LESSON
4 APRIL 15-21
PASIAN
KIHTA UNLA AMAH MIN THANNA PIA UN
SABBATH
NITAK
TU
KAAL SUNG SIM DING: Mang.14; Pian. 22:12; Thna. 12:13,
14; Kol. 3:1, 2; Heb. 12:1, 2; 1 Kor. 3:16, 17.
KAMNGAH: “Hih thu-ah Pasian thukham le Jesuh upna a nei mite thuakna a om hi (Mang. 14:12).
Danish
mi laigelh Soren Kierkegaard in leitung hun bei ding thu tawh kisai thu
gentehna khat gen hi. Tua a gen thu in hih dan hi. Laminnpi khat sung meikang
hi. Ciamnuih gensiam khat in mipite tungah inn meikang hi, ci-in a taikhiat
nadingun hilhhilh hi. Inn sung panin kihemkhia un! ci-in a gen thu mipite in a
ciamnuihna hi, ci-in paikhiat sawm peuhmah lo uh hi. Amah in kihemkhia un, ci
tuahtuah hi: Paikhia un! pai khia un! Ahi zongin vau hilh kholhna a pulaak
ciangin mipite nuihza semsem uh hi. Kierkegaard in a gennaah koi bangin leitung
hong bei ding a genkholhna hi zaw hi. Tua bangin hilhkholhna a gen ciangin
mipite in nuihsan semsem uh hi. Amaute in tua vauhilhkholhna pen ciamnuih
bangin a ngaihsun uh hi. Leitung bei ding a hong hilh thupiangte in tu-in ei
adingin ciamnuihna hi peuh mah lo hi. Tuicin tun khit a kipan leitung in gimna
lianpi thuak khin hi. A taktakin Peter mahmahin Tuicin tangthu siksanin leitung
bei ding thu hong hilhkhol hi.
Leitung
in tui tawh kihahsiang khin a, leitung bei ciangin mei tawh kihahsiang ding hi.
Tua hun ciangin “leitung le vantungte khempeuh in kangmang ding a na khempeuh
kisia maimang khin ding hi (2 Pet. 3:10). A hong tung ding lauhuai thute
vauhilhk hilhna ngah khin ihih manin tu-in koi bangin kigingkhol thei ding i
hiam?
SUNDAY
April
16
Pasian
Kihta Un
Mangmuhna
bu ngimna bulpi in tuhun mite in Jesuh hong pai baih ta ding ahih manin
kiginkholh ding deihna hi; Amah tawh vanah laktohna a ngah thei ding le Ama
vangliatna sungah a nungta dingin a kigingkhol ding hong deih hi. Hih thu
leitung mun khempeuhah kizelsak dingin sapna ngah ihi hi. Mangmuhna bu in
Pasian in mihingte adingin a geelkholh thute le Satan zuaukhemnate hong hilh
hi. Mangmuhna bu in leitung adingin Pasian thupuak nunung bel, thukin thu,
tawntungin kimang ding thute hong hilh hi.
Sawltak
John in leitung hun bei kuan a thukin thupuak thute bang pulaak hiam? Mang.14:7
(Pian. 22:12; Late 89:7; Pau. 2:5; Thna. 12:13, 14; Eph. 5:21.) Bang thupiak
hong kihilh hiam?
