LESSON 6 | OCT 29–NOV 4 Amah in Eite ading hongsi hi

LESSON 6 OCT 29–NOV 4

AMAH IN EITE ADING HONG SI HI

 

Sabbath Nitak

Tu Kaal Sung Sim Ding: Mang. 13:8; Matt. 17:22, 23; Mark 9:30–32; John 19:1–30; Rom. 6:23; 1Kor. 1:18–24.

KAMNGAH:‘Moses in gamlak khuam tungah sumngo gul a khai mah bangin Mihing Tapa zong hong kikhai ding hi a, amah a um mi khempeuh nungta tawntung ding hi.Pasian in leitung mite hong it mahmah ahih manin ama Tapa a um mi khempeuh si nawn loin a hin tawntung theih nadingun a Tapa neihsun a hong piak dongin a hong itna a hong lak hi” (John 3:14, 15).

Mihingte in sihna le siahpiakna i pelh thei kei hi, ci-in kigen hi. Hih pen man khin tak lo hi. Siah piak bel kipelh thei na ven, ahi zongin sihna bel kuaman a pelh thei kei hi. Zatui zatang tawh kibawl cina mi kimkhat kum 3, kum 4 a nungtata zong om mah hi; ahi zongin a tawpna-ah sihna mah kituak veve hi. Bang hang hiam cihleh midik hi taleh mi gilote hi taleh mihing khempeuh a si ding ihihlam i theitel hi. Midik ahi a migilo ahi zongin a si khempeuh thawhkikna om ding hi, cih i lametna hi (1 Kor. 15:18), Khrih sunga a site in Pasian kiangah ompah ding cih thu hilhna in a man lo thu hi. Tua hi-a, Khrih thawhkikna in i upna thu bulpi hi. Bang hang hiam cihleh thawhkikna in Ama thawhkikna tungah kingah hi. Jesuh thokik ahih manin misite hong thokik pelmawh ding hi, cih khamuanna i nei thei hi. Tua hi-in Gethsemane huanin Ama gimthuakna-ah, hih bangin Jesuh in thu a ngen hi: “Tu-in lunggimna le lungkhamna ka thuak hi. Bang pulaak nawn ding ka hiam? Pa aw, hih gimna panin hong honkhia in. Ahi zongin keima deihna hi kei henla, nangma deihna bang hi zaw ta hen. Hih gimna a thauk dingin leitungah kong pai hi” (John 12:27). A nuntakna pia dingin a hong pai ahi hi.

Tu kaal sung i sin ding thuin Khrih hong sihna le tawntung nunna ahong kamciam thute i sin ding hi.

 

 

SUNDAY                        October 30

Leitung Piakcil A Kipan

 

Mang. 13:8, Sawl. 2:23, le 1 Peter 1:19, 20 sim in. Koi bangin Khristian khat in Khrih in leitung piancil a kipan thahna thuak hi, kici thei hiam?

___________________________________________________________

“Tua ahih manin a kigo Tuuno laibu sungah a nungta ding mite’ min, leitung pianma pekin a kikhumna-ah a kihel lo leitung mi khempeuh in tua ganhing bia ding uh hi” (Mang. 13:8). Hih in a thupi mahmah thu – leipiancilma-in thahna hong thuak” cih thu hi.” Hih in limciinna kammal tawh hong hilh ahihna i theithei hi. ( Mangmuhna Bu sungah limciinna tamipi kimu thei hi. Bang hang hiam cihleh Khrih in leitung kipiansak khit kum tulnih mateng Khrih in thahna a hong thuak nai kei hi. Lei piancila thahna thuak cih thu in bang hog hilh nuam hi ding hiam? Hih thu-ah Jesuh – Pasian Tuuno in sihna ahong thuakna hi. Titus 1:2 sim in. Hih in hotkhiatna kisep nading bang tan hunsawt hi ding hiam?

