TOPA
HONG PAI MATENG AMA NA LIMTAKIN SEM
Topa in na khempeuh piangsakin a bawlsa nate le mihingte tawh ahong kizopdan i tel zo ngei kei hi. “Pa Pasian in eite bangzah takin hong itna thu thei un. Ama hong itna lian mahmah ahih manin eite pen Pasian’ tate hong kici a, hong kicih mah bang ihi takpi hi. Leitung mite in tuhun ciang dong Pasian thei lo uh ahih manin eite zong a hong thei lo uh ahi hi” (1 John 3:1). Ellen G. White genna-ah: “Mihing hoihna in bang tawh kikim ding hiam? Ciangtan nei lo Pasian tapa tanu hih theihna sangin a lian zaw bang om nawn ding hiam? Leitung hamphatna tawh tehpih theih ding bang om ding hiam? God’s Amazing Grace, p. 341. Mawhna hangin leitung in Jesuh sungah a hong kipia i dinmun lungdam theihna hong neisak zo kei hi. Tua hi-in Jesuh sungah i nuntak keileh, leitung nate le leitung nopsaknate in hong zo ding a, Khrih tawh akikhen ihi ding hi. Pasian Kammal in Satan hong khemnate le hong zolnate hong hilh tawntung hi. Satan khemna sung a tung mite in ama sila suak uh a, kisiatna sungah nungta-in thuman lampi panin lampial mi a suak uh hi. Sum it lua-te in siatna khempeuh a thuak uh hi. Tua bang mite in huaihamna hangin upna nangawn a nusia uh hi. Gimna lianpi a thuak uh hi (1 Tim. 6:9, 10). Ahi zongin Topa in koi bang in sum zong ding, koi bangin sum zang ding cih thu hong hilh hi. Paul in hong vauhilhna-ah, sum deihna in “kisiatna le manthanna hong tunpih ding hi” ci hi. Lai Siangtho mun 2,000 val bang in sum, van le nate tawh kisai hong hilh hi. Pasian in van le nate, sum le paai zon zia ding le zatzia ding kician takin a hong hilh hi. A hong piak thuphate zatsiamzia ding zong a hong hilhkhol hi. Tu quarter sung i thusin ding thu in Pasian tawh mihingte kizopzia thute le na khempeuhah Amah i muan theihna, Ama tungah citak theihzia ding lampite i kikum ding hi. Tua bangin i nuntak laiteng lei theih loh hun, zuak theih loh hun (Mang. 13:17) hong tun ciangin Ama sungah i khamuang thei ding hi. Ahi zongin tua bang upna in zan khat suun khat thu-in kingah thei upna hi lo hi; Pasian hong piak nate zeek siamna le Ama tungah citakna tungtawnin a kingah thei upna hi. I tuah ding hamsatnate i nawktan zawh nadingin a hong kigingkholsak thei thute zong i pulaak ding hi. Topa Pasian in van le nate phungpi hi. Amah tawh nasemkhawm mi ihih laiteng Ama deihna tawh kituakin na khempeuh zatsiamna, zeeksiamna a hong guan hi. Tua bangin nungtakna-ah Honpa deihna in a hong hahsiang hi; Ama nasem ding khutin hong zang hi. Hih in a lian mahmah hamphatna khat hi; tua hangin Ama tungah lungdam a ko tawntung ding ihi hi. Bang hang hiam cihleh “Amah in khuamial vangliatna panin a hong honkhia hi. Ama it Tapa Ukna sungah a hong tunpih hi. Ama sung pan sisan in hong honkhia-in mawhmai-na a hong pia hi” (Kol. 1:13, 14). Topa Pasian in pilna tawh kidimin Solomon tungtawnin a hong hilh thu in: “Na neihsate tawh na Topa Pasian zahtak in. Na anpalte tawh Topa zahtak in” (Pau. 3:9). Hih thu in nuntakpih dingin a hoih thu hilhna khat hi. Bang hang hiam cihleh ‘Kote’ Topa Pasian aw, nangmah in na khempeuh piangsakin, nangma deihna bangin na khempeuh omin,na khempeuh kipiangsak ahih manin, minthanna, pahtawina, le vangliatna na ngah tawntung dingin a kilawm hi,” (Mang. 4:11). Nuntak khuasakna in gimna, lungkhamna tawh kidim hi. Ahi zongin thu-umte in lungkhamna, lungzinna dim leitungah lungmuanna le lametna tawh i nungta thei veve hi.
