Lesson 5 | Jan 28 - Feb 3 Leiba tawh Kisai

 

LESSON 5          JAN 28 – FEB 3

LEIBA TAWH KISAI

Sabbath Nitak

Tu Kaal Sung Sim Ding: Thkna. 28:1, 2, 12; Matt. 6:24; 1 John 2:15; Pau. 22:7; 6:1–5; Thkna. 15:1–5.

KAMNGAH: “Mihaute in mizawngte uk a, leitawi a late pen a piate’ sila a suak hi.” (Pau. 22:7). Leiba i cih in “mailamah ngah ding siksanin tuni-in nuntakpih” kici thei hi. Tuhun ciangin leiba tawh a kinungta hong suak hi; Khristian thuumte in leiba nei lo-in nungtak ding mungtup lianbel hi sak ding kilawm hi. Lai Siangtho in leiba neih ding tha pia lo hi. Lai Siangtho sungah mun 26 val in leiba tawh kisai pulaak hi. A vekpi-in leiba hoih lohna thu pulaak uh hi. Leiba neihna in mawhna hi,ci-in pulaak lo hi mah taleh, leiba neihna hangin siatna tampi hong tunpih zaw hi. Sum le paai tawh kisai kigenna-ah Paul in hih bangin lam hong lak hi: “Tua ahih manin phiangsiah piak dingte tungah pia-in, mangmu piak dingte tungah pia-in, zahtak dingte zahtak bawlin, pahtawi dingte pahtawi ta un.Khatlekhat ki-it ding cih lohbuang, kuama tungah leiba nei kei un.” (Rom. 13:7, 8). Bang hangin mimal, kipawlna le kumpite in leiba tawh kipelh lo uh hi ding hiam? Mikim in a tawm a tamin leiba kinei ciat hi. Ahi zongin tu-in leiba hangin buai-na kituakkha hi lo hiam? Tu kaal sungin leiba tawh kisai, banghangin leiba kinei a, koi bangin leiba lo zo ding cih thute i kikum ding hi. Leiba nei lo mi na hi kha ding hi. Ahi zongin tu kaalin i sin ding thute midangte tungah na hawmsawn thei hi.

 

SUNDAY                          January 29

Leiba Hangin Buainate

 

Thuhilhkikna 28:1, 2, 12 sim in. Leiba tawh kisai-in Pasian bang thu pulaak masa hiam?Koi bangin leiba nei lo-in nungta thei ding i hiam? Hih thu in i nunzia tawh kibang lo hi mah taleh i nuntakpih theih ding bang thu guipi hong hilh hiam?

 ___________________________________________________________

Sum hamsatna hong thuaksak thei thu bul thumte i pulaak ding hi. Hamsatnate hong tunpih a thu lian bel tawh panin tua bangin a gual suk ihi ding hi. Amasa-in theihlohna hangin sum hamsatna i tuak hi. Mi tampi in, lai thei hi taleh lai thei lo hi taleh, sum tawh kisai theihna nei lo hi. A tam zaw in Lai Siangtho hong hilh sum thute thei lo uh hi; sum le pai zeekzia ding theihna zong nei lo uh hi. Ahi zongin hih bangin theihlohna panin theih theih nading lametna om lai hi. Hih i thusinna in sum zekzia ding thu guipite hong hilh ding hi.Thunihna ah huaihamna, angsung khualna hangin sum hamsatna i tuakkha hi.Mimal deihna le pulaak ding kisam a, mihingte in amaute ngahna sangin a tam zaw-in sum zang uh hi. Amau ngahna sangin inn hoih zaw, mawtaw hoih, puansilh nikteente i zang hi. Tua hinapi, sumpi piakna-ah mi zawng bangin kingaihsun uh hi; sawmah khat piak ding sum om lo hi, ci uh hi. Tua manin tua bang mite in Pasian kamciam lo-in, Pasian thupha lo-in a nungta mite hi (Mal. 3:10, 11; Matt. 6:33). Ahi zongin hih bang mite adingin lametna om nawn lo hi lo hi. Tua hi-in i lungsim kikhel thei hi- lungkimna hong guan thei hi.A thu thumna-ah mimal tuahsiatna in sum hamsatna hong tun thei hi. Nat le sat ciangin zatui zaha tawh kibawl zo lo in nungta uh hi. Nupa kikal kizopzia kisiatna hangin zong sum hamsatna hong tung thei hi. Zinlinna, tuikhanna a kipan kim le paam pan tuahsiatnate hangin zong sum hamsatna hong tung thei hi. Ahih keileh i pianlim a kipan sum hamsatna kituakha thei hi. Hih bang mite in lamet bei a hi kei hi. Amau nuntak khuasakna in hamsa hi mah taleh tua bang hamsatnate a zo thei uh hi. A thu- uppihte panpihna tawh kikhelna a ngah thei hi; Pasian a zahtak mi khat in zong lamlahna tawh nuntak khuasak nuamzaw thei hi; pilna nei-in nasep hanciamna in zong nuntakna ol zaw sak thei hi; Pasian thupha sangin Ama lamlahna in nunzia kikhelsak thei hi.Bang bang thu hangin nuntak hamsa hi taleh, ama khialhna hangin hamsa hi mah taleh, leiba lohin leiba lo-in nungta thei dinmun tung thei hi. A thupi-ah tua bangin leiba neite in nuntak khuasakzia kikhel thei hi; sumzatna khiamin, masak dingte masakna, nunun dingte nununsakna cihte tungtawnin zong kikhelna piangin leiba tawh kipelh thei hi. 1 Timothy 6:6–9 sim in. Paul in kitangsapte tungah bang thu hong hilh hiam? Tua kammalte in nang adingin bang khiatna nei hiam? Koi bangin Pasian kammal bangin nungta ding na hiam?

