LESSON
4 APRIL 16-22
TUICIN
SABBATH NITAK
Tu Kaal Sung Sim Ding: Pian. 6:13-7:10, 2 Pet. 2:5-9, Pian. 7,
Rom. 6:1-6, Late 106:4, Pian. 8, Pian. 9:1-17.
KAMNGAH:” ‘Noah hunlai
bangmahin Mihing Tapa a hong paikik ciangin Noah hunlai mah bang ding hi
(Matthew 24:37).
Tua ciangin Topa in mihingte siatna lian mahmahna mu-in
mihingte ngaihsutna in siatna tawh kidim ngitnget ahihna amu hi (Pian. 6:5). “Mu” cih kammal in
(Pian. 6:5) piancilna thute hong
phawksak hi. Ahi zongin tu-in Topa in hoihna (tov) sangin “siatna” amu hi (Pian.
6:5). Mihing siatna lianlua-in Pasian in mihing abawl kisik bangin kipulaak hi.
A hoih mahmah leitung in tu-in siatna tawh a kidimta hi (Pian. 6:5).
Hi mah taleh tua siatna sungah hotkhiatna thu a kihel hi.
Hebrew kammal “nakham” a khiatna in “dah” cihna
hi-in Noah min in apulaak hi. A
khiatna in “hehneem” cihna hi (Pian. 5:29). Tua hi-in Pasian in mihing siatna a thuhkikna-ah thu
nih kimu thei hi: Thuman thutak tawh a sepna hangin mi kimkhat in kisiatna a
thuak uh hi. Ahi zongin mi kim khat adingin hehpihna le khamuanna ngahna suak
hi. Mi kim khat adingin hotkhiatna sung tunna suak hi. Hih thunihte in Cain le
Abel/ Seth tungah kipulaak khin hi. Seth suan le khakte (Pasian tate) le Cain (
mihing tate (etkakna panin hih mite kibat lohnate zong i mu thei hi) Tu-in Noah
le minam dang khempeuh kibat lohna hong kihilhkik hi.
SUNDAY April 17
TUICIN TUNG DING KIGINKHOLHNA
Pian. 6:13-7:10 sim in.
A lamdang hih tangthu panin nuntakpih ding bang thu na mu hiam?
___________________________________________________________
Daniel bangmahin Noah in kamsang
khat hi; amah in leitung bei ding a genkhol hi. Hebrew lai tawh kigelhna-ah
tembaw in “tevah” hi-in a khiatna in lawh ahih keileh ciang cihna hi-in (Pian.
6:14) Egypt kammalah a kimu mengmeng lo kammal khat ahi hi. Naungek Moses
kiselna lawh khat sungah kiselin tua
panin thahna thuak ding panin a suakta thei hi (Pai. 2:3).
Tua banah tembaw kilamzia le biakbuk kilamzia kibang hi
(Pian. 25:10). Tembaw in Noahte innkuan suahtakna piak bangin thuciamna
singkuang in zong Pasian in a mite lakah a omna limcing hi. (Pai.25:22);
thuciamna singkuang in leitung minamte kihotkhiatna thu pulaak hi. “Noah in
Pasian sawl bangin sem hi,” cih thu in (Pian. 6:22) Tuicin tawh kisai thukhupna
hi, cih i thei hi. Sepna lak kammal “asad” a khiatna in “sem “bawl” cihna hi-in
Noah tembawlna hong hilh hi (Pian. 6:14) Pasian sawl bangin Noah in sem hi, cih
thu nga vei bang kipulaak hi. (Pian. 6:14-16). “Asah” kammal in Pasian thupiak
le Noah sawlmanna thu hong phawksak hi. Hih kammal mah biakbuk lam ding
thupiakna-ah zong a kizangkik kammal hi. (Pai. 39:32, 42; 40:16).
“Pasian in Noah tungah thuciamna singkuang a lamzia ding
kician takin a hilh hi. Mipilna in tua bangin a lian a to ding a theithei kei
hi. Pasian mahmah in tua inngeelpa ahi hi; Noah in a semkhiapa hi” Ellen G.
