LESSON 2 | October 2–8

 

LESSON 2         October 2–8

MOSES TANGTHU HONG HILH THUTE

 

 

Sabbath Nitak

 

Tu Kaal Sung Sim Ding: Thkna. 1–3, Pai. 32:29–32, Gam. 14, Eph. 3:10, Pian. 15:1–16, John 14:9.

 

 KAMNGAH: “A vekpi-un kha-thu tawh kisai an ne uh a, a vekpi mahun kha thu tawh kisai tui na dawn uh hi. Bang hang hiam cih leh amaute a tonpih, kha thu tawh kisai suangpi panin tui na dawn uh a, tua Suangpi pen Khrih ahi hi” (1 Corinthians 10:3, 4, NKJV).

 

        Thuhilhkikna Bu kipatna-ah hih kammalte in Moses kammalte hi (Thkna. 1:1) ci-in kigelh hi. Moses thupatna, Moab gamah a sihna thu a kipan Thuhilhkikna sungah ama thu tampi kigelh hi mah taleh  (Thkna. 34:5), Thuhilhkikna buppi in Topa Jesuh thu vevi a kigelhna laibu hi. Bang hang hiam cihleh Amah in eite a hong Piangsakpa hi (Pian. 1, 2; John 1:1–3), hong kem hi (Kol. 1:15–17, Heb. 1:3), leh hong tankhia hi (Isa. 41:14, Titus 2:14). A huampi-in gen hi leng Thuhilhkikna bu hong hilh thu in hotkhiatna thu-ah Topa in tatsat lo-in piangsakin, kemcingin, honkhia hi.

        A thu bulpi-in Israel mite in Canaan a lut uh ciangiin Moses in a piangsa thute limtakin hilh a, a beisa hun a Topa in amaute adingin a nasepnate a mangngilh loh nadingun hilh phapha hi. Hih pen Lai Siangtho buppi sungah kipulaak kikkik hi. 

        Israelte tungah Topa thuhilhna in tuhun eite adingin zong manpha hi. Eite in zong Kamciam Gam a lut ding ihi. “A beisa hunte ngaihsunkik hi lehang hih ciang dinmun i tun nadingin kal khat khit kal a suan toto ihihna,… lamdangsakna tawh ka kidim hi….. a hong makaihpa Khrih sungah muanna i nei hi. A beisa hunin Topa hong makaihnate leh Ama hong hilh thute a mangngilh ihih kei nakleh mailam hun sungah bangmah lau ding a om kei hi. us, and His teaching in our past history.”—Ellen G. White, Life Sketches, p. 196.

 

 

 

SUNDAY                                                      October 3

Moses Nasepna

 

        Lai Siangtho buppi sungah Moses nasepna kiciantakin kiciamteh hi. Pai. 2:2 mateng ama thu kigelhna om lo hi. Moses in Piancil bu gelh a, Pasian piansak mi ihihna, mihingin i pianna, bangbangin siatna tam taleh lametna tawh nungta thei ihihna thute hong hilh hi. Piansakna, Mawhna hong lutna, hotkhiatna kamciam, Tuicin, Abraham leh lungdamna thu cihte hong kipatna a zung in Piancilna sung pan hi. Hih thute a gelhpa in kamsangpa Moses hi. Moses in kicinlohna nei hi mah taleh ama huzaap in Pasian adingin nalian piangsak hi; bang hang hiam cihleh amah in Topa it a, Ama na bek a sem nuam hi.

        Pai. 32:29–32 sim in. Mawhna lian mahmah ahi kham tawh bawng lim a kibawl khit ciangin Topa leh Moses kiho-na hi. Moses zia le tong bang hong hilh hiam? kicinlohna tuamtuam nei hi phial taleh banghangin Topa in a lamdang takin Moses zang veve thei hi ding hiam?

_________________________________________________________

_________________________________________________________

 

        Kham bawng lim bawlna-ah Moses mawhna kihel lo hi mah taleh, Moses in ama nuntakna pia khia ngamzahin a mite mawhna mai nadingin mawhthuumsakna nei hi. Pai. 32: 32 sungah Moses in Pasian tungah lamdangtakin a nget thu in “Amaute mawhna na maisak in,” ci-in ngen hi. Hih munah mawhmaisak cih kammal kizang a khiatna in “van pua” cihna hi.  Tua hi-in Moses in mawhna suksiatnate leh mawhmai nading lampi a theitel hi. A tawpna-ah tua bekmah lametna lampi hi; i mawhna khempeuh Amah in a hong puak ciangin mawhmai-na ngah thei ihi hi.”

