Lesson 6 | Feb 4-10 Vantung Sumkholna

LESSON 6        FEB 4–10

VANTUNG SUMKHOLNA

 

SABBATH NITAK

TU KAAL SUNG SIM DING: Pian. 6:5–14, Heb. 11:8–13, 2 Kor. 4:18, Pian.13:10–12; 32:22–31, Heb. 11:24–29.

KAMNGAH: “Mi khatpeuh in hih leitung khempeuh a ngah hangin a nuntakna bulpi suplawh leh bang phattuamna om ahi hiam? Ama nuntakna bang tawh leikik thei nawn ding ahi hiam?”(Mark 8:36, 37). Jesuh in leitungah sumngahna hoihna pen lampi hong hilh hi. Ama hong hilhna-ah: Nget in ne-in a kekseu theihna, gutate in luhin a guktheihna hih leitungah na sum uh khol kei un. Nget in a nek theih lohna, a kekseu theih lohna, gutate in luhin a guk theih lohna mun vantungah note a dingin kholzaw un. Bang hang hiam cih leh na sum omna uhah na lungsim uh om tawntung ding hi” ci-in hong hilh hi (Matt. 6:19, 20). Jesuh in a thukhupnaah hih bangin hong hilh hi. ‘Na sum omna munah na lungsim zong a om ding hi” (Matt. 6:21). A dang khatin gen lehang: Na sum zatnate hong lak in. Na lungsim omna ka thei ding hi. Bang hang hiam cihleh na sum omna munah, na lungsim a om khol khin kei zongin, na lungsimin hong zui ding hi. Pasian gam na ngaihsun hiam? Ngaihsun na hihleh, na neihsate zong Pasian gam adingin na zeek ding hi. Tua hileh tawntungin a kimang ding thaman na ngahkik ding hi. Na hun, na neihsate Pasian nasep nadingin zang in. Ama nasepna adingin thungen in. Tua bangin na kalsuanleh, a sawt lo-in Pasian nasep nuam nasa dinga, na lungsim khempeuh tawh Topa na a sem na hi ding hi. Hih sunga thute le hilhkholh thute in koi bangin vantunga sumkhol thei ding i hiam? Tawntung thaman hong kipia ding hi.

 

 

SUNDAY                        February 5

Noah In Hepihna Mu

 

Vatungah sumkholna a neite in a nuntakna uah Pasian masak tawntung uh hi, cih thu i phawk ding kisam hi; amaute in nunzia kikhel mite hi. Tua bang dingin nang zong kiging in. Pian.6:5–14 sim in. Noah in Pasian sawl bangin a nuntak manin bang kikhelna a nei hiam? I nuntakpih ding thu guipi bang na mu hiam? A hong tung ding lauhuaina bang vauhilhkholhna hong gen hiam?

 _________________________________________________________

Noah in tembaw lam dingin a hun le a neihsa khempeuh a zang hi. Tua manin kum 120 sung tawntung tembaw lamin a omna-ah nunna in lamdang takin kikhelna a nei hi. Lai Siangtho a um nuam lo mi kimkhat in Tuiciin thu um thei lo-in a kipuak mawkmawk tangthu hi, ci uh hi. Tuhun leitung pilna tawh kituak lo hi, ci uh hi. Hih thu pen lamdang lo hi. “Tuiciin tunma leitung in khuahun hoih mahmah leitung hi-in nate in a ngei bangin nasem uh hi. Tuk hun, khuakhal hun, phalbi hun hong kikhel toto hi. Tuiciin ma-in leitungah guahzu ngei nai lo hi. Leitungah daitui kia bek om hi. Gun tui khang ngei lo hi. Gunte in tuipi sungah hoih takin tung suk thei uh hi. Gunpiaute ah tuikhang ngei lo hi.” Ellen G. White, Patriarchs and Prophets, p. 96. Tuiciin ma-in mihingte in Pasian genkholh bangin Tuiciin tung thei dingin ngaihsun thei peuhmah lo uh hi. Tuiciin khit ciangin na khempeuh teltheihzia kikhel hi. Lai Siangtho gen bangin “Vankhuanuai leitungah a thak bangmah om lo hi.” (Than. 1:9). Tua bangin Lai Siangtho in hun nununga hong piang ding thute mi tampi in a um thei kei uh hi ( 2 Pet. 3:3–7). A hong tung ding siatna adingin koi bangin kigingkhol ding i hiam? Gualnopna nial, zekaisak cih thu i phawk ding kisam hi. CIhnopna-ah Pasian hong sawl thute sem dingin sapna ngah ihi hi. Tua bangin nungta hi lehang vangliatna tawh kidim thaman a hong kipia ding hi. Khrih hong pai hun ding i thei kei hi. Hong pai hun ding theih loh hangin phamawh lo hi. A thupi bel in Noah hunlai bangin Pasian deihna bangin i nuntak ding thupi zaw hi. Tua bangin Pasian sapna bangin i nuntak ciangin i nuntakna-ah kikhelna lianpi kimu ding hi. Koi bangin Pasian adingin na nunzia kikhel dingin kiging na hiam? Noah bangin Pasian sawlna mang dingin na kiging hiam? (Luke 16:10.)

