LEHSSON 8 | AUG 13-19 A kimu theilo nate Muhtelna

 

LEHSSON 8      AUG 13-19

A KIMU THEI LO NATE MUHTELNA

 

Tu Kaal Sung Sim Ding: Rom. 8:28-39, John 14:1-14, Eph. 1:18-23, Isa. 40:27-31.

KAMNGAH: “Moses pen kumpipa’ heh ding lau hetloin Egypt gam panin paikhia a, a kimu thei lo Pasian a mu bang keekin a nungkik hetlohna zong a upna hang mah ahi hi.” hi. (Hebrews 11:27).

Upna in bang hi, cih a khiatna Hebrew Bu in a hong hilhna in to (challehnge) na lianpi nei tawntung hi. “Upna nei i cih ciangin i muhtheih nai loh i lamette ngah takpi ding, ci-in muanna lungsim neihna ahi hi.” (Heb. 11:1). Koi bangin mit tawh kimu thei lo thute thuman takpi mah hi, ci-in theithei i hiam? Tua hi phial talehh Moses in (Heb. 11:27) sung bang mahin hong hilh hi. A kimu thei lo Pasian a mu bang keekin a nungkik hetlohna zong a upna hang mah ahi hi. (Heb. 11:27).

A kimu thei lo Pasian pen a mu bangin nuntak ding hong sawlna in eite adingin masuan lianpi khat hong suak hi. A diakdiak in na khempeuh in lamkhialin a pai laitakin upna tawh kalsuanna hong thupi semsem hi. Tua bang upna in Khrih neih upna bang hi ding hi; Tua bang upna in Pasian thuman thutak leh Pasian gam thu in a makaih hi. I Pa Pasian hoihna thuman thutak in Jesuh vangliatna thu mah hi-in, sihna pan Jesuh thawhkikna vangliatna zong ahi hi. Pasian hong hehpihna thuman thutak in eite hong thakhauhsakin zia-etna i tuah ciangin a hong zawhpih hi; muanmawhna lungsim a hong hepkhiatsak hi.

 

Tukaal sung thusin a tomin etna:Hun sia pen sung nangawnah Pasian thu tawh kisai bang thu in hong zawhpih thei ding hiam?

 

SUNDAY                            August 14

I Pa Vangliatna

 

“Pasian in hong it takpi ahih lehh, Amah in …… hong sepsak ding hi. Amah in … thupha hong pia takpi ding hi. Hih bang thute bangzah vei i ngaihsun ngei hiam? I thuak thute ngaihsun lehhang Pasian in hong it takpi mah hi ding hiam, cih thu i ngaihsun kha zel hiam? Bang hang hiam cihlehh Pasian in hong it takpi hi lehh i nunzia in kilamdang khin ding hi.

Pasian hoihna muanlahna hong tun thei ngaihsutna thu nih om hi. Amasa-in i lungsim in a hoih thu khat na hoih khat deihna nei hi; Pasian in eite adingin a hoihlamin hong kalsuanpih ding hi, cih upna i nei hi. Nihna-ah Pasian hoihna tungah muanmawhna i nei hi. Bang hang hiam cihlehh i lamet khat in thu hoih hi napi-in, i tuahkhak thu in thu dang khat hong suak hi. Thu khat pen i muhna-ah thu hoih ahih keilehh a deihhuai thu khatin i muh pen tua bang ding mahin i tuah ding i lunggulh hi. Tua bangin i tuahkhak loh ciangin Pasian tung hehna hong suak hi. Hih bang hun ciangin upna kisam pha mahmah hi. Pasian leh Ama hoihna tungah muanmawhna lungsim hong lut ciangin upna kisam mahmah hi.

Romans 8:28-39 in Pasian hoihna a hong laktel kician mahmah khat hi. Pasian hoihna tungah muanmawh khak loh ding bangin a hong dal thei ding hiam?

Romans 8:32 sunga kigelh thute in hamsatnate panin a hong dal thei thute hi. “Pasian in mawhna thaman hong suan nuam hilehh hong suan thei lua hi. Ahi zongin A Tapa in mawhna thaman pua dingin lehitungah hong nungta hi. Mawhna thaman lungdam takin a hong puaksak hi. Pasian in lehitungah Jesuh hong paisakin sihna hong thuak khit nungah na khempeuh hong pia nuam lo- in bangci bangin itsiik ding ahi hiam? Cihnopna-ah Pasian in eite tungah hong cingh gamtat mahmah hi; na khempeuh hong pia ahihna Khrih sihna in hong lak hi. I tuahkhak hamsatna zia-etnate sangin Khrih sihna in huzaap lian mahmah nei zaw hi lo hiam?

