Lesson 12 | Mar 18-24 Cihtakna thaman

 

LESSON 12                            MARCH 18–24

CIhTAKNA THAMAN

 

Sabbath Nitak

Tu Kaal Sung Sim Ding: Heb. 11:6, Isa. 62:11, Rom. 6:23, John 14:1–3, Mang. 21, Matt. 25:20–23, Rom. 8:16–18.

KAMNGAH: “Topa in, “Hoih mahmah hi; a hoih a citak nasempa aw, a tawmno na zekna-ah siam na hih manin a tampi tak ka hong zeksak ding hi. Hong pai in; kei tawh nuamsa khawm ni,’ a ci hi.” (Matthew 25:21). Hotkhiatna ngah nadingin kuamah in a thalawh theih thu hi lo hi. Lai Siangtho in Pasian hehpihna a ngah mite in citakna tawh nungta dingin hong hanthawn hi. A tawpna-ah i ngah na khempeuh i nuntakna khempeuh in Pasian hehpihna hang bekin i ngah ahi hi. David gen bangin: “Topa’ thu kicing a, nuntakna a thaksuaksak hi. Topa’ teci panna hi takpi a,mi pillote pilsak hi. Topa’ thuhilhte man a, lungsim nuamsak hi.Topa’ thupiakna siang a,mitte vaksak hi. Topa a kizahtakna siang a,kip tawntung hi.Topa’ ngeina kipte thuman a,a vekin kituakin man kim hi.Kham sangin ahi zongin kham hoihpen sang ahi zongin tuate deihhuaizaw a,khuaizu le khuailuzu taakte sangin zong khumzaw lai hi” (Late 19:7–11). Lai Siangtho mun tampi in i ngah ding thamante pulaak hi. Khrih hong paikik khit ciangin leitung panin mawhna siatna khempeuh tawntung adingin kisiansuah dinga, Khrih in thaman hong pia ding hi, ci-in hong kamciam hi. A hong kikamciam thute, ngah takpi ding ihihna bang lungmuanna na nei hiam?

 

SUNDAY                          March 19

Citakna Hangin Thaman

 

Hebrews 11:6 sim in. Hih in bang khiatna pulaak hiam?Koi bangin a hong sawl bangin i nungta hiam? Mang. 22:12, Isa. 40:10, le Isa. 62:11. Hih Lai Siangthote in bang thu hong hilh uh hiam?

 _________________________________________________________

Citak mite tungah Pasian piak ding thaman in a tuam vilvel thaman hi ding hi. Tua thute mihing ngaihsutna in ngaihsun zo lo hi. “Thuman mite ngah ding thaman pulaak dingin mihing kammal in kicing zo lo hi. Tua thaman lamenin a ngak mite bekin atheithei ding uh hi. Ciangtan nei mihing in Pasian Paradise vangliatna a pulaak zo kei hi.”Ellen G. White, The Great Controversy, p. 674. Jesuh in Mual tung thuhilhna-ah Thuphate a pulaakna-ah hih bangin thukhupna a nei hi: ‘Midangte in keima hangin a man lopi-in hong simmawhin hong bawlsia a, a nam tuamtuamin hong gensiat uh ciangin thupha ngah mi na hi uh hi. Note a dingin vantungah thaman lianpi hong kikoih kholhsak ahih manin tua bang na tuah uh ciangin nuamin na lungdam un. Note’ hun ma-a kamsangte zong tua bangmahin a na kibawlsia ngei ahi hi” (Matt. 5:11, 12). Hebrew 11 sungah upna nei kamsang, sawltakte min kigelhnaah Hebrew gelhpa in a thupatna-ah Jesuh a hong sihna thu a pulaak masa hi. “Tua hi a, eite in i kiim i pamah hih zahin a tam teci nei ihih ciangin eite a hong dongtangsak thei nate khempeuh le eite a hong gakcip mawhna le khialhnate khempeuh paikhia-in, i mai-ah a om tai nading lampi a mong dongin lungsim kiptakin tai ni. Eite hong makai-in i upna a hong cingtaaksak Jesuh mitsuanin nei ni. Mailamah a ngah ding lungdamna hangin maizumna kihta loin singlamteh tungah sihna hong thuak a, tu-in Pasian tokhom taklamah a tu hi” (Heb. 12:1, 2). Citakna hangin thaman kipiakna le gamtatna tawh hotkhiatna ngah ding hanciamna kibang lo hi. Lai Siangtho sung hi taleh eite lakah kua in gamtatna tawh Pasian maipha ngah zo ding aom hiam? Kuamah om zo lo hi. Tua manin singlamteh tungah Khrih hong sih ding kisam ihi hi. Gamtatna pha tawh Pasian maipha kingah thei ding hi zenleh singlamteh tungah Khrih in sihna hong thuak kul lo ding hi. Tua hi-in hehpihna bek in Pasian mai-ah midik hong tangsak thei hi. “Tua mah bangin note zong Khrih Jesuh tawh kipawlin mawhna thu-ah si-in, Pasian’ thu-ah a nungta-in na kingaihsut ding uh ahi hi” (Rom. 11:6). Tua hi-in thaman i cih in Pasian in eite adingin a hong sep, eite sunga a sep thute hi zaw hi. Koi bangin hehpihna hangin hotkhiatna kingah ahihna thu le gamtatna hangin thaman kilamdang hiam? Na lawmte tawh kikum in.

