LEHSSON 7 | AUG 6-12 Akisia theilo Lametna

 

LEHSSON 7          AUG 6-12

A KISIA THEI LO LAMETNA

 

Tu kaal sung sim ding: Hab. 1:1-4, Job 38-41, Isa. 41:8-14, Jer. 29:1-10, Heb. 12:1-13.

KAMNGNGAH: “Pasian in eite tungah a hong piak a Kha Siangtho tawh eite sungah ama itna hong guang ahih manin hih lametna in eite hong lungkiasak ngei lo hi.” (Romans 5:5)

Pawl sungah thu-um mite khat leh khat kimaitai-in a om ciangin lametna thute pulaak ding hamsa het lo hi. Ahi zongin gimna hamsatnate i tuak khak ciangin lamet nei lo bangin i nungta hi.Kim leh paam thupiang nate hangin na khempeuh banh Pasian upna zong hong kiam hi. C. S. Lehwis in a laibu gelhte khat sungah hih bangin gelh hi: Na mai-ah humpi khat omin tua humpi in bangmah hongcih lo ding cih hi, cih thei khol hi mah ta lehcin, na gei-a mi khat in tua humpi pen gilo lo hi, ci-in hong gen hangin tua humpi na kihta veve ding hi.

Pasian nasepzia leh i tel zawh loh thu tampi a om hi. Hih bangin i puulaak ciangin Pasian in i langah hong pang hi, cihna hi lo hi; i tuahkhak thute a telsiangnai lo ihi bekhi.Ahi zonginlungdaihna, lungmuanna leh lametna   i nei thei veve hi.Ama sungah “bitna” kitsam hi, cih i thei a, aih zongin eite in lungkiatna sungah i kalsuan kha zel hi.

 

SUNDAY                                  August 7

 A Taangpi-In Thupiang

 

Gimna i thuak ciangin i tuak gimna mah a thupi pen bangin i ngaihsun kha zel hi. Ahi zongin tua sangin a lian zaw thu tampi omlai hi (Mang.12:7, Rom. 8:22).

Habakkuk 1:1-4 sim in. Habakkuk in bang thu nawkkha hiam?

Pasian in Habbakkuk tungah hih bangin hopih kha thei dingin na ngaihsu kha ding hi: “Na thuak gimna in lian mahmah hi, Habakkuk aw. Kei hong pai-in kong huh ding hi.” Ahi zongin Pasian in tua bangin Habbakkuk tungah pulaak lo hi. Habbakuk in a lian zaw gimna thuak kha lai ding hi, ci- in Pasian in pulaak hi.

Habakkuk 1:5-11 sim in. Israelte in Assyriante salin om uh hi. Ahi zongin Pasian kamciam in a thu hamsa hong pai lai ding hi, ci hi. Babyloniante in Israelte salin a kai uh hi.Habakkuk kikona in aneu 12-17 sunga kimu thei hi. Tua ciangin Pasian in bang pulaak ding cih ngakin a om hi.

Bangci bangin Pasian in Babylon a suksiat ding kamciam hiam? Tua kisiatna sung panin Habakkuk 2:2, in bang lametna hong guan hiam?

Habakkuk 2 in Pasian kamciamah Babyloniante kisiat ding kimu thei hi. Hebrews 10:37 in Habakkuk 2:3, siksanin a pulaak hi-a, hih thu in Messiaah nasep ding hong hilh khol hi. Pasian kamciam bangin Babylon in kisia takpi ding ahihna Mang.18:2, zong a pulaak hi. Siatna a nawkkha Habakkuk kimkot in a lian zaw gimna lianpite hong tung lai ding hi, ci-in Pasian kamciamte sungah a om hi. Tua bangmahin eite in zong hotkhiatna tangthu sungah i nawktan thu tampi om hi. I kimkot in siatna lianpi tawh kidim hi. Ahi zongin Lai Siangtho hong hilhkholhna-ah hih gimnate sangin a lian zaw gimna hong tung lai ding hi. Gimnate a zawhtheihna a thubulpi in tua thupiangte a pat pan a tawp dong muhna thu in a gualzo sak hi. tua hi-in Hab. 3 sunga bangin Pasian in mailam hunah a sep ding nate hangin Ama min phat ding thupi mahmah hi.

Habakkuk 3:16-19 sim in. Habakkuk in a neih lametna bang tawh pulaak hiam? Genkholhna ahong tangtung lai dingte in bang kisamlai hiam? Koi bangin hih thute-ah lametna nei thei ding I hiam?

