LESSON 14 | December 24–30 Na Khempeuh Athak

LESSON 14         December 24–30

NA KHEMPEUH A THAK

         

Sabbath Nitak

 

Tu Kaal Sung Sim Ding: 2 Pet. 3:13; Mang. 21:3, 22; 1 John 3:2, 3; 1 Pet. 1:22; Isa. 25:8; Mang. 22:3–5.

 

KAMNGAH: “Tua ciangin tokhom tungah a tupa in, “Tu-in na khempeuh a thakin ka bawl hi,” ci hi. Tua ciangin, “Hih thute thumanin muantaak ahih manin lai-ah gelh in,” hong ci lai hi. (Mang. 21:5). 

 

Lai Siangtho in lametna hong guan hi: “Eite in Pasian’ hong ciamsa, thuman bekbek a kizat nading mun van thak le lei thak a ngak ihi hi (2 Pet. 3:13). Ahi zongin mi kimkhat adingin “leithak le vantung thak” a ngah luah ding uh hi’ (Mang.21:1) cih thu in nopna tawh kidim kamciam hi-in sihna pan thawhkikna vangliatna a um mite luah ding ahi hi. Hih thu tu-in up ding hamsa phial taleh ni khat ni ciangin thaman na ngah ni hong tung ding hi. Lai Siangtho hong hilh bangin aum mite in tua kamciam leithak le vanthak luah ding ahihna uh lenkip ding u hi. Atawpna-ah hih thu um lo-in a zahpih mite in tua lametna thupha a nial ding uh hi (2 Pet. 3:3–7). Tua bangin amaute zahpih ding uh hi, cih thu kigenkhol khin a, tua bangmahin tangtung takpi hi, cih kimu thei hi. Hih in Lai Siangtho in thuman thutak hi, cih hong hilh hi.

 

Tu kaal sung i sin ding thute in a hong tung din leithak le vanthak, vantung biakbuk Pasian omna sihna le khitui luangna khempeuh beisiang ding ahihna vanglian kamciam thute i kikum din g hi.

 

 

SUNDAY                                            December 25

Leitung thak leh Vantung thakte

 

Greek lungsim ngaihsutna a zui mi kimkhatte in muh theih nate in siatna hi, ci uh hi. Hih thu hangin vantung in a om takpi hi lo ding hi; lei thak le van thak cihte zong a takpi hi lo ding hi ci uh hi. Hih bang ngaihsutna-ah vantung gam in nopna taktak ahih dingleh leitung siatnate tawh kipelh ding hi; lungsim a ngaihsut zawh loh nopna hi ding hi. Vantung thak in ahong tung takpi ding hi lo hi ding hi, ci uh hi. Muhtheih lawntheih nate in Pasian thu tawh kituak thei lo hi. Hih tawh kibang lo thu khat in Lai Siangtho in vantung thak le leitung thak thu hong tung takpi ding ahihna hong hilh hi. Tua munah siatna, mawhna kimu nawn lo ding hi. Na khempeuh in hoihna tawh kidim ding hi.

Isaiah 65:17–25; Isaiah 66:22, 23; 2 Peter 3:13; Mang. 21:1–5 sim in. Hihte pulaak thu nunung bel in bang thu hiam?

Isaiah Bu sungah kigelh thu in Israelte in Topa tungah citak uh hileh

a ngah ding uh hamphatnate kipulaak hi; bangzahin a nuam leithakah a nungta thei ding uh ahihna hong hilh hi. (Isa. 65:17–25; Isa. 66:22, 23 le Thkna 28 enkak in). Piansak na khempeuh in Pasian geelna, mawhna om a, nopna tawh kidim leitang zuanin a khualzinna uh kipulaak hi. Tua lamet bang lo-in tua geelna tangtung lo hi. Tua hi-in geelna thak khat kipia kik a, tu-in pawlpi in tua nunna sung nungta dingin a kalsuan hi.Hih pawlpi in Gentile, Jew le minam deidan omlo-in a ut khempeuh kihel thei hi (Matt. 28:18–20, 1 Pet. 2:9). Tua hi-in Pawlpi kalsuanna siksanin, Isaiah genkholhnate a tangtung thei ding hong suak veve hi (2 Pet. 3:13, Mang. 21:1–5).