        Tua hi-in hih munah Pasian mahmah in Jesu sungah mawhna thaman mite thuak ding tangin hong thuak ahihna Lai Siangtho kipatna mah in hong hilh hi. Pasian in mihingte a hong hotkhiat nading lampi geelkholhsa-in, a lang khatah Ama kumpi ki-ukna thu guipite leh itna a lenkip veve hi.

        Hi mah hi, kum za tom tampi khit ciangin Peter in Jesuh thu a gelhna-ah: “Eite, mawhna lamah misi bangin, thuman lamah nungta-in i gamtat theih nadingin Khrih mahmah in eite’ mawhna ama pumpi mahmah tawh singlamteh tungah a pua hi” (1 Pet. 2:24).

        Tua kalin, Moses tangthu sung leh a mipihte mawhna hangin mawhthuumsakna in a mite dingin palaai khat ahihna pulaak hi; tua banah Moses in Jesuh in mawhnei mite adingin a hong ding na khempeuh hong hilhkholppa hi (Heb. 7:25).

        A mipihte adingin ama nuntakna a sumngam, cih thu in bang hong hilh hiam? Ei le ei ki-it bangin midangte zong it ding cih i cih in bangcihna taktak hi ding hiam?

 

 

MONDAY                                              October 4

A Tangtungkhin Genkholhna

 

 

        Leitung pilna in leitung in ama thu-in thakhatin hong pia hi, nuntakna in bang lo khat panin a hong khangkhia-tawm hi, ci-in pulaak uh hi taleh, leitung pilna in Pasian vangliatna lianpipi hong musak thei hi. Piansak nate omzia, khat leh khat kihual takin a omna, siatna tawh kidim hi taleh piansak nate i kantel zawh loh ding a lamdang tampi hong lak uh hi.    Pasian in piansak nate omzia ding limtak geelkholhsak ahih manin Amah tawh kizopna-ah zong limtak kizopna deih hi. Thuhilhkikna kipatna-ah hih thu kimu thei hi.

        Thuhilhkikna 1:1–6. Aneu 3-ah a kum sawm li-na cih thu in bang genkholhna thupi-na nei hiam?

 

_________________________________________________________

_________________________________________________________

 

        Lawpsapna a tuah khit uhteh Moses in gam en sim dingin Kadesh Barnea panin thu kansim ding mi pawlkhat sawl hi. Mipi in tua gam valuah ding nial uh hi – bang thu piang hiam? Mipi in amau lamet Kamciam Gam sung lut nai lo uh hi. Bang tanvei ngak lai ding hiam cihleh “Na gam vaan sung uh ni phazah tawh kizui-in, ni sawmli, ni khat ciangin kum khat, note in na mawhna uh kum sawmli sung na thuak ding uh a, keima lungkim lohna na thei ding uh hi,’ ci hi (Gam.14:34).

        Tua hi-in Thuhilhkikna sungah a kum sawmli-na ci-in Pasian gen bangin tangtung hi.  Cihnopna-ah Pasian in a muanhuai Pasian ahih mah bangin Ama genkholhna Kammal in zong a muanhuai hi; Thuhilhkikna sung a kigelh thute in a muanhuai thu hi, cih hong hilh hi. Pasian in a gen bangin sem takpi a, a sep ding khat peuh genkhol hi.

        Hi mah hi, Pasian gen kholh hih bek a tangtung hi lo hi. A beisa thupiangte ngaihsun lehang Dan. 9: 24-27 genkholh bangin Jesuh hong suah hun ding Topa genkholh hun – hun khat, hun nih leh hun lang a cin ciangin Jesuh a hong suak hi (Dan. 7:25; Mang. 12:6, 14; 13:5); ni 2300 genkholhna zong tangtungkhin hi (Daniel 8:14).

        Kipelhna khat zong om lo-in genkholhna bangin a hun a ni bang lian mahin tangtung Daniel 2, 7, 8 cih thu in Pasian in mailam hun khempeuh a muhkholhna, a theihkholhnate in muanhuai-in, hun khempeuh ama ukna nuai-ah om hi, cih kilang hi.

