LESSON 7 | November 6–12

 

LESSON 7  November 6–12

THUKHAM LEH HEHPIHNA

 

 

Sabbath Nitak

 

Tu kaal sung sim ding: Ezek. 28:15, 16; Thkna. 4:44; Rom. 3:20; Thkna. 10:1–15; 5:6–22; 9:1–6.

 

KAMNGAH: “Hih bang ka gen ciangin Pasian’ hehpihna thupha ka deih lohna ahi kei a, Thukham zuihzawhna hangin Pasian tawh kipawl theihna om hileh, singlamteh tungah Khrih sihna a mawkna hi lel ding hi, a cinuam ka hizaw hi” (Galatians 2:21).

Khristian pawlpi tampi in thukham leh hehpihna leh hih nihte kizopna gen uh hi. Thukham in Pasian sianthona leh dikna-ah Ama dinmun hong hilh hi; “Mawhna i cih pen thukham palsatna hi; mawhna in thukham neihlohna hi; a mawh mi khempeuh thukham palsat ahi uh hi” (1 John 3:4) Eite khempeuh in thukham palsat ihih manin mawhna ukna nuai-ah i nungta hi (Gal. 3:22); tua hi-in Pasian hehpihna bek in mawhna sung pan a honkhia thei hi.“ Note’ upna hangin Pasian’ hong hehpihna tawh hotkhiatna a ngah na hi uh hi. Note’ thalawhna hangin a ngah hi loin Pasian’ hong piakkhong ahi hi” (Eph. 2:8).

        Piansak ni sagih ni Sabbath in thukham lak pan a thupi mahmah thukham hi. there is the “slight detail” of the seventh-day Sabbath as part of the law. Ahi zongin siksan tuamtuam nei-in Khristian pawlpi tampi in piansak ni sagih Sababath a nial uh hi; Sabbath a nialna thute thuman bangin ngaihsun uh hi.

        Thuhilhkikna akipan Lai Siangtho buppi in thukham leh hehpihna tawh thu guipite a hong hilh hi. Thuhilhkikna hong hilh thukham leh hehpihna in a dangte bang lo-in tuamdiak hi.

 

SUNDAY                                                      November 7

Vantunga Thukham

       

 

        Pasian in itna Pasian hi; itna in Ama zia le tong leh Ama ukna bulpi kingakna hi. Pasian in eite hong it ahih manin Amah i itkik ding deih hi. Amah in sia leh pha khentel theihna leh suahtakna tawh hong piangsak hi; suahtakna in itna panin hong pai hi.

        Suahta takin gamtat theihna in thukham sawm hi. Subatomic, tuipi tunga tuihualpite, ganhingte in amau zuih ding thukham (natural law) nei ciat uh a, thukham sawm zui lo uh hi; kisam lo uh hi. Sia leh pha a khentel thei mihingte bek tham lo-in Pasian in vantungmite adingin zong thukham sawm a koih hi.

        Ezekiel 28:15, 16 sungah vantunga om Lucifer pukna kigelh hi. Ama sungah ‘mawhna’ om hi; amah in siatna bawl hi. Vantungah mawhna, thu manlohna om cih thu in vantungah thukham sawm om ahihna hong hilh hi lo hiam?

 

__________________________________________________________________

___________________________________________________________

 

        “Thu manlohna” “mawh” cih kammalte zong mihingte tungah a hong kizang kammmal hi. Tua hi mah taleh Lai Siangtho hong hilhna-ah vantunga thu manlohna, mawhna om cih thu in vantung zong Pasian bawlsa ahihna hong hilh hi. Hih thu in vantunga om nate thu leh leitunga om nate thu zong a hong hilh hi.     

        “Tua ahihleh Thukham mahmah pen a siahuai ahi hiam? A sia hi lo hi. Mawhna bang hiam cih Thukham in hong theitel sak hi. Thukham in, “Hazatna lungsim nei kei in,” ci-in gen lo hileh, haza i cih bang ahi hiam, ci-in ka thei kei ding hi” (Rom. 7:7). Koi bangin hih thu bulpi in vantungah zong sia leh pha khenteltheihna nei vantungmite om ahihna hong hilh hiam?

 __________________________________________________________________

___________________________________________________________

        Ellen G. White hong hilhna-ah:  Pasian deihna thute in Ama siangtho thukham in a pulaak hi; hih thukham bulpite in vantung ki-ukna thu bulpite hi. Vantungmi-siangthote in Pasian deihna sangin a sang zaw thu theihna a nei kei uh hi; Pasian deihna bangin a gamtatna uh sangin a lian zaw nasepna dang amau hih theih bangmah om lo  hi.” Thoughts From the Mount of Blessing, p. 109.