 

  MONDAY                              August 8

  Amah In Eite Pa Hi

 

Oswald Chambers in a laigelhna khatah hih bangin gelh hi: “Pasian tungah bang sem ding na hiam, ci-in na dongkha ngei hiam? Amah in a hong gen ngei kei ding hi. Pasian in a sep ding thute a hong gen kei ding hi. Ahi zongin Amah in bangci Pasian hi, cih a hong kilaak hi.” My Utmost for His Highest (Uhrichsvilleh, OH: Barbour & Company, Inc., 1963), Jan. 2. Oswald Chambers pulaak thu in bang a deihna hi ding hiam? I theihsa bangmah in Job Bu kipatna-ah Job gimthuaknate kigelh hi. Job in na khempeuh suum hi. “Pasian samsia-in si zaw in,” ci-in a sawl hi.”(Job 2:9).Hih ban zoma kigen thute in Job leh a lawmte in Job thuak gimna tawh kisai thute kamkupna hi.Tua bangin a kamkupna-ah Pasian in bangmah pulaakna anei kei hi. Tua ciangin thakhat thu-in Job 38 sungah Pasian in thugen nei-in “thu theihtelna neilo-in kua in ka geelnate hepkhiat sawm hiam,” ci-in dotna a nei hi. (Job 38:2) Tua ciangin Pasian in tha khat thu in Job tungah dotna nei hi. Job 38 leh Job 39 a huampi-in sim inla, a nunung pen thu dotna Job in hih bangin dawngkik hi.” Kilawmna bangmah ka nei kei hi. Ka kam ka hum hi. Thu khat vei ka gen khit nak lehh Topa thudotna ka dawnkik nading ka thei kei hi.” (Job 40:4, 5). Ahi zongin Pasian in dotna zo nai lo hi. Tua hi-in Pasian in a dotkikna-ah dotna lian khat dongkik hi.

Job 42:1-6 sim in. Pasian in Job tungah bang thu gen nuam hi ding hiam? Tua thu in Job tungah bang huzaap nei hiam?

 

Pasian in Job thuak gimnate bang hangin thuak cih thu dongngei lo hi. Job thuak gimna-ah Pasian in piansak nate tungtawnin tehpih om lo Ama vangliatna a pulaak hi. Tua bangin Pasian in a pulaakkhit nungah Job indawnkik ding bangmah nei nawn lo hi.Pasian vangliatna in lunghimawhna khempeuh a hemkhia hi. Hih thu in a kilangdo thu nih a pulaak hi. Thu neu no khat pnain lametna leh tha ngahna i nei thei hi. Apiang thute i theihna in lungmuanna ahong guan hi.

Tua hi-in i tel loh thute i tuahkhak ciangin i lungkia hi. Ahi zongin khat veivei ciangin Pasian in bangmah i theihlohnate hong phawksakin Ama sungah khamuanna a nei thei dingin lam hong lak hi. Tu-in i telloh thu a om hiam? Hih bang hun ciangin Pasian zia leh tong mitsuan belin nei in. Lametna in i tel zawh loh thute theihtelna a ahong guan hiam?

 

TUESDAY                              August 9

  I Pa Hong Ompihna

 

“Bang hang hiam cihlteh Keimah in Topa na Pasian ka hi hi. Na taklam khutah kong lehn a, “Lau kei in. Kong huh ding hi, kong ci khin zo hi (Isa. 41:13). Mi khat in hih bangin pulaak hi: “Pasian in gamla om hi, ci-in na ngaihsut ciangin amah in na nai-ah hong om thei Pasian zong ahi hi.” Buai- na in hong nawkkhak ciangin Pasian in ?ite hong nusia hi, ci-in ngaihsutna lungsim hong lut kha zel hi. A taktakin Pasian in a hong nusia ngei kei hi. Jewte in saltangin a om uh ciangin Pasian hong ompihna in nusia hi, ci-in a ngaihsun uh hi. Tua hi mah talehh Isaiah tungtawnin Pasian in amaute honkhia ding ahihna thu a pulaak hi. Kamsangpa pulaak bangin amaute in saltanna panin Jerusalehm khuapi zuanin a ciahkik uh hi. Pasian in a mite nusia ngei ahihna, amau kiang panin gamla om ahihlohna thu amaute in a theih ding uh a deih hi. Gim thuak talehh amaute in lamet bei hi lo hi, cih a theih ding uh kisam hi.

Isa.41:8-14 sim in. Bang thu siksanin mailamah hotkhiatna hong tung ding hi, ci-in amaute in ngak uh hiam? Hih kamciam in hih lehitungah saltangin i omna panin suahtakna ngakin hong khamuangsak hiam?

