LESSON 3 | APRIL 8-14 TAWNTUNG LUNGDAMNA THU

LESSON 3                                    APRIL 8-14

TAWNTUNG LUNGDAMNA THU

 

Sabbath Nitak

 

TU KAAL SUNG SIM DING; Mang. 14:6–12; 1 Kor. 15:1–4; Rom. 3:24–26; 1 Pet. 1:18–20; Matt. 28:19, 20; Sawl. 1:8.

 

KAMNGAH: “Tua ciangin vankimlai-ah vantungmi khat a leeng kawikawi vantungmi khat ka mu hi. Tua vantungmi in tawntung Lungdamna thu leitung minam khempeuh, pau-nam khempeuh tungah a puak kawikawi hi (Mang.14:6).

 

Nidang Israelte kim le paam in milim biakna tawh kidim hi. Tua mite in biakthei biakmawh pasian tampi bia uh hi. Suang tawh kibawl pasian, sing tawh kibawl pasian bia uh hi. Ahi zongin Israel mite biak Pasian in tua bang pasiante tawh tehkak theih ding hi lo hi. Amaute biak Pasian in hih bangin pulaak hi: Thkna. 6:4: “ Ngai un, Israelte aw: Note Pasian in Topa khat hi.”Kum hong pai toto-in Jew mite thungetna-ah hih Shema (Ngai un, Note Pasian in Topa khat hi) cih thu pulaak den uh hi. Tua bangin thungetna-ah “Ngai un” cih kammal in Topa khat bek ahihna thu a phawksak hi. Hih thu in khat le khat kikaal kizopna kipsakin amaute laka om kilemlohnate a beisiang thei hi. A nungta Pasian khat bek bia ahihna uh a lenkip uh hi.

 

Seventh-day Adventists pawlpi adingin vantungmi thumte thupuak (Mang. 14) in Shema khatin kipom hi. Tua thupuak in ei kua hi-a, leitung mite tungah i thupuak plaak hi. A tomin gen lehang, Pasian lamlahna bangin i kalsuanna kimu thei hi(Mang. 14:6–12); hih thu in leitung mun khempeuhah Lungdamna thu pulaak ding hong lawpsak hi. Tu kaal sung i sin ding thu in Mang. 14: 6-12 sunga thute hi ding hi. Tua bangin i kantelna-ah hehpihna thu siksanin Pasian hong hopihna aw a za thei i suak ding hi.

 

 

SUNDAY                              April 9

Hehpihna Tawh Kidim Lametna Laibu

 

Mi tampi in Lai Siangtho bu nunung pen Mangmuhna Bu a ngaihsut uh ciangin Pasian hehpihna thu a phawk kha kei uh hi. Mangmuhna Bu in thu dang hi lo-in hehpihna Bu hi. Pasian thu puak nunung bel i ngaihsut ciangin, mi tampite ngaihsutna in kihtakhuai sapi le limciinna tuamutamte bek ngaihsutnin nei uh hi. Mi tampi in Mangmuhna Bu pen lauhuai, kihtaak ngaihsut uh hi. Ai zongin limtakin ngaihsun hi lehang Mangmuhna Bu in hehpihna le lametna thu vive hong hilh hi. Cihnopna-ah a lauhuai sapi tuamtuamte le bawlsiatna thute lakah mailam hunah a hong tung ding hun hamsa thute kipulaak hi mah taleh hotkhiatna thu hangin lungdam nading thu Pasian in hong hilh hi.

 

Mang. 1:1–3 le Mang. 14:6 sim in. Koi bangin hih thute in Mangmuhna Bu bek tham lo-in tawntung lungdamna thu pulaak hiam?

 

________________________________________________________

___________________________________________________________

 

Mangmuhna Bu in Jesuh thu pulaak hi. Tua thute in A mite tungah a honghilh thute le a diakdiakin nunung a A pawlpi ading thute hi, ci-in i theithei hi.Tua thu in hehpihna tawh kidim thute hi-in, leitung hun bei kuan ading lametnathute hi. Mangmuhna Bu a kipat pan a tawp dongin Khrih in thahna thuak tuuno ahihna thu pulaak hi. Tua Bu a sim khempeuh in theihtelna ngahin akipulaak thuman bangin a nungta mi in thupha ngah ding hi, ci-in kamciamzong hong hilh hi. Mang. 1:5, 6 in Jesuh in eite hong it Pa, i mawhnate hongsawpsiang Pa, Ama sisan tawh hong lei ahihna thu le kumpi le siampi dinmunah hong koih ahihna thu kipulaak hi. Khrih sungah eite in hehpihna i ngah hi. Ama sungah mawhmai-na i ngah hi. Hehpihna in mawhmaisakin, i nuntakna ding tha hogn guan hi. Lametna hong guan hi. Cihnopna-ah Khrih in mawhna thaman panin hong honkhia hi; ni khat ni ciangin hong pai kik ding a, mawhna vangliatna panin hong honkhia ding hi. Hih in Mangmuhna Bu pulaak hi.

