Lesson 9 | Feb 25 - Mar 3 Huaihamna Kidawm in

 

LESSON 9                    FEB 25–MAR 3

HUAIHAMNA KIDAWM IN

Sabbath Nitak

Tu Kaal Sung Sim Ding: Isa. 14:12–14, Eph. 5:5, Joshua 7, John 12:1–8, Sawl.5:1–11, 1 Kor. 10:13.

KAMGNAH: “Tua ciangin Jesuh in amaute khempeuh kiangah, “Hoihtakin kidawm unla, na huaiham loh nadingun kikem un. Bang hang hiam cih leh bangzahta-in mi khat a hauh hangin a neihsa tawh a nuntakna taktak kicing zo lo hi,” a ci hi” (Luke 12:15).

Huaihamna in midangte hauhna, neih le lamhte lunggulhna, deihgawhna kideek zawh lohna, khaam zawhlohna hi. Huaihamna pen sia huai mahmah hi. Huaihamna hangin zuauphuahna, guktakna, mi thahna cihte hong piang hi. Pasian thukham palsatna lianpi khat hong suak hi. “Na vengte uh inn na deihgawh kei ding uh hi. Na vengte uh zi hitaleh, ama nasempa hitaleh, ama nasemnu hitaleh, ama bawngtal hitaleh, ama la hitaleh, na vengte a’ ahi na khat peuhpeuh na deihgawh kei ding uh hi,” a ci hi” (Pai. 20:17). Huaihamna in siatna khempeuh lak pan a lian penpen siatna khatin kiciamtehhi. Huaihamna in Pasian gam luahsak ding panin a hong dal khat hong suak hi. “Migilote, Pasian’ Ukna sungah a lut hetloh nading thu na thei uh hi. Note kihaibawl kei un. Numei tawh a paktatte, milim biate, mi zi ahih kei leh mi pasal tawh a mawhte, pasal le pasal a khialte, a gutate, a huaihamte, zukhamte, mi gensiate, ahih kei leh mi’ na a sutte khat beek, Pasian’ Ukna sungah lutthei het lo ding hi” (1 Kor. 6:9, 10). Huaihamna in buluhna, milim biakna, numei pasal mawhna, mizi mita tawh mawhna tawh kikim hi lo hiam? Tu kaal sung i thusin ding in huaihamna a lauhuai-zia le huaihamnate zawh theihna lampite i pulaak ding hi.

 

SUNDAY                          February 26     

Mawh Hong Kipatkhiatna Phungpi

 

Pasian bawlsa vankhuanuai panin koi bangin mawhna hong piangkhia hi ding hiam, cih dotna a nei mi tampi om hi. Koi bangin mawhna hong kipan khia cih thu tawm no khat bek i thei hi. Mawhna zungpi in huaihamna lungsim panin hong khangkhia hi, cih i thei hi. Huaihamna in mawhna phungpi kici thei kha ding hi. Isaiah 14:12–14 sim in. Mawhna sungah Lucifer kiatna hong hilhh hi lo hiam? Koi bangin huaihamna, hazatna in mawhna piangsak hiam?

 _________________________________________________________

“Vantung mite tungah pahtawina ngah hi napi-in, ama dinmun tawh lungkim lo-in, Piangsak Pa neih dinga kilawm liatnate deihgawhna lungsim hong neih ciangin Pasian it ding sangsikin langpan ding hong geel hi. Vangliatna khempeuh ama tungah kipia ding a lunggulh hi. Vantungmi khempeuh in ama na bek sem dingin a deih hi. Tua hun a kipan ciangtan nei lo Pa Pasian le Tapa tungah a kipia minthannate ngah theih nading lampi a zong hi. Hih vantung mi in Khrih neih vangliatnate suhkhiat ding a ngaihsun hi.”Ellen G. White, Patriarchs and Prophets, p. 35. Ephesians 5:5 le Kol. 3:5 sim in. Paul in huaihamna, hazatna thu bangci pulaak hiam? Bang hangin tua bangin gen hi ding hiam?