LESSON
1
December
31–January 6
PASIAN
INNKUANPIH SUNGAH KIHELNA
SABBATH
NITAK
TU
KAAL SUNG SIM DING: Gal. 3:26, 29; Late 50:10–12; 1
Khang. 29:13, 14; Phil. 4:19; 1 John 5:3; Matt. 6:19–21.
KAMNGAH:
“Pa Pasian in eite bangzah takin hong itna thu thei un. Ama hong itna lian
mahmah ahih manin eite pen Pasian’ tate hong kici a, hong kicih mah bang ihi
takpi hi. Leitung mite in tuhun ciang dong Pasian thei lo uh ahih manin eite
zong a hong thei lo uh ahi hi (1John 3:1) Khristian thu-um mite adingin Topa
Pasian tawh kizopna in lamdang hi. Bang hang hiam cihleh Topa in Ama neihsate a
kemin, a cing ding, a zeek dingin a hong koih hi. Mihing a hong piansak akipan
Pasian in Adam le Eve tungah piansak nate hoihtak a kem dingin masuan lianpi
khat a pia hi (Pian. 2:7–9, 15.) Ganhingte minvawh akipan Eden Huan kepna,
leitung mun khempeuhah kizel un, cih thupiak a kipan Pasian aitangin nasem
dingin sawlna a ngah uh hi. Topa Pasian in van le nate hong pia hi. Ahi zongin
a hong piak neih le lamhte Ama deihna tawh kituakin i zeek i zat ding hong deih
hi. Sum zon paai zonna-ah, vanlei vanzuaknate-ah thuman ding hong deih hi.
Sawmah khat piakna, sumpi piakna cihte-ah zong a citak dingin hong deih hi.
Topa Pasian in i kitangsapnate-ah zat dingin neih le lamhte, sum le paaite zong
ahong pia hi. Eima kitangsapnate bek tham lo-in midangte kitangsapnate zong a
huh a panpih dingin a hong piak ahi hi. Hihte sangin a thupi zaw in Ama nasepna
a tangzai semsem zawk nadingin i zat ding hong deih hi. Up ngam huai lo thu hi
mah taleh Topa Pasian in a tate tungah masuan lianpi hong guan hi. Midangte
tungah hotkhiatna thu gen ding hilh ding le Ama inn a lam dingin banah
khangsawnte panpih dingin a hong sawl hi. Tu kaal sung i sin ding thu in Pasian
innkuan sungah i omna tawh kizui-in i hamphatna le i masuan thute i kikum ding
hi.
SUNDAY
January 1
Eite
In Pasian Innkuan Sungah A Kihel Ihi Hi
“Hih
ama geelna teng ka ngaihsut ciangin, vantung a tung khinsa mite le leitungah a
omlai mite khempeuh’ pianna i Pa Pasian’ mai-ah ka khukdin hi” (Eph. 3:14, 15).
Hih sungah limciimna bang kigen a, lametna bang thu hong hilh hiam?
_________________________________________________________
Jesuh
in amasa lam a nasepnate-ah hih bangin a pulaak hi: “Tua ahih manin thu na nget
uh ciangin hih bangin na ngen un: “Vantunga om kote’ Pa aw, na min siangtho
kizahtak hen.” (Matt. 6:9). A nung ciangin zong a Nungzuite tungah hih bang
mahin thungen dingin a sawl hi (Luke 11:2). Eite in Topa Pasian pen “Pa” ci
dingin Jesuh in hong hilh hi “Vantunga om kote pa aw” ci-in Topa tawh kizopzia
ding hong hilh hi. Jesuh in sihna pan a thawhkik khit ciangin Mary tawh a
kimuhna-ah Mary in Jesuh a pom nuam hi. “Jesuh in Mary tungah, ka Pa kiangah
kahto nai lo ka hih manin hong pom nai kei in. Ahi zongin ka sanggamte kiangah
va pai inla, “Keimah in Ka Pa le note Pa, ka Pasian le note Pasian kiangah ka
kahto ding hi, ci-in a sawl hi” (John 20:17). Jesuh Pa in eite Pa mah ahih
manin Amah in eite Sanggam pa hi; Topa sungah a om mi khempeuh in eite sanggam
tanau vive hi pah hi. Jesuh in leitung mi innkuan khat sungah hong kihel hi.
