LESSON 7 February 5 - 11 JESUH, I BELH SIKKIP

 

LESSON 7       February 5 - 11

JESUH, I BELH SIKKIP

  

 

Sabbath Nitak:

 

Tu kaal sung sim ding: Heb. 6:4–6, Matt. 16:24, Rom. 6:6, Heb. 10:26–29, Heb. 6:9–13, Heb. 6:17–20.

 

KAMNGAH: “Eite in tua lametna Kha adingin sikkip i nei a, kip mahmahin muanhuai hi. Tua in, puanzak nung mun siangtho sungnung ah lut a, tua munah Jesuh eite ma-ah eite tangin a na lut khinzo hi. Amah Melchizedek gui zui-in tawntung tulpi hong suak hi.”(Hebrews 6:19, 20, ).

 

Hebrews 5:11–6:20 in eite tangin siampi ahihna thu tawh kisai Lai Siangtho thuthuk a hong hilhcianna hi.Paul in Khrih kiang panin pai khiat ding lauhuai-na hong vauhilh hi. Mi kimkhat in amau deihna zui-in upna nei lo-in Khrih kiang panin a paikhia uh hi. Sawltak Paul in Ama laigelh a simkhate in a thuak uh gimnate hangin upna thu-ah bangmah thei lote bangin om lo-in upna sungah dinkhol ding lauhuaina hong hilh khin hi. Gimna hangin a lungkiate in lauhuai dinmun ah om uh hi. Gimna hangin na upna a kiam hiam? Lai Siangtho hong hilh thute in mainawt nading vive hi. Paul in Jesuh tungtawnin Pasian in a kisia ngei lo ding hotkhiatna kamciam hong pia hi(Heb. 6:9–20).

 

Vauhhilhkholhna leh thapiakna Hebrews 10:26–39ah kimu thei hi. Jesuh tung panin thapiakna kammalte i sinkhawm dng hi.

 

 

SUNDAY                       February 6

Kammal Hoihna Ciamkha

 

Hebrews 6:4, 5 sim in. Khrih tungah a citakte tungah bang thute kipia hiam?

 

_____________________________________________________________

 

___________________________________________________________

 

“Khuavak mu khin” cih thu in nunna kikhelna pulaak hi (Heb. 10:32). Khuavak mute in khuamial vangliatna, Satan ukna panin Pasian khuavakah a kalsuante pulaak hi.(Sawl. 26:17, 18). Tua in mawhna sung pan suahtakna (Eph.5:11) le thuman theihlohna panin suahtakna hi (1 Thess. 5:4, 5). Tua bangin suahtakna in Jesuh tungtawnin Pasian sepna hi-in, “Pasian vangliatna kilatkhiatna” hi.(Heb. 1:3).

 

“Hotkhiatna ciam”cih thu in “ Kha Siangtho tawh nungta” cihna hi. Pasian piakkhong in Ama hehpihna in Pasian hong piak khong hi. (Rom. 5:15) ahih keileh Pasian in Kha Siangtho tungtawnin hehpihna hong pia hi. (Sawl. 2:38). Kha Siangtho tawh a nungta khinte in (John 7:37–39, 1 Cor. 12:13) hehpihna sungah a nungta khin mite ahi uh hi; tua nunna sungah Ama deihna kicinna zong kihel hi. (Gal. 5:22, 23).

 

Topa kammal hoihna a ciamkhin mite in (Heb. 6:5,8) lungdamna thuman tawh a nungta mite ahi uh hi. (1 Pet. 2:2, 3). “A hong tung ding hun a vangliatna in” Pasian in thu-um mite adingin sihna pan thawhkikna nalamdang bawl ding hi (John 5:28, 29), i pumpi kikhel ding a, tawntung nunna ah kikhel ding hi.Ahi zongin thu-um mite in tu-in tua vangliatna a ciam thei hi. Amaute in Kha thu-ah a thokik mite ahi uh hi (Col. 2:12, 13), lungsim thaksuahna (Rom. 12:2) Khrih sungah tawntung nunna a ciam khin uh hi (John 5:24). Paul in hih bangin a gen ciangin sehnel gam sunga Israel mite tuahkhak thute ngaihsun hi ding hi.AMaute in Pasian hehpihna leh Ama hotkhiatna angah uh hi.Sehnel khang mite tungah meikhuampi panin khuavak a taang hi. (Neh. 9:12, 19; Late 105:39), a kipia khong vantung manna tawh nuamsa uh hi (Pai. 16:15), Kha Siangtho tawh nungta uh hi. (Neh. 9:20), Pasian kammal hoihna a ciam uh hi.(Josh. 21:45). A hong tung ding hun a vangliatna sungah “Egypt gampan amaute suahtak nadingin lim leh nalamdangte kihel hi.” (Sawl. 7:36). Ahi zongin Paul in a genna-ah sehnel gama akhangmite in tua bangin lim leh nalamdangte muh khin uh hi mah taleh amaute in Pasian a langpan uh hi.