“Lai Siangtho sungah tatkhiatsate luah ding “leitang” ci-in kipulaak hi. Hebrews 11:14–16. Tua munah vantung Tuucingpa in a tuute nunna tuinakah a tonpih ding hi, kici hi. Nuntakna singkung in kha sialin gah nam khatta a gah khia ding hi, ci hi. Tua singteh in minamte adingin damna singteh hi ding hi. Tua munah luitui a luang tawntung ding hi. Kep tui bangin a siang mahmah tuigei-ah amaute om ding uh a, singtehte in Topa tatsa mite a muak bangin kihuang zialzial uh hi. Tua munah mual hoih mahmahte kimu ding a, zangkuam etlawm mahmah ding hi. Tua zangkuam lakah luitui luang sialsial ding a, singkung lopa in niim dimdiam ding uh hi. Pasian mite in hun sawtpi sung khualzinin a omna panun inn a tung u hi ta hi.” Ellen G. White, The Great Controversy, p. 675.

 

Leitung mi laigelh siam tampi in tawntung nunna lametna nei lo ahih manun nuntakna manneihna thei kha kei uh hi. Lametna nei mah taleh tua lametna in a man lo lametna hi-in, bang hangin lametna nei lo nunna in man nei lo nunna hi, ci-in kiciamteh hi. Na lawmte tawh kikum in.

         

 

MONDAY                            December 26

Pasian biakinn sungah

 

Mi kimkhatte ngaihsutna-ah vantung in Pasian biakinn hipah hi, ci

uh hi. Ahi zongin Mangmuhna Bu sungah Jerusalem Thak sungah a tuamin Pasian biakinn om ahihlam hong hilh hi. Tua munah Pasian vanglian tokhom om a, hoihna khempeuh tawh kidim hi (Mang. 4:2–6;7:9–15; 15:5–8). Tua munah minamkim panin mi siangtho honpi a om ding uh hi. Amaute in Pasian a bia tawntung ding uh hi (Mang. 7:9–17).

 

Mang. 7:9–15 le Mang 21:3, 22 enkak in. Koi bangin tua mi honpite kipulaak hiam? Koi bangin a kibang lo thu nihte in gawptuah thei ding i hiam?Amaute in suun le zan a tawntungin Topa biakinn sungah biakpiakna a nei uh hi (Mang. 7:15) kici napi, John in Jerusalem Thakah biakinn ka mu kei hi, ci- in a gen thu Mang. 21:22 gawmtuah ding i hiam?

 

Vantung biakbuk in a tawntungin Pasian biakna mun hi. Ahi zongin mawhna hong om a kipan tua biakinn in mawhneite tungah hotkhiatna hong kipiakna mun hong suak hi. “Mawhna bei ciangin vantung biakbuk in Pasian biakna mun hong suakkik ding hi. Mang. 21:22 sungah John in amuh thute pulaakna-ah biakbuk amuh nawn lohna thu a pulaak hi. Bang hang hiam cihleh Vanglian Topa in Tuuno tawh a omna mun hi. Hih bangin i gen ciangin tatkhiatsate hong pai-in Amah tawh a tuam vilvel biakpiakna mun om nawn lo hi, cihna hi lo hi.”Richard M. Davidson, “The Sanctuary: ‘To Behold the Beauty of the Lord,’” in Artur Stele, ed., The Word: Searching, Living, Teaching, vol. 1 (Silver Spring, MD: Biblical Research Institute, 2015), p. 31.

Mangmuhna Bu in misiangthote in a tuam vilvelin Topa biakna thu kipulaak hi. Hih vantung biakbuk in Pasian le Tuuno biakna mun a phualpi hi (Mang. 5:13; 7:10). Tatsat lo-in a tawntungin Khrih in eite biak lianbel ahi hi.Pasian a bia mite in “minamkim, paunamkim, leitung mun tuamtuam panin a kikaikhawm mite hi. Amaute in gimna lianpi a nawktan mite ahi uh hi; a puan silh uh Tuuno sisan tawh a sawpsiang uh hi” (Mang. 7:14). Amaute in a nungta Pasian tatkhiatna vanglian le a nunzia a khel vangliatna a pulaak uh hi. Amaute in Pasian min a phat den uh hi; Pasian in Pasian ahihna le amaute adingin a sepnate hangin tua mite in Pasian min a phat uh hi.Mang. 21:3 “ Tokhom panin nakpitakin awging khat ka za a, “Tu-in Pasian omna inn pen mite tawh omkhawm ta hi. Pasian in amaute ompih ding a, amaute pen ama mite hi ding uh hi. Pasian mahmah amaute tawh omkhawm ding a, amah pen amaute’ Pasian hi ding hi.”

 

Hih thu mah Lai Siangtho mun tampi-ah kimu thei hi (Jer. 32:38, Ezek. 37:27, Zech. 8:8, Heb. 8:10). Tu-in nang le kei adingin bang khiatna nei hiam? Pasian in eite Pasian hi-in, a mite hong huh Pa hi lo hiam? Koi bangin hih thu nuntakpih na hiam?

