LESSON 5 | APRIL 22-28 THUKHUN THAK PULAAK LUNGDAMNA THU

LESSON 5                    APRIL 22-28

THUKHUN THAK PULAAK LUNGDAMNA THU

 

 

Sabbath Nitak

 

Tu Kaal Sung Sim Ding: Mang. 14:7; Late 51:1–4; Mang. 20:12; Dan. 7:9, 14, 26; Mang. 4:2–4; Mang. 5:1–12.

 

KAMNGAH: “Amah nakpitakin kiko a, “Amah in mihingte thu a khen ding hun hong tungta ahih manin Pasian kihta unla amah phat un. Van le lei, tuinak le tuipite a bawlpa hong bia ta un,” a ci hi (Mang. 14:7). Lai Siangtho hong hilh thute in kician kitel mahmah hi. Pasian in thukhen Pasian hi, ci-in hong hilh hi. A sawt lo-in lampi khat ahih keileh a dang khatin Pasian in thukhen hong ding hi. Tua bangin thukhenna in tu-in zong thu hong khenkhen hi; Pasian mahmah in thukhen dingin a sawt lo-in hong tung ding hi; “Amah in leitung thukhen Pasian hi” (Pian. 18:25; Late 58:11, Late 94:2, Late 98:9). Ahih keileh Paul mahmahin zong hih bangin laigelh hi: “Tua ahih manin a kuamah peuh in i gamtatna ciat Pasian’ mai-ah a va kigentel ciat ding ihi hi” (Rom. 14:12). Lauhuai hi lo hiam? Na khempeuh a thei, lungsim ngaihsutna khempeuh zong mu-in a thei Pasian mai-ah thu hong kikhen ding hi, cih thu in, “na khempeuh, a sia a pha a kiselsimte nangawn thu hong khen ding hi” (Thna. 12:14)? Hi mah hi; a tawpna-ah Pasian hoihna le thukhenna hong kilang ding hi; tua ciangin Amah in hehpihna tawh a kidim Topa Pasian ahihna leh, hotkhiatna a ngah mite le kisiatna a ngah ding mite hong kilang ding hi. Kido-na lianpi tawh kizomin thukhenna bulpi thute tu kaal sung thu sinna sungah kihel ding hi.Pasian tungah a citak mite tungah a kipelh thei lo thukhenna hong tung dinga, amaute ngah ding thute zong i pulaak ding hi (Sawl. 24:25).

 

SUNDAY                                            April 23

Thukhenna A Thupi-Na

 

Lai Siangtho bu nunung pen Mangmuhna bu in a bei nai lo sia le pha kido-na thu pulaak hi. Lucifer, a langpan vantungmi, in Pasian thumanna, thutanna, pilna a langpan hi. Amah in Pasian langah thuman lo hi,vankhuanuai khempeuh a ukna-ah thuman lo-in thutang lo hi. Mangmuhna bu in a nunung thukhenna thu in Pasian zia le tong bulphuhin thukhenna hi ding hi. Mang. 14:7 in “Amah in mihingte thu a khen ding hun hong tungta ahih manin Pasian kihta unla amah phat un. Van le lei, tuinak le tuipite a bawlpa hong bia ta un,” a ci hi. Bang hangin hih thukhenna in “tawntung lungdamna thu” tawh kizomin a kipulaakna in thupi h ding hiam? Amasa vantungmi in Pasian thukhenna thu a pulaak hi. “Tawntung lungdamna thu” in Pasian thukhenna tawh bangci bangin kizopna nei hi ding hiam?

