LESSON 13 *December 23 –29 Pasian Mission Kizawhna

 

LESSON 13          *December 23 –29

Pasian Mission Kizawhna

 

SABBATH NITAAK

 

Tu Kaalsung Simding: Mang. 1:1–7; 14:6–12; 21:1–4; 1 Pet. 2:9; Luka 11:23; 1 Tim. 2:4.

Kamngah: “Hih nate khempeuh hih bangin kisusia mangkhin ding ahih manin note a bangci mi dingin kilawm cih limtakin na ngaihsun un. A siangtho nuntakna nei-in Pasian’ deihna bangin na gamta unla, vantungte mei in kangtumin, vantung nate sa lua-in a tuimang ding hun Pasian’ Ni hong tunbaih theih nadingin na hihtheih zahun hanciam unla, na ngak un.” (2 Peter 3:11, 12)

 

Mangmuhna Bu in leitung bei cianga thupiang ding thute a pulaakna kimu thei hi. Laibu thu gil in Khrih le Satan kikaal kido-na lianpi thu hi. Satan in tua kidona-ah gallel khin hi; leitung uk theihna a nei nawn kei hi. Tua hi-in tu-in Satan in Pasian mite a do den hi. Mangmuhna bu thu khupna-ah Zeisu in a mi siangte ladingin hongpai ding ahihna thu, a nungta lai midikte le Ama sungah a si mite phonglo dingin hongpai ding hi, ci-in honghilh hi. Tua ciangin Satan le ama nasemte khempeuh in meikuangpi tawh suksiatna a thuak ding uh hi. Tua khitciangin Zeisu in leitung thak khat hong bawl ding a, a mite tawh a tawntungin nungta khawm ding uh ahihna thu honghilh hi.

Mangmuhna bu a sin a kan khempeuh in kum zalom khat panin leitung bei dongin a piang ding thu khempeuh kipulaak ahihna thu mu thei uh hi. Hi mah hi; tua a pulaak thute un hun ciaptehna hi, ci-in zong i thei hi. Ahi zongin tu quarter i thusinna bangin Mangmuhna bu in khuamial lak hotkhiatna thu kipulaak kimu thei hi. Pasian in tua hotkhiatna nasem dingin hongsam Topa Pasian ahihna kimu thei hi. Hih sapna in “Tulai thuman” ci-in leitung thak dongin, mimal khat ciat in Pasian langpan ding maw Pasian sawlna mang ding maw, cih a khensat ding uh hi.

 

*December 30, Sabbath a ding kiginkholhna in tukaal lesson sim in.

 

SUNDAY                               December 24

Mangmuhna Bu: A Nunung Pasian Nasepna

 

Mangmuhna bu kipatna-ah Pasian nasepna mah pulaak masa bel hi.

 

Simin: Mang.1:1–7. Bangci bangin Mangmuhna bu in hun nunung a Pasian nasepna mah siksan ahihna ngaihsun in.

________________________________________________________________

 

Amasa bel thu in Zeisu in Mangmuhna bu thu bulpi le a pulaak thu lian bel hi, cih kimu thei hi. Mang. 1:4, 5 in Pa, Tapa, le Kha Siangtho thu pulaakna zong kimu thei hi. Amaute-in mihingte hong hotkhiatna dingin nasem khawm ahihna zong kimu thei hi. Pa in a tawntungin om a, a-om tawntung ding Pa hi. Kha Siangtho in vanglian takin kum zalom khat hunlai thu-um mite lakah nasem hi. Tua ciangin Johan in Zeisu Khrih dinmun a pulaak kik hi. Amah pen “A citak Teci,” “Misite lakah a thokik masa pen Pa” (Mang. 1:5), ci-in a pulaak hi. Amah in vankhuanuai khempeuh anei Pa hi, ci-in kipulaak hi. Satan in Zeisu ukna susia dingin a hanciam tawntung den hi. Satan ukna tungah zawhna bek thamlo-in eite hong Piangsak Pa in i mawhna khempeuh, i maizumna khempeuh hong khuhcip sak hi.

 

Simin: Mang. 1:6 le 1 Peter 2:9. Tatkhiatsa mite ngah ding min le za in bang thupina nei hiam?

