LESSON 3 | OCTOBER 8–14 Mihing nunzia theihtelna

 

LESSON 3     OCTOBER 8–14

MIHING NUNZIA THEIHTELNA

 

Sabbath Nitak

Tu Kaal Sung Sim Ding: Pian. 1:24–27; Pian. 2:7, 19; Matt. 10:28; Thuhilhsia 12:1–7; 1 Kum. 2:10; 1 Kum. 22:40.

KAMNGAH: “Topa Pasian in leilak pana leivui tawh mihing bawl a, a nak sungah nuntakna hu sang suk hi. Tua mi pen leitung nuntakna a nei mihing hong suak pah hi” (Pian.2:7).

‘Note in na si ding uh hi” (Pian. 2:16, 17); Satan zuau kamciam in, “Note in na si takpi kei ding uh hi.”( Pian. 3:4) cih thu piak in Eden Huan tawh a bei hi pahlo hi. Tua thupiak in tudongin a gingginglai hi. Mi tampi in Pasian kammal le Satan pulaak thute kithu khat hi, ci-in ngaihsun uh hi. Tua bang mite adingin vau thuhilhna khat in “Nang in a si ding hi” cih thu in pumpi taksa kisiatna bek hi, ci-in ngaihsun uh hi. Tua thupiak tawh kizomin kamciam khat in: ‘Note in na si takpi kei ding uh hi,” cih thu in mihing a sih hangin a si thei lo nunna khat om hi cih upna hong guan hi. Ahi zongin hih bang ngaisutna in man lo hi. Gentehna-in Pasian kammal le Satan kammal in kithuhual thei ding hiam? Mihing nuntakna a sih khit ciangin a si thei lo nunna om lai hiam? Hih bang dotnate ngaihsutna le leitung pilna tuamtuamte tungtawnin dawnkik dingin a hanciam mi om hi. Ahi zongin Lai Siangtho siksan Khristian thu upna-ah Vanglian Pasian bek in mihingte a hong piangsak in kicinna tawh hong Piangsakpa hi, ci-in i thei hi (Late 139). Tua hi-in Ama kammal hong hilh thu in den a i pulaak dotnate hong theitelsak thei hi.

Tu kaal sung i kikup ding thu in koi bangin Thukhun Lui in mihing nunzia bang gen a, nuntakna bei ciangin bang thu om hiam, cih thute i pulaak ding hi.

 

SUNDAY                        October 9

“A Nungta Mihing”

 

Pian. 1:24–27 le Pian.2:7, 19. Mihing hong kipiansakzia le ganhingte kipiansakzia -ah bang thute in kibang lo-in bang thute in kibatna nei uh hiam? Pian. 2:7 in mihing hong kipiansakna thu bang pulaak hiam?

