LESSON 9 February 19–25 JESUH, A KICING BIAKPIAKNA

 

LESSON 9       February 19–25

JESUH, A KICING BIAKPIAKNA

 

Sabbath Nitak

 

Tu kaal Sung sim ding: Heb. 9:15, Pian. 15:6–21,Jer. 34:8–22, Eph. 3:14– 19, Heb.7:27, Heb. 10:10, Heb. 9:22–28.

 

KAMNGAH: Bang hang hiam cihleh hih akisiangsak mite in khat vei biakpiakna tawha atawntungin a hoihkim hi.” (Hebrews 10:14).

 

Mawh hi, ci-in singlamteh tungah khailupna a thuak mi khat Pasian bangin biak ding pen nidang mite in sang zo lo uh hi. Roman laigelh in tua bang thute nialna thu gelh uh hi. Jew mite adingin thukham in Pasian samsiat mi in singtungah khailupna a thuak hi, ci-in ciamteh uh hi. (Thkna. 21:23).

 

Tua hi-in amasa-in Khristian sungah catacombs leihuam sungah kimu lim kisuahte lakah utong ( sih nawn lohna limcing) vakhu ( kimawlte lawhcinna) nisuh leh ngasa kimu thei hi. A nungciangin thu dang tuamtuam hong kilang hi.Noah tembaw; Abraham in biakpiakna-in Isaac a piakna, humpi koihna sung a Daniel, ngasa gilpi sung pan Jonah, tuucingpa in tuu puakna, leh nalamdang tampi, pumzaw mi damna ngahna, hankhuk sung pan a thokik Lazarus cihte kimu hi. Hihte in hotkhiatna, zawhna leh Pasian hong kepna pulaak uh hi. Singlamteh in ahihleh guallelhna leh maizumna limciing hi. Ahi zongin Singlamteh in Khristian upna kiciaptehna khat hong suak hi. Paul in lungdamna thu pen “Singlamteh vangliatna” ci hi. (1 Cor. 1:18, ESV).

Tu kaal sungin Hebrews pulaak Singlamteh thu i en ding hi

 

 

SUNDAY                       February 20

Bang hangin Biakpiakna kisam hiam?

 

 

Hebrews 9:15 in hong hilhna-ah Jesuh sihna in thuciam palsatna panin suahtakna hong pia hi, ci-in hong hilh hi.” Pasian mite in tawntung kamciam gamh a ngah nading uh a hi hi. Lai Siangtho hunlai-in thuciam in mi nih kikaal, ahih keileh gam nih kikal kiciamna hi-in thupi mahmah hi. Tua bangin a kiciam uh ciangin khat le khat tungah kamciam kipia-tuak uh hi. CIhnopna-ah a kamciam palsat khat in pasian gimpiakna thuak ding hi, cihna hi. A tam zaw-in hih thuciamnate gangawhna tawh kipsak uh hi. Gentehna-in Pasian in Abraham tawh thuciam a bawlna uah ganhing tumnih suah uh hi (Pian. 15:6–21).

 

Ganhing tumnihte kikaal ah pai uh a, thuciam a palsat zawzaw in gim thuak ding hi, cih lahna a hi hi. Pasian in tua ganhing tumnihte kikaal ah hong pai hi. Abraham tungah a piak thuciam palsat lo ding cih atelna hi.

 

Pian. 15:6–21 leh Jeremiah 34:8–22 enkak in. Hihte in thuciam tawh kisai bang thu pulaak uh hiam?

 

________________________________________________________

 

___________________________________________________________

 

Israel tawh Pasian thuciam in KHAPSA GAM luah theihna a pia hi. Hih thuciam sungah thukhamte leh meihal biakna tau tungah sithehna kihel hi.Thuciam a palsat zawzaw in gim thuak ding ahihna pulaak hi. Tua hangin Hebrews in “Sisan lo-in mawhsianna om lo hi,” ci-in pulaak hi. (Heb. 9:22).

 

Israelte in thuciam a palsat uh ciangin Pasian in nasa mahmah hi. Thuciam in thuciam a palsatte in sihna thuak ding hi, ci hi. Ahi zongin Pasian in a mite it hi. Pasian in thuciam palsatte gimpia lo hileh Ama thukhamte in thu nei lo ding suak hi. Leitungah thukham om kei leh na khempeuh in kisia khin ding hi. Eite tawntung thuciam i luah theih nadingin Pasian Tapa in amah leh amah eite munah sihna hong thuak hi (Heb. 9:15, 26, Rom.3:21–26). Cihnopna-ah Amah in a thukham sianthona tawisang ding a, thukham palsatte a hong hotkhiat nadingin sihna a hong thuak hi. Sihna longal lampi dang om lo hi.