 

Thukin thupuak in, amasain vankimlai-ah vantungmi khat in leeng kawikawiin “tawntung Lungdamna thu” a tangko hi. Bang lungdamna thu hi ding hiam? Tua thu in Khrih sungah upna tawh hotkhiatna thu hi. Khrih in eite adingin sihina ahong thuak hi lo hiam? Tawntung nunna kamciam in eite thalawh zawh ding thu hi lo hi; eite adingin Khrih hong sepsakna hang hi zaw lo hiam? Hih thute khempeuh in vantungmi thumte thupuak kipatna hi, ci-in i thei hi. Tua hi-in mawhna le lamet bei leitung adingin vantungmi thumte thupuak in hehpihna tawh kidim thupuak hi; lametna le kamciam tawh kidim thupuak hi. Sapi le hun nunung adingin vauhilhkholhna thute bek mitsuan ding hamsa lo hi mah taleh, Mangmuhna bu in eite adingin sihna hong thuak Khrih hong sihna thu in i mitsuan ding thu bulpi hi zaw hi.

 

MONDAY                               April 10

Tawntung Lungdamna Thu

 

Mang. 14:6 kipatna-ah vantungmi thumte thupuakte kipatna-ah “tawntung” or “tawp hun nei lo lungdamna thu” cih kammal tawh kipan hi. Lungdamna thu thuk tel zo lo hi lehang, vantungmi thumte thupuak i tel zo kei ding hi. Lungdamna thu tel kei lehang, hun nunung a Pasian thukhenna, Babylon kisiatna, ahih keileh sapi ciaptehna cihte i tel zo kei ding hi. 1Kor. 15:1–4, Romans 3:24–26, le Romans 5:6–8 sim in. Koi bangin “Tawntung lungdamna thu” telthei ding i hiam? Eite adingin lametna thu lian bang hong hilh hiam?

_________________________________________________________

___________________________________________________________

 

Lungdamna thu in i mawhna hangin Khrih hong sihna a lamdang thu hi; vangliatna tawh sihna pan a thawhkikna le eite hong it tawntung, eite adingin a hoih bel hong deihsak thute ahi hi. Eite adingin a hong luang Ama sisan le a thawhkikna vangliatna sungah upna tawh i nuntak ciangin mawhna thaman le mawhna vangliatna panin eite in suahtakna i ngah hi. Paul in Khrih sungah lametna le thuhilhna, thugennate tawh a nungta hi. Thahna thuak Khrih thu bek

mah thu bulpi belin nei-in, mawhsakna le mawhna panin a hong suakta sak hi. Sihna pan a thokik Khrih vangliatna in tu-in zong mawhna ukna panin a hong honkhia hi. Khrih hong paikik ding thu in lametna hong guan hi. Romans pulaak thu nihte ngaihsun in.

 

1. Eite in hehpihna tawh dikna ngah ihi hi.

2. Hehpihna in Pasian dikna i ngahna thu a pulaak hi.

3. Upna tawh Khrih a sang mite in hehpihna hangin dikna a ngah uh hi.

4. Mawhnei mi ihih laitak mahin Pasian hong itna a hong kilang hi.

 