 

MONDAY               February 6

Abram, Citakna

 

Pupi Abram in a pianna leitang a innkuan, a beh a phung nusia-in Pasian in a lah ding gam zuanin pai khia dingin Pasian sapna angah hi. Tua suan le khak sung panin Messiah hong khangkhia diing hi. Ama paikhiat nading a neng a tawngin a kipulaak loh hangin Abram in a beh a phung, a pianna leitang nusia dingin sapna ngah hi. Tua bangin a kalsuan ding a thubaih hi lo hi. Leitung nopsakna le ama deihnate nial hamtang ding hi. Pian. 12:1–3 sim in. Hih sawlna manna hangin koi bangin Leitung minamte in thupha ngah ding uh hiam?

___________________________________________________________

Abram le a innkuan sungah kikhelna lianpi hong piang hi. “Pasian in ama tungah piak dingin a ciam leitangah Abraham a pai dingin a sap laiin Abraham in Pasian’ sapna a manna pen a upna hang mah ahi hi. A pai nading mun nangawn thei lopi-in a gam le a lei nusia-in a ding khia hi”(Heb. 11:8). “Abraham thumanna in lamdang hi. Lai Siangtho sungah Pasian sawlmanna , upna kip nei pa ahihna kimu thei hi.” Ellen G. White, Patriarchs and Prophets, p. 126. Mi tampi in a pianna, a beh a phung nusia, lawm le gual kinusia nuam lo hi. Ahi zongin Abram in tua bangin nusia ngam hi. Abram in Pasian sawlna munah pai dingin a lungkim hi. Mi khual khat ahi mah taleh Abram, Isaac, le Jacob in a nuntak sungun gam luah nei lo uh hi. Hi mah taleh amaute in Topa tungah citak veve uh hi. Hebrews 11:8–13 sim in. Eite adingin bang thu hong kihilh hiam?

___________________________________________________________ ___________________________________________________________

Abram in a kim a paamte lakah kumpi khatin a minthang hi. Amah pen mi cingkhaam mahmah, leengla dosiam, Sangpen Topa Pasian nasem khat hi, ci-in kithei hi.Topa adingin teci khat ahihna etteh thamcing mahmah hi. Eite in Abraham tawh gamh luahkhawm ding ihi hi. “Abraham in Pasian um ahih manin Pasian in dik a tangsak hi. Tua ahih manin upna tawh Abraham ta ahi khempeuh in Topa dikna a tang uh hi (Gal. 3:6, 7). “Mi khat in Khrih sungah a om ciangin Abraham suan le khak hihna ngahin kamciam a om bangin gamh luah mi a suak thei hi” (Gal. 3:29). Vanglian Topa in Abraham le Noah le mi tampi nunzia kikhelsak hi. 2 Kor. 4:18 sim in.. Koi bangin hih thupuak in khanlawhna hong tunthei hiam? Koi bangin Moses le Abrahamte in a zui thu zungpi kibang hi lo hiam?