___________________________________________________________
___________________________________________________________
Thukhun
Thak sungah “Kihta” cih kammal in (Mang.14:7) phobeo hi. Mang. 14:7 bek tham lo-in
a dangdangah zong kimu thei hi. Hih kammal in Pasian launa, kihtakna, zahtakna,
lamdangsakna a pulaak kamaml hi. Hih kammal in Pasian tungah nuntakna khempeuh
tawh cihtakna le Ama deihna sungah kipiakna a pulaak kammal hi. Hih bangin
nuntakna in mihing bulphuh hi lo-in Pasian bulphun nuntakna hi. Hih bangin
lungsim in Lucifer lungsim puak tawh kilehbulh hi. Lucifer lungsim in Isaiah
14:13, 14 sunga a genbangin kimu thei hi; “Nang in na lungsim sungah, vantungah
ka kahto ding hi. A sangna mun, Pasian’ aksite’ tung pekah ka kumpi tokhom ka
koih ding a, leilu lam peka kikhopna mualtungah ka tu ding hi. Meiite’ tung
pekah ka kahto ding a, Sang Pen pa bangin ka kibawl ding hi,’ na ci hi. Khrih
in vangliatna tawh kidim Pasian hi mah taleh, “Amah mah hong kiniamkhiatin
sihna hong thuak dongin a hong kiniamsak hi.” (Phil. 2:6, 8). Kidona Lianpi thu
guipi in Pasian tungah kipia ding maw, ahih keileh Lucifer tungah kipia zaw
ding maw cih thu hi. Kumpi tokhom tunga a tupa tungah ki-ap ding sangin Lucifer
in Pasian a langdo hi. Teltheih dingin pulaak lehang, Pasian a kihta mi khat in
na khempeuhah Amah bek mah masak ding hi. Tua bang mi in angsung khualna nial,
kiphatsakna nusia-in Ama adingin a nungta hi.Vantungmi khatna thupuak in i
nuntakna-ah bang thupi ding hiam, cih thu hong hilh hi. Tua hi-in hih thu
ngaihsunin i nuntak ding kisam hi. Pasian na kihtakna-ah bang thute na tuak kha
ngei hiam? Koi bangin midangte tungah “Pasian kihtakna” in thu hoih ahihna thu
pulaak ding na hiam?
MONDAY
April
17
Pasian
Kihta Unla Ama Thu Mang Un
Lai
Siangtho in Pasian kihta cih in bang hi, ci-in hong hilh hiam? Thkna. 6:2; Late
119:73, 74; le Thna. 12:13, 14 sim in. Pasian kihtakna panin bang thute kimu
thei hiam?
__________________________________________________________
___________________________________________________________
A
tunga thute in Pasian kihtakna le Ama thupiakte bangin nuntakna in kikhen tuam
lo ahihna hong hilh hi. Pasian kihtakna in Ama thupiakte bangin nuntakna-ah
hong tonpih hi; Amah zahtakna zong hipah hi. Hehpihna tawh hotkhiatn a ngah
mite in Topa thukhamte bangin a nungta dingin Topan hong sam hi (Eph.
2:8–10).Hehpihna in Pasian thukhamte nuntakpih ding panin hong map lo hi; hong
pengsak lo hi. Hotkhiat lungdamna thu in Pasian thukham hong mawhsakna panin
hong suaktasak hi; thukham bangin kalsuan ding tawh hong kipelhsak lo hi.
Hehpihna in a bei hun a mawhnate panin hong suaktasak bek tham loin, tulaitakin
Topa deihna bangin nuntakzawhna tha hong guan hi.
Sawltak
Paul pulaak bangin, “Minam khempeuh in ama thu umin a zuihtheih nadingun Khrih
hangin sawltak nasep sep theih nading hamphatna thu Pasian in Khrih’ na sep
nadingin kote a hong pia hi” (Rom. 1:5). Mi kim khat in hehpihna hangin
hotkhiatna kingah hi, cih thu sang uh hi napi Pasian thukham kisam nawn lo hi,
ci-in ngaihsun uh hi. Tua bang mite in thukham bangin nuntakna in gamtatna tawh
Pasian maipha ngah ding hanciamna bangin ngaihsun uh hi. Tua bang miten eite
kitangsap lian bel in Jesuh bek hi, cih uh hi. I dot ding thu khat in “Koi
Jesuh” hi ding hiam?Amau deihna a zui ding Jesuh maw, ahih keileh Lai Siangtho
hong hilh Jesuh hi ding hiam? Lai Siangtho hong hilh Khrih in Ama thukhamte
thupi takin ngaihsun hi. Thukham in Ama zia le tong hong hilh hi. Lai Siangtho
hong hilh Khrih in Lai Siangtho sung upna thute a tawisang mahmah hi. Tua thute
in Ama nunzia hong hilh thute hi-in, leitung a dingin Ama geelnate hong hilh
hi. Lai Siangtho hong hilh Khrih in Ama thuhilhnate nawlkhin ngei lo hi. Khrih
in thuman thutak khempeuh hong pai-na phungpi hi. Jesuh in thuman thutakin a
hong nungta hi. Ama nuntak panin thuman a kilangkhia hi. Mangmuhna bu in a
nunung bel hong sapna in Jesuh sungaha hong piak na khempeuh upna tawh kisang
thei ahihna hong hilh hi. Tua thu in “Pasian kihtak un” ci-in hong sawl hi. Tua
bangin a nungta mi in Ama hong hotkhiatna vangliatna upna tawh a pulaak hi; tua
bang mi in Jesuh thupiak bangin a nungta mi hi. Koi bangin Jesuh pulaak thute i
tel thei hiam? Pumpi a thah khit ciangin kha a that thei lote na kihta kei un.
