LEHSSON 5 | JULY 23-29 Alian mahmah Asa mahmah

 

LEHSSON 5                       JULY 23-29

A LIAN MAHMAH A SA MAHMAH

  

 Sabbath Nitak

 

Tu Kaal Sung Sim Ding: Pian. 22, Hos. 2:1-12,13; Job 1:6-2:10, 2 Kor. 11:23-29, Isa. 43:1-7.

KAMNGAH: “Ahih hangin amah a kisatnim ding pen Topa’ deihna ahi hi. Amah in natna thuaksak hi. Mawhna hangin ama pumpi a kipiak ciangin amah in a suanlehkhakte mu ding a,ama khan a sau ding hi. Topa’ deihna ama khut sungah pung ding hi.” Isaiah 53: 10.

Khristian thu laigelh minthang C.S. Lehwis zi in a si ding hi ta hi. Tua hun laitakin Lehwis in hih bangin laigelhna khat nei hi: “ Pasian ka upna khawl ding cih ka ngaihsun kei hi. A lauhuai mahmah thu khat aphutkhak ding lau lua mahmah hi. Ahi zongin a tawpna-ah ka lau nawn kei hi. Tua bangin lau- na tawh a nungta hi lehng Pasian a omlo bangin a ngaihsun hi kha ding hi. Ahi zongin Pasian in tua bangin nasem hi, cih ka thei hi.” A Grief Observed (New York: HarperCollins Publishers, Inc., 1961), pp. 6, 7.

Hamsatna tampi a thuakkha mi tampi in Pasian nusia-in nawlkhin uh hi. Mi kim khat in Lehwis bangin Pasian in itna, hehpina nei lo Pasian hi, ci-in ngaihsun dingin zia-etna a thuak uh hi. Bangzahin hamsa hi ding hiam? Pasian in Amah a um mite sungah “Tapa zia leh tong” a hong koih nadingin bangzahin hamsatna i thuak ding phal hi ding hiam? (Rom. 8:29).

Tu Kaal Sung thusinna tomlakna: Bang hangin Pasian in Amah a itte leh amah a thei nuamte’n mukhial dingin kiphal hi ding hiam? “Tapa lim leh meel” bangzahin kitel khial ding phal hi ding hiam?

 

SUNDAY                                          July 24

Hamsatna Sungah Abraham

 

Pian. 22 sim in. Pasian in Abraham a sap ciangin a thu a la bangmah pulaak lo hi. Hilhkholhna, gencianna om lo hi mah talehh Pasian sawl bangin Abraham in a tapa biakpiakna adingin a pia ngam hi. Abraham thuakzia ding na ngaihsun thei hiam? Abraham in bang zah in lunggimna thuak hiam? cih thu na ngaihsun thei hiam? Biakpiak nadingin tapa pia ding cih thu in a siangtho Pasian zia leh tong tawh kilangdo hi. Abraham in tua sawlna a sang thei phial zongin a gamh luah ding tapa Pasian kamciam bang suak ding hiam? Tapa lo-in kamciam tangtung thei lo ding hi. Bang hangin Pasian in Abraham tungah tua bang biakpiakna ngen hi ding hiam? Pasian in na khempeuh thei ahihlehh zong tua bang sawlna in bang deihna nei hi ding hiam? Pasian in tua bangin ngetna nei pahpah hi lo hi. Lungkhamna tawh kidimin a om laitakin tua bangin ngetna thuak ahi hi. Abraham in a lian mahmah gimthuakna thuak dingin Pasian in a geelkholh ahi. Teeknung guai nungah tua bang lungkhamna vangikpi pua dingin sittelna a thuak hi. A thuakna lianlua ahih manin a nuntakna a bei ding a lunggulh hi.”Ellehn G. White, Patriarchs and Prophets, p. 147. Pasian in ama hehna hangin tua bangin sittelna piang ahi hiam? Tua bang hi peuh mah lo hi. Teeknung guainungah tua bang gimna lianpi a thuakna tungtawnin mihingte a hong hotkhiat nadingin ciangtan nei lo Pasian in a tapa a hong piakna thu a hilhnopman ahi hi.” Patriarchs and Prophets, p. 154.