 

TUESDAY                                   February 7

Lot Khensatna Hoih Lote

 

Abram in Pasian sapna bangin a pianna gam le lei nusia-in a paikhia hi. A sanggampa tapa Lot tawh khualzin khawm uh hi. Pian. 13 pulaak thu in Pasian in Abram thupha pia hi; amah in bawng, kham le ngun tampi a nei hi (Pian. 13:2). Lot in zong tuuhon, ganhon, le puanbukte nei hi” (Pian. 13:5). Abram le Lot in neih le lamh a hau mahmah mite hi; ganhon tampi zong nei uh ahih manin mun khatah teengkhawm thei nawn lo uh hi. A nasemte kikalah buai-na a om loh nadingin Abram in Lot tungah na teen nopna leitang teel in ciin sawl hi. Hi mah hi. Lot in amah sangin a u ham zaw Abram sawlna nialleh etlawm ding hi. Lot hauhna in Abram deihsakna hang ahihlam kimu thei hi. Tua bangin nei le lamh tawh kidim hi mah taleh tua bang dinmun a tun theihna hangin Abram tungah lungdamko lo hi. Huaihamna, angsung huaihamna tawh kidim ahih manin a hoih pen leitang mah a teel zaw pah hi. Pian. 13:10–12 sim in. Bang thute in Lot khensatna huzaap hiam?

__________________________________________________________

Lot in khuapi sungah teeng dingin teel thei lua hi. Ahi zongin khuapi sung tel lo zaw-in, Abram tawh Lot thuak thute a zak ciangin, “Lot aw, na tel bangin a thuak hita ciai. Na vawh bangin tu-in a gah a at hi ta ciai” ci peuh lo-in Lot va honkhia zaw hi (Pian. 14). Khat veivei ciangin van le nate deihna nei-in hauhna tawh kidim phial taleng nunzia ding i phawk khak lo thu tampi om hi. Lot in Sodom ah kituah hi. Ahi zongin Pasian hehpihna lian tawh Pasian in Lot le a innkuan tungah vauhilhkholh thupuak ding mite paisakin, Sodom khua thuak ding gimnate a hilhkholsak hi. Pian. 18:20–33 sim in. Pasian in leitungah a hong pai-na thu Abraham tungah a pulaak hi. Pasian in tua khuapite suksiat ding a gen ciangin Abraham in bang ci dawnkik hiam?

 ___________________________________________________________

Abraham in Lot le a innkuanpihte lunghimawh mahmah ahih manin tua bangin Pasian tungah khuapite suahtak ding a ngen hi. Khuapi-ah midik 50 kimu leh khuapi susia veve ding na hiam, ci-in midik 50 panin midik 10 ciang a pulaak hi. Pasian itna tawh kizui-in Pasian in tua khuapiah midik 10 akimuh leh khuapi suakta ding hi, ci-in pulaak hi. Topa Pasian le vantungmi nihte in Lot, a zi le a tanu nihte akaikhia hi. Ahi zongin Lot zi in khuapi nunghei ahih manin ci khuam a suakpah hi. Lot in Sodom khuapi sungah neih le lamh tampi tawh a lut hi. A pai khiat ciangin a pumpi kia bek tawh pusuak khia hi. Khensatna khat peuh i neih ding ciangin bangzahin kidophuai hiam? A diakdiakin tawm vei sung bek kimang thei thute le tawntungin kimang ding thute ngaihsut huai hi lo hiam? Mark 8:36, 37.

 

WEDNESDAY                  February 8

Zuaupuakpa Hihna Panin Kumpi Tapa

 

Khangno khat ahihna tawh Jacob in Pasian zahtakin Pasian itna nei hi mah taleh a nu Rebeka sawlna nial lo-in a pa khemin apa thupha a ngah hi. Tua bangin zuau khemna hangin gimna sung hong tungin lam man lo tawnin khuasa hi. A pa kiang panin taikhia-in a nuntakna zong bei baih hi. Rebekah in Jacob tungah a gen bangin “Laban kiangah taikhia dingin a sawl bangin taikhia-in a sanggampa hehna a daih mateng Laban tawh om khawm dingin a sawl hi. Na sanggam pa hehna a daih khit ciangiin kong sam ding a kong dawn ding hi,” ci-in pulaak hi (Pian. 27:43-45). Jacob in a inn panin kum 20 sung bang galtai-in om a, a nu tawh a kimu kha nawn kei hi. Pian. 32:22-31 sim in. Jacob tungah bang thu piang hiam? Khensat khialhnate lak panin koi bangin Pasian hehpihna kimu thei hiam?