 

Banghangin thukham in lungdamna thu-ah a thubulpi ahihna koi bangin mu thei na hiam?

 

 

61

 

MONDAY              February 21

Biakpiakna Tuamtuamte

 

 

Jesuh sihna in i mawhnate panin mawhmai-na, niinbaan lohna hong pia hi. Mawhsawpsian nadingin thuciam palsatna hangin thaman piakna sangin lian zaw hi. Hih sungah a dang a thupi kihel hi. Tua hangin Israelte in biakpiakna nam nga bangin khen uh hi. Tuate khat ciat in Singlamteh tunga Khrih hong sihna pulaak uh hi.

 

Ephesians 3:14–19 sim in. Thu-umte adingin Paul in bang thungen hiam?

 

___________________________________________________________

 

___________________________________________________________

 

Meihal biakpiakna( haltumna) ah meihalna tau tungah ganhing pumpi kihaltum hi.(Siam. 1) Tua in Jesuh limcing hi; ama nunna in ei hong kipia hi. Mawhna hangin a hong thuakna-ah eite tungah Jesuh hong kipiakna kihel hi. Amah in Pasian tawh pumkhat hi mah taleh, Jesuh in amah le amah hong kiniamkhiatin sila dinmun hong la hi (Phil. 2:5–8).

 

Mangbuh tawh biakpiakna in Pasian in a mite hong kepna hanga lungdamkohna hi(Siam. 2). HIh in zong Jesuh – nunna an limcing hi. (John 6:35, 48), Ama tungtawnin eite in tawntung nunna i ngah hi. Thunuam a annek khopna in lawmte leh innkuanpihte tungah Pasian hong piak damna thu hangin lungdamkohna pawi hi. (Siam. 3).Hih in zong Khrih limcing hi. Amah in eite kilemna hong suak hi. (Isa. 53:5, Rom. 5:1, Eph. 2:14). Tua banah Jesuh si dawnin a sa a ne mite in Ama hong sihna-ah a kihel i suak hi. (John 6:51–56). Mawhna hangin biakpiakna in kilemna hong guan hi. (Siam. 4:1–5:13). Hih biakpiak in sisan tawh biakpiakna limtakin hong hilh hi. Sisan in nunna limla hi. Jesuh nunna in mawhnate sung panin hong honkhia hi.(Siam. 17:11). I mawhna panin ahong honkhia ding Jesuh tungah lametna hong guan hi.(Matt. 26:28, Rom. 3:25, Heb. 9:14).

 

Mawhna hanga biakpiakna in (Siam. 5:14–6:7) mawhmaina hong pia-in mun khatkhatte-ah lohkikna piak ding zong hong hilh hi. Pasian in mawhna hong maisakin ahi zongin khialhna hangin lohkikna a pha bawlkikna hong ngen hi.

 

Biakbuk in Hotkhiat ngah nadingin eite tangin Jesuh sihna san ding thu sangin lian zaw hi. Ama hong vak ding zong i kisam hi; a hong piak thuphate midangte tungah hawmsawn-in i tungah hong khial mite thupha bawlkik ding hong hilh hi.

 

 

TUESDAY              February 22   

Jesuh kipiakna Kicing

 

 

Hebrews 7:27 leh Hebrews 10:10 sim in. Koi bangin Jesuh hong kipiakna pulaak hiam?

 

_________________________________________________________________

 

___________________________________________________________

 

Levi siampite a milip tampi pha uh hi. Bang hang hiam cihleh si cih longal siampi sem thei vive suak uh hi. (Heb. 7:23) Jesuh siampi hihna tawh enkak lehang Jesuh in nungta tawntungin atawntung siampi hong suak hi. (Heb. 7:24, 25). Levi siampite in ‘nisim’(Heb. 7:27) leh “kum sial” (Heb. 9:25) thunuam a piakna leh biakpiaknate pia uh hi. Hih biakpiaknate in mite kicinna hong pia thei lo hi. (Heb. 9:9; Heb. 10:1–4). Ahi zongin Jesuh khat vei hong kipiakna in “ Mi khempeuh mawhmai nadingin a kicing hi.” (Heb. 10:10, 12–14) Khat vei ama i ngaihsutna a hahsiang hi (Heb. 9:14, Heb. 10:1–10) mawhna khempeuh panin hong hahsiang hi(Heb. 9:26). Jesuh sihna in ganghing tawh biakpiaknate sangin a lian zaw hi.Bang hang hiam cihleh Jesuh in Pasian Tapa hi.( Heb. 7:26–28); amah in Pasian deihna paubaanna om lo-in akicingsak hi. (Heb. 10:5–10).