Khrih hong hehpihna ngah dingin kilawm lopi mah a hong pia hi. Jesuh in gimna lianpi thuakin sihna a hong thuak hi. Ama sihna hangin mawhnei mite in sihna panin uahtakna i thei hi. Amah in mawhna hangin Pa Pasian hehna le thukhenna a hong thuak hi. Amah in nawlkhinna a thuak hi. Tua manin eite a hong kisang hi. Eite thuak ding sihna Amah in a hong thuak hi. Tua hangin eite in a nungta ding ihi hi. Ama nunna tawh eite in a nungta ding ihi hi. Tua hi-in upna tawh hotkhiatna kingah thei ahi hi; thukham zuihna tawh hotkhiatna kingah hilo hi. Singlamteh tunga Khrih in eite ading ahong sepsak khit nungah mihing in bang behlap thei ding ahi hiam? Hih hotkhiatna kigeelna in leitung pianma-in kigeel khin ahi hi (2 Tim. 1:9, Titus 1:2, Eph. 1:4); hih thu hangin “tawntung lungdamna thu” ci-in kiciamteh hi. Leitung kipiansakma-in, Pasian in bang piang ding cih thu a theikhol hi; tua hi-in Topa Pasian in mihingte kihotkhiatna ding a hong geel hi; mawhna sung pan suahtakna dingin Topa in tua bangin geelna nei hi.

 

TUESDAY                                   April 11

Hehpihna Thu

 

Vantungmi thumte thupuak in hehpihna thu puak hi. Hih thu in Honpa hong itna in ciangtan nei lo hi, ci-in hong hilh hi. Jesuh hong itna in hell sangin thuk zaw hi; manthanna sangin lian zaw hi. Hih thu in ciangtan nei lo, mihing tel zawh loh thu hi; kuama nial zawh ding zong hi lo hi. Ciangtan nei lo itna hi, ci-in hong hilh hi. Pasian pen mihingte phawn theih ding hi lo hi. Amah in mihingte deih bangin

kikhel ngei lo hi. I pulaaksa bangmahin Ama geelna-ah mawhna sung pan a hong honkhia hi. Mawhna hong om ciangin hotkhiatna kigeel phingphing hi lo hi. Mawhna in Pasian linglawngsak lo hi. Mang. 13:8 le 1 Peter 1:18–20 sim in.  Hotkhiatna kigeelkholhna thu bang hong hilh uh hiam?

 

________________________________________________________

___________________________________________________________

 

Mang. 14:6 sung a “Tawntung lungdamna thu” cih kammal in a beisa, tuhun le mailam hun ading a pulaak thu hi, ci-in i thei hi. Pasian in mihingte a hong bawlin sia le pha a khentel thei dingin hong bawl hi. Tua hi-in siatna zong a tel thei ding hong thei hi. Tua bangin mihingte in deihtel theihna zangin a man lo thu i tel ciangin, itna tawh kidim Pasian langpang i suak hi. Deihtel theihna a nei lo hi lehang, van le nate tawh i kilamdanna om lo ding suak hi. Zawhthawh thu

tawh sawlmanna Pasian in deih lo hi; Ama zia le tong tawh kituak lo hi. Pasian in itna tawh khensatna bek a deih hi. Deihtel theihna hong kipiak khit a kipan a sia zong i tel thei hi. Siatna lam tel theihna zong kinei hi. Tua hi-in hotkhiatna in Adam le Eve in Eden huanah a omma nangawnin aom khin zo hi, cih hong hilh hi. “Mawhna hong om khit ciangin hotkhiatna a kikhuanung geel tawm hi lo hi. Tangtawng panin geelkholhsa-in a om ahi hi” Romans 16:25. Tangtawng pek panin Pasian tokhom panin kigeelsa thu, tu-in a hong kipulaak hi.” Ellen G. White, The Desire of Ages, p. 22.

 

“Tawntung lungdamna” in a beisa thu le tuhun ading bek hong hilh hi lo hi. Mailam hun adingin lametna hong guan hi. Tawntung Pa lungtang panin a hong pai thu hong hilh hi. Ephesians 1:4 sim in. “Leitung pianma” cih thu ngaihsun in. Khrih sungah note in “teltuam” ngah mi na hi uh hi. Bang hangin hih thu in tha hong guan hiam?

 

WEDNESDAY                                    April 12

Leitung Mun Khempeuhah

 

Mang. 14:6 simkik in. “Tawntung lungdamna thu” in bang ciang huamkha hi ding hiam? Bang hangin eite a hong sapna le hotkhiatna nasepna-ah thupi hiam?

___________________________________________________________

___________________________________________________________

 

Leitung hun bei kuanin thu kin tangko-na le vantungmi thumte thupuak in “tawntung lungdamna thu”in minam khempeuh, pau khempeuh, mi khempeuh tungah kipulaak ding hi. Hih munah pawlpi masuan lian mahmah khat, a thupi mahmah na khempeuh kipiakkhitna thu hi, ci-in tangko ding thu hi. Hih thu in hanciamna, kipiakkhiatna hong kal hi. Angsung khualna panin hong suakta sakin Khrih ading sepna hong kal hi. Hih thu in i nuntakna khempeuh hong kal hi. Leitung mit khuamuhna panin a lian zaw muhna hong neisak thu hi.