___________________________________________________________

“Mawhna hong om ciang, Adam le Eve in mawhna sung hong tun uh ciangin hotkhiatna thu kigeeltuam hi lo hi. . .Hotkhiat ding geelna in Pasian tokhom panin hong kipan ahi hi.”Ellen G. White, The Desire of Ages, p. 22. Hotkhiatna geelna thu Amasa-in Adam le Eve tungah kilang hi (Pian. 3:15, 21). Hih hotkhiatna in ganhing tawh biakpiakna in pulaak hi. Thukhun Lui sungah ganhing tawh biakpiakna thu tampi kigen hi. Gehtehna[1]in Abraham upna sittelna a thuak laitakin Pasian Isaac sih ding tangin tuutal kipia hi (Pian. 22:11–13). Isaac sih tangin a si tuuno in Khrih in mawhneite adingin singlamteh tungah kithahna athuak ding limcinkhol hi. Tua hi-in hotkhiatna thu-ah mawhneite adingin Jesuh in a nuntakna hong pia ding ahihna, kum tul tampi sung ganhing biaknate in hong hilh kholkhol hi. Tua bangin ganhing tawh biakpiakna khat ciat in singlamteh gunga Khrih hong sihna limcingkhol hi; Pasian Tuuno in leitung mawhna a puakhia hi” (John 1:29). Ganhing tawh biakpiakna in mulkim huaihuai mahma hi; sisan naisan tawh kidimin biakpiakna hi. Bang hangin tua bangin biakpiakna kisam hi ding hiam?Eite munah Khrih mahmah in hong thuak ahihna hong hilh hi; mawhna thaman in bangzahin lian hi, cih hong hilhna hi.

 

MONDAY                            October 31

Singlamteh Hong Hilh Thu Masate

 

Nungzuite in Jesuh in Ama thuak ding gimna le sihna thu Nungzuite in bangci ngaihsut uh hiam? Amaute in Lai Siangtho hong hilhkholhna thute a thei khial uh hi lo hiam? Matt.16:21–23

___________________________________________________________

Matt. 17:22, 23; Mark 9:30–32; Luke 9:44, 45

___________________________________________________________

Luke18:31–34 ___________________________________________________________

Jesuh in sihna thuak dingin mihingin hong piang hi. Amah in a si dingin hong nungta hi. Ama nuntak kalsuanna khempeuh, a kalsuanna khat khit khat in Singlamteh tungah a hong sih nading tawh kinai semsem hi. A nasep ding theikhol sinsenin Amah in tua sih ding tawh kipelh thei ding lampi a zong peuhmah kei hi; mawhneite a adingin anuntakna a hon gpiak ding a dal thei thu le la khempeuh a hemkhia hi. A takin “Ama nuntakna khempeuh in singlamteh tunga a hong sih ding a kigingkhol khol ahi hi.” Ellen G. White, Fundamentals of Christian Education, p. 382. A nuntakna masa lamah Jesuh in a Nungzuite tungah a thuak ding sihna thu a hilhkholhna tampi kimu thei hi. Ahi zongin a Nungzuite in Jesuh pulaak thute a theithei zo kei uh hi. Messiah nasep ding theihkhialhna tawh kidim uha, a nunung penah Jesuh in Messiah ahihna a pulaak hi. Amaute thu telkhialhna in Messiah in tua bangin gimna le sihna a thuak ding kisam lo hi, ci-in a ngaihsun uh hi. Jesuh in Nicodemus tungah a pulaak thu in “Moses in gamlak gullia khai bangin Mihing Tapa in zong khailupna a thuak ding hi. Amah a um mi khempeuh in kisia lo-in tawntung nunna a ngah ding uh hi” (John 3:14, 15). Caesarea Philippi-ah a om sungin Jesuh in a Nungzuite tungah “ Amah in Jerusalem ah pai-in siampi, biakna makaite khut sungah gimna tampi thuak dinga sihna thuakin nit hum khit ciangin nungta kik ding ahihna thu a hilh khol hi (Matt. 16:21) Amah guak in Galilee nawkin kantanin a om ciangin (Mark 9:30–32) le Jerusalem ah a nung bel a pai-na ah (Luke 18:31–34), Jesuh in a Nungzuite tungah a sihna ding le sihna pan a thawhkikna thute a pulaak khol hi;Jesuh gen thute in amaute zaknop thute hi lo ahih manin a thugen a ngai nuam kei uh hi.

Eite zong tua bangmah hi lo i hiam? Pasian teltuam mite in Messiah hong pai-na tawh kisai lamet khialhna nei uh hi. Tua bangin a lametkhialhna uh bang thute hiam? Nihvei-na ahong pai ding tawh kisai-in zong mi tampi in bangci bangin lamet khialhna tawh kidim hiam?

 

TUESDAY                             November 1

“Kizo Zo Hi”

 

John 19:1–30 sim in. Jesuh in “Kizo zo hi” ci-in a thulaak ciangin bang thute hong hilh hiam?

