LESSON 2 | APRIL 1-7 TAWNTUNG HUN DING

LESSON 2                           APRIL 1-7

TAWNTUNG HUN DING

 

Sabbath Nitak

 

Tu Kaal Sung Sim Ding: Matt. 24:1; Mang. 14:14—20; Matt. 16:27;

Sawl. 1:9—11, Mark 4:26—29, Mang. 16:1.

 

KAMNGAH: “Tua ciangin ka khuadak leh meiipi a bang a kang biakbuak om a, tua meiipi tungah mihing tawh a kibang khat tu-in, kham lukhu khu-in, a khutah phiaukawi hiam khat a tawi ka mu hi. Biakinn sung panin vantungmi khat hong paikhia a, meiipi tungah a tu mipa nakpitakin samin, “Leitung mite lak dingin min mahmah a, a lak hun hong tungta ahih manin na phiaukawi tawh at in,” a ci hi (Mang. 14:14, 15).

 

Topa Pasian in A mite a hopih tawntung hi. Amaute nuntakpih ding thuman thutak a hilh tawntung hi. Tuiciin tunma tun nading thu a kipan (Pian. 6:7) Jesuh hong pai ding thute a hilhkholh hamtang hi (Dan. 9:24—27); Khrih hong pai-ma kisem ding thute- dawpkholh thukhenna thute (Dan. 7:9, 10; Dan. 8:14) le a nunung thukhenna thute zong a hong hilh khol hi (Mang. 12—14), Topa Pasian in eite tungah hong gen khin zo hi. Leitung beikuan adingin leitung mite le a Mite adingin a tuam vilvel thupuak a hong hilh hi. Tua thupuak in Amah hong pai ding a kigingkhol dingin hong hilhna hi. Hih thu puak in vantungmi thumte thupuak hipah hi. Amaute in vankimlai-ah leengin leitung mun khempeuhah a tangko kawikawi uh hi. Vantungmi thumte thupuak in Jesuh hong hehpihna pulaakna a nunung pen hi ding hi. Tua sapna in mihing dikna tungah kinga lo-in Jesuh dikna le Ama hong

hahsianthona tungah kinga zaw ding sapna tangko-na hi. Hih thupuak in eite tungah vangliatna a hong tun ding thupuak hi. I pulaaksa bangmahin eite in Khrih i tel zaw ding hi; Ama tungah i ki-ap ding kisam hi; Ama hong sawl bangbang I man ding kisam hi; i khensatna bangin tu-in a thuak ding ihi ta hi. Tawntung nunna i telleh tawntung nunna sung i tung ding a, tawntung sihna i telleh tawntung sihna a thuak ding ihi hi. Tua hi-in tu-in i kiginkholh ding ahi hi.

 

SUNDAY                                        April 2

Tawntung Nunna Teel

 

Mang. 14 in mawhna tawh kidim leitung adingin Jesuh thupuak nunung pen hong hilh hi. Leitung in Pasian a langpan zawh kum tul guk bang a pai khin hi. Tua hi-in Jesuh a sang mite hi taleh a nial mite hi taleh amauten thaman a san ding hun hi ta hi. Mangmuhna Bu in Khrih dikna thu hong hilh hi. Hih in mawhsakna panin hong suaktasak a, mawhna sila panin a hong khahkhia hi. Hih thu in leitung mun khempeuhah a kizel ding thupuak hi. Matthew 24:14 sim inla Mang.14:6 tawh enkak in.

 

Jesuh in A Nungte tungah bang kamciam hong pia hiam? Ama hong pai-ma-in leitung mun khempeuhah tangko ding bang thu hong hilh hiam?

___________________________________________________

_________________________________________________________

 

“Hotkhiatna Lungdamna (Gospel) in leitung mun khempeuhah kipuak ding hi,” ci-in Jesuh in thu hong pia hi. Hih thupuak in Matthew 24:14 sungah kipulaak hi. Jesuh in thupiak in hun nunung ciangin hong tangtung takpi ding hi. Mang. 14:6 pulaak bangin hotkhiatna lungdamna thu ( gospel) in minam khempeuh,, pau nam khempeuh, mi khempeuh tungah kigen ding thupuak ahi hi. Mang. 22 sungah Jesuh in “Kei, ka hong pai baihta ding hi” ci-in thumvei vilvel kipulaak