Tua manin eite in vantung innkuan sungah a kihel thei ihi hi. “Vantung innkuan
le leitung innkuan in pumkhat hi.”Ellen G. White, The Desire of Ages, p. 83.
Pai. 3:10; Pai. 5:1; Galatians 3:26, 29 sim in. Hih Lai Siangtho munte in koi
bangin Pasian in mihingte tawh a hong kizopzia pulaakin, bang hangin tua bangin
kizom dingin hong hanthawn hi ding hiam?
_____________________________________________________________________________________________________________________________________________________________________
Piansak
thu a um lote in mihing in ama thu-in hong piangkhia tawm hi; leitung khuahun huahun
paiziate tungtawnin a kinungta hi, ci uh hi. Ahi zongin Lai Siangtho in Pasian
in na khempeuh a piansak ahihna thu hong hilh bek tham lo-iin Amah in mihingte
hong it ahihna hong hilh hi; Ama innkuanpih dingin hong bawl hi, ci-in hong
hilh hi. Amah in itna tawh mihingte tawh kizopna a hong bawl hi. Jesuh in
Israelte “Ka mite” ci-in pulaak a, eite pen “Pasian tate” ci-in pulaak hi. Topa
Pasian in eite “Pa” hi, ci-in hong hilh hi. Innkuan sungah khat le khat i ki-it
diamdiam bangin Topa Pasian in zong eite a hong it hi. Gimna tawh kidim leitung
hi mah taleh tua bangin itna hong nei Topa Pasian hangin bangzahin lungdam huai
thu hi lo hiam? Leitung mi khempeuh innkuan khat bangin ki-it cih thu ngaihsun
in. Koi bangin midangte tawh kizopna-ah sanggam u le nau bangin kizopzia ding
hong hilh hiam?
MONDAY
January
2
Na
Khempeuh A Nei Topa Pasian
Late
50:10–12; 24:1; 1 Khang. 29:13, 14; le Haggai 2:8 sim in. Bang thu puak
kipulaak hiam? Tua thute in bang hong hilh hiam? Koi bangin neih le lamh, sum
le paaite tungah lungsim puak nei ding ci-in hong hilh hiam?
__________________________________________________________________________________
Khang
Tangthu Masa 17 a kipan a pulaak thute in Kumpi David in Pasian biakinn lam
ding a lunggulhna thu kipulaak hi. Tua bangin a geelna thu Kamsang Nathan
tungah zong a pulaak hi. Tua ciangin Natan in ‘Na lungsima om bangbang sem in.
Topa Pasian in nangmah hong ompih ding hi,” a ci hi (1Khang.17:2). Ahi zongin
Pasian kammal in Nathan tungah hong tungin David in galdo-na tam ahih manin
sisan luanna tam ahihna hangin Pasian biakinn lam lo ding hi, cih thu hong tung
hi. Ama tangin a tapa in biakinn lam dingin Nathan tungah thu hong tungkik hi.
