May 14 | Party maw Pasian (Laam Pawite Ahihkeileh Pasian)

 

May 14 | Party maw Pasian (Laam Pawite Ahihkeileh Pasian)

Agen: Bessie Lechina, 35

Botswana Gam (Khangkhin Numei khat gensak in)

 

Kikhop nading a zong Bessie in Sunday nisim in Seventh- day Adventist biakinn gei a totkawmin, tua biakinn pen Sunday nisim phial a kikhakna ahang thei zolo hi.

Ahang theizo tuanlo ahihmanin a tawpna ah hong dinkhawla, Botswana gam laizang lam, biakinn kiangaa inn khat ii huang sungah a na ding kum sawmval gual numeino khat tawh kiho uh hi. “Cik ciangin biakinn kihong ding hiam? Tawh tawh a kikalh thapaai mah ahi hiam?” ci-in ama’n dong hi.”Tua pawlpi pen Adventist pawlpi hi. Ahizongin tua biakinn ah na kikhawm thei ding hiam cih ka theikei hi. Adventist pawlpimi khat hih ding baih hetlo hi” ci-in numeino in dawngkik hi.

“Bang thu a gen nuam nahi hiam?” ci-in Bessie in dngkik hi. Numeino in zong, “Tua biakinn ah a kikhawmte laamna pawite ah a pai loh uh baanah suangmanphate tawh kizeem lo uh hi. Amau pen Saturday nisim in biakinn ah kikhawm uh hi” ci-in genpha hi. Botswana gam ah Saturday nisim in khangnote laamna pawi ah pai uh hi.

Bessie in laamna pawi ah pai nawnloh ding leh a bilbahte lakhia ding cih mawkpen ngaihsun zo hetlo hi. Tualeh, “Hih pawlpi ah kikhop ding bel hi thei kei” ci-in Bessie in genkik hi. Bessie pen Khristian a hilo innkuan khat panin khangkhia ahihmanin Pasian’ thu tawmbek ama’n thei hi. Bangbang ahizongin, university ah lai akisin masiah sangkhak sungin Khristian suah ding khensat hi. Pawlpi tampi ah va pai kawikawi ahihmanin Adventist pawlpi-in a biakinn uh Sunday sim a khak lam uh ama’n phawkkha hi.

Bessie pen University ah pilna sin dingin Botswana gam ii khuapi thupi pen ahi, Gaborone khuapi ah va lal hi. A sawt loin, ama’ inndei sungah a ompih Solofelang pen nilai ni, kiginni leh Sani nisim biakinn ah a kikhop lam thei himah leh awlmawh selo hi. Sani nisim in amah laamna pawi ah paia, Sunday ni a kikhop nading pawlpi a zong kawikawi ahi hi. Ahizongin, tua pawlpite in Lai Siangtho zanglo uh ahihmanin bangmah theituam kisa hetlo hi.

Kha tampi hong sawt khit ciangin, Bessie in, “Nipi kaal khat ah thum vei na kikhopna bang pawlpi hiam?” ci-in inndei khat sungah a ompih nu hong dong ta hi.

“Tua pawlpi pen Seventh-day Adventist pawlpi hi-in, pawlpimite Sani ni-in biakinn ah kikhawm uh hi” ci-in Solofelang in genkik hi. Bessie in zong a khaanpih nu limtakin a etphat leh suangmanpha tawh amah akizep loh lam hong theita hi. Tualeh, ama’ teenna khuapi sungaa numeino khat tawh akihona uh hong phawkkik a, “Tua biakinn ah ka kikhop ding piangthei ken teh” ci-in ama’n hong ngaihsun hi.

Tawlkhat sung, Sunday nisim pawlpite ah a va paipai pen cimtaak ahihmanin Adventist pawlpi pen a tuamdang deuh kha diam aw ci-in a thu kan nuam hi. Sani ni bek hilo kikhop ni dangte ah zong biakinn kikhop ding ama’n khensat hi. Nilai ni- in Adventist sangnaupangte kikhopna university laisinna inndei khat sungah Solofelang tawh Bessie hong kikhawm hi. Pastorpa in innkuanpih neih ding vai tawh kisai thu a gen pen ama’n zaknop sa hi. Bessie in ni khat ni ciangin pasal neih ding lawp mahmah hi.