________________________________________________________________ _________________________________________________________

 

Vantungmi masa thu puak lungdamna thu le thukhenna in a kikhentuam thei hi lo hi. Tua “tawntung lungdamna thu” om lo hi leh eiten thukhenna-ah lametna bangmah i nei kei hi. A taktakin i ettoh ding banah “ tawntung lungdamnat thu” in thukhenna-ah eite lametna bek hi. A hong tung ding thukhenna-ah lungdamna thu zong a kihel hipah hi. Hih thukhenna mawhna nei lo leitung dangte in mu ding uh a, Pasian sepna khempeuh a en uh hi. Pasian in mawhnei mimal khat ciatin a hong honkhia nuam hi. Hih thukhen in Pasian thutanna le hehpihna a kilangsak hi. Hih thukhenna in Ama hong itna le a thukham a pulaak hi. Ama thukhenna in hotkhiatna hong pia Ama hehpihna le Ama vangliatna a pulaak hi. Thukhenna in leitung panin mawhna siatna khempeuha beisiangna hi ding hi. Topa Pasian in Satan mawhsakna khempeuh thukhen ni ciangin, Amah in mawhnei mite a hong hotkhiatna kimu hi. Leitung siatna sung panin eite a hong hotkhiat nadingin a kisam na khempeuh Topa mah in ahong sepsak khin zo hi; Singlamteh tungah a Tapa hong piakna tawh a hong honkhia hi.Vantung in ciangtan nei lo-in mihingte a hong hotkhiatna dingin vantung thu ciapna a om khempeuh kipholaak khin hi (Dan. 7:10). Pasian mai-ah eite in a manpha mahmah mite ihi hi. Vankhuanuai khempeuh in mihing in Kha Siangtho sapna a zui ding hiam, ci-in thei nuamin a om uh hi.Kalvary tunga Ama hong sihna thu thei-in Amahmah i pom ding vantung in hong lamen hi. Late 51:1–4 limtak sim in; a diakdiakin aneu 4. Hih in thukhenna ngimna le a khiatna bang pulaak hiam?

 

MONDAY                                                 APRIL 24

Pasian Hehpihna Le Thukhenna

 

Singlamteh le thukhenna in Pasia in thuman thutang hi; Amah in hehpihna nei hi, cih hong hilh hi. Thukham a palsat mi in thukham palsatna thaman sihna a thuak ding hi. Thuman in hih bangin pulaak hi: “Mawhna thaman in sihna hi.” Hehpihna in dawngkikin, “Pasian hong piakkhong letsong in Jesuh Khrih sungah tawntung nunna hi” (Rom. 6:23). Pasian thukham kikhel thei ahih keileh kihemkhia thei hileh Jesuh in sihna hong thuak kul nawn lo ding hi. Ahi zongin Khrih in sihna hong thuak ahih manin Thukham in a kikhel thei lo tawntungin a kip ding ahi hi. Thukham siksanin thu kikhen ahihna kimu thei hi. Mang. 20:12 sim in. Koi bangin thu khenna thuak ding ihi hiam? Gamtat hoihna le hotkhiatna kizopna in bangci bang hiam?

