LESSON
2 APRIL 2-8
MAWHNA
SABBATH NITAK
Tu Kaal Sung Sim Ding: Pian. 3; 2 Cor. 11:3; Mang. 12:7-9; John
8:44; Rom. 16:20; Heb. 2:14; 1 Tim. 2:14, 15.
KAMNGAH: “Nang le numei kikal le nang suan le khak le ama suan le
khakte kikalah kihuatna ka omsak ding hi. Amah in na lutang suzan ding a, nang
in ama khetul na tu ding hi,” ci hi. (Pian. 3:15).
Pasian mi masa Adam le Eve tungah na tampi a piak khit
ciangin vauhilhna khat zong a pia hi: “singgah khempeuh na ne thei ding uh hi;
Ahi zongin sia le pha theihna singgah na ne kei ding uh hi. Na nek ni-un na si
takpi ding uh hi.” (Pian.2:16, 17) Hih vauhilhna in sia le pha theihna kisam lo hi, cih hong hilh
hi.(Pian. 2:16, 17); a pha theihna-ah siatna theih a kul hi lo hi, cih zong
hong hilh hi. Bang hang hi ding hiam cih thu i thei kei hi. Hi mah lo hiam? Hih
vauhilhna a man kei uh leh sihna thuak ding uh hi. Thuman lohna in sihna tun
ding hi (Pian. 2:17) Hih hilhkholhna pen tangtung takpi hi (Pian. 3:19). Nek ding kiphal lo bek tham lo-in Eden huan
sung panin hawlkhiatna a thuak uh hi. (Pian. 3:24), Tua hi-in amaute in
tawntung nunna tawh a kipelh uh hi (Pian. 3:22).
Ahi zongin mawhna hong om hangin lamet bei ihi kei hi.
Pian. 3:15 in Lungdamna thu a pulaak masa pen mun hong suak hi; Lungdamna
kamciam amasa pen” ci-in kiciamteh hi. Hih in Lai Siangtho sungah amasa pen Lungdamna Thu a kipulaak masak pen
na hi hi. Mawhna om hi mah taleh Adam le Eve tungah suahtak nading lampi kilaak
hi.
SUNDAY April 3
GULPI
Pian. 3:1; 2 Corinthians 11:3, le Mang. 12:7-9 sim in. Kua
in gulpi hi-a koi bangin gulpi in Eve khem hiam?
____________________________________________________________
__________________________________________________________________________________________________
Pian. 3:1 kipatna-ah “Gulpi” kipulaak hi.Laigual luanzia a
entelte pulaakna-ah a pulaak bulpi in “gulpi” hi. Hih gulpi in ganhing khat mawkmawk hi lo
ahihna, laisim mi in gulpi cih in kua hi ding hiam cih a theitel thei hi.Hih
gulpi in Piancil Bu pulaak thute kiptakpi ahihlam pulaak hi. Hi mah hi. Lai
Siangtho in gulpi pen Pasian langpangpa hi, ci-in pulaak hi (Isa. 27:1) kitel
takin “Dawimangpa” “Satan” hi, ci hi. (Mang.12:9). Tua bang mahin nidang mite (Near East) in
zong Dawi gilopa vangliatna a pulaak uh
ciangin gulpi limcingsak uh hi.
“Satan in ama nasepna kuamahin a theih loh nadingin a
simtham gulpi tungtawnin nasem hi. Ama zuaukhemna tawh zawhna a ngah nadingin
ganhing khempeuh lak panin a hoih pen
pen le a pil pen ganhing gulpi a zang hi. Guipi in kha nei-in leng thei a, tua
bangin a len ciangin huihlakah mel tuamtuam nei-in kikhel zialzial hi. A etlawm
mahmah melpua-in etlawm mahmah hi.”Ellen G. White, 10 Patriarchs and Prophets,
p. 53.
Dawimangpa i pulaak ciangin a om lopi khat a kipulaak hi
lo hi. Lai Siangtho mahmah in zong hih thu hong hilh hi. Siatna limcing
khat hi mawk lo-in a om takpi mah ahi
hi. Satan pen a om takpi hi-in mit tawh
a kimuh theih loh hangin pumpi taksa nei ahi hi. Siatna, khuamial limciinna a
kizang hi mawk lo hi. Gulpi in amah le amah Pasian galpa bangin kipulaak lo hi.