 _________________________________________________________

 

“Kiniamkhiatna, mawhna kisikna, kipiaknate tungtawnin mawh dim hih leitung khialhna dimna panin vantung Vangliatna sungah i nungta thei hi. Jacob in lau-na tawh kidimin Pasian kamciamte a lenkip thei hi. Ciangtan nei lo itna panin kuamah a taikhia thei kei hi. Bang thu in mawhna sungah Jacob a tunpih hiam? Zuaukhemna tawh a pa gamh luah a ngahkhia hi. Pasian kamciamte muang lo hi leh, Jacob in ama hanciamna suangin Pasian thupha ding a hanciam suak ding hi. Jacob in sawt veipi a lunggulh thupha a ngah thei hi. Zuau khemna mawhna nei pa hong suakin a zuaukhemna mawhna zong mawhmai-na a ngah khin hi.”Ellen G. White, Patriarchs and Prophets, pp. 197, 198. Pian 49:29-33. Jacob in Canaan ah gamh luah a neih nawn lo hangin ama sih nungah a tate masuan ding bang vaikhak hiam? Kua in tua suanghawm sungah vui hi ding hiam? Bang hangin Jacob in tua munah kivui dingin ngen hi ding hiam?

___________________________________________________________

Lai Siangtho hong hilhna-ah upna pate le a zite a sih ciangin tua suanghawm sungah kivui-khawm ahihna hong hilh hi. Jacob in Pasian sungah muanna nei hi. Amah in leitungah khualzin mi lengla hong suak hi (Heb. 11:13). Khialhna nei-in a inn panin bangmah lo tawh taikhia hi mah taleh, neih le lamh tampi tawh Canaan hong tungkik hi. Khialhna mawhna nei hi mah taleng, Pasian in thupha hong pia veve hi. Tua hi-in bangzahin siatna pelh ding thupi ahi hiam? Tu-in khensatna khat peuh na neih ciangin koi bangin khialhnate pelh thei ding na hiam?

 

THURSDAY                          February 9

Egyptah Moses

 

Moses zia le tong, ama nunzia thute Lai Siangtho Bu masa sungah kipulaak hi. Amah in Pasian kepna tawh a nungta mi hi. A nu le a sanggamnu kepna sung pan a khang khia mi khat hi.Pharoah tanuten naungek Moses amuh ciangun amauten naungek kem dingin Hebrew nupi khat zong dingin a sawl uh hi; a nu mahmah in kemkha hi. Saltangin a om nupi Jochebed in ta naungek Moses kem dingin a kisawl ciangin bangzahin hamphatna hong suak hiam? Jochebed in a tapa kum 12 sung kemin Topa sungah a pantah thei hi. Amah in thungetzia, gamtat zia le tong a pantah thei hi.Kum tampi sung Moses in Egypt kumpi inn sungah a om hi. Tua hun sung tengin Moses in Egypt mite pilna, siamna tuamtuamte a sin thei hi” (Sawl. 7:22). Moses hong gol semsem ciangin Pasian lamlahna bangin a nungta thei hi. Ama khensatna hangin a nunzia le Israel mite nuntakna-ah kikhelna lianpi hong piang hi. Hebrews 11:24–29 sim in. Moses nusiat thute le a maingat thute ngaihsun in. Ama munah a om dingin kingaihsun in; a mipihte tawh gimna thuak zaw dingin a khensatna thu ngaihsun in. A nusiat thu ngaihsun in. Tua bangin Pasian deihna bangin nungta dingin a khensatma a dinmun ngaihsun in.

__________________________________________________________

 

Egypt in nidang hunlai-in a minthang mahmah gam khat hi. Nile Gun in Egypt leitang nuntak khuasakna-ah a thupi mahmah Gun lianpi khat hi. Hih Gun dung mun khempeuh in leitang hoih vive hi-in khaigah, ankung hoih thei mahmah hi. Tua manin Egypt gam in hauzaap nei gam khat hong suak hi. Moses mahmah in Egypt gamah makai lianpi khatin hong om hi. Leitung liatna nusia-in a mipihte tawh gimna thuak khawm ding a tel zawkna thu telhamsa hi. Egypt hauhna, minphatnate a ngah khin mi khat hi. Pahtawi-na, minphatna nopsakna, neih le lamh hauhna sungah nungta ngel ding hi. Sila khatin nungta-in gimna thuakin a nuntak sangin Egypt gam sung nopsaknate tawh lungkim hithiat ziau a hi thei lua hi. Ahi zongin tua bangin nopsakna a tel kei zaw hi. Lai Siangtho hong hilh bangin leitung nopsakna sungah a nuntak ding sangin a mipihte tawh gimna thuak dingin a khensat zaw hi (Heb. 11:25). Gimna tawh a nungta mi khat hong suak hi. Paikhiatna Bu sungah a tam zaw thute in Moses thuak gimna thute hi, cih i mu thei hi. Tua bang gimna a thuak khit hangin Khapsa Leitang a luahkha kei hi (Gam. 20:12). Ahi zongin a tawpna-ah i theihsa bangin Moses in a sia telkha het lo ahihna i mu thei hi. Amah mah in a tel zawh loh thute thuak kha-in Pasian vangliatna amu kha tawntung hi. Leitung nopsakna siksanin a nungta mi hi leh Moses in Egypt gamah om suak ding hi. Ahi zongin Khristian thu-um khat ihihna tawh kizui-in hih leitung nopsaknate sangin a lian zaw nopna thu a hong kihilh khin hi. Leitung nopsakna in hong zia-et ciangin koi bangin tawntung nopna mitsuan zaw thei ding i hiam? Bang hangin tua bang nuntakna in thupi hiam?