 

(Gam. 14:1– 35), Hebrews pawlpite I n Pasian maipha sungah nuamsa khin uh hi mah taleh amaute zong a lauhuai dinmun ah om uh hi. Hebrews pulaak a lauhuai dinmunah na om kha ngei hiam? Gentehna-in Khuavak mu khin napi-in khuamial sung nungta bangin na om hiam?

 

 

TUESDAY                 February 8

A Kipulaak lo Mawhnate adingin biakpiakna om lo

 

 

Hebrews 6:4–6 sunga vauhilhna thute in Heb.10:26–29 thute tawh kibang hi. Khrih sihna a nial mite adingin mawhmai nading lampi om lo hi. Bang hang hiam cihleh Jesuh simloh mawhmai nading dang om lo hi. (Heb. 10:1–14).

 

Hebrews 10:26–29 sim in. Mawhmai-na kingah theihlohna mawhna lampi thumte bang pulaak hiam?

 

___________________________________________________________

 

___________________________________________________________

 

Hebrews laigelhpa in thuman theih khit nungah mawhna in mawhmai-nading om lo hi, ci hi. Pasian in Jesuh in eite palaai dingin sehkhin hi. (1 John 2:1). Ama tungtawnin eite in mawhmai-na i ngah thei hi. (1 John 1:9). Mawhmai-na om lo mawhna in Pasian Tapa khe nuai-ah a tuatcilna thuciamna sisan zangkhai ngaihsutna leh Kha Siangtho hehsakna, dahsaknate hi. (Heb. 10:29). Hih kammalte a khiatna i ensuk ding hi. Khe nuai-ah Pasian Tapa tuatcilan cih thu in Jesuh ukna nialna hi. (Heb. 10:29) Pasian Tapa cih minin Pasian khut ziatlamah Jesuh koihin a khenuai-ah a galte koih ding kamciam pulaak hi. (Heb. 1:13; Heb. 1:5–12, 14). Khe nuai-ah Jesuh koih cih a khiatna in Jesuh pen gal bangin ngaihsutna ahi hi. Hebrews laikhak tungtawnin khe nuai-ah Jesuh koih cih in (Heb. 1:13), Jesuh a kumpi tokhom panin hemkhia cihna hi. Tu-in tua tokhom ah thuman langpangpa a tu hi) Lucifer in vantungah tua na sem hi. Thukham neilo pa in mailam hunah hong semkik ding hi (Isa. 14:12–14; 2 Thess. 2:3, 4).

 

Thuciam sisan niinsak, zangkhai ngaihsut cih thu in Jesuh hong sihna nialna hi (Heb. 9:15–22).Siansuah vangliatna nei Jesuh sisan hemkhia cihna hi.

 

Kha Siangtho hehsak, dahsak cih ciangin lauhuai mahmah hi. Greek laimalah “enybrisas” (hehsak, dahsak) siantholohna akilangsak ‘ awlmawhlohna” bangmah theihlohna a pulaak kammal hi. Hih thu leh hehpihna nei Kha SIantho nasep ki-mu thei hi.

 

Pasian hong piak hehpihna nial, thusim lo cihna hi. Tua in thuman lampialna hipah hi. Tua bang mi in Jesuh, Ama sihna leh Kha Siangtho a nial hi.

 

 

WEDNESDAY                       February 9

A Hoih zaw Nate

 

 

Hebrews 6:4–8, vauhilhna leh hilhkholhna limtakin a pulaakkhit ciangin Paul in Tapa kiang pan lampial lo dingin hilh hi. Ama laikhak a sim mite in hih a lauhuai vauhilhna uma , gah hoih gahpha ding a lamen hi. Amaute nunna in leitang tawh kibang hi; hih leitang in Pasian khaici vawhna hi-in Ama lamet bangin a gah nei ding uh hi. Hih mite in Pasian tung panin thupha a ngah uh hi.(Heb. 6:7), tua in hotkhiatna hi.(Heb. 6:9).