 

 

TUESDAY                                   December 27

Pasian Omna-Ah

 

Lai Siangtho hong hilhna-ah “Pasian in khuavak pha mahmah sungah om ahih manin kuamah in a kiang neh thei lo hi” (1 Tim. 6:16); kuamah in Pasian mu thei lo hi (John 1:18, 1 John 4:12). Hih bangin i gen ciangin mi siangthote in vantungah Pasian mu lo ding hi, cihna hi lo hi. Mawhna om khit ciangin mihing in Pasian mu thei nawn lo hi. Bang hang hiam cihleh Lai Siangtho mun tampi-ahmi siangthote in vantungah Pa Pasian amu ding uh hi, ci-in hong hilh hi.

 

Matthew 5:8; 1 John 3:2, 3; Mang. 22:3, 4 sim in. Hihte in Pasian muhna in hamphatna lianpi hi, ciih hong hilh hiam?

 

Sawltak John in “Kuamah in Pasian mu ngei lo hi, ci-in a pulaak hi (John 1:18, 1 John 4:12) Johnmah in

 

“Pasian tawh maitang i kimu dinghi,” ci- in pulaak hi.1John 3:2, 3 (Mang. 22:3, 4). Hih thu in Pa Pasian gen ahi hiam, ahih keileh Khrih gen hiam, cih thu khat le khat kinialna piangsak thei hiAhi zongin Khrih thuhilhna bangin “Lungsim siangtho anei mite in thuph angah ahi uhhi. Banghang hiam cihleh amauti in   Pasian amu ding uhhi ( Matt. 5:8).Tatsa mite in Pasian biakinn sungah Amah abiaktheih na uhin hamphatna lianpi hilo hiam? Alian mahmah hamphatna adang khatin Ama maitang muhna hi. “Pasian mite in Pa Pasian le Tapa tawh kizopna ngah uh a, hamphatna a ngah thei uh hi. ‘Tu-in kitelcian lo-in a kimu milmialin i mu hi 1 Kor. 13:12. Pasian lim le meel en gige hi lehang i nuntakna tungtawnin Pasian lim le mee hong kilang khia ding hi. Aliah a dal om lo-in Pa Pasian tawh maitang i kimu ding hi. Ama kiangah i om ding hi. Ama meel vangtang i mu ding hi.” Ellen G. White, The Great Controversy, pp. 676, 677.

Sianthona le Pasian muhna kizom ahihlam ngaihsun in. Lungsim siangthote in  Pasian a muding uhhi. Pasian  in siangtho  ahihman in Amah amu mi in amahmah a ki siansuah mi hi” (1 John 3:3). Vantung  gam alut thei dingin tu-in Pasian in i sungah bang na hong sem hiam?  Atawpna-ah vantung  nunna sung i lut theihna-in Jesuh hong sihna hang ahi hi. Tawntung inn nuam sung i nuntak theih nadingin tu-in I nuntakna ahong kihah siang toto ahihi. Hih sianthona-ah a thubulpi khat in  Pasian sawl manna ahi hi.

 

1 Peter 1:22 sim in. Hih in koi bangin sawlmanna le sianthona kizopzia hong hilh hiam? Siantho-na hong ngahsak sawlmanna in bang sawlmanna hi ding hiam? Koi bangin a tuam vilvelin Peter in sawlmanna tawh kisai bang thu hong hilh hiam?

 

 

WEDNESDAY                              December 28

Sihna Le Khitui Luang Nawn Lo

 

Pumpi a sih hangin khuaphawk theihna khat om lai veve hi; a mei ngei lo ding meikuang sungah gim thuakna cihte in Lai Siangtho tawh kituak lo hi. Lai Siangtho hong hilh thu in leithak le van thakah sihna le khitui luanna om nawn lo ding hi” (Mang.21:4). A mit ngei lo meikuang a om takpi ding hileh sihna nihna in mawhna le mawhneite a hemkhia zo lo suak ding hi; van khuanuai panin mawhna a siang zo lo suak ding hi; mawhna le mawhnei mite in hell sungah dahna le kahna thuakin aom ding uh hi. Tua banah vankhuanuai in mawhna omma leitung bang kik zo nawn lo suak ding hi. Ahi zongin Lai Siangtho hong hilhna-ah mawhna le mawhnei mi beisiang ding ahih manin Topa minphata, Ama tungah lungdamkoh tawntung ding ahi hi.