________________________________________________________________

________________________________________________________________

 

Pasian in nasepna a sepna-ah a mungtuppi bel in a mangthang mite bitna munah tunpih ding ciang bek hilo hi. Pasian hong hotkhiatna in dinmun thak, nunna thak hong guan hi. Banghang hiam cihleh eite in Pasian lim-le-meel suunin hong kipiangsak kik hi. Tatkhiat mite in Zeisu hong sihna tungtawn in kumpipa tapa tanute hong suak thei uh hi. Tu-in kumpipa innkuan khat sungah nungta ihih manin hotkhiatna nasepna-ah zong a kihel ciat dingin sapna ngah ihi hi. Hih in siampi hong suaksak hi. Khrih in a Pawlpi sungah hong omsak in ama ukna Ama kumpi gam sungah “siampi-in” hongkoih hi. Kumpi gam mi suahna-ah siampi suahna zong i ngah hi.

Mang.1:7 sungah kipulaak bangin kiptakin sepding nasepna i nei hi: Zeisu in hongpai ding hita hi. Minamte kap ding uh hi. Banghang hiam cihleh amaute in a mangthang mite suak uh hi. Pasian in Ama gam sung teeng dingin tua bang mite hong zong tawntung hi. Tuahi-in Mangmuhna Bu in mihingte adingin nasepna honghilh hi.

Pasian hong piansakte ihi bek thamlo-in Ama hong tatkhiat mite ihi hi. Tua bangin a hong tatkhiatna dingin man kiseh theilo tawh a hong tankhia hi. Hih thu in i nuntakna-ah lametna hong guan hilo hiam?

 

MONDAY                   December 25

Vantungmi Thumte Thupuak le Nasepna

 

Mangmuhna Bu in Sia le Pha kido-na a thu guipite hong hilh hi. Mang. 12:12 pulaakna-ah “‘Tua ahih manin vantungte le tuate sungah a teng mi khempeuh aw, lungdam un! Ahi zongin vantung panin Dawimangpa hong kilawnkhia suk a, hun tomno bek a neilai ahihlam thei ahih manin leitung le tui tungah a omte-a’ dingin lauhuai mahmah ding hi,’ hong ci hi.” Sia-le-pha kidona bulphuhlo-in Lai Siangtho thu thuk kitheithei zolo ding hi. Leitung bei ding hun ciangin hih thu in manpha semsem ding hi.

 

Simin: Mang.14:6–12. Bang thu kipulaak hiam? Pawlpi mission le i thupuak bang thu pulaak hiam?

________________________________________________________________

________________________________________________________________

 

Mission nasepna-ah a thu bulpi ahih bang mahin Pasian mission in Pasian kiang pan hongpai thupuak hothiatna thupuak mah hi. Hihthu in mission thu puak hi. Leitung in hih thupuak vauhilhkholhna kisam hi. Hih thupuak in thuman maw, thumanlo, koi lampi zuiding ci-in khensatna kisam hi. Nunna maw sihna khat teitei i khentel pelmawh hun hongtung ding hi. “Kei hong pawlpihlo peuhmah keima lang hi uh a, tuute hong kaihkhoppih lo peuhmah tuute a thehthang gawpte ahi uh hi,” a ci hi (Luka 11:23).

 

Zeisu in mission tawh kisai bang thu honghilh hiam?

________________________________________________________________

 

Vantungmi thumte thupuak in Mang.14 pulaak thu guipi hi, cih kimu thei hi. Hih thu mah Seventh-day Adventist pawlpi in leitung mun khempeuahah i thupuak lian bel hi. Hih thupuak a thu guipi thu nih a pulaak hi: “Tawntung lungdamna thu” (Mang. 14:6) le Piangsak Pa bia ding cihthu hi. Hihthu nihte mah mi siangthote in a pulaak tawntung uh hi. “Hih thu-ah Pasian’ thupiakna zui-in Zeisu tungah a citak Pasian’ mite a dingin thuakzawhna kisam hi.” (Mang.14:12). I sepna khempeuh in na hoih sepna khempeuh ahi zongin mi huhna khempeuh ahi zongin i pawlpi in “tawntung lungdamna thupuak le pawlpi nasep (Mission) phawk tawntung a i kalsuan ding kisam hi. Ahong tung ding siatna le a nuam leitung thak thu zong hilh kholhna kisam hi.

“Kei tawh hong kipawl lo mi-in kei mah hong langpan mi hi” (Luka 11:23). Hih in koi bangin i masuan ah thu honghilh hiam? Bang hangin hih thu in i lungsim kisittel ding kisam hiam?