 _________________________________________________________

Paul in milim biakna le huaihamna kikimin a pulaak thu in lamdang i sa hiam? Milim biaten milim a biak uh ciangin a nuntakna khempeuh uh Pasian ahi lo nate tungah a ki-ap, kipia uh hi; Piangsak pa bia lo-in piansak nate tungah kinga uh hi (Rom. 1:25). Tua hi-in huaihamna zong neih dingin kilawm lo na khat neih i sawmna, deihna, Topa i deihna sangin nate deihna lianzaw-in i nuntakna khempeuh in tua na tungah kinga hi. Lucifer in a ngaihsut masakna-ah koi lam huaihamna, hazatna in manawhin bang hong tunpih ding hiam, cih theikholhna nei lo hi. Eiten zong tua mah hi lo i hiam? Haza kei in, cih thupiakna in lungsim ngaihsutna tawh kisai ahih manin a dang thupiakte zong palsat dingin hong makaih hi ( 2 Samuel 11.) 1 Tim. 6:6, 7 sim in. Koi bangin Paul hong hilh thu siksanin hazatna, huaihamna zo thei ding i hiam?

 

MONDAY                       February 27

Giahphuala Kisel Nate

Israelte tangthu-ah gam sung in nopsakna tawh a kidim pen hun hi dingin a kipulaak thu khat in; sehnel gam sungah kum 40 sung khualzinin a om khit uh ciangin Khapsa Leitang a luah hun uh hi dingin kiciamteh hi. A lamdang takin tua gam va luah thei uh ahih bang mahin Israelte in Jordan Gun tui a khan laitakin kantan thei uh hi. Gun tuikhang in khen nih kisuahin leitang keu tawnin Gunpi a kantan thei uh hi. Tua bangin amaute in Canaan gam sung hong lut uh ciangin Canaan kumpite in lau-in linggawp uh hi. Amaute in Israelte do kik ding a ngaihsun ngam kei uh hi (Josh. 5:1). Canaan gam luah zawh nadingin thu hamsa zawh ding a masa bel in Jericho kulhpi suksiat zawh ding ahi hi. Bangci bangin Jericho khuapi luah thei ding cih thu kuamah in a thei kei uh hi. Joshua in zong bangmah thei lo hi. Joshua in Topa tungah thungen a, Pasian in khuapi a lak zawh nading lampi a pulaak hi. Pasian lamlahna bangin a zuih uh ciangin Jericho khuapi a la zo uh hi. Ahi zongin a thupiangte sungah a deihhuai het lo thu khat hong om hi. Joshua 7 sim in. Jericho khuapi a zawh khit uh ciangin bang thu piang hiam? Tua thu panin nuntakpih ding bang thu na mu hiam?

 ___________________________________________________________

Thusitna a thuak ciangin Achan in a mawhna a pulaak hi. Tua vante a iplahna thu a pulaak hi. Hebrew tawh kigelhna-ah “ hazatna, huaihamna” cih kammal in “chmd” a khiatna in Lai Siangtho mun khatkhatah a deihhuai thu le thu hoihin kipuulaak hi. Hih kammal mah Daniel 9:23 sungah kimu thei hi. Gentehna-in Gabriel in Daniel tungah a pulaak thu in “Nangmah in mi lian, itna ngah mipa” na hi hi, ci-in kipulaak hi. Ahi Jericho kizawhna thu-ah tua kammal in a deihhuai lo thu-in kiciamteh hi. Pasian in limtakin thu hilh khin hi mah taleh (Josh. 6:18, 19), Achan in Pasian thupiakte nialin van manphate amuh ciangin iplahna a nei hi. Tua bangin huaihamna hangin a mipihte tampi in gim thuakluah uh hi. A taktakin Ai khua a zawh khit uh ciangin Joshua in Canaanite mite le Canaaan leitanga a teeng mite a kihta hi. I kim le paam mite kiang panin kihemkhiain i nuntakna a bei dingin kingaihsun in. Na sih khit nungah na min, na nunzia koi bangin kipulaak dingin na lunggulh hiam? (Josh. 7:9). Lam khat panin Topa in kim le paam siatna tungah zawhna a ngah dingin hong deih hi. Tua bangin zawhna-ah Ama vangliatna tawh kizo ding hi. Tua bang zawhna in midaangte tungah Topa vangliatna a kilang ding hi. Amaute zawhna in Yahweh vangliatna kilangsak ahi hi. Ai khua simna-ah guallelhna in gallelhna bek tham lo-in thuman lampi panin lampialna khat hong suak hi. Achan in lak loh ding van le nate a lak ciangin khialhna hi lo hi, ci-in pulaak hileh, khialhna neu no khat in gimna lianpi hong tun thei ahihna hong phawksak hi lo hiam? Tua bang khialhnate kua in thuak ding cih i theitel kei a, kua in gimna ngah ding hi, cih i theithei khol kei hi. Tua banah ka innkuanpihte in sum le paai kitangsam hi, ci-in a pulaak om hileh koi bangin tua bang lauhuai-na tawh kipelh thei ding i hiam

