zeisu luang a muhloh uh ciangin lamdangsa uh a, cih nading theilo-in lau-na tawh a kidim uh hi; tua bangin lau-na tawh kidimin a om laitakun vantungmi khat in puankaang silhin amaute gei-ah hong kilang a, amaute tungah thupuak khat a pulaak hi. Zeisu gen thute amaute tungah a pulaak hi. Tua bangin Zeisu in sihna panin tho-in sihna zo ahihna thu a zak uh ciangin amaute nuamna tawh a kidimpah uh hi. Hihthu pulaak dingin amaute in manlang takin Nungzuite kianglam zuanin a pai uh hi. Amaute-in lungdamna tawh kidimin a zak uh thu imcip zolo-in a paipai-na khuate-ah a pulaak kawikawi uh hi; banghang hiam cihleh amaute zak thu genlo-in a om theikei uh hi. Tuahi-in midangte tungah hotkhiatna thu i pulaak ding kisam hi; Khrih nunzia ettehin a nungta ding ihi hi. Tua numeite thuakzia ding na ngaihsun thei hiam? Amaute’ nuntakna in a lamdang thu tawh hong kidim ta hi. Ahi zongin Nungzuite in tua bangin a tuah thute zuau thuhi-in, ci-in a um thei kei uh hi. Tua numeite’ pulaak thu a um a, a um kei zongin Peter in manlang takin han lam zuanin a taipah hi.

Peter ading hi taleh eite’ adingin thukhat pepeuh i um ngam pahpah thei hi. Banghang hiam cihleh mi khat in thuman a gen nakleh i sang theipah lel hi. Peter in tua numeite thugen um himah taleh Khrih thawhkikna hangin lungdamna sungah a nungta thei nai kei hi. Amasa-in ama tuahkhak thute in hankhuk sungah Zeisu kisial mu nawnlo hi. Hih thu hangin Peter in lamdangsa hi (Luka 24:12). Hankhukah ama tuahkhak thute in tua numeite tuahkhak thute tawh kibanglo hi.

Peter in bangbangin tua thu a dawngkik zongin a sawtlo-in tua numeite thugenna hangin amaute in midangte tungah apulaak nuam uh hi. Zeisu in amaute adingin a hong sihna thu gending sangin bang thu gen nuam zaw ding i hiam? Eite lamet khat bek Zeisu hong hotkkhiat lungdamna thu lianpi genlo-in om thei ding i hiam? Midang tungah i pulaak ma-in ei mahmah in i phutkhak ding kisam masa zaw hilo hiam? Midangte tungah pulaak nopna lungsim in hotkhiatna nasepna tha hong guan suak a, a tawpna-ah i neih loh thu khat midang tungah i hawmsawn thei kei ding hi. Hi mah hilo hiam?

Pasian le a hong itna sungah na nungta hiam? Bang hangin lungdamna hotkhiatna thu midang tungah hawmsawn thei dingin bangthu in hong tawsawn hiam?

 

MONDAY                   November 6

Kamsanna Bulphuh

 

Simin: Luka 24:36–49. Bang thupiang kipulaak hiam? Bang hangin tua thu in Nungzuite adingin thupi hiam?

_____________________________________________________________________

 

Nungzuite in lau-na hangin upna nei hilo uh hi, cihthu in lamdang hi. Zeisu amuhkhit uh ciangin Amah in sihna panin thokikin nungta takpi ahihna a-um uh hi. Amaute in lungdam ngahnadingin a um hilo hi (Luka 24:41). Thuhoih mahmah thukhat na tuak kha ngei hiam? Nungzuite in thuhoih mahmah a thuak kha uh hi. Tua inndei tungnungah a kikhopna-ah zong lungdamna thu a ngah uh hi.