 

MONDAY                           March 20

Tawntung Nunna

 

Mihingte in i uta i ut kei zongin tawntung nunna in hong ngak hi. Lai Siangtho hong hillhna-ah hih tawntung nunna in thu nihin kipulaak hi. Tawntung nunna ahi keileh tawntung sihna hi. A laizang nunna cih bang om lo hi. Kawingawi cih bang om thei lo hi. Tawntung sihna ahih keileh tawntung nunna khat zawzaw in i lawh ding thu hi. Hih in na khempeuhte mong, na khempeuhte bei-na hi ding hi. Romans 6:23 le John 3:16 sim in. Tel ding bang hong kipulaak hiam?

 ________________________________________________________

Koici bang dinmun hi ding hiam cih thu i tel zo kei hi; tawntung sihna le tawntung nunna in a kician takin akibatlohna kingaihsun thei hi. Tawntung nunna lampi na tel zawk leh tua thu a ngaihsun na hi ding hi.Pasian in a gen bangbang a tangtungsak thei hi.Ama kamciamte pel lo-in a tangtungsak hi. Amah i up ding bek a kisam ihi hi. Jesu dikna tungah kingain upna tawh Ama thupiakte i nuntakpih ding ahi hi. John 14:1–3 sim in. Aneu 1 ah Topa in bang hong hilh hiam? Aneu 2, 3 ah bang hong kamciam hiam?

 ___________________________________________________________

Jesuh in leitungah a nasep nunung lamah a Nungzuite tungah lametna le thapiakna thute a pulaak hi. Hih kammalte in lungkiat hun le gimthuaknaah amaute tungah lawpna a piangsak hi. Eite tungah zong tua bang mahin lametna le tha a hong guan kammalte hi lo a hiam?Jesuh in Pa Pasian kiang panin hong pai-in Ama kiang zuanin a kahtokik hi. Ama hong kamciam in: “Note la dingin keimah ka hong paikik ding hi. Tua munah note tawh kong omkhawm tawntung ding hi” ci hi. Thu dangdangte sangin a hong pai masaka singlamteh tunga Khrih hong sihna in Nih vei hong pai kik ding a hong khamuangsak hi. Nih vei-na hong kumkikna om keileh a hong pai masakna in zong man nei lo suak ding hi. “Kei va pai-in note’ om nading mun ka va bawlkholh khit ciangin keima omna munah note na hong om theih nadingun note a hong la dingin ka hong paikik ding hi” (John 14:3). Khrih hong pai masakna in Nihvei-na hong pai hamtang ding ahihna muanna hong neitheisak ahihna ngaihsun in. Nih vei-na hong paikik nading hong khamuangsak Amasa a hong pai-na in bang thu hiam?