 

JUDAH NGAIHSUTNA

Lai Siangtho sunga kiciamteh a lipkhaphuai mahmah thupiang khat in Judah Iscariot tangthu hi. Hih pa in nungzui dang 11te tawh kibangin hamphatna a ngah nungzui khat hi. Amah in Jesuh tawh om khawm denin a Topa tung panin thuman tampi ngah khin hi. Judah in hotkhiatna ngah lo ding cih thu in bangzahin dahhuai thu hiam? Hotkhiatna ngah thei ding dinmunah a om kimlai tawntung kisiat thuak ding hi. Bang thu piang hiam? Hih thu dotna a dawnkikna kammal khat tawh kimu thei hi: huaihamna, ahih keileh hazatna, lungsim deihna hangin tawntung siatna a thuak ding hi. Jn. 12:1–8 sim in. Bang thu hangin mipi in Mary tungah mittu uh hiam? Judah in bangci dawn hiam? Jesuh in koici paupih hiam?

 ___________________________________________________________

Honpa in thudam takin Judah huaihamna a taihilh hi. Tua bangin thuhilhna a ngah khit ciangin Judah in paikhia-in siampi lianpa kiangah paipah vingvengin, Jesuh man ding a om galkap honpite tawh kimu hi. Judah in amaute tungah Mary piak sangin tawm a man zaw sumtang pia-in Jesuh mat le hen dingin a zuak hi (Matt. 26:14–16.) Judah tungah bang thu piang hiam? Hamphatna tampi ngah ngei khin hi mah taleh bang hangin Judah in tua bangin siatna bawl ding teelzaw hi ding hiam? Ellen G. White hong hilhna-ah, “Judah in a Topa tungah itna lianpi nei hi; Amah tawh om khawm tawntung nuam hi. A nunzia zong kikhel nuam mahmah khat hi. Jesuh tawh kizopna panin tua bangin kikhelna kingah thei ding ahihlam zong a thei hi. Honpa in Judah nial lo hi. Jesuh in Nungzui sawm le nihte lakah koih hi. Pasian thugen kawikawi (evangelist) ding nasep a guan hi. Dawi gilote hawlkhiat theihna vangliatna a pia hi. A dam lote damsak thei ding thu a pia hi. Ahi zongin Judah in a nuntakna buppi, anunna khempeuh Khrih tungah a kipia nuam kei hi.” The Desire of Ages, p. 716. A tawpna-ah eite khempeuh in zia le tongah paubaanna a tam a tawm i nei ciat hi. Pasian tungah kipia-in ki-ap hi lehang, eite sungah om Pasian vangliatna in kicinlohnate a hong khel thei hi. Ahi zongin Judah in Khrih tungah kipia nuam lo hi. Khrih vangliatna tawh hazatna, huaihamna tungah zawhna kingah thei hi. Tua hileh a lauhuai kisiatna tawh i kipelh thei ding hi.Hazatna, huaihamna nei lo kua om ding i hiam? Hih munah sum deihna, lungsim huaihamna, hazatna in guktaakna hong tunpih hi lo hiam? (John 12:6) A tawpna-ah Judah in Jesuh lehhek hi lo hiam? Hazatna huaihamna in lauhuai sung hong tunpih thei hi, cih i phawk ding kisam hi. Hahatna, huaihamna in thuneu mahmah tawh a kibat hangin tawntung manthanna hong tunpih thei ahihlam phawk huai hi

 

WEDNESDAY                  March 1

Ananias le Sapphira

 