Hell khuk sungah pumpi le kha a nihin a susia
thei pa na kihtazaw un” (Matt. 10:28) hih thu in Pasian kihta cih thu i tel
nadingin hong huh thei hi lo hiam?
TUESDAY
April
18
A
Nungta Pasian Bulphuh Nunna
Annek
tuidawn nopsakna tawh kidim tuhun nunzia sungah leitung van le nate bulphunin
nuntakna in manpha takin kingaihsun hi. Ahi zongin vantung panin sapna aw in
leitung ci le sa nopsakna nusia-in Pasian bulphuhin a nungta dingin hong sam
hi. Mi kimkhatten a nuntakna uh sum le paai tungah kinga-in nungta uh hi. Mi
kim khat in ahihleh ukna neihna, thu le za neihna bulphuhin nungta uh hi. Mi
kim khat in ahihleh nopsakna bulphuhin nungta uh hi. Mi kim khat in mi tungah
thu neihna bulphuhin nungta uh hi. Mi kim khat in kimawlna, music le
gualnopnate mitsuanin nungta uh hi. Mangmuhna bu thupuak in kician kitel
mahmahin Pasian kihta ding, zahtak ding le pahtawi dingin hong sawl hi; Pasian
bulphuha a nungta dingin hong sam hi. Matthew 6:33, Kol. 3:1, 2, le Hebrews
12:1, 2 sim in. Hih munte in i nuntakna-ah Pasian mitsuan ding thu bang hong
hilh hiam?
___________________________________________________________
___________________________________________________________
Mihing
lungsim sungah kido-na bulpi bel thu hong hilh hi. Tua thu in i nuntakna-ah kua
in thu nei-a, kua tungah thuman thutak ding i hiam, cih thu le Pasian deihna
tungah kipiakna thute hong hilh hi. A nunung bel kido-na in sia le pha kikal
kido-na hi ding a, hih kido-na in i lungsim khempeuh hong uk dingin kido uh hi.
Sawltak Paul in hih bangin hong hilh hi: “Khrih lungsim in note sungah hong om
ta hen” (Phil. 2:5). I ngaihsutna in i nuntakna khempeuh hong uk hi. Ngaihsutna
in i gamtatna kipatkhiatna hi. “Khrih lungsim puak na nei un” cih thu in
deihtel theihna hong pia kammal hi. I ngaihsutna, khensatna hong kal hi. Khrih
lungsim puak a tel zaw mi in Ama khekhap zui dingin a khensat mi hi.