 

MONDAY                             January 30

Pasian Lamlahna Zui

 

Ei mihingte in a si thei, a sia thei ihi hi. Piansak leitungah a nungta ihi hi. Khat veivei ciangin leitung nate in iplahhuai thei hi. Sik le van le nate bangin bangmah khuaphawk theihna nei lo-in i om ding kisap hun om hi. Khat vei vei ciangin neih le lamh hauhna lunggulhna nei lo-in i nuntak ding kisam hi. Khat veivei ciangin kua in hauhna deih lo-in om ding hiam? Sum hauhna, neih le lamh hauhna in mawhna hi lo hi; nasep hahkatin sum le paai zonna in mawhna hi lo hi. Ahi zongin hauhnopna, neih le lamhte in hong ukcip khak ding lauhuai hi. Topa tungah i cihtak laiteng a hoih thute theihtheihna Pasian in hong pia dingin hong kamciam hi. Hih in thupi hi. Bang hang hiam cihleh neih le lamh hauhna, sum le paai hauhna in nuntakna tampi siatna a tunpih hi. Matthew 6:24 le John 2:15 sim in. Lampi tuamtuam tawh a kipulaak hangin a kibang thu bang thu pulaak hiam?

_________________________________________________________

Leitung nate itna in leiba hauhna hong tunpih hi, cih thu in a deihhuai lo thu hi. Mi tampi in leiba nei dingin kilamen lo uh hi (tua bang hi ngei lo hi; Thuhilhsia 4:8.) Bang hang hiam cihleh leiba neihna in Satan thangsiahna sung hong tunpih thei-in lauhuai hi. Pasian in a mite leiba nei lo dingin hong deih hi. Amah in Lai Siangtho tungtawnin leiba tawh kipelh theihzia ding a hong hilh hi. Kamsangte in zong sum leiba panin suahtak nading lampi hong hilh thu tampi om hi. Late 50:14, 15 sim in. Pasian mite in bang lungsim nei ding kisam hiam? “Na kamciam bangin tangtungsak” cih ciangin a khiatna in bang hi ding hiam?

___________________________________________________________

Pawlpi mi suahna-ah Pasian min phatna le Ama tungah lungdam kohna i nei ding thupi hi. Bang hang hiam cihleh Amah in eite hong Piangsak Pa, le a hong Honkia Pa hi. Kituiphumna kamciamna-ah thu kidot thu 13 lakah thu 9 na -ah “Pawlpi kipawlna na um hiam? Sawmah khat le sumpite , na nunzia le huzaapna tawh Topa Pasian biakna-ah kihelin pawlpi panpih ding ci-in na thukim mah hiam,? ci-in dotna om hi. Seventh-day Adventist thu-um mi khat ihihna tawh “ka thukim mah hi,” ci-in tui a kiphum khin ihi hi. Late 50:14, 15 Pasian tungah lungdamna a ko mite le kamciam bangin a tangtungsak mite tungah kamciam pulaak hi. Na deihtelnate in koi bangin leitung nate tungah na lungsimpuak pulaak hiam? Bang hangin nuam takin nuntak zawhna dingin nasep hanciam kul hiam? Tua bangin nasep hahkatna in sum le paai baikna hi lo hi. Koi bangin hih thu nihte in kibang lo hiam?