Sittelna bek hi-in Abrham in meihal biakpiakna-ah a piak dingin a tapa athat ding geelna nei peuhmah lo hi. Hih thu in Pasian in hotkhiatna nasep a hong sepna-ah a tuam vilvelin a hong hilh thu khat om hi. Nasep khat a tawp dong sem dingin Pasian in hong sawl kha ngei khol lo mai thei hi. Pasian muhna-ah a thupi thu in a tawpkhakna thu hi lo hi. A hun zui-in i kalsuanna tungtawnin thuman sungah a nungta toto ihi hi. Jesuh in Abraham thu a genna-ah Jewste tungah hih bangin a pulaak hi. ‘Na pa uh Abraham nunzia in ka lung hong damsak hi (John 8:56). Abraham in hih thu tawh kipelh thei hi. Satan zuau genna a na nial hi. Pasian hopihna tungtawnin Abraham in tua lunggimnate nawktan zo-in thuman thutak sungah a nungta hi.

Koi bangin Pasian in hong hopih hiam?Koi bangin Pasian hong hopihna na theithei hiam? Pasian in Ama deihnate bangci bang lampi tawh hong hilh hiam?

 

MONDAY                   July 25

A Nungtolh Israel

 

Hosea nunzia in thu tampi hong hilh hi. Hosea nunzia in lamdang mahmah hi; a zi Gomer in a pasal nusia-in pasal dang tawh ta nei nupi khat hi. Amah pen a citak lo zulhzang nupi khat hi mah talehh Pasian in Hosea tungah a zi dingin lakik dingin sawl hi; itna takpi tawh it dingin sawlna a ngah hi. Hih nupate nunzia in Pasian leh Israel kikal kizopna hong hilh hi.Israelte in Pasian nusia khin uh a, pasian tuamtuamte a bia uh hi.Amaute in tua bangin nungta uh hi mah talehh Pasian in Ama tanu tapa dingin amaute a sam kikkik hi. Ahi zongin Pasian nasepziate ngaihsun in.

Hosea 2:1-12 sim in. Pasian in a mite Ama kiang a kaihkikna- ah bang lampi tawh kaikik hiam? Amaute in bang thute a mu uh hiam?

Hosea 2:2, 3 ____________________________________________

Hosea    2:5-7    _____________________________________________

Hosea   2:8,   9   ____________________________________________

Hosea    2:10    ____________________________________________

Hih thu in Hosea thu in Pasian leh mihingte kizopna a thupi thunih pulaak hi; mihingte in mawh kisikna-ah Pasian in a hong makaih hi. Amasa- in Pasian nasepna i phawk kha kei hi. Israelte in gimna hamsatna a tuah uh ciangin, Pasian in amaute hotkhiatna ding nasem ahihna a mu thei kei uh hi. I pai na lampi –ah hamsatna leh lingkungte i nawk khak ciang, i ziat i vei ah hong dal a om ciangin i pai nading lampi i mu thei nawn kei hi (Hos. 2:6) Eite hong makaih Pasian mah hi ding hiam cih uplahna lungsim hong lut kha thei hi lo hiam? Annek tuidawn kitangsapna bangmah nei lo-in ahih kei lehh maizumna tuamtuam cihte nei lo-in i om ciangin i nuntakna-ah Pa Pasian in a hong ompih ahi ding hiam?(Hos. 2:9, 10). Bang bang i tuak zongin Pasian in mawhna kisik dingin a hong deih hi, cih thu in thuman thutkak hi. Bang hang hiam cihlehh Pa Pasian in eite hong itna lian mahmah hi.

Nihna-ah Pasian nasepzia i telkhialkha zel hi. Pasian naseplam bel thei na ve hangin ahi zongin Ama sepna i deih kei hi. Gim thuakna ahih keilehh maizumna i tuahkhak ciangin Pasian mawhpaihkha pahpah hi lo i hiam? Pasian in gitlohna tawh kidim hi, i hamsatnate hong dalsak lo hi. Ahih keilehh Pasian in hong kem lo hi, ci-in i ngaihsunkha zel hi. Ahi zongin Pasian in in Ama itna thuciam tawh a tawntungin tha thak a hong guan den hi.

Hosea 2:14-23 sim in. Pasian thu bang pulaak hiam? Pasian tawh kigamla-in a nungta mi na hihlehh Kha Siangtho ngen in. Pasian nusia-in a nungta na hihlehh bang hangin gimthuak ding ngak ding na hi hiam? Topa tungah ki-ap dingin bang in hong dal hiam?

 

TUESDAY                   July 26

 Biakpiaknatungtawnin Nuntakna

 

Job 1:6–2:10 sim in. Job thuak gimna bulpi in bang hi ding hiam?

