LESSON 7 | MAY 6-12 PIANGSAKPA BIA

LESSON 7                           MAY 6-12

PIANGSAKPA BIA

 

Sabbath Nitak

Tu Kaal Sung Sim Ding: Mang. 1:9, Isa. 40:26, 2 Kor. 5:17, Kol. 1:17, Mang. 4:11, John 19:16–30.

KAMNGAH: “Kote’ Topa Pasian aw, nangmah in na khempeuh piangsakin, nangma deihna bangin na khempeuh omin, na khempeuh kipiangsak ahih manin,minthanna, pahtawina, le vangliatna na ngah tawntung dingin a kilawm hi,”a ci uh hi (Mang. 4:11).

I nuntakna sungah i ngah thuphate ngah dingin kilawma ngah bangin kingaihsun kha pahpah hi. Naupangte in a nu le pa tung pan na tampi ngah uh a, a ngah ding mahin ngaihsun uh hi. Tua bang mahin nitang, huihdik, aksi, ni, kha cihte khe nuai-a leitang cihte hangin Topa tungah lungdam koh ding i mangngilh kha zelzel hi. Ahi zongin hih thute hangin Topa tungah lungdam koh ding mah hi, ci-in na ngaihsun ngei hiam? Bang hangin bangmah a om loh sangin nate om hi ding hiam? Cih thu na ngaihsun ngei hiam? Bang hangin vankhuanuai-a om na khempeuh in lamdangin tu-a bangin om thei hi ding hiam? Om lo ding hi leh zong a om lo thei thu hi. Tu-a bangin nate a om lo hi zenzen leh tu-adinmun tawh bang kilamdanna om ding hiam? Leitung pilna in a pulaak thu in hun khat lai-in vankhuanuai- nate om loh hun khat om hi, ci hi.

A dang khat in pulaak ding hi leng, vankhuanuai nate in a kip tawntung hi lo hi;a hunhunin a kikhel khel thei hi, cih hong hilh hi.Vankhuanuai nate in a om panin hong piangkhia hitaleh vankhuanuai a om theihna a hang in Pasian- Piangsak Pa in na khempeuh piangsakin nate kem ahih manin a om thei hong suak hi

 

SUNDAY                                        May 7

Buai-Na Lakah Hong Ompih

 

Vantung a kah khit ciangin Jesuh in nungzui John kiangah vahawh hi. John in tua laitakin Patmos tuikulhah a om hi. Roman ukpi Domitian in gawtin bawlsia-in tua bangin John in a mah guak tuikulhah a om hi. Mang.1:9 sim in. Matthew 13:21, Sawl. 14:22, le John 16:33 sim in.Jesuh nung a zui mite adingin bang thu puak hong gen hiam?

____________________________________________________________ ___________________________________________________________

 

Innkuanpihte, lawm le gual le thu uppih mite tawh kikhenin mun simtham khatah om John in gimna thuakin om hi mah taleh Jesuh ompihna a ngah hi. John in a sep ding zo nai lo hi.Ama teci panna in mansiang nai lo hi. Pasian tokhom panin vantungmi khat in khuavak tangpha mahmah khat tawh John kiangah thupuak va pulaak hi. Hih thupuak in khang tawntungin Pasian mite tungah Pasian thupuak hong suak hi. Tua thupuak in lametna tawh kidim thupuak hi. Khang khat pan khang khata a nungta Pasian mite tungah thupuak hi. Hih thu puak in Jesuh hong pai ding naita ahih manin mihingte kiginkholhna ding thupuak hi. Hun nununga a nungta mite in Khrih dawn dingin a hong kigingkholsak hi. Lau-na tam hun sungah thu-um mite tha a hong guan hi. John bukna leihawm sungah a lut dingin kingaihsun inla, vantungmi in nang hong cing dingin ngaihsun inla, Mangmuhna bu pulaak thu a kipulaak thu, hih mangmuhna hong pia dingin kingaihsun in:” ‘Pasian kihta unla, Ama vangliatna pulaak un. Bang hang hiam cihleh leitung, tuipi le ciktui a Piangsak Pa thukhenna hun hong tungta hi” (Mang. 14:7). Mangmuhna bu pulaak a thu bulpi in biakpiakna thu hi. Biakpiakna a nei dingin mihingin a hong kipiangsak hi. Mihing khat ciat in biak khat teitei i nei hi.Biakpiakna mantak in Piangsak Pa biakna hi; tua in nuntakna mungtuppi hong musak, hong phawksak hi; nuntakna manneihna hong hilh hi. Nuntakna buppi i piak ngamna thu bek tham lo-in nuntakna a thupina, manphatna hong lak hi. Bawlsiatna, gimnate zong a hong zosak thei hi. A taktakin a nunung bel gimna lianpi hong tun ciangin “Pasian ukna sung i lut zawh nadingin gimna lianpi i nawktan ding hi,” cih thu i tel semsem ding hi. (Sawl. 14:22). John bangmahin Pasian nasem mi citak ihih nakleh gimna hamsatna i pelh theih hi lo hi.