 

Hebrews 6:9–12 sim in. Hebrews pawlpite na hoih a septeng uh kigualsuk hi. Tatsat lo-in tua na hoihte zom toto ding leh tuate in bang pulaak hiam,, cih a hilh hi.

 

___________________________________________________________

 

___________________________________________________________

 

Thu-um mite in Pasian min itna nei ding uh hi. Pasian mahmah itin, a mi siangthote tungah na hoih sem ding uh hi. A beisa hun a sepna bek hi lo dinga, tumahmahin zomto suak ding uh hi. Na hoih sepnate in nunzia man kilangsak hi. Pasian itna in biakna mi hihna hi lo-in midangte itna in Pasian itna kilangsak zaw hi; a diakdiakin a cimawh a gentheite itna hi ding hi.(Matt. 10:42, Matt. 25:31–46). Tua hi-in Paul in thu-um mite in na hoih sep ding mangngilh lo dingin hanthawn hi (Heb. 13:2, 16).

 

Hebrews 6:12 sim in. Thadahna, om mawkmawkna langpan hi. Tua bangin a thadahte le a mawk om mite in upna panin a puk mite hi,ci hi. (Heb.5:11, Heb. 6:12). Lametna in a thu-in theihna hi lo-in upna hangin itna tawh nasepna hi (Rom. 13:8–10).

 

Thu-um mite in kamciam sungah upna le thuakzawhna tawh nungta dingin Paul in a hanthawn hi. Paul in sehnel khang mite thuak thute pulaak khin a, amaute in upna le thuakzawhna nei lo ahih manun a luah dingun a kipia kamciam amu kha kei uh hi, ci-in a hilh hi. Tua khit ciangin Paul in upna leh thuakzawhna-ah etteh dingin Abraham (Heb. 6:13–15) thu a pulaak hi. Abraham in Pasian kamciam amu kha hi. Paul in upna thu-ah etteh ding mi siangtho tampi hong gualsuk hi. Hebrews 11 sungah upna le thuakzawhna-ah etteh ding a lian penpen Jesuh hong hilh hi(Hebrews 12:1–4).

 

Mang.14:12 in upna thuakzawhna leh Thukham a nei mite thu hilhin hihte in hun nunung ni ciangin mi siangthote nunzia ding hong hilh hi. Khat veivei ciangin i it mite tungah hilhkholhna i pia thei hi.Sawltakpa vauhilhna leh hanthotna panin bang thute na nuntakpih ding hiam?

 

 

THURSDAY                           February 10

Munkipna Jesuh

 

 

Paul in thuman panin lampial loh ding a hilhkholhna le thu-um mite a hanthotna-ah itna, upna tawh Khrih sungah khamuang dingin a hanthawn hi.

 

Hebrews 6:17–20 sim in. Koi bangin Pasian in A tate tungah kamciam a muanhuaina hong lak hiam?

 

___________________________________________________________

 

___________________________________________________________

 

Pasian in A kamciamte muanhuai-na lampi tuamtuam tawh hong hilh hi. Amasa-in Pasian in a kamciam muanhuai-na hong hilh nadingin ahong kiciam hi (Heb. 6:17). Pasian in Abraham le David tungah a kiciamna in a tawpna-ah Israel minam maipha a piakna tawh hong tangtung hi. Israel mite in Topa langpanin kham bawnglim a biak khit uh ciangin Moses in Topa tungah Abraham tungah a thuciam siksanin a mipihte mawhna mai nading mawhthumna nei hi( Pai. 32:11–14, Pian. 22:16–18). Pasian kiciamna in kikhel thei lo ahihna hong lak hi (Rom. 9:4; Rom. 11:28, 29). Tua bang mahin Late gelhpa in zong Israel mite adingin David tungah Topa kiciamna a pulaak hi. “ Topa genna-ah “ Ka thukhun ka palsat kei ding a, ka muka ka genkhiatsa zong ka khel kei ding hi. Khatvei-a cin dingin ka siantho-na kiciam khin a, David tungah zuau phuak lo—in ama khanggui kizomsuak ding aka mai-ah ni bangin a kumpi tokhom kip hi.” (Late. 89:34–37).Thuthun Thak hong hilh bangin Pasian kiciamnate in Jesuh sungah tangtung hi. Abraham suan sung panin David kumpi tokhom tungah a tu om hi (Gal. 3:13–16; Luke 1:31–33, 54, 55).