Tua ciangin David in biakinn lam ding a geelnate a khelkik hi. A tapa Solomon
in biakinn lam dingin phalna a kipiak ciangin David in biakinn lamna dingin a
kisam suang, sing, kham le ngunte akisam zah sangin a tam zaw a kaikhawm
hi.”Biakinn lam nadingin van kisam khempeuh a kaihkhop khit ciangin mi honpite
in biakinn lam nading munah a hong kikaikhawm uh hi; David in Israel makaite
samin Pasian min phatna le lungdamkohna a nei khawm uh hi. 1 Khang.29:13, 14
sungah Kumpi David thungetna kiciamteh hi. A gen thute in thuman thutak vive
hi. Biakinn lam nadingin amaute in sum le paai, van le nate a hong paipih ciat
uh hi. Lam khat panin, ama gen thu in: “Hih bangin van le nate, sum le paai
kaihkhop zawhna in Topa Pasian hang bek mah hi. Tua hi-in Ama tungah lungdamkoh
ding kilawm hi. Nangma neihsa mah kong pia-kik uh hi, “ci-in a pulaak hi. Eite
adingin a thupi mahmah thu khat in ahau azawng (a diakdiakin sumhaute) tungah
thu puak in Pasian in a kipatcilin na khempeuh a piansak ahih bang mahin (Pian.
1:1; John 1:3; Ps. 33:6, 9). Khrih in nuntakna khempeuh tungah thu neihna nei
hi; van le nate, i neihsa khempeuh tungah zong thuneih theihna a nei hi;
bangzahin hamsa-in semin i ngah hi phial ta leh zong na khempeuh in Topa Pasian
neihsa hi. Topa Pasian hong itna le hehpihna lo-in bangmah i neih a om kei hi.
Mihing nuntakna mahmahin zong a mawkna suak ding hi. A taktakin hehpihna om kei
leh eite zong i nungta kei ding hi. I nuntakna khempeuh, na khempeuh, Topa
Pasian hoihnate hangin Ama tungah kinga ahih manin Topa tungah lungdam tawntung
ding le Ama min phat ding ihi hi. Hih thu i phawk tawntung ding kisam hi. “Ahih
hangin kote in hih bangin utna tawh kong piak nadingun kei kua hi a, ka mite
bang ahi hiam? Bang hang hiam cih leh na khempeuh nang kiang pan hong pai hi a,
nangma a’ mah nang tungah a hong pia ka hi uh hi.” (1 Khang. 29:14). Bang thu
guipi kipulaak hiam? Koi bangin Topa le van le nate tungah lungsim puakzia ding
hong hilh hiam?
TUESDAY
January
3
Pasian
Innkuante Adingin Na Khempeuh Kingahna
Pasian
tate tungah a lian penpen Ama hong piakkhong in Jesuh Khrih ahi hi. Mawhmai-na
hangin Amah in daihna hong pia hi; Amah in nisim nuntak khuasak nadingin a
kisam hehpihna le Kha lam khantohna le tawntung lametna a hong guan hi. “Pasian
in leitung mite hong it mahmah ahih manin ama Tapa a um mi khempeuh si nawn
loin a hin tawntung theih nadingun a Tapa neihsun a hong piak dongin a hong
itna a hong lak hi.”(John 3:16). “Tua bang hitaseleh ama thu ngai-in amah a um
mite khempeuh tungah Pasian’ tate suahtheih nading thu a pia hi” (John 1:12).
Tua hi-in eite tungah hotkhiatna a hong piakhong hi. Hotkhiatna hong piakhong
khit nungah bang in thupi nawn hiam? Bangbang i tuak zongin, ni khat ni ciangin
a si ding vive ihi hi. I nuntakna a bei ciangin bang thu tawh hong kiphawk ding
hiam? Kua in eite hong thei laiding hiam? Tua hi-in a masa pen le a thupi pen
in a khawnkhongin ahong kipia gospel thu in Khrih sungah hong kipia khin hi (1
Cor. 2:2), Hih thu siksanin a nungta ding ihi hi. Tua banah hotkhiatna tawh a
hong piakkhop thupha tampi ngah hi. Annek tuidawnte banah ahong piak thuphate
kisim zo lo hi. Bang ne ding bang silh ding ka hiam, ci-in a lungkham mite
tungah Topa in “Pasian gam le Ama dikna zong masa un. Tua hileh note
kitangsapna khempeuh a hong piatuah ding hi,” ci hi (Matt. 6:33). Late 23:1; 37:25,
le Philipp. 4:19 sim in. Hih Lai Siangtho munte in nisim kitangsapnate Pasian
in bang hongci piak hiam, cih hong hilh hiam?