 

TUESDAY                            January 31

Koi Bangin Leiba Nei Lo-In Nungta Ding I Hiam?

 

Pau.22:7 sim in. Bangci bangin sum leitawi a pia mipa ukna nuai-ah kitung hiam?

 _________________________________________________________

Leiba lauhuaina panin bangci bangin suakta thei ding i hiam? Leiba nei mi khat na hihleh a nuai-a thute zui lecin leiba neihna panin na suakta thei ding hi. Leiba neihna panin suahtak nading lampi in tel hamsa lo hi. Amasa-in thu siksan thum tawh kipanin, zuih ding thu thum i pulaak ding hi. Thu siksanin masa bel in Pasian tungah cihtakna, sawmah khat le sumpite mantakin piakna hi. Sawmah khat piakna in Topa hong lamlahna le Ama thupha i ngahna lampi hi. Ama thu bangin a nungta mite Topa in thupha a pia nuam hi. Step I. leiba neih lo dingin pulaak in. Ngahna sangin zatna tamsak kei zaw in.Leitawi lo-in om lecin leiba nei lo na hi pah hi. Step II. Pasian tungah thuciam pia inla, Ama thupha piak ding ngen in. Tua hileh leiba loh zo dinmun hong tunpih thei hi.Pasian in sum le paai tuahphatna hong piak ciangin na leibate lohpah in. Kisam lopi-in van lei kei in. Hih in thupi mahmah hi. Lamet loh khatin sum ngahna i neih ciangin zangpahpha nuam hi hangh. Tua bangin zangpah kei zaw in. Leiba lohna dingin zang zaw in.Step III. Naa loh ding leiba khempeuh laidal khat tungah gualsuk in. A tam pen panin a tawm pen dongah gelhkhia in. Innkuan tampi in innsapna, inn lei nading sum zang masa uh hi. Leiba loh ding cihpen a nununglam ah koih uh hi. Khasialin leiba tawm theithei dingin na sum ngahte zeek nading mun geel khol in. Tua khit ciangin, tawmtawmin leiba lohna-in zang lecin hun khat ciangin leiba lohsiang khin na suak ding hi. Hun tomno sungin manlang takin leiba loh khin na suak ding hi. Leiba loh khin hi lecin na sumte hong zatcing zaw ding hi. Pasian in leiba nei-in i om ding hong deih lo hi. Pasian tungah thuciam khat vei a nei khin innkuante tungah lamet lohpi-in Pasian thupha hong tung takpi hi. Amaute upmawhna sangin leiba loh zo baih zaw uh hi. A tunga step thumte limtakin zui thei hi lehang, innkuan tampi in leiba nei lo in nungta thei ding uh hi. Pasian masak hi lehang, Ama lamlahna i ngah dinga, ahong piak thuphate zeeksiamna i nei thei ding hi. “Sum deihluatna tawh na kipelh nadingun na nuntakna uhah kikem unla, na neihzah uh tawh lungkim un. Pasian in, “Note ka hong nusia ngei kei ding a, ka hong tamasak ngei kei ding hi,” hong ci hi.” (Heb. 13:5). Koibangin hih thu guipi leiba nei lo-in i nungta thei ding hiam?

 

WEDNESDAY                               February 1

Lamdawt Zui-In Hauhpakna

 

Lai Siangtho hong hilhna-ah Pasian in A mite in midang khat leiba lohsak dingin kamciam pia lo dingin hong deih hi. Paunak Bu sungah Topa in tua bangin midang khat leiba loh sak dingin kiciam lo ding hong hilh hi. Pau. 6:1–5; 17:18; 22:26 sim in. Bang thupuak hong hilh hiam?