 

TUESDAY                                       March 21

Jerusalem Khua Thak

 

Lai Siangtho in Jerusalem Thak thu hong hilhna-ah Abraham in upna tawh tua khuapi amu thei hi, ci-in hong hilh hi. “Pasian in geelin a lam, bulkip a nei khuapi, Abraham in a ngakna-in tua bangin a om ahi hi” (Heb. 11:10). Jerusalem Thak in Pasian bawl hi. Ama thupiakte tawh nungta-in Amah a it mite teen nading mun hi. Jerusalem Thak in Pasian ta a citak miten kum tulkhat vantungah a om khit uh ciangin leitungah a luah tawntung ding uh khuapi hi. Zinsuk zintoh a lunglut mite adingin hotkhiat lungdamna thu a om hi. Pasian in na khempeuh a kem hi. John in tua khuapi amu hi. “Mothak khat a pasal tawh a kituah dingin a kizem bangin vantung Pasian kiang panin Khuapi Siangtho ahi Jerusalem khua thak a hong paisuk ka mu hi” (Mang.21:2). Mang. 21. Bang hong kikamciam hiam?

 _________________________________________________________

Mawhna suksiat i lungsim in a ngaihsut theih thu tam het lo hi. Mawhna tawh kidim ihihlam a phawk thei liamliam bek hi. Tua hi mah taleh lametna nei ihihlam a theithei hi. Amasa-in Jesuh in mawhdim leitungah eite tawh a hong nungta khawm hi; tua bangin a hong nuntakna in nunna thak tawh hong ompih hi. Naitakin Jesuh amu mite Amah tawh mimal kizopna a nei mite in a hampha mite ahi uh hi. Tua hamphatna, tu-in mawhna in Jesuh hong mu sak thei lo hi mah taleh tua hamphatna i ngah ding a, mawhna khupcip thute i mucian thei ding hi. Tua hi-in khitui luanna, dahna le kahna a thei mihingte in Pasian kamciamte i muang thei hi. “Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi” (Mang. 21:4). Leitung na khempeuh mangthang ding a, a om ngei nai lo nate hong om ding hi. Tua hi-in Pasian tokhom panin a siangtho nunna a hong pai hi. Tua tokhom a pangah nuntakna gun tui luangin a gun pang tuakah nunna singkung a po hi. Pasian tokhom a om hi.”Amaute in ama maitang mu ding uh a, a taltang tung uhah ama min kigelh ding hi” (Mang. 22:4). Tatna ngah miten Pasian tawh kinai takin a om ding uh hi. Tua val vanthak le leitang thakah nunzia ding hong kihilh lo hi. Mang. 21:8 sim in. Sihna nihna a thuak dingte thu bang hong hilh hiam? Jesuh in a maisak loh mawhna bang kipulaak hiam? Mi kimkhat in tawntung nunna sung tung uh hi mah taleh bang hangin mi kim khat in manthanna sung tung uh hi ding hiam? Hih mi nihte kilamdanna in bang hi ding hiam?

 

WEDNESDAY                       March 22

Sum Ciaptehna Lai En

 

Jesuh in nasep a zawhkuan ciangin a Nungzuite tungah hih bangin dotna khat a nei hi: “Olive Mual tungah Jesuh tu-in a om laitakin a nungzuite guak a tuamin hong pai uh a, “Hih thute cik ciangin hong piang ding a, nang na hong pai ding hun le hun bei nading bang lim hong om ding ahi hiam, hong gen in,” a ci uh hi” (Matt. 24:3). Amaute dawnkikna khit ciangin Jesuh in hih bangin a genkik thute Mathew 24 sungah kimu thei hi. Leitung hun beikuan ciangin a hong piang ding thute a hong hilhkholhna-ah kidona, zinlinna, tuikhanna, hamsatna namcin hong tung ding ahihna thu hong hilhkhol hi. Tua ciangin Matthew 25 in Jesuh hong pai-ma deuh pawlpi omzia a pulaak hi. Hih dinmunte tangthu ahih keileh thugenna thum tawh a hong hilh hi. Amasa-in talent thugehna kimu thei hi. Hih thugentehna in Pasian hong piak siamna tuamtuamte i zatzia koi bangin kizang ding hi, cih a hong hilh hi. Matthew 25:14–19 sim in. Gamla mun khata khualzinkhia in kua hi ding hiamAmah in a neih a lamhte kua tungah ap hi ding hiam? Sum thu siangsak cih thu a khiatna in bang hi ding iam? (Matt. 25:19)