        Pasian in vantung ahi a leitung ahi a ukna-ah thukham tawh a uk hi. Tua thukham palsatna in mawhna hi.

        Banghangin thukham in sia leh pha a khentel thei mihing tawh kikhen thei lo hiam? Thukham om lo hileh, bang tawh sia leh pha kikhentel thei ding hiam? 

                 

 

 

MONDAY                                                              November 8

Thuhilhkikna sunga Thukham

 

 

        Pasian teltuam Hebrew minamte in a tawpna-ah Pasian kamciam lut dingin gamgi vatung uh hi. I pulaaksa bangin Thuhilhkikna in Moses in Hebrew mite tungah Canaan gam a teenma uh a thuhilhna hi. Tua a thuhilhnate sungah thupiakte a zuih nading uh thuhilhna hi.

        Anuai-a Lai Siangtho munte sim in. Bang thu kigen kikik hiam? Bang hangin tua thu in amaute adingin thupi hiam? (Thkna. 4:44, 17:19, 28:58, 30:10, 31:12, 32:46, 33:2).

__________________________________________________________________

__________________________________________________________________

 

        A tungtham simpakin zong Thuhilhkikna Bu in Israelte in thukham gen bangbang a man ding uh thupi mahmah ahihlam kimu theipah hi. A taktakin Pasian tawh thuciamna-ah thukham zui dingin a kithukimsa uh ahi hi. Amau leh amau in a sep zawh loh nate, a tangtun zawh loh ding uh nate Pasian in amaute adingin na tampi a semkhin hi; mailam hunah zong Pasian in sepsaklai ding hi. Tua bangin Pasian huhna leh hehpihna ngah dingin amaute in kilawmna khat beek a nei kei uh hi; Pasian hehpihna ngah ding kilawm lo pimah hehpihna ngah ihi hi. Tua hi-in Pasian hong hehpihna i dawnkikna-in Ama thukham a nuntakpih dingin hong deih hi.

        Tu-in bang mah kilamdanna om nai lo hi. Pasian hehpihna in eite hong hon hi; thukham zuihna tawh hotkhiatna ngah ihi kei hi. Tua hi-in mi khat in “upna tawh diktansakna a ngah hi; thukham zuihna tawh kuamah in diktansakna a ngah kei hi” (Rom. 3:28) – tua hotkhiatna i dawnkikna pen thukham i nuntakpihna a kilang hi.  Thukham i zui hi; thukham zuihna in a mawkna suak lo hi mah taleh, “tua hi-in thukham zuihna tawh kuamah in Pasian mai-ah diktansakna a ngah kei hi. Bang hang hiam cihleh thukham in mawhna a hong theisak hi” (Rom. 3:20), ahi zongin hehpihna hangin hotkhiatna a hong kipia khin zo hi. “Kei nong it uhleh, ka thukhamte na nuntakpih ding uh hi” (John 14:15).

        Thuhilhkikna in hehpihna leh thukham hong limhilh mahmah laibu khat hi. Hehpihna tawh Pasian in eite hong hon hi; Israelte in amau leh amau in Egypt gam pan a suahtak theih loh bangun, ei le ei in i sep theih loh Topa mahmah in a hong sepsak hi.  Ei adingin a hong sepsak i thuhkikna-in eite in upna tawh nungta-in, Amah le Ama thukhamte i zui hi. Adam puk a kipan gimna hun sung leh sapi ciaptehna hun sung a nungta mite in Pasian thukhamte lenkip ding uh a, amaute in Jesuh neih upna tawh a nungta ding uh hi” (Mang. 14:12) Pasian in a thuciam mite tawh kizopna-ah thukham leh hehpihna tawh kizom mite hi. God’s relationship with His covenant people is one of law and grace.  Pasian thukham palsat ihih manin Pasian hehpihna in mawhmai-na hong pia hi. Pasian hehpihna in Ama thukhamte zuihnopna lungsim hong guan hi. Ama thupiakte nuntakpihna in Amah tawh thuciam kizopna nei ihi hi.

        Koi bangin thukham i nuntakpihna-ah thukham zuihna tawh dikna ngah ding hanciamna pelh thei ding i hiam?