Hih thu-ah a lamdang thu khat kimu thei hi. Pasian mu dingin vantungmite khat hong pai hi. Satan in tua vantungmite tawh hong paikhawm hi. Pasian in Satan tungah “koi-ah pai na hiam? ci-in dong hi. Satan in ama pai-nate pulaakin “lehitung mun khempeuhah pai kawikawi-in ka om hi,” ci hi (Job 1:7). Tua ciangin Pasian in dotna khat dong lehulehu hi: “ Ka nasempa Job na thei kha hiam? ci-in dong hi. (Job 1:8). Hih dotna in a thupi thudotna hi lo hi; a thupi in a dong Pa hi zaw hi. Job tungah sittelna nei dingin a pulaak pen Satan hi lo hi; Pasian ahi hi. Apiang ding thute thei khol ahihna tawh kizui-in Pasian in Job hopihna-ah Satan mittukna khat ahihlam a pulaak hi. Lungkhamna tawh kidim Job in gimna a thuakna-ah koi bangin tua gimna nawktan zo ding cih a thei kei hi. Tua bang gimna thuaknate in Satan tung pan hong pai ahihna theitelin Pasian tung pan hong pai hi lo ahihna a thei hi. Tua bang gimna a thuak dingin Pasian in Satan phalna a pia hi. A neih lehh lamhte suksiatna thuakin, a tate leh amah mah in a pumpi tawh a thuak hi.

Satan in Job gimsak dingin phalna kipia ahihlehh, Job thuak gimna in Pasian ahih keilehh Satan khat zawzaw tung pan hong pai hilehh bang kilamdanna om ding hiam?Koi bangin Pasian in siangtho-in thuman hiam? Koici bangin a dik, a siangtho Pasian in Job tungah gimna pia dingin phal hi ding hiam? Hih gim thuakna in a tuam vilvel a gim thuakna a hiam? Ahih keilehh tuni tuhun adingin Pasian in eite tawh a hong kizopzia in Job tunga thupiang mah tawh kibang hiam? Job 1:20, 21 in a gen bangin koi bangin Job in a thuak gimnate mu hiam?

Tua bang gim thuakna-ah muhzia lampi nih bangin kimu thei hi. Pasian in gitlohna tawh kidim hi; ahih keilehh Pasian om lo hi, ci-in Amah i nungngatkhak lehh hehna, thangpaihna i tuakkha ding hi. Tua ahih keilehh Pasian mah kiptakin i lehnkip ding hi. Job in a phutkhak gimnate a nawktan zawhna a hang in amah in Pasian bekmah bia- in ama tung bekah kinga hi. Job 1:20 sunga kigen bangmahin biakpiakna tawh kisai-in thu thum i mu thei hi.Biakpiakna in i thuak gimna hamsatnate a hong zawhpih thei hi. Amasa-in Job in ama tha tawh bangmah hih zawhna nei lo, mi cimawh ahihlam kithei hi. “Ka nu sung panin bangmah lo tawh ka piangkhia a, guaktang mahin lehi-ah ka ciahkik ding hi,” ci-in a pulaak hi (Job 1:21). Nihna-ah Job in Pasian in na khempeuh tungah ukna nei ahihna a pulaak hi. “Topa in hongpia-in Topa mah in a lakhiakikhi,” ci- in pulaak hi. (Job 1:21). Thumna-ah Job in Pasian dikna leh thutanna a pulaak hi. “ Topa min kiphat tawntung hen” ci-in a pulaak hi (Job 1:21).

Na thuak gimnate na kantan zo ding hiam? Job zuih thute na zuih nak lehh na thuak gimnate na zozo ding hi.

 

WEDNESDAY             July 27

  Lametna Tungtawnin Nuntakna

 

Pasian telngah sawltak Paul in midangte sangin gimna a thuak zaw hi. Tua bang hi mahta lehh Paul lungkia lo hi. Tua bangin gimna tuamtuamte lak panin Pasian min a phat semsem zaw thei hi.

Paul phut khak samsatnate simin. 2 Corinthians 11:23-29. 2 Corinthians 1:3-11. Ama pulaak bangin Pasian hehpihna leh lainatna i ngah theihna ahang in “ ei mahmah in Pasian tung panin hehpihna leh lainatna i ngah bangin gimthuak mite hehpihin lainatna lungsim i neih theih nading ahi hi. Gimthuakna in bangci ciangin Pasian na sepna hi thei ding hiam? Gim thuakna tungtawnin hotkhiatna nasepna lampi ahi thei dingin pilvang in. Gimthuak mite tungah nasemdingin Pasian in hong deih hi. Cihnopna-ah ei mahmah in zong gim i thuak masak kisam hi. Tua khit ciangin gim thuak mite hehpih theihna lungsim nei thei pan ding ihi hi. Athu bekin theihna hi lo ding a, i tuahkhak thu panin Pasian hong hehpihna leh lainatna i ngah thei hi. Hih thu mah Jesuh nunzia in hong hilh hi (Heb. 4:15).