 

FRIDAY                           February 10

Ngaihsutbeh Ding: Pasian in Abraham thupha a piakna tungtawnin Ama thuciamna a tangtungsak hi. Abraham in zong leitung neih le lamh hauhna mitsuan lo-in Topa sawlna bangin a nungta zaw hi. “Pasian in a mite ngah ding a kamciam go le gamh in leitung hauhna liatna kamciam lo hi. Abraham in leitung hauhna liatna nei lo hi. “A khe tawh a sikna mun le mual khempeuh ama gamh luah hi thei tuan lo hi” Sawl. 7:5. Ahi zongin Abraham in sum tawh man kiseh thei lo hauhna nei-in Pasian minthan nading le a mipihte hamphat nadingin a neih le lamh khempeuh a zang hi. Bang hang hiam cihleh amah in leitung hauhna mitsuan mi ahi kei hi; hih leitung in a luah ding leitang hi lo hi, cih a ngaihsun hi. Abraham in milim biakna leitang nusia dingin Topa sapna a ngah hi; tua bangin a mipihte kiang panin paikhia-in Canaan gam luah tawntung ding gam hi dingin kamciam a ngah hi; a tate a tutate in tua gam a luahkha uh hi. Abraham in a sih ciangin a kivui nading mun lunggulhna lianpi a nei hi. Tua manin Canaan mite kiang panin a luang kivui nading mun sum tawh a lei hi. Ama go le gamh lian bel in Khapsa Gam hi; tua gam mun khatah Machpelah suang hawm khat a lei hi” Ellen G. White, Patriarchs and Prophets, p. 169. I nuntakna-ah khat vei vei ciangin neih le lamh leitung nopsakna zuanin i nungta hi. Tua bang nopsaknate i nial zawh nadingin upna kip kisam hi. “Pharaoh kumpi inn liatna le kumpite nopsakna in Moses a zol den hi. Ahi zongin Moses in tua bang mawhna sunga nopsaknate in Pasian tawh kigamlasak ding ahihlam thei ahih manin tua bang nopsaknate a nial zo hi. Leitung mite pahtawina ngah ding sangin Vangpen Pa pahtawi-na, mawhna om lo nunna sungah nuntakna a lunggulh zaw thei hi. Amah in zawhna ngah mite lu tungah a kisia thei lo kham lukhu kipia ding ahihna upna tawh amu hi. Hih bangin upna in leitung hauhna, liatnate a paisan zo-in Pasian sawlna mangin kiniamkhiatna le gentheihna thuak zosak zaw hi.” Patriarchs and Prophets, p. 246.

 

KIKUP DING DOTNATE:

 

1.       Jesuh hong paikik ciangin leitung neih le lamhte in bang suak ding hiam? (2 Pet. 3:10.) A taktakin tua bang nate in Jesuh hong pai-ma-in bang thuakkha ding hiam?( Matt. 6:20.) Tua hi-in bang hangin neih le lamte tungah lungsim puakzia in Pasian deihna tawh kituak lungsim puak i neih ding thupi hiam?

 

2.     Jesuh in leitung neih le lamhte, hauhnate in hong khem thei ahihna bang hong vauhilhkhol hiam?(Mark 4:19). Jesuh in bang thu hong hilh hiam? Koi bangin hauhna in hong khem hiam?

 

3.     Bang thute siksanin Moses in Egypt gam nopsaknate nusia-in Pasian mite tawh gim thuak ding tel zaw hi ding hiam? Bang thu in tua bangin khensatna nei theisak hi ding hiam?