       

 

 

TUESDAY                                                              November 9

Letov Lak

 

       

        Upna nei lo mite in Lai Siangtho a nial nading thu zongzong uh hi; a tam zaw in Thukhun Lui siksanin Lai Siangtho a nial uh hi. Amau cihna-ah Thukhun Lui sunga thu in Pasian pen ngongtatna tawh kidim, mawhna maisak lo, a phincil, Jesuh lungsim puak tawh kibang lo hi, ci uh hi. Hih bang thute in tu leh tu-in a hong piang ahi kei hi. Tuma kum zalom tampi laipek a om tudongin om hi.

        Thukhun Lui in Topa in nidang Israelte a itna thu pulaak phapha hi; amaute hoih nading bek a deihsak Pasian hi. Hih itna Thuhilhkikna Bu sungah kimu thei hi.

        Thkna. 10:1–15 sim in. A zomah bang thu in zui pah hiam? Amaute in mawhna tawh kidim uh hi taleh, Pasian in amaute tawh bangci kizop hiam? Amaute bang thu hilh hiam? Hehpihna thu bang hong hilh hiam?

__________________________________________________________________

__________________________________________________________________

 

        Thuhilhkikna in Israelte tungah in Pasian hehpihna leh itna nei ahihlam hong lak hi Thkna.10: 12, 13 in laigualsau mahmah hi taleh Israelte tungah thudotna hi. “Nangma hoih nadingin ka lampite tawn in; hong it in, ka na sem in, ka thukhunte zui in, ci-in a hong sawl pa keimah Topa in bang ka hi hiam? Hebrew kamin a kigelhnate-ah ‘nang’ ‘nangma’ cih kammalte in mihon a pulaak kammal hi. Topa in Israel mipite tungah thuhilh hi mahtaleh mimal khat ciat in Topa thu nuam kei leh, a minam buppi-un Topa piak hoihna a ngah kha kei ding uh hi. Mimal khat ciat in Topa a zuih uh ciangin a vekpi-un thumang hi ding hi. Mimal lo-in mipi piang thei lo hi; mimal a hoih ciangin mipi hoih thei pan hi. Topa in Israelte a hopihna-ah Amah in mimal mimal tungah a hopih hi.

        Thkna 10: 13 gen thu i mangngilh ding hi lo hi.  Tua thupiakte in “Note hoih nading” (letov lak) hi, ci hi. Adang khatin gen lehang Pasian in a mite hoih nading a deihsak manin Ama thupiakte zui dingin a hilh hi zaw hi. Pasian in amaute a piangsak hi; amaute a kemcing hi. Amaute adingin a hoih pen a thei Amah hi. Ama thukhamte, Ama thupiakte nuntakpih uh hi leh, amaute hamphat nading hi zaw hi.

        Thukham in lauhuai-na pan ahong dal ding daai, kulhpi tawh kibang hi. Lauhuai-nate pan a hong dal thei daai leh kulhpite bang mahin thukham in siatnate panin ahong dal hi; tua hi keileh siatna in hong vuknel ding a, kisiatna sung i tung ding hi. A tawpin gen lehang a mite a itna hangin Pasian in amaute tungah Ama thukham a pia hi. Amaute in tua thukham nuntakpih uh hileh siatna tawh kipelhin amau adingin thu hoih hi ding hi.

        Bangci bangin in Pasian thukham in eite hoih na piangsak hi, ci-in na mu hiam?

 

 

WEDNESDAY                                                  November 10

Egypt A Sal

 

 

        Thuhilhkikna sungah thu guipi a kipulaak kikik khat in bang hiam cihleh Topa in a mite Egypt panin a honkhia hi, cih thu hi. Amaute adingin Pasian in a sepnate amaute tungah a kigen kikkik hi. “So the LORD brought us out of Egypt with a mighty hand and with an outstretched arm, with great terror and with signs and wonders”  (Deut. 26:8, NKJV; see also Deut. 16:1–6).

        Thukhun Lui buppi in Paikhiatna tangthu – Pasian in vangliatna tawh a mite a hotkhiatna thu, Pasian in Ama hehpihna tawh Egypt mite nenniamna thuakin sila-in a om a mite a hotkhiatna thu hi. “ Egypt gam panin note kong leisa na hi uh hi; keimah in note saltanna panin kong tankia hi” (Mic. 6:4).

        Thukhun Thak sungah zong hih thumah kimu hi. Egypt gam pan Israel mite Paikhiatna- suahtakna in Pasian vangliatna hangin hotkhiatna in Khrih sungah upna tawh kingah hi, cih a limcing hi. “Amaute in lampi-ah lampai bangin upna tawh San Tuipi a kantan uh hi; Egypt mite in zong San Tuipi kantan dingin a kithawi uhleh tui in a tummang khin uh hi. (Heb. 11:29, 1 Kor. 10:1–4).

