LESSON 13 | June 17-23 PASIAN VANGLIATNA TAANG PEMPAM

LESSON 13                      June 17-23

PASIAN VANGLIATNA TAANG PEMPAM

 

Sabbath Nitak

 

Tu Kaal Sung Sim Ding: 1 Thess. 5:1–6; John 8:32; Mang. 18:1; Mang.

4:11; Pai. 33:18, 19; Mang. 5:6, 12; Mang. 13:8.

 

KAMNGAH: “Tua khit ciangin vantung panin vantung midang khat a hong paisuk ka mu hi. Amah in aana a lian mahmah nei a, ama vang in leitung buppi a taan hi” (Mang.18:1).

 

A sawt lo-in leitung bei-na hong tung ding hi. Lai Siangtho hong

genkholh bangin tangtung takpi ding hi. Koi bangin hong tangtung ding cih ahong kihilh loh hangin genkholhnate tangtung takpi hi. Thukham 4na deihlohna hangin Sunday sianthosakna hong lian semsem ding a, Sunday ni tawlngak ding thupiak hong om ding hi. Mangmuhna bu in leitung hun bei ciangin a piang ding thute hong hilhkhol khin a, genkholhnate a tangtung sak ding kua hi ding a, ki bangin hong tung ding cihte a hong kihilh loh hangin Lai SIanghto hong hilh bangin a hong tungtung hi ta hi.. Piangsak Pa biakna le piansak nate biakna, hih nih bek hong om ding hi. “ Vantung, leitung tuipi le ciktuite Piangsak Pa bia un” (Mang. 14:7), “Leitung pianma pekin thahna thuak Tuuno laibu le Nuntakna laibu sungah min kigelh khempeuh in tua sapi le ama milim a bia ding uh hi” (Mang. 13:8). A dangkhatin gen leng, TOpa Jesuh Khrih a zui mi khempeuh in Ama thupiak zui ding uh a, amaute min in nuntakna laibu sungah a kigelh hi.

 

Pasian ciaptehna lai bu sungah min kigelhna sangin a deihhuai zaw bang om nawn ding hiam?

 

Pasian in leitung mun khempeuhah hotkhiatna thu pulaak dingin

Seventh-day Adventist Pawlpi hong khangkhiasak hi. Tua hi-in Adventist thu – um mi khempeuh in thuman thutak sungah kikhel ding a, tawntung lungdamna thu (Mang. 14:7) tawh a suak thak, a kikhel mite hi ding uh hi. Tawntung lungdamna thu in eite ading sihna hong thuak Khrih tungah kinga-in, Ama sungah khamuanna a hong neisak hi.

 

 

SUNDAY                              June 18

Leitung Hun Bei Ding Kiginkholhna

 

1 Thess.5:1–6 sim in. Sawltak Paul in leitung hun nunung a hongpiang ding bang thute pulaak hiam?

_____________________________________________________________

___________________________________________________________

 

Sawltak Paul in Thessalonica khua-a thu-um mite tungah Khrih hong pai ding nai ta ahih manin “vilin ngakin om un” ci-in hanthawn hi. Ama hunlaia mite tung tua bangin thu hilh ahihleh tuhun thu-um mite tungah bang thu hong hilh ding hiam? Paul in Thessalonica pawlpite “ khuavak tate” ci-in pulaak hi (1 Thess. 5:5) tua hi-in amaute in khuamial gamtatna nusia-in suun nitang sungah (Khrih hong pai ding thu tawh) a nungta mite ahi uh hi(1Thess. 5:4) Khrih hong pai ciangin guta bangin kuama kiginloh laitakin hong pai ding hi (1 Thess. 5:4). Jesuh in ama hong pai ding limtakin vilin ngakin thungenin i om ding hong deih hi (Matt. 24:42, Matt. 26:40, 41). Vilin ngak cih ciangin thu upna-ah lawpna khanlawhna gen hi. Lungsim kikem zo cih ciangin tuhun in bang hun hi-a, bang thute masak ding cih thu theihtelna tawh nungta cihna hi.

 

Ellen G. White genbehna-ah: “A sawt lo-in a hong piang ding thute a thei eite in kigingkhola i nuntak ding kisam hi. Tua thute hong tun ciangin patau lo, lamdangsa lo-in i om thei ding hi.” Testimonies for the Church, vol. 8, p. 28. Leitung in lamdangsa-in dipkua-in om dinga, eite in tua bang ihi kei ding hi. Bang hunin hong tung ding cih i theihkholh loh hangin tu-in tuahun adingin na kigingkhol thei hi.Daniel 2 sim in.Kumpi khat khit khat hong khanna thu kipulaak hi; tua bang mahin tangtung takpi hi.