Paul in a thuak gimnate hangin eite in amah hehpih ding deihna tawh a thuak gimnate a hong hilh hi lo ahihna thu kiciantakin pulaak hi.A thuak gimnate a hong hilh ciangin eite in zong gimna i phut khak tak ciangin Topa Pasian bek mah in hong hehpihin hong lainat ahihna thu a hong hilh nopman hi zaw hi. Hamsatna dongtuaknate tawh a kipelh thei kuamah i om kei hi; sihna nangawng a nawkkha thei ihi hi. Tua bang dinmun tawh a nungta hi mah ta lehhang in a lau lo ding hong hilh hi; bang hang hiam cihlehh eite in Pasian i muang thei hi. I biak Pasian in mite a hingkiksak thei Pa ahi hi (2 Cor. 1:9).

Paul in lungdamna thu gen ding bek a masuan hi sak den hi. Gim thuaknate sung panin Pasian in honkhia ding hi, cih a thei hi. Tua bangin gimthuak talehh tatsat lo-in lungdamna thu agen teitei zawhna pen hih thu thumte tungah kinga hi. 2 Cor.1:10, 11. Amasa-in Pasian in na khempeuh thei-in ciapteh hi, cih a thei hi.”Gimna sung pan a hong honkhia pa in mailam hunah zong a hong honkhia zo lua ding hi” cih a thei hi (2 Cor. 1:10).

Nihna-ah Paul in Pasian bek mah mitsuan den dingin a khensat hi. Kote in Topa tungah lametna koih ka hih manin Amah in a hong honkhia ding hi” (2 Cor. 1:10). Thumnna-ah “ Mi siangthote in thu-um mite adingin kote a dingin thu hong ngetsak un. Tua hilehh mi tampi in kote a dingin thu a hong ngetsak uh hi; Pasian in a hong piakna hangin mi tampi mah in kote’ tang dingin Pasian tungah lungdamna ko thei ding uh hi.”(2 Kor. 1:11).

Gim thuakna hangin nang leh nang kihehpihna na zawh nadingin Paul nunzia tung panin bang thu na mu thei hiam?

 

THURSDAY                           July 28

A Sa Mahmah Meikuangpi

 

Mawhna niin a hong hahsiang thei hamsatnate i pulaak khin hi. Tua bangin hamsatnate i tuah ciangin Khrih zia leh tong a hong neizo sak semsem hi; tua banah a hong hahsiangtho hi. Hih thute siksanin mi tampi in Pasian in a ngongtat Pasian, a sepna khempeuhah hehpihna nei lo bangin a pulaak uh hi. Mi kimkhatte lehulehu in Pasian in eite sung panin na hoih na pha a sem dingin hong deih hi.Hih thugentehnate in itna leh hehpihna pulaak lo hi.Ahi zongin Pasian in ukna nei mi khat bangin mihingte a hong nuai nen nuam hi, ci uh hi. Topa in Ama ngimna a tangtunnadingin nasem a, tua bang hamsatnate i pelh thei hi lo hi. Mawhna tawh kidim lehitungah i nuntak hun sungin thu upna thu-ah hamsatna leh gimnate i thuak kha thei mah hi. Vantung i tun ciangin hih lehitungah i thuak gimnate i tel zaw semsem ding hi. (1 Cor. 4:5, 1 Cor. 13:12), ahi zongin tu-in Pasian in hong ompih hi; hong kemciang hi, ci- in i thuak gimnate i nawkzo thei hi. I tuah thute in lungnopna hong pia thei lo hi mah talehh lungdamna thu hong hilh veve uh hi.

