March 25 | LEIBA NEI LO
Lydie
Lydie in Rwanda gama ateng khangno khat hi. A innkuanun nek tawm zong hi-in neih le lamh kicing nei lo uh hi. Ama lunggulhna lianbel in university khat sangkah dingin degree khat nei ding ngimna nei hi. Tu-in koi bangin kalsuan uh hiam?
Lydie in a laisin zo mahmahin University
of Rwanda ah sangkah thei hi. Hih university in Rwanda gamah university lian
penpen hi. Ahizongin amah in university sangkah ding huhna ngah thei lo hi. A nu le pa in zong sum nei lo ahih manun
sangkahsak zo lo uh hi. Ahi zongin Lydie nu le pate in a sangkah ding mah
deihsak veve uh hi Adventist University of Central Africa ah sangkah theih
nadingin sanglutna ngahsak thei uh hi. Hih sangah tuition tawm vei zaw
tham hi. Lydie lungkhamna veng zaw deuh
hi.
Lydie
in cinate kemin limtakin khoi thei hi.
Tua bangin kum tampi sung nasem hi. Tu-in cina kepdan, zatui tawh kisai
sinna nei thei ding hi ta ahih manin a ngimnate a tangtung ding ahihlam thei-in
lungdam mahmah hi. Amah tawh kibangin a lawmte 35 tawh sangkah kipan thei uh
hi. University of Rwanda bang loin, Adventist University of Central Africa ah
sangkah nuamsa zaw hi. Adventist University of Central Africa ah sangnaupang 70
khawng bek sangkahin om hi. Hih sanga
akah sangnaupangte in mi hehpih thei mahmah uh a, innkuan khat bangin nungta
thei uh hi. Laihilh siate zong migi thei uh
hi. Sanglai sin a zozo lote a tuamin hilh thei uh hi. Thunget kikhop a
kipan Sabbath ni kikhop cihte ah nuamtakin kikhawm thei uh hi.
Lydie in Adventist innkuan sung pan hong pai hi lo
ahih manin SDA pawlpi upna thute tam theihnai lo hi. Nungak khat ahih bang
mahin a lawm le gualte tungtawnin SDA upna thute hong theihlawh hi. Tu-in Lydie
in Sabbath thuman theihtelna ngahin biakpiaknate-ah nuamsa bek tham lo-in makai
khatin om hi. Sangkahna-ah lai-et ding tampi om hi mah taleh biakpiakna masak
den tawntung hi. Sabbath thuman a theih khak manin lungdam mahmah hi. Lai
Siangtho thuman sinna neih ding lunggulhna nei ahih bangin Lai Siangtho thuman
sinna-ah va kihel thei hi. Tua bangin a sinna tungtawnin Sabbath in Pasian
thupiakna tawh kituak ahihlam hong tel semsem thei hi. A nuntakna Topa tungah
kipiak ding ngaihsutna nei ahih manin tui kiphum dingin a min pia hi.
“Kumkhatna
sangkah ka zawh theih a leh tui ka kiphum ding hi,” ci-in khensatna nei hi. A
laite zong zo thei khin hi mah taleh tui kiphum ding a hun sot to hi. A
kumnihna ciangin sangsap ding sum hamsatna tuakkha hi. Sum hamsatna hangin “Ka
sangkahna ka zozo ding hiam? ci-in lunghimawhna lianpi nei hi. Pasian tungah
kamciam khat pia-a, “kumnihna sangkah nong zawh a leh tui ka kiphum ding hi,” ci-in kamciam pia hi.
Pasian in ompihin a laite zosak thei a, Lydie in zong tui kiphum dingin a
nuntakna Topatungah kipia thei hi.
Ahi
zongin a sangkahna leibate loh nading vai lianpi khat nei lai hi. A nu le pate
in huh zo tuan lo uh ahih manun Lydie in a sangsap ding a thalawh kul hi, ci-in
pulaak uh hi. Nuntak hamsa takin kalsuan hi. Nasem ahih manin laivuan kimkhat a
hun lapin gelh thei lo hi.A lawm a gual sangnaupangten zong thungetpih uh hi.
Lungkia lo-in sang zom toto suak dingin hanthawn uh hi. A kum li-na a
kah ding ciangin sangzop thei ding dinmun tung zo lo kisa lua ahih manin sang
tawp ding a ngaihsun hi. Rwandan sum francs (U.S.$1,500) leiba nei hi.Hih zah
leiba tawh sangzop ding ngaihsun zo lo hi. Leiba nei ahih manin sangzom thei
nawn lo suak hi.
Lydie in leiba loh zawh nading nasem
kipan hi. University ah sanginn thak khat kilamna-ah nasem hi. A lawm a gualte
sangkah uh a, aman nasemin a om ciangin a lungkia mahmah hi. Ni khat khitui
luangin sangkah nawn lo-in inn ciahkik ding a ngaihsun hi. Tua bangin a om
laitakin a siate khat in “Topa in na dinmun hong mu hong thei hi. Topa hong
nusia lo-in hong ompih tawntung den hi”ci-in thapia den hi. Pasian nusia lo-in
amah bek mah beel tinten ding a hanthawn hi. Tua bangin thungen a nipi kaal
khat sung bangmah kilamdanna om lo hi.
A tawpna-ah Pasian in Lydie thungetna
Pasian in dawng lo hi leh kilawm hi. A siate khat in lungkia lo-in mainawt veve
dingin a hanthawn hi. “ Lungkia lo-in Topa tungah thunget khawl kei in”ci-in a
siaten hanthawn den hi. Kaal khat sung tawntung nisimin Lydie in Topa tungah a
hamsatnate pulaak hi. Nipi kaal nih khit
ciangin lamet loh laitakin phone tawh kihopihna khat ngah hi. Innkuan khat in
huhna piak ding cih a zakna hi. “ Leiba bangzah nei na hiam,” ci-in dong a, tua
thu a zak ciangin Lydie in lungdamna lianpi tawh kidim hi. Leiba nei nawn lo ahih manin a laisin
ding hun tampi ngah zaw ta hi. Tua hi-in hanciam mahmah a, ol takin 2021 kumin Adventist
University of Central Africa panin BA degree a ngah thei hi. “Topa in ka
thungetna hong dawng bek tham lo-in Ama hong sawlna munmunah Ama nasem thei dingin
tha hong guan hi; hamsatna tuamtuamte a hong zawhpih hi.
2016 kumin gam tuamtuam panin Sabbath
School sumpite in Adventist University of Central Africa ah kipuakin sanginn
puahna-in kinei hi. Hih sanginnpi in 2021 kumin kihong kik hi.
Tu
quarter Sabbath School 13na sumpi in Adventist University of Central Africa ah
kipuak ding a, sanginnte behlapna ding, hall, sangsiate om nading inn le
sangnaupangte om nading boarder inn lam nadingin kipuak ding hi.
MUC
in ahihleh Sawbua Adventist Sang huh nadingin kipuak ding hi. Nung Sabbath a i
kizaksaksa om bangin sumpi i khiat ngei a zah thum i khiat ciat ding i
kihanthawn hi.
