May 7 | Nungta dingin sihna

May 7 | Nungta dingin sihna

David Diogo de Victoria, 29

MOZAMBIQUE

 

Khangno khat ka hi a, lawm 13 ka nei hi. Hih ka lawmte pen kanza tepin guihtheih khamtheih zangin nitum uh hi. Ken a van lei-in midang ka zuaksawnsak hi. Ka lawmte pai-na munah ka zui a, amau zat khamtheih tuamtuamte ka zang kei hi. Tua hi-in ka lawmte sangin mi hoih zaw khatin ka kingaihsun hi.

Ka makaipa tawh ka kitawng thei zel uh hi. “ Za na tep nop kei leh ko tawh kikhawl thei lo ding hong ci hi; hong sat gawp ding hi ung, ci-in zatep dingin hong sawl hi. Zatep loh theih loh khatin ka ngaihsun hi. Marijuana ka zata kipan siatna sung ka tung hi, cih ka thei hi. Guih theih khamtheih a zuak bek hi nawn lo-in, guktakna tawh ka nungta hi. Guk theih guk mawh ka guta hi. Mawtaw gu-in inn buluh ka kipan hi.

Angola khuapi Luanda sungah mun tuam khat ka nei uh a, palikte in mat dingin hong zongzong uh hi. Hun tomno sungin palikte in ka lawmte 12 kaplum mawk uh hi. Kei bel ka suakta thei bilbel hi. Ka lawmte uh a sih hangin ka lungkia kei a, kipawlpih dang khat ka kipan thak uh hi. Hih munah kei pen a makai ka hi hi. Siatna, gitlohna namkim ka sem uh hi. Palikte in migilo 180 bang kaplum hi, cih zong ka thei hi.40 vei val bangin kolbulh ka thuak hi. Thukhen zumah thum vei bang thusitna ka thuak hi.

Thum vei ka thongkiatna-ah thonginn sung panin Seventh- day Adventist Pawlpi cih ka za hi. Hih pawlpi ka zak masak penna hi. SDA pawlpi mite in manmanin hong pai uh a, Lai Siangtho thusinna hong neihpih uh hi. Thongkiatna pan ka suahtak khit ciangin ka nuneute khat innah ka om hi. Ka kikholhpihte tawh kizom kik ding ka ngaihsun hi.

Gas station khat buluhin ka om laitakun tua muna nasemte khat ka that kha uh hi. Palikte in ka omna inn ah hong pai uh a, that dingin hong pai uh hi. Ahi zongin hong that kha lo-in ka suakta thei hi. Palikte hong pai laitakin ihmu-in ka om a, hong mu kha lo uh hi. Ka nu neu leh lau cihtak mahin lau hi. A inn panin mundang khatah kihemkhia dingin hong gen hi. Kei zong ama inn panin kihemkhia-in ka pa inn nuai mun khatah ka om hi. Ka nu in ka lawmte hong pai khak ding lau ahih manin innah om dingin hong deih nawn lo hi. Dawi nasem thei mi khat kiangah pai dingin hong gen hi.

Tawlkhat sung bel tua dawi nasempa in hong khel thei ding tawh kibang hi. Kha li sung guihtheih khamtheih zang lo-in ka om thei hi. Ka innkuanpihte lungdam mahmah uh hi. Ahi zongin a kha ngana ciangin ka nunluite ka zui kik hi. Nidang hunlaite sangin tu-in siatna sungah nuam ka sa semsem hi. Ka nuntakna in lamet nei lo khat hong suak hi, cih ka thei hi. Tua leh Pimp min nei khat tawh ka kimu hi. A pumpi tungah tattoo ding takin kisuai ka mu hi. Amin le a meel puakzia pen kei bang mahin migilo khat hi ding hi, ci-in ka ngaihsun hi. Ahi zongin amah bel tua bangin mi gilo hi lo hi. Amah pen Seventh-day Adventist thu-um mi khat hi. Ni khat Pimp in Romans 8:14 hong lak hi. “Kha Siangtho in mi tampi makaihin amaute in Pasian tate cihna a ngah uh hi. Hih thute ka zak ciangin ka lungsim ah Pasian ta khat ka hi, cih hong lutin nuamna tawh ka kidim hi. Pasian in kei ading bang geelna nei hiam, cih ka thei kei hi.

Pimp tawh Lai Siangtho thusinna ka nei khawm uh hi. Tua bangin thusinna ka neihna uh panin Pasian hong itna tampi ka theihbeh toto hi. “ Pasian in leitung mite a hong itna lian mahmahin Amah a um mite in kisia lo-in tawntung nunna a ngah nadingun a tapa a hong pia hi” (John 3:16). Ka nunzia hong kikhel ka thei hi. Sihnopna lungsim cihte ka nei nawn kei hi. Nunlui gamtatnate nusia-in Jesuh sungah nunna thak ka lunggulh ta hi. Ka lungsim Amah ka ap a, 2013 kumin SDA pawlpi-ah ka kituiphum hi. Tu-in Pasian min ka phat hi. Pastor sem dingin Mozambique Adventist University ah Lai Siangtho thu sinin ka om hi. Ka innkuanpihte, ka behte le ka veng ka paamin SDA ka suah deih lo uh a, hong langpan mahmah uh hi. Ka nuntakna- ah a thupi pen in Jesuh adingin nungtak ding simloh a thupi zaw dang ka thei kei hi. Ka nuntakna in Ama hong leisa hi-in Ama ading bekin ka nungta nuam hi.

Tu quarter Sabbath 13na sumpi in Mozambique Adventist University ah kipuak ding hi. Hih sangah Lai Siangtho thusin sangnaupang tampi om uh hi. Laisinna sanginn khan lam nading le lai sinna van tuamtuamte lei nadingin kizang ding hi.

MUC in Lezang biakinn le Tamu biakinn huang umna dingin kizeek ding hi.