MUC

Print Friendly and PDF

Wednesday, July 12, 2023

Ka sung a la khat BOLIVIA | July 15

Ka sung a la khat
BOLIVIA | July 15
Gabriel

 

Lasa siam mi minthang kim khatte in lasak nuamsa mahmah uh hi; a neutung uh a kipan music le lasak uk ngiat uh hi.  Ahi zongin Gabriel in tua bang hi lo hi. Amah pen Bolovia gam La Paz khuapi-a teeng khat hi-in Jesuh itna a nei mahmah khat hi. A suah a kipan a nu in Jesuh hong itna thute a genpih tangtang hi. Amah in Thukham Sawmte zong thei-in Sabbath thupiak zong a thei mahmah khangno khat hi. Thukham in Pasian zia le tong kilangsak hi, ci-in zong a thei hi. Sumpi piakna, sawmah khat piakna cihte a thupi-na zong tel mahmah hi.      

Kum 9 a phak ciangin a nuntakna Jesuh tungah kipia dingin khensatna nei-in tui kiphum ding a ngaihsun hi. Ahi zongin hun hong bei toto-in music lam ukna hong nei hi. Leitung lasaknate tawh nuamsa mahmah hi. Gabriel in a sangkahna-ah  gualnop lasakna cihte zong a sa zelzel thei hi. Tua bangin a lasakna panin music tuamtuam a tum mite tawh kimu kha-in amah zong kihel dingin sapna hong ngah hi. Amah zong kihel dingin a khensat hi. Tua bangin tumging tuamtuam tumin hong omna pan mi minthang khat hong suak hi. Kum 19 a phak ciangin lasak le tumging tumna tawh nungta khuasa dingin hong khensat hi. Gabriel  University ah sangkahin om a,  tua bangin lasakna tumging tumte tawh kitah kawikawi-in a om ciangin khat veivei “ ka kalsuanzia in a khial hi ding hiam? ci-in ngaihsun kha zel hi. Khua sung mun khatah tuahsia dektak ngei hi. A laisin a zawh khit ciangin zong lasakna le tumging  tuamtuam tumnate-ah va kihel kawikawi thei hi. Lawm le gual zong tampi nei-in ut bangin om uh a,nuamsa mahmah uh hi. Amau group in khuakim khua paam te ah pai kawikawi thei uh a, lasakna le tum ging tumna nei te tawh hong pai uhhi.

          Gabriel in tua bang lasaknate le tumging tumnate hangin a lungdam mahmah hi. Gual nopna (night clup) cihte-ah zong pai zelzel in lamna tawh asum le apaai a hunte a mawkbeisak hi. Amah bel lasak le vanlei zong siam hi. Gabriel in lasak nuamsa mahmah  hi.  Tua bangin leitung nopsakna tawh a nuntak hangin a kisam khat omlai hi, cih a lungtang in a phawksak den hi. Nuntakna in bangmah man lo hi, ci-in ngaihsutna khat hong nei hi. Tua bangin leitung nopsakna tawh nungta ahih hangin Adventist biakinnah kikhop ding a pelh ngei kei hi. Sabbath ni zingsang hun lamteng pen Khristian thu-um mi khatin nungta hi mah taleh  biakinn ah biakpiaknate a zawh khit ciangin leitung gualnopna sungah nungta kik leuleu hi.

Sabbath ni khat a kikhopna-ah Pasian phatna lasakna khat a ngai kha hi. Tua bangin Pasian min phat a lasak ding lunggulhna lianpi hong nei thei hi. “ Ken zong hih bangin biakinn sungah Pasian phatna lasa nuam ing,” ci-in khensat a, “ Tua bangin a khensatnate a nu in thei hileh nuam mahmah ding hi,” ci-in theihna zong a nei thei hi.  A sawt lo-in Gabriel in biakinnah manman in kikhawm hong pai den hi. Zingsang hun bek kikhawm hi nawn lo-in biakpiakna hun khempeuhah biakpiakna nei-in hong kikhawm den hi. Adventist lasa siam tuamtuamte lasaknate zong ngai kawmkawmin a om hi. Tua panin leitung nopsaknate nusia dingin hong khensat hi. Lasa siam minthang khat suah ding a lunggulhna nusia zo tuan lo hi. Pasian huhna ngah dingin thungen hi.

Tua leh Covid-19 pulnatna hong tung hi. Na khempeuh kikhak mang khin hi.  Gabriel in a pua lamah la sa thei nawn lo  hi. Tua bangin lungkhamin a om laitakin lungsim suahtakna khat  hong ngah hi. Kimanna nei lo leitung thute nusia dingin ngaihsun hi. Tu-in Dawimangpa khemna sung panin suakta-in Pasian deihna tawh kituakin nungta dingin a khensat hi. Biakinn a a lawm a gualte le Pastor tawh kimel theihna hong nei semsem hi. Pastor in Lai Siangtho thusinna nei dingin a zawn hi. Gabriel in zong Pastor tawh Lai Siangttho thuthuk sinna hong nei thei uh hi.

A nuntakna khempeuh Jesuh tungah kipia-in tui kiphum ding hong ngaihsun hi. Gabriel in Covid pul natna hong tunkhit kum khat ciangin tui kiphumna nei hi. Tui kiphumna thungetna-ah Gabriel in hih bangin a pulaak hi: “Leitungah Topa Pasian simloh i lunggulh ding  bangmah om lo hi. Leitung nate in a  mawknapi hi; tua hi-in i nuntakna khempeuh amah  i ap ding kisam hi. Nuntakna bek tham lo-in siamna tuamtuamte zong Topa tungah i ap ding kisam hi” ci-in pulaak hi. Tui kiphum khit ciangin Gabriel in  Zoom tungtawnin Pasian min phatna lasakna a nei thei hi. Pawlpi  makaite siate in lungsim ngaihsutna tawh kisai (Psychology) thusinna pia dingin pulaak uh  hi. Gabriel in zong mang thei pah a, khangno le  uham tampi in thusinna zong a nei thei uh hi.

          Gabriel in khangnote tungah hih bangin a pulaak khia hi: “ Khrih tawh kigamla dingin zia-etna na tuah uh ciangin Jesuh bek mah mitsuan un. Na hun uh a mawkna-in beisak kei un. Mimal khat ciatin Pasian hong piak siamna i nei ciat hi. Ama min than nadingin  tua siamnate i zat ding ahi hi.”

Tu quarter Sabbath School 13na sumpi in  Bolivia gam., La Paz khuapi-a Pawlpi nasepna huh nadingin kipuak ding hi.

 

To get the latest update of me and my works

>> <<