LESSON 8 | MAY 13-19 SABBATH LE LEITUNG BEI-NA

LESSON 8     MAY 13-19

SABBATH LE LEITUNG BEI-NA

 

SABBATH NITAK

 

Tu Kaal sung sim Ding: James 2:8–13; Thkna. 5:12–15; Late 33:6, 9; Mang. 14; 2 Pet. 3:13; Mang. 21:1.

KAMNGAH: “Pasian in a geelsim thute a kisep khiatna thu mi khempeuh a musak dingin Pasian in kei tungah hih hamphatna hong pia hi” (Ephesians 3:9).

 

Mihingte manneihna bulpi in piansakna mah hi. Pasian mai-ah mihing khempeuh in mihing manphatna kikim kibang khin hi. Nu sunga om a suak khia nai lo naungek a kipan naupang a tei pha mel lote, Down natna ngahte, Alzheimer natna neite a kipan mi khempeuh manphatna in kikim hi; Pasian mai-ah a manpha mihing ihi hi. Pasian tanu tapa vive ihi hi. Bang hang hiam cihleh “Tua Pasian pen leitung buppi le a tunga om khempeuh a piangsak Pasian hi a, van le lei a uk Topa ahih manin mihingte’ lamsa biakinn sungah teng lo hi. Amah pen mi khempeuh tungah nuntakna le na khempeuh a piapa ahih manin mihingte in ama a dingin na khat peuhpeuh a sepsak ding a kisam ahi kei hi. 26Mihing khat tung panin leitung minam khempeuh hong piangsakin, leitung khempeuhah a omsak hi. Amah in mihingte a piansakma pekin, mihingte’ nuntak tanvei ding le a ten nading uh mun a sehsa ahi hi” (Sawl. 17:24–26).

I nuntakna in Topa Pasian tung panin i ngah ciat hi; tua hi-in a kibang nunna a nei ihi hi. Mihingte in innkuan khat ihi hi. Sanggam u le nau ihi hi. Pasian in a kibangin a hong bawl ihi hi. Piansakna hangin i nuntakna in mannei hong suak hi. Pasian in lamdang takin genes le chromosomes kigawmkhawmin nunna anei mihingin hong bawl ihi hi. Amau le amau thu tawh nuntakna nei ding dinmunah Pasian in hong koih lo hi. Vankhuanuai-ah nang tawh kibang linlian midang a om kei hi; nang bek mah na hi hi. Na nuntakna in a tuam vilvel nunna hi; piansak nate lakah a kihelkha na hi hi. Vankhuanuai khempeuh a bawl Pasian in mihingin hong nungta-in mawhna hangin sihna hong thuakna thu in lamdangin i tel zawh loh thu hi.

 

SUNDAY                                 May 14

Thukhenna, Piansakna Le Mawhngawh Neihna

 

Africa zawng nam khat panin a piang khia hi lehang, annek manin a nungta hi lehang, nuntakna in man nei het lo ding hi; a nungta pek bek mah ihi ding hi. Ahi zongin Lai Siangtho hong hilh thu i ngaihsut ciangin nuntakna in mannei-in ngimna tawh a hong kipiangsak ihihlam kimu thei hi. Pasian in a hong piansak, a hong bawl mihing ihi hi. Tua hi-in i gamtatna bangin Pasian in thu hong khen ding ahihna thu zong i thei hi. Eite hong Piangsak Pa in i nuntakzia buppi thu hong khen ding ahihna thu zong hong hilh hi. Amah in i nunzia ding hong geelkholhsakin a kikhel ngei lo a kip tawntung lampi nunzia ding ahong hilh khin hi. Mang.14:7, Romans 14:10, le James 2:8–13 sim in. Thukhenna in masuan le mawhpuak hong suan hi lo hiam?Koi bangin thukhenna, biakpiakna le Pasian thukhamte cihte in kizopna nei hiam?

_______________________________________________________________ ___________________________________________________________

Vantungmi thumte in vankimlai-ah leeng uh a “ Topa Pasian thukhennna hun hong tung zo hi,” ci-in pulaak uh hi (Mang.14:7). Pasian hong piansak ihih bang mahin sia le pha khentel theihna nei ihih manin i khentatna bangbang, i gamtatna bangin a gah a atkik ding ihi hi. Pasian hong piansak hi lo-in, nate tung panin a piangkhia-tawm hi lehang, thuman le thuman lo khentel theihna, sia le pha theihna i nei kei ding hi. Kim le paam nate hong uk hileh i khensatna le gamtat zia le tong a gah at ding cih thu om lo ding hi. Tua hi-in thukhenna in sia le pha khentelna thu hong theisak hi; i vawh bangin a gah a atkik ding ihi hi. Leitung hun beikuan a gimnate tungtawnin Topa Pasian in eite hong sam hi. Tawntung nuntakna lampi tel zaw dingin a hong sam hi.