Pawlpi mi khat hihna in a lawphuai mahmah thu khat hi. Pentecost Ni-a Kha Siangtho hong kumsuk khit ciangin sawltakte in vangliatna tawh thuhilh kawikawi uh hi. Thu-um mi tul tampi in pawl sungah hong uh hi. “ Amaute in thungenin a om laitakun, a omna mun in kilinglawp a, amaute in Kha Siangtho tawh kidim uh hi. Amaute in hangtakin Pasian kammal a pulaak uh hi. Mi tampi in kipum khat uh a, lungsim khat, ngaihsutna khat tawh a kalsuan uh hi. A neih a lamhte uh kei neihsa, nangneihsa cih om lo-in kipawlkhawmin ne khawm, zang khawm uh hi (Sawl. 4:31, 32). Ananias le Sapphira in hamphatna lianpi a ngah uh hi. Pawlpi masate sungah kihel uh hiin, pawlpi khantohna amu kha uh hi. Pawlpi in Kha Siangtho tawh kidimin kalsuan ahihna amu uh hi. “Inn ahi a, lo ahi zongin a neite in zuak uh a, a sum ngahte uh sawltakte kiangah a ap uh hi. Mi khempeuh tungah a kisapna bang ciat un a sumte hawm uh ahih manin amaute lakah sum kitangsam kuamah om lo uh hi” (Sawl.4:34, 35). Ananias le Sapphira tunga thupiang in leitang zuakna panin Pawlpi tungah piak ding le amau zat dingin khentuamna hangin tua bangin gim thuak uh hi. Sawl.5:1–11 sim in. Sumpi piak ding khempeuh pia lo-in khentuamna hangin, zuau genna hangin bang lauhuainate hong tung thei hiam, cih ngaihsun in. Bang hangin tua zahin gim uh hiam?

___________________________________________________________

Amasa-in Ananias le Sapphira in mi citak bangin kingaihsun uh hi. Ahi zongin a nung ciangin, Ananias le Sapphira in huaihamna lungsim a neih manun Kha Siangtho a dahsak uh hi. A kamciam piak uh a kinungsik uh hi. Thupha a hi ding kimlai amaute tungah sihna hong tun suak hi. Khrih nasepna a tangzai zawk nading sangin huaihamna in huzaap khin ahih manin tua bangin sihna a thuak uh hi.” Ellen G. White, The Acts of the Apostles, p. 72. Kammal dang khatin pulaak lehang amaute in ngimna hoih tawh kalsuan uh hi mah taleh huaiham lo bangin om uh hi mah taleh, zuaukhem nupa suak veve uh hi. “Annias le Sapphira nupa tungah a tung thu hangin thu-um mite sungah lau-na lianpi hong piang hi (Sawl. 5:11). Hih thupiang khit ciangin, thu-um miten sawmah khat piakna-ah citak uh hi. Ahi zongin amaute nupa tunga thupiang in sawmah khat piakna-ah citakna hong hilh hi. Huaihamna hangin a tuah uh thu in huaihamna in bang dinmun hong tunpih thei hi, cih hong hilh hiam?

 

THURSDAY                             March 2

Huai-Hamna Nial Zawhna

 

Huaihamna in lungsim tawh kisai mahmah thu hi. Kiphatsakna, angsung khualnate bang mahin huaihamna nial ding kiphawkkha lo pahpah hi. Huaihamna in hong zo gawpin huaihamna nuai-ah kinungta toto hi mai hi. Zuau genna, numei pasal mawhna, milim biakna, Sabbath palsatnate bek mawhna-in kingaihsunin huaihamna zong mawhna ahihna kiphawk kha lo hi. Ahi zongin hih bang tatziate in a kimu thei vive hi-in, a kimu khia thei lo huaihamna, hazatna cihte kidop huai pha mahmah hi. Siatna ngaihsutna mahmah zong i zawh ding kisam hi. Hazatna zawh ding hamsa hi lo hiam? 1Kor. 10:13 sim in. Bang kamciam hong pia hiam? Bang hangin hazatna, huaihamna thu siksanin i tel ding kisam ahi hiam?