Zeisu in lungdamna thu tawh amaute nusiat hileh, amaute tawh a kikhen ciangin a-upna in sawt kimanglo khading hi. Amaute’n tua thute mangngilh kha thei, ahih keileh a thakin kipatkik kha thei ding dinmunah om uh hi. Tua hi-in amaute tungah Zeisu in a khut tunga liamna lak tawntung den hi. Ama nasepna-ah thu bulpi dingin kamsangte pulaak thute zong amaute tungah a pulaak hi. Amaute in Zeisu tawh kikholhkhopna lianpi nei uh himah taleh, a-upna uh Pasian Kammal tungah kinga dingin a pulaak hi. Zeisu in amaute kiangah, “Tu-a thu piang khempeuh pen note tawh kong omkhawm lai-a ka gengen thute mah ahi hi. Moses Thukham laibu sung, kamsangte laibu sung le Late sungah a kigelh thu khempeuh a tung ding ahi hi,” a ci hi. (Luka 24:44).

Hih munah teci panna le hotkhiatna nasep nadingin a thupi thukhat kimu thei hi. Tua in Pasian Kammal hi. Zeisu in nungzuite tuahkhak thute zong a thei hi. Bang hangin Zeisu in hong si hiam, cihthu amaute in a theihtel ding uh kisam hi. Zeisu hong sihna le sihna pan a thawhkikna thu zong a thei uh hi. Leitung ukna panin leitung kumpi bangin thu neihna nei-a, mawhna beisiang zawh nading lampi hong bawlsak hi; tua banah Khrih in sihna tungah zawhna a ngahna thu zong a theitel uh hi. Lungdamna thu in Israel mi namte adingin leitung kumpi ukna sangin thunei zaw vangliatna thu hi. Hih in Satan tungah Khrih zawhna thu hi. Leitung mawhnei mite in gitlohna khempeuh beisiang ding ahihna thu hong hilh hi. Mawhna tawh kidim leitung in kibawlpha thak ding a, hih leitung in a thak leitung hiding hi. Satan tungah zawhna lianpi hiding a, mihingte in theih telna tawh kidim ding hi (Luka 24:45). Amaute in hih thuman thute a theitel thei uh hi. Hih thute mah leitung mun khempeuhah a puak kawikawi ding uh hi.

Topa Kammal bulphuh lo-in Amah tawh i kizopna in kisiapah ding hi. Genkholhna tuamtuamte a kipan Khrih hongpai masakna le a hong paikikna thute in Lai Siangtho siksanlo upna in, a mawkna suak ding hi. Hih thute kiptakin upna in hotkhiatna nasepna-ah tha hong guan thute hong suak ding hi.

Khrih hongpai ding thu, a masa-a hongpai-na le nihveina hongpai nading thu a kipan Khrih a kawk khol thute sungah bangzahin na kip hiam? A diakin leitung hun bei ding a thupiangte tawh kisai bang hangin Pasian Kammal bekmah siksan ding kisam hiam? Bang hangin hih thute in hotkhiatna nasepna-ah thupi hiam?

 

TUESDAY November 7

Ngakna le Mission

 

Luka 24 thu khupna-ah Zeisu van a kahna tawh thu khupna kimu thei hi (Luke 24:50–53). Ahi zongin hihthu in a tawpna hilo hi. Luka gelhpa in Sawltak Bu zong gelh hi. Zeisu in van a kah ma diakin, a nungzuite tungah sawlna a pia hi; tua nasep a sep zawh nadingun kamciam zong a pia hi. Nungzuite in zong Topa sawl bangin Jerusalem khua-ah Kha Siangtho kipia ding ngakin om uh a, amaute tungah Kha Siangtho hongtun ciangin amaute in hotkhiatna thu a pulaak kawikawi uh hi (Luka 24:49; Sawl. 1:4–8).

Zeisu in a Nungzuite tungah Jerusalem khua-ah Kha Siangtho ngak dingin a hilh hi. A kamciam bangin Pa Pasian kiang panin Kha Siangtho hongpai-in, amaute in Jerusalem a kipan, Judea, Samaria le leitung mun tuamtuamah Topa teci a suak thei uh hi.

 

Simin: Sawl. 1:12–26. Nungzuite a kipan numei pasal 120 te in Kha Siangtho kipiak ding a ngak kawmun bang sem uh hiam?