___________________________________________________________
Tua
hi-in Jesuh in a Nungzuite tungah “A sawt lo-in vankahto ding ahihna thu a
pulaak hi. Ama nungah amaute tawh a omkhawm ding Kha Siangtho ka hong paisak
ding hi, ci-in kamciam pia hi. “Kei nong it uh leh ka thupiakte na zui ding uh
hi. Keimah in ka Pa tungah thu ka ngen ding a, Amah in Huhpa hong paisak ding
hi. Huhpa Kha Siangtho in note tawh a tawntungin a hong omkhawm ding hi. Kha
Siangtho in thuman hong hilh ding hi. Leitung in Amah a sang kei hi. Bang hang
hiam cihleh leitung mite in amah amu thei kei uh hi.Ahi zongin note in Amah na
thei uh hi; Amah in note tawh a hong omkhawm ding hi; Amah in note sungah a
hong nungta ding hi (John 14:15–17). “Amah in thuman khempeuh a hong hilh ding
hi” (John 16:13). Tua hi-in Kha Siangtho mah in Pasian tate tungah silpiak
tampi hong pia hi (1 Kor. 12:4–11.). A tomin pulaak lehang, eite in Pasian
sungah nungta-in i gamtang hi” (Sawl. 17:28); Topa Pasian in nunna phungpi hi;
na khempeuh Ama kiang pan a hong pai hi “(Sawl. 17:25), Amah in nunna hong pia
hi. Hotkhiatna kamciam hong pia hi; neih le lam, van le nate le upna thuphate
zong hong pia hi. Tua bangin a hong piakna a hang in eite in zong midangte
tungah a pia dingin hong deih hi. Khut siamna tuamtuamte zong a hong pia hi.
Topa tungah lungdam ding leiba lianpi i nei hi.
WEDNESDAY
January
4
PASIAN
INNKUANTE MASUANTE
Pasian
hong piak leitung thuphate le vantung thuphate hangin i lungdam hi. Koi bangin
Pasian innkuan sungah kihel ihihna in bangzahin lungdam huai hiam, cih na thei
hiam? Thkna. 6:5 le Matthew 22:37 sim in. Hihte in bang khiatna nei hiam? Koi
bangin a hong gen bangin nungta thei ding i hiam?
_________________________________________________________
Koi
bangin “nuntakna khempeuh, lungsim khempeuh, pilna khempeuh le thahatna
khempeuh tawh Topa Pasian it ding i hiam? (Matt. 22:37)? A lungdamhuai mahmah
thu khat in tua bangin i nuntak theih nadingin Lai Siangtho in hong hilh hi.
Thkna. 10:12, 13 le 1 John 5:3 sim in. Lai Siangtho hong hilh bangin vantunga i
Pa tawh itna tawh kizopna i cih in bangci bang nunzia hi ding hiam?
___________________________________________________________
Thukham
zuihna hi ding hiam? Thupiakte bangin nuntakna hi ding hiam? Khristian mi tampi
in tua bangin ngaihsun uh hi. Tua bang ngaihsutna in man lo hi. Thukham tawh
hotkhiatna ngah ding hanciamna in Pasian deihna tawh kituak lo hi. Eima pumpi i
it bangin midangte zong it ding hong sawl hi Ahi zongin Pasian hong thuhilh in
siang mahmah hi. Ahi zongin Pasian in kitel kician takin hong hilh hi. Ama hong
piak thupiakte i nuntakpihna in Pasian i itna le i vengte i itna tawh hong
kilang ding hi. “Pasian i it ciangin ama thupiakte a zui ihi hi. Eite a dingin
ama thupiakte zuih ding a haksa lua hi lo hi” (John 5:3). Hih laikhak siksanin
ngaihsun lehang eite in Pasian i it hi. Tua ahih manin Ama thupiakte a nuntakpih
ihi hi. Hi mah hi. Ahi zongin “hih in Pasian hong itna mah hi,” ci-in i thei
hi. Ama thupiakte i nuntakpihna in Ama i itna hang ahihlam i pulaak hi. Matthew
7:21–27 sungah Jesuh thugente kimu thei hi. Pasian kammal za-in a zak bangin a
nungta mi in suangpi tunga kilam inn tawh kibang hi. Ahi zongin za napi-in a
zak bangin a nungta lo mite in sehnel tunga innlampa tawh kibangin mihai hi,
ci-in Jesuh thu hilhna i mu thei hi. Sehnel tunga innlam in kisia gawp ding hi.
