April 30 | TUA GAL KHATAH KONG MU DING HI

April 30 | TUA GAL KHATAH KONG MU DING HI

Ocrhain Matengu, 31

NAMIBIA 

 

Ka pa kik a nasepna panin inn hong ciah ciangin awng buabua-sa in hong ciah den hi.

“Mary! ci-in hong sam pahpah hi.Bang hong pian ding ka thei pah hi. Ka pa inn hong ciahin ka nu in vuak thuak pahpah hi. Kum 5 a phak ciangin ka sanggamte tawh Nambia gam khua no khatah ka pai uh hi. Ka pi tawh innngakin ka om u a, tai 20 bang kigamlatna khua khatah khualzin khia ka hi uh hi. Ka nu in anhuan bukah nasep manlah mahmah hi. Nasep kawmin ka sanggampa a pua hi. Tommy in ka nu puak nop a sa mahmah hi. Ka pa kik in an huan buk kongkhak panin gal etin om a, “ Tu tan vei an min nai lo maw’ ci-in ka nu mai beng vat hi. Ka nu zong awngsa-in inn sungah lutin inn nung lampan vakkhia hi. Ka pa kik in nungdelh in a khut ah ciang gol mahmah khat a tawi hi. Tha khat thu-in a ciang tawi tawh ka nu dengphei hi. Ka nu zong ciang tawh kipaal kha-in tuksukpah hi.

Tommy la kap cih takin kap a, “ ka tapa si sak ni teh” ci-in ka pa ot san hi. Tua kimah a om mite’n hehpih huaisa-in ka nu umcih uh a, mi khat in palik khat sampah hi. Palikte zong hong paipah uh hi. Cina pua mawtaw zong hong tung pah hi. Ka pa kik pen palikte’n kol bulhpahin thonginn den na uh hi. Tommy a lu ah liamma lianpi ngah ahih manin zato kipuak hi.

Siavuante’n liktak velvel uh a, khitui luang kawmin ka nu tungah “ naupang pen liam lua mahmah ahih manin a khuak kisia hi, ci-in gen uh a, a taklam zaw thei ding hi ci uh hi. Hih thu a zak ciangin ka nu zong kap khia pah hi. Zato a om khempeuh in ka nu kah za ciat uh hi. Tua bangin dahin ka om laitakun a kiu mun khat pan mi khat in “ thu i ngen diam? hong ci hi. Tua thu hong ngetsakpa in a khut vantung lamah lamto-in “ Vantunga om ka pa aw, kei pen Elijah hi lo hing. Hih zato sunga om mite sangin zong a siangtho zaw mi ka hi tuan kei hi.Ahi zongin Khrih hehpihna nuai ka bukna mun panin thu kong ngen hi. Hih mite hong phawk in. Amau natna gimnate hong en in. Nangma deihna bangin piangzaw ta hen. Jesuh min tawh thu kong ngen hi. Amen, ci-in thungen hi.

Thunget aman khit ciangin ka omna inn sung teng dai khipkhep hi. Ka sungah lungnopna khat ka ngah hi. Vantung ah Pasian om takpi ahihna ka thei hi. Thu hong ngetsakpa in zong Pasian a om mi khat ahihna tawh kizui-in Pasian in a thungetna pia hi, cih ka thei hi.

Tua zawh nipi kaal nih khit ciangin Tommy in zato tuak thei ding hong hi ta hi.Siavuante pulaak bang mahin a pumpi taklam siah tang thei pha mei lo-in hong om mawk hi. A pau ciangin zong kitel mel lo, hoih takin pau thei lo hi. Kha li sung zato bekbek ka ngaihsun hi. Zato a hong thungetsak ka phawk pha mahmah hi. Kum khat khit ciangin kei pen kum 6 a pha a, Sabbath ni hong tunsialin ka sanggam khat tawh biakinn ah kikhawm dingin ka pai thei uh hi. Tua bangin ka kikhopna-ah pawlpi mite thungetzia in zato a thu hong ngetsakpa thungetna tawh kibang hi. Hih mite’n Pasian thei ngel ci uh, ci-in ka ngaihsun hi. 

Hun hong bei toto-in Tommy nuntakna lah gimna le natna tawh hong kidim hi mawk hi. Ni khat, kum 12 a cingin, kei pen kum 15 ka pha hun pawl hi-in ka pi in suun hong pia ding ngakin singkung nuai khatah ka tawlnga uh hi. Thakhatin Tommy pen tha bei-in lei lakah hong tuksuk mawk hi. Khua hong phawk ciangin “ a si ding lah ka hi mawk a” ci-in hong paukhia hi.Tua bangin a pau khitteh pau lo-in nak zong nak nawn lo hi. Manlang takin ka pi ka sampah uh a, nakpi takin ka kap hi. Cih nading theilo-in lamet bei-in ka om uh hi. Zato a thu hong ngetsakpa ka phawk mahmah hi.A thunget zong ka phawk lai-in lungnopna lunggulh ka hih manin “ Naupang khat hi lai ing, hih gimna thuak zawh nading tha bangmah nei keng. Tommy damna hong pia lai in,” ci-in thu ka ngen hi. Amen ka cih lian leh Tommy hong hiatciai hi. Thum vei bangin hiatciai-in ka pi zong nuamlua- in “ hong nungta kik ei” ci-in nuamlua-in hong awng veva hi. Topan ka thunget hong dawng ahih manin Ama tungah ka lungdam mahmah hi.

Tua zawh kum sawm khit ciangin Namibia khuapi Windhoek ah ka tuah uh hi. Hih khua ka tun uh ciangin SDA pawlpi khatah ka ki-ap uh hi. Hih pawlpi pen thunget hahkat mahmah uh a, Pasian a um pawlpi hi, cih ka thei hi.

Ni khat ka sanggam nu in hong sam Tommy cina hi, ci-in hong hilh hi.Thahat thu-in thunget ding kisam ahihlam ka phawk pah hi. Manlang takin bus tuangin zato ah ka delhpah hi. tai 745 bang gamla hi. Zato ka tai pah tingteng a, Tommy pen gimpi-in gim mahmah ahihlam ka mu hi. Ahi zongin lungnopna khat nei ahihlam ka thei hi. “ Ka hun hong tungta hi,”ci-in hong hopih hi. “Sihna gal khatah kimu thei dingin Topa tungah thu ka ngen hi. Na upna khahsuak kei in,” hong ci hi. Ni thum khit ciangin Tommy a nuntakna hong bei hi. Ahi zongin a kampaute ka bilah ka zaza hi. Ka sangkahna panin radio lam tawh kisai lukhu nelkai khat ka ngah hi. Tu-in Namibia gamah AWR ah Pasian nasemin ka om hi.

Khrih hong pai kik ciangin Tommy tawh kimu kik ding lamenin ka om hi. Hong nusia khin it le ngaih tampite tawh i mu kik ding hi. Tua ni hong tun mateng upna sungah kip ding kisam hi. Tu quarter Sabbath 13na sumpi in Namibia gama pawlpi nasepna huh nadingin kipuak ding hi. Jesuh hong pai baih ta ding hi.

MUC in Lezang biakinn le Tamu biakinn huang umna dingin kizeek ding hi.