Koi bangin Pasian hoihna in muanmawhna lungsim sangin vanglian zaw thei hiam? Nang sih tangin sihna hong thuak Jesuh sihna thu lungngaingai in. Pasian hong kipiakna lamdang tu-in lampi tuamtuam tawh hong kilang hi lo ahi hiam? Jesuh sihna in na upna thu-ah bang nasem hiam?

 

MONDAY                       August 15

Jesuh Min Suangin

 

“Keima min suangin nong nget peuhpeuh uh ka hong sem ding hi.” (John 14:14). Jesuh in a nungzuite tawh sawt kikhawl nawn lo ding hi ta hi. Nungzuite a ompih den tha apia den Jesuh in a sawt lo-in vankahsan ding hi ta hi. Nungzuite in lungmang, cimawh kisa-in beidong dinmun tungin kingaihsun uh hi. Amaute in Jesuh nawn lo ding uh hi ta hi. Jesuh in amaute tungah a mangngilh loh ding uh kamciam khat a pia hi.

John 14:1-14 sim in. Aneu 13, 14 gen bangin Ama min suangin i nget bangbang Jesuh in hong sepsak ding ahihna hong kamciam hi. Hih thu hangin thu i nget ciangin a tawpna-ah Jesuh min suangin thu kong ngen hi, ci-in pulaakin Amen cih tawh thunget i khup hi. Jesuh min suangin thungen cih thu in bang a khiatna nei hi ding hiam? Ama min suangin thungen ding ci-in hong sawlna-ah bang a khiatna hi ding hiam? Hih thu i tel nadingin bang thu hong pulaak hiam?

Jesuh min suangin thunget ciangin vantung vanliatna khempeuh in eite aitangin nasem hi. I kimkotah vantungmite om i muh theih loh hangin amaute in vantung tokhom panin sawlna ngahin i ngetnate tangtungsak dingin a hong tuaksuk uh hi. Khat veivei ciangin Jesuh min suangin thu i nget ciangin na khempeuh a kilamdangpah dingin i lamen a, ahi zongin na khempeuh in kibangbang hi. Ahi zongin Pasian vangliatna in vanglian takin hong tungin thakhat thu-in huihpi a daihpah hi; i phawk khak loh hangin Pasian vangliatna in daihna hong pia hi. Jesuh in Pasian vangliatna mah tawh Gethsemane huana gimna a zo zo hi. Mitmuhin thakhatthu-in bang mah hong pianglian kei zongin Pasian in ei adingin bangmah hong sem lo hi, cihna hi lo hi.

John 14:1-14 sim in. Na sim kawmkawmin maitang kimu bangin kingaihsun in. Hih kamciamte panin lametna bang ngahkha hiam? Tua hi-in nang leh nang kidong in: Tua kamciamte a tangtun nadingin na nuntakna-ah bang kisam na hiam? Bang kikhel na neilai hiam?

 

TUESDAY                             August 16

Thawhkikna Vangliatna

 

Thawhkikna in mihing in bangmah sem thei lo ahihna, mihing cimawhna pulaak hi. Jesuh nunna, a sihna leh sihna pan a thawhkikna ngaihsun in. Jesuh hong sihna pen Pasian tawh thukham bangin kizoptheihna bekin i ngaihsunkha pahpah hi. Hih pen hi mah hi. Ahi zongin Thawhkikna in hotkhiatna thu pulaak lianbel hi. Thawhkikna in thupi hi; bang hang hiam cihlehh Ama sunga a si mite in zong Amah bangin a tho kik ding uh hi.Pa ziatlamah Jesuh a tuttheihna leh ukzawhna a ngahna a hang in amah in sihna pan a tho kik hi. Tua Thawhkikna vangliatna in tuni dongin eite adingin omlai hi.

Ephesians 1:18-23 sunga Paul in Pasian vangliatna pulaak hi. Eph. 1: 18- 23 in thawhkikna vangliatna thu bang pulaak hiam?

Ephesians 1: 18- 23 sunga thute in Paul thungetna hi-in, Pasian huhna tawh mi tawmno khat bek in a theitel thei hi. (1). Nunzia kikhelna om dinga tawntung nunna tawh a nungta dingin Jesuh in eite hong sam hi. (2). Eite aitangin vangliatna hong kilang hi, cih i tel thei hi. Tua khit ciangin Paul in hih vangliatna lamdangsa mahmah ahihna thu a pulaak hi. Sihna pan a thokiksak vangliatna tu- in zong a kingah thei ahihna thu a hong hilh hi. Nuntakna hong pia bek tham lo- in Pa ziatlam khutah a hong tunpih ding vangliatna ahi hi. Tua in a tawpna hi nai lo hi. Thawhkikna in a hong kipia mawkmawk vangliatna hi lo hi.

