June 4 | Lamet Hetloh Kutna

June 4 | Lamet Hetloh Kutna

Agen pa: Esmeralda Joao, 27

Angola Gam

 

Ka pa pen Khristian pawlpi khat ii pawlpimi hia, ka nu pen Angola gam ii khuapi thupipen ahi Luanda khuapiaa a dang pawlpi khat ah pawlpimi khat ahi hi. Ka neulai-in, Sunday ni ka pa tawh ama’ pawlpi ah ka kikhawm uha, a Sunday nikik ciangin ka nu’ pawlpi ah ka nu tawh ka kikhawm uh hi. Ahizongin, kum 18 ka phaak ciangin tua pawlpi nihte ah ka kikhawm 4nawnkei hi. Ka nu’ pawlpi ah awkim lasate lakah ka kihel nawnloh baanah ka pa’ pawlpi ah khangnote’ Pasian’ nasepna ah zong ka kihel nawnkei hi. “Banghangin biakinn ah kikhawm nawnlo nahi hiam” ci-in ka nu in hong dot ciangin, “Nuam asa kei hi” ci-in ka dawngkik hi.

“Tua ahihleh, nuam nasakna pawlpi khat zong mai ve. Topa Pasian’ tungah hun hoih hun pha khat pia limhlimh sin aw” ci-in ka nu’n hong gen hi. Ahizongin, ke’n leitung thu bek lawpin ka neita hi.

Ka unu in kiteen ding kamciam a piak ciangin kiteenpih dinga zuthawl a pia a pasal tawh a kiteen ma-un Seventh-day Adventist pawlpi pan Pastorpa tawh thu kikupkhopna nei uh hi. A kiteen khit uh ciangin Adventist pawlpi biakinn ah kikhop ding khensat uh hi. K unu in Lai Siangtho munte leh thugennate hong khakkhak ta hi. Tua khitciangin a piang ngeilo thute damdamin hong piang toto hi. Ka lawmte khatin Topa Pasian’ kiangah ka lungim ka aap ding hong hanthawn hi. Tua kaalsung mahin adang ka lawmte khat in, “Hih leitung hoih lo hi. Topa Pasian’ kiangah ki-pumaap in”, ci-in Topa Pasian aadingin ka nuntaak ding hong thuum ngaungau hi. Topa Pasian in Amah a zahtaak pasal hoih hong piak nadingin ama’n thu hong ngetsak sawnsawn hi. Ama’ thungetna a thu in ka lungsim hong sukha mahmah hi.

A sawt loin, ka unu’n zong, “Topa Pasian in naakpitakin nang hong taai hi ci-in ngaihsun ing. Ke’n ka naunu hong taai kei leng, nang mawhna sisan ka hong ngen ding Topa Pasian in ci hi ven” hong ci sawnsawn hi.

Ka unu in Ezekeiel 3:18-19 sungpan, “Migilo khat pen si ding hi, ci-in kong gen ciangin amah kikheelin a nuntak theih nadingin thu na hilhkholh keileh, tua mi pen mawhnei mahin si dinga, ahizongin, ama’ sihna thu ahihleh nang kong ngawh ding hi” ci-in hong sim ngiat hi.

Ahihhangin, hanciamin, paulap ka zonga, “I nu pawlpi ah ka kikhawm mah ve leh” ci-in ka gen hi. “Ahizongin ka naunu in tua pawlpi ah nuam salo hilo na hiam? Adventist pawlpi biakinn khat peuhpeuh ah kikhawm pongpong dih ve. Amau hun hoih nun pha khat pia sin aw” ci-in ka unu in in hong genpha hi.

Mai kaal Sabbath ni ciangin Adventist pawlpi biakinn khat ah kikhop ding kamciam ka pia hi. Ahizongin, na sem dingin hong kisam ahihmanin ka kikhawm thei kei hi. Sabbath ni 3 vei a kizomin na ka sem hi. Ka unu in kikhop vai hong dot ciangin nasep tamluat manin ka kikhop theihlohna ka gen hi. “Nasep pawlkhat pen Topa Pasian’ kiangpan thupha ngahna hilo ahi maw. Ka nau in bangmahaa kimanglo nate aadingin nasep hanciam na hi. Nasep nusia-in Topa Pasian masak limhlimh ding nahi maw” ci-in ka unu in hong gen nguutnguut hi.

Ka cih nading ka thei nawnkei hi. Ka teel man hi loin, ka ci a nat manin nasep ka khawlta hi. Siikhaan aa Siavuanpa pen kum 4 sung ka siavuan ahihmanin kei hong thei mahmah hi. Siavuan leh cina kikaal kizopna hoihtak ka nei uh hi. Ahizongin, tutungin, ama’n ka natna hong veel kawmkawmin, ka khut hong leenin, kiteeng dingin hong kun hi. Tua ma-in, ama’n kei hong ngaih lam hong gen ngeilo mahbangin ke’n zong amah cikmahin ka pasal dingin ka ngaihsun ngeikei hi. Ahizongin, ama’n hong kut ciangin kei zong ama’ zi hih ding ka thukimta a, “Sia aw, nang tawh kiteeng nuam mah ing” ka cih leh amah zong hong nui hiuhiau hi.

“Kei pen Seventh-day Adventist pawlpimi khat kahi hi. Ka zi zong Adventist pawlpimi khat hi leh ut mahmah ing” ci-in ama’n hong gen hi. Kei zong nuihsan hiuhiau kawmin, “Lem in cia” ka cikik hi. A beisa nipi kaal tawmno sungin thu lamdang tuamtuam hong piang hi. Ka it mahmah ka lawmte nih leh ka unu in Topa Pasian’ kiangah ka lungsim bup ka aap ding hong hanthawn uh hi. Ka lawmte khat in Pasian a zahtaak pasal hoih ka ngah nading thu hong ngetsak in, ka unu in Adventist pawlpi khat ah kikhop ding hong thuum ngiat hi. Tu-in, Adventist pawlpimi siavuan khat tawh ka kiteenga, Adventist pawlpimi khat ka suah ding ama’n hong kun hi. Topa Pasian in hong sapna ka langpan thei nawnkei hi. Tui kiphuum dingin Lai Siangtho thu ka sin saan hi.

Tuni-in, kei pen Adventist pawlpimi khat ka hi taktak ta hi. Siavuanpa in kiteen ding hong kut manin Adventist pawlpimi khat kahi kei hi. Ka unu in hong hanthot manin Adventist pawlpimi khat ka hikei hi. Pawlpi nuam kasak manin zong Adventist pawlpimi khat kahi tuankei hi. Ama’ Thupiakte a zui ding leh Topa Zeisu upna ah a lawp mi siangthote tawh a kipawlkhawm dingin Topa Pasian in a hong sap manin Adventist pawlpimi khat kahi hi. Ka lungsim khempeuh Topa’ aa ahi hi. Tu quarter Sabbath 13na sumpi pawlkhat pen Esmeralda teenna Angola gam, Luanda khuapi ah Seventh-day Adventist pawlpi saang khat lamna ah kizang ding hi. Phaltak aa nong piak uh sumpi hangin lungdam mahmah ung.

MUC in Lezang le Tamu biakinn huang umna dingin kizeek ding hi.