____________________________________________________________ ___________________________________________________________

I gamtatnate in i sunga om thute a kilangsak hong suak hi. Pasain tungah i cihtakna zong hong kimuthei hi (Eph. 2:8, 9), “Hehpihna hangin upna tawh hotkhiatna na ngah khin uh hi. Note gamtatna hang hi lo hi; gamtatna tawh hotkhiatna a ngah hi le uhcin, kisakpih ding a om ding hi.”Ahi zongin Khrih in eite hong hon hi; Amah in eite hong khel hi. Bang hang hiam i cihleh eite in Ama piansak mite ihi hi. Na hoih a sem dingin tua bangin a hong bawl ihi hi (Eph. 2:10).Kha Siangtho in i gamtatnate hong ompih ciangin i upna man takin a pulaak thei ihi hi. Tua bangin Kha Siangtho ompih gamtatnate in hotkhiat ngahna ding hi lo hi. Pasian in a nunung bel thukhenna hong tun ciangin kineihkhemna, zuau khemna khempeuh beimang ding a, thuman thutak bek i nuntakpih hong suak ding hi. Thukhenna-ah Pasian mai-ah eite dinmun Ellen G. White in hih bangin hong hilh hi. Koi bangin lungdamna thu (Gospel) le thukhenna tonkhawm hiam? “Pasian mite in Ama mai-ah mawhna tawh kidimin mawhna puanniin silhin a om uh hi. A mawhna kisik mi in Topa mai-ah mawh thuumin om a, a mawhna mai nading ngenin a om hi. Amah in Topa tung pan mawhmai-na angah thei hi. Amah in Topa thuman thutak tawh siantho-na a ngah hi. Tua bangin mawhmaina a ngah mi in Topa mai-ah a kiniamkhiat thei hi. Khrih tawh a kinai semsem mi in ama mawhna a kimu semsem hi; Topa zia le tong a lunggulhna lian semsem ding hi. Tua ciangin Ama nunzia in Topa siantho-na a kilangsak semsem ding hi. Ahi zongin mawhna tawh kidim i dinmun i muh ding kisam hi; tua ciangin Khrih dikna in eite dikna hong suak thei hi; amah in eite dikna, sianthona le kihotkhiatna hong suak hi. Ei le ei thu-in Satan hong mawhsaknate i hemkhia thei kei hi. Khrih bek mah in Satan hong mawhsaknate a beimangsak thei hi; eite dikna hi lo-in Ama dikna bek in Satan tungah zawhna hong ngahsak hi. Testimonies for the Church, vol. 5, pp. 471, 472. Koi bangin Ellen G.White kammalte in thukhenna-ah hotkhiat lungdamna thu in thu tuam khat hi lo, tonkhawm ahihna thu bang hong hilh hiam? Hotkhiatna le Thukhenna tonkhawm ahihna thu panin lametna bang na ngah thei hiam?

 

TUESDAY                                                 April 25

A Lamdang Thu Khenna

 

Daniel genkholhnate le Mangmuhna sunga genkholhnate in leitung hun bei ciangin a piang ding thute hi. Mangmuhna sungah Pasian thukhenna hong tung ding hi, ci-in genkhol hi; Daniel in tua thukhen hun kipatna pulaak hi. Daniel 7 sungah Pasian in a kamsangpa tungah leitung a uk ding kumpite thua pulaak kholhna kimu thei hi. Kumpite khat khit khat hong khang uh hi.Pasian mite a bawlsia kumpi zong hong khangkhia hi. Babylon kumpi khit ciangin Media-Persia hong khangin ama khit ciangin Greece in leitung uk khit ciangin ama nungah Rome kumpi hong khang hi; Roman Empire kitamin ama nunga hong khangkhia kumpi in Pasian mite kum 1260 sung bang a bawlsia hi (Dan. 7:25; Mang. 12:14); Daniel in a piang thute Pasian geelna bangin amuh theih ding Pasian in zong a deihsak hi. Kamsangpa in kumpite khat khit khat a khan khiatna thu amu hi. Pasian mite langpangah pangin amaute bawlsia-in Pasian thukhenna tokhom a zahko gawm Kumpi zong a pulaak khol hi. Topa Pasian in siatna khempeuh beisakin Ama kumpi tokhom le Ama dikna tawh kidim gam hong dingin lamenin i nungta hi. Pasian in Daniel tungah siatna tawh kidim leitung bawlpha-in hoihna tawh kidim leitung a mukholsak hi. Siatna panin hoihna tawh kidim ukna sungah vantung biakbuk vangliatn zong a kilang amu hi. Khrih in leitung Ukpa ahih bang mahin Pa Pasian ukna gam le A mite ama mi ahihna thu zong a pulaak hi. Daniel 7:9, 10, 13 sim in. Daniel in bang mu hiam? A nunung thukhenna hangin bang hong piang ding hiam? Daniel 7:14, 26, 27.

