“Note kep dingin ahong kipia tuute ,
Aana neihna tawh acing hilo-in tuu te etteh dingin a gamta ten a hi un. Tuu
cing ukpa hong pai ciangin amual ngeilo minthanna lukhu ahong pia ding hi.”
IPet. 5:2-4
Khris sungah a om Topa lenggah huan sungah naseppih siate leh makaite
leh pawlpi mi khempeuh Ih Topa Pasian in thupha hong pia kim ciat ta hen.
Tutung ih kiteelpina ah ih theihsa bangin Cingtaak ta kei leng Pasian leh pawlpi te hong deihsakna tawh Ministerial lam alen ding a hong koih mah bangin a beisa unte sunga ihnasepnate tha kipia in a kihanthawn ih hihi.
“LUNGDAMKOHNA”
Abeisa hunte sungah Ih gam buaina leh ih pulnatna te hangin ih khualzin
gamvakna leh biakpiakna , Effort bawlna, Gospel paina sangkahna cih te khempeuh
din khawl tek a mun khat a lem zawkna munte ah kikhopna Gospel paina tawmtawm
kinei thei bek hi. Ahizongin Hih bang hunsia sung mahah nuntak hamsa pi mah in
lungkia lo in Topa a ding leh MUC gam bup a dingin ma ih pan ciat tek na hangin
Topa hong piak ih kep ding tuu te hem lo ban ah
a lang lam pan guta buluh bangin hong guk sak nuam in atuamtuam tawh
nasem aom kawmkal ah tu ciangciang ih tuu te hemlo in kem bit thei ciat ih hih
manin Nakpi takin lungdam ih kiko hi.
Tua banah tuu huang pua lam a om lo
tuu te ih mat zawh nailoh hangin ih nasepnate mawkna hetlo a lawhcing mah hi
veve hang. A tunga Topa kammal bangin tuu cing ukpa hong ki lat ciangin
lungkialo a itna veina tawh hong kipia ih tuu te ih kep bit na hangin Amual
ngeilo minthanna lukhu Topa in hong pia ciat ding hi ci-in ih lamen hi. I Pet.
5:4
“LUNGKIA LO IN HANCIAM ZEL NI”
Tua khit ciangin II Tim. 4:2 sung Paul in agen
bangin “Hun hoih hunsia cih khen lo in Pasian thuhilh ding na kin ngaihsut
in.Lungduaina tawh mite lungsim zo in Mite taai in hanthawn in om in” acih mah
bangin ih khuahun ih gam vai te bang hun teh hoih ding gen theilo hi hang.
Tua ahih manin hun hoih om sun te aam in hun sia paulap lo-in Top ana ih
sepna ciat thangah takin sem ciat ni. Tua tawh kizui in a diak in ei tuucing te
in ih tuute a hem loh nang in limtak in kem in tuu te a ci dam kim hiam? Agil a
vah hiam? A zawngkhalna a om hiam cihte kanin a gilkial a om leh an kham sakin
tui duh te tui kham sak in a zawngkhal a
damlo a om leh zatui pia, a gammang a om leh a kimlo te kankhia in zong in tuu
te kisapna kankhia in akisap bangbang pia in sem ding hi hang.
Tua bangin tuu te cidamsak, an khamsak tui kham sak, zawng sak lo-in ih
kep nak leh tuu te cidamin zawngkhal lo-in mundang lunggulh lo in, tuu huang
sung bek nuamsa ding ban ah,anawi tampi hong suak kaii in amul tampi pha in ih
khua hong lumsak ding a ih pawlpi a cidam akhangto hong suak ding hi.
Thukhupna:
Tua ahih manin Topa lenggah huan a nasem khempeuh siate, upa makaite leh
pawlpi mite akuamaciat in abeisa hunte sungah hunsia hun lauhuai kawmkalah Topa
a ding leh MUC a ding a ih hih theih zah ciat tawh ihsepna ih gualzawhna sa te
tung pan tha la ciat in hong pai lai ding hun thak sungah ih sep ding ih cin
ding Goal te phawk kawm in a beisa hunte sang ih khantoh zawk theih nadingin a
kuamah ciat in thungen tangtang ni.
Thangah takin itna veina tawh siate leh pawlpi mite khut kilenin nasem ciat ni
cih a kihanthawn hi hang.
Topa in akuama ciat lei thupha kha
thupha hong pia ciat hen! Lungdam.
Agelh: Pr Thang Khan Pau