 

Hih in Pasian muanhuai ahihna thu hong hilh hi lo hiam? Bangci bangin genkholhna bangin tangtung takpi ding hiam?

____________________________________________________________

___________________________________________________________

 

Khrih in leitung hun bei cianga thupiang dingte hong hilh khol khin hi. Tua hi-in leitung hun bei-a a piang ding thute hangin i kigingkhol ding hi. Daniel le Mangmuhna bu sunga genkholhnate tawh kizomin tuhun adingin Ellen G. White genkholhnate in Kha Siangtho hilhna tungtawnin a pulaak hi-in leitungah a hong tung ding genkholhna hi, ci-in io theithei hi. Pasian Kammal in leitungah a piang ding thute hong hilhkholh hi. Daniel 2 sungah leitung ukna nei kumpite thu hong hilhkhol hi. Tua hi-in Pasian in muanhuai ahihna hong hilh hi.

 

Paul in “midangte bangin ihmu ding hong deih lo hi.” Hih inbang khiatna nei hiam? Koi bangin ihmu le ihmu lo theithei ding i hiam? Ihmu hi lehang bang dinmun hong tun thei ding hiam?

 

 

MONDAY                      June 19

Thuman Theitel

 

John 8:32, John 7:17, le John 17:17 sim in. Jesuh in thuman bang kamciamte hong pia hiam?

________________________________________________________

___________________________________________________________

 

Pasian in a nunung bel A mite tungah a hong sapna thu in Babylon khialhnate nusia-a tawntung khuavak sungah nungta dingin hong sapna ahi hi. Na khempeuh tungah Lai Siangtho in thunei pen hisak in. Lai Siangtho hong hilhna i zuih laiteng Dawimangpa hong khemna pan i suakta thei ding hi; Sabbath thuman I lenkip thei ding hi. Vantungmi nihna thupuak in a man lo thu sangin a man thute pom zawk ding hong hilh hi. Mihing ngei-na, ngaihsutnate sangin Lai Siangtho hong hilhna a zui zaw ding ihi hi. Mihingte thuhilhna sangin Pasian hong lahna Lai Siangtho tawh a nungta ding ihi zaw hi.

 

Thumna vantungmi thupuak in amasa vantungmite thupuak tawh kizomin “Sapi ciaptehna a lauhuai-na thu hong hilh hi.Lai Siangtho buppi sunga genkhoolhna khempeuh in “sapi” in biakna le leitung ukna” kigawmkhawm thuneihna nei kipawlna khat hi, ci hong hilh hi. Mang. 13, 14 pulaak “sapi” in a manlo biakna pan a hong khangkhia Rome pawlpi ahihna kimu thei hi. Rome khuapi panin a hong khangkhia pawlpi in tu-in leitung mun khempeuhah kizel khin hi. Hih pawlpi thuneihna lian mahmah a, gam uk makaite tungah zong thunei pawlpi hi. Hih Rome pan hong khangkhiat pawlpi in biakna le gam ukna gawm khawm hi. Hih pawlpi in leitung gam makaite tungah huzaap lianpi nei a, leitung buai-na tuamtuamte a zawhpih ding hi. Gam sung buai-na, sum le paai zonnate-ah makai-in ama thuneihna kuamah in a nial kei hi. United States in leitung kumpite kipawl khop nadingin makai ding hi;leitung ukna nei makai khempeuh kipumkhatsak zo ding hi.’ Aman lo hih thunih – mihing a sih khit ciangin a si thei lo nunna khat om lai hi, cih upna le Sunday sianthosakna tungtawnin Satan in mi khmpeuh ama khemna sung a tunpih hi.

 

Mihing a sih hangin khuaphawkna nei lai hi, cih upna in dawi tawh kizopna hong tunpih hi. Sunday sianthosakna in Rome tawh kizopna piaksak hi. USA gama Protestant pawlpi tuamtuamte in dawi tawh kizopna pan masa ding uh a, tua panin Rome tawh kizopna zong hong neito to ding uh hi. Hih thum kigawmna panin Rome thupiak bangbang hong zui ding uh hi.” Ellen G. White, The Great Controversy, p. 588. Hih thupuakte in Khrih nungzui mi citakte tungah thupuak hi-in, Pasian thukhamtele Jesuh neih upna bang a nei mite nuntakpih ding

thupuak ahi hi (Mang. 14:12).