 __________________________________________________________

Khat veivei ciangin pianpih siamnate- lasak siamna, thugen siamna cihte in Luke 19:12–24 sunga sum thugentehna “minas” tawh kibangin kiciamteh hi. Ellen G. White in zong hih bangin hong hilh hi: “Talent thugenna thu kei hong kilak hi napi-in a thu ka thei khin zo kei hi.Hih thugentehna in nungzui mi khat hihna-ah hun nununga nuntak khuasakzia ding hong hilhna hi. Hih “talent” i cih in thugen siamna le thuhilh siamna bek a genna hi lo hi. Hih thugentehna in Pasian in Ama nasep nadingin a mite tung a hong ap neih le lamhte zeek siamna, zatna hong hilh hi” Testimonies for the Church, vol. 1, p. 197. Matthew 25:20–23 sim in. Pasian hong piak neih le lamh, sum le paaite Ama nasep nadingin a zangkhia mite tungah Pasian in bang gen hiam? “Na topa tawh nuamsa in” cih a khiatna in bang hi ding hiam (Matt. 25:23)?

 ___________________________________________________________

Ei sangin siamna nei zaw mi tampi om kha ding hi. Tua hi-in siamna haute in Pasian tungah masuan tampi nei zawpah uh hi. Ahi zongin hih thugentehna-ah siamna khat bek a nei mipa in citak lo-in selcip ahih manin Pasian gam a tanlawh hi. Midangte masuan buaipih sangin Pasian in nang le kei hong piak siamnate Ama min than nading le a Gam zai nadingin i zat ding thupi zaw hi; koi bangin Pasian min thangsak thei ding ka hiam, ci-in ngaihsun kawmin i kalsuan ding hi. Koi bangin Pasian in sum le paai zatnate hong sittelna-ah thuman citakin nasem khatin a hong mu ding hiam?

 

THURSDAY                        March 23

Thaman Mitsuan

 

Paul akikhel khit ciangin Khrih nasepna-ah a nuntakna khempeuh tawh nasem hi. Ama pilna le lungsim ciimnate hangin Paul in leitung mite muhna panin zong a lawhcing mahmah mi khat hi. Moses bang mahin Paul in zong Pasian mite tawh gim thuak khawm ding, Khrih adingin bawlsiatna a thuak zaw dingin a khensat hi. Amah in satna, suang tawh denna, thongkiatna, tembaw kisiatna, khuavot thuakna, gilkialna a thuak hi (2 Kor. 11:24–33). Bangci bangin Paul in tua bang gimnate a kantan zo thei hiam? Romans 8:16–18 sim in. Koi bangin Pasian a suahna in Ama tungah cihtakna guan hiam?

 ___________________________________________________________

Paul in cihtakna manpha sa mahmah hi. Tua hangin Khrih adingin a thuak ngam hi. Thong sung panin hih bangin pawlpite laikhak hi: “Sanggamte aw, tua hamphatna a ngah khinin ka kingaihsun kei hi. Tua ahih manin a beisa thute mangngilh bawlin mainawtin ka hanciam a, 14Khrih Jesuh nasepna tawh vantung nuntakna-ah Pasian’ hong sapna ahi hamphatna ka ngahtheih nadingin, a kung lam zuanin tangtakin ka tai hi” (Phil. 3:13, 14). 1 Timothy 6:6–12 sim in. Hih sungah a thuaknate hangin a ngah ding thute manpha asakna bang pulaak hiam? Khristian thuumte adingin bang thupuak nei hiam?