        Topa in a genkholhh bangin tangtungsak takpi hi. Hih thu hangin mailam hunah a hong tung ding thute a genkhol Pa sungah lungmuang takin om ding hong hilh hi lo hiam?

 

 

TUESDAY                                                              October 5

Tul Tampi Vei Sangin A Tam Zaw

 

 

        Sehnel gam sungah kum tampi sung a khualzinna khit ciangin Topa ading thugen Moses in (amah pen kamsang hi napi, kamsang sangin lian zaw hi) “En un, note’ mai-ah leitang ka koihzo hi. Pai unla, Topa in na pate uh Abraham, Isaac, Jakob, le amau’ nunga a suanlekhakte uh tungah piak dingin a ciam leitang luah un,’ hong ci hi” (Thkna. 1:8). Hih khit ciangin thupiangte ngaihsun in.

 

        Thuhilhkikna 1:9–11 sim in.  Kadesh Barnea ah Topa a langpanna uh hangin gimthuak khit a thupiang, hih kammalte in bang thupina nei hiam?

_________________________________________________________

_________________________________________________________

       

        Hih munah Israelte tungah Pasian hehpihnate kimu thei hi. Amaute in sehnel gam sungah amau mawhna hangin gimthuak uh hi taleh, amaute in thupha ngah mite ahi uh hi: amaute in bangmah kisapna nei lo uh hi. En un, note’ mai-ah leitang ka koihzo hi. Pai unla, Topa in na pate uh Abraham, Isaac, Jakob, le amau’ nunga a suanlekhakte uh tungah piak dingin a ciam leitang luah un,’ hong ci hi (Neh. 9:21).

        Tua leh Moses in a mipihte a itna lakkik hi. A beisa hunah thupha a piaksa mah bangin, tu-in zong Pasian in amaute phungsak dingin Moses in a ngen hi.

Thuhilhkikna 1:12–17 sim in. Pasian in amaute thupha a piakna tungtawnin bang thupiang hiam, Moses in bangci bang lampi tawh kalsuan hiam?

__________________________________________________________________

__________________________________________________________________

 

        Topa in amaute makaih hi mah taleh, amaute kalsuanna khempeuhah limtak kipawl khopna kisam hi; a kipia nasep tungah a cihtak ding uh kisam hi. Israel in qahal – limtakin a kipawl, gamlak a pawlpi hi (Thkna. 31:30); hih in Thukhun Thak sung a pawlpi kilamzia ding hong hilhkhol hi. Greek kammin  ‘ekklesia’ a khiatna in pawlpi cihna hi ( Matt. 16:18).  Kikhelna lianpi om khin hi mah taleh Paul in Jew ngei-na tawh kigamla lo hi. Thuhilhkikna sung a ‘qahal’ bang mahin pawlpi in zong a masuanah limtakin a mainawt nadingin Kha Siangtho piak siamnate zui-in makai dingin kiseh hi (1Kor. 12).  Tuhun pawlpi in zong thu-um mi ngah siamnate tawh kizui-in pumpi (pawlpi) adingin mapangkhawm uh hi.

        Mi kimkhat in biakna kipawlna a deih loh uh hangin kipawlna nei lo biakna sangin limtakin kipawlna mah deihhuai zaw veve hi. Pasian kammal – Thukhun Thak sungah thu-um mite kipawlkhopna simloh a dang om  lo hi.

                 

       

         

WEDNESDAY                                                       October 6

Kadesh Barnea

 

 

        Thuhilhkikna  kipatna-ah Kadesh Barnea a langpanna hangin gimthuakna thute kigelh hi. Hih thupiangte tawh kizomin a piang thute limtakin kantelhuai ahihna hong musak hi.

        Gam. 14. Koi bangin mipi in thu-kansimte thupuak dawngkik uh hiam? Tua bangin mipi upna lohna in bang thu tuak uh hiam? (Thkna. 1:20–46.)

 

_________________________________________________________

_________________________________________________________

 

        Hih thupiangte sung panin nuntakpih ding thu manpha tampi om hi. A thupi thuhilhna Gam. 14 sungah zong kimu kikkik hi.

        Gam. 14:11–20 sim in. Moses in palaai khat hi mah taleh Topa in a mipihte susia lo-in a om nadingin a thuumsakna-ah a siksan thu in bang thupina nei hiam?