Bang thu in tua bang thute tuak kha lo dingin hong lamensak hiam? (1 Pet. 4:12–15.)

 

 

MONDAY                                 May 8

Piangsak Pa Bia

 

Mang.14:7sim in. Koi bangin vantungmi masa thupuak thu khupna kimu thei hiam?Thukhenna hun hong tung zo hi, cih thu in bang hong hilh hiam? (Isa. 40:26, John 1:1–3, le Rom. 1:20.)

 ___________________________________________________________

Mang.14:7 thu khupna-ah Piangsak Pa bia ding cih thu limtakin hong hilh hi. Hih thupiak in tu-in a thupi mahmah thu piak hi. Leitung pilna bek tham loin Khristian sungah zong na khempeuh in amau thu thu-in hong piangkhia tawm hi; piansakna om lo hi, ci uh hi. Tua bangin piansakna om lo hi mawk leh i upna in a mawkna suak ding hi. A thupi mahmah thu puak hong suak hi. Mangmuhna bu hong nget thu in a taktakin Lai Siangtho bu masa penpen Piancil bu in zong hong hilh hi. Piansakna thu i tel keileh vankhuanuai-a kidona lianpi buaipih biakpiakna thu i thei zo ngei kei ding hi. “A kipatcilin Pasian in vantungte le leitung a piansak hi” (Pian.1:1). Hih Pian. 1:1 in Lai Siangtho buppi kingakna khuam bulpi hi. “A kipatcilin Pasian in piangsak hi.” Hebrew kammalah “bara” kammal tawh kigelh hi; a khiatna in Pasian bek in a bawl theihna a pulaak kammal hi. Pasian vangliatna in ciangtan nei lo a, Ama vangliatna tawmno khat i pulaak thei bek hi. Ama bawlsa na khempeuhlak pan “ni” thu tawmno khat i en ding hi.

Ni in khuavak a kipan nitang pha mahmah hong pia hi. Sathau, gas le suang meihol le mei pangin “thahatna” (enery) sepzawhna kingah thei hi. Hihte banah Ni in na tampi sep zawhna tha hong guan hi. Ni golzia pen a nawl khat pan a nawl khat ciang 865,000 tai gamla hi;leitung liatna zah mak tampi-in gol zaw hi. Hih zahin a gol “ni” in aksi lompi le vuklam lakah (galaxy lakah) lakah khat hi bek hi. “Pistol Star” min nei aksi gol mahmah khat in leitung ni sangin a zah awn za tampi-in gol zaw tham hi. I leitung ni bang vive ni awn za khat bang “Pistol Star” sungah kiguang thei ding hi. Koi bangin hih zahin a lian piansak nate i lungsim in tel zo ding hiam? Piansakna in Pasian vangliatna le ciangtan nei lo Ama sepzawhna hong hilh hi. Ama vangliatna in vantung le leitung a piangsak hi. Tua hi-in A mite adingin a hong sem tawntung hi. Amah in Pasian hi; leitung a piana kipan, tuni le leitung a om laiteng Amah in A mite a nusia ngei kei ding hi.

Koi bangin hih zahin a lian piansak nate in Pasian hong itna pulaak uh hiam? Piansak nate tawh tehkak dingin eite in n cihtham hetlo hi mah ta lehang, Khrih in eite adingin sihna a hong thuak hi.

 

TUESDAY                                                      May 9

Ei Tawh Nai Takin A Hong Om Pasian

 

Piangsak Pasian in ni, kha le aksite a bawl hi. Na khempeuh in Topa vangliatna hangin a piang hi. Tuni dongin nate a om theihna in Topa vangliatna hang bek mah ahi hi. Amah in nate sungah nuntakna koih a, mihingte zong Ama hong piansak ihi hi. Amah in ihihna khempeuh a hong lunghimawh tawntung Pasian hi. Amah in Egypt gamah saltangin a om A mite a honkhia hi. Amah in amaute makaihin sehnel gamlakah amaute nek dingin vantung panin manna a pia hi.Amah in Jericho kulhpi kiciimsakin a galte uh khut sung panin a suakta sak hi. Na khempeuh a piangsak Pasian vangliatna in tuni dongin eite tawh hong om khawm a, a tawpnaah siatna vangliatna, mawhna thaman sihna a beimangsak ding hi. 2 Kor. 5:17, Late 139:15–18, Sawl. 17:27, le Kol. 1:17 sim in. Hihte in eite tawh naitakin hong om Pasian thu bang pulaak uh hiam?

