Pasian tung bekah Kinga
BRAZIL | September 17
Marcelo
Marcelo in a nuntakna khempeuh Jesuh tungah a kipiak a kipanin a sepna khempeuh ah daupai-na a ngah hi. Tua leh a nasepna company ah mi hon khatin nasepzia makaih hong kipan uh a, ama nasepna hong nawngkai sak uh hi. Manager thak in nasep hun sung khiam a, Saturday le Sunday ni-in nasem dingin pulaak hi.
Sabbath ni-in
nasem ding cih pen Marcelo in ngaihsun thei lo hi; a cih nading thei lo-in
cimawh mahmah in om hi. Sabbath siangtho takin tawlnga mi khat ahihna tawh
kizui-in Sabbath ni-a nasem ding cih pen hi sa thei lo hi. SDA a suah tung a
kipan a zi tawh citakin thu zui nupa khat ahi uh hi. Tua bangin pawlpi upna
tungah a citak uh kum 3 bang val khin ta hi.
Marcelo in
bangle bangle ci-in company makaite kiangah Saturday ni nasem thei lo ding
ahihna thu a pulaak hangin ama ngetna a pia thei tuan kei uh hi. Nasem mi
khempeuh in nasep manman ka sem mah ding uh hi,cih thukimna letmat thuh khin uh
hi.
Marcelo bek in letmat thuh nuam lo hi.
A mailam thu ding a ngaihsut khak ciangin lau-na tawh kidim hi. “Ka nasepna pan
hong kikhawlsak diam? cih patau mahmah hi. Bang thu tuak ding cih thei khol lo
ahih manin lunghimawh den hi.
“Ka lungkhamna
khempeuh Topa ap ning” ci-in khensatin tua a kipan lungnopna khat nei thei hi.
Pasian in hong nusia peuhmah lo ding hi, cih a lungmuang thei hi. A nasepna
company sungah buaina lian semsem hi.
Macelo in a kisawl bangbangin manmanin nasem thei hi. Ahi zongin
Saturday ni hong tun ciangin nasem kuan lo-in biakinnah kikhawm dingin hong pai
hi. Monday niteh nasem dingin hong pai ciangin a naseppih lawmte in nasepna pan
kikhawlsak dingin ngaihsun uh ahih manin lamdangsa thei mahmah uh hi. Nite hong
cing toto-in manmanin nasep lut thei hi. Amah mah in zong lamdangsa hi;hih pen
Pasian hong ompihna hi, cih ding sim loh a gen ding thu dang bangmah thei lo
hi. Kha sum sanni hong tun ciangin Marcelo in Saturday ni nasem a kuan lohna
hangin a khasum kidoksak ahihlam hong thei hi. Marcelo in bangci bangin a
innkuan un nungta thei ding cih lunghimawhna tawh kidim hi. A zi in naupaai hi
lai ahih manin innkuan sung sumzeekna hong
hamsa semsem hi.
A nasepna
company ah nasep lut suak ding lem nawn lo hi, cih hong ngaihsun hi. A
naseppihte in zong ciamnuih bawl thei zel ahih manin nasepna mun laih ding
ngaihsun hi. A lawmte khat in Marcelo hopih a, “ A haipi nai ve; a thadah hi teh!
cih san hi. A lawmte khat mah in Marcelo tungah Pasian in bangci bangin hong
makaih hiam, mu nuam peuhmah ing” ci-in hopih hi. Hih a lawmte kampaute Marcelo
lungsim ah mang ngei nawn lo hi. Marcelo in na khempeuh Topa ap thei hi. Kha 4,
kha 5 khit ciangin Marcelote nupa in pawlpite huhna ngah thei uh hi. Ahi zongin
sum kisam den uh hi mah taleh Topa tungah citak ding bek a khensat uh hi.
Tawlkhat khit
ciangin Marcelo naseppihte khat in Marcelo in nasep hahkat mahmah ahihlam hong
mu khia hi. A naseppihte in zong Marcelote nupa huhhuh uh hi. Tua leh a lawmte
kipawl uh a, Manager pa tungah Marcelo adingin huhna ngen dingin letmat thuhsak
uh hi. Saturday ni nasep a kuan loh hangin a nidangte ah nasep hanciam mahmah
ahih manin kha sum a bitin piak dingin thuumsak uh hi. Tua bangin a ngetna uh
kipia lo hi. Kum nih bang cingkhinta, Pasian in Marcelote nupa nusia lo-in
kitangsapna khempeuh a sikh tawntung Pasian hi. Marcelo in David pulaak thute
tawh nungta hi. “ Topa tungah a citak mite khut dawh ngenin vakvai ka neutung
akipan ka mu nai kei hi” (Late 37:25).
Pasian in Marcelo cihtakna ciaptehsak hi.
Ni khat Marcelo
in lamet lohpi-in manager tung pan lai-ip khat ngah hi. Company makaite in
Marcelo tungah thuman lo takin na kisem hi, cih thei uh ahih manin a kha sum
akipia lo teng khempeuh pia kik ding a zasak uh hi. Marcelo in Saturday ni-in
nasem a kuan lohna hangin kha sum a kimin a ngahloh pen thuman lo hi, cih thu
makaiten zong phawk ahih manun tua bangin a kipia lote piakkik ding ahihna thu
a zasak uh hi. Hih bangin zaksakna amuh
uh ciangin Marcelote nupa lungdam lua-in,Topa tungah lungdam a ko uh hi. Pasian
in i thungetna hong dawng hi, ci-in lungdamna a pulaak phapha uh hi.
Marcelo in hih
company ah kum 14 sung bang na a sem suak theilai hi.”Pasian tungah i cihtak
laiteng Amah in hong kem tawntung ahihna, Ama thupiak bangin nungta dingin i
khensat laisiah Pasian hehpihna in hong zui tawntung hi, cih ka thei hi, “
ci-in Marcelo in pulaak hi. A naseppih tampi in zong Topa tungah cihtakna thu
theihbehna-in a nei uh hi. “Amauten Pasian in na khempeuh hih thei hi,” cih a
mu uh hi.
Tu quarter Sabbath School 13na sumpi in Brazil gama
pawlpi nasepnate huh nadingin kipuak ding hi.
Mai Sabbath in quarter cin Sabbath ahih manin sumpi Ii
khiat ngei a zah thum khia dingin kiging ciat ni.