Isaiah 43:1-7 sim in. Aneu nihna-ah Pasian pulaak thu in A mite in tuipi leh meipi kantan ding uh hi. Tuipi leh meipi in a lauhuai gimnate limcing hi-in, San Tuipi leh Jordan Gunpi kantanna limcing zong hi kha thei ding hi; ahih keilehh a nihin a pulaak hi kha thei ding hi. Tua bang lauhuainate panin Pasian in hong dal ding leh hong honkhia dingin i lamet hi. Lam nuam i tun dongin Topa in a hong makaih ding hi. Late 23 sunga Tuucingpa bangin hamsatna hong tun ciangin a tuam vilvelin Pasian in a mite hong kepna i kisam hi. Bang hang hiam cihlehh Amah in a tuute tawh a hong omkhawm hi. Isaiah 43:1-7 en inla nangma kammal tawh na tel bangin gelhkhia in. Hamsat hun ciangin lampi tuamtuam tawh a hong zawhpihnate gelhkhia in. Na lungsimah Pasian dinmun ngaihsun in. Ama kamciamte bangci bangin na nuntakpih ding hiam? Pasian hong sittelna thu thumte a tomin i pulaak dng hi. Amasa-in Pasian in a thuak hamsa mahmah thute hong thuaksak lo hi. Nihna-ah tua bang thuaknate in nuntakna genthei sak ding deihna hi lo-in a hong hahsiangna hi zaw hi. Thumna-ah Pasian in a tawntungin hong kemcingin a hong it den hi; Bang bang piang talehh Pasian in a hong nusia ngei kei hi.

Hih a nuai-a Lai Siangtho munte in Pasian sepnate leh Ama zia leh tong bang pulaak uh hiam? Late 103:13, 14; Matt. 28:20; 1 Cor. 10:13; 1 Pet. 1:7.Koi bangin tua thute na nuntakpih thei hiam?

 

FRIDAY                July 30

Ngaihsutbeh Ding: Ellehn G. White, “The Test of Faith,” pp. 145–155 in Patriarchs and Prophets; “Praise Ye the Lord,” pp. 315–319 in Testimonies for the Church, vol. 5.

“Meikuang lianpi tungtawnin Pasian in a mite a sittel hi. Tua meikuangsa in a sianglo niin bu lom tang khempeuh haltum a, kham siangtho bangin zia leh tong a hong kilang khia hi. Pasian in a mite sittel mah hi. Amah in bang teng siansuah ding kisam cih a theitel hi. Tua hilehh mihing in Pasian hong itna a kilangkhia sak thei ding hi. Ama Sawltak nasemte a hong sittel hi; kinai takin eite tawh a hong omkhawm hi. Pasian in Ama nasem mite tawh a hong omkhawm hi. Ama nasepna mainawt thei dingin a mite a hong zang hi. Tua bang mite Amah in a sittel masa hi. Amah in amaute thaneemnate a kilangsak hi; Ama tungah kinga dingin zong a hilh hi. Tua hi-in Pasian in Ama ngimna a tangtun hi. Amaute in theihna tawh kidim uh a, limtakin a kalsuan mite hong suak hi. Ama ngimna a tangtungsak dingin Pasian in a mite tungah tha a guan hi.” Ellehn G. White, Patriarchs and Prophets, pp. 129, 130.

“Pasian ompihna sungah sittelna thuak ding ihih lehh, a kha mahmah tui dawn dingin leh singlamteh i nial kei ding hi. I tuidawn nading hai a lehn Pa khut i muang ding hi. Hamsatna hun hi lehh gentheih hun hi talehh, Amah i muan ding kisam hi. I hoih zawk nadingin Pasian in na khempeuh hong pia ding hi lo hiam? Hamsatna i phutkhak ciangin koi bangin i lungsimte Ama tungah lamto-in lungdamna tawh Ama min phat ding i hiam? Singlamteh i puakna tungtawnin Ama hong itna kilangkhia-sak ding ihihlam na phawk hiam? Ellehn G. White, Testimonies for the Church, vol. 5, p. 316.

 

KIKUP DING DOTNATE:

 

1.  Abraham bangin upna na nei kei zongin nangma upna thute sim toto in. Tua thute na lawmte tungah hawmsawn in. Tua thute panin bang thute na nuntakpih ding hiam?

2.  Singlamteh tungah kithahna a thuakma nai 24 sung tengin Khrih thuak thute ngaihsunkik in. Bangci bang gimna a nawktan hiam? Koi bangin Khrih in tua gimnate tungah zawhna ngah hiam? Gimna i phutkhak ciangin Khrih nunna panin bang thu bulpite nuntakpih ding i hiam?

3.  Gim thuak mite bangci bangin huh thei ding na hiam? Bangci bang gimnate thuakkha thei ding i hiam?

4.   Ellehn G. White in hih bangin gelh hi: “Lungkham hun ahi zongin lungdam hun a hi zongin Ama sungah muanna nei ni. Tua bangin nuntak ding a pulaak bang nuntakpih ding hamsa hi. Tua bang gimnate i zawh nadingin khat leh khat kihuh diamdiam ding hi lo i hiam? Hunsia sungah zong Pasian tungah muanna nei ding bang hangin thupi hiam?