 ___________________________________________________________

Piancilna hong hilh thu in ni guk sungin Pasian in na khempeuh a piangsak hi (Pian. 1:24–27), Pasian in minu le mipa banah ganhingte zong hong piangsak hi.Amah in “ganhingte le huih laka om vasate leivui tawh a bawl hi, ci hi ( Pian.. 2:19). Pasian in leivui tawh mihing a hong bawl hi (Pian. 2:7). Ganhing le mihingte leivui tawh a hong kipiangsak hi. Ahi zongiin mihing a hong kipiansakna-ah ganhing kipiansakna tawh kibatlohna thu nih kimu thei hi. Amasa-in Pasian in leivui tawh milim khat bawl hi; tua ciangin tua milim sungah Pasian in nuntakna huu a piak ciangin milim in mihing hong suak hi” (Pian. 2:7). Milim in nuntakna nei mihing hong suak hi. Nihna-ah Pasian in Ama lim le meel suunin mipa le minu hong bawl hi (Pian. 1:26, 27). Pian. 2:7 in “Nunna huu” tawh kisai a hong hilhna-ah nuntakna nei lo milim sungah tua nuna huu a mopsuk ciangin Adam a hong piang hi. Hebrew tawh kigelhna-ah “Nephesh, chayyah” kammal tawh kigelh hi; a khiatna in nuntakna nei cihna hi. Cihnopna-ah pumpi om lo-in nuntakna om thei lo, nuntakna om lo-in pumpi guak nungta thei lo hi, cih hong hilh ahi hi. Tua hi-in mimal khat ciat in nuntakna i nei hi. Pumpi a khit hangin a si thei lo nunna, khuaphawk theihna khat omlai hi, cih thu in Lai Siangtho tawh kituak lo upna hi-in, pagan (milim biakna) panin hong pai upna ahi hi. Mihing nunna theihtelna in tua bang upna man lote- mihing a sih hangin si thei lo nunna khat om suak hi, cih upna man lo panin a hong dal thei ding hi. Pumpi kihel lo-in mihing in nuntakna a nei thei kei hi; khuaphawk theihna zong a nei nawn kei hi. Pasian in mihingte a hong bawlzia in lamdangtak le lauhuai takin mihingte a hong bawl hi. Lai Siangtho hong hilh loh thute upmawh thugenin neih khak loh ding thupi hi. Mihing nunzia in telzawh lohin lamdang hi; (leitung mi pilte,scientist, cihte in) mihing nunn a ngaihsut uh ciangin tel zolo-in lamdangsa uh hi. Ahi zongin tua sangin a lamdang zaw thu in khuaphawk theihna in lamdang zaw tham hi.

Koi bangin khauk sung sazangte le sivuite (cells le chemicals) in nasemin phawk theihna hong guan hiam? Mihing in ngaihsutna le khua phawk theihnate hong piang thei hiam, cih thu a lamdang thu khat hi; i theih loh thu ahihlam pulaak ding zong kisam hi. Nuntakna in a lamdang mahmah khat hi lo hiam? Bang hangin nuntakna hu nei theilai hi ding i hiam? Ahi zongin tawntung nunna in lamdangzaw tham hi lo hiam?

 

 

MONDAY                          October 10

“A Mawh Mi Bek Si Ding”

 

Ezekiel 18:4, 20 le Matthew 10:28 sim in. Koi bangin hihte in mihing nunna theitel thei dingin a hong huh thei hiam?

______________________________________________________

Mihing nuntak hun sung sawt het lo hi; mitphiat kaalin a bei mang thei nunna hi (Isa. 40:1–8). Mawhna tawh kisawh kha lo khempeuh tawntungin a kimang suak ding ahi hi. “Mi khat hangin leitungah mawhna hong om a, tua mawhna hangin sihna hong piang hi. Mi khempeuh mawh uh ahih manin tu-a bangzia-in mi khempeuh tungah sihna hong tung hi” (Rom. 5:12). Sihna i cih in mawhna thaman ahi hi. Sihna in nuntakna nei khempeuh a sukha hi. Hih thu tawh kisai-in a thupi thu nih kimu thei hi. Mihing le ganhing nuntakna in a a si thei nunna hi. Solomon kumpipa pulaak bangin, “A tawpna[1]ah ci lehang, mihingte le ganhingte in a tuah ding uh kibang a, ganhing mah bangin mihing zong a si ahi hi. Mihing le ganhing in a kibangin nuntakna hu nei a, mihing le ganhing nuntakna a kimanna bangmah om lo ahih manin, mihing pen ganhing sangin a hoihzawkna bangmah om tuan lo hi. A nih tuakun mun khatah tung khawm ding uh a, leivui panin a piang uh ahih mah bangin leivui mah suakkik ding uh hi” ci hi thuhilhkikna 3:19, 20). Thunihna-ah pum taksa sihna hi; nuntanna nei nawn lo cihna hi. Hebrew tawh kigelhna-ah “nephesh” kammal kizang hi.Pian. 2:16, 17 sunga kigelh bangin Pasian in Adam le Eve tung vauhilhkholhna thu gen khin zo hi. Sia le pha theihna singgah a nek nini-un sihna thuak ding cih thu hi. Hih hilhkholhna zui-in Topa in Ezekiel 18:4, 20 hih bangin pulaakkik hi: “‘A pate in leenggah thuk ne a, a tate’ ha kim,’ cihna pen bang a cihnopna ahi hiam? “A si ding pa pen a mawh mipa ahi hi. Ta in pa’ mawhna thuak lo ding a, tua mah bangin pa in ta’ mawhna thuak lo ding hi. Mihoih pa in a hoihna thaman ngah ding a, migilo pa in a gitlohna thaman thuak ding hi.” Hih thu in thunih a pulaak hi. Mi khempeuh in mawhnei mi hi; a kipelh thei lo teekna le gimna, sihna i mai-ah a om hi (Rom. 3:9–18, 23). Nihna[1]ah nuntakna si thei ahihlam hong phawksak hi. I sih ciangin mihing in bangmah khuaphawk theihna nei nawn lo hi. Lai Siangtho hong hilhna tawh kilangdo-in mi kimkhat in mihing in a si thei lo nunna nei hi; mihing a sih ciangin hell sung ahih keileh gawtthuakna mun vatung photin tua munah gimna lianpi a thuak khit ciangin tawntung nunna sung a lut thei pan hi, ci-in ngaihsun uh hi. Khrih sungah a si mite hong thokik ding uh hi. Jesuh gen bangin Amah in nuntakna an hi. Tua ahih manin Tapa mu-in a um mi khempeuh in nuntak tawntungna ngahin, nitawp ni ciangin ka hinsak ding, ka Pa in hong deih ahi hi,” a ci hi (John 6:40).