__________________________________________________________ ___________________________________________________________

Lai Siangtho thuthuk kansiam tampi in Pasian vangliatna pulaak uh hi. Tua bangin a pulaakna uhah Pasian in piansak nate tungah omin, na khempeuh tungah ukna nei ahihna hong hilh uh hi. Pasian vangliatna a pulaak bangmahun mihingte tawh kinai takin ahong om khopna thu zong hong hil uh hi. Pasian in vanglian mahmah hi mah taleh mihingte tawh kinai takin a hong om Pasian hi. Hih bang thu in Pasian in vangliatna khempeuh tawh kidim hi mah taleh Amah in a bawlsa nate tawh kinai takin hong ompih ahihna thu kimu thei hi. Mihingte nuntak khuasakna, leitung thu piang, la piangte in zong Ama makaihna ukna sungah om hi, ci-in i khamuang thei hi. Topa in “a siangtho mun le a sanna munah om hi”mah taleh Amah in lungsim kiniamkhiat mi le lungsim kitamzan mi sungah zong a hong om hi (Isa. 57:15). Jesuh mahmah in zong a nungzuite tungah “Leitung mite in kei na hong sawlna thu a theih nading le kei na hong it mah bangin amaute na itna thu a theihna hangun amaute pumkhat a suah taktak theih nadingun amaute lakah kei ka om a, kei tawh nang na hong omkhawm hi” (John 17:23). Hih sangin kinai zaw le a hong ompihna kician zaw om nawn lo hi. I Topa Pasian thu tawh kisai lungdam huai thu lianpi in Ama vangliatna le minthanna in ciangtan nei lo-in zai hi; vankhuanuai khempeuhah kizelin i sungah zong hong kizel hi. Ama lim le meel suun dingin i nunzia hong bawlpha ding le hong khel ding hong kamciam hi. Topa Pasian in aksi lompi sim zawh loh phialin a tam aksi lompite Piangsak Pa ahihna le Ama sungah nunna nei-in nungta ihihna thu” (Sawl. 17:28) ngaihsun in. I lungsim hong bawlpha thei, lungsim thak hong guan thei bek tham lo-in i mawhnate hong hepkhiatsakin Ama sungah nunna thak a hong guan hi.

Hih thu in lungmuanna hong guan hi lo hiam? A vanglian mahmah Pasian, itna tawh kidim Pasian, kitangsapna khempeuh hong sik hong pia Pa ahihna i theihna in bangzahin manpha hiam? Ei tawh hong omkhawm Pasian hi, ci-in theihna in bangzahin lungmuanna le lametna hong guan hiam? Ahih keileh i mawhna khempeuh a thei Pasian ahih manin lau-na le kihna tawh nungta zaw ding i hiam? Koi bangin hotkhiatna lungdamna in lungnopna hong guan hiam?

 

WEDNESDAY                           May 10

Gospel, Thukhenna Le Piansakna

 

Vantungmi masa thupuak ngaihsun in. Tawntung lungdamna thu hi lo hiam? Thukhenna thu hong hilh hi lo hiam? Piangsak Pa bia ding sawlna hi lo hiam?

Hih thu thumte kizopna ngaihsun in. Topa Pasian thukhenna a thuak dingin kingaihsun in; hih thukhenna-ah eite lamet lian bel in Lungdamna, hotkhiatna thu bek mah i lamen hi. “Ahi zongin tu-in ahihleh Khrih Jesuh tawh kipawlin a nungta mite pen mawhna thukhenna tawh kipelh hi.” Tu-in kuamah in mawhsakna thukhenna a thuak kei hi. Thukhenna-ah mawhsakna tawha kipelh thei ihi hi.Topa Pasian in na khempeuh a Piangsak Pa hi, cih thupuak in “ tulai thuman thupuakah a thu bulpi khat hi; nate in amau thu thu-in hong piangtawm hi, cih upna a khan laitakin piansakna thu in a thupi mahmah thupuak lian khat hi. Piansakna uplohna in Khristian upna phungpi susia ding hi ta hi. Tua bang thu om hi mah taleh piansakna thu a tangko dingin Pasian in a pawlpi hong khangkhia sak hi. Hih pawl sungah a om mite in Piangsak Pa le piansakna thu a pulaak kawikawi ding uh hi. Amaute in Topa Pasian in eite hong Piangsak Pa le hong Honpa hi, ci-in a pulaak uh hi. Ephesians 3:9, Kol. 1:13–17, Mang. 4:11, le Romans 5:17–19 sim in.

