June 25 | Lamdangsak Huai mahmah Thupiang Khat

 June 25 | Lamdangsak Huai mahmah Thupiang Khat

Agen pa: Milagre Braga Caminbao, 22

(Khangno pasal khat gensak in)

 

Ka min’ a khiatna pen ‘Lamdangsakhuai’ hia, ka nuntakna aa thupiangte zong lamdangsakhuai thupiang khat ahi hi. Ahizongin, nang lament nam thupiang hi thei hilo thei hi.

Angola gam ah Khristian innkuan khat panin ka khangkhia- a, pawlpi’ thukhun om bangbang citaktakin ka zuih baanah saangmaang sia khat ka hihna tawh ka teenna gamkhen sungah Pasian’ na ka sem hi. Ahizongin, kum 14 ka phak ciangin Agola’ khuapi thupi pen Luanda khuapi ah na sem dingin ka lal ciangin ka pawlpi ka zon hangin ka mu zokei hi.

Ka pawlpi bekmahin Lai Siangtho maan takin a thei hi cih khauhtakin um kahihmanin adang pawlpite ah kikhop ding ka nial den hi. Tua manin, ka omna inn ah Sunday ni sim kum khat sung vilvel kei guak mah ka kikkhawm hi. Ka teenna khuapi ah ka hawhkik leh, ka pawlpiaa Lai Siangtho thu hong hilh Sianu leh ka lawmte tampitak Seventh-day Adventist pawlpi sungah na luut ngeingai uh hi.

Ka heh suaklua ahihmanin, ka lawmte’ maitang mah ah, “Pawldangte thuhilhna banghangin saang nahi uh hiam? ci-in ka taai giap hi. Amaute’n kam khat nangawn hong paupih lo uh hi. Ni khat ni ciangin, Lai Siangtho thu hong hilh Sianu’ inn ah Adventist pawlpi ah a luutna thu dong dingin ka va hawh hi. Ama’n maitai takin hong muak hi. Kei zong ka dotnop thu ka dong paha, ama’n zong Topa Pasian in thupha a piak ni pen ni masa ni hi loin, ni sagih ni a hihna Lai Siangtho sungpan mukhia ahihna thu hong gencian hi. Amah in Lai Siangtho bu hong leema, Piancil 2:1-3 sungah, “Tua ahih ciangin vantung, leitung leh a sungaa omte khempeuh kiman khin hi. Ni sagih ma-in Pasian in a nasepte zo khinta-a, Ama’ hihsa nasep khempeuh panin ni sagih ni-in a tawlnga hi. Tua ahihciangin Pasian in ni sagih ni thupha pia-in siangthosak hi. Banghanghiamcihleh piansak nasepna Ama’ nasep khempeuh panin tua ni-in Pasian a tawlnga hi” ci-in hong sim deudeu hi.

Tua khitciangin, Sabbath thu pen Pai 20:8-11 sungah, “Sabbath ni a siangtho aa zat ding phawk un. Ni guk sung nomau’ na semin na nasep ding khempeuh uh na hih ding uh hi. Ahizongin, a ni sagih ni pen Topa note Pasian’ Sabbath ni ahi hi. Tua ni-in, note, na tapate, na tanute, na naseppate, na nasemnute, na ganhing uh ahia, peemtate in ahizongin na bangmah na sem kei ding uh hi. Banghanghiamcihleh, ni guk sung tengin Topa in van leh lei, tuipi leh tuate sungaa om khempeuh bawla, a ni sagih ni tawlnga hi. Tua ahihcingain Topa in Sabbath ni thupha pia-in siangthosak hi” ci-in hong sim deudeu leuleu hi.

Sianu in nuihmai hiuhiau in kei hong et kawm in, “Ka lungsim khempeuh tawh Topa Zeisu’ nung zuih ding ka khensatta hi” ci- in hong gen hithiat hi. Ama’ tungaa thupiang pen kei aadingin lamdang lua ahihmanin hong gen thute ka thukim zo mahmah naikei hi. Amah in Sabbath ni-in Lai Siangtho thu sinkhop ding hong genpih hangin ama’ thugen cikmahin a ngai nawnlo dingin ka khensatgiap hi. Luanda khuapi ah ka ciahkik ciangin ka sep ngeiteng sep ding ka hanciam hangin Lai Siangtho thu hong hilh Sianu’ hong thugente ka mangngilh thei hetkei hi.