Na nuntakna-ah bang munte in Jesuh thawhkikna vangliatna kisamlai hiam? Kisittelpha inla, tua khit ciangin tua vangliatna ngah nadingin thungen in. Tua banah bang thute-ah kipuahphat ding kisamlai na hi hiam? Bang deihtelna nei thei ding na hi hiam? Thawhkikna vangliatna in suakta takin na hong sep nadingin bang khentatna nei ding na hi hiam?

 

 

WEDNESDAY                       August 17

I Lungkhamnatea Puakhiading

 

Inn khat sung laisuanna khatah hih bangin lai kisuang hi. “Na lungkham ciangin bang hangin thu ngen na hiam?Hih laisuan in hong nuihsak hi. Bang hang hiam cihlehh i lungkham na khempeuh a pua dingin Pasian kiang zuan zaw ding i kisam hi. Mi kimkhat in a genna uhah i van gik khempeuh hong dawn dingin Pasian kiangah pai in,” ci uh hi. Koi bangin Pasian in i van gik puakte hong dawn ding hiam? I puak van gik in hong zawh mateng ei mah leh ei mah in pua dingin i ngaihsun hi. Bang hangin lungkiat thuak dong ngakin Topa kiang zuan lo ding na hi hiam?

1 Peter 5:7 sim in. Peter in Late 55:22 siksanin a gelh ahi hi. Ei adingin a thubul in bang thupuak hi ding hiam? Matt. 6:25- 33.

1 Peter 5:7 hong hilh thu in tel nop hi. Thusim om lo hi. Ahi bang lian mahin hong hilh hi. Hepkhia cih thu in paikhia cihna hipah a, buai-na a piangsak thute paikhia-in nusia cihna hi pah hi; tua bang thute tawh kizopna nei nawn lo ding cihna hi pah hi. Hi mah hi; i vangikte in mun khempeuhah kinusia thei ziau hi lo hi. I lungkhamnate kipelh thei hi lo hi.Vantunga i Pa tungah suan ding hang a, Amah in i vangikte hong hepkhiatsak ding ahihna hong kamciam hi. Hih thu mah Matthew in zong hong hilh hi. Tua bangin i vangikte Ama tungah suankhia ding hamsa hi lo napi, i buai-napi ei mah in i puapua lai veve hi.

Na khempeuh in lunghihmawhna hong tung thei hi. Nasepna panin zong lunghimawhna hong om thei hi. Lamet loh mi khat tung panin gensiat ngahna ahi zongin nawlkhin thuakna, it ngahlohna cihte in hong lunghimawhsak hi. Cidamlohna leh sum leh paai hamsatnate in zong lunghimawhna hong tun hi. Pasian mai-ah kicinlohna hangin zong lunghimawhna hong om thei hi. I mawhnate hong kimai sak lo hi, cih ngaihsutna in zong lunghimawhna hong tun hi. Bangbang ahi zongin i buai-na bek mitsuan lehhang lunggimna tawh i kidim den ding a, a hong huh thei Topa mah i belh tinten ding kisam mahmah hi. Peter pulaak bangin tua bang thute limtakin ngaihsut ding kisam hi. Lunghimawh lo dingin a hong hilhna a hang in Pasian in eite hong kemcing hi, cih thu tungah kinga hi. Nupa kikhen cihte a kipan buai-na tuamtuamte hangin lungman ding leh kimanna ka nei kei hi, ci-in ngaihsut khak ding hi lo hi.

Lai Siangtho hong genna bangin Topa Pasian in eite hong cing hong kem tawntung ahih manin na khempeuh Amah in khel thei ahihna phawkin lungman ding hi lo hi, cih hong hilh hi. Tua hi-in bang thute in na lung hong khamsak hiam? Topa adingin a hamsa lua bang om hiam? I buai-na lian pen in Pasian um hang a, Amah in buai-na khempeuh vengsak thei hi, cih thu zong thei na pi hangin, ei mahmah in buai-nate siangsak ding i hanciam veve hi; Amah in eima deih bangin hong sem lo ding hi, cih ngaihsutna i vom den hi. Hih thu ngaihsun inla nang leh nang kidong in. Na nuntakna-ah bangzahin na thuman hiam?

 

THURSDAY                 August 18

A Kimuh Theih Loh Hangin Pasian Tungah Citak Veve

 

Kuamah in hong kin lo hi, hong awlmawh lo hi, cih thu i theih ciangin i lungnuam thei lo hi. Ahi zongin Pasian in i lunggim laitakin hong kin lo, hong awlmawh lo hi, ci-in ngaihsun kha lehhang lunggim huai penpen hi. Babylon gama saltanga om Judah mite phawknate Pasian in amaute thuakna kin lo hi, ci-in ngaihsun uh hi. Amaute in saltangin om lai uh hi. Amaute mawhna hangin Pasian thukhenna thuak uh hi, ci-in a ngaihsun uh hi. Ahi zong Isaiah pulaak thu in gim thuak mite tungah hehnepna kammalte hi. Isaiah 40 in kammal hoih mahmah thute pulaakin Pasian in a mite limtak kem ahihna hong hilh hi. “ Tuucingpa in a tuute a cin a khoi bangin Topa Pasian in a mite hong cing hong kem hi. Tuucingpa in tuunote a liangah pua-in hehpihna a nei hi (Isa. 40:11). Saltan sawtpi khit ciangin saltangte a ngaihsutna uhah “Topa aw, nang koi-ah om a hi hiam? Nong cin nong kepna ka mu kha kei uh hi, ci uh hi.