Hihte in Jesuh in Piangsak Pa le Honpa ahihna thu bang pulaak uh hiam?

___________________________________________________________ ___________________________________________________________

Jesuh in Piangsak Pa ahihna le Honpa ahihna in kizopna lianpi nei hi. Piangsak Pa ahihna bei hileh nate in amau thuthu-in hong piang hi, cih thu in thutak suak ding hi; eite Honpa ahihna zong muantakcing lo hong suak ding hi. Jesuh in mawhna, sihna le siatnate panin hong honkhia hi, cih thu zong om lo ding a, nate in Piangsak Pa nei lo-in amau thuthu tawh hong piangkhia hi ding hi. Topa Pasian in nate a piansakin mawhna tawh piangsak hi; tua mawhna panin eite hong honkhia hi, cih thu in a lauhuai kikhemna hi. Nate in amau thuthu-in hong piang hi, cih upna in singlamteh tunga Khrih hong sihna nial suak hi. Bang hangin hih bangin pulaak i hiam? Paul (Rom. 5:17– 19) in a pulaakna-ah Adam mahna le Jesuh hong sihna kizoppha mahmah ahihna hong hilh hi. Tua hi-in Adam le Jesuh in kizopna lianpi nei ahihlam kimu thei hi. Piansak thu aom lo mite in mawh nei lo Adam in sihna hong tun thei lo ding hi, ciin ngaihsun uh hi. Kum zalom tampi sung sihna thuak khit ciangin vangliatna khat in Adam bawlkik hi, cih thu in a piang thei lo thu hong suak hi. Tua hi-in nate in amau thuthu-in hong piang hi, cih thu in Lai Siangtho hong hilh thu bulpi Singlamtehah Khrih hong sihna thu susia hi. Tua hi-in Seventh-day Adventist pawlpi in Piangsak Pa bek bia dingin pulaak hi. Hih in a man lo thu nialna hi.

 

THURSDAY                                          May 11

Singlamteh Tungah Piangsak Pa

 

          Bangbangin i hih theihna zah sit lo-in Topa Pasian, Piangsak Pa bia-in i om hangin tua sangin thu lian zaw i cin zawh loh thu om hi. I pulaaksa om bangin eite hong Piangsak Pa in mawhna panin eite hong Honpa mah hi, cih thu in manpha mahmah hi. Eite hong piangsak Pa Pasian in eite Honpa mah hi.Topa Pasian in “Eima lim le meel suunin mihing i bawl ding hi,” ci-in pulaak hi (Pian. 1:26); Amah in singlamteh tungah sihna thuakin, “Eli, Eli, lama sabachthani?’ a khiatna in “Ka Pasian Ka Pasian, “ Bang hangin hong taisan na hiam?” (Matt. 27:46). Pasian kihtak nading thu banah Ama min thansak ding thute ngaihsun in. mawhnei mi ihihna tawh kizui-in koi bangin Khrih hong sihna thu dawngkik ding i hiam? Vantungmi masa thupuak in i kalsuanzia ding hong hilh hi: “Pasian kihta unla, Ama min thangsak un.” Bang hang hiam cihleh Ama thukhenna hun a hong tung zo hi. Ciktui, luitu, vanpi le leitung a bawlpa bia un” (Mang.14:7). John 19:16–30 sim in. John in singlamteh tung Jesuh hong sihna thu bang pulaak hiam? Tua na simna tungtawnin Jesuh in Piangsak Pa ahihna, “Vantung le leitungah a om na khempeuh, kha thu tawh kisai vangliatna, tote, mi ukte, aana neihnate a kipan a kimuthei hitaleh a kimu thei lo hitaleh na khempeuh, Pasian in amah zangin a piangsak hi. Leitung a kipanin huih lakah a om khempeuh dongin, Pasian in Khrih a dingin amahmah zangin a piangsak hi” (Col. 1:16), ci hi.Koi bangin hih thu in Pasian hong itna hong hilh hiam?