 

Isaiah 25:8, Mang. 7:17; 21:4 sim in. Hihte in gimna lungkhamna sungah bang lungmuanna khamuanna a hong pia hiam?

 

Nuntak hamsa mai thei hi; thumanna om lo, gitlohna tawh kidim nunna hi thei hi. Mi kimkhatte in cikziathuai takin a nuntakna bei uh hi. Ahih kei leh mi kimkhat in i theihkhak loh sungin hong huzaap hi; i lungsim ngaihsutna hong la uh hi. Tua khit ciangin i kiang panin amaute paikhia uh a, ahi zongin amau om lohlam kiphawk kha lo thei hi. I muan i suan mikhat in i tunga siatna khat hong bawlkha le uh tua in bangzah in lungkhamna hong tun thei hiam?

I nuntakna nuamsa mahmah phial taleh lungkiatna, lungmanna, gimna tawh kipelh thei kuamah om lo hi. Dahna, lunggimnate pelh thei lo hi mah ta lehang Pasian in khituite hong nul siangsak ding hi. Tua hun hong tun mateng dahna, kahna i nawkkha dendenlai ding hi. Ahi zongin tua bang dahna, gimnate a bei hun hong tung veve ding hi (Mang. 21:1–5).Pasian thukhenna nunung sungah lungmuanna i nei thei hi; Amah in thuman le itna tawh thukhen ding hi. I it i ngaihte in Khrih sungah hong sihsan uh hangin Topa tawh a nungta tawntung dingin a hong thokik ding uh hi. Tawntung nunna tawh a kipelh mi khempeuh in a mangthang ding uh hi; hih bang mite in vantung nopna ngah kha lo mite hi; amaute in meikuangpi sungah kihaltumna a thuak ding uh hi. I khamuanna lian bel in Pasian in mi khempeuh thuman takin thu hong khen hi, cih thu in a hong khamuangsak hi. Sihna a bei siang hun ciangin tatsa mi khempeuh in “Sihna aw koi-ah om na hiam? Sihna aw, na gu koi-ah om ahi hiam, lungdamna tawh ci ding uh hi” (1 Kor. 15:54, 55).Lei thak le van thak ka bawl ding hi, ci-in Topa in kamciamkhin zo hi. “Abeisa na khempeuh kiphawk kha nawnlo ding a, ngaihsutin zong om nawn lo ding hi” (Isa. 65:17).

 

Hih thu in vantung in khuaphawk lo-in om milmialna mun hi ding hi, cihna hi lo hi. Ahi zongin vantung nopnate hangin leitung nuntakna kiphawk kha nawn lo ding cihna hi zaw hi. A man lo thu khat peuh na tuak kha ngei hiam? A diakdiakin hamsat hun ciangin koi bangin Pasian hoihna, hong hehpihna phawk thei ding i hiam?

 

 

 THURSDAY                    December 29

 Ama Min In Amaute Tal Tungah A Om Hi

 

Mang. 22:3–5 sim in. Koi bangin i taal tungah Pasian min kigelh hi, ci-in theitel thei ding i hiam? Ahih keileh a piang thei thu hi takpi ding hiam?

 

Lucifer leAdam le Evein Pasian a langpan ciangun, Pasian in amaute susia nuam hi leh susia thei mahmah hi. Ahi zongin Pasian in a bawlsa mite tungah ciangtan om lo itna nei ahih manin Pasian in a bawlsa mite suahtak nading lampi hong bawlsak hi. Hih hotkhiatna in leitung bawlma thamin a geelkholhsa hi (Eph. 1:3, 4; 2 Tim. 1:9; Titus 1:2; Mang. 13:8); mawh hong om ciangin tua hotkhiatna thu in Eden huanah hong kilangkhia masa hi. Tua khit ciangin Hebrew biakpiakna tungtawnin limciinna le genkholhna tuamtuamtawh hongkilang hi(Pai. 25). Tua ciangintuagenkholhnalimciinna khempeuh in Jesuh nunna, sihna le a thawhkikna-ah kicing takin a hong kilang hi ( Romans 5). Hotkhiatna thu laigil in tawntung nunna kamciam hi; hih kamciam in Jesuh dikna tungah kinga hi. Upna tawh tua dikna a sang mi khempeuh in tawntung sihna panin hotkhiatna a ngah hi. Jesuh hong sihma le hong sih khit nungah hotkhiatna upna tawh kingah hi; cikmah hunin gamtatna pha tawh hotkhiatna kingah hi lo hi.Ahi zongin i gamtatnate in hotkhiatna sung nungta ihihlama kilangsak hi.Khrih hong nuntakmakum zalom tampi lai-in a nungta Abrahamthu Paulina pulaakna-ah “Abrahamin asepnahangin amahtawh a kipawldingin Pasianin sanghilehAbraham in kisialhpihding thu aneiahihi. Ahi zongin Pasian’mai-ahAbraham a kisialh nading bangmah thu om lo hi. Bang hang hiam cih leh Lai Siangtho sungah, “Abraham in Pasian um a, tua a upna hangin Pasian in mihoihin a sanghi,” ci-in kigelhhi (Rom. 4:2, 3).