Matthew 28:19, 20 sim in. Koi bangin vantungmi khatna thu puak hong hilh hiam?

__________________________________________________________

___________________________________________________________

 

Paul David Tripp in a laibu gelh “A Quest for More: Living for

Something Bigger Than You” sungah mihingte lunggulhna thu tawh kisai thu le mihingte sangin a lian zaw thute “Mihingte in i nuntakna sasngin lian zaw (tawntung nunna) dingin a hong kipiangsak ihi hi. Mawhna in i nuntakna sangin a neu zaw dinmunah hong niamkhiatsuk hi. Khrih hong hehpihna in angsung khualna, ei le ei kiliatsakna, kiphatsakna panin a hong suakta sak hi. Tawntung nunna sungah a nungta dingin a hong khahkhia hi; Pasian ukna sungah nuamsa dingin hong suakta sak hi.” “Hotkhiatna sungah nuntakna sangin a deihhuai zaw, a lian zaw, hamphat ngahna dang om nawn lo hi. Tua hotkhiatna thu tangko dingin Pasian in nuntakna huu hong kop ahih bang mahin tua sangin a lian zaw nasep dang om nawn lo hi. Mang 14 pulaak Pasian kiang pan hong pai sawlna in Ama pawlpi tungah a hong piak nasep ahi hi.

 

Vantung hong guat nasepna-ah i nuntakna khempeuh kipiak ding lo ngal, hih nasepna sangin a lian zaw a dang sep ding bangmah om lo hi. Jesuh hong pai kikma-in hih nasep a sem ding ihi hi.” Na nuntakna sangin a lian zaw nasepna khat peuhah kihelna na nei hiam? Na tuahkhak thute in tu kaal sung thusinna thute theihtel nadingin ahong huh hiam? Piangsak Pa hong piak nasepna-ah tawntung kilamdanna a om dingin bang dang om nawn ding hiam?

 

THURSDAY                           April 13

A Mainawt Hotkhiatna Nasep

 

Adventist pawlpi makai mi masate in Pasian thuman thutak theihnopna lungsim tawh Lai Siangtho thuthukte a kankhiatna uh tungtawnin vantungmi thumte thupuak in pawlpi thupuak a thupi ahihna hong mukhia uh hi. Amaute tangko thute in tuhun a pawlpi tangko thute mah ahi hi. Leitung hun bei ciang a thupuak ding ahihlam zong a thei uh hi. Jesuh hong pai nadingin minam khempeuh, pau nam khempeuh, mi khempeuh a kigingkholsak ding thupuak ahi hi. Vantungmi thumte thupuak in pawlpi kipat a kipan pawlpi nasepna tha guan khat hong suak hi. 1874 kuma kibawl the General Conference panin a masa penpen missionary kipaisak John Andrews Europe gamah kipuak hi. Ellen G. White in eite lak panin “A hangsan penpen” John Andrews hi, ci-in pulaak hi. Andrews in pau nam 7 bang pau thei hi. Thukhun Thak buppi lotngah phialin gen thei hi. Thukhun Lui a tam zaw phial mah lotngah hi. Amah pen laisiamna, khuak a hat mahmah, laigelh siam, thugen siam mahmahin, Lai Siangtho thuthuk tampi zong a thei makai lianpi khat hi.

 

Bang hangin tua bangin mi thupi mahmah khat thu-um mi tawmno khat bek omna-ah kipaisak hi ding hiam? Bang hangin pawl sung pan mipil, misiam penpen hotkhiatna thu kigen ngei lohna munah kipaisak hi ding hiam? Bang hangin amah zong pai nuam hi ding hiam?  A sawt nai lo hun khat lai-in a zi in sihsan hi. Bang hangin a innkuanpihte, a lawm a gual naseppihte nusia-in a tate nih tawh a theih ngei loh gam zuanin Khrih adingin thuak ngam hi ding hiam?