hi (Mang.22:7, 12, 20). Amah hong pai baihta ding ahihna thu siksanin i Topa in“ A dik mi in diklai ta hen. A mawh mi in mawh den ta hen; a siangtho mi in siangtho denlai tahen” (Mang. 22:11), ci-in pulaak hi. Mangmuhna Bu in Khrih a nial mi ngah ding le Amah a sang mi ngah ding thute hong hilhkim hi. Mimal khat ciatin i khensatna bangin a thuak ding ihi hi. Thu neuno tungah i khensatna in thu lianpi hong thuakkha sak thei hi. Tua hi-in Jesuh adingin nungta ding maw, ahih keileh Jesuhnnialin nungta ding maw, cih thu i khensatna bangin thaman hong kipia ding hi. I nuntak sungin i telkhialhleh tawntung siatna i thuak ding hi. A nunung pen hun hong tun ciangin Jesuh tawh a nungta thei dingin Amah mah i tel zawk ding kisam hi. Leitung in Khrih nial ahih manin tu-in siatna tawh kidimin i nungta hi. Tu-in nisimin Khrih tungah ki-ap ding le Ama thupiak sungah a nungta dingin i khensat thei hi. “Topa Pasian i itna hangin Ama thupiakte a zui ihi hi” (1 John 5:3). Ellen G. White hong gen bangin: “Jesuh in cikmah hunin kikhel ngei lo hi; Ama hong pai ciangin zong Ama zia le tong hong kilang ding hi. Nunzia kikhelna ahihleh tuhun hi. Nisim i nuntak khuasakna in tawntung i tun nading mun a manawh ihi hi.” Last Day Events, p. 295.

 

Koi bangin Topa Pasian i zia le tong hong zuun hiam? Ama hehpihna sungah khangto cih thu a khiatna in bang hi ding hiam? Jesuh tawh kisuun zia le tong i neih nadingin koi bangin i sungah Kha Siangtho in na hong sem thei ding hiam?

 

 

MONDAY                                   April 3

Mihing Tapa Hong Paikikna

 

Mang. 14 sungah Topa in a mite ading le leitung adingin Ama thupuak pulaak hi. Jesuh hong paikik ding thu bulpi siksanin Ama kamciam tangtung ding a, “Nangmah in Mihing Tapa in vangliatna tawh kidimin Vanglian Pa ziatlamah tu-in om na mu ding hi; Amah in meilom tung tuangin hong kumsuk na mu ding hi (Mark 14:62).

 

Mang. 14:14 sim in. Leitungah Jesuh hong paikik nading bang min

tawh kipulaak hiam? Bang hangin John in tua bangin pulaak hi ding hiam?

 

________________________________________________________

_________________________________________________________

 

Jesuh in “Mihing Tapa” cih min zangin amahmah hong paikik ding ahihna thu Gospel sungah kimu thei hi. “Mihing Tapa” cih min in Jesuh zat mun mahmah min khat hi. Amah in mihingte tawh dinmun kibangin hong nungta hi. Amah in eite Honpa hi. Amah in eite bang mahin zia-etna hong thuak hi. I thuakkhak hamsatnate Amah in zong a hong thuak hi. Eite lakah hong nungta Jesuh mah in eite hong lato dingin hong paikik ding hi. Tua hi mah taleh amah in eite khat bangmahin Satan zia-etna a hong thuak hi mah taleh Amah in Satan

tungah zawhna a ngah hi.

 

A nuai-a Lai Siangthote in Jesuh, Mihing Tapa thu bang pulaak uh hiam?

 

Matt. 16:27 _____________________________________________

_________________________________________________________

Matt. 24:27, 30 _________________________________________

_________________________________________________________

Matt. 25:31, 32__________________________________________

_________________________________________________________

 

A nuai-a thute ciamteh in:

 

(1) Jesuh, Mihing Tapa in vangliatna le Ama vantungmite tawh hong pai ding hi

(2) Amah in keelte lak panin tuute hong khenkhia ding hi( hih in

thukhenna pulaak hi)

(3) Minam khempeuhte tun nading mun a hong khen ding hi. “Mihing Tapa” cih min ngaihsun in. Hih in Khrih in mihingin hong nuntakna thu ngaihsun in. Amah in Pasian hi mah hi. Ahi zongin Amah in eite khat bangmahin mihing hi. Ahi zongin eite bangin Amah in mawhna nei lo hi.