        Thkna.5:6–22 sim in. Hih munah Moses in Thukham Sawmte mipite tungah a pulaakkik hi; Thukham Sawm in Yahweh tawh thuciamna-ah a bulpi hi. Thukham Li-na ngaihsun in; bang thu hangin hih thukham hong kipia hiam? Tua thute in thukham leh hehpihna kilangsak hi.

____________________________________________________________________________________________________________________________________

 

        Moses in piansak ni sagih ni – Sabbath tawlnga ding thupiak leh hih thupiakna ahang thute a hilh phapha hi. Tua bangin a hilhna-ah thupi diakin a hilh thu in suang tungah kigelh thukham mah a hilhkik hi. Sabbath tawlngakna in piansakna thu phawk nading bek hi lo-in Egypt panin suahtakna thu zong a pulaak hi. Pasian hehpihna in Egypt panin amaute honkhia-in nasepna panin tawlngakna a pia hi (Heb. 4:1–5). Tu-in Pasian piak hehpihna a thuhkikna-un amaute in midangte tungah hehpihna lakkik ding uh hi.

        Tua hi-in ni sagih Sabbath in piansakna thupi takin limcing bek hi lo-in hotkhiatna leh hehpih zong limcing hi. Innkuan sungah naupangte bek hi lo, nasemte, ganhingte leh khualmite in Sabbath ni tawlnga ding uh hi.   Sabbath in Jewte tungah thupha  a piak bangin, thuciam pua-a om namdangte tungah zong hehpihna a pia hi. Tua hehpihna in Pasian thukham sungtawngah kimu thei hi. Pasian in hehpihna tawh amaute adingin a sepsak bangin amaute in midangte tungah hehpihna nei ding uh hi.

        Matt. 18:21–35 sim in. Bangci bangin hih thugentehna sungah Sabbath thu guipi kimu thei hiam?  A diakdiakin Thuhilhkikna gen thute kimu thei hiam?

 

 

THURSDAY                                                           November 11

Diktansakna Na ngah Nading Uh Hi lo

 

 

        Khristian biakna-ah a thu bulpi khat in Lai Siangtho hong hilh bangin, upna bek tawh diktansakna kingah hi, cih thu hi. “Lai Siangtho in bang gen hiam? Abraham in Pasian a um hi. A upna pen ama diktansak ngahna-in a kiciaptehsak hi” (Rom. 4:3).

        Ellen G. White in hih bangin pulaak hi: “Upna tawh diktansakna kingah hi, cih in bang hiam? Tua in Pasian in mihing minphatna khempeuh leivui-ah ngasukin, mihing in ama sep theih loh Pasian in a hong sem hi. Mihing in amah mah bangmah ahihlohna a kimuh ciangin amaute in Khrih dikna puan bang silh dingin a kiging uh hi.” Ellen G. White, The Faith I Live By, p. 109.

        Pasian in kua hi-a, Amah in bangzahin siangtho hiam, cih na ngaihsut ciangin mihing in kua hi-a, bangzahin niin i hiam cih na kithei ding a, a lamdang itna bek mah in eite hong honkhia thei ahihlam na thei semsem ding hi. Hi mah hi; a lamdang hehpihna hangin hotkhiatna ngah ihi hi; singlamteh tungah Khrih mawhnei lo hi mah taleh mawhnei mi adingin a hong  sihna in Ama hong hehpihna hi.

        Hih thu siksanin Thkna.9:1–6 sim in.  Pasian hehpihna ngah dingin a kilawm lo mite adingin lamdang takin hehpihna i ngahna thu Moses in bang gen hiam? Koi bangin hih thu in upna tawh diktansakna kingah hi, cih thu pulaak hiam?

__________________________________________________________________

__________________________________________________________________

 