Vantungmi masa thupuak in “Vantung, leitung, tuipi le ciktuite a Piangsak Pa bia dingin hong sawl hi (Mang.14:7) Biakpiakna thu bulpi in Pasian in eite hong piansak ihi hi, cih thu tungah kinga hi. Tua hi-in piansak ni sagih Sabbath ni i upna in Jesuh in eite hong Piangsak Pa ahihna tawh Amah in biaktak cing hi, ci-ina pulaak ihi hi. Hih in Ama thukham in Pasian humopna tawh kigelh nuntakzia ding thu guipite kicingtakin hong lak hi. Tua ahih manin Thukham in Pasian ukna bulpi banah Ama zia le tong a hong hilh hi.Thukham in thukhenna-ah siksan thu bulpi hi. Sabbath thupiak tungah i cihtakna in nuntakna buppi tawh Topa tungah kipiakna, Ama sawl bangin nuntakna hi.

Koi bangin piansakna thu theihtelna in i zia le tong hong huzaap hiam? Nu le pa tung pan i luahsuk zia le tong le kim le paam huzaapte in nisim nuntak khuasakna hong huzaap hiam? Koi bangin Pasian hong hehpihna in zongsatna hoih lote tungahzawhna hong guan hiam?

 

MONDAY                                   May 15

Sabbath le Piansakna

 

Leitung le a sunga om na khempeuh in Pasian piansak hi, ci-in i theih tawntung nadingin Pasian in Sabbath hong pia hi. Kum 1800 huam sungin nate in amau thuthu tawh hong piang hi; piansakna om lo hi, cih upna hong khangkhia hi; hih bang up khialhna hong khankhiat laitakin vantungmi thumte thupuak a tangko khia dingin Pasian in a pawlpi hong piangkhia-sak hi (Mang. 14:6, 7).

Satan in piansak thu upna susia nuamin lampi tuamtuam tawh do tawntung hi.Hih thu hang mahin Satan in Jesuh mudah tawntung hi; Jesuh i biak ding Satan in deih lo-in hong langpan tawntung hi. Jesuh in i Honpa le i Tanpa hi, ci-in Amah i biak ding Satan in deih lo hi.Sabbath in Kido-na Lianpi-ah a thu bulpi hi. Khrih in biak tham cing biaktaak cing hi; Amah in Piangsak Pa hi; vantung le leitung na khempeuh a Piangsak Pa hi, cih thu in leitung hun bei ciang a Pasian kiang pan thupuak nunung hi. Hih thu siksanin Amah a bia ihi hi.

Mang. 14: 6,7 siksanin Pian. 2:1–3, Pai. 20:8–11, le Thkna. 5:12–15 sim in. Koi bangin Sabbath thupiak in Piansakna le Hotkhiatna tawh kizopna nei hiam?

____________________________________________________________ ___________________________________________________________

 

Sabbath in Ama sungah tawntung nunna, tawldamna limcing hi. Piangsak Pa tungah citak le citak lohna limciinna lim khat hi (Ezek. 20:12, 20). Sabbath sianthosakna in Thukham zuihna tawh Pasian maipha zonna hi lo zawin, Sabbath tawlngakna in Topa sungah dikna, kalsuann le tawlngakna taktak hi zaw hi. Sabbath in eima tha tawh i cin zawh loh thute Pasian in a hong sepsakna pulaak hi.Siangtho in Sabbath hong tunsialin Topa sungah tawldamna le Ama itna ngah dingin hong sam tawntung hi. Sabbath in tawlngakna, nasepnate pan khawlna limcing hi; gamtatna hang hi lo-in hehpihna le Ama tungah kingakna hangin mawhsakna tawh a kipelh thei ihi hi. Sabbath sialin Ama nopna, hoihna sungah nuamsa-in Amah phatna lasa-in, Khrih sung bekah kingah hotkhiatna hangin Amah i bia hi. Sabbath in tawntung nunna le a beisa hun a Eden kicinna kizopna hi-in, vantung thak le leitung thak tawh zong kizopna hi;a beisa hun le mailam hun kizopna hong suak hi (Isa. 65:17,Mang. 21:1).