White, Patriarchs and Prophets, p. 92.
Hih munah thuciamna nih hong kidawkkik hi. Tua thuciam
nihte nasepna in hotkhiatna nasep ahi hi. Noah thumanna in Pasian hotkhiatna
geelna sungah kihel khat hong suak hi. Noah in Tuicin panin a suakta hi. Bang
hang hiam cihleh amah in Pasian sawl bangbang mang dingin upna a nei hi (Heb.
11:7). Amah pen upna nei mi masa khat hi-in a upna pen sawlna tungtawnin a
kilang hi. Tua bang upna bek mah a kisam ahi hi (James 2:20). A tomin pulaak
lehang, Noah in Topa mai-ah dikna a ngah hi (Pian. 6:8), A kipia dikna a
dawnkikna-ah Noah in cihtakin le thumang takin Pasian thupiak bangin a nungta hi.
Eite in zong tua bang ding hi lo i hiam?
2 Peter 2:5-9 sim in. Bang hangin Noah le a innkuante in
Tuicin panin suakta uh hi ding hiam? A hong tung ding thukhenna tawh kisai-in
Noah le a innkuanpihte tungtawnin bang thu nuntakpih ding i hiam?
MONDAY April 18
TUICIN TUNNA THU
Sepna lak kammal ‘asah,” a khiatna in “sem” “ bawl” cihna
hi-in Noah tembaw bawlna a pulaak kammal
hi. Hih kammal in Piansakna thu-ah kammal bulpi khat ahi hi (Pian. 1:7, 16, 25,
26, 31; Pian. 2:2). Noah thumanna in Pasian piansak nasep bangmahin kipulaak
hi. Tuicin thu in mihingte kisiatna bek htham lo-in nuntakpih ding thu bang na
mu thei hiam? Pasian hong hotkhiatna thu
zong na mu thei hiam?
Pian. 7 sim in. Bang hangin Tuicin thu in Piansakna thu
hong phawksak hiam? Piansakna thu le Tuicin thu panin nuntakpih ding bang thu
na mu thei hiam?
___________________________________________________________
Tuicin thu limtak sim lehang
Piansakna thu tawh kisai thu tampi kimu thei hi.Piansakna thu-ah sagih cih
kammal (Pian. 7:2, 3, 4, 10; le Pian. 2:1-3 enkak in); “numei le pasal (Pian.
7:2, 3, 9, 16; le Pian. 1:27 enkak in); “amau nam taw kizui-in” (Pian. 7:14 le
Pian. 1:11, 12, 21, 24, 25 enkak in); ““gam vasate” “ vasate” “a tuan ganhing namte” (Pian. 7:8, 14, 21, 23
le Pian.1:24, 25); le “nunna huu” (Pian. 7:15, 22; le Pian. 2:7). Tuicin
tangthu in piansakna thu tawh kibatna tampi nei hi. Tua a kibang thute in
Piansakna thute hong phawksak hi; a
Piangsak Pasian in a susia Pasian zong hi (Thkna. 32:39). Hih thute in lametna
thu zong hong hilh hi: Tuicin in
piansakna thak a piangsak hi; tuicin panin nunna thak hong om hi.
Tuiluanziate in hih piansakna thak a pulaak uh hi; Pian 1
sunga piansak nate kilumletna i mu thei hi. Pian. 1 sung a piansakna-ah vantung
om tuite le leitunga om tuite kikhen hi (Pian. 1:7),Tuicin ciangin tui khempeuh
in gamgi neilo-in kigawm khin uh hi (Pian. 7:11).
Hih thu in a kikeelki thu pulaak hi. Pasian in piansakna
thak a bawl nadingin nate susia phot hi. Lei thak a hong pian nadingin a lui
leitung kisusia phot ding hi.Tuicin in leitung bei ciangin hotkhiatna thu hong
hilh hi. “ Vantung thak le leitung thak ka mu hi. Amasa vantung le leitung a mangthang hi” (Mang. 21:1 le Isa. 65:17 enkak in).
I nuntakna a thak hong pian nading bang nate suksiat ding
kisam hiam? (Rom. 6:1-6.)