 

 

TUESDAY                    December 26

A Nunung Bel Buai-na

 

Zeisu in a Nungzuite tung le ei tungah hong gen thu in: “Tua ahih ciangin note pai unla, midang khempeuh, keima nungzui mi suaksakin, Pa min, Tapa min, le Kha Siangtho min tawh tui sungah na phum un. Tua ciangin note tungah ka hong gen thute khempeuh a zuih nadingun na hilh un. Hun bei dongin note a hong ompih tawntung ding ka hihna thu phawk ta un,” a ci hi. (Matt. 28:19, 20). Hih ALian Sawlna le vantungmi thumte thupuak in lampi tuamtuam tawh minamte, pau namcinte, le leitung mun khempeuhah kipuak kawikawi hi” (Mang. 14:6). Hih thu mah “Tulai Thuman” hi, ci-in i thupuak ahi hi (2 Pet. 1:12).

 

Simin: 1 Johan 4:8; 2 Peter 3:9; 1 Timothy 2:4 le Pian. 12:3. Bang hangin minam tuamtuamte in Pasian mai-ah manpha mahmah hiding hiam?

 

Khrih hong itna in minam khempeuh hong baan hi; kuamah deidan khentuam neilo-in hong it hi. Khrih in mi kimkhatte ading bekin hong si hi, cih upna nei mite banglo-in Lai Siangtho honghilh thu in kitel kician mahmah hi. Khrih in minam khempeuhte ading, pau namcin khempeuhte adingin hong si hi. Mihing khat na hih nakleh, nang adingin Khrih hong si hi. Hih val omlo hi. Kidot ding thu khat bek omlai hi; tua in Koi bangin Khrih hong itna na dawngkik ding hiam?

Zeisu hong paikik ciangin Mang. 13 le 17 pulaak bangin leitung mi khempeuh in khennih bek pha ding hi. Biakna le gam ukna kigawm khawmin nasepna tungtawnin Satan ukna sung a nungta mite le Khrih ukna sungah a nungta mite hiding hi. Hih mite in Pasian ukna sungah nungta ahihlam uh Ama thukham sawmte upna tawh a nuntak pihna uh tawh a kilanghsak mite hiding uh hi, ci-in khennih bek ki omding hi (Mang.14:12).

A kipatcil a kipanin mihingte in Pasian in kua hi-a, thuman thutak in bang hi hiam, Topa lampi le Ama hong itna in bang hiding hiam cih a theihtel nadingun honghilh tawntung hi (Rom. 1:18–21). Tua ahih ciangin mihing khempeuh in thuman bangzah theihna nei a, nei kei taleh, koi bangin Pasian tawh nungta khawm uh hiam? Koi bangin Pasian tawh kizopna nei hiam cihthu siksanin thukhenna a thuak hi (Rom 2:11–16).

Ahi zongin leitung bei ciangin mihing deihtel theihna kikhaktan ding a, Satan tawh kipawlin nasepna sung lut dingin thatang hatna zangin nasem hong om ding hi. Tua hun hong tunma-in thukin takin hotkhiatna thu i pulaak ding kisam hi. Tua hileh Satan zuau khemna kilanghin ama hong thangsiahna panin i suakta thei ding hi. Hih thu in vantungmi thumte thupuak hi. Hih thu in i pawlpi thupuak i pawlpi nasepna mah hi.

Khrih in nangma adingin sihna hong thuak hi, cihthu ngaihsun in. Na nasepna thu khat peuh ngaihsun in. Bangbang thu hi taleh lungkim huailo thu hiphial taleh singlamteh tunga Khrih hong sihna in na khempeuh kicingsak khin hilo hiam?

 

WEDNESDAY                      December 27

Nasepna-ah Lawhcinna

 

Mission nasepna-ah lawhcinna i cih in bang hiam? Mi kim khat in tuiphum mimal pha tamna, biakinn gol pipi neihzawhna, cihte lawhcinna hi, ci-in ngaihsun uh hi. Mission nasepna-ah lawhcinna i cih in minam tuamtuamte tungah hotkhiatna thupuak genna, TV, internet, le website tuamtuam tungtawnin thugenna cihte zong lawhcinna khatin kiciamteh thei hi. Hih bang thute banah Paul in Korin pawlpite tungah a laikhak thute i phawk ding kisam hi. “Keima nasep pen khaici vawh hi a, Apollos’ nasep pen tuibuah hi-a, ahi zongin a khangsak pa ahihleh Pasian ahi hi.” (1 Kor. 3:6). A dang khatin pulaak ding hi lehang, i mungtup lian bel ding in khantohna, mainawtna i mungtup lian bel ding ahi hi.

Leitung minam tuamtuamte tungah hotkhiatna thu kizel dingin i masuan pi khat ahihna thu i pulaak khin hi. Tua bangin minamte thu-um mi suaksakin thu-um mi hihna pan nungzui hihna-ah a kah ding ihi hi.