 __________________________________________________________

A tawpna-ah Jesuh in a thupi mahmah mihing khempeuhte le vankhuanuai khempeuh adingin sihna a hong thuak ding hun hong tung hi. Gimna lianpi thuakin khuamial vangliatna a do hi. Jesuh in damdamin Gethsemane huan lam zuanin kalsuanin thuman lo takin thusitna thuakin Kalvary mual tungah kahto hi. Vantungmi gilote kimkhat in Jesuh do-in zawh ding a hanciam uh hi. Jesuh in singlamteh tungah kithahna a thuak laitakin siampi liante, lai theite, biakna makaite in zahpihin “Amah in midangte honkhia thei hi napi Amah le amah a kihonkhia zo kei hi,” a ci uh hi. Amah in Israel Kumpi taktak ahihleh, tu-in hong tuaksukin Amah le amah hong kihonkhia hen. Tua hi leh Amah ka um ding uh hi” ci-in Jesuh zahpihin kampau uh hi.” (Matt. 27:42). Khrih in singlamteh tung panin kumsukin Amah le amah kihonkhia nuam hi leh kihonkhia thei lua hi. Amah le amah kihonkhia thei dingin Amah in vangliatna khempeuh tawh a kidim hi. Amah a zahpih mite a kipan mi khempeuh a hong itna in ciangtan nei lo itna hi. A taktak in “Jesuh a zahpihte ahonkhia dingin Jesuh hongsi ahi hi. Singlamteh tung pan hong kumsukin Amah le amah kihonkhia thei lua hi. Bang hang hiam cihleh singlamteh tungah Jesuh a kilh in siktukilhte hi lo hi. Ahi zongin Amah in mihingte a hong tatkhiat nopna hang hi zaw hi.” Alfred Plummer, An Exegetical Commentary on the Gospel According to Smalay. Matthew (London: Elliot Stock, 1910), p. 397. Hih munah Khrih thuak sihna in Satan vangliatna tungah zawhna a ngahna ahi hi. Satan makaihna tawh singlamtehah sihna thuak hi mah taleh, Judah lehheekna tawh a si hi mah tale Khrih in tuate tungah zawhna a ngahna hi, ci-in i thei hi (John 6:70; John 13:2, 27). “Pasian thuhilh kimkhat in Jesuh sihna in Satan gamtatna hangin sihna thuak hi, ci-in a hilh loh hangin, Ama sihna in Satan tungah zawhna hi, cih kimu thei hi.” George E. Ladd, A Theology of the New Testament, rev. ed. (Cambridge, UK: Lutterworth Press, 1994), p. 192. Singlamteh tung panin “Kizo zo hi”cihna aw ging in (John 19:30), Khrih in hih leitungah zawhna bek hi lo-in vankhuanuai-adingin Satan le a pawlte tungah zawhna hi, ci-in a pulaak ahi hi. Gimna sihna a bei ding hita a, vankhua-nuai-a Satan le Khrih kido-na a bei ding hi ta hi, cih pulaak hi. “Vantung khempeuh in Honpa zawhna hangin kipaak uh hi. Satan in a guallel hong suak hi. Ama ukna bei ding ahihlam zong a thei hi.”Ellen G. White, The Desire of Ages, p. 758. Hih a lamdang mahmah thu i tel zo kei hi. Pasian Tapa in hong kiniamkhiatin Satan in eite ading le vankhuanuai khempeuh tungah a lian mamah zawhna a ngah hi. Mawhna a sian nading Khrih in sihna a hong thuakna thu in mawhna in bangzahin lauhuai hiam cih thu ngaihsun in.

Hih thu in gamtatna phate Pasian mai-ah midik khatin om dinng hanciamna in a mawkna ahihlam hong hilh hi lo hiam? A tawpkhakna-ah Khrih in a nuntakna hong piakna hangin Ama tungah bang i sem thei hiam? Na lawmte tawh kikum in.

 

WESNESDAY               November 2

Mah In Eite Adingin Hong Si Hi

 

John 3:14–18 le Romans 6:23 sim in. Hihte in Khrih sihna in eite adingin bang zawhna piangsak hi, ci-in hong hilh hiam?

___________________________________________________________

Jesuh in kituiphum dingin Jordan Gunah hong tun ciangin, John in “ En un, leitung mawhna a puakhia Pasian Tuuno ci-in a tangko hi “ (John 1:29). Hih thu puak in Khrih in Pasian Tuuno , kamsangte genkholhnate le ganhing tawh biakpiaknate limcinnate tangtung ahihna a pulaak hi. Ahi zongin ganhing biakpiakna kia bek in mawhna maisak thei lo hi (Heb. 10:4). Tuate in Khrih sihna tungah kinga-in mawhmai-na a ngen mi tungah mawhmaisak thei ahihlam i thei hi. “I mawhnate kisikin thuum lehang, Amah in thuman citak ahih manin i mawhnate a hong maisakin kihhuai nate sung panin a hong siangthosak hi (1 John 1:9). John 3:16, 17 sim in. Mawhna khialhna lianpi hangin thukhenna thuak dingin na om laitakin lametna lianpi bang hong hilh hiam?