TUESDAY April 19
TUICIN BEI-NA
Pian. 7:22-24 in tui nasepna pulaak hi. Tui in nuntakna a
nei khempeuh susia hi (Pian. 7:23) “ leitungah ni za le sawmnga sung tuicin a
om hi”(Pian. 7:24). Hih thu hangin
Pasian in Noah a phawk hi. (Pian. 8:1). Pasian in Noah a phawk hi, cih thu in
Tuicin tangthu-ah thu bulpi khat hi; Tuicin tangthu thu guipi hi, cih hong hilh
hi.
Pian. 8:1 sim in. Pasian in Noah a phawk hi, cih thu a
khiatna in bang hi ding hiam?
___________________________________________________________
Sepna lak kammal “zakhar” a khiatna
in “phawk” cihna hi-in a khiatna in Pasian in mangngilh lo hi, cihna hipah hi.
Phawk cih thu in khuak nasep na khat sangin tangzai zaw hi. Lai Siangtho in
Pasian in phawk hi, cih ciangin Ama kamciam a tangtun pulaak hi-in, hotkhiatna
a pulaak kammal ahi hi (Pian. 19:29). Tuicin tawh kisai-in “ Pasian in Noah a
phawk hi, cih thu in Tuicin beita hi, cihna a pulaak kammal hi (Pian. 8:2); a sawt lo-in Noah in tembaw
panin pusuak thei ding hi, cihna ahi hi (Pian. 8:16). Tembaw sung panin pai
khia in cih thupiak a om loh hangin Noah in a pusuah theih hun ding a
ngaihsunsun hi. Amasa-in va-ak khat a khahkhia hi. Tui a kiam le kiam loh
kitheih nadingin vakhu khat a khahkhia leuleu hi. A tawpna-ah hih vakhu hong
ciahkik nawn lo hi. TUa hi-in Noah in Tuicin
bei ta hi, cih a thei hi. (Pian. 8:13).
Noah nunzia panin i nuntakpih ding thu tampi kimu thei hi.
Lam khat panin Pasian muan ding hong hilh hi; Aman in i zak dingin kampau lo a,
Upna in thu ngaihsut theihna le sittelna nial lo hi. Upna in thu ngaihsutnate, thuman
zon ding cihte hemkhia lo hi. Noah in Topa sawl ciang bekin Tembaw sung panin a
pusuak khia hi (Pian. 8:15-19). Paikhiat hun ta hi, cih a theih hangin Topa
tungah kinga-in Ama lamlahna khat a ngak hithiat phot hi. Noah in Tembaw
sungah Topa lamlahna ngah dingin lungdui
takin a gak hi. Pasian thupiakna tawh Tembaw a lam hi-in Tembaw sung pan a
pusuah nadingin zong Topa mah a ngak hi. A tawpna-ah vantungmi khat in vantung
panin hong tuaksukin Tembaw kongkhakpi a hongkhia hi. Noah le a innkuanpihte in
Tembaw sung panin pusuakkhia-in a neih van la nate khempeuh tawh pusuak
khahkhia dingin a vakhak hi. Ellen G.
White, Patriarchs and Prophets, p. 105.
Pian. 8:1, Pian.s 19:29, le Late 106:4 sim in. “Topa in phawk hi” cih thu akhiatna in bang
hi ding hiam? Tu-in koi bangin Pasian in nang a hong phawk ding hiam?
WEDNESDAY April 20
THUCIAM: KHEN MASA
‘ TU-in thukham kamciam a tangtung ding hi ta hi. “ Ahi zongin
nang tawh thuciamna khat ka bawl ding a, nang, na tapate le na zinte in Tembaw
sung na lut ding uh hi.”(Pian. 6:18). Tuicin tawh enkak lehang (Pian. 6:17), hih thuciamin nuntakna thuciam
hi, cih kimu thei hi.Pian. 8:20 sim in Noah in bang sem masa-a bang hang hi
ding hiam?
