Pul natna sungin Na lamdan
BOLIVIA | July 8
Guillermo
COVID -19 pul natna hong laan sungin Bolivia gam in zong buaina namcin tawh kidim hi. Biakinn khempeuh kikhakcip hi. Sangkah cih zong om lo hi. Pulnatna kilawh mang kha leh cih lau-na hangin tua bangin mihon kikaihkhopna mun- biakinn, sanginn, cihte kikhakcip hi. Tua ahih ciangin El Alto khuapi-a om thu-um mi kim khat kikaikhawm uh a, biakpiakna a nei khawm uh hi.
Guillermo in
nakpi-in thungen hi. Hih bangin pulnatnate om hi mah taleh biakpiakna kinei lo
hi mah taleh, a lungsim khempeuh tawh thu a ngen hi. Tua bangin Guillermo in thu a nget ciangin a
lungsim ah ngaihsutna khat hong suak hi. Bang hangin khuapite nusia-in kuama
omlohna munte-ah biakpiakna kinei lo hi ding hiam, ci-in a ngaihsun hi. Thungetna
tampi a neih khit ciangin pawlpi mite huhna tawh khua kiim a om gamlakte-ah
biakpiakna a nei uh hi.
Hih bangin
gamlaka kikhawm pawlpi mite in Aymara kampau zang uh a, amau le amau “Wana
Quta” kici uh hi. A khiatna in “Bualtui kang” cihna hi. A kikhopna munun
mualbul vuktam mahmah na mun khat hi. A
kikhop masak pen Sabbath ni-in kikhawm dingin mi 8 bek hong pai uh hi. Kikhawm a hong pai mite in ahihleh lungkia
peuhmah lo uh hi. Khat le khat tha kipia ciat uh a, Sabbath ni hong tun sialin
tua bangin gamlakah a kikhawm uh hi. Tua bangin thungetna tawh mapangin Sabbath
khat khit Sabbath akikhopna vuah mi kikhawm hong kibeh lap toto hi. Kha thum
khit ciangin mi 100 val bang hong pha thei uh hi. Hong kikhawm mite lakah
Adventist thu-um mi, Evangelical pawlpi pan le pawl tuamtuam pan hong kikhawm
mite hi. Khuadamin, guahzu lakah gimin tawlin tua bangin kikhawm veve uh hi;
Thu-um mite in
lungkia peuhmah lo uh hi. Khangno uham hong pai tek uh hi. Tai nih phial bang
lamsiau-in hong kikhawm uh hi. Amaute ngaihsutna-ah
“Pasian in eite tawh hong omkhawm hi. Mainawt ding hi hang, ci-in khat le khat
kihanthawn ciat uh hi. Amaute in Pasian muanna nei-in Lai Siangtho sim bek tham
lo-in Pasian kammalte a lungngaingai uh hi. An ngawlin thungen zelzel uh hi.
Mual tungah khukdinin thungen uh a, gamlak mualtunga kikhawm ahih hangin tha
ngah thei mahmah uh hi. Mi tampi in hamsatna khat peuh a tuah uh ciangin Topa
zong pan uh hi. Cinatna, nasep neihlohna, hamsatna khat peuhpeuh a neih mateng
Pasian zon ding ngaihsun lo uh hi. Ahi zongin tua bangin hamsatna khat a tuah
uh ciangin Topa zong bek uh hi. Pawlpi mite in lungkhamna lunggimna a tuah uh
ciangin khitui luangin Topa zong uh hi. Khat le khat kihanthawn uh hi; “Ana ka
sep Topa hauhna in note kitangsapna khempeuh a hong sik ding hi.” Leitungin
pulnatna hangin lungmangin a om laitakin Pasian a muang mite in nisimin
nalamdang a mu uh hi. Hotkhiatna lungdamna thupuak in khawl hun nei lo-in a
tawntungin mainawt den hi. Hih thu hangin mual tung gamlaka kikhawm mite lak panin
mi 13 in tui kiphumna nei thei uh hi. Tu-in hih mualtunga kikhawm mite kibehlap
toto uh a, pawlpi mi 50 bang pha thei uh hi. Tu-in gamlakah kikhawm nawn lo-in
inn khat saap uh a, tua munah kikhawm ta uh hi.
Pulnatna om hi
mah taleh thu-um mite in lungkia lo-in
gamlak mualtung khawngah kikhawm veve uh a, tu-in pawlpi lian khat hong
suak thei hi. El Alto khuapi-in Bolivia gamah a lian nihna khuapi khat hi. El
Alto khua sung mun tampi in Adventist biakinn nei zo nai lo uh hi.
Tu quarter
Sabbath School 13na sumpi in El Alto khuapi-a om Adventitst thu-um mite kikhop
nading biakinnte lam nadingin kipuak ding hi.