 

Koi bangin Jesuh thugen, thuman thutakin note hong suaktasak ding hi, cih thu na theitel thei hiam?A khiatna in bang hi ding hiam? Koi bangin thuman thutak in hong suaktasak hiam? Hih tawh kisai-in “suakta” cih in bang khiatna nei hi ding hiam?

 

 

TUESDAY                                           June 20

PUAHPHATNA KIZOM SUAK

 

Hun nunung ni ciangin Pasian in Lai SIangtho thuman thutak bek a lenkip mi tawmno khat a hong khangkhia sak ding hi. Amaute in Phuahphate (Reformers) bangmahin Lai Siangtho bek mah a kimakaihsak ding uh hi; Khrih bek mah in hotkhiatna lampi a pom ding uh hi; KHa Siangtho in amaute hatna phungpi hi ding a, Topa hong paikik ding lametna bek a nei ding uh hi.

Zuau thu in thuman thutak tuamcip a,khuamial sahpi in tuamcip hi mah taleh amaute in Sababth thuman a kipan Lai Siangtho hong hilh thuman thutak a tangko ding uh hi. Vantungmi thumte thupuak in leitung hun beikuan ciangin kikhelna lianpi piangsak ding a, leitungah Khrih nasep kizawhsiangna hong tunpih ding hi. Mangmuhna bu pulaak genkholhnate in leitung adingin Pasian thupuak a nunung bel hi ding hi. Mang. 14 in leitung mun khempeuh a om pawlpi tungah tawntung lungdamna thu puakin nasem hi.

Mang. 14 sunga vantungmi thumte thupuak le Mang. 18 sunga vantungmi 4na in kizopna nei hi. Hih vantungmi in vantungmi thumte thupuakna-ah vangliatna a guan hi; hih thu hangin Leitung in Pasian vangliatna tawh akidim thei hong suak hi (Mang.18:1). Mang. 18 in leitung bei nading a thupiang dingte, hotkhiat lungdamna thu hangin a nunung bel zawhna thute a pulaak hi.

 

Mang.18:1 sim in. John in vantungmi thu bang hong hilh hiam? (Hab. 2:14.)

___________________________________________________________

__________________________________________________________

 

Vantungmi khat in Pasian tokhom panin vangliatna tawh hong kum suk hi; amah in Pasian hong hehpihna a nunung bel sapna le leitungaha hong tung ding gimnate a vauhilhkhol hi. Vantungmi in “thuneihna” tawh hong paisuk hi. Thukhun Thak sungah”thuneihna” cihkammal in “exousia” hi. Jesuh in hih kammal a zatna mun in a Nungzuite a sawlkhiatna-ah kimu thei hi. Matthew 10:1 sungah Jesuh in A Nungzuite tungah khuamial ukna nei dawite tugnah “Thuneihna” a pia hi. Amaute in sia le pha kido-na tungah zawhna ngah dingin thu kipia hi. Matthew 28:18, 19 sungah Jesuh in amaute khat vei a sawlkhiatkikna kimu hi; minam khempeuh nungzui suaksak ding le vantung le leitung a om thuneihna khempeuh tawh amaute a sawl khia hi.”

 

A tawpna-ah “khuamial ukna neite tungah thuneihna tawh kisaiin hun nununga hong tung ding thute nisim i nuntakna-ah koi bangin I phukhak zel hiam? Kua thuneihna zui zaw ding i hiam? Pasian thuneihna maw, sapi thuneihna maw ahih keileh mihing khat peuh thuneihna zui zaw ding maw? Tu-in kua thuneihna zui na hiam?

 

 

WEDNESDAY                                              June 21

Leitung In Pasian Vangliatna Tawh Kidim

 

Mang. 4:11, Mang. 5:12, Mang. 19:1, le Mang. 21:26 sim in. Bang

kammalte in Mang. 18:1 pulaak Pasian vangliatna tawh kidim leitung

pulaak hiam?