Ahi zongin gulpi in Pasian kammal mah siksanin nei-a ama gen thute thuman
bangin a pulaak hi. A pat a pan Satan in Pasian kammal siksanin nei-in thu a
gen hi (Matt. 4:6).
Gulpi in numei pulaak thute nialpah lo ahihna ciaptehhuai
hi. Ahi zongin gulpi in Eve tungah dotna khat dong hi; cihnopna-ah gulpi in
Adam le Eve tungah Topa gen thute um hi, cih kilang hi. A tawpna-ah gulpi in “Pasian
in hong gen takpi mah hiam? ci-in dongpha pha hi (Pian. 3:1) Tua hi-in a kipat a kipan gulpi in ngiansiamna tawh a
kidim khat hi, cih kimu thei hi. Ama nasepziate i pulaak toto ding hi.
Satan in Eden Huana Eve khemso a hihleh bangzahin eite
khemnop hongsa ding hiam? Ama hong khemna bang tawh do ding hoih pen ding hiam?
MONDAY April
4
NEKLOH DING SINGGAH
Pian.2:16, 17 le Pian. 3:1-6 sim in. (John 8:44 tawh zong
enkak in). Adam tunga Pasian kammal le
Eve tungah Satan kammalte enkak in. Bang kilamdan na nei-in tua kilamdannate in
bang khiatna nei hiam?
___________________________________________________________
Pasian in Adam a hopihna le Gulpi in Eve a hopihna a thu
kibangte ngaihsun in (Pian. 2:16, 17) Gulpi in tu-in Pasian dinmunah a om
bangin thu a gen hi; Pasian sangin thu thei zaw bangin thu a gen hi.
Amasa-in Eve in Pasian mukhial dingin dotna khat dong masa
hi. Tua ciangin Satan in Pasian deihnate muangmawh dingin thudotna a nei hi. Pasian pulaak thu tawh
kituak lo-in thu a genta hi. Satan langdotna in thu nih nei hi; sihna le sia le pha theihna hi. Sia le pha theihna
singgah a nek uhleh si takpi ahihna Pasian in kitel takin genkhin hi (Pian.
2:17); hih thu tawh kilangdo-in Satan in ne le-uh cin na si kei ding uh hi,
ci-in pulaak hi; ama gennop bel in mihing in a si lo nunna nei hi, ci hi (Pian.
3:4).
Tua singgah nekloh ding hi, ci-in Pasian in
Adam tungah hilhkhol khin a (Pian. 2:17), Satan in ahihleh tua singgah ne
dingin hanthawn hi. Bang hang hiam cihleh tua singgah a nekna uh tawh Pasian
tawh kibang ding uh hi, ci hi (Pian. 3:5). Satan siksan thu nihte in sih lohna le Pasian tawh kibang ding cih thu ahih hangin Eve in tua singgah a ne hi. A
nek phetin Pasian thupiak man loh ding a khensat hi; nek loh ding singgah a ne
ta hi. Eve in Pasian a om lo bangin ngaihsun a, Pasian dinmun a luahkha bangin
kingaihsun hi. Nunzia hong kikhel hi.
Eve in Pasian kammalte mah zang hi: Nek
loh ding singgah a nekna-ah a zat kammalte sittelpha in: “Tua singgah pen nek
dingin limci sa mahmah hi, nek ding mah hi ci-in a ngaihsun hi (Pian. 3:6);
Pasian in nate a piansakin “hoih hi” ci-in a pulaak kammalte hong phawksak hi.
Pasian in mu-in hoih hi, ci-in a pulaak hi (Pian. 1:4).
Hih zia-etnate - a si lo nunna le Pasian tawh kibatna
cihte in nidang Egypt upna le Greek biaknate siksan bulpi hi. Amau upna-ah
mihing in Pasian nunna a ngah ding uh hanciam ding hi. Tua bangin Pasian dinmun
a ngah uh ciangin si thei nawn lo ding uh hi, cih upna a nei uh hi. Lamdang
takin hih bang upna in Jew mi Khristiante sungah hong lut hi; hih bang upna
panin mihng in a si lo nunna nei hi, cih
upna tuhunin pawlpi tampi in um uh hi.
Mihing in a si thei lo nunna nei hi, cih upna khempeuh
ngaihsun in. Hih a lauhuai upkhialhna in mihing pianzia langdo ahi hiam?