_________________________________________________________

Tua hi-in koi bangin Pasian vangliatna in a lauhuai huaihamna panin hong dal thei ding hiam? 1. Pasian tungah kinga ding khensat in. Ama innkuan sungah kihel dingin teel in. “Tuni-in kua na sem ding teel un. Kei le ka innkuante in ahihleh Topa na ka sem ding uh hi” (Josh. 24:15). 2. Nsimin thungetn in. Na thungetna-ah (Matthew 6:13) Khemna hong tuaksak kei in. Gilo pa kiang pan hong honkhia in, ci-in Topa tungah thungen in. Gillo pa kiang pan hong honkhiaa in. Vangliatna, minthanna nei tawntung ta in.” Midangte neih le lamh enna, hazatna na neih ciangin thungenpah in. Pasian hong piak kamciamte muang in, 1 Kor. 10:13. 3. Manmanin Lai Siangtho sim in.” Na tungah ka mawh khak loh nadingin ka sungah nangma thute ka khol ding hi” (Late 119:11). Jesuh in mawhna langpan hi. Amah in eite bangmahin na khempeuhah zia-etna a thuak hi. Amah in mawhna vangliatna a zawh zawh nadingin zan tawntung thungen hi. A pa tawh tua bangin kizopna nei den hi. Eite etteh dingin Ama nunzia tawh a hong lak hi. Upna tawh nungta dingin le thumang dingin a hong nungta hi. Eiten zong Khrih zia le tong i neih zawh nadingin tua bangin thungenin Pa Pasian tawh tatsat lo-in kizopna kisam hi. “A kimuh thei hun lai-in Topa zong unla amah a nai om lai-in thu ngen un. Migilo in ama gitlohna nusia hen la,thuman lo mi in ama ngaihsutna nusia hen. Amah in a hehpih theih nadingin Topa eite’ Pasian’ kiangah amah paisak un. Bang hang hiam cih leh a mawhna maisiangsak ding hi” (Isa. 55:6, 7). Hazatna, huaihamna hangin gim na thuakkha ngei hiam? Bang thu na mu kha hiam? Bang thu nuntakpih ding na lenkip hiam?

 

FRIDAY                March 3

Ngaihsutbeh Ding: Jericho zawhna-ah Israelte giahphualah kham le ngunte hong paipih Achan bek hi Io hi. Tua van le nate Pasian biakbuk sumte kholhna munah paipih dingin Joshua in a mite thupia hi. (Josh. 6:19, 24). Na khempeuh mei tawh kihaltum ding hi. Ahi zongin Achan bek in tua a kikhaam nate a kem hi. “Israel mi tul zalom tampi lak panin mi khat bek in thukhenna a thuak hi. Amah bek mah in huaihamna hangin gim a thuak hi. Shinar puan tampi man in Achan huaihamna a khangsak hi. Sihna a tunpih puan manphate, Babylon mite puantualte a iplah manin a nuntakna a tanlawh hi. Mawhna khat in a dang mawhna hong tunpih hi. Achan in kham le ngunte Topa tungah a ap hi; Amah in Pasian tungah puak ding Canaan gam panin khai gah masate a pia nuam kei hi.” Ellen G. White, Patriarchs and Prophets, p. 496. Paul hun nununglama thupiangte in sum le paai, neih le lamh tungah lungsim puakzia nihte kimu thei hi. “Nitawp ni hun pen a lauhuai hun ahih ding lamtak phawk in. Tuahun ciangin mite in amau angsung ding bek ngaihsunin, huaihamin, kisialin, kihisakin, mi zahko-in, nu le pate’ thu mang loin, lungdam theihna mel nei loin, biakna lungsim nei lo ding uh hi” (2 Tim. 3:1, 2). Huaihamna le sum itna in hun nunung ciangin mihingte hong ukcip ding hi. Tua hun in tuhun mah hipah hi.

 

KIKUP DING DOTNATE:

 

1.       1 Timothy 6:6–10 sim in. “Pasian biakna hangin a neihsateng tawh a lungkim mite pen biakna in mihau a suaksak takpi mah ahi hi. A taktakin ci lehang, leitungah mihingin i suah laitakin sumlepai tawh i suak kei a, i sih ciangin zong leitung panin bangmah i keng thei tuan kei hi. Tua ahih manin annek tuidawn, nikten puansilh i neih nakleh a phazo ahi hi. Ahi zongin a haunuam mite in ze-etna a tuamtuam thuak a, duhhopna, huaihamna a haivai thute-ah awkcipin, haksatna le siatna a tuahlawh uh hi. Sum deihluatna in siatna namkim piangsak hi. Mi pawlkhat in sum deihlua liang uh ahih manin a upna panun pialkhia-in gimna lungkhamna tampi a thuaklawh uh hi.”Sum it luatna hangin gimna lianpi a thuak mite na lawmte tawh kikum in.” Tua bangin sum itna hangin gimna buaina tawh a nungta mi tampi om hi lo hiam? Koi bangin kitangsapnate lei nading sum kisapna le Paul hong hilh bangin lauhuai-na hong tunpih thei sum itna koi bangin khentel thei ding i hiam?

 

2.     Sum le paai simloh, bang na dang tuamtuamte iplahna kinei kha thei hiam?

 

3.     Huaihamna le nate deihtheihna kilamdanna na theitel hiam? Bang dinmun ciangin huaihamna hong tunpih hi ding hiam?