Tua
ciangin i nuntakna buppi in Khrih ukna nuai-ah hong om ding a, i ngaihsutna in
tawntung thute tawh hong kidim thei ding hi.I zia le tong in i ngaihsutnate a
pulaak khia hi. Khrih lungsim bang a nei mi in Pasian kihta ding a, ama
nuntakna khempeuhah Topa Pasian bek a masak mi hi ding hi.I ngaihsutna uk ding
kisam hi, cih na theihnak leh ngaihsutna uk ding ol mahmah hi lo hiam? Thu hoih
thute tungah i lungsimte koih zaw-in, leitung thute tungah i lungsim i koih
sangin vantung thute i ngaihsut zaw ding hi. I lungsim in mawhna sung tumkhin
zo-in siatna tawh kidim ahi manin leitung nate le leitung nopsaknate tungah i
lungsim i koih hi. Tua hi-in, Paul hong hilh bang mahin khensatna le deihtelna
tawh a hoih thute i tel zawk ding Topa hong deih ahi hi. Vantung thute ngaihsun
thei dingin Pasian in deihtel theihna hong guan hi. “Sanggamte aw, tawpna-ah ka
hong gennop thu in, a hoih le a phattaak thute tawh na lungsim uh na kidimsak
un. Tuate in: A man, a dik, a tang, a siangtho, a deihhuai, le a pahtakhuai
thute ahi hi (Phil. 4:8). Koi bangin Paul hong hilh thute i nuntakpih thei ding
hiam?
WEDNESDAY
April
19
PASIAN
MIN THANGSAK IN
Thukhun
Lui sungah “Pasian min thangsak in” cih thu in (Mang. 14:7) Pasian thukhenna
tawh kizopin a kipulaak thu hi (Josh. 7:19; 1 Sam. 6:5; Jer. 13:15, 16; Mal.
2:2), vantungmi masa thu puak in (Mang. 14:7) Mang. 19:1,2 pulaak bangin
“Pasian phat un! Hotkhiatna, minthanna le vangliatna pen eite’ Pasian-a’ ahi
hi. A thukhennate thumanin thutang a, a paktatna tawh leitung mi khempeuh a
siasak, a paktat nu tungah thu khen khinta a, ama nasemte a thahsakna hangin
ama tungah a phu la khinta hi,” tawh kizopna nei hi. 1 Kor. 3:16, 17; 1 Kor.
6:19, 20; le 1 Kor. 10:31 sim in. Koi bangin hih Lai Siangthote in Pasian min
thangsak cih thu hong theisak hiam?
_________________________________________________________
___________________________________________________________
Sawltak
Paul gen bangin i pumpi in biakbuk hi; Kha Siangtho hong teenna innpi hi; a
siangtho Pasian in Ama teen nadingin a siangthosak biakinn hi, ci hi. Lai
Siangtho hong hilh a kician mahmah thu in i nuntakna khempeuh in Pasian min
thangsak dingin hong sam hi. I nuntakna buppi Topa tungah i kipiak ciangin
lunggulh khat bek i nei ding a, tua in Pasian minthangsak ding ahi hi. Annek
tuidawnna, puansilh nikteen, gualnopna, mi tawh kizopna-ah Pasian min a
thangsak dingin hong deih hi. Pasian min a thangsak nunna in Ama zia le tong
kilansak ding a, Ama deihna tungah a nuntakna khempeuh a kipia ding hi. Ama
deihna bek a sem nuam ding hi. Hih in leitung hun beikuana thukhenna siksanin thupi
mahmah hi. Romans 12:1, 2 sim in. Sawltak Paul hong hilh bangin i nuntakna
khempeuhah Ama tungah kipia dingin hong sawl hi lo hiam?
___________________________________________________________
___________________________________________________________
Thukhun
Thak sungah “Pumpi” cih kammal in “somata,” hi-in a khiatna in pumpi, lungsim,
theihnate (emotions) cihna hi. Phillips Lai Siangtho bu sungah “a etlawm
nasepna” “biakpiakna khat hi, ci-in pulaak hi. Kam dang khatin pulaak hi
lehang, na nuntakna khempeuh tawh Pasian kihta dingin na nuntakna khempeuh na
kipiak ciangin Ama min thangsak dingin na kipiak ciangin na pumpi, na lungsim,
na theihna (emotions) khempeuh Amah na pia ding hi; hih in khensatna tawh
biakna hi. Pasian thukhenna ngaihsunin Ama thupiak bangin a nungta nuam mi na
hi ding hi; hih thu in ngaihsutna hoih hi. Na pumpi na bawlzia ngaihsun in.