Tua innlam minihte in Topa thu za uh hi. Khat in a zak bangin nungta hi; ahi
zongin a dang khat in a zak bangin nungta lo hi. A tuah ding uh thu in sihna
maw ahih keileh nuntakna ci-in lampi nih bek om hi. Pasian a it mi in Ama
thupiakte bangin a nungta hi. Bang hangin Pasian itna in Ama thupiakte
nuntakpihna tawh kilang hiam? Ama thupiakte nuntakpihna in itna taktak pulaak
hi lo hiam? Ama thupiakte nialna gah bang kimu ding hiam?
THURSDAY January 5
Vantungah
Sum Kholna
“Nget
in ne-in a kekseu theihna, gutate in luhin a guktheihna hih leitungah na sum uh
khol kei un. Nget in a nek theih lohna, a kekseu theih lohna, gutate in luhin a
guk theih lohna mun vantungah note a dingin kholzaw un. Bang hang hiam cih leh
na sum omna uhah na lungsim uh om tawntung ding hi” (Matt. 6:19–21). Jesuh in
hih munah a thupi bang thu pulaak hiam?
_________________________________________________________
Neih
le lam a haute in hih thu a zak khit uh ciangin tua bang neih le lamhte beimang
ding ahihna thu a ngaihsun thei uh hi. I leitung nate in mitphiatkaalin beimang
ding hi; leitungah kidonate, gitlohnate, siatnate, huihpi, tuicin cihte tawh
kidim hi. Mit phiat kaalin leitung nate khempeuh beimang thei hi. Hamsapi-in
nasemin citakna tawh i ngah na khempeuh in beimang lel ding hi. Tua hi-in hun
tomno sungin na khempeuh in beimang ding ahihna hong hilh khol hi. Sihna in
manlang takin hong tung ding a, na khempeuh in a mawkna suak mang ding hi. Lai
Siangtho in neih le lamh hauhna pen mawhna hi, ci lo hi. Ahi zongin Jesuh hong
hilhkholh thu in leitung nate in siatna lam hong tunpihkha thei ahihna hong
hilh hi. Tua hi-in vantungah sumkhol i cih ciangin bang a gen nuam ihi hiam?
Vantungah sumkhol i cih ciangin na khempeuhah sum le paai masak sangin Pasian
le Ama nasepna masak zaw hamtang cihna hi. Tua banah vantungah sumkhol i cih
ciangin neih le lamhte Pasian na kisep nadingin zangin, Ama gam tangzai zawk
nadingin zeekna, midangte huhna, midangte tungah thupha bawlna cihte zong kihel
hi.Gentehna-in Pasian in Abraham samkhia-in, amah le a innkuante tungtawnin
leitung minamte in thupha ngah dingin Pasian in geelna nei hi. Abraham in
Pasian lawmpa cih min a ngah hi (James 2:23), “ Thupha a ngah dingin minam lian
khatin nang hong bawlin, thupha hong pia-in, na min kong liansak ding hi. Nang
thupha hong piate thupha ka pia ding a, nang hong samsiate ka samsia ding hi.
Nang’ thupha ngah bangin thupha a ngah nadingun leitung midang khempeuh in hong
ngen ding uh hi,” a ci hi. (Pian. 12:2, 3). “Abraham in a up manin Pasian in
thupha a piak mah bangin Pasian a um midang khempeuh in zong thupha a ngah ahi
uh hi” (Gal. 3:9). Abraham in minamte tungah thupha hi dingin sapna ngah
bangmahin eite in zong midangte adingin thupha ahi dingin sapna ngah ihi hi.