Kiginni nitak ciangin innkuanpih neih ding vai tawh kisai a ngai dingin a khanpih nu tawh Bessie hong kikhawmkik hi. Sabbath ni zingsang ciangin Solofelang tawh biakinn ah hong kikhawmkika, sunan neek khit ciangin Lai Siangtho thu sinna ah zong kihel hi. Tuani aa kipan-in Sabbath ni sim biakinn ah hong kikhawmta hi.

Bessie’ nuntakna damdam in hong kikheel hi. Ama’ aadingin suangmanpha kizepnate leh Sanini lampawite a nusiat ding haksa nawnlo hi. Thungetna tawh Topa Pasian tungah kiho thei cih ama’n hong telta hi. Bessie’ nuntakna a mu khempeuh in lamdangsa uh ahihmanin dotna tuamtuam hong dong uh hi. Amah zong ama’ upna thu lungdam kipaaktakin hong genkhia hi.

Bessie pen sang kikhak madeuh in tui kiphum hi. Ama’ khaanpih Solofelang zong a lungdam lua ahihmanin hong kap khaliangh hi.

Tuni, Bessie pen kum 35 phata in, naupang thumte’ nu ahi hi. Saklam Botswana gamaa Adventist pawlpi’ tansawm bawda saang khat ahi, Eastern Gate Academy ah sangsiama a sep laitak hi. Ama’ pasal zong sang ii sumbawl nalam manager ahi hi. Amah in sangnaupangte’ nuntakna ah kikheelna tuamtuam mu hi. Khatveivei, nulehpate in a ukhak a tate uh sang ah hong kha uh hi. Ahizongin, sangnaupangte sang panin a paikhiat uh ciangin amaute hong kilamdang uh hi” ci-in ama’n gen hi. Nulehpate’n zong, “ka tate uh hong kikheel ahihmanin lungdam mahmah ung” ci-in hong gen uh hi.

Eastern Gate Academy huang sungaa Eastern Gate Zolai saang pen 2017 kum, January kha in a kihonna ah Sabbath 13na sumpi pawlkhat kizang hi. Hih saang aa pilna a sin kum 6 a pha tanu Joanna’ nu Bessie in, “Ka sang uah naupang a tam theithei Topa Pasian’ kiangah ka tutpih zawh nadinguh thu ka ngen hi” ci-in gen hi.

Sabbath thuman theihtelna ka neih ciangin tua ka inn a nasem a hong pai nu tawh ka kiho uh hi. “ Biakinn ah kikhawmin pai nawn kei in. Ka innah nasem nuamin nong pai nop le hong pai in” ci-in ka gen hi. Nasem lo-in biakinnaah pai-in kikhop pain awn loh ding cih pen thu hoih hi lo hi, ci-in ka gen hi. Tu-a kipan Monday ni pan Friday ni dong ka innah nasemin nong pai ding a, ahi zongin Saturday ni-in hong pai kei in, ka ci hi. Tua hi-in hih nu in kikhop hun tampi a ngah thei hong suak hi. Tu-in amah in tui kiphum dingin Lai Siangtho thusinna a nei hi. Sabbath thuman theihtel nopna nei ka hih manin pastor phone nambat ngenin ka hopih den hi. Amah pen a thudik mi khat hi- in laibu tampi ka sim dingin hong pia hi. 2021 sung Sabbath ni khatin ka kituiphum hi.

Tu-in mi thak khat ka hi ta hi. Nisimin hehpihna sungah ka nungta toto hi. Pasian in ka mawhna hong maisak hi, ci-in lungnopna le khamuana zong ka nei hi. Ka zia le tong in Pasian zia le tong tawh kinai semsemin Amah ka suut nadingin thu ka ngen tawntung hi.

Tu quarter Sabbath 13na sumpi pen Antonia khuapi, Angola gama SDA sanginn phuah nadingin kipuak ding hi; Lombe khuapi-ah zong SDA sanginn phuah nadingin zong kipuak ding hi. Tua banah Huambo khuapi ah zong Adventist University of Angola sang adingin zong kipuak ding hi.

MUC in Lezang biakinn le Tamu biakinn huang umna dingin kizeek ding hi.