 ___________________________________________________________

Hih thu in bang hong hilh hi ding hiam, ngaihsun in. Van khuanuai khempeuh a bawl Jesuh in Amah le amah hong kipia-in mawhna hangin sihna hong thuak hi. I mawhna khempeuh adingin sihna hong thuak ahih manin eite in mawhna thukhenna tawh a kipelh thei ihi hi. Hih in a lian mahmah lungdamna kamciam hi lo ahi hiam? Jesuh Khrih in a pulaakna-ah “Pasian in a Tapa khat bek a neihsun a hong piak dongin leitung mite a hong itna lian mahmah a hong lak hi. (John 3:16). Tua hi-in eite aitangin Amah le Amah hong kipiatawm ahihna i phawk tawntung ding kisam hi (Heb. 9:14). Martin Luther in singlamteh a pulaakna-ah:”meihalna tau tungah kihalna a thuak Khrih in a sung panin ciangtan nei lo itna meikuang in kangtumin Pa Pasian mai-ah a nungta, a siangtho-in Ama pumpi le sisan tawh a namtui meihal biakpiakna, mawhthuumsakna, kahna awging, lunggimna meikhu, dahna khituite a kahto hi (Heb. 5:7).”—Luther’s Works, vol. 13 (St. Louis, MO: Concordia Publishing House, 1956), p. 319. Khrih in khat vei a hong sihna in mi khempeuh adingin akicing sihna hi (Heb. 10:10; 10:12). Bang hang hiam cihleh Ama sihna in mi khempeuh adingin kicing hi; mawhmaisakna Ama vangliatna in kicing hi. Tua bangah: “Leitung mi khat beekbeekin hehpihna hanga hotkhiatna sang ding uh hileh zong Khrih in a thuak gimna, maizumna, kiniamkhiat taak cing a sa hi.”Ellen G. White, The Ministry of Healing, p. 135. John 3:16 sim in.

Leitung le a um mi khempeuh cihna munah nangma min koih in. Koi bangin i nuntakna-ah mawhna in hong zia[1]et ciangin hih a lamdang kamciam pom ding na hiam?

 

THURSDAY                     November 3

Singlamteh Thupuak

 

1 Kor. 1:18–24 sim in. Paul in singlamteh thu bang pulaak hiam? Koi bangin Paul in leitung pilna tawh tehkakna nei hiam? Bang hangin tuni tuhunin “leitung nopsakna in” leitung pilna le nuntak khuasakna huzaap ahih manin singlamteh thupuak in thupi hiam?

___________________________________________________________

Khrih singlamteh in hotkhiatna thu-ah a thu bulpi lian bel ahi hi. “Kalvary panin a hong kilang itna thuk cikmah hunin mihing in a tel zo ngei kei ding hi. Tua singlamteh in Khrih hong itna a hong hilh hi. Singlamteh in Satan angsung huaihamna a langdo hi.” Stephen N. Haskell, The Cross and Its Shadow (South Lancaster, MA: Bible Training School, 1914), p. v. Khrih in a Amah mah hong kiniamkhiatin minamte mawhna hangin sihna a hong thuak hi. Satan kimkot in angsung huaihamna le gimna tawh akidim hi. Amah in tawntung sihna tungah zawhna a ngah hi. Amah a um mi khempeuh in kisia lo-in a nungta tawntung ding uh hi; mihing hanciamna in tawntung nunna sung a hong tunpih thei kei hi. Singlamteh tawh kisai-in i phawk ding thupi kimkhat a om hi. Amasa-in Singlamteh in mawhna thukhenna-ah Pasian thutanna ahong hilh hi (Rom. 3:21–26). Nihna-ah, Singlamteh in mawhnei mite tungah Pasian hong itna hong hilh lian penpen hi (Rom. 5:8). Thumna-ah singlamteh in mawhna koltanna panin suahtak nading zawhna phungpi hi (Rom. 6:22, 23; 1 Kor. 1:17–24). Lina-ah singlamteh in tawntung nunna i ngah nading lametna khat bek hi (Phil. 3:9–11; John 3:14–16; 1 John 5:11, 12). Nga-na, singlamteh in mai lam hunah vankhuanuai-ah Pasian langpanna om nawn loh nading ahong dal lampi khat bek hi (Mang. 7:13–17, Mang. 22:3). Hih thute leitung pilna in a thei zo kei hi. Tua hi-in a langkhatah tu-in singlamteh thu gengenna in leitung mite muhna-ah hai-na thu a suak hi. Leitung in Piangsakpa om hi, cih a thei thei kei hi. Tua hi[1]in leitung pilna in singlamteh thu a mukhia zo kei hi (Rom. 1:18–20). Greek tawh kigelhna-ah “hai-na” cih kammal in Manglai “Moron” (a khiatna in lungsim tha neem cihna hi) cih kammal tawh kizopna nei hi.” Singlamteh thu in leitung pilna mai-ah hai-na thu hi. Leitung pilna in Jesuh a theithei kei hi; Singlamteh tungah a hong sihna in mawhnei mite suahtak nading thu ahilhna leitung pilna in a um thei kei uh hi.