_________________________________________________________

_________________________________________________________

 

        Moses in Pasian tungah a pulaak thute ngaihsun in. “Kong thupiak bangin nungta hi lecin Egypt mite leh namdangte  hong muhdan ding ngaihsun in. Hih in thupi hi. Bang hang hiam cihleh Pasian in Israel mite tungah a bawl thute in amau ading bekin a bawl hi lo hi; leitungmi khempeuh adingin a bawl ahi hi. Israel minamte in leitung khuavak hi ding uh hi; a man Pasian hong itna, Ama vangliatna leh Ama sung bekah hotkhiatna om ahihna teci hi ding uh hi. Tua hi-in pasian leh milim tuamtuamte in kimanna nei lo hi, ci-in gen ding uh hi.    Ahi zongin Moses in Topa tungah  a gen thu in: “ Nangmah in leitung maitang panin  amaute hemkhia leh, bang piang ding hiam? Minamte in “Topa in a kamciam om bangin amaute Kamciam gam tunpih zo lo-in sehnel gam sungah amaute that khin hi, ci-in pulaak ding uh hi, ci hi. (Gam.14:16).

        Lamkhat  panin gen lehang Lai Siangtho buppi in thu bulpi-in a pulaak thu kimu thei hi: A mite lakah Pasian a kitawisang ding hi – Ama vangliatna, Ama hoihna, itna leh a minthannate in A pawlpi sungah kilang ding -  A mite tungtawnin Ama nasepna a hong kilang ding ahi hi. Ahi zongin A mite in tua bangin Pasian in amaute sungah na a sep theih loh hun zong om hi. Ahi zongin a tawpna-ah leitungah Ama nasepnate hangin Pasian in pahtawi-na a ngah ding hi.

        Ephesians 3:10 sim in. Paul in bang thu gen hiam? Koi bangin tua thu piang hiam? Koi bangin Pasian pilna in vankhuanuai khempeuhah hong kilang hiam? Mimal khat ciat in bangci bangin Pasian vanglian pilna a kilangsak thei hiam? 

 

THURSDAY                                                           October 7

Amorite Mite Siatnate

       

        Thuhilhkikna 2 leh 3 sungah Moses in Israel mite tangthu pulaakna nei a, bangci bangin Pasian in amaute thupha  a piakna, a galte uh tungah zawhna a ngah theihnat, amaute in Pasian tungah a cihtak uh ciangin  Pasian in  mi thahat mi gol pipite tungah zawhna a piakna thute a pulaak hi (Thkna. 2:11, 20; 3:13).

        Hi mah hi, Israelte in a galte zo gawpin that khin cih thu in a telhamsa thu khat hi. Israelte in a galte uh tungah kilem nading thu gen masa uh hi (Thkna. 20:10, 11), ahi zongin amaute in kilemna thu a nial uh ciangin, khat veivei ciangin Israelte in naupang leh numei a kipan a vekpi-un amaute susia uh hi.  “Topa i Pasian in amah hong pia a, amah le a tapate le a mi khempeuh i zo hi. 34Tua hunin a khuapi khempeuh i la a, a khuapi khempeuh, papi, nupi, le naupangte i susia maimang a, bangmah i siit kei hi.” (Thkna. 2:33, 34).

        Mi kimkhat in hih bang thupiangte a man hi lo hi, ci uh hi.  Ahi zongin eite in ahihleh “Pasian’ na a sem mite mi cingtaak hi-in, na hoih namkim a septheih nadingun Lai Siangtho pen Pasian’ lamlahna tawh a hong kipia hi a, thuman thutak hilh nading, a khialte taii nading, a man lote a manin puah nading, a manin nuntak theih nading thuhilh nadingin a manpha mahmah ahi hi” (2 Tim. 3:16,  Seventh-day Adventist pawlpi in hih thuman i hemkhia kei hi. Tua hi-in hih thupiangte tawh kizui-in thu hamsa i phu-kha hi.

        Pian. 15:1–16 sim in. Abram in bang sem dingin Pasian in sawl hiam? Pian.15:16, koi bangin tel hamsa thute i tel nadingin lampi hong honsak hiam?