 

Jesuh khat vei a hong sihna in mi khempeuh adingin a kicing sihna cih thu in a thupi thu pulaak hi.Amasa-in Jesuh sihna mawhmai nadingin kicingin nawlkhin theih hi lo hi.Levi siampite biakpiakna in khat vei bek tawh kicing zo lo ahih manin biakpiakna pia kikkik uh hi. Bang hang hiam cihleh tua bang biakpiaknate in muibun zo lo hi. Tua hikeileh amau biakpiakna in khawl ngei lo ding hi. Biakpiakna a pia mite in siansuahna ngah khinin mawhna thu a thei nawn kei uh hi. (Heb. 10:2).

 

Nihna-ah Thukhun Lui biakpiakna limciin kholh khempeuh in Singlamteh tungah tangtung hi. Tua hi-in Jesuh in mawhna panin hong honkhia hi banah (Heb. 9:14;Heb. 10:10–14) hong siangthosak hi; i nunna pan mawhna khempeuh hong lakkhiatsak hi. (Heb. 9:26). Siampite in Pasian mai-ah mipite aitangin biakbukah va kilangh hi. Tua bangin Pasian mai-ah a paima-un amaute in kisiansuah masa uh hi. (Siam. 8, 9). Jesuh hong sihna in eite a hong sawpsiang hi; a hong ki-apsak hi.(Heb. 10:10–14) Tua hangin khamuanna tawh Pasian i vazuan thei-in ama siampi na a sem thei ihi hi. (Heb. 10:19–23;Heb. 9:14, 1 Pet. 2:9). A tawpna-ah Jesuh hong sihna in upna thahatsak hi. Tua in i pai nading lampi hong lak hi; tua lampi zui-in a pai ding kisam hi. Tua hi-in Hebrews in Jesuh bek mitsuan dingin hong hilh hi; a diakdiakin singlamteh leh Ama hong makaihna a zui ding ihi hi (Heb. 12:1–4, Heb. 13:12, 13).

 

Singlamteh in Pasian thupha khempeuh ahong pia hi. Tua in mawhna sung pan a hong siansuahna, upna hatna leh thu upna sungah hong khangcingsak hi. Koi bangin Jesuh sungah a hong kipiate sungah nuamsa semsem thei ding i hiam?

 

 

 

WEDNESDAY                    February 23

Singlamteh leh mawhmai nading piakkhiatna

 

 

Hebrews 9:22–28 sim in. Hih in vantung biakbuka Khrih nasep bang hong hilh hiam?

 

____________________________________________________________

__________________________________________________________

 

Vantung biakbuk in siansuah kisam hi, cih thute in Thukhun Lui biakbuk nasepzia zui-in a kipulaak ahi hi. Biakbuk in Pasian ukna limciing hi.(1 Sam. 4:4, 2 Sam. 6:2), Pasian in Ama gam sung om dingte mawhna a siansuahna zia leh mawhnei mi in dikna a ngahtheihna thu hong hilh hi. (Late. 97:2). UKPA ahih bangmahin Pasian in A mite thukhen hi; Ahihna khempeuh in thuman tawh kidim hi. Mawhbaang lo mi adikna pulaakin a mawh mi gimpia hi. Tua hi-in, Pasian in mawhnei mi mawhna maisakin thukhenna tawh kizui-in a sep ding khempeuh a zo hi. Biakbuk in Pasian zia le tong aitangin a om hi-in,biakbuk sungin mawhna tawh kidimin niin suak hi. Hih thu in Pasian in i mawhnate pua-in mawhmai-na hong pai hi, cih hong hilh hi.(Pai.34:7, Gam. 14:17–19) Hebrews tawh kigelhna-ah mawhmaisakna “nōśē¾ cihna-ah kizangin a khiatna in “puakhia’ “gimthuak” cihna hi. Israelte biakbukah biakpiakna in mawhmaisakna pulaak uh hi. Mi khat in mawhmai-na a nget nadingin ganhing khat ama aitangin hong paipiha, tua tungah a mawhnate suutin tua khit ciangin a ganhing go hi.