TUESDAY April
5
PASIAN MAI-AH KISEL
Pian. 3:7-13 sim in.
Bang hangin Adam le Eve in Pasian mai-ah bu dingin kisamsa uh hi ding
him? Bang hangin Pasian in amaute tungah “koi-ah om na hi uh hiam? ci-in dong
hi ding hiam? Koi bangin Adam le Eve in a mawhna uh pua nuam lo-in nial uh
hiam?
_______________________________________________________
Mawhna sung tun khit ciangun
Adam le Eve in guaktangin om ahihlam uh a kiphawk uh hi. Bang hang hiam cihleh
amaute in vangliatna puan a silh nawn kei uh hi. Tua in Pasian ompihna limcing
hi (Late 8:5, le Late 104:1, 2 enkak in). Mawhna in mihing tunga om lim le meel
a siasak hi. Sepna lak kammal “bawl” cih thu in amaute in pumpi a tuam ding
khat a bawl uh hi (Pian. 3:7,19) . Hih in Piangsakpa kigenna bekah a kizang
kammal hi (Pian. 1:7, 20 16, 25, etc.). Amaute in Piangsakpa dinmunah a om
bangin amawhna uh selcip ding hanciam uh hi. Sawltak Paul in gamtatna tawh
dikna ngahsawm a hanciamna ci hi.(Gal. 2:16). Pasian in amaute omna munah
vapai-in dotna khat a dong hi. “ Koi-ah om na hi uh hiam?
Cih dotna in (Pian. 3:9), Pasian in Cain tungah tua
bangmahin dong hi (Pian.4:9). Pasian in Adamte nupa le Abel omna mun a thei lo
hi lo hi. Tua bangin a dot ciangin amaute phattuampih nading ngimna tawh a dot
hi zaw hi. Amawhna uh phawkin kisik ding deihna tawh Pasian in a dong hi zaw
hi; tua bangmah in a mawhna uh kisikin hotkhiatna sung a lut uh hi. Mihing in
mawhna sung a tun a kipanin TOpa in mawhneite honkhia dingin hong zong tawntung
hi.
A taktakin hih thu khempeuh in sittel thukhenna (dawpkholh
thukhenna) pulaak uh hi. Hih thukhenna-ah thukhenmangpa thukhenna tawh kipan
hi. THukhun a palsat mi khat thaman a piak nadingin thukhen mangpa in thusitna
nei masa hi. (Pian. 3:9; 3:14-19). Ahi
zongin tua bangin a thukhenna-ah thu palsat mi in a mawhna kisikkik ding deihna
hi zaw hi; a tawpna-ah hotna ngah leh cih deihna ahi hi. (Pian. 3:15). Hih thu
guipi Lai Siangtho buppi in pulaak hi.
Amasa-in mawhneite pulaak ngei zel mah bangin Adam le Eve
in mawh pua nuam lo uh hi. Khat le khat kingawh uh hi. Pasian in Adam a dotna-ah
Adam in Eve ngawh hi; Kei tawh om dinga nong bawlsak hih numei in hong pia-in
ka ne hi, ci hi (Pian. 3:12)—singgah a ne dingin a sawl pen Eve hi mah hi. Tua
pen Eve khialhna hi mah hi (Pasian khialhna zong kihel hi, ci nuam ahi hi). Eve
in a piak ciangin a nek loh dinglam phawk lo-in , Eve a dot ciangin Eve in
gulpi ngawh leuleu hi. Hebrew tawh kigelhna-ah “nasha” kigelh hi; a khiatna
in “khem” cihna hi. (Pian. 3:13),
lametna khial pia a hoih lo khat sem napi-in a hoih mahsa veve cihte ah zong a
kizang kammal hi. (2 Kum.19:10, Isa. 37:10, Jer. 49:16). Adam in Eve ngawh hi.
Bang hang hiam cihleh Eve in Adam singgah apia hi. Eve in gulpi ngawh hi. Gulpi khemna sung tung khin uh hi.
Amau khialhna pen midangte hang hi, ci-in mi ngawh uh
hi. Bang hangin eite in zong i khialhna
khat midangte ngawhnuam pahpah hi ding i
hiam?