_____________________________________________________________ ___________________________________________________________

Mihing khempeuh i tun nading mun in vantung thukhenna tokhom panin kikhen khin hi. THuman tawh kikhen hi. A man lo-in bangmah kikhen lo hi. Thuman in zawhna ngah hi. Hih in a lamdang mahmah thukhenna khat hi. Lai Siangtho sung a thute panin i tel zawh loh thu thuthuk lianpi khat hi. Lungdamhuai thu khat in Pasian tungah a citak mite in puansilh bangin Khrih dikna a silh uh hi. Jesuh in vantung a Pa tokhom tungah tu-in vankhuanuai khempeuh pahtawi-na a ngah hi. Vantungmite in Pa Pasian tokhom kimah a om uh hi. Vankhuanuai khempeuh in Pasian thukhenna amu uh hi; amaute in lamdangsakna tawh kidimin a om uh hi. Kum tul tampi kido-na a sawt lo-in kizo ding hi ta hi. Hih kido-na in vantung tokhom panin kua in ukna nei ding cih kido-na hi. Daniel in leitung a uk ding kumpi khat khit khat thute a pulaka bangin hong tangtung takpi hi. Tua hi-in bang hangin Pasian kammal in muantakcing ahihna le Lai Siangtho hong hilh “tawntung gam” in kisia ngei lo ding gam ahihna in thu upna-ah manpha hiam?

 

WEDNESDAY                                           April 26

Vantung Nopna Gal Et

 

Mang. 4 sungah John in vantung kihongin sapna aw khat za-in, “Hong pai in. Hih thute khit ciangin hong tung ding thute kong lak ding hi” ci-in hopihna aw khat a zakna thu kipulaak hi. (Mang. 4:1). Jesuh in a nungzuite samin vantung kongkhak kikhong en a, tawntung thute, kido-na lianpi thute en dingin a sam hi. Eite in zong John pulaak thute i mu thei hi;tawntung hotkhiatna hangin nuamna sungah i nuntak thei hi. Vantunga thukhenna-ah eite zong a vakihle ding ih hi. Kido-na Lianpi tawh kisai a thu bulpi in sia le pha kidona hi, ci-in i thei hi. Mang. 4:2–4 sim in. Dan. 7 pulaak thukhenna tawh bang thute in kibatpih nei hiam?

_________________________________________________________ ___________________________________________________________

Hih a pulaak thu in thukhenna tokhom tawh kibang hi. Topa Pasian in thukhenna tokhom tungah tu-in ama kimkotah vantungmiten a kimkot uh hi. Tua ciangin khuaphia-in kekkhia-in a om hi;hihte in Pasian thukhenna limcing uh hi. Mang.4:4 sung upa 24 in Pasian tokhom kim ah a om uh hi. Upa 24 in kuate hi ding hiam? Nidang Israelte sungah khen 24 pha-in kikhen uh hi. Hih Levite in Pasian mai-ah a om uh hi. 1 Peter 2:9 pulaak bangin Sawltakte in Thukhun Thak sunga kipulaak bangin thu-um mite in “teltuam minam” ‘ Siampi nam” dingin a kiteel hi. Hih upa 24 in hotkhiatna ngah mite Pasian tokhom maiah lungdam kipaakin a om ding mite limcing hi; tua ahih keileh zong upa 24 in Khrih in sihna pan thokikin vantungah a kahtoh ciangin sihna pan a thokik Amah tawh van a kahto mi siangthote limcing uh hi. Matt. 27:52, Eph. 4:7, 8). Hih thu in lungdamhuai thu hi. Pasian tokhom kimah hotkhiatna ngah mite a om uh hi. Eite bang mahin amaute in zia-etna a thuak mite hi. Khrih hong hehpihna le Kha Siangtho vangliatna tawh amaute in zia-etnate tungah zawhna a ngah uh hi. Amaute in Khrih dikna “Puanpaak” a silh uh hi. Tua puankang in Khrih dikna limcing hi. Amauten kham lukhu a khu ciat uh hi. Hih in siatna tungah zawhna limcing hi; vantung Kumpipa tanu tapa lakah kihel thei ahihna thu a pulaak hi. Vantung kihongin Pasian in thukhen kipan dingin a kigingkhol hi. Ama tokhom kimkotin vantungmite a om uh hi.