Sabbath in i piankhiatna hong phawksak hi. Piansakna thu hong phawksak hi. Mihing i kipatkhiatna hong theisak hi. Leitung piancil a kipan Sabbath hong kipan hi. Leitung piancil a kipan tu dong kitatsat lo-in a hong kizom toto Sabbath hi. Sabbath tawlngakna in Pasian tanu tapa ihihna hong mitsuansak hi. A hong tung ding vangliatna mitsuanin kalsuan ding hong hilh hi. Sabbath tawlngakna in Topa tawh naitakin kizopna hong neisak hi. Koi bangin Mang. 14:6,7 in Sabbath thupiak hong hilh hiam? Bang hangin leitung hun beikuan ciangin Sabbath in thupi semsem ding hiam? (Pai. 20:8–11.)

 

TUESDAY                                  May 16

A Neu Lo Zuau Khemna

 

Piansakna thu in thupi mahmah khat hi; hih thu suksiat nadingin Dawimangpa in a simthamin zuau-khemna zang tawntung hi. Tua bang zuaukhemnate thuum mi tampi in um uh hi. Hih bangin zuau khemna khat in “Pasian in nate piangsak mah hi; tua bangin a piansak nadingin kum tul zalom tampi kisam hi. Tua bangin a piansakna-ah Pasian in nate amau thuthu-in a piang dingin thupia hi, ci uh hi. Hih bangin ngaihsutna in leitung pilna le piansak thu kigawm hi. Pasian in nate a piansak nadingin kum tul zalom tampi kisam hi, ci uh hi. Late 33:6, 9 le Hebrews 11:3 sim in. Hihte in koi bangin Pasian in leitung piangsak hi, ci-in hong hilh hiam?

__________________________________________________________ ___________________________________________________________

 

Lai Siangtho hong hilh thu in kician kitel mahmah hi.Pasian in “Thupia in a thupiak bangin nate hong piangpah hi” (Late 33:9). “Pasian’ kampauna tawh leitung le vantung piang a, tu-a i muhtheih nate a om nai lopi panin hong piang hi, ci-in i upna bek mah tawh a thei ihi hi.” (Heb. 11:3). Piancil 1 sungah zong Pasian in piansak ni guk sungin na khempeuh piangsak ahihna thu kimu thei hi; a ni sagih ni in Sabbath hi, ci-in hong hilh hi.

Pian. 1 le 2 in Pasian thupiakna tawh nate hong piang ahihna thu hong hilh hi.Tua lo thu dang bangmah om lo hi. Piansak ni khat in nai 24 sung hi-in, kum tul za tampi hi lo hi. Lai Siangtho thu thuk kantel mi kim khat in ni guk sungin Pasian in ni guk sungin leitung le a sung aom nate kipiangsak hi, cih thu um lo uh hi. Piancil bu in piansakna thu a hong hilhna hi lo hi, ci uh hi.Hebrew kammalah “yom” a khiatna in “ni” cihna hi. Piancil 1 sunga kizang kammal hi. Lai Siangtho buppi sungah “yom” kammal a kigelhna khempeuh in nai 24 ni khat ahih keileh ni khatna, ni nihna, ni thumna cih bangin a pulaak kammalin kizang hi. Tua hi-in “ni” khat in kum tul zalom a sawt hi lo hi. “Ni khat” i cih in nai 24 sung bek hi; tua val hi lo hi. Hih thu tawh kizui-in Pasian in ni guk sungin na khempeuh a piansak hi lo hileh Sabbath ni in khiatna nei lo suak ding hi.

Bang hangin Pasian in Sabbath ni, ni sagih ni tawlnga dingin thu hong pia hi ding hiam? Piaksak nite in nai 24 sung hilo-in kum tul zalom tampi sawt hi leh Sababth ni tawlngakna zong a om thei lo suak ding hi. Tua hi-in nate kipiansak nadingin kum tul zalom tampi kisam hi, cih upna in ni sagih ni Sababth a nial suak hi. Tua banah Lai Siangtho hong hilh thute nialna zong suakpah hi. Sabbath langpanna tawh Satan in Pasian ukna a nial hi. Ni guk sungin na khempeuh kipiansakna thu nialna in Pasian thuneihna le ukna nialna hi-in, hih sangin a lian zaw Pasian langpanna bang om ding hiam? Khristian tampi in piansakna le ni sagih Sabbath thu nial uh hi. Hih thu sangin Satan hong khemna le zuau lianpi om ding hiam?

