JUNE 24 | Inn phual in Mission nasepna
13th Sabbath
Victor leh Eunice
Victor le Eunice in Topa na a sem nuam mite ahi uh hi. Tua hi-in a gamla mahmah Angola ahih kei leh Mozambique gamah missionary dingin a kipia khia uh hi. Ahi zongin 1974 kumin gam sung buai-na hangin koimah ah zinkhia thei lo ahih manun Portugal gam sung mahah Pasian nasem dingin a kuankhia uh hi. Amau ngaihsut bang lo-in Portugal kumpi galkapte in gam uk sem uh a, gam sung khuasakna tampi kikhel mang hi. Adventist Pawlpi in pawl sang khat hon ding geelna nei uh hi. Tua ma-in pawl sang neih ding geelna om lo hi. Gam buai-na hangin pawlpi phattuamna hong suak hi.
Kha 4, kha 5 khit ciangin Victor le
Eunice in Ellen G. White lamlahna bangin pawl sang kipat ding ngaihsun uh hi.
“Biakin khempeuh in thuhilhna naupang kipantahna inn hi ding hi. Thu-um mi a om
nakleh pawl sang neih ding hanciam huai hi, cih siksanin pawl sang khat hong
kipan uh hi. Hih sangah hong kah naupangte Pasian thu tawh pantahuh a, khangno
tampi in hamphatna lianpi a ngah thei uh hi. Bang hang hiam cihleh amaute in
leitung pilna bek a sin uh hi lo-in tawntung kimang ding pilna zong a sin thei
uh hi.
Sangsia laihilhte zong Pasian nasem
mah hi. Sangnaupangte Pasian thuman thutak tawh pantahin thuman lampi ahilh nak
uhleh naupangte nuntak khuasak nadingin bulkip a bawl bawl suak uh hi. Pawl
sangte-ah lai tuamtuam kihilh uh hi mah taleh Lai Siangtho kihilhna in a manpha
pen ahihlam i phawk ding kisam hi. Pasian kihtakna nei-in Amah zahtak ding
kihilhin kipantah ding kisampha mahmah hi. Kamsangte sangte in tua bangin khangnote
pantah ding hi (Review and Herald, July 2, 1908, 1). Pawlpi in tua bangin pawl sang kipat ding
ngaihsun uh hi. Eunice min nei laihilh sangsia khat in Adventist upna sungah
khang 4na bang hi-in, Porto khuapi pua lam mun khatah pawlsang kipat ding a
ngaihsun hi. Tua bangin a ngaihsutna-ah
upna bek mah tawh kalsuan ahihna
akiphawk thei hi. Bang hang hiam cihleh Portugal gamah pawlsang peuhmah
om nai lo hi.
Gampua
Angola ahih keileh mission field pai tawh kibang hi, ci-in Eunice pulaak hi. “Na khempeuh kipat thak
ding vive ahih manin hanciamna kisampha mahmah hi. Hih sanginn in 1975 kumin
kiphuan khia hi-in, sangnaupang tawmno khat bek om hi mah taleh amaute lungkia
het lo-in zomtoto thei uh ahih manin pawl sung panin naupang honkhat tawh kipan
thei uh hong suak hi. Pawl dang panin zong naupang tampi takin hih sangah hong
laisin dingin sang hongkah uh hi. Huzaap lianpi nei SDA hi lo innkuan sung
panin zong naupang honkhat sang hong kah thei uh hi.
Eunice
in pension a lak dong mah hih sangah laihilhin om hi. Victor in ahih leh
kum 21 sung sem hi. amah pen electronic khut siamna nei khat hi-in, sang panin
a khawl khitteh electronic lam semkik hi. Anihun sangah a sep hun sungun
sangsiapi kikhel uh hi. Hih sang panin missionary nasep khiatna tampi nei thei
uh hi. Sangnaupangte zong tua bang nasepnate-ah kihel nuamsa mahmah uh hi. Hun
khat bang union president le pastor 14 le laibu zuak evangelist 4 tawh mun dang
khatah kuankhia-in Pasian thugenna zong va nei thei zel uh hi. Khangno tampi in
a nuntakna uh Jesuh tungah kipia-in tui kiphum uh amuh ciangin Victor le Eunice
in lungkim mahmah uh hi. SDA ahi lo innkuan khat sung pan a khangkhia khangno
kum 14 a pha khat in hotkhiatna thu sang thei-in SDA upna sungah tui kiphum
hi. Lawmngaih khat zong nei-in tua
lawmtawh nupa suak thei uh hi. Hih nupate in suan le khak nei uh a, a tate uh
khat in siavuan semin om hi. A dangte zong pawl sungah a kizang thei mahmah
khangno makaite hong suak thei uh hi. Hih sang panin khuasung kim le paam
khantohna nasepnate ah zong kihel kawikawi uh a, khua sung makaiten zong
pahtawi-na tampi pia ngei khin uh hi.
Tu-in Victor le Eunice in kum
70val khin ta uh hi. A beisa thute a ngaihsut uh ciangin Pasian in a
nuntaknate uh zangin innphual panin na lianpi sem thei ahihlam a phawk thei uh
hi.
Hun
khatlai-in Angola ahih keileh Mozambique gamah missionaries pai ding geelna nei
uh hi. Gam sung buai-na hangin pai thei lo uh hi mah taleh inn phual panin missionary
nasep kisem thei ahihna a mu thak hi. Victor in a pulaakna-ah Sanginn panin
zong Pasian na kisem thei ahihna, tua bang mahin inn sung panin zong Pasian na
kisem thei hi, ci-in a pawlpi mite tungah a hawmsawn thei hi. Jesuh in a
Nungzui 12te tungah a thupiak om bangin Eunice in zong tua bangin nungta dingin
a khensat thei hi. Jesuh in amaute tungah “Note zong pai khia nuam na hi uh
hiam? ci-in a dot ciangin, Peter in dawngkik a,
“Topa aw, Nang kiang lo-ah koi-ah pai ding ka hi uh hiam? Nang mahin
tawntung nunna na hi hi,” ci-in a dawngkik hi (John 6:67, 68).
Eunice in zong Peter bangmahin “Pasian
na sem kei lecin kua in sem ding ahi hiam? ci-in a pulaak hi. “Adventist sangah
nasem kei leng koi-ah sem nawn ding ka hiam? ci-in Eunice in pulaak hi.
Tu quarter Sabbath School 13na sumpi
in Portugal gama pawlpi nasep nadingin kipuak ding hi. A diakdiakin Setubal
khuapi-a om Adventist sang puah nadingin kizeek ding hi.
MUC in ahihleh Langzang biakinnlamna
huh nadingin kipuak ding hi. Nung Sabbath a i kizaksaksa om bangin tu Sabbath
in Quarter cin Sabbath 13na ahih bangmahin sumpi i khiat ngei a zah thum khia
ciat ding hi hang.