 

Anuai-a kigelhte sim inla Zeisu nungzuite zia-le-tong bang pulaak uh hiam?

 

2 Kor. 11:2 ______________________________________________________

Isa. 30:21; Johan 10:27; 16:12, 13 ____________________________________

_______________________________________________________________

2 Thess. 2:9–11; Heb. 3:12, 13; 1 Johan 1:8 ____________________________

________________________________________________________________

1 Johan 1:9; Mang. 7:14; 19:8 _______________________________________

 

Zeisu nungzuite in siantho-na nei ding uh a, Ama tungah a citak mite hiding uh hi. Zeisu in a zi dingin a siangtho mo bangin Amah a zui mite zong siangtho-in nungta uh hi. Amaute in Zeisu nungzui mite hi; Ama makaihna na-ah a zuite ahi uh hi; amaute in Kha Siangtho hopihna awneem a za thei uh hi. Hih bangin nuntakna-ah hotkhiatna thu a za ngei nailo mite lakah hotkhiatna thu pulaakna zong a kihel hi. Tua bangin Zeisu nungzuite sungah zuau, khemna cihte kimu lo hi. Amaute in uplahna thute, a manlo thuhilhnate a nial uh hi. Pumpi a sih ciangin a silo nunna khat omlai hi, cih upna zong a nial uh hi. Amaute in midangte sangin dik a kisazaw kei uh hi. Amaute in a kicinlohnate a kiphawk thei uh hi. Siangtho na ngahna dingin Pasian hehpihna le lainatna a ngen tawntung uh hi. Hih thu theihtelna-in thu-um midangte thu hilhnate a za thei a ngai thei uh hi. Mission nasepna-ah lawhcinna in hih bang nungzui hihna kihel hi.

Khrih ading in siangtho cih ciangin a khiatna in bang hiding hiam? (2Kor. 11:2). Koi bangin mawhnei mi khat in Pasian mai-ah mite mai-ah a siangtho nuntakna tawh nungta thei ding hiam?

 

THURSDAY                          December 28

Mission Nasep Kizo

 

Simin: Mang. 21:1–4 le 21:22–22: 5. Bang thu piang pulaak hiam?

________________________________________________________________

________________________________________________________________

 

Leitung thak in bang zahin nuam ding hiam? Sihna, mawhna cihte om nawn lo ding hi; Satan in suksiat a thuak khin hi. Eite in i Honpa i mu ta ding hi; i it i ngaihte tawh kimuhkikna hun hiding hi. Leitung thak in minam tuamtuam, paunam tuamtuam panin tatkhiat ngah mite tawh kidim ding hi.

General Conference Mission Board in Global Mission nasem ding phalna pia-in, hotkhiatna thu kigen nailohna munte-ah vapai-in hotkhiatna nasem mi tampi kipuak khin hi. “Hotkhiatna thu kigen khitna mun” cihte in gam pua panin bangmah panpihna kul lo-in, amau le amau in limtakin hotkhiatna thu a gen thei cihna hi; hih in biakpiakna tawh kizui-in thu thum a sem thei suak hi; biakpiakna, Lai Siangtho thusinna le biakna tawh kisai laibute hawmkhiatna, cihte kihel hi. Hih bang munte-ah tual sung mite mah in biakna makaih thei uh hi. “Hotkhiatna thu kigen nai lohna mun” cihte in gam pua panin huhna panpihna lo-in amau le amau a kimakaih theihnai lohna munte a cihnopna hi. Hih bang munte-ah Adventist thu-um mi om napi, muibun takin hotkhiatna thu gen nadingin gampua pan panpihna tuamtuamte lo-in a kikhuasa zawhlohna munte zong kihel hi.

Khuatual pawlpi ciat le conference (pawlpite kipawlna) in koi munah vapai-in Pasian thugenna nei ding cihte geelna, khensatna nei ding uh hi. Tu-in Pasian nasepna-ah sum-le-paaite a kipan neih-le-lamh zatding hun hong tungta hi. Minam khempeuh nungzuih suaksak ding le Topa hongpai ding amanlang sak i hih ding kisam mahmah ta hi. Honpa hongpai ding hun naita ahihlam phawkin Topa hong kamciam om bangin leitung thak le vantung thak sung a nungta dingin a kigingkholte ihih ding kisam hi.

 

To-na: Koi bangin Khrih hongpai baihsak thei na hiam? Lungdamna thu na genna-ah mihing nuntakna sungah lametna khaici a tuh nahi hiam? Pawlpi sung honglut thakte tungah “tui buak” mi na hi hiam? Khrih hong thu piak bangin a nungta mi na hi hiam? Leithak ah a nungta dingin midangte ading thunget sakna nei inla, na thungetsak ding mite ciaptehna nei in.