 

WEDNESDAY                                                         May 17

 Piansakna, Sabbath, Le Hun Nununga Zuau Khemna

 

Kido-na Lianpi in vantung panin kum tul val khin hi. Hih kido-na in Pasian ukna nialna langpanna hi. Hih thu in tuni dongin beisiang nai lo hi. Mang. 14:7, 9, le 12 sim in.

 

A nuai-a thute a tomin bang pulaak hiam?

 

Mang.14:7 bang thu zui dingin hong sawl hiam?

______________________ ___________________________________________________________

Mang.14:9 Bang thu nial dingin hong sawl hiam?

_____________________ __________________________________________________________

Mang. 14:12 Bangci bang mite pulaak hiam?

________________________ __________________________________________________________

 

A tunga Mangmuhna bu pulaak thute in leitung hun bei ciangin biakpiakna tawh kisai buai-na, sia le pha kido-na, Satan le Khrih kilangneihna thu pulaak uh hi. Piangsak Pa a bia ihi hiam? Ahih keileh Sapi a bia ihi hiam? I upna thu khempeuh in Piansakna thu tungah kinga ahih manin ni sagih ni Sabbath le Piangsak Pa biaklohna in khialhna lianpi hong tunpih hi lo hiam? Pian. 2:1–3 pulaak bangin Sabbath in Piansakna thu le a kikhel ngei lo Pasian hong phawksak hi lo hiam? I thu upna khempeuh phungpi hi lo hiam? Hih thu khitah a thu bulpi in Pasian bek mah hi lo hiam? Tua hi-in ni sagih ni Sabbath nialna in Topa thuneihna le ukna langpanna hi;Piangsak Pa langpanna lian mahmah khat hi.

Sabbath thu nialna in na khempeuh zung panin zunglotna suak hi. Pasian mahmah nialna, langpanna taktak hi (2 Thess. 2:4). Leitung hun bei ciangin i tuah ding a thupi mahmah thu khat in Jesuh tungah citakna le Amah itna hi. Lai Siangtho hong hilh bangin Jesuh a it mi khempeuh in Ama thupiakte nial lo-in nuntakpihna hi (1 John 5:3, Mang. 14:12); Sabbath bek mah in tua itna nei le neil lo hong khentel hi. Thupiak khempeuh tungah Sabbath thupiak om hi. Bang hang hiam cihleh tua thupiak bek in Pasian in Piangsak Pa hi, ci-in hong hilh hi (Pai. 20:8–11). Sabbath thupiak in Topa a bia taktak le Sapi biakna hong khen ding hi (Mang. 14:11, 12). Tua hi-in Sabbath thupiak in na khempeuh le thu khempeuhah a thu bulpi hi, ci-in na mu thei hiam? Piangsak Pa biak ding simloh thudang om thei lo ahihna na mu thei hiam? Mi tampi in ni khat peuhpeuh tawlnga lehang Sabbath tawlngakna hi, ci uh hi. Lai Siangtho siksanin hih bang ngaihsutna dawng in.

 

 

THURSDAY                                          May 18

Sabbath Le Tawntung Tawlngakna

 

Sabbath tawlngakna in leitung gimnate lakah tawlngakna bukna mun kip khat hi.Nipi kal hong tun simin Sabbath in leitung lunghimawhna gimnate paisanin, Topa sungah tawldamna ngahna ni hong suak hi. Jew mi minthang laigelhsiam Abraham Heschel in Sabbath in “kaal khat sungah kumpi inn sung bangin tawldamna ni hi, ci hi. Ni sagih ni in Pasian in vantung tokhom leitungah ahong tuahsuk ni hi.