 

Hih thu in Pasian in eite a hong itna bangzahin lamdang hiam cih

ngaihsun in. Amah in i hamsatnate thei-in zawhna hong guan hi?

 

TUESDAY                                       April 4

Vantung Thukhenna

 

Mang. 14:14 le Sawl. 1:9—11. A kibang bang thute na mukhia hiam?

 

_________________________________________________________

_________________________________________________________

 

John pulaak thu in “Mihing Tapa in meitung tuangin a hong kum suk ka mu hi (Mang. 14:14). Jesuh in vantungah kahto-in, Luke in Sawl.1:9 sunga a pulaak bangin Nungzuite in vantunglam ento-in om uh a, “ Tua bangin ento-in a om laitakun Jesuh in laktohna ngah hi. Amah in meilompi le vantungmi honpi tawh vantungah laktohna a ngah hi. Tua ciangin vantungmite in lungzinna tawh kidim Nungzuite tungah “Laktohna a ngah hih Jesuh mah note kiangah hong kum sukkik ding hi (Sawl. 1:11). Hih thu in Pasian mahmah in a pulaak thu hiin mihing tel zawh loh thu kihel hi. Hih “Jesuh” in Mihing Tapa hi-a, Amah in Nazareth khua sung leivui lamdungte tungah a pai Mipa in, mihonpi tawh kidim Jerusalem khua sung lampite-ah zong pai-in, Israel gam sung khuano khuatate pan cinate damsak hi; Galilee gam mualtungte-ah hotkhiatna thu a gen kawikawi hi. Mihing Tapa in Daniel. 7 sunga thukhenna tawh kisai-in kipulaak hi.

 

Daniel 7:9, 10, 13, 14 sim in. Bang hangin Daniel in Jesuh pen Thukhenna tawh kisai-in “Mihing Tapa” ci-in pulaak hi ding hiam? I thusinna om bangin Thukhenna-ah “Mihing Tapa” cih min in khamuanna bang hong guan thei hiam?

 

________________________________________________________

_________________________________________________________

 

Daniel 7:9, 10 sungah Daniel in vantung thukhenn tokhomte amuhna thu hong hilh hi. Tua tokhom kimah vantungmi tulsawm tulthen sangin a tam zaw aom uh hi. Thukhunna kipan hi; laibute ki-en hi. Vantungmite in i nuntakna kiciaptehna laibute vankhuaunuai muh dingin a sittel uh hi. Daniel 7:13, 14 pulaak bangin Mihing Tapa in Taang Mipa (Ancient of Days), le Pa hihna tawh Ama tawntung gam a luah hi. Thukhenna in vankhuanuai khempeuh muhna-ah Pa, Tapa, le Kha Siangtho in mihing khempeuh hotkhiatna sung tung thei dingin a sepna khempeuh a pulaak uh hi. Hih thukhenna in mi siangthote bek tham loin Pasian zia le tong mantakin a kilangsak hi.Hih thukhenna in Satan zuau gennate a pholaak hi ( Job 1—2, Late 51:1—4).

 

Pasian mai-ah na nuntakna khempeuh hong kisittel ahihna thu ngaihsun in. Tua ahih leh bang lametna nei na hiam? ( Rom. 8:1.)

 

 

WEDNESDAY                               April 5

A Zote Kham Lukhu

 

John in Jesuh a pulaakna-ah A lu tungah kham lukhu khu-in a khutah a hiam mahmah phuaikawi a tawi Mihing Tapa ci-in pulaak hi (Mang. 14:14). “Lukhu” cih kammal in “stephanos” hi. Hih in zawhna ngah miten a khuk uh lukhu hi, cihna hi. Kimawlna-ah zawhna ngah le kidemna-a zawhna ngah mite ngah, pahtawi-na, minphatna le zawhna lukhu hi. Jesuh in ling lukhu khu hi; tua in simmawhna le zahpihna limcing hi. Amah in nawlkhinna thuakin mihingte nialna a thuak hi. Amah in cilphihna, satna ahong thuak hi.

 

Ahi zongin tu-in Amah in minthanna le vangliatna lukhu a khu hi. Amah in kumpite Kumpi le topate Topa hi. Mang. 14:15 le Mark 4:26—29. Hih munte in a kibang thu bang pulaak uh hiam? Tua thute in bang thu hiam?

