June 18 | Hong Hawlkhia Peetmah

June 18 | Hong Hawlkhia Peetmah

Agen pa: Manuel Salvador Tunda, 19

Angola Gam (Khangno pasal khat gensak in)

 

Angola gamaa Khristian pawlpi khat pan ka khangkhia-a, kum 14 ka phak ciangin tuithehna tawh tui ka kiphum hi. Ahizongin, Topa Pasian’ thu ka theihzah tawh ka lung a kim zokei hi. A diakin, Seventh-day Adventist pawlpi’ thuhilhnate in ka lung hong buaisak phadeuh hi. Amaan Sabbath ni thu lamdang kasa-a, “Banghangin Protestant Pawlpi khemepeuh in Sabbath ni pen ni masa ni-in zui uha, Seventh-day Adventist pawlpite in ni sagih ni zui uh hiam?” ci-in kei leh kei tamveipi ka kidong hi.

Tua ma’nin, a nununglam ciangin ka pawlpi Makai tampite kiangah, “Banghangin Seventh-day Adventist pawlpite in Sani ni -in kikhawm uha, eite pen Sunday ni-in kikhawm ihi hiam?” ci-in ka dong hi. Pawlpi makaite in Sunday ni-in Topa Zeisu sihna panin a thawhkikna pahtawina hi ci-in hong gen uh hi. Ahizongin, Topa Zeisu in kikhop ni ding Sani ni pan Sunday ni ah a kheelna Lai Siangtho sung panin mun khat beek amau hong lak theilo uh hi. Amau hong genphatnate uh in ka lung hong lungkimsak zolo hi.

Hope Channel TV et leh ngaih ka kipan hi. Hih channel ah thugente in Thupiak 10 te sungpanin ni sagih ni Sabbath ni pen thupisak phadiak uh hi. Topa Pasian in ni sagih ni Sabbath ni pen leitung a piansak lai-in siangthosaka, Topa Zeisu in zong hih leitungah a om lai-in Sabbath ni a sianthosakna thu ka thei toto hi. Ka dotna Sabbath tawh kisai-in a dawnna ka muta a, ka lungkimta hi. Seventh-day Adventistte in ni sagihni aa a kikhopna ahang telta ka hihmanin a maan ni-in Sabbath zuih ding ka khensatta hi. Tui thehna tawh tui ka kiphum khitzawh kum nih ciangin Topa Zeisu tui sungah a kiphum teekteek bangin tui kiphum ding ka khensatta hi. Seventh-day Adventist pawlpi sungah ka luut nuamta hi. Ka khensatna ka pa ka gen leh hehlua ahihmanin inn panin hong hawlkhia peetmahta ahihmanin ama’ naunu ka ni’ inn ah ka omta hi.

Ka nulehpate tawh ka omkhop nawnkei hangin buaina khang semsem hi. Ka beh ka phungten zong ciang tawh saat ding zah dongin hong lauthawngsak uh ahihmanin ka om nading ka thei nawnkei hi. Tuni dongmah,Sani ni Sabbath ni-in ka kikhawm a, tui kiphumnopna lungsim ka khiam tuankei hi.

Ka pawlpi lui pan Pastorpa in ka pa tawh na kiho uha, ama’ inn ah kei hong omsak ding kithukim uh hi. Ama’ inn ah ka om sungin, Pastorpa in pawlpi lui ah a kiheikik dingin nipi kaal thum sung vilvel kei hong zol hi. Ahihhangin, Topa Pasian in Sabbath ni pen Sani ni pan Suanday ni masa ni ah a kheelna Lai Siangtho mun khat zong hong lak theilo hi. A tawpkhakna ah ama’ inn panin kei hong paikhiasakta hi. Bangbang ahizongin, buainate hong suuksia semsem lozaw in hong hoih semsem zawta hi. Nisim-in, Lai Siangtho ka sim mahbangin Topa Pasian’ thu leh Ama’ hong itna thu ka thei semsem hi. Ellen White kamsangnu thu zong ka theita a, ama’ gelh laibute zong sim ka kipan hi. 2021 kumin, Angola gam, Luanda khuapi aa New Jerusalem Seventh-day Adventist pawlpi ah tui sung takpi ah tui kiphumta ka hihmanin Topa Pasian ka phat hi.

Ka nuntakna ah ka phuutkhaak gimna leh haksatnate aadingin Topa Pasian’ hong hehpihna ka phat hi. Hih bangin haksatnate ka phuutnate in Honpa Topa aadingin a kizangthei semsem dingin hong zuun bekloin, a lamdang Topa Zeisu’ vangliatna ka muan semsem nadingin hong thahaatsak hi. Hong kisaatna ka liammate dam khinta-a, liammate a hihleh om lai phot hi. Topa Pasian’ hangin tha ka ngah mahmah hi. Ka innkuanpihte’ lungsim ngah zoa, innkuan kipumkhat in biakpiakna ka bawl theih nadinguh hehpihna tawh thu hong ngetsak un.

Tu quarter Sabbath 13na sumpi pawlkhat pen Manuel teenna Angola gam, Luanda khuapi ah Topa Zeisu thu tawh kisai amau theih nop mahmah dotnate aading a dawnnate naupang tampi in a zak theih nadingin Seventh-day Adventist pawlpi saang khat lamna ah kizang ding hi. Phaltak aa nong piak uh sumpi hangin lungdam mahmah ung.

Mai Sabbath in Sabbath 13na ahih manin sumpi khiat ngei a zah thum khia dingin hong kiging in.

MUC in Lezang le Tamu biakinn huang umna dingin kizeek ding hi.