A vanglian mahmah limciinna khat Isaiah 41:13 sungah kimu thei hi.Vankhuanuai khempeuh tungah ukna nei Vanglian Pasian in a mite tungah “Lau kei un. Bang hang hiam cihlehh ka khut taklam tawh note ka hong makaih hi,” a ci hi. Lehitung panin tai tul za lom a gamlakna panin Pasian in hong makaih hi, cih thu leh eite tawh kinai takin hong omin ahong makaih hi.cih thu in kilamdang hi; Topa in a mite naitakin a khut tawh a lehn hi. Nasep manlahin i om hun ciangin Pasian in eite tawh kinai takin hong om hi, cih thu i phawkkha kei hi. Ahi zongin Pasian in eite tawh hong omkhawm Pasian ahihna “Immanuel” cih thu in tampi kilamdangsak hi. Pasian in eite tawh a hong om ciangin Ama ngimnate, a kamciamte, leh a hong khel AMa vangliatna tawh a hong ompih hi.

 

Pasian hong ompihna na theih leh theih loh ni tawmvei sung sin in. Tatsat lo-in every Vankhuanuai uk Pasian hong ompihna na mu ding hi. Koi bangin Pasian kamciate in na nunzia hong khel hiam cih thu ciamteh in. Na lawmte tawh kikum dingin kigingkhol in.

 

WEDNESDAY                               August 10

Eiteadingin I Pa Geelnate

 

Mi khempeuh in lametna i nei ciat hi. Tua lametna koi-ah om ahi hiam? Mi kimkhatte adingin nuihna in lametna pulaak hi. Mi kimkhatte adingin zat ding sum neihna, neih leh lam neihna-in lametna tawh nuntakna hi. Mi kimkhatte adingin nupa suahna in lametna guan hi. Nang ee lehh? Na lametna in bang tungah kinga hiam? Koi mun panin lametna leh na thahatna na mu hiam?

Jeremiah sungah kamsangpa in lamet bei-in a om saltangte tungah a

laiakhak kimu thei hi. “Zion phawkin Babylon gungei-ah tu-in kap uh hi (Late 137:1).Tua bangin lunglneg khuangai pipi mahun lametna nusia lo dignin Jeremiah in a hilhhilh hi.

Jer. 29:1-10 sung bang thu siksanin lametna thu leh hanthotna thute kimu thei hiam?

Jeremiah 29 sungah lametna phungpite thupina hong hilh hi. Amasa-in Pasian in a mite tungah a gen thu in amaute in lametna nusia lo dingin gen hi. Bang hang hiam cihlehh amaute dinmun in a genkhol thei lo siatna tawh dinmun ahih keilehh ama thu thu tawh a hong piangtawm hi lo hi. Pasian mahmah in hih bangin a pulaak hi: “Jerusalehm panin Babylon-ah a hong kipuakkhia saltang mi khempeuhte’ tungah Vanglian Topa, Pasian in hih bangin hong ci hi. (Jer. 29:4). Amaute kimkot in siatna tawh a kidim hi. Judah in Pasian makaihna a nusia ngei kei hi.

Nihna-ah Pasian in a mite tungah lametna nusia ngei lo dingin gen hi. Bang hang hiam cihlehh Pasian in amaute thuak gimna sung panin zong a honkhia thei hi. ‘Na omna khuapi adingin thungen un. Khua sung in daihna leh nopsakna nei lehh note zong daihna leh bitna na mu kha ding uh hi, ci hi. Topa tungah thungen un. Tua hilehh note in nopsakna leh lawhcinna na mu ding uh hi (Jer. 29:7). Thumna-ah Pasian in a mite tungah lametna nusia lo dingin hilh phapha hi. Bang hang hiam cihlehh a sawt lo-in amaute saltanna hun hong beita ding hi. Babylonah kum 70 a cin ciangin Keimah kong pai ding a, na gam uhah kong ciahpihkik ding hi, ci-in a kamciam hi. (Jer. 29:10).

Pasian in na khempeuh tungah ukna nei-in ama nasepnate a pulaak khit ciangin, tu-in zong amau dinmun khempeuh uk ahihna thu leh mailamah zong amaute uk ding ahihna thu a gen hi.Banghanghiamcih lehh Topa inkongcihin- ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi.

Tuahuncianginnote inkeihongsamin, hongpai-in thunongngendinguha, ke’n zongkongdawngdinghi.Tua khitciangin Topa ina mite a kepcinnazialimtakin apulaak hi ( Jer. 29:11-14).Jeremiah 29:11-14, sim inla nang dingin kibulh in. Pasian in nang mahmah hong kamcam hi, cih thei in. Bangbang hamsatna na tuak zongin hih kamciamte muang in.

 

THURSDAY                         August 11               

I Pa Hong Seekna

 

Hebrews 12:5-13 sim in. Bang thu puak hong gen hiam? Koi bangin tu quarter sung thusinna tawh kituak hiam?