Pasian min a thangsak takpi na hi hiam?
THURSDAY
April
20
Mangmuhna
Pulaak A Zo Mite
“Pasian
thukham a zui mite le Jesuh upna bangin upna nei mite thuakna a om hi” (Mang.
14:12). Hih in leitung hun nunung a Pasian tungah a citak mite nunzia pulaak
hi. Hi mah taleh mi khat peuh in Jesuh up bangin upna a nei ciangin Pasian
thukhamte a nuntakpih thei hi. Mangmuhna hong gen limtakin i ciapteh ding kisam
hi; “Jesuh sungah upna” in thupi mah hi. Ahi zongin tua bangin pulaak lo zaw-in
“Jesuh up bangin upna” ci-in hong hilh zaw hi. Hih in thu lianpi huam hi. Upna
gil, a kip upna (Jesuh neih upna bangin upna) bek in Satan hong zia-etna tungah
zawhna hong ngahsak hi. Upna in thu-um mimal tungah a khawnkhongin hong kipia
hi. Kha Siangtho in i sungah hong teen ciangin upna thasanna zong hong om ding
hi; tua ciangin upna hong khangto thei pan ding hi. Lungsim hanciamna tawh zawhna
kingah ding hi lo a, a nungta Khrih vangliatna tawh zawhna a ngah ding ihi hi.
I mihing hihna tawh zawhna a ngah ding ihi kei a, Ama hangin zawhna a ngah ding
ihi hi. Khrih in zawhna ngah ahih manin eite in zong zawhna i ngah thei hi.
Eite in zawhna i ngah thei hi; bang hang hiam cihleh Amah in zawhna a ngah hi.
Eite in zia-etna tungah zawhna ngah ahih manin eite in zong zia-etna tungah
zawhna i ngah thei hi.
Hebrews
4:14–16 le Hebrews 7:25 sim in. Koici bangin “Pasian kihtain” “Ama vangliatna
phat” theihna lampi hiam?
_____________________________________________________________
___________________________________________________________
Jesuh
in Pasian Tapa hi; Amah in dawimangpa tungah zawhna a ngah hi. Amah in zia-etna
a thuak hi. Pasian kamciamte tungtawnin zia-etna tungah zawhna a ngah hi; Jesuh
in ama deihna khempeuh a Pa tungah a ki-ap hi; a Pa vangliatna tungah kinga hi.
Amah muang in; Amah en in; Amah um in; eite in zong zawhna i ngah ding hi.
Jesuh in eite adingin na khempeuhah kicinna hi. Vantungmi thumte thupuakte in
Jesuh thu mah hi. Mangmuhna bu pulaak thu khat in Jesuh zawhna thu mah hi;
lelhna thu hi lo hi. Tua zawhna in Ama hehpihna le Ama vangliatna tawh zawhna a
ngah mite thu hong hilh hi. “Zawhna ngah” cih kammal in Mangmuhna bu sungah
(11) vei bang kimu thei hi. Pawlpi (7) in kum zalom khat lai-a pawlpite panin
limciinna-in a kizang a khangkhanga om pawlpite limciinna ahi hi. Leitung hun
bei ciangin zawhna ngah mite in na khempeuh a luah ding uh hi, ci-in John in a
pulaak hi (Mang. 21:7). Hih thu in thukham tawh Pasian maipha ngah ding
hanciamna hi lo hi. Jesuh Khrih tungtawnin eite in zawhna i ngah hi. Ama nunna
in kicinna le dikna tawh a kidim hi. Ama kicinna bek mah in tawntung nunna hong
pia dingin hong kamciam hi. Tua in upna tawh kalsuanna hi; tua in nunzia hong
khel hi; nunzia thak hong guan hi; tua in thu-um mite sungah a lamdang hehpihna
hi. Na nuntakna-ah na zawh ding bang nate a om lai hiam? Koi bangin i
lunggulhnate a kimu thei ding hiam? Mangmuhna Bu pulaak bangin zawhna i ngah
nadingin bang kisam i hiam?