 

A hang thu khat bek om hi. Andrews in Jesuh in a sawt lo-in hong pai ding ahihna thu thei hi. Tua hi-in hih thu in leitung mun khempeuhah kizel ding ahihna thu theitel hi. I nuntakna-ah leitung mun khempeuhah kizel ding hun nununga Pasian kiang pan thupuak bek mah masuan i nei hi. Tua bangin nasepna-ah laihilh siate, zatui zaha tawh nasem siavuan siamahte, pastorte, khut tawh sep theih tuamtuam a semte mi khempeuh kihel kim hi.Pawlpi nasem khempeuh in zong kizel hi.Pawlpi mite in zong Jesuh hong pai baih ta ding hi, ci-in i um ciat hi.

 

Mang.14:6, Sawl.1:8, le Matthew 24:14 sim in. A kibang bang thu kipulaak hiam?

_____________________________________________________________

_____________________________________________________

 

Tawntung lungdamna thu in gamgi nei lo-in mun khempeuhah akihilh thu hi. Hih thu in lei mong dongah a kizel ding thupuak hi. HIh thu in minam khempeuh pau nam khempeuh tungah kizel thupuak hi. A tawpna-ah hih thupuak in leitung buppi a tuamcip ding hi. Leitung gam om 235 lak pan gam 210 ah lungdamna thu kizel khin hi, cih thu in pawlpi nasepna tha hong guan hi lo hiam?

 

Hotkhiatna thu tangko na-ah bang dinmunah ma na pang thei hiam? Koi bangin vantungmi thumte thupuak tangko nasepna-ah a hoih zaw le a muibun zaw-in na sem ding hiam?

 

 

FRIDAY               April 14

Ngaihsutbeh Ding: Wednesday ni-a thusin thu ngaihsunkik in. I nuntakna sangin a lian zaw thu hong hilh hi lo hiam? I nuntakna in hun tomno khat sung bek hi-in, gimna siatna tampi i tuakkha hi. Deihna lungsim in na tampi sem hi. Pumpi taksa gol zenzen loh hangin i lungsim in na tampi sem thei hi Ngaihsutna khuak in gol lo hi mah taleh kim le paam nate tawh kizopna tungtawnin na lianpipi a sem zo hi.

 

1.       Hih a neu mahmah lungtang khat le ciangtan nei lo vangliatna nei Pasian mai-ah bang cihtham hiam? Genthamcing hiam?

 

2.     Angsung khualna bek tawh nungta ding maw? Ahih keileh nuntakna sangin a lian zaw thu taw nungta ding maw?

 

3.     Inndei sung khan neu khat sung khatah nungta-in angsung ding bek mitsuani a nungta mi na hi hiam? Hih bangin nunna sangin a

4.     lian zaw, a tangzai zaw nunna deihhuai zaw lo hiam?  Jesuh sungah hong kipia tawntung nunna sungah nungta nuam zaw lo na hiam?

 

“Pasian sila, nasemte in vantung lam ento-in a maitang uh khuavak in taanin vantung panin a siangtho khuavak in a taan hi. Amaute in mun khat panin mun khatah pai kawikawi-in vantung pan thupuak a tangko uh hi. Aw tampite kiza dinga, leitung buppi tungah vauhilhkholhna kipia ding hi. Nalamdang tuamtuamte kimu ding a, natan neite in damna a ngah ding uh hi. Satan in na tuamtuam bawl ding a, vantung laizang panin meikuang kia-sak dongin leitung mite hong khem ding hi. Mang. 13:13. Tua hi-in leitung mi tampi in sittelna a thuak ding uh hi.” Ellen G. White, The Great Controversy, p. 612.

 

KIKUP DING DOTNATE:

 

1.   Ellen G. White in a genna-ah” Upna tawh dikna kingah hi, cih thu in vantungmi thumna thupuak sungah kihel mah hiam? ci-in mi tampi in hong dong uh hi. Ka dawnkikna-ah, ‘Vantungmi thumna thupuak in upna tawh dikna kingah ahihna thu kitel takin hong hilh hi.” Ellen G. White, The Advent Review and Sabbath Herald, April 1, 1890. Upna tawh dikna kingah hi, cih thu in vantungmi thumna thupuak tawh kizopna nei hiam?

 

2.    “Tawntung hotkhiatna lungdamna thu” ngaihsunkik in. Tawntung gospel in bang hiam?

 

3.    Leitung gam tampi-ah Seventh-day Adventists thu-um mi om cih thu in bang hong hilh hiam? Pawlpi in hanciamin a nasepna bang kimu thei hiam? Tua hi-in koi bangin tual pawlpi, Sabbath School biakpiakna akipan “leitung mun khempeuhah lungdamna thu kizel ding nasepna-ah kihel hiam?