 

Nihna-ah Jesuh in Pasian ziatlam ah a tutna hangin Pasian in ama kamciam bangin sem takpi ding hi, cih kipsak hi. Jesuh vankahna in thu-um mite tungah Pasian kamciamte a tangtun nading hi. Jesuh in eite aitangin ama paikhol hi. (Heb. 6:20). Tua hi-in Jesuh vankahna in eite a hong kihotkhiat takpi-na thu hong lak hi. Pasian in Jesuh gimthuakin mi khempeuh adingin sihna a thuakna tawh vangliatna a pia hi. Ama sihna hangin ama ta tampi in vangliatna a ngah nading uh ahi hi. (Heb. 2:9, 10). Pasian mai-ah Jesuh omna in ei adingin a muanhuai sikkip hi. (Heb. 6:19) tua in Pasian tokhom tawh hong kinai-sak hi.Jesuh tungtawnin Pasian Kamciamte tangtung hi lo hiam? Khamuan nading bang dang kisam i hiam?

 

Pasian in na tungah hong kiciam cih thu na ngaihsut ciangin bang na phawk hiam? Kilawmna nei lo hi napi-in bang hangin tua in hotkhiatna sungah hong khamuangsak hiam?

 

 

FRIDAY                      February 11

 

Ngaihsutbeh ding: Ellen G. White, “John the Beloved,”pp. 539–545, in The Acts of the Apostles; “Judas,” pp. 716–722, in The Desire of Ages cihte sim in.

 

“A lian mahmah mawhna galdo-na kizo khin hi. I nunna kipiakna, Pasian deih bangin nun nadingin hanciam kul hi. siangthona sungah i nuntakna khempeuh a kibawlphatma-in i nuntaknakhempeuh Pasian tungah kipiak kul hi. Ellen G. White, Steps to Christ, p. 43.

 

“John in Jesuh tawh kibang dingin lunggulh hi. Khrih itna nuai-a a nunna kikhel nadingin a kiniamsak hi. Ama deihna khempeuh Jesuh sungah tumcip hi. A lawmdangte khempeuh sangin John in ama nunna a lamdang nuntakna sungah a kipia hi. “John in Khrih itna thuk nei ahih manin Amah tawh omkhawm ding lunggulh den hi. Honpa in Nungzui sawm le nihte sangin John in kipiakna a nei zaw hi. Amah in Nungzuidangte sangin a moi zaw hi.Naupang bangin a lungsim khempeuh Jesuh tungah a kipia hi. Khrih tungah hehpihna lungsim nei semsemin Honpa thuman thute midangte tungah a hilhsawn thei hi. Siantho etlawmna in ama nunna khelin a maisuah panin Khrih vang a tangkhia hi. Khrih meel a suunin amah tawh pumkhat a suah matengin Honpa pahtawina leh itna tawh a kidim hi. Ama nunna in A Topa zia le tong kilang ding bek a lunggulh hi. Ellen G. White, The Acts of the Apostles, pp. 544, 545.

 

Kikup Ding Dotnate:

 

1.      John leh Judas Iscariot in a kibanglo a thupi nunna nih etkak theih dingin thupi hi. Jesuh in John a sanggampa Boanerges, khuaphialep tate mu hi. John in paubaanna nei hi. Judas in zong paubaanna nei hi. Ahi zongin ama paubaanna in Johna sangin siahuai zaw lo hi.

 

2.    Bang hangin John in Jesuh zia le tong nei-in Judah in Kha Siangtho tungah mawh ahi hiam? Bang kilam dang uh hiam? Jesuh in thu-um mite in singlamteh pua-in ama nungzui dingin hong sam hi. Singlamteh pua-in Jesuh nungzuihna leh midangte nungzuihna in bang kilamdang hiam?

 

3.    Bang hangin Pasian in ama tungah nuntakna khempeuh kipia dingin hong ngen hiam? Suahta takin deihtel theihna leh hotkhiatna in bang kizopna nei hiam?