Bang hangin Khrih Nihveina hong pai kik takpi ding hiam? Khrih hong pai kik lo ding hileh mihingin ahong nuntakna in khiatna nei lo ding hi; tua bangmahin mihingin hong pai-na om lo hileh Nihvei-na a hong pai ding thu in kimanna nei lo ding hi. Amah hong pai kik ding hi, cih lametna om lo hileh bang lametna nei i hiam?

 

TUESDAY                      October 11

“Nuntakna Pasianah Kilehkik”

 

Pian. 2:7 le Thuhilhsia 12:1–7 sim in. Hih mun nihte sungah a kibang lo bang thu na mu hiam? Koi bangin hih thute in mihing in a si thei ihihlam hong thei pha zaw semsemsak hiam?  Pian. 7:22.

 __________________________________________________________

I pulaaksa om bangin Lai Siangtho-in mihing in nuntakna nei hi-in (Pian. 2:7), pumpi a sih ciangin tua nuntakna zong a bei hipah hi, ci hi (Ezek. 18:4, 20). Ahi zongin “ kha” (spirit) in bang suak hi ding hiam? Pumpi a sih ciangin khuaphawkna omlai hiam?Khristian tampi in tua bangin um uh hi. Thuhilhkikna 12:7 siksanin tua bangin um uh hi. “Pumpi, lei suakkik ding a, i nuntakna a hong pia Pasian’ kiangah i kha ciahkik ta ding hi.”Hih in pumpi a sih ciangin khuaphawk theihna khat Pasian tawh omkhawm hi, ci-in hong hilh lo hi. Thsia. 12:1–7 naupan hun panin uham hun dongah a kikhel toto ihihna hong hilhna bek hi-in, mihingin i suah akipan a tawpna-ah i tuahkhak ding sihna thu hong hilh hi. Aneu 7 pulaak thu in Pian. 2:7 tawh kilehbulh ahihna hong hilh hi. I pulaaksa bangin ni guk ni-in Topa in leivui tawh milim khat bawlin tua milim nakah nunna huu muam suk khit ciangin mihing a hong piang hi (Pian.2:7). Ahi zongin tu-in Thna. 12:7 in tua nunna huu in lei-ah ciahkik ahihna thu hong hilh hi. Tua hi-in Pasian in Adam sungah nuntakna huu hong guanin tua nunna huu in nuntakna nei ganhing khempeuh tungah zong a pia nunna hi. Pumpi a sih ciangin tua nunna huu a bei hi, ci i thei hi. Thna. 12:7 in midik le mimawh bangmah khentuamna nei lo hi. Pumpi a sih khit ciangin khua phawk theihna a om lai hileh mawhnate in Pasian tawh a omkhawm hi ding hiam? Tua bang thuhilhnate in Lai Siangtho tawh kituak lo hi. Bang hang hiam cihleh sihna-ah mihing sihna le ganhing sihna-ah kilamdanna bangmah om lo hi (Thna. 3:19, 20), sihna in nuntakna huu bei-na hi. David pulaak bangin, “Na maitang na seel ciangin amaute khasia uh hi. Amau’ husanna na lakkhiat ciangin amaute si-in amau’ pianna leivui-ah a ciahkik uh hi” (Late 104:29).