 

Gan sisan in biakbuk dei masa sunga meihalna tau tung tengah kitheh hi. Tua in ama mawhnate biakbukah kisuan khia limla hi. Pasian in a mite mawhna khempeuh Ama tungah kisuanin mawhmai-na a pia hi. Israelte biakpiakna sungah siansuahna ahih keileh mawhmaisakna tawh kisai biakpiakna in cial nih nei hi. Kum khat sung tawntung mawhnei mi in biakpiak nadingin a ganhing biakbukah vapaipih hi. Meihal biakpiak a neih khit ciangin ama mawhnate in biakbukah- Pasian tungah kisuankhia hi. Kum bei ciangin kum khat ciin Mawhsuutpi Ni, thukhen ni, hong tun ciangin Pasian in biakbuk siansuahna nei hi. Biakbuk sung mawhna khempeuh a siangsak hi; Ama thukhenna nasep semin mawhnateng khempeuh Azazel, Satan limcing tungah suan uh hi. (Siam. 16:15–22). Hih siansuahna cial nihte in vantung biakbuk limcing leitung biakbuk khennihah kisem hi. (Pai. 25:9, Heb. 8:5), Pasian in hehpihna leh thutanna a pulaakkhawm hi. Kum khat sungin a mawhna thum mite in Pasian tungah citak uh a, Mawtsuutpi Ni ciangin antangin Pasian mai-ah amau le amau akiniamkhiat-tawm uh hi. (Siam. 16:29–31). Tua ni-in a citak lo mi in a mipihte kiangpan kikhenkhia ding hi. (Siam. 23:27–32).

 

Na mawhna hangin gimthuak ding ngaihsun in. Bangci bangin nang adingin Khrih hong sihna in hong huh hiam?

 

 

THURSDAY             February 24

Thukhenna le Pasian zia le tong

 

 

Romans 3:21–26; Romans 1:16, 17; and Romans 5:8 sim in. Singlamteh hong piak mawhmai-na hotkhiatna in Pasian thu bang pulaak hiam?

 

______________________________________________________________

 

Mawhmai-na i ngah theihna in vantung biakbuk deihnihte-ah Jesuh palaai sepna pulaak hi. Amasa-in Jesuh in i mawhnate Singlamteh tungah hemkhia-in Amah a um mi khempeuh tungah mawhmai-na a guan hi. (Sawl. 2:38, 5:31). Singlamteh tawh Jesuh in mimal khat ciat mawhmai-sak theihna a ngah hi. Bang hang hiam cihleh Ama in i mawhnate a puakhia hi. Amah in thuciam thak a hong pankhia hi. Amah in Kha Siangtho tungtawnin i lungtang tungah A thukham hong gelh hi.(Heb. 8:10–12, Ezek. 36:25–27).

 

A cial nihna biakbuk nasepna-ah Jesuh thukhen nasep, dawpkholh sittelna thukhen in Hebrews pawlpite in a maingat uh hi. (Heb. 2:1–4; Heb. 6:2; Heb. 9:27, 28; Heb. 10:25). Hih thukhenna in Pasian mite tawh kipanin Danial 7: 9-27; Matthew 22:1–14, Mang 14:7. Hih thkhenna ngimna in Pasian in a mite mawhna maisakin Pasian dikna lahtel nading ahi hi.Hih thukhenna-ah thukhenna thuak mite nunna ciaptehna khempeuh vankhuanuai muh dingin kihong hi. Thu-um mite lungsim sunga om khempeuh a kilanghkhia ding hi.

 

Amau in Honpa-in Jesuh sang uh a, a nuntak uh in Kha Siangtho tawh kidim ahihna kilangh ding hi. Hih thukhenna tawh kisai-in Ellen G. White gelhna-ah: “Hih thukhenna-ah mihing in ama tha tawh thukhenna a zo thei kei ding hi. A puansilh in mawhniin tawh kidim hi. A mawhna a thuumin amah in Pasian mai-ah a ding hi. Ahi zongin Jesuh in a mawhna kisik mi khempeuh aitangin mawhthuumna a neihsak hi. Amaute in upna tawh Jesuh sungah a ki-ap uh hi. Jesuh in amaute a mawhpaihna khempeuh Kalvary tunga asihna tawh a nial hi. Jesuh in singlamteh tungah kithahna a thuak dongin Pasian thukham a nuntakpih hi. Pa Pasian in Jesuh tungah leitung vantung vangliatna khempeuh a pia hi. Jesuh a Pa hehpihna leh mimawh mi adingin mawhmai-na a thuumsak hi. Tua bangin Jesuh in eite adingin Palaai a sepna thu ngaihsunin i mawhnate leh i nunzia, i dinmun thei-in, dikna, siangthona leh vangliatna i ngah nadingin Khrih dikna tungah i kingak ding kisam hi.