___________________________________________________________
___________________________________________________________
Adam le Eve in piansak ni guk khit ciangin Sabbath ni-in
Topa a biak bangmahin Noah in zong
Tembaw sung pan a pusuahkhiat khit phet ciangin
biakpiakna khat a nei hi. Hih in piansakkikna khat hi. Noah biakpiakna
in Adam le Eve te biakpiakna tawh kibang lo biakpiakna khat hi. Adam le Eve in
Pasian tawh kimu-in biakpiakna hi-a, Noah in ahihleh meihal biakpiakna (olah)
hi. Biakbukah biakpiakna-ah kilimzat mahmah hi. Noah adingin hih biakpiakna in
lungdamkohna hi(Gam. 15: 1-11), Tuicin panin amah a honkhia Piangsakpa tungah a
lungdamkohna hi, cih i thei hi.
Pian. 9:2-4 sim in. Koi bangin Tuicin in mihingte annek hong
khel hiam? Pasian in annek tawh kisai in bang thu guipi hong pia hiam?
Tuicin hong tun ciangin
anteh bek nek ding pen piang nawn lo hi. Tua ciangin mihingte in sanek
theihna Topa in a pia hi. Hih annek kikhelna in mihing le ganhingte kizopzia
zong hong khel hi. Piancil hunlai bang nawn lo-in mihing le ganhingte kizopna
hong kikhel hi. Piancilna-ah mihing le ganhingte in annek ne khawm uh hi. Khat le khat kilausak, patausak lo uh hi.
TUicin khit ciangin nek dingin ganhingte kithahna hong om ciangin mihing le
ganhingte kizopna in lau-na le kihtakna tawh kidim hi (Pian. 9:2). Mihing in sa
a nek a kipan amaute geel kikal kizopna in Eden huan a kizopna tawh kibang nawn
lo hi.
Ganhing khempeuh nek theih hi peuhmah lo hi. Amasa-in “ sa
siang le sa sianglo” khenna om hi.Pian. 8:19, 20; le Pian. 1:21, 24 enkak in).
Nihna-ah sisan nek loh dingin Topa in thu hong pia hi. Bang hang hiam cihleh
sisan in nuntakna hi (Pian.:4).
THURSDAY April
21
THUCIAM: KHENNIHNA
Pian. 8:21-9:1 sim in. Pasian in nuntakna kemcing ahihna
in bang thupina nei hiam? Koi bangin Pasian thupha in hih thu tangtun hiam?
Pasian in nuntakna a kepna a
hangin Amah in hehpihna tawh kidim ahih man hi; mihing hoihna phatna hang hi
peuh lo hi. Mihing in siatna tawh kidim hi mah taleh Pasian in leitungah
nuntakna kepcingsak ding a khensat hi. (Pian. 8:21).
Pian.8:22 sungah “ leitung a om laiteng” leitung a
omlaisiah khuahun khat khit khat kikhel ding a,
leitung ah nuntakna nei khempeuh a nungta thei ding uh hi. A tomin
pulaak leng, Pasian in a piansaksa nate
nusia lo hi, cih hong hilh hi. Tua tawh kizomin Pasian in leitung thupha a
piakna thu kimu thei hi. Tua in Piancilna thupha hong phawksak hi. (Pian.1:22, 28; Pian. 2:3). Lam khat panin
Topa in mihingte tungah kipat thakna khat
pia hi.
Pian. 9:8-17 sim in. Sakhituihup in bang thupina nei hiam?
Koi bangin tua in “thuciamna ciaptehna suak thei hiam? Sakhituihup a thupina in
bang hi ding hiam? Koi bangin thuciam limcinna hi thei hiam? PIan.9:13,6. Hih
in a dang thuciamna limcinna Sabbath tawh bang kizopna nei hiam?
__________________________________________________________
__________________________________________________________
Pian. 9 sungah “ THuciam akipsak hi “ cih kammal thum vei bangin kimu thei hi. (Pian.9:9, 11,
17), Pasian kamciam masak a tangtunna hi, cih kilang hi (Pian. 6:18). Pian. 8
sunga thute tawh a kibangin, Pian, 9 sungah zong a kibang thu kimkhat kimu thei
hi. Piansakna tawh kisai-in Sabbath thu hong hilh a, tua sungah thuciam cih kammal sagih vei bang
kimu thei hi. Thuciam in Sabbath thupiak tawh kizopna nei hi, cih kimu thei hi.