Nuntakna-ah sihna zong a kihel thu khat hi. Bang hangin hih bang ngaihsutna in khial hi ding hiam?Nuntakna lang khatah sihna hi. Suksiatna a thuak ding i gal nunung pen in “A tawpna-ah suksiat ding a gal nunung pen in sihna ahi hi” (1 Kor. 15:26)

 

 

WEDNESDAY                                    October 12

“Misi In Khua Phawk Theihna Bangmah Nei Lo Hi”

 

Job 3:11–13; Late 115:17; 146:4; le Thuhilhsia 9:5, 10 sim in. Hih thute in sihna tawh kisai bang hong hilh hiam?

 ___________________________________________________________

Lai Siangtho hilhcianna laibu kimkhat in hih Job 3:11–13; Late 115:17; Late 146:4; Thuhilhsia 9:5, 10 in lakam tawh kigelh hi-in, mihing sih cianga thupiangte a pulaak hi lo hi, ci uh hi.Khat veivei ciangin lakam kammalte in theihhamsa hi; a pulaak thute zong kician sinsen lo thei hi. Ahi zongin den a i pulaak Lai Siangtho munte in ahihleh tua bangin tel zawh loh thu le kician lo thute hi lo hi. A pulaak uh thute in kitel kician hi. Tua thute in Thukhun Lui khempeuh tawh zong kilangdo-na bang mah nei lo hi. Amasa-in Job 3 in upna pate suahna le a gim thuakna thute a hong hilh hi (Tua bangin gim thuakna-ah mihingin a piangkha lo hileng cih ngaihsutna hong lut thei hi.) A suahtungin a sipah hileh bangmah phawkna nei lo-in leisungah a tawlnga hi ding hi (Job 3:11, 13), ci-in a pulaak hi. Late 115 in a site omna mun in gamdai hi; bang hang hiam cihleh a site in Topa min phat nawn lo uh hi (Late 115:17). A site in a sih khit uh hangin Topa tungah a thuman thutak bangin kipulaak a, vantungah Pasian min phat bangin akipulaak hi. Late 146 siksanin i pulaak thu in ngaihsutna le khuaphawk theihna khempeuh in i sih hun ciangin a bei suak hi: “Ama nuntakna paikhia-in lei-ah a ciahkik hi. Tua ni mahin a ngaihsutna khempeuh a beimang hi (Late 146:4). Sih ciangin a piang thute kician takin Lai Siangtho in hong hilh hi. Thuhilhsia 9 sungah “A site in bang mah khuaphawk theihna nei nawn lo uh hi,” ci hi. Hansungah amaute in bang mah a sem thei nawn kei uh hi. Hankhuk sungah “nasep bang mah om lo hi; tua munah theihna cihte beimang hi” (Than. 9:5, 10). Hih thute in Lai Siangtho hong hilh a site in khuaphawkna bangmah nei nawnlo ahihna uh hong hilh phapah hi. A site in khuaphawkna bangmah nei nawn lo hi, ci-in a hong hilh thu lamdangsak ding hi lo hi Amasa belin hotkhiatna ngah nai lo a si mite in tawlkhat hun sung gimthuakna nei lo ahihna thu i tel ding kisam hi. Nihna-ah Khrih sungah a site in a lamdang thaman a ngah ding uh hi. Thu-um mite in, “Sihna in lamet bei-na hi lo ahihlam lamdangsak ding hi lo hi. . .... Khristiante adingin sihna in tawm vei sung ihmuhna hi; tawm vei sung gamdaihna le khuamialna hi. Pasian sungah Khrih tawh nuntak selna hi-in, nuntakna hong pia Khrih a hong paikik hun ciangin Ama sunga a site in vangliatna tawh a hong thokik ding uh hi.” John 8:51, 52; Kol. 3:4.”—Ellen G. White, The Desire of Ages, p. 787. Khrih sungah sihna thu ngaihsun in. Khrih sungah a site in kum tampi kum 1500 ahih keileh tawm vei sung kha nga sung hi phialta leh, hun sawt tan in bangmah kilamdanna nei lo hi.