 ___________________________________________________________

Lai Siangtho siksanin ngaihsun lehang kitangsapnateng i neih nakleh hauhna lianpen hipah hi. Van le nate behlap toto-in hauhna hi masa lo hi. Hauhna in Pasian hong kamciamte muanna hi (Phil.4:19): “A na ka sep i Topa Pasian in ama hauhna tawh kizui-in Khrih Jesuh hangin note’ kitangsapna khempeuh hong pia ding hi” Pasian a tate tungah leitung neih le lamh hauhna nei dingin hong kamciam lo hi. Ahi zongin Pasian deihna bangin a nungta mi in bawlsiatna thuak ding hi, ci-in hong hilh zaw hi. Neih le lamh hauhnate sangin a hoih zaw a hong kamciam hi. Amah in “Na kitangsap khempeuh kong sik ding hi. Na paipai-na mun khempeuhah nang tawh kong omkhawm ding hi” hongci hi. Tua hi-in a tawpkhakna-ah Amah in a citakte tungah hauhna taktak, cihtheihna taktak, tawntung nunna a hong pia ding hi. Bangzahin hamphat huai hiam? A nuntakna abeikuan ciangin Paul in hih bangin a pulaak thei hi:” Kei ka hih leh Pasian biakna-in hong kipiak ding hun hong tungta hi. Hih leitung nuntakna ka nusiat ding hun hita hi. Kidemna-ah ka hat tawpin ka hih khin a, a mong dongin ka tai khin a, upna thu khotakin lenin ka zokhin hi. Thu a manin a khen Topa in tua Ni ciangin kei a hong piak ding thuman lukhu ahi gualzawhna thaman in tu-in kei hong ngak gige hi. Kei tung bekah a hong pia ding hi lo a, ama hong paikik ding itna tawh a ngakte khempeuh tungah zong a pia ding ahi hi” (2 Tim. 4:6–8). Eiten zong Pasian hong hehpihna tawh Paul bangmahin khamuanna i nei thei hi

 

FRIDAY                           March 24

Ngaihsutbeh Ding: Thu-um mite in Pasian hong piak sum le paaite Ama na sep nadingin hoihtak kizeek hiam, ci-in kitel phat ding kisam hi. Seventh-day Adventist Pawlpi in Neihsa kepna tawh kisai-in pawlpi hong lamlahna zong tampi za khin thei khin ciat hi hangh. Pastorte le pawlpi miten neihsa zeeksiamna nei-in Topa adingin limatakn nasem ding in Pasian in hong koih ahihlam i phawk ding kisam hi. Hih tawh kisai-in thusinna, panpihna le thapiakna cihte zong tam veipi nei khinkha ding uh hi. Lai Siangtho hong hilhbangin a kalsuan pawlpi ihih ding thupi hi. Tua bang mite in piakkhiatna hat mahmah uh hi. Pawl sunga zeek ding sum (Fund) tuamtuam zong nei uh a, Pasian nasepna a panpih a huh pawlpi hong suak uh hi. I kidot ding khat in: “Topa hong piak zahzah tawh Ama hong sawlbangin nungta dingin a hong sapna ka za hiam?

 

KIKUP DING DOTNATE:

 

1.       Lai SIangtho hong hilh sum le paai vai thu nihte in bang hi ding hiam? Na lawmte tawh kikum in. Gamtatna tawh hotkhiatna kingah maw? Ahi keileh hehpihna hang bekin hotkhiatna kingah hiam? Koi bangin hih thu nihte in tonkhawm thei ding hiam?

 

2.     Bang hangin i neih zahzah tawh lungkimna in thupi hiam? Tun bangmah na nei kei zongin leitung hauhna sangin adeihhuai zaw hauhna thu na thei hiam? Tua hi-in bang hangin hih thu nihte in a kilangdo thu hi lo ahihna na mu thei hiam? 3. Tawntung nunna in hong ngak hi, cih thu i nial kei hi. Hih thu siksanin tu-in bang deihtelna nei thei i hiam? Thuneu khat a bat hangin tawntung nunna sung hong tunpih thei thu hi lo hiam?