“Sum in mannei mahmah hi. Bang hang hiam cihleh sum in na tampi sem hi. Pasian
tate khut in gilkialte anpia-in cimawh dongtuakte ahuh thei uh hi. Guaktanga om
mite puansilh pia-in thupha tampi a bawl thei uh hi. A dam lo mite zong huh
thei uh hi. Ahi zongin Pasian na sepna, midangte huhna dingin a kizat keileh
sum in leivui sangin manpha lo ding hi.” Ellen G. White, Christ’s Object
Lessons, p. 351. “Na sum omna-ah na lungsim zong a om hi.” (Matt. 6:21). Na
lungsim in na sum koihna mun pulaak hi lo hiam?
FRIDAY January 6
Ngaihsutbeh
Ding: “Topa Pasian in a Mite hong itna in sihna sangin
vanglian zaw tham hi. A Tapa hong piakna-ah vantung thupha khempeuh zong a hong
pia khawm hi. Honpa nunna, le sihna, sihna pan a thawhna, van a kahna,
vantungmite nasepna, Kha Siangtho na sepna cihte tungtawnin Pa Pasian in mihing
kihotkhiatna dingin nasem hi. Vantungmi khempeuh in zong mihingte kihotkhiatna
nasepna a lungtung mahmah uh hi.” Ellen G. White, Steps to Christ, p. 21.
“Angsung huaihamna nialin na nuntakna khempeuh Khrih tungah ki-ap hi lecin,
Pasian innkuan sungah a nungta na hi ding hi. Vantung Pa neihsa khempeuh nangma
neihsa hong suak ding hi. Vantung hauhna kongkhak khempeuh hong kihon ding a,
hih leitung le a hong tung ding leitungah cihtheihna na ngah ding hi.
Vantungmite na sepna, Kha Siangtho silpiak, Topa nasemte in nangma nasem hong
suak ding hi. Leitung thupha khempeuh nangma luah hong suak ding hi.” Ellen G.
White, Thoughts From the Mount of Blessing, p. 110.
KIKUP
DING DOTNATE:
1.
Pa Pasian hong piak a
lamdang thuphate tawh David pulaak bangin, Topa tungah “Nangmah biakna dingin
bang hong keng ding ka hiam? cih lungsim tawh Topa lam zuan dingin hong sawl hi
(Late 116:12).Pasian hong piak thupha neih le lamhte, thu upna tawh kisai-in
hong piakkhong thuphate gualsuk inla na lawmte tungah pulaak in. Hih thu in
Topa tungah lungdam ding thu bang hong hilh hiam?
2.
Pasian in Piangsak
Pa, ahihna Lai Siangtho in hong limhilh mahmah hi. Piangsak Pa bek htam lo-in
na khempeuh A Cing A Kem Pa hi, ci-in zong i thei hi ( Heb. 1:3; Job 38:33–37;
Late 135:6, 7; Kol. 1:17; Sawl. 17:28; 2 Pet. 3:7) Ni, Kha, Aksi, vuklam lompi,
aksi lompite a kipan khuavannuaia om na khempeuh, lungtang kisai- a kipan na
khempeuh a om theihna a hang in Pasian vangliatna ahi hi. Ama hangin na
khempeuh a om thei ahi hi. Koi bangin hih thu in Pasian tungah masuan lianpi
nei ihihna hong hilh hiam? Ama hong piak thuphate hangin bang masuan nei i
hiam? Koi bangin hih thu in Ama kiang hong makaih thei ding hiam?
3.
Tukaal sung thusinnate
in bang hangin Pasian in na khempeuh hong pia hiam, cih thu hong hilh hi. A
hong piak thuphate lak panin a lian penpen thupha in Jesuh le Ama hong
hothiatna hi, ci-in zong i thei hi. Bang hangin hih thu in thuman hiam? Ama
hong piak lametna thu nei lo hi lehang bang nei nawn ding i hiam? Pasian om lo
hi, a ci mi khat in hih bangin laigelh hi: mihing in si le sa, guh le tangte
nasepna hi lel hi,” ci hi. Bang hangin Gospel in nuntakna in mannei suaksak
hiam?