_________________________________________________________ _________________________________________________________

Nek tawm zong mi khat in leiba a lak nop ciangin ama adingin kamciam thuciam a piaksak ding om keileh sum leitawi kipia lo hi. Tua bangin kamciam a piaksak ding mi om keileh sum leitawi kipia lo ahih manin sum leiba ngah lo ding hi. Tua ahih manin leitawi a la nuam khat in aa-mah-khan a piaksak ding mi kisam hi. Khat veivei ciangin pawlpi miten tua bangin aa-mah-khan piaksak thei uh hi. Tua bangin aa-mah-khan pia dingin a hong kisawlleh, “Lai Siangtho in hong phal lo hi,” ci-in na nial ding hi. Lai Siangtho in cimawhte huh ding hong hanthawn hi mah hi. Ahi zongin midangte leiba lohsak dingin kamciam na pia kei ding hi. Tate in mawtaw ahih keileh van manpha khat peuh a lei ding uh ciangin nulepa thukimpihna om lo-in kileisak lo hi. Sum bawlna khat peuh a neih ding uh ciangin nulepa thukimpihna kisam thei zel hi. Tua bang thute nangawnah nulepa in thukimpihna pia lo ding uh hi. A kitangsam takpite huh ding cimawhte huh ding kilawm mah hi. Midangte leiba lohsak dingin kamciam a pia 75% in leiba pia-kha takpi uh hi. Pau. 28:20 le 1 Timothy 6:9, 10. Bang vauhilhkholhna hong kipia hiam? _________________________________________________________ _________________________________________________________

Lamdawt zui-in hauhpakna in lauhuai thang khat hi.Tua bangin hauhna a zong mite in siatna sung tung uh hi. A thu-in deihhuai hi napi, siatna sung hong tunpih takpi ding hi. Tua bang siatna sung a tungte in lungsimna hamsatna lianpi tawh a nungta mite hong suak hi. Tua bang siatna sung a tungte in leiba nei lo-in a om kei uh hi. Tua hi-in siatna khat khit khat tuak uh hi. Innkuan tampi in lamdawt zui-in hauhna zong uh hi.Tua bang mite in lauhuai sung a tung mite ahi uh hi. A lawmte ahi-a, na it mi khat peuh in tua bangin lamdawt zui-in hauhna zui dingin hong gen leh na nial ding hi. Tua bang lampi tawn kei in. Na thaneihzah tawh taikhia in.

 

THURSDAY                           February 2

Ciangtan Nei Leibatte Le Leitawi Thu

 

Thkna. 15:1–5 sim in. Topa hong kalh thu bang hong hilh hiam?

_________________________________________________________

Sila le to kizopna tawh kisai-in kum sagih thuthun om hi (Pai. 21:2; Siam. 25:3, 4),silate bek tham lo-in leitang neite in zong hih thukhun zui ding uh hi. Bang hang hiam cihleh sum leitawi pia mi in leiba maisak nuam lo hi. Leiba koih hun a sawt pen kum sagih sung bek hi ding hi. Hih thu in sum le paai vai thu hong hilhna hi-in, Israelte in a mipihte tungah sum leiba nei lo ding uh hi, ci-in hong hilh hi. Leiba tawh kisai thu Topa hong hilhna hi-in, bangzahin deihhuai lo thu hi mah taleh a kipelh thei lo thu hong suak ahih manin amaute kalsuanzia ding Topa hillhna kimu thei hi. Tuhun ciangin leitung gam tampi-ah inn khat neih zawh nadingin kum 30, 40 bang ciangin inn nei zo pan uh hi. Inn khat neih zawh nadingin sum tampi kisam ahih manin lei bat lakin inn nei tampi ki-om hi. Tua panin leibat hong kipan hi. Mi tampi in, nulepa akipan sangkah sangnaupangte in koi bangin sangkah nadingin sum leitawi ding cih lungmang uh hi. Gam thukhun kim khat in college sangkahte in sum leitawi-in sangman khit ciangin nasem uh a, nasepna pan a ngah uh sum tawh sangkahna sangsumpiakte lohkik uh hi. Tua bangin inn neih zawh nading le sangkah zawh nadingin nuntak hun neih laiteng sum leitawite lohkikna uh hi. Tua bangin sumleitawi lohkikna-ah summeet tawh piakik uh hi. Sangkahna ding huhna(scholarship) tuamtuam kipia hi mah taleh a meetpiakna tawh lohkik kul lo kingah zo lo hi mai hi. Nasepna pan ngah zahte lak pan sumkholin tua bangin leiba loh nading hong huh thei hi. Nasep ngah theih nading thusinna, laisinnate neih ding kisam hi. Na nulepa kihuhsak in. Lai Siangtho hunlai-in, nulepate in tate tungah lokhawhzia hilh uh hi. Tua bangin nungta khuasa uh hi. Tu-in tua bang gamh in manpha takin kingaihsun khol lo hi. Tua bangin lokhawhna in ei le ei-in nuntak khuasak theihna lampi khat hi. A deihhuai taktakin leitawi kullohna mun, leiba neihlohna mun hi. Ahi zongin tua bang leitung i mu kha nawn kei hi. Leitawi lo-in nuntak hamsa hun sungah a nungta mite ihi hi. Tua bangin leitawi tawh a nungta mi na hihleh leiba tawm theithei dingin vaihawm in. Leiba loh theih dingte lohpah dingin hanciam in. Thuman guipi in ahih theih laiteng leiba neih loh ding hanciam in. Lai Siangtho hong hilh sum vai thute i nuntakpih nakleh leiba nei lo-in kinungta thei hi. Leiba pelh ding hanciamin, leiba tawm theithei dingin sum zeek in. Midang khat tungah leiba pia na hihleh koi bangin amaute tungah thutangin thuman thei ding na hi hiam? Sum le paai vai-ah Pasian mai-ah koi bangin na nungta hiam? (Thusiahilh 12:14.)