_________________________________________________________

_________________________________________________________

 

        Namdangte in gitlohna leh ngongtatna tawh kidim uh hi; Pasian in amau gamtatnate hangin Ama hehna leh gimpiakna a thuak ding uh hi. Pasian in amaute kisik ding ngakngak hi taleh, amaute in kisik lo uh hi; bangmah kikhelna nei lo uh hi – naupang leh numei a kipan thahna a thuak khit nangawnun bangmah kikhelna nei lo uh hi. (Israel mite thahna thuak naupangte sangin Tuicin tawh a si naupang tam zaw kha ding hi)

        Bang thu hangin Israelte in namdang tampi thah uh hiam, cih a thupiang kicingin i thei kei hi. Ahi zongin a thupi i phawk ding thu in Pasian hoihna muan ding kisam hi, cih kilang hi; Ama hoihna in lampi tuamtuam tawh hong kilang hi. Upna i cih pen nopsak hun sunga Pasian itna bek hi lo hi. I telzawh loh thu tampi om taleh Amah muanna in upna mah hi.

 

        1 Korinthians 10:1–4 leh John 14:9 sim in.  I tel zawh loh Pasian nasepzia i muh ciangin, koi bangin Pasian hoihna, a thutanna leh a hoihnate  tungah muanna nei thei dingin hong huh hiam?

 

 

 

 

FRIDAY                                                         October 8

Ngaihsutbehna: Namdangte tungah Israel mite bawlzia i tel zawh loh thu hamsate thuthuk kan mipilte in hih bangin pulaak hi:

        “Na khempeuh Piangsakpa leh na khempeuh tungah ukna nei Pa ahih mah bangin, Pasian in mi khat peuh tungah a sep nop bangbang a sem thei Pasian hi-a, tua bangin a sep pen thuman kei kici thei lo hi.

        “Pasian nasepziate  i tel zawh lohin thuthuk hi. Mihing in Amah theitel khin lo ihih manin i tel zawh loh thute buaipih lo ding kisam hi. Isaiah 55:8–9 in hong huh thei ding hi.

        “Lai Siangtho hong hilh mah bangin Canaan mite in gitlohna tawh kidim uh hi. Amaute sihmangna in amau mawhna tungah Pasian thukhenna a tung hi. Canaan mite sihna in Pasian in a sep masakna leh a sep nunung pen hi  lo ding hi. Canaan mite thuakna leh leitung minamte thuakna a kibatlohna (Noahte innkuan simloh) Piancilna 6–9 sungah kimu thei hi.

        “Israelte in namdangte thatmang khin dingin Pasian in geel ngei lo hi;tua bang dingin a gamta dingin  amaute tungah Pasian thukhun pia lo hi. Tua bangin kithahna a thuak ding mite Thkna. 7:1 in ciangtan nei hi. Israel mite in Aramaean mite ahih keileh Edom mite ahih keileh Egyptian mite ahih keileh mi khat tungah Canaan mite tungah  bawl bangin bawl lo uh hi (Thkna. 20:10–18).

        “Canaan mite thuak bangin mawhnei mi khempeuh in a thuak ding hi: tua in Pasian thukhenna hi.

        “Pasian in Canaan mite a hepkhiatna pen hotkhiatna thu-in a kisam nasepna khat hi. “Canaan mi khempeuh in Pasian thukhenna a thuak uh hi mah taleh, kum 40 sung hilhkholhna a ngah uh hi ( Rahab mawhthuumna Josh. 2:8–11).”Daniel I. Block, The NIV Application Commentary: Deuteronomy (Grand Rapids, Mich.: Zondervan, 2012), pp. 98, 99.

 

 

Kikup Ding Dotnate:

 

1. Kum tul khat thu i teldan ngaihsun in. Kum tul khat sungin i telloh i theih loh thu khem peuh a hong kihilh ding hi. Hih thu na theihna in koi bangin tu-in i tel zawh loh thute tawh nungta hi mah taleng Pasian sungah muanna nei thei veve ding i hiam?

 

2. A beisa hunin Pasian in bangci bang lampi tawh hong makaihin mailam hunah Amah na muang ding hiam?  Bang hangin Pasian in i nuntakna sungah Ama nasepziate mangngilh loh ding thupi hiam?

 

3. Sunday ni-a dotna tawh kisai – Moses in a mipihte adingin ama nuntakna mahmah suplawhngamna thu na lawmte tawh kikum in.  Tua bang lungsim puak neihhuai mah hiam? Midangte hotkhiat nadingin eima nuntakna suplawhhuai mah hi ding hiam?