Bang tan sawt khin hi phial taleh amaute in Khrih hong pai ciangin a thawhkik hun uh kibang kim ding hi; mi kim khat in a nungta laite sangin Khrih sungah a site in mi hampha zaw hi lo hiam? ci uh hi.

 

 

THURSDAY                                     October 13

Pupate Tawh Tawlnga

 

Pian. 25:8, 2 Samuel 7:12, 1 Kum.2:10, and 1 Kum. 22:40. Hihte in sihna tawh kisai bang thu hong hilh uh hiam?

___________________________________________________________

Thukhun Lui in sihna thu le sih khit misi vui-na tawh kisai a tuamtuam a pulaak om hi. Tua bangin sihna a thuak mi khat a omleh a kim a paam panin a mipihte in tutpih kahpih uh hi. Gentehna-in Abraham in akhancingin, a teek khit nungah a nuntakna a bei hi; “Abraham, kum za le kum sawmsagih le nga a phak ciangin, 8a hu tawpna sang a, a teek, kum tampi a pha, a khanghamin si a, ama mite tawh kivui khawm hi” (Pian. 25:8). Aaron le Moses a sih ciangin a mipihte hong kikaikhawm uh hi (Thkna. 32:50). Kumpi hoih khat a sih ciangin hi taleh kumpi gilo khat a sih ciangin hi taleh amaute tunna mun in kibang hi, cih thu in sihna tawh kisai bang thu a hong hilh hiam? (2 Kum 24:6, 2Khang. 32:33).

___________________________________________________________

Sihna thu apulaakna a dang khat in a site in a pu apate tawh tawlnga khawm hi, ci-in kipulaak hi. Kumpi David a sih ciangin Lai Siangtho in “Amah in apu a pate tawh tawlngakhawmin, David khuapi-ah a kivui hi (1 Kum. 2:10), ci-in kipulaak hi. Pasian tungah a citak kumpite hi taleh a citak lo kumpite hi taleh a sih uh ciangin a tunna munuh kibang khin hi. A citak kumpi in Topa tung pan thaman a san hun hong tun mateng gimna tawlna panin amaute in tawlnga hithiat uh hi. Hih thute banah hih bangin gimna thuakin sihna a ngah masa mite ihi kei hi. I mai-ah mi tampi in gimna sihna a na thuak khin uh hi; amaute nung a zui ihi zaw hi.Amaute tawh kivuikhawmin khat guak bek a om ihi kei a, amaute mah tawh kibangin khuaphawkna bang mah nei lo-in thawhkikna ngakin a om ihi hi. Hih bang upna in tuhun mikimkhatte ngaihsutna sungah lut zo lo thei hi. Ahi zongin nidang hunlai-in hih bang upna in a lamdang hi lo hi.Khrih sungah a site in a si khin a it a ngaih mite tawh kinai takin a kivui khawm ahi hi. Bangzahin kinai phial taleh amaute in kihopih theihna kizopan bangmah a nei kei uh hi.Vangliatna tawh thawhkik hun a hong tun mateng amaute in khuaphawkna bangmah a nei kei uh hi. Misite in khuaphawk theihna nei uh hileh amau nunzia in bangci bang nunzia hi ding hiam, cih ngaihsun in. A sanggamte, ait a ngaih mite gimthuaknate mu uh hileh a nungta mite tungah sihna in ihmu bang hi, ci-in hehnepna in bang hong suak ding hiam?