Ka nasepna ah ka lungsim hong buaisak mahbangin ka lup ciangin zong ihmut ding haksa ka sa hi. Lai Siangtho thu hong hilh Sianu in ni sagih ni Sabbath zuih ding a khensat giapna in sun tawh zan tawh ka lung hong buaisak hi. A tawpkhakna ah, Seventh-day Adventist pawlpi khat ah va hawha, pawlpimite’n ni sagih ni a zuihna a hang kan ding ka khensatta hi. Kei aadingin lungnopna ka ngah ding thu phamawh hong hita hi.

A Sabbath ni kik ciangin Adventist pawlpi’ biakinn khat sungah ka luut hi. Kei pawlpi lo buang a dang pawlpite ah khatvei zong a lut ngei nailo kahi hi. Amaute lakah khat in Sabbath ni tawh kisai ka thudotna pen pawlpi Makai khat kiangah hong gensak hi. Ama’n zong Lai Siangtho thu hong hilh Sianu’ hong gen Lai Siangtho munteng mah hong gencian hi.

Sabbath ni-in ka kikhop hangin Pastorpa’ thugen ka thukim kei hi. Ka pawlpiaa a kigen Pasian’ thute tawh kibanglo ahihmanin ka deih kei hi. Ahizongin, Sabbath kikciangin Adventist biakinn ah ka kikhawmkik hi. A maikaal Sabbath ni ciangin zong tua pawlpi mahah ka kikhawmkik zel hi.

Sabbath ni ka kikhop nopman hi loin, ka pawlpi khuapi sungah muzo ngiatlo kahihmanin kum 5 sung vilvel Adventist biakinn ah a kikhawm kahi hi. Hih hun sungtengin, Adventist pawlpimi khat ii inn ah Lai Siangtho thu sinna ah ka kihela, Friday nitaak sim, biakinn aa tui kiphum nading thusinna ah zong ka kah hi. Topa Pasian in ni sagih ni pen siangthosak takpi ahihna ka tel semsema, ka lungsim sungah Topa Pasian ka itna zong hong khang semsemta hi.

Ni sagih Sabbath ni bekmah zuih ding ka khensatta hi. Kum 19 ka phak ciangin Seventh-day Adventist pawlpi sungah tui ka kiphum peetmahta hi.

Tuni-in, ka nuntakna pen nidang bang nawn loin, lungnopna leh kipaakna tawh hong kidimta hi. John 8:32 sungah, Topa Zeisu in, “Tua ciangin thuman na thei ding uha, tua thuman in note hong suaktasak ding hi” ci-in hong gen hi.Thumaan thutak ka muta-a, Topa Pasian’ hehpihna tawh mawhmaisakna zong ka ngahta hi. Hih pen kei aadingin lamdangsakhuai mahmah thupiang khat ahi hi.

Tu quarter Sabbath 13na sumpi pawlkhat pen Milagre teenna Anglogam aa geelna sa innpi 4 lam nading, Luanda khuapi aa Adventist pawlpi sang khat, Adventist pawlpi biakinn khat, Belize khuapi aa tan nga pan tan 8 dong sang khat, Lombe khuapi aa ngaihsutna hoih kikumkhopna phualpi khat leh Huambo khuapi aa Anglogam’ Adventist university aadingin pasal bawda khat lam nadingin kizang ding hi. A dang sumpi pawlkhat zong Malawi gam aa geelnate leh India tuipi sungaa tuikulh Mayotte gam aa geelna aadingin kizang ding hi. Phaltak aa sumpi hong pia ding note tungah lungdam kong ko khol hi.

    Tu Sabbath pen Quarter cin Sabbath ahih manin sumpi khiat ngei a zah thum khia ciat ding hi hangh.

MUC in Lezang le Tamu biakinn huang umna dingin kizeek ding hi.