 

To-na Bangin Kalsuanna: Na nung hong zui thu-um mite in Khrih a sang dingin kigingkhol kha thei ding uh hi. Hih thu-ah pawlpi ahih keileh thu-um mite kipawlna sungah hong lutna zong kihel hi. Amaute dinmun ah a om dingin nang le nang kingaihsun in. Biakinn ah na kikhop masak penna thu ngaihsun in. Nang tuah bangin amau zong a tuakkha uh hiam? Koi bangin na pawlpi in pawlpi mite nungzui suahna-ah nungta dingin makaih hiam? Thu-um mite kipawlna thak khat na kipan ding hiam? Na thaneem nate kankhia in. Na pawlpi makai, siate tawh kikupna nei inla, amau tawh mapangin nasem khawm in. Koi bangin nungzui suahna-ah na kalsuan uh hiam? Koi bangin kipantahna na nei uh hiam?

 

FRIDAY                                December 29

Ngaihsutbeh Ding: “Hotkhiatna a kicin ciangin Pasian maipha hong ngahsak hi. Mihing khempeuh in mawhna sungah tung khin hi; vankhuanuai khempeuh a thakin kibawlpha kik ding hi. Mihing bek thamlo-in leitung in kipuahpha ding hi; Pasian sawl bangin a nungta mite in a tawntungin a nungta ding uh hi. Kum 6000 sung bang Satan in hih leitung a ukcip hi. Tu-in a kipatcila Pasian geelna a tangtung hi. “Sangbel Topa mi siangthote in Ama kumpi gam luahding uh a, a bei ngeilo kumpi gamh luah ding uh hi.” Ellen G. White, Patriarchs and Prophets, p.42.

Pasian hong hotkhiatna, Khrih hong kumkikma-in, leitung mun khempeuh ah hotkhiatna thu a pulaak ding ihi hi. A hong tung ding kisiatna tawh kipelh nadingin leitung mite tungah vauhilhkholhna a pia dingin Pasian sapna i ngah hi. Tua hileh leitung mite in leitung kibawlpha kik ding hi, ci-in Pasian kamciam tawh a nungta thei ding uh hi.

“Mi tampi in hotkhiatna nasepna-ah kihel dingin lunggulhna lianpi ka nei hi; i thu upna a thei nailo mi tampite in thuman amuh nading uh ahi hi. Mi tampi in vantungmi thumte thupuak tungtawnin thuman amu thei uh hi. Tu-in amaute in leitung mun tuamtuam ah tua thupuak a taangko kawikawi uh hi. Ka sepding ka masuan sepnopna lungsim ka nei hi. Midangte in thuman khuavak amuh nading lampi ka sialsak nuam hi. Topa in Ama galvante hong silhsakleh ka deih hi. Thu-um mite in kipumkhatin hong tung ding gimna thu vauhilh khol dingin sawlna hong kipia hi.” Ellen G. White, Letter 390, 1907 (unpublished).

Tu quarter sung i sin thute in Pasian hong hotkhiatna tawh kisai thu vive i sin hi. Tu kaalsung i kikup thu in i thukhupna-ah Mangmuhna Bu sunga Pasian le mihingte kizopna thu bulpite i kikum hi. Pasian hong hotkhiatna kicinzia cihte zong i pulaak hi- hih leitung kibawlpha thakin na khempeuh kibawl thakna thu i gen hi. Mawhna le siatna kisusiat ding thu in leitungah a lauhuai bel a hong tung ding thu himah taleh tua kisiatnate galah i ngah ding kamciamte hangin lungnop khamuanna tawh a nungta dingin Topa in hong deih hi.

 

Kikupding Dotnate:

1.       Tawntung lungdamna thu i cih in bangthu hiam? Bang hangin tawntung kici hiding hiam? Bang hangin i nasepna-ah tuathu in a guibel suak hiam?

2.     Bang hangin vantungmi thumte thupuak thupi takin gen i hiam? Zeisu bek mitsuan ding hihang, tua lote thu khempeuh, leitung kisiat ding vauhilh kholhna a kipan a hoihna omlo hi, ci thei i hiam?

3.     Koi bangin tu quarter sung i sin thute in hotkhiatna nasep thupi ahihlam hong theitel sak hiam? Nang le na pawlpi in nasem dingin sapna i ngah bangmahin hotkhiatna nasepna-ah a beisa hunte sangin hoihtak na kihelzaw thei ding hiam?