___________________________________________________________

___________________________________________________________

Kido-na Lianpi, sialepha kido-na in Pasian minphatna, Pasian vangliatna tawh kisai kidona hi. Satan in lanpang vantungmi khat hi lel a, Pasian in thuman lo hi; biak taakcing lo hi, ci-in pulaak hi; Pasian thukham in mihing suahtakna le nopsak ding khaktan hi, ci-in pulaak hi. Jesuh nunzia, a sihna le sihna pan a thawhkikna in Satan gen thute in thuman ahihlohna a pulaak hi. Eite a hong Piangsak Pa in mawhna sung pan a hong honkhia dingin leitungah hong pai hi. Singlamteh tungah Jesuh in Satan zuau gennate man lo ahihlam kilangsak hi; Ama hong sihna in Pasian in itna le hehpihna, thuman thutak ahihna hong musak hi. Ama hong itna hong tuamin, Amah pahtawi-in a nungta leitung hun bei kuana a nungta Pasian mite in itna nei lo siatna tawh kidim leitungah Ama hong itna, angsung zong lo-in Ama hong kipiaknate amau nunzia tungtawnin a kimu khia ding ahi hi.

 

Pai. 33:18, 19 sim in. Koi bangin Pasian in Moses tungah a vangliatna kilangsak hiam? Pasian vangliatna in bang hi ding hiam?

___________________________________________________________

___________________________________________________________

 

Pasian vangliatna in Ama zia le tong ahi hi. Pasian hong itna tawh a hong hotkhiat mite in Ama itna tawh a kidim uh ciangin leitung in Pasian vangliatna tawh kidim hong suak ding hi. I nunzia khempeuh in Topa vangliatna, a hong itna a kilangsak ding hi. Khuamialsahpi in a tuamcip leitungah a nunung bel thupuak in “Pasian kihta unla, Ama vangliatna phat un” (Mang. 14:7). Mihing gamtat hoihnate le dikna-ah vangliatna om lo hi. “Leitung mun khempeuhah kipuak ding Khrih dikna bek in vangliatna nei hi. . . … Hih vangliatna bek in Vantungmi thumna thupuak zosiangsak ding hi.”

 

Ellen G. White, Testimonies for the Church, vol. 6, p. 19. Ellen G. White in zong hih bangin gelh hi: “Upna tawh diktanna in bang hiam? TUa in leivui tawh hong kibawl mihing sungah Pasian nasepna hi; tua nasep in mihing sep zawh a hi kei hi.”Testimonies to Ministers and Gospel Workers, p. 456. Mihingte vangliat nading bangmah om lo hi; Pasian bek in vangliatna a ngah ding hi.

 

 

THURSDAY                                       June 22

TUUNO: THAHNA THUAK TUUNO

 

Mangmuhna bu sungah limciinna tuamtuam kimu thei hi. Hih limciinnate in a thupi thu limcing hi; vantung a gulpi (Mang. 12:3, 4, 7), van kimlai-ah a leeng vantungmi (Mang.14:6),sisan tawh kidim sapi tungah a tuang numei (Mang. 17:3), cihte hi.Hihte in Pasian Kammal pulaak hi-in, Kha SIangtho humopna tawh John a hong gelhkhiat ahi hi. Mangmuhna bu a sim mite adingin a thupi thute pulaakna hi-in, “Hih laibu a sim mite mi hampha hi a, hih thu kigente ngai-in, hih laibu sungah a kigelh thu a zuite zong mi hampha mah ahi uh hi. Bang hang hiam cih leh hih thu kigente a tun ding hun hong naita hi.” (Mang.1:3).

 

Tua hi-in Mangmuhna buppi sungah limciinna tuamtuamte kimu

kikkik thei hi. Bang limciinna le bang limcing uh hi ding hiam?

 

Mang. 5:6, 8, 12;Mang. 7:17;Mang. 14:1; Mang. 15:3; Mang. 19:7; Mang. 21:22, 23; le Mang.22:1, 3. Tuuno in bang limcing hi ding hiam?

Bang hangin Tuuno in Mangmuhna bu sungah tam veipi kigelh hi ding hiam?

____________________________________________________________

___________________________________________________________

 

Hi mah hi. Mangmuhna bu kipatna-ah “Hih in Jesuh Khrih hong lah thute hi;” Tuuno hi bek tham lo-in Amah in thahna thuak Tuuno hi (Mang. 5:6, 12; Mang.13:8). Cihnopna-ah Jesuh Khrih in singlamteh tungah thahna hong thuak hi. Hih in Lai SIangtho buppi thu bulpi hi bek tham lo-in Mangmuhna Bu le vantungmi thumte thupuak thu guipi hi. Pasian hong sapna tungahi cihtak ding kisam hi. Pasian in a pawlpi piangsak kei leh eite in bangmah i sem thei kei ding hi; thahna thuak Tuuno nei kei lehang, mawhna hangin a nuntakna hong pia Jesuh nei kei lehang i thupuak in bangmah kimanna nei lo suak ding hi; i sepna i thugenna khempeuh in hih thu tungah kinga hi.