_________________________________________________________

________________________________________________________

 

Vantungmite in vangliatna tawh kidim biakbuk a om Pasian kiang panin hong pai uh hi. Pasian in vantungmite enin “tu-in a hun tungta hi” ci-in a pulaak hi. Buhvuite min khin hi. Biakbuk panin vantungmite hong pai-in Jesuh kiangah hong pai uh a, awngaih mahmah tawh “Tu-in a hun hong tungta hi. Buhte min khin hi,” ci-in a pulaak hi. Pai inla na tate tawh inn hong ciah in. Thuthun Thak sungah Jesuh in lokhawhna thu gentehna tungtawnin Ama hong pai ding thu a hong hilh kholkholna mun tampi-ah kimu thei hi. Buhte min khinin buh atna limcingin hotkhiatna khaici bangin kituhin mun khempeuhah kizel a, mi tampi in hotkhiatna sung tung ahihna thu a hong hilh hi. “Khaici kituhin ankung hong po khiatna in i sungah vantung thu a hong kipatna limcing hi. Ankung hong khangtoto-in gah tampi hong gahna in Khristian nuntakna-ah picinna limcing hi. Thu zuihna le taksa nuntakna-ah nunna lo-in khantohna om thei lo hi.

 

Nuntakna lo-in ankung in si ahih keileh gah nei thei bek hi. Ankung khantohna a thawm bangmah kizakna om lo hi mah taleh a khanlam kimu thei veve hi. Khristian nunna zong tua bangmah hi. Tua bangin khantohna-ah i nuntakna in kicinna i ngah thei hi. Pasian deihna tangtung hi. Tua bangin tatsat lo-in a khangtoto ding ahi hi. I nuntakna a omlaisiah siantho-na in a kizom toto ding ahi hi. Mihing in hamphatna a ngah semsem ciangin i phutkhak thute zong hong kibehlap toto ding hi. Mihing thutheihna zong hong khangtoto ding hi.

Ellen G. White, Christ’s Object Lessons, pp. 65, 66.

 

A ki-at thei ding a min khin ankungte in hehpihna le itna tawh a nunzia kikhel mite limcing hi. Amaute nunzia in Pasian min a thangsak uh hi. Amaute lungtang in Khrih lungtang tawh pum khat suakin Ama deih bangbang amaute in zong a deih thei uh hi.

 

Koi bangin Ellen G. White pulaak thu “I nuntakna-ah khantohna

khempeuh in nunna kicinna hong ngahsak thei hi” cih thu na telthei

hiam? Midangte in i khialhna kicinlohnate a hong muh uh ciangin a kicing nunna cih in bang a cihna hi ding hiam?

 

 

THURSDAY                                            April 6

Khaici Khempeuh In Gah A Nei Hi

 

Mang. 14 in anlak nihte thu pulaak hi. Kham khaici anlak in midikte limcing hi-in; a hut lenggahte in diklohna le manthanna limcing hi. A nih tuakin kungmin khin khaici hi. Khaici kituhin a kung hong pokhiain gah hong nei hi. Mang.14:17—20. “Pasian hehna lenggahzu” in bang hi ding hiam? Mang.14:10; Mang. 15:1; Mang. 16:1.

______________________________________________________

_________________________________________________________

 

“Biakna tau panin vantungmi a dang khat hong paikhia-a, amah in mei phualpi tungah zawhna a nei hi(Mang.14:18).Hih vantungmi in Pasian kiang panin thukhenna nunung meikuang a hong tawi hi. Buhte min khin zo hi. Mawhna in a mongdong tung hi. Langpanna in Pasian hehpihna khengval hi. Mawhna in siattawpin sia-in, a siattawpna dong a tung hi. Itna tawh kidim Pa Pasian in eite adingin na khempeuh a bawl a sem thei hi. Eite in mawhna sung pan i suahtak nadingin Amah in a nuntakna a hong pia khia hi.”Mawh nei

lo Amah in eite adingin mawhna hong suak hi. Tua thu hangin eite in Pasian sungah dikna i ngah thei hi” (2Kor. 5:21; Gal. 3:13).