 

THURSDAY                                               April 27

Jesuh In Phattakcing Hi

 

Mang. 5:1–3 sungah vantung tokhom thu khat vei kipulaakkik hi. Laizil khat in tokhom pang tuakah a om hi. Tua laizial tungah Pasian ciaptehna a ngah hi. Hih ciaptehna in Pasian ciaptehna hi-in, tua laizial a hong khia zo ding vantung leitungah kuamah aom kei hi. Vantung in kilingin a om hi. Tua thukhenna in a lian mahmah, a thupi mahmah thukhenna hi. Tua thukhenna-ah mite adingin a dingin vantungmi khat beek kipiakhia ngam om lo hi. Tua laizial a hong ding mi kuamah a om lohna thu a theih ciangin John a khitui luang hi. Tua ciangin upa 24 lak panin khat in, Johan thapia-in, Pasian Tunno- Jesuh in tua laizial hong dingin a kilawm hi, ci-in a pulaak hi. John in Mang. 5:5 sung a kipulaak bangin a nunung bel mawhna kisiansuah ding lamenin ngakin a om hi. Hih munah kamsang pa in Pasian tokhom a a nunung bel thukhenna panin mawhnsakna tawh kipelh nading lampi khat beek ngakin a om hi. “Tua laitakin upate khat in kei kiangah, “Kap kei in. Judah minam sung panin Humpinelkai, David suan sung panin a lianpa gualzo khinta a, tua laizial ciaptehna sagihte lakhia-in a laizial phelthei ding hi,” a hong ci hi.

Mang. 5:8–12 sim in. Koi bangin Topa Pasian in tua laizial a hong ding le eite hong honkhia dingin, Jesuh bek mah kilawm kituak pen hi,ci-in a kipulaak thu a dawngkik hiam?

___________________________________________________________ ___________________________________________________________

Jesuh in Pasian tuuno thahna thuakin, mihing khempeuh a hong hotkhiat nadingin a nuntakna hong pia-in tua laizial a hongkhia dingin Amah bek mah kilawm kituak ahihna thu kipulaak hi. Vantung in tha khatin nuamna thu a tangko hi. Satan zia-etna tungah zawhna ngahin Singlamteh tungah Ama hong sihna, sihna pan a thawhkikna, siampi nasep a sepna hangin mawhnei mi khempeuh in hotkhiatna ngah thei ahihna thu, hih hotkhiatna in Ama hehpihna hangin a hong piak upna tawh i san ciangin tua hotkhiatna sung a tung thei ihi hi.Thukhenna in Pasian mite adingin lungdamna thu hong suak thei ahihna i tel zawh lohin a lamdang thu hong suak hi. Hih thu in mawhna a bei siangna le Pasian mite kihotkhiatna hong hilh hi. Hih thu sangin tha hong guan zaw ding bang thu om nawn ding hiam? Thukhenna-ah Jesuh in ei lamah hong pang hi. Ama dikna kicinna in eite hong tuam hi. Ama dikna in eite sunga hong tun ciangin mi thak a hong suaksak hi. Ama hehpihna in mawhmai-na hong guan a, tua hehpihna in i nunzia hong khel hi.Ama hong hehpihna mah in Pasian deihna bangin hong nungtaksak hi. Lau kul lo hi. Jesuh in thukhenna-ah eite lamah hong pang ahih manin siatna vangliatna, mawhsakna i thuak nawn kei ding hi. Thukhenna kipulaak khin a, Pasian mite in maipha ngah khin uh hi (Dan. 7:22). Thukhenna in bangzahin i mawhna lian hi, cih pulaak nading hi lo hi; thukhenna in bangzahin Pasian in hoihna tawh kidim hi, cih hong hilhna hi zaw hi. Thukhenna-ah eite in lametna lianpi nei ihihna thu ngaihsunkik in. Jesuh in eite adignin hong ding hi. Bang hangin hih bek mah eite lametna thu hi thei hiam?