Sabbath bangmahin sakhituihup in zong thuciamna lim khat ahihna kimu thei hi.
(Pian.22 9:13, 14, 16; le Pai. 31:12-17 enkak in). Tua banah Sabbath bangmahin sakhituihup in leitung mun khempeuh huam hi;
Sabbath in piansakna a hong phawksak bangmahin sakhituihup in piansakna thu
hong phawksak hi. Mi khempeuh tungah tuicin tung kik nawn lo ding hi, cih
kamciam hi.
Sakhituihup na muhkik ciangin Pasian kamciam khempeuh
ngaihsun in. Bang hangin tua kamciamte muan ding kisam hiam? Koi bangin
sakhituihup in tua kamciamte muanna hong pia thei hiam?
FRIDAY April 22
Ngaihsutbeh Ding: Tuicin tunma mite nunzia le tuhun mihing
nunzia in thu tampi hong hilh hi. Mihing in siatna tawh kidim hi mah hi. Hih
pen a lamdang hi lo hi. Noah hun le tuhun ngaihsun in.
“Tuicin tunma mihingte mawhna lianlua ahih manin TUicin
tung hi. Tua bang mawhnate tu-in zong leitung mun khempeuhah kizel khin ta hi.
Topa kihtakna om nawn lo hi. Ama thukhamte kinawlkhin hi; a awlmawh ki om nawn lo
hi. Leitung nopsakna lam bekbekah mihing
in kalsuan hi. Pasian in Tuicin hunlai
mite kiteen kipi, annek tuidawn uh a mawhsak hi lo hi. Amau mawhna in tua nate
a Piapa phawk lo-in nate tung kinga uh
hi. Kipi kiteng ding hi mah hi. Pasian hong geelsakna hi.
Mihingte tungah hong piak masak pen hi kha ding hi. Kipi kiteenna tawh kisai
ding Pasian in zuih ding hong pia hi. Nek le dawn, puansilh niikteen zia ding
Pasian in hong hilh hi: sianthona le etlaawmna in a thu bulpi hi.
Ahi zongin hih thupiakte kimangngilh hi; Pasian geelna
panin lampial uh hi. Tu-in zong tua bang mah ahi hi. Pasian ciangtanna val
khengin lampial khin uh hi. Zuau genna,
golhguknekna, le thuman lo-in gamtatna tawh kidim uh hi. Mun khempeuh in mi
thahna tawh kidim hi. Minam khempeuh in tatsiatna tawh kidim khin uh hi. Ci le sa deihna ultungsak uh a, kikhalna
cihte om nawn lo hi. Leitung in mihing tatsiatna tawh kidim khin hi. Tuicin
hunlai bangin tuhunin zong kilamdanna om lo hi. Thu-um Khristiante in zong
leitung ci le sa deihna tawh kidim khin uh
hi. Gitlohna, ganhing lungsim sangin tatsia zaw uh hi. Tua bang siatnate
hangin leitung in Tuicin tawh sawpsiangna a thuak hi.” Ellen G. White,
Patriarchs and Prophets, pp. 101, 102.
KIKUP DING DOTNATE
1. Tuicin hunma mite nunzia le tuhun mihing
nunzia in bang kibatna nei hiam? Hih thute in Pasian hehpihna bang hong hilh
hiam? Pasian in leitung it ahih manin
honkhia dingin a nuntakna a hong pia hi lo hiam?
2. Mi kimkhat in Noah hunlai Tuicin in ama
teenna mun teng bek hi; leitung buppi hi lo hi, ci uh hi. HIh bang ngaihsutna
in bang khialhna nei hiam? Leitung buppi
Tuicin tung lo hi leh bang hangin mun
khat bek Tuicin in sakhituihup kisam
ding hiam? Pasian a zuau phuak suak lo ding hiam?