 

 

FRIDAY                        October 14

Ngaihsutbeh Ding: Ellen G. White, “The First Great Deception,” pp. 531–550, in The Great Controversy. Dammawhna hangin ki-atna na nei ngei hiam? Tua bangin a ki-at dingte in khuaphawk loh nadingin anesthesia kipia masa phot hi. Tua bangin bangmah phawk lo-in na om bangin a si khinte in zong khuaphawkna bangmah nei lo uh hi. Anesthesia na kisut hangin na khuak in nasem thei veve lai hi. Na khuak in nasemlaipi mahin misite bangin bangmah khuaphawkna nei nawn lo-in asite tawh akibang na hi ding hi. Amaute tuahkhak sihnate in leitung bei mateng a om denden ding hi-a, sihna a thuak uh hangin a sawt lo-in a mitte uh kihongin Jesuh hong kumkik amu ding uh hi (Mang. 20:7–15). Tua hun a hong tun matengin a si mi khempeuh midik ahi-a, mi gilo ahi zongin khuaphawkna nei lo-in a ihmu cip ding uh hi. A nungta lai mite adingin sihna in hun sawtpi sung bang ding hi. A nungtalai mite adingin hun sawtpi abat hangin a si mite adingin mitphiat kal sung a bang ding hi. “A si masasa vantung va tungto-pahpah uh hi leh nuntakna sangin sih ding kilunggulh zaw ding hi. Mi tampi in sih ciangin vantung kitungpah hi, ci-in um uh hi. Lunggimna, buai-na, lungmanna tawh kidimin a om uh ciangin sih ding lunggulhin tawntung nopna sung a tungpah dingin kingaihsun uh hi.” Ellen G. White, The Great Controversy, p. 539. “Midik le mi gilote a sih ciangin thaman ngahpah uh hi, ci-in upna ding Lai Siangtho in hong hilh peuhmah lo hi. Kamsangte le upna pupite in zong tua bangin nopna a ngahpah kei uh hi;zong tua bangin thu a hong hilh hi. Khrih le Nungzuite in zong tua bang thu hilhna peuhmah a nei kei uh hi. Lai Siangtho hong hilhna-ah a site in thakhatin vantung va tung uh hi pah lo hi.Amaute in thawhkik hun hong tun dongin a ihmu uh hi.” pp. 549, 550.

 

KIKUP DING DOTNATE:

 

1. Koi bangin Lai Siangtho in mihing nunna hong hilh a, sih ciangin nuntakna buppi zong kisia ahihna hong hilh hiam? Tua thute in sihna tawh kisai theihtelna a hong guan hiam?

2. Mi tampi in mihing a sih hangin a si lo khuaphawk theihna khat omlai hic, um uh hi. Hih upna kizelh nadingin Satan in zong lampi tuamtuam tawh hong khem hi. Tua hi-in bang hangin Lai Siangtho hong hilh misite omzia in bang zahin thupi hiam? Bang hangin a si thei lo nunna khat mihing sungah om hi, cih upna Khristian sung nangawngah om thei hiam?

3. A si khinte kongzing lak khawng, mun khat peuhpeuh pan muh nate cihte koi bangin theitel thei ding i hiam? Bang in tua bang thute up ding panin hong dal thei ding hiam? I muh thute in muanhuai lo ahih manin a si khin i innkuanpihte ahi-a, sanggam u le nau khat peuh ahi zongin kongzing lampi ahi a, mun khat peuhpeuha i muhte in muanhuai hetlo ahihlam na phawk hiam?