        Paul hilh lungdamna thu a tomin pulaak ding hi lehang Thkna. 9:5 sungah kimu thei hi. “Pasian in note a hong hotkhiatna in note dikna leh note lungsim manna hang hi lo hi” Ahi zongin Aman in note a hong hotkhiatna ahang in ama kamciam tawntung lungdamna thu hang hi (Mang. 14:6). Hih kamciam in “eite sepna bangin hong kipia hi lo-in, Ama ngimna leh hehpihna siksanin leitung pianma-in Khrih Jesuh sungah a hong piak kamciam  hi (2 Tim. 1:9, Titus 1:2).  Hih kamciam in leitung pianma-in hong kipia khin ahih leh, i gamtat hoihnate tungtawnin diktansakna kingah thei lo hi, cih kilang hi. Bang hang hiam cihleh leitung pianma-in mihingte a piang kuamah i om kei hi. A tomin gen lehang na khialhnate, na kicinlohnate, na ngawngkhauhnate lakah Topa in nang ading leh nangma sungah a lamdangin na hong sem ding hi. Tua hi-in Amah in hong honkhia khin ahih manin Topa thupiakte zui-in Ama thukham i nuntakpih dingin hong sawl hi.  Tua kamciam a hong kipia khin zo hi; hong kitankhia zo hi; na gamtat hoihnate in bangzahin hoih hi taleh, tuate hotkhiatna a hong tunpih thei kei hi. A taktakin gamtat hoihnate in hotkhiatna gah hi zaw hi.

        Topa in hehpihna tawh a hong honkhia khin hi; tu-in Ama thukham in na lungtang tungah kigelh a, Ama Kha Siangtho in tha hong guan a, Ama thukham na nuntakpih thei hi.

 

       

FRIDAY                                                 November 12

 

Ngaihsutbehna: “Khrih galpa in vantung panin Pasian thukham a langpan hi. Pasian thukham bek mah in mawhna hong mutelsak hi, diktatna tehna hi. Langpangpa in siamna, theihna leh ama vangliatna tawh Pasian thukham susiak nading lampi khat khit khat a banbanin zong hi; amah in zuau tawh a kidim hi.” Ellen G. White, Review and Herald, November 18, 1890.

        Vankuumpi sungah aksi lompi (vuuklam) bekbek 200,000,000,000,000,000,000 (mak mak leh mak then nih om hi.) Vuuklam khat bek sungah aksik 100,000,000,000 (Awn za khat) om hi, kici hi. Tua hi-in vankuumpi sungah aksi 200,000,000,000,000,000,000,000 (mak leh mak leh mak leh mak then nih) om cihna hi.

        Nate sangin nate a bawlpa lian zaw hi; na bawl mi khat in a bawl na tungah ukna nei hi; bang hang hiam cihleh a bawl nate sangin amah lian zaw hi. Picasso limte sangin Picasso lian zaw hi. Vankuumpi a piangsak Pasian in vankuumpi sangin a lian zaw tham hi. Hih thu siksanin hih thu ngaihsun in: “A kipat cil-in Thu na om a, tua Thu, Pasian tawh na omkhawm a, tua Thu, Pasian ahi hi.  Tua hi a, a kipat cil a kipanin Thu le Pasian na omkhawm hi. Pasian in Thu tawh na khempeuh piangsak a, a kipiangsak na khempeuh, Thu tawh loin a kipiangsak khat beek om lo hi” (John 1:1–3).  Na khempeuh a bawl, a piangsak Pasian, aksi 200,000,000,000,000,000,000,000 leh na khempeuh a piangsak Pasian in bang dinmun tawh a hong nungta hiam? Amah in naungekin hong suak hi, mawhna nei lo-in hong nungta hi; tua ciangin singlamteh tungah thahna a hong thuak hi. I mawhnate amah in pua-in tawntung nunna a hong kamciam hi.

                I ngaihsun ding hih thu lianpi in: Singlamteh tungah Khrih hong sihin Jesuh sungah hehpihna a hong kipia hi. Pasian in eite tung pan bang hong ngenkik hiam? Hih thute khempeuh banah gen ding thu khat bek om hi. Mihing hong kipiansakna a thu bulpi pen in:

Pasian zahtakna le a thupiakte manna ahi hi.” (Thuhilhsia 12:13).

 

 

Kikup Ding Dotnate:

 

1.      Monday ni-a a tawpna pen a dotna enkik in. Bangci bangin Pasian thukham sawmte a nuntakpihte in thukham tawh diktansakna ngah ding hanciamna tawh kipelh thei ding uh hiam? Koi bangin lunghiang lo takin thumanna in thukham tawh diktansakna ngah ding hanciamna tawh kibang lo ahihna kimu thei hiam? Koi bangin hih thu nihte kibat lohna i theithei ding hiam?

 

2.    Thukham Sawmte palsatna hangin gimna lianpi thuak na theihkhak a om hiam? Koi bangin hih thu in thukham in Pasian hong itna kilangsak ahihna na mu thei hiam?

 

 

3. Bang hangin singlamteh in eima hanciamna tawh vantung tun ding hanciamna in a mawkna hi, ci-in hong lak hiam?