 

“I pawlpi upna thu guipite in Thahna thuak Tuuno tungah kinga hi; hih thu mah i nuntakna khempeuh kingakna hi;biakpiakna, Lai SIangtho simna, thungetna, i sepna khempeuh kingakna bulpi hi. Singlamteh tunga sihna hong thuak Tuuno in i nunzia hong khel hi; mi khat le khat i kizopzia zong hong puahpha hi.” Ángel Manuel Rodriguez, “The Closing of the Cosmic Conflict: Role of the Three Angels’ Messages,” p. 70. A lauhuai sapi gitlohna, gulpi gitlohnate, kido-na, gal le sa, natna, sihna, bawlsiatna, sapi ciaptehna lakah Thahna thuak Tuuno mitsuanin a kalsuan ihi hi. Amah bek mah in hong honkhiain, tu-in hong honkhia lai-a, tawntung adingin zong a hong honkhia ding hi. Amah in kikhel ngei lo ahih bangmahin a tawntungin a kip ding hi. A tawpna-ah vantungmi thumte thupuak in hih thumah ahi hi.

 

Bang hangin Sabbath sianthosakna in pawlpi thupuak a thu mungpi hi-in, midangte zong hih thu-ah i makaih ding le ei mahmah in i nuntakpih thu hong suak hiam?

 

 

FRIDAY                      June 23

Ngaihsutbeh Ding: “Pasian nasemte maipuak in vantung khuavak a kilangsak uh hi. Amaute in ki-apna nei-in mun khat pan mun khatah vantung thupuak a tangko uh hi. Mi tul tampi in leitung mun khempeuhah vauhilhna thu a gen uh hi. Thu-um mite sungah nalamdangte kimu ding a, cinate in damna ngah ding uh hi. Satan in zong nasem a, man lo nalamdangte zong sem a, vantung panin meikuangkia-sakin mihingte haong khem ding hi. Mang.13:13. Tua hi-in leitung mihingte in sittelna a thuak ding uh hi. “Vantung thupuak in langpanna tampi thuak hi mah taleh Kha Siangtho nasepna hangin a mainawt thei veve hi. Tua bangin uplahna thute zong kipulaak hi. Khaci kituh khin hi; a gah at ding lametin i ngak hi. Khuamial nasem mite in huzaap lianpi nei-in nasep in masuan thei hi. Mi tampi ngaihsutnate kikhelin thuman theihtelna ngah mi tampi a om hi. Tu-in vantung khuavak in mun khempeuh a kitaan hi. Thuman theihtelna ngah uh a, thuman theihtelna a ngah zawsemsem uh hi. Innkuan sung kizopna, pawlpite kizopnate in tu-in thaneem hi. Thuman in na khempeuh sangin manpha zaw hi. Thuman kitangko-nate tungtawnin mi tampi in Topa lam zuan thei hi. Ellen G. White, The Great Controversy, p. 612.

 

KIKUP DING DOTNATE:

 

1. Ellen G. White in “Upna tawh dikna kingah hi,” cih thu in vantungmi thumna thupuak hi.”Evangelism, p. 190. Hih in a khiatna bang hi ding hiam? Upna tawh dikna kingah hi, cih thu le vantungmi thumna thupuak in bang kizopna nei hiam?

 

2. Mang.14:12 simkik in. Pasian thukham nuntakpihna le thukham zuihna tawh Pasian maipha ngah ding hanciamna bang kilamdang hiam? Sawlmanna in bang hun ciangin thuykham zuihna tawh Pasian maipha ngah ding hanciamna hong suak hiam? Thukham a zui mi khat in bangci bangin ama hanciamna tawh Pasian maipha ngah ding hanciamna suak thei veve hiam?

 

3. Lai Siangtho hong hilh bangbang i gen ding thuman hi na ven, Mangmuhna bu sunga a lauhuai “Sapi” thu a kigen ciangin a langpan mite bangci bangin na dawngkik thei ding hiam?

 

4. Tuhun leitung thupiangte na lawmte tawh kikum in. Leitung bei ding thupiang tawh a kizomto thu na mu thei hiam? A piang taktak thu ahi khol lo ding thu lametna khengval a suah khak loh nadingin bangci bangin kidawm thei ding i hiam?