 

Zeisu in a Nungzuite tungah nasep ding a pia hi. Amaute in leitung mun tuamtuamah Zeisu adingin teci hiding uh hi. Tua hi-in Kha Siangtho kipiak ding ngakin a om sungun amaute in hotkhiatna nasem dingin a kigingkhol thei uh hi. Amasa-in Luka gen bangin amaute in thungetna le thuumna a nei uh hi. Amaute in Zeisu piak nasepna thute a ngaihsun sun uh hi; Zeisu piak nasep sem dingin a kigingkhol khinta uh hi. Hihthu hangin amaute in thungen tawntung uh hi. Amaute’n bangthu ngen uh hiam cihthu Luka in a pulaak loh hangin nasepna-ah a kisam pilna, ciimna, sepzawhna tha-le-ngal, hanciamna cihte a kipan nasep a zawhsiang nadingun thungen pelmawh ding uh hi. Eite etteh ding hilo hiam?

Nihna-ah, Kha Siangtho kipiak ding a-ngak kawmun hotkhiatna nasepzia ding a mun a mual thu kantelna a nei uh hi. Zeisu in sihna thuak dingin Judah in a Topa a lehhek hi; Nungzui 12 lakah khat kisam hongsuak hi. Nungzuite in Pasian lamlahna a ngak uh hi. Tua khit ciangin Judah tangin khat a teelkhia thei uh hi. Hihthu hangin Nungzuite in lamdangsa-in Topa piak nasep sepzia ding geel kipan uh hi. Tua bangin khensatna a neihkhit uh ciangin Peter in pawlpi nasepna a makaih hi. A kalsuanna khempeuh ah Pasian kiangpan pilna a ngahlam uh kimu thei hi. Khat le khat kimuanna hong om hi. Pasian in amaute tungtawnin hotkhiatna nasep a mainawt thei hi. Amaute-in a ngak hunsungin nasepzia ding geelna nei uh a, hotkhiatna nasep bekmah ngaihsunin a kalsuan thei uh hi.

Kha Siangtho hong kipiak ding ngakin i om sungin Pasian hongsawl bangin na i sep zawh nadingin Kha Siangtho i kitangsam hi. Khat le khat tha kipiak ding kisam hi (Heb. 10:24, 25); Kha Siangtho tawh a kidim nunna i ngah nadingin thu i ngen ding hi. Pawlpi masuan hitaleh ei mimal masuan in hotkhiatna nasep bek mah masuan lian belin i neih ding kisam hi.

Koi bangin na upna nusialo-in Topa ngak ding na hiam? Tua bang na ngak sungin Nungzuite bangin na hun a hoih penin koici zat ding na hiam?

 

WEDNESDAY                               November 8

“Na Khailup-uh Mipa”

 

Sawltak 2 in Pentecost Ni-a Kha Siangtho hongpai-na thu pulaak hi. Zeisu nungzuite in thungen-in om uh a, a theihngeiloh uh kampau nam tuamtuam a thei uh hi. Amaute in Pasian kamciam om bangin Kha Siangtho hongpai-na tangtung ahihlam a phawk thei uh hi.

 

Simin: Sawl. 2:1–41. Nungzuite in Pentecost Ni-a Kha Siangtho tawh a kidimna hangun bang thu piang hiam?

_____________________________________________________________________

 

Nungzuite in cikmah hunin a zakngeiloh a sin ngeiloh namdang pau tuamtuamte theih theihna a ngah uh hi. Kha Siangtho in ompih ahih manun namdang pau, sin kullo-in a pau thei uh hi (Sawl. 2:4). Hihthu-ah Pasian in thu-umlo mite phattuam nadingin vangliatna a pia hi. Tua bangin thupha a piak ciangin amaute nopsak nading, hamphat nadingin a piak hilo hi. Vantung gam lut theih nadingin kicinna ngahna zong hilo hi. Namdang paute olno takin theih nadingin a kipia zong hilo hi. Tua thupha in a mangthang mite hotkhiatna nasep kizawh nadingin a hongpiak hizaw hi. Tuni-in Topa in Ama nungzui mimal khat ciat in thu-umlo mite kiangah nasem dingin a hongsam hi. Kha Siangtho silpiakte hong kipia khin hi: Midangte kiangah hotkhiatna thu va puak ding sangin a thupi zaw nasep bang dang om nawn hiam?