 

FRIDAY                                              April 28

Ngaihsutbeh Ding: Kha Siangtho in kamsangte tungah a lah thute in bangzahin vanglianin man nei hiam, cih thu ngaihsun in. Leitung hun nununga Pasian mite adingin Pasian hong lah thute, a diakdiakin thukhen hun le leitung bei hun ding a hong hilh thute ngaihsun in. “Pasian mite in Ama hehpihna simloh lametna dang bangmah nei lo uh hi. Amaute kidalna in thungetna bek hi. Joshua in Vantungmi mai-ah dingin a beibang pawlpi adingin mawhthuumna a neihsak hi. Amaute in lungsim kitamzanin upna takpi tawh mawhmai-na a ngen uh hi. Jesuh in amaute adding Palaai ahih bang mahin Jesuh tungtawnin hotkhiatna a zong uh hi. Amauten mawhna tawh kidim ahih lam uh a kiphawk uh hi; Pasian mai-ah cingtakna nei kisa lo lua uh ahihna kiphawk uh hi. Amau le amau a ki-et uh ciangin thaneemin lungkia uh hi. Satan zia-etna thuak uh a, Satan mawhsakna a thuak uh hi. Satan in Joshua a nial bangin, amaute zong a nial tawntung hi. Satan in amaute puanniin silh kawkin,amaute kicinlohnte a pulaak tawntung hi. Satan in amaute thaneemnate, le amaute hai-nate, amaute lungdam theilohnate a pulaaklaak hi; tua bang nunzia in Khrih zia le tong suun thei lo ahihna banah tua bang nunzia in amaute Honpa maizumsak ahihna thu zong a pulaak hi. Pasian mite in tua bangin mawhsakna a thuak tawntung uh hi. Satan in amaute thaneemna thei ahih manin mawhna sung nungta dingin a zol tawntung hi. Amah in khuavak taang pha mahmah tawh kilangin, “Pasian in Ama le vantungmite kiang panin kei hong nawlkhin ding hiam? Keimah tawh a kibang mawh nei mite honkhia veve ding ahi hiam? Topa aw, tua bangin thu na khen kei ding hi. Na tokhom in thuman lo-in nasem lo ding hi.

Thutanna in amaute langkhatah thu gen ding a, amaute a mawhsak ding hi. Ahi zongin Khrih nung a zui mite in mawh nei mi hi mah taleh mawhna in a ukcip kei hi. Amaute in mawhnate nusia-in kiniamkhiatna le lungsim kitamzanin Topa mai a zong uh hi. Tua ciangin Topa Pasian in amaute Palaai-in ding ding a, amaute ai-awhin thu a gen ding hi. Amah in amaute kicinlohnate, mawhna le lungdam theihlohnate thei-in, “Satan aw, Topa in nang hong taihilh hi; taikhia in,” a ci ding hi. Keimah in amaute adingin ka nuntakna ka pia hi. Amaute min in ka khut sungah a kigelh khin hi, a ci ding hi.” Ellen G. White, Testimonies for the Church, vol. 5, pp. 473, 474.

 

 

KIKUP DING DOTNATE

 

1.       Koi bangin “Ama thukhun hun hong tung zo hi,” ci-in theihna in i nunzia hong huzaap hiam? Thuman i gen takpi leh, tua bangin theihna in i nunzia hong huzaap khol lo hi. Koi bangin kikhel thei ding i hiam?

 

2.     Bang hangin thukhenna in thu hoih lah hi, thusia zong hi thei veve hiam? Thukhenna-ah Jesuh in eite adingin a sep thute na lawmte tawh kikum in. Bangci bangin hih thu in Ama sungah kiptakin i nuntak ding tha hong guan hiam? Eite adingin a sep thute hangin eite in hotkhiatna ngah dingin lametna nei thei i hiam?

 

3.     Thukhenna thu ngaihsunpha in. Thukhenna in vankhuanuai khempeuhah Pasian zia le tong a kilangsak hi. Koi bangin hih thu in Kido-na Lianpi tawh tonkhawm hiam?