 

Koi bangin hih in upna tawh hotkhiatna kingah ahihna thu theitel sak hiam?

 

Tua hi-in Jesuh i sanna kipanin Ama tungah i nuntakna khempeuh zong apia ihipaha, Ama hong kamciamte i pom akipanin eite in hotkhiatna- ah khamuangtakin i nungta thei hi.Ama dikna le siangthona simlohbangmah dang suang lo-in i kalsuan ciangin Ama dikna pen eite dikna- in ahong kiciaptehsak hi. Tua hi-in hih thu in i taalah Ama min kigelhna hi, ci-in i thei hi. Tu-in i taalah tua min kigelhinAma kiang panin a paikhia ihih kei nakleh leithak vanthak-ah zong i min akigelh ahi hi.

 

FRIDAY                                December 30

Ngaihsutbeh Ding: Read Ellen G. White, “The Controversy Ended,” pp. 674– 678, in The Great Controversy; “The Earth Made New,” pp. 133–145; “Heaven Is a School,” pp. 146–158; “It Will Not Be Long,” pp. 159–166; “Heaven Can Begin Now,” pp. 167–176; “The Music of Heaven,” pp. 177–184; “A Call for Us to Be There,” pp. 185–192, in Heaven.

 

“Khrih singlamteh pen tatsa mite sak tawntung ding la le thusin ding ahi hi. AMaute in Khrih sungah vangliatna a ngah uh hi; amaute in Singlamteh tunga Khrih thah thuakna a mitsuan tawntung ding uh hi. Na khempeuh a piangsak Vangliatna le na khempeuh a kemcing Khrih Jesuh kimangngilh ngei kei ding hi. Amah in Vanglian Pa, Pasian Itna ngahin vantung Liatna khempeuh a nei, cherub le seraph vangtang vantungmite pahtawi tawntung Pa hi mah taleh, Amah mah hong kiniamkhiatin mawhnei mi tawntung nunna- ah ahong tunpih hi. Amah in eite mawhna, maizumna khempeuh a hong puakkhiatsak hi. Pa Pasian in Khrih gim thuakna en ngam lo-in Kalvary tungah sihna a hong thuak hi. Amah in kuamah dang hi lo-in leitung khempeuh a Piangsak Pa, mi khempeuhte tun nading mun a khensat Pa, vangliatna khempeuh nusia-in mawhnei mite le vankhuanuai lamdangsak phialin a hong kiniamkhiat Mipa hi.”—Ellen G. White, The Great Controversy, p. 651.

“Kidona Lianpi bei ta hi. Mawhna le mawhnei mi om nawn lo hi. Van khuanuai khempeuh in siangtho hi. Na khempeuh in kilemna tawh kidim hi. Pasian kiang panin na khempeuh hong pai hi. Mun khempeuh in nunna khuavak, le nuamna tawh kidim hi. A neu penpen ‘atom’ a kipan a lian penpen nuntakna nei hi taleh nuntakna nei lo piansak na khempeuh in Pasian in a kicing nuamna le itna hi, ci-in a pulaak uh hi.”—Ellen G. White, The Great Controversy, p. 678.

 

KIKUP DING DOTNATE

 

Khristian mi tampi in leitung vai tawh kidimin hih leitung in atawntunga kip ding bangin a nungta uh hi (Luke 12:16–21). Koi bangin nuntak khuasakzia le vantung masak zawk ding tonkhawm thei ding hiam? Luke 12 sunga Khrih hong vauhilhna sungah i siat khak loh ding kidal thei ding i hiam?

 

Leitungah vantung nopna hong kipan thei ahihleh bangci bang lampi tawh i innkuan le i nunzia in vantung thuman thute nuntakpih thei hiam? 3.Sunday ni-a thu sin thu ngaihsunkik in. Mi kimkhatin tawntung nunna lamen uh hi napi, lungkia-in nungtata uh hi ding hiam?

 

Mi kimkhat in lametna nei lo hi mah taleh nuamtakin nungta leuleu uh hi. Tawntung nunna kamciam om keileh hih leitung hong piak theih nate in bang tanvei kikhom ding hiam?