Kha Siangtho hong kipiakna-ah Messiah a nial mi tampite in mawhna kisik na-in a nei uh hi. Jerusalem khuapi sunga mi tampite adingin zong Zeisu in sihna a hong thuak hi. Hih thu-ah vantung vangliatna thu ngaihsun in: amaute kim khat in Khrih khailum uh hi, ci-in a mawhsak hi. Amaute in a sepnate uh a phawkkik thei uh hi. A mawhnate uh kisikin, “sanggamte aw, bangcih ding i hiam,” ci-in a pulaak uh hi (Sawl. 2:37).

Tua hangin amaute in mawhmai-na a ngah uh hi. Peter in amaute tungah: “Kisik un, mawhmai-na na ngah nadingun Khrih min tawh tuikiphum un” ci-in a pulaak hi. Tua ciangin amaute in Kha Siangtho tawh a kidim uh hi” (Sawl. 2:38). Amaute kipumkhatin nasem khawm uh a, Kha Siangtho makaihna tawh khat le khat kihuhin kalsuan in, mawh kisikna thu le mawhmai-na thu a gen kawikawi uh hi. Zeisu a khai lumte nangawn in mawhna kisik uh hi. Hih lungdamna thu vangliatna hi. Hotkhiatna thugen dingin tha hong guan keileh bangthu in tha hong guan hiam? Leitung mun khempeuhah hotkhiatna thu pulaak kawikawi dingin sapna ngah ihi hi. Mawhna, siatna tawh kidim leitung mun khempeuh ah lungdamna thu a tangko ding ihi hi. I nasep in mite tungah thukhen ding ihi kei hi; i sep ding a lianbel in hotkhiatna hongpia Zeisu vangliatna pulaak ding ihi hi.

Banghangin Khrih sihna in hotkhiatna sungah a nungta: (1) Ei mahmah hong hotkhiatna sungah a nungta dingin tha hong guan hilo hiam? (2) Midangte in bangzahin siatna sungah nungta uh himah taleh eite in hotkhiatna teci hidingin hong sawl hilo hiam?

 

THURSDAY                November 9

Pawlpi Masa Lim

 

Simin: Sawl. 2:41–47. Pawlpi masa lim bang honglak hiam?

_____________________________________________________________________

_____________________________________________________________________

_____________________________________________________________________

 

Sawl. 2 thu khupna-ah pawlpi masate lim kimu thei hi. Sawl. 2:41 genna-ah nisimin pawlpi-ah thu-um mi kibehlap hi. Pawlpi sungah thu-um mi hong kibehlapte a ciamteh om hi-ngel hi, cih kimu thei hi. Pawlpi nasepna in tangzai semsemin pawlpi masuan mazaan nate kiciamteh hi, cih i mu thei hi.

Tua hi-in pawlpi masate in nungzui hihna-ah citak mahmah uh hi, cih kimu thei hi. Thu-um mi kibehlapna tungtawnin nungzui hihna thu zong thu thum bangin kimu thei hi. Amasa-in, Nungzuite thu hilhna (upna thu hilhna) ngahin kilawmtatna zong a nei uh hi. “Upna thu hilhna” le “Kipawlkhopna” cihte in sawltakte in upna thumanlo tuamtuamte langpangin thu hilhna a nei uh hi. Thu-um mite nuntakna sungah a tuahkhak thute a theih zawh loh thute sawltakte in hilhcianna nei uh hi. Mi khatpeuh in “thuman thak ka mu hi” ci-in a ngaihsut uh thute kihilh uh hilo hi. A nuntakna uhah pawlpi thu upna thuman thutawh nuntakna thute a kihilh uh hi. Thu-um mi thakte in sawltakte thu hilhna ngah uh a, a nuntakna uhah kidawm takin nungta uh hi. Sawltakte makaihna nuai-ah a nungta uh hi.