WEDNESDAY April 6
GULPI THUAK DING
“Nang le numei kikal le nang suan le khak le ama suan le
khakte kikalah kihuatna ka omsak ding hi. Amah in na lutang suzan ding a, nang
in ama khetul na tu ding hi,” ci hi. (Pian. 3:15). TOpa in Gulpi tungah bang
thu pulaak hiam? Lametna bang thu kipulaak hiam?
______________________________________________________
Pasian in Gulpi tungah thukhen
masa hi. Bang hang hiam cihleh amah in mawhna kipatna hong suak hi. Hih thu-ah
Gulpi bek mah in hamsiatna thuak hi.
Piansak na khempeuh in kilumletkik hi. Piansakna-ah na khempeuh in
nunna, hoihna manawh hi. THukhenna in ahihleh sihna, siatna, hamsiatna hong tun
hi. Ahi zongin hotkhiatna kamciam zong a pulaak hi.
“Nang in leivui na ne ding hi, ci-in Pasian samsiatna in
(Pian. 3:14) minam khempeuhte tungah hotkhiatna kamciam a hong pulaak hi; tua
pen genkholhna tungtawnin hong kilang hi. Adam le Eve tungah mawhsakna thu a
kipulaak nangawngin zong Topa in amaute
lametna thu a pia hi(Pian. 3:15). Hi mah hi; amaute mawh mah hi. Tua hangin
mawhna thaman a sang uh hi. Amawhna hangun gimna lianpi a thuak uh hi. Hi mah
hi; mawhna hangin amaute in sihna thuak ding uh hi. Ahi zongin a tawpna-ah
amaute in lametna nei uh hi; tua lametna
in hotkhiatna ahi hi.
Pian. 3:15 le Romans 16:20, Hebrews 2:14, Mang. 12:17
enkak in. Koi bangin hotkhiatna, Khrih le Satan Kidona lianpi kipulaak hiam?
___________________________________________________________
Pian. 3:15 le Mang.12:17 gen thu
kibangte ciamteh in. Gulpi in numei suan le khakte tawh kilangneih hi. Eden
Huan a numei le Mang. 12: 17 pulaak numei a kibang ahi hi. Hih Kidona lianpi in
Eden huanah hong lutin leitung a bei dongin a kizom paisuak ding ahi hi. Ahi
zongin Satan in guallel khin hi. Eden
huan panin zong ama lutang kisuzan khin hi. Hih thu mah Mangmuhna Bu in hong
hilh hi. A tawpna-ah a sihna thu Mang. 20:10 in pulaak hi. Cihnopna-ah a pat a
kipan mihingte tungah lametna hong kipia a, mawhna hong luta kipan in
hotkhiatna lametna tuni dongin a kizom suak ahi hi.
Mawhna hong kipatna Eden pan mahin Topa in hotkhiatna
pulaak ahihna thu in eite adingin bang hangin lungmuanhuai thu hi thei hiam?
THURSDAY April
7
MIHING TUN NADING MUN
Pian. 3:15-24. Mawhna hangin Adam le Eve
tungah bang thu piang hiam? ___________________________________________________________
Gulpi tunga Pasian thukhenna in hamsiatna hi-in, (Pian.
3:14), Adam le Eve tunga thukhenna in ahihleh samsiatna hi lo hi. Gulpi tunga
samsiatna khit ciangin Pasian samsiatna koi munah hong kidawkkik hiam cihleh leitang samsiatna
hi (Pian. 3:17). Tua in Pasian in mipa
le minu ading a geelna pen Gulpi ading a geelna tawh kilehdo hi. Eve
tungah lametna kipia hi; Adam tungah kipia lo hi.Numei tungah thukhenna in
Gulpi tunga thukhenna tawh kizopna nei hi. Pian. 3:16 in Pian. 3:15 tawh
kizomto pah ahih bang mahin tua genkholhnate in Pian. 3:16 gen thu in Messiah
hong pai ding ahihna pulaak hi.Numei
tunga thukhenna sungah
naupaai-na kihel banah hotkhiatna thu zong hong hilh hi ( 1 Tim. 2:14, 15). Adam
in Pasian thupiak nialin a zi thupiak zui zawsop a hih manin ama hong
piankhiatna leitangin zong samsiatna a thuak hi (Pian. 3:17). Tua hangin mipa
in gimpi-in nasem ding hi (Pian.3: 17-19). A pianna leivui mah a zuankik ding
hi(Pian. 3:19). Hih bangin a piang ngei dingin Pasian in a geel hi peuhmah lo hi.