Nitu khat pan nitum khat ni khat, nai 24 sung, Sabbath niin, Topa in Ama vangliatna sungah om dingin hong sam a, Amah tawh kikhawlkhopna nei dingin hong sam hi. Heschel laigelhna khatah Sabbath siangtho-na le a deihhuaina, a thupina hih bangin gelh hi:” Sabbath in paradise limla hi. Pasian ompihhna limcing hi; i thungetnate in Messiah tawh nuntakkhopna in Sabbath hi ding hi. Hih bangin Topa tawh kizopna nei thei dingin Sabbath ni hong tunsialin kiginkholhna hong neisak hi. Sabbath nopna sungah i om kei leh a hong tung ding leitung thak nopna nuam kisa zo lo ding hi.” Piansakna-ah Jesuh in eite adingin teenna mun hong bawlkholhsak hi. Tua munah eite in bitna i ngah thei hi. Lungmuang takin tua munah i om thei hi. Ama nasep in kicing khin hi. Piansakna kizo siang hi. Sababth ni-in i tawlngak ciangin Ama hong itna sungah a tawlnga ihi hi.A sawt lo-in hong tung ding vantung thak le leitung thakah tawlngakna lamenin i nungta hi.

Isaiah 65:17, Isaiah 66:22, 2 Peter 3:13, le Mang. 21:1 sim in. Koi bangin Sabbath in tawntung hong lak hi.

 

__________________________________________________________ ___________________________________________________________

 

Hun khat lai-a na khempeuh a Piangsak Pa in na khempeuh a thakin hong bawlpha kik ding ahihna Sabbath in Piangsak Pa limcing hi (Isa. 66:23). A taktakin Jew mite in Sabbath pen vantung tawldamna lim hi, ci-in Hebrew laimal tawh “olam haba” ci-in pulaak uh hi. Vantungmi thumte thupuak in tuhun kum zalom sawm nih le khat sunga lunggimna buai-nate lak panin tawldamna, lametna thu hong hilh hi. Hih thupuak in Piangsak Pa hong hilh hi. Amah in na khempeuh kipatna, eite Honpa, a hong paikik ding Pa le thukhenna khit ciangin mawhna khempeuh beisiangin na khempeuh a thakin hong bawlpha ding Topa Pasian hi, ci-in hong hilh hi. “Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi” (Mang. 21:5). Koi bangin nang le na innkuaan adingin Sabbath in vantung nopna hong ciamkholsak hiam?

 

FRIDAY                     May 19

NGAIHSUTBEH DING: “Pasian in Piangsak Pa ahih manin Amah biak ding ahihna hong hilh hi. Vantung mite in Pasian min a phatna uhah hih bangin kimu thei hi: ‘Topa Pasian in na khempeuh na piangsak hi.” [Mang 4:11). Leitungah na khempeuh in Pasian piansak hi, cih thu kiptak le kho takin i pulaak ding kisam hi. Tua hi-in vantungmi in Vantung, leitung, tuipi le ciktuite a Piangsak Pa bia un,” ciin hong sawl hi. [Mang. 14:7). Vantungmi masa in THukham nambat li-na thupiak, Pasian biak ding ahihna thu pulaak hi, ci-in kimu thei hi (Pai. 20:11) . . .. “Thukham Sawm sungah Sabbath thupiak in kua in Pasian hi, ci-in hong hilh hi; Amah in Piangsak Pa hi; Amah in na khempeuh tungah ukna nei ahihna hong hilh hi. Gulpi tungah zawhna i nadingin Topa Pasian in tua zawhna limcing dingin Sabbath hong koihsak hi.”—Ángel Manuel Rodríguez, “The Closing of the Cosmic Conflict: Role of the Three Angels’ Messages,” pp. 40, 41.

 

 

KIKUP DING DOTNATE:

 

1.       Koi bangin Sabbath thu puak in dotna thupi- koi pan piang ihi hiam, bang hanga nungta i hiam, tawntung nunna i cih in bang thu hiam cihte hong theisak hi.

 

2.       Piansakna thu in lamdangin thupi hi. Vankhuanuai –a om na khempeuh in lamdangin i tel zawh loh thu tampi om hi. Piansakna thu hong phawksak thei ding in bang hi ding hiam? Tukaal sung i thusin in Piansakna thu upna in bangzahin thupi hi, cih hong phawksak hiam?

 

3.       Daniel 3 le Daniel 6 in koi bangin biakpiakna thu hong hilh hiam? Hih thute in leitung hun bei ciangin “sapi ciaptehna” hun hamsa hong tun ciangin Pasian mite cihtakna thu bang hong hilh hiam?

 

4.      Nate kipiansak nadingin kum mak tullum kisam hi, ci-in a um mite tungah koi bangin Sabbath tawlngakna in tua bang upna man lo ahihna na pulaak ding hiam?