 

I tungah Satan hong mawhpaihnate i do zo kei hi. Khrih bekin a zo thei hi. Amah in eite adingin mawhthuumna nei hi. Amah in gamtatna siksan hi lo-in Ama dikna siksanin Satan hong mawhpaihna khempeuh Jesuh in a daisak thei hi. Testimonies for the Church, vol. 5, pp. 471, 472.

 

Thukhenna tawh kisai-in bang hangin i ading Jesuh in a nasep kiniamkhiatna, mawh kisikna leh muan ding kisam hiam?

 

 

FRIDAY               February 25

Ngaihsutbeh ding: Ellen G. White, “Calvary,” pp. 741– 757; “ ‘It Is Finished,’ “ pp. 758–764, in The Desire of Ages sim in.

 

Professor Jiri Moskala in Sittel thukhenna tawh kisai hih bangin hong hilh hi: “ I mawhnate mi khempeuh in amuh dingin Jesuh in thukhen hi lo hi. A langkhatah Amah in vankhuanuai khempeuh muh dingin Ama hehpihna le a hong lainatna pulaak masa hi. Amah in mihingte nuntakna buppi thei-in Pasian tungah ka lungpuakzia, ka ngaihsutna, ka gamtatnate, ka mainawtna khempeuh a kilangsak hi. Ka mawh ka khialhnate Jesuh in teci pang ding hi. Ama thukham siangtho palsatnate, ahi zongin ka mawhna tampite kisikin mawhmaina ka nget ciangin Jesuh in Ama hehpihna tawh a hong khel hi.Amah in “ ka sisan in mawhnei Moskala, amah in kei leh midangte tungah itna hong nei-in angsung ngaihsun het lo-in amah in kilawm kituakin, amah in ka ta hi; Amah in a diktat ka nasem hoih ahi hi” ci-in a pulaak hi.Toward a Biblical Theology of God’s Judgment: A Celebration of the Cross in Seven Phases of Divine Universal Judgment,” Journal of the Adventist Theological Society 15 (Spring 2004): p. 155.

“Tatkhiatte le mawh nei lo vantungmite in Khrih singlamteh thu sin ding uh a, la-in a sa ding uh hi. Jesuh maitang panin khuavak taangin itna a pia khia vangliatna nitang hi ding hi. Kalvary panin nitang in itna hong pia thukham, leitung le vantung adingin nunna thukham a kilangsak hi; tua itna in ama nopsak nading zong lo-in Pasian lungtang panin hong pai itna hi. Kiniamkhiatna le nunneem tawh a kidim Ama nunzia hong lak hi. Amah in khuavak sungah omin tua khuavak kuamah in a neh zo kei hi.Ellen G. White, The Desire of Ages, pp. 19, 20.

 

 

KIKUP DING DOTNATE:

 

1.      Mihingte in a tawntungin biakpiakna a tuamtuamte Pasian tungah pia-in Pasian tung pan mawhmaina leh hotkhiatna lamen uh hi. Mi kim khat in tua bangin biakpiaknate ah pumpi gimna tawlna (kigawtna) leh a nunna uh pia khia uh hi. Hih bang biakpiaknate in Jesuh hong kipiakna le Lai Siangtho hong hilhna siksan lehang hih bang biakpiakte kisam lo hi. (Dan. 9:27, Heb. 10:18).

 

2.    Ahi zongin lamkhat panin biakpiakna in thu-um mi nunn-ah bang dinmun nei hiam? Jesuh in na singlamteh pua-in ka nung hong zui in” ci-in hongsawlna thu a khiatna in bang hi ding hiam? (Matt. 16:24), ahih keileh Sawltak Paul in “na pumpi uh a hing biakpiakna, a siangtho a deihhuai, Pasian santhamcing biakpiakna-in na pia ta un” a cih ciang bang a gennopna hi ding hiam? (Rom. 12:1)

 

 

3.    Jesuh hong sawlna leh Paul gen thu in bangci bangin kizopna nei hiam?(Matt. 16:24, Rom. 12:1) le Hebrews 13:15, 16.