 

Hebrews 12:5-13 sungah Paul in gimthuakna pen kiseekna khat hi,

ci –in hong hilh hi. Lai Siangtho version kimkhat in kiseekna tawh kisai kammal sawm vei bang a pulaakna om hi. Greek tawh kigelhna-ah kiseekna cih kammal a khiatna in “pilna” (education) cih khiatna nei hi. Tua hi-in kiseekna in Pasian in i upna sungah pilna a hong piakna hi, ci-in i tel ding hong deih hi. Hebrew 11 ma-in zong Paul thu kipulaak hi. Hebrews 11 sung in upna nei mite thu hong hilh hi. Tua mite in gimna hamsatna a thuakna tungtawnun amaute upna in kip semsem hi, cih hong hilh hi. Heberews 12 sungah Paul in a laikhak simte tungah a hong hilh thu in gimna hamsatnate thuak mah talehh amaute in thu upna-ah a mong dongin kiptakin nungta uh hi, cih hong hilh hi. Tua bangin a nuntakna uhah a thu bulpi pen in Jesuh mitsuan ding hi, cih hong hilh hi (Heb. 12:2)hamsatna thuakin nuntakna-ah etteh ding Jesuh mah hi, cih hong hilh hi (Heb. 12:3).

Hebrews 12 i sim ciangin laisimna mitlimlang bulh tawh kibang hi. Hih mitlimlangte bulh kei lehhang muhna ahih kei lehh i thuak hamsatnate in hong lungmangsak ding hi. Ahi zongin tua mitlimlangte i bulh ciangin khua muhphatlohnate bei-in khuamuhna – i thuak hamsa-nate hong telsiamsak hi. Tua hilehh limtakin kitel takini muh thei ding a i thuak gimnate theihtelna i ngah ding hi. A kimu milmial nate hong kitelsiang ding hi (Heb.1-13). Heb. 12:5-13 siksanin hih dotnate dawngkik in.

 

Kikhalna bulpi in bang hiam? Kikhalna koi bangin i mu hiam? Kikhalna ngimna in bang hiam?

Hebrews 12:1-13 simkik in. Lametna siksan theih ding thute gualsuk in. Koi bangin “kikhalna-ah” i tuah thute hong hilh hiam?

 

FRIDAY                      August 12

 Ngaihsutbeh ding: Ellen G. White, “The School of the Hereafter,” pp. 301– 309, in Education; “Help in Daily Living, pp. 470, 471, in The Ministry of Healing sung sim in.

Lungkiatna leh lungzinna tuamtuamte i phut khak ciangin Pasian in na khempeuh tungah ukna ei-in mihingte hong it leh hong hehpih mahmah hi, cih thu up ding hamsa kisa ciat hi. Pasian in a tate nopsak nadingin nasem tawntung hi.Hamsatna i phut khak dingin sih ding alunggulh zaw zong mi om hi. Tua ciangin mi tampi in Pasian a upna uh taisan ding uh a, muanlahna sila, up lohna hakkol in a tuamcip hi. Tua bang mite in Pasian nusia uh hi. Tua bang hun ciangin Pasian thuphate lehh a hong makaihnate-in vantungmite in mihingte honkhia dingin vantung panin lehitungah hong tuahna i mu thei ding hi; i dinna mun in a kip suangpi tung ahi hiam? Mual sang tung ahi hiam? I sungah upna thak leh nunna thak a hong tung na thei ding hi.”Ellehn G. White, Prophets and Kings, 152.

 

KIKUP DING DOTNATE

 

1.   Ellehn G. White genna-ah “ i vekin” lungkiatna leh thaneemna i tuak ngei hi. Tua bang hun ciangin bangci bangin na kalsuan hiam? Bangci bangin lametna khat om hi, ci-in midangte in mu thei ding uh hiam?

2.   Na lawmte tawh Tuesday ni-a dotna kikum un. Pasian in nangmah tawh kinai takin hong om hi, cih thu na phawkna in nuntakna-ah bang kilamdannna hong om hiam?

3.   Job 38–41 sim in. Pasian in bangci dan Pasian hi, ci-in hong hilh hiam? Bang in lametna leh lawpna hong guan hiam?Koi bangin Sabbath tawlngakna tawh kizopna nei hiam? Koi bangin Pasian nunzia leh Ama zia leh tong theihtelna hong pia hiam?

4.   Kikhelna a piangsak lametna in Pasian tung pan hong pai hi. Cihnopna- ah i nunna-ah lametna a nei thei dingin thu i gen thei hi. Lametna nei lo mite in lametna a ngahkik nadingin thungetna neisak in. Tua sangin a thupi zaw in lamet bei kisa-in gim thuakte adingin bang nasem thei hiam?

5.   Mi khat tungah lungkiatna, gimna a thuak thute pulaak dingin dong in. Bang thu in kikhelna a piangsak hiam? Lungmanna leh lungzinna a thuakte koi bangin na huh thei ding hiam?