Isa. 40:27-31 sim in. Bangci bangin Isaiah in Pasian a pulaak hiam? Koi bangin hih dawnkikna in “Topa in ka pai-na lampi mangthangsak hi, cih upna dawngkik hi lo hiam? “ (Isa. 40:27).

Kimkhat in Esther Bu in Pasian cih kammal a pulaak loh bangin Pasian in ka pai-na lampi mialsakin gimna hamsatna ka tuak uh hi, ci-in ngaihsun uh hi. Esther Bu sungah Pasian cih kammal a kipulaakna om lo hi. Ahi zongin a thupiangteng khempeuh in Pasian in a mite kisuksiat nading pan in ahotkhiatna hong hilh hi. A mite kisiat ding thupiak kihepkhiatsak hi. Tu-in hih thu piang in a bei sa thu hi mah talehh mailam hunah a hong tung ding thute limcingkhol hi; Pasian mite in bawlsiatna thuak ding uh a, amaute kisiat nading thupiak hong omkik ding hi, cih pulaakkhol hi (Mang. 13:15).

Tua bang hamsatna hong tungkik ding na ngaihsun thei hiam?Pasian in a mite nusia takpi ding hiam? Ahi zongin lau ding hi lo hi. Esther hunlai-a a mite a honkhia Pasian mah in hun nunung a gimnate panin hong honkhia ding hi.

 

FRIDAY                 August 19

Ngaihsutbeh Ding: Ellehn G. White, “In the Days of Queen Esther,” pp. 598–606, in Prophets and Kings.

“Pasian in Kha Siangtho ngen dingin hong sawl hi lo hiam? Kha Siangtho a om takpi mah hi lo hiam? Amah in eite a hong makaihpa hi lo hiam? Mi kimkhat in Pasian kammal um ngam lo uh hi; upmawh thu ding bekin ngaihsun uh hi. Topa tungah thungen uh hi napi-in, Pasian kammal muang ngam takpi lo uh hi; Ama hong hilh thute a sang ngam kei uh hi. Vantung i Pa mai-ah kiniamkhiat laiteng, Ama hong thuhilhna i ngaih laiteng, bang hangin Pasian kamciamte muangmawh ding i hiam? Topa muanmawhna neuno khat nangawn neih ding hi lo hi; tua bangin muanmawhna in Amah zahtak lohna suakpah hi. Ama deihna theitel dingin na zon laiteng, Ama deihna bang sem dingin na kipiak laiteng Topa in a hong makaih ding hi. Ei leh ei kimuan ngamhuai lo hi; tua bangin muanmawhna in Ama hong hilh thute telkhialhna hong tun hi.A hong hilh thungetna muang inla, a tawp dongin muang in; Kha Siangtho in lampi manah a hong makaih ding, Ama geelnate leh a hong lamlahnate na zui ding hi.” Ellehn G. White, Manuscript Relehases, vol. 6, p. 225.

“Muanlahnate leh langpannate i tuah ciangin upna zong hong khangin hong hat hi. Hamsatna lak pan i ngah thute in suangmanpha sangin a manpha zaw thute i nga hi.” Ellehn G. White, Testimonies for the Church, vol. 3, p. 555.

 

KIKUP DING DOTNATE

 

1.   A kimu thei lo nate thu i upna na lawmte tawh kikum in. Tua thute in muh theih nate sangin lian zaw hi lo hiam? Tua thute in lehitung nate bat zawh ding hi lo hi. Hih thu in a kimu thei lo Pasian mu thei cih thu telzawk nadingin bangci bangin hong huh hiam?

2.   Wednesday ni-a dotna kantel pha in. Tua bang dinmun tung kha pahpah hi lo i hiam? Deih pen hi kei mah talehh Topa muan nading lampi hoih pen in bang hi ding hiam? Tua bangin gimna leh langpannate phukha mah talehng upna in khangto-in suangmanpha sangin a manpha zaw thute i ngah hi, cih thu in koi bangin gimnate muhzia hoih hong guan thei hiam?

3.   Mihing muhna panin i hih theihzahin thungenin hanciam hi mah ta lehng, Khristian kimkhatte thuaknate in cikziathuai mahmah i mu hi. Tu kaal thusinna tungtawnin hih thu koici tel ding i hiam?