 

FRIDAY                        February 3

Ngaihsutbeh ding: Leiba neih loh nading step thu thum i gen thute in Ellen G. White laigelhte siksanin akipulaak ahi hi. “Leiba nei lo dingin khensat in. Leiba nei liangin van le nate lei ding ngaihsun kei in. Tua bangin leiba neihna in hamsiatna khat hi. Sumphuk natna pelh bangin leiba pelh in. “Pasian tungah thuciamna nei in. Ama hong piak thuphate panin na leibate lohna-in zang in. Leiba nei lo-in nungta lecin, na nuntakna nuamna tawh kidim ding hi.” Lunghiang kei in. Lungkia kei in. Nunghei-na nei kei in.Nangma deihna nial in. Gawltanlahna zawh ding hanciam in. Sum khol in. Na leiba na loh zo ding hi. “Na sep ding a om khempeuh zekai lo-in sempah in. Leiba neilo-in na om ciangin midangte na huh na panpih zo ding hi. Tua ciangin zawhna lianpi na ngah ding hi.”Counsels on Stewardship, p. 257. Leiba nei lo dingin na nuntak nop leh hih a nuai-a thute ngaihsun in. Budget neikhol in. Na sumte koi-ah bangah zang ding cih ngaihsun masa in. Kha thum sungin ngahna le zatna khempeuh limtak ciamteh in. A kisam lo van le nate adingin sum tampi zang na hihna na kiphawk thei ding hi. Batlak pelh in. Credit cards cihte in innkuan sungah buai-na lianpi hong tun hi. Batlak hamsa kisa lo hi. Ahi zongin leiba loh ding hamsa i sa ciat hi. Kha sialin na leiba loh zo kei lecin, sum zatna khiam zaw in. Leibat neihna in na innkuan sung a hong siatsak ma-in batlak peuhmah pelh zaw in.Sum ngahna zah tawh nungta ding kipan in. Khat veivei ciangin kha khatin bang zah sum khol thei cih ngaihsun kha ngei lo hi hangh.Sumneente limtak kem in; theihloh kalin na lianpi sem zo thei hi.

 

KIKUP DING DOTNATE

 

1.       Gam tampi in leiba tawh nasem hi. Mimal mahmahin zong tua bangin kalsuan uh hi. Na nuntakna-ah leiba tawh kisai bang buai-na na nei hiam? Midangte hangin leiba nei na hi hiam?

 

2.     Na omna khuatual pawlpi mite in leiba tawh kisai bangci muh hiam? Sum le paai vai-ah bangci bang lungsim puak nei uh hiam?

 

3.     Leitung nate iplahna, sum le paai itna, huaihamna panin a hong dal thei ding Lai Siangtho kamciamte bang na mu thei hiam?