FRIDAY
April
21
Ngaihsutbeh
Ding: Heb. 7: 25 sunga Paul kammalte- Jesuh in eite
Siampi Lianbel ahihna thu “Amah a zuan mi mawh penpen zong a hotkhiat theihna
thute ngaihsun in. A mawh pen zong honkhia thei hi. Greek tawh kigelhna-ah
“kicing,” paubaanna omlo,” “A buppi” cih khiatna nei hi. Eite a hong honkhia in
Jesuh hi; Ama tungah a kipia ding ihi hi. Ama zawhna hangin eite in zong zawhna
i ngah thei hi. Ama sungah muanna nei—a, ei le ei kimuan ding hi lo hi.“Pasian
kihta un, cih sawlna a tomin kipulaak thei hi. Pasian in leitung mite tungah a
hong thupiak nunung bel in Ama minthangsak ding le Amah vangliatna pia dingin
hong sam hi. Tua bangin a nungta mite in siatna tungah zawhna a ngah ding uh
hi; Pasian hong geelsak hotkhiatna a langpan mite tungah zawhna i ngah thei hi
(cf.Mang. 14:9–11). Hih kihtakna in tu le tu-a kimu thei pah hi lo hi [Mang.
6:14–17), dipkua-in lignin lau-na hi lo hi. Ahi zongin hih lau-na in nuamna le
lungdamna tawh Ama thupiakte nuntakpih a, Amah bek mah biak ding ahihlam phawka
biakna hi. Amah simloh kuamah dang i biak ding hi lo hi. Ama simloh kuamah dang
tungah i nuntakna khempeuh pia-in i biak ding hi lo hi. A taktakin vankhuanuai
kido-na-ah a nungta Pasian simloh pasian dang tuamtuam i biak ding om lo hi.
Satan le ama nasem khempeuhte in tawntung kisiatna a thuak ding uh hi (Mang.
16:13, 14; 17:14; 20:11–15). Tua hi-in Topa kihtakna in mihingte tuahphatna
ding thu hoih hi zaw hi, cih kimu thei hi. Vankhuanuai khempeuh a kido-na-ah
Pasian in vangliatna tawh zawhna hi ding a, a tawntungin nuamna le lungdamna
tawh i nungta ding hi (Mang. 21:3– 4; Mang. 22:3–5).”Ángel Manuel Rodríguez,
“The Closing of the Cosmic Conflict: Role of the Three Angels’ Messages,” p.
27.
KIKUP
DING DOTNATE
1.
Pasian vangliatna lamdang ngaihsun in.
Amah in na khempeuh piangsakin, na khempeuh a om theihna in Ama vangliatna hang
hi. Vankhuanuai le a sung om na khempeuh i theitel zo kei hi; tua ahihleh tua
na khempeuh a Piangsak Pa theitel zo lo zawkan ding hi lo i hiam? Amah in
bangzahin lianin na khempeuhte tungah ukna nei Pasian mihing in i tel khin zo
ngei kei ding hi. Hih zahin a lian Pasian in ni khat ni ciangin eite tungah thu
hong khen ding hi. Koi bangin “Pasian kihta un” cih thu na theitel hiam? A
khiatna in bang hi ding hiam?
2.
Koi bangin thukham tawh Pasian maipha ngah ding hanciamna nialin Lai Siangtho
hong hilh sianthona, zawhna le lawhcinnate ngah thei ding i hiam? Bang hangin
Singlamteha Khrih zawhna i theih tel ding kisam hiam? Leitungah bang bang
zawhna i zah zongin hotkhiatna ngah nadingin i lametna phungpi hi.
3.
Bang hangin mawhna tungah zawhna
kamciam hong kipia hi mah taleh mawhna sungah kia-in dikna tawh kigamla phial
ta lehang, Jesuh in eite etteh ding hi; Amah in zawhna ngah ding hong kamciam
hi. Topa in ama kamciamte eite sungah a hong tangtunsak ding, i khialhna bang
thute in a khaktan suak hiam?