Leitung pilna in manpha a sak thute, leitung pilna hong piak theih thute, bang hangin Jesuh upna in leitung piak theih pilnate in hai-na thu kici thei hi ding hiam? (1 Kor. 1:21).

 

FRIDAY                            November 4

Ngaihsutbeh Ding: Ellen G. White, “Gethsemane,” pp. 685–697; “Calvary,” pp. 741–758, in The Desire of Ages; “Repentance,” p. 27, in Steps to Christ. “Vantung khempeuh in eite a hong kihotkhiatna thu a thei nuam mahmah uh hi, cih ka mu hi. Eite zong tua bang ding mah hi lo i hiam? Hotkhiatna ahih keileh mangthanna thu kin lo-in om ding i hiam? A hong kihotkhiat nadingin Topa hong sihna thu neuseh theih ding hi lo hi. Mi kimkhat in tua bangin hotkhiatna thu kin lo uh hi. Amaute in hehpihna thu nial uh hi. Pasian in tua bang mite tungah maipha a pia kei hi. Pasian Kha Siangtho dahsak tawntung ding hi lo hi. Kha Siangtho dahsak khakleh Amah in a hong taisan ding hi. Pasian in a hong hotkhiat nadingin na khempeuh a sem khin hi. Amaute in Khrih hong hehpihna a awlmawh kei uh leh amauti tungah sihna hong tung ding hi. Singlamteh tunga Khrih thuakna nial uh ahih manun tawntung nunna sung a tung thei kei ding uh hi. Tawntung nunna le sih theih loh nunna gamh a luah theihna uh phawkin i nuntak ding kisam hi. Mawhneite a hong kihotkhiat nadingin alian mahmah a hong kipiakna thu in mihing manphatna a hong hilh hi. Mihing in tawntung minthanna tawh a nungta ding hi.” Ellen G. White, Testimonies for the Church, vol. 1, p. 124.

 

KIKUP DING DOTNATE:

 

1. Hebrews 10:4 sungah “ganhing sisan in mawhmai sak thei lo hi. Tua ahihleh Thukhun Lui a mite adingin hotkhiatna lampi in koi bang hi ding hiam? Koi bangin “credit card” (leibat theihna tawh vanlei-na) in Thukhun Lui-a hotkhiatna thu hong theitel sak hiam?

2. 2 Kor. 5:18–21 sim in. Khrih hong sihn ain leitung mi khempeuh adingin sihna ahiheh bang hangin mi khempeuh in hotkhiatna ngah lo ding hiam? Bang hangin mimal khensatna in hotkhiatna thu-ah thupi hiam? Kuate in kisiat tawntungna thuak ding a, kuate in singlamgteh hangin hotkhiatna a ngah thei ding uh hiam?

3. Leitung pilna bang thute in Pasian mai-ah hai-na thu suak hiam? Leitung nate in Pasian geelsa bangin a piang hi-in ama thuthu-a hong piang hi lo hi, cih thu koi bangin na sang hiam? eation? Ahih keileh leitung in bang mah a om lo panin hong piang hi, cih thute leitung pilna in bangci bangin a pom hiam? A dangdang pulaak ding a om hiam?

4.Tuesday ni-a thusinna-a dotna ngaihsun in. Singlamteh hangin hotkhiatna kingah hi-a, mihingte hanciamna in hotkhiatna hong ngah sak thei lo ahihna, tua bangin gamtatna pha tawh hotkhiatna kingah hi, cih upna in a mawkna le a man lo upna ahihna thu, hih thu in Pasian hong hotkhiatna tawh kituak lo ahihlam koi bangin na mu thei hiam?