Bang semding ci-in kihilh a, koi bangin semding cih kihilh lohna in thuhilhna hoihlo hi. Ahi zongin laibute simna le thu hilhnate ngaihna tungtawnin nasep kalsuan zia ding kithei thei hi. Ahi zongin nasepzia koi bangin semding-a muh theih dingin sepna sangin a deih huai zaw dang omlo hi. Paul in thu-um mite etteh thamcingin nungta-a, Zeisu ka etteh bangmahin note in zong hong etteh un, ci-in thu ahilh hi (1 Kor. 11:1). Midangte in na nunzia hong muh uh ciangin Khrih nunzia amuh ding le amaute nunzia tungah huzaap anei dingin na nungta ding hi.

 

To-na: Na nunzia mu-in midang khat in hong muh ciangin thu-um mi a suak ding na lunggulh hiam? Tua dingin nisimin thungen inla, Zeisu tawh nungta in.

 

To-na Bangin Kalsuanna: Nungzui suak dingin kua makaih na hiam? Zeisu tawh kizopna nei dingin kua tonpih na hiam? Thu-um midangte tawh kipawl khopna a om nadingin lampi zong in.

 

FRIDAY                                November 10

Ngaihsutbeh Ding: I sepna-ah itna takpi le Zeisu hong hotkhiatna hang a lungdamna tawh i sepding kisam hi. Tualo tha hongpia thu dangte in lam hong pialsak thei hi. Topa Kammal sungah nungta-in Ama deihna tawh kituakin nuntak kalsuan hilehang i nasepna-ah lawhcinna i ngah ding hi.

“I nuntakna in Khrih nunna sungah nuntakna ahih kul hi. Ama kiang panin tatsatlo-in nunna i la ding a, Amah tawh nungta khawmin vantung panin hong pai Khomun tawh i kivak ding hi. Tua hileh i nuntakna panin vantung hauhna thuphate hong luangkhia ding hi. I mai-ah Topa mitsuan hilehang, i sungah Khrih a hong nuntak ciangin lungdamna tawh a kidim nunna i nei thei ding hi. Tatsat lo-in Amah i phat thei ding hi. I thu zuihna-ah thathak tawh i nungta thei ding hi. Lawmta kiho bangin i thunget ciangin Topa tawh kiho thei ihi ding hi. Amah in Ama thuthukte a honghilh ding hi. Zeisu tawh mimal kizopna i nei thei ding a, Ama hong ompihna i ngah tawntung ding hi. Enoch in Topa tawh tonkhawmin a nuntak bang mahin, i lungtang in Amah tawh i nungta khawm nuam ding hi. Hih thuman sungah i nuntak ciangin i nunna-ah kiniamkhiatna, dikna, lungneemna, kiniamsakna le lungsim siantho-na cihte hong kilangh ding hi. Zeisu tawh tatsat lo-in kizopna tungtawnin Ama lungsim i nei thei ding hi.” Ellen G. White, Christ’s Object Lessons, pp. 129, 130.

“Angsung khualna tawh a nungta mi sungah khantohna, nuntak gahphatna cihte om theilo hi. Zeisu Khrih pen nangma Honpa-in na pom ciangin nangma deihna naphawk kei ding a, midangte huh nopna lungsim tawh na nungta thei ding hi. Khrih hong itna thu pulaak in; mawhneite adingin a hong sihna thu gen in. Khrih lungsim a nei hilecin, angsung zonglo itna sungah na nungta thei ding a, midangte zong na huh tawntung nuam ding hi. Singkung bangin na khangtoto ding a, gah limci na gah ding hi. . . na thu upna hong khang ding a, na khamuanna kip semsemin na itna in a kicing itna hongsuak ding hi.” Christ’s Object Lessons, pp. 67, 68.

 

Kikupding Dotnate:

1.       Koi bangin Filippi pawlpi tungah enna, kitotna le angsung huaihamna tawh Khrih thu kigen thute na theitel thei hiam? Bangci bangin ei mahmah in tua bang thu hoih lote panin i suakta thei hiam?

2.     Pasian hong itna le Ama thu sungah na nuntakzia in koi bang hiam? Cihnopna-ah, na nunzia siksanin thumanna, lungsim sianthona, Pasian hoihna le a hong itna a kimu thei hiam? Koi bangin Zeisu ading teci na hi thei hiam?

3.     Topa hongpai ding ngakin na nuntakna-ah na tuahkhak thute in bangci bang hiam? Ama sungah muanna, thu upna na nei thei hiam?