 

Singlamteh tungah a nuntakna hong pia khin Topa Pasian in bang dang hong sepsak thei ding hiam? Kha Siangtho a nial mite tungah hehpihna in bang mah a sem thei nawn kei hi. Mang. 14 in genkholhna thute pulaak hi. Ankung khempeuh at hun hong tung hi. Khaci kituh khempeuh in a kungin hong po-ina gah min khin ta hi. Pasian mite in Ama hehpihna, itna le lai-natnate a kilangsak ding uh hi. Siatna tate in huaihamna, enna, le hazatna tawh a nungta uh hi. Jesuh zia le tong in kilangsak a om bang mahin Satan zia le tong a om hi. Vankhuanuai khemepuh mai-ah Pasian mite in dikna a kilangsak ding uh hi. Cikmahin tua bang dikna kuamah in a mu ngei nai kei uh hi. Khrih mite sung pan a kilangkia Khrih dikna in vankhuanuai khempeuh in amu ding hi.

 

Pasian langpang mite in zong tua bang dikna amu ding uh hi. Gitlohna, mawhna le siatna, thukham neihlohnate in vantungmite le mihing in amu tawntung hi. Sia le pha kido-na, thumanlohna le thumanna khempeuh in vankhuanuai khempeuh in kitel takin amu ding uh hi.

 

Koi bangin sia le pha kido-na na theitel thei hiam? Bang hangin tua thu theihtelna in thupia hiam? (Heb. 5:14.).

 

FRIDAY                                  April 7

Ngaihsutbeh Ding: “Leitung nuntak khuasakna le thu upna-ah i muhna tungtawnin a kikhel ihi hi. I ngaihsutna in i muhna zui-in gamtangin, nasem hi. I muh thute lenate itna le zahtakna i nei thei hi. Mihing in siangtho le thuman thutak sungah a nungtakna in kicing khin cih dinmun om thei lo hi. Angsung khualna a nusiat mateng amah in a deihhuai nunzia a nei ngei kei ding hi. Tua hi-in amah in siatna sungah a kia semsem dng hi. Pasian hong hehpihna bek in a siangtho nunna-ah hong tunpih thei hi. Kha Siangtho tawh a nungta lo mi in siatna sungah a nuai kiat semsem hi.” Ellen G. White, The Great Controversy, p. 555. Zia le tong hoih lohnate in kilangtangin hong kilangkhia pah ahi kei hi. I theih khak loh kaalin, damdamin siatna sung i tung hi. Gamtat zia le tong hoih in i lungtang i ngaihsutna pan a hong kipan khia ding hi. Khaici in i sungah kivawh masa ding hi. Khaici hoih vawh hi lecin, gah hoih na at thei ding hi.

 

Khaici hoih kituh hileh kung hoihin gah hoih hong gah ding hi. Tua hi-in khaici hoih lo tuhte in a kung hoih lo, a gina lo gahte a ngah ding uh hi. Siatna i gamtatleh siatna mah i atkik ding hi. Pasian awlmawh lo-in i nuntak ciangin vantung thu manphate le i masak zawk ding thute i theithei kei hi. Pasian awlmawh lohna gahte in it theihlohna, i dinmun tawh lungkimna, thu zuihna-ah lungkiatnate i ngahkha thei hi. Hih bang thu hangin hun nunungah bawlsiatna hong tung ding hi. “Sapi ciaptehna” zong hong tung ding a, tua ciaptehna a ngah mite in gimna lianpi a thuak ding uh hi. Tua hun hong tun ciangin bawlsiatna

lianpi hong tung ding hi. Tu-in Pasian in eite hong sam a, i nuntakna khempeuh Ama tungah kipia dingin hong sam hi. Kha Siangtho hong sapna dawng lo-in na omleh Pasian lamlahna na phawk kei ding a, zuau thu sung i tung ding hi. Satan hong khemnate zui-in i nuntak ding hi.

 

 

KIKUP DING DOTNATE

 

1.       Mang. 14:14-20 siksnin hehpihna tawh hotkhiatna thu le hehpihna sungah khantohna kizopna in koi bang hiam? Buhat anlakna tawh kisai bang thu guipi kimu thei hiam?

 

2.     Singkungte hong khanzia le thu upna-a khantoh nadingin a kisam thute kikum un. Bang thute in kibatna nei hiam? Singkungte khanzia panin bangthu nuntakpih ding i hiam?

 

3.     Pasian hong piak theihtheihna le deihtel theihna in kizopna a nei hiam? Bang hangin Khristian thu upna-ah khantohna dingin tua thu in thupi hiam?

 

4.     Bang hangin “Mihing Tapa” cih min in thukhenna le Khrih hong pai kik ding lamenin a nungta mite adingin bang thu hong guan hiam? Bang hangin mihingte in Mihing khat mah in eite lamah hong pang hi cih thu in khamuanna hong guan hiam?