Adam in lamet bei dinmun panin numei nu tung panin lametna
a ngah kik thei hi. Bang hang hiam cihleh numei in nausuahna tungtawnin
nuntakna lametna a nei thei hi (Pian. 3:20). Cihnopna-ah sih ding thukhenna
ngah kawmkalah Adam in nun nading lamettna amu hi. Tua hi-in itna tawh kidim nu
le pate in tate tungah siatna a bawl loh bangmahin Pasian in Adam le Eve
adingin a hoih pen a deihsak hi.
Amaute in tu-in thusia a thei uh hi. Thusia sung panin
Pasian in amaute a honkhia nuam hi. Tua hi-in thukhenna sungah lametna thu hong
kilaang veve hi; amaute in lamet bei kiuhkeuh uh hi lo hi. Amaute in Paradise
sungah nuamtakin nungta thei-in Pasian muanmawh ding peuhmah om kei taleh
amaute in Pasian thu mang lo-in taisan
uh hi. Ahi zongin Pasian in amaute it veve hi.
Thu theihna pen a sia hi pah lo napi, bang hangin theihna
in siatna hong tunpah hi ding hiam? Bang thute i theihloh mah ei adingin hoih
zaw veve hiam?
FRIDAY April 8
Ngaihsutbeh Ding: Nuntakna singkung le sia le pha theihna
singkung kizopzia ngaihsun in. Hih singkungte in Eden Huan sungah a po
singkungte hi (Pian. 2:9). Hih singkungte po -na mun sangin a thu thuk zaw om hi. Mihing in sia le pha
theihna singgah a nek ciangin amaute in Pasian thupiak nial uh hipah hi. Amaute
in nuntakna singgah nek theihna a ngah nawn kei uh hi. Hih kizopna in a thu
bulpi hi. Gamtat zia le tong, deihtel theihna le Pasian tawh kizopnate in i
nuntakna hong sukha mahmah hi. Solomon in a tate a thuhilh bangin: ka thu piakte mangngilh kei in. Ka thukhamte zui hi lecin na khan hong
sau-sak ding hi. Tuate nuntak sau le lungnopna hong pia ding hi.” (Pau. 3:1,
2). HIh kizopna in vantung
Jerusalem nunna singkung a po-na, lampi
laizangah kimu kik ding hi (Mang. 22:2, 21).
“Pasian in Eve a piansakin numei in pasal sangin dinmun
niam zaw ding le a sang zaw dingin a bawl hi lo hi. Ahi zongin na khempeuhah
pasal tawh kikim dingin a bawl ahi hi. Nupate in dinmun kikim ding uh hi. A tuam tuakin nungta ding uh hi lo hi. Eve in
mawhna sung hong tun khit ciangin Adam in Eve tungah ukna nei dingin Topa in
thu a pia hi. Eve in a pasal ukna nuai-ah a om ding hi. Hih pen samsiat sungah
kihel hi. Mawhna hangin samsiatna in Eve nunna hingimsak hi. Numei sangin pasal
dinmun a sangzaw-ah a koihna tawh kizui-in pasal in a thu neihna zangkhialin
siatna sung a tung pasal tampi om hi. Pilna tawh kidim Pasian in hotkhiatna
hong geelin a dang gimthuakna khat tungtawnin a nihvei-na hehpihna a hong pia
hi. “Ellen G. White,Testimonies for the Church, vol. 3, p. 484.
KIKUP DING DOTNATE
1. Pasian in Adam le Eve tawh kimaituahin thu a
dong hi. Tua bangin a dot ciangin amawhna uh kiphawk thei ding bek tham lo-in
mawhna akisik nading deihna ahi hi. Hih thu mah Cain tungtangah hong dawkkik hi
(Pian. 4:9, 10), Tuicin(Pian.6:5-8),Babel Tausang (Pian. 11:5) le Sodom le
Gomorrah (Pian. 18:21). Koi bangin hih thute in sittel thukhenna (dawpkholh
thukhenna) pulaak uh hiam?
2. Bang hangin Eve in sia le pha theihna
singgah a nekna panin pilnangah dingin ngaihsun hi ding hiam? Eve bang lo-in
Pasian Kammal hong piak lametna sangin a hoih zaw thu khat ngah dingin lametna
nial thei ding i hiam?