_____________________________________________________________ ___________________________________________________________

Vantungmi masa thupuak in Piangsak Pa bia dingin hong sawl hi. Hih thupiak ma-in Singlamteh thu kipulaak khin hi; vankhuanuai khempeuh le Khrih nunguite in “Amah kiniamkhiat tawm zaw a, nasem lim a hong puazaw hi. Mih ing bangin amah hong kibawl a, mihing teekteek mah a hong sun hi. Amah hong kiniamkhiat tawm a, singlamteh tung nangawnah sih ding a ut hi” cih thu a theitel uh hi (Phil. 2:7, 8).Jesuh in leitungah mihingin hong nuntakna thu lamdang mahmah hi lo ahi hiam? Amah amu mi khempeuh in lamdangsa-in tel zo lo hi lo hiam? Vantungmite in Amah bia uh hi. Tu-in Ama sisan in hong tankhia khin zo ahih manin hong Piangsak Pa le i Honpa biak ding sim loh thu dang bang om nawn ding hiam? Bang hangin tunga Khrih hong sihna banah mihing in behlap thei nei hi, ci-in upna in lampialna hi thei hiam? Piangsak Pa hong sepsak tungah i gamtatna in bang behlap theih ding nei hiam?

 

FRIDAY                                   May 12

Ngaihsutbeh Ding: Pasian bia un, cih thupiak in Lai Siangtho thu bulpi khat hi. Hih thu mah mihingte tungah thupiak ahi hi. Lai Siangtho Lui sungah kamsangte in Pasian mite tungah a hilhtawntung thu ahi hi; A nungta Pasian nusia-in pasian dangte a biak khak loh nadingun vau thuhilhna a ngah tawntung uh hi. Tua bangin amaute in pasian tuamtuam a biak uh ciangun Pasian in amaute a samkik zel hi. A nungta Pasian biakna le pasian tuamtuamte biakna in a kilangdo mahmah thu khat hi. Hih thu siksanin Pasian thukham nialin thukham langpanna hong lian semsem hi. “Biakpiakna thu in mihing nunzia tawh kisai thu tampi huam hi. Mihing in nuntakna huu a neihlaisiah Piangsak Pa bia ding hi.A nungta lai mite bek in Topa bia thei hi; a si miten Topa biakna, Ama min phatna nei thei nawn lo uh hi. Eite hong Bawlpa in i nuntakna khempeuh Ama tungah ap dingin hong sam hi; a hong piak thupha khempeuh midangte phattuam nadingin i zat ding zong hong deih hi. Biakpiakna i cih in i nuntakna khempeuh kihel bek tham lo-in, angsungkhualna nialin midangte kitangsapna huhna zong kihel hi. A nungta Pasian bia lo nuntakna in kimanna nei lo nuntakna hi; tua nunna in bangmah ngimna nei lo nunna hi. Tua bang nuntakna in ngimna bangmah nei lo nuntakna hi-in, sihna manawh nunna hi; tua bang nunna in mangthang ding hi. Bnag hang hiam cihleh tua bang nunna in nunna phungpi tawh kizopna nei lo hi.” Ángel Manuel Rodríguez,”The Closing of the Cosmic Conflict: Role of the Three Angels’ Messages,” p. 42.

 

 

KIKUP DING DOTNATE:

 

1. Mawhna tawh kidim hih leitung in Pasian bawlsa hi, cih thu sangin thu thuk zaw hiam? Bang hangin hotkhiatna kamciam kisam ihi hiam?

 

2. Na nuntakna-ah na tuahkhak Pasian vangliatnate ngaihsun in. Koi bangin Pasian in nang mahmah hong it ahihna na mu thei hiam? Topa Pasian in vankhuanuai khempeuh a bawl Pa hi. Amah in nangmah hong kem tawntung hi; na kitangsap khempeuh a hong sik Pasian hi lo hiam? Bang hangin hih thu in hong khamuangsakin, hong kiniamkhiatsak thei hiam?

 

3. Nate in amau thuthu-in hong piangkhia hi, cih thu in thutak hi zenzen leh Piangsak Pa bia un cih thupiak in khiatna nei nawn ding hiam? Piansak thu a um lo mite in kum sim zawh loh phial sung Pasian in sihna, kisiatna, gimna le thuakna panin leitung piangsak hi, cih thu in Lai Siangtho hong hilh piansak thu tawh kituak thei lo hi lo hiam? Tua hi-in Pasian bia ding sawlna ngah hi lo ihi hiam? Bang thu hangin Amah bia i hiam?