LESSON 9 August 21–27

 

Ahun Manmanin Tawlnga

 

Sabbath Nitak

 

Tu Kaal Sung Sim Ding: Pian. 1, Pai. 20:8–11, Pai. 16:14–31, Thkna. 5:12–15, Late 92, Isa. 58:13.

 

KAMNGAH: “Tua ahih ciangin Pasian in ni sagih ni thupha pia-in siangthosak hi. Bang hang hiam cih leh piansak nasepna ama nasep khempeuh panin tua ni-in Pasian a tawlnga hi.” Piancil 2:3)

Piansakna thu kua in tel zo ding hiam? Khuamial sung pan khuavak, tuipi sung ganhingte, huih laka leng vasate hong piankhiatdan uh lamdang hi. A lamdang takin Adam leh Eve kipiangsaknate, koi bangin Pasian in nate bawl hi ding hiam cih pen mihing lungsim in a ngaihsun zo kei hi.

Ahi zongin piansak a tawpna-ah Pasian in thu dang khat pulaak hi. Amasa- in tua in tuipi sung ngasa golpite leh vasa mel hoih tuamtuamte hoihna bang hi lo-in, Pasian in a tuam vilvel ni khat – ni sagih ni a piangsak hi. Tua ciangin hih ni pen a tuam phadiak ni-in a koih hi. Mihing in lungkhamna tawh a nuntakma-in zong Pasian in hih ni sagih ni phawktheihna lungsim a guan hi. Hih ni in khawl hun leh nunna nopsak nading ni – Ama mi bangin om ding ni hi-in, eima na sep ni ding hi lo hi; Pasian hong piakkhong singkung lopate, huih, tui, lawm le gual, a tawpna-ah na hoih khempeuh a Piangsakpa hangin lungdam ni hi ding hi.

Eden panin Adam leh Eve a paikhiat khitin zong Sabbath ni nuamsa dingin sapna ngah uh hi. A kipatcil a kipanin Pasian in Sabbath ni tawlnga-a nuamsa dingin a mite hong sam hi.Tua dingin mihing in sittelna a ngah den hi.

Ni sagih ni hong tun sialsialin Pasian in a lamdang tawlngakna ngah dingin eite a hong sapna thu tu kaal sung i kikum ding hi.

 

 

SUNDAY                August 22     

Tawlnga Dingin Thupatna

 

A kipatcilin Pasian aom hi. Topa Pasian in a gen bangbangin piang pahpah hi. Khuamial panin khuavak kikhen hi. Khuavak in suun leh zan khen hi; ni nih ni-in Ama thupiakna tawh vankuumpi, vankhuanuai leh tuipite a piangsak hi; nithum ni-in leitang leh singkung lopate a piang hi. Pasian in hun leh munte a piangsak hi. Tua ciangin ni thum sung ganhing, vasate leh mihingte a bawl hi. Suun in ni in uk a, zan ciang in ni, kha leh aksi in a uk hi. Nidanglai a kipan piansak tangthu tuamtuam om hi. Lai Siangtho hong hilh bangin ni, kha leh aksite in Pasian hi lo-in amaute biak ding hi lo hi, cih hong hilh hi. Amaute in ni li ni-in hong kilangkhia uh hi; Amaute in Piangsakpa sawl bangin a om uh hi. Moses pulaak ni 5 leh ni 6 ni a piangsak thu (Pian.1:20–31) in nunna leh hoihna tawh kidim hi. Vasa, ngasate leh leitung ganhingte in Pasian koihna munmunah om uh hi.

Pasian in Piansaknate tungah hoih hi, ci-in a pulaak thu in bang hong lak hiam? Pian. 1:1–31.

Pasian in leitung a bawl ciangin a bawl mawkmawk hi lo hi; leitung in kicinna tawh kidimin bawl hi. Mun khempeuh in piansak nate tawh kizem hi. Pasian in a bawlsa nate hoih hi, ci hi.

Mihing kipiansakna leh a dangte kipiansakna-ah bang kilamdang hiam? Pian. 1:26, 27 leh Pian.2:7, 21–24.

 

Pasian in lei-ah kunsukin tungman bawl kipan hi. Mihing kipianna-ah Pasian in Ama lim le meel tawh kisuunin a bawl hi-in, Amah tawh nungta- khawm ding leh kizopna nei dingin a hong bawl ahi hi. Pasian in awnsukin Adam nak sungah nunna hu a guan hi. Tua ciangin nunna nei mihing hong suak hi. Eve in ahihleh a tuam vilvelin kipiangsak ahi hi; Piansak nipi kaal sung mahin Adam nakguk panin Eve kipiangsak hi. Kiteenna in mihingte adingin Pasian hong piak ahi hi; “mipa” - ish leh “ minu - ishshah a siangtho pumkhat hi ding uh hi.

Pasian in ni guk ni-in a bawlsa na khempeuh tungah na dangte tungah a pulaak bang lo-in nupa kiteenna a bawlkhit ciangin hoih mahmah hi ci-in a pulaak hi (Pian. 1:31).

Pasian Kammal hong hilh loh leitung mite hilh piansak thute leh Lai Siangtho hong hilh piansak thute kilamdanna thu ngaihsun in. Piansakna thu i theih nadingin Pasian Kammal tungah kingak ding bangzahin thupi hiam?

 

MONDAY                                                  August 23

Tawlnga Ding Thupiak

 

Piansakna in hoih mahmah hi. Ahi zongin tua in kicing lo hi. Piansakna in Pasian tawlngakna leh ni sagih ni Sababth ni-a thupha tawh khawl hi. “Tua ahih ciangin Pasian in ni sagih ni thupha pia-in siangthosak hi. Bang hang hiam cih leh piansak nasepna ama nasep khempeuh panin tua ni-in Pasian a tawlnga hi” (Pian. 2:3).

Sabbath in Pasian piansakte lakah khat hi. A taktakin Piansakna khempeuh kigawpkhopna hi. Pasian in tawlngakna piangsak hi; tua hunlai-in Adam leh Eve bek hi mah taleh, mihingte in ni khat khit ni khat nasepnate hun khat ngahin tawlngak hun dingin Pasian in Sabbath piangsakin amaute Piangsakpa tawh a tawlnga khawm ding uh hi.

Ahi zongin leitungah mawhna hong lut ciangin na khempeuh in kikhel hi. Pasian tawh maitang kizopna om thei nawn lo hi. Leitungah nausuah gimna, nasep hamsatna, khat le khat kizopna kisia-in gimna kipan siatna hong dim hi. Tua bangin gimnate lakah Pasian Sabbath in eite a hong kipiansakna, lametna leh eite hong kibawlpha-kik ding kamciam hong phawksak hi. Mawhna omma Sabbath tawlngakna kisam ahihleh mawhna om khit ciangin Sabbath tawlngak kisam zaw semsem lo ding hiam? Kum tampi khit ciangin Pasian in Egypt gamah saltang Ama tate a hotkhiatna thu mah Sabbat in zong amaute a phawksak hi.

Pai. 20:8–11. Sabbath in Piansakna tawh a kizopna-ah Sabbath thupi- na bang hong hilh hiam?

Pasian in i piankhiatna a phawk dingin Sabbath thupiak tawh hong hilh hi. Mi tampite upna tawh kibang lo-in eite in Pasian geelna om lo-in a piang mawkmawk ihi kei a, Ama lim leh meel sunin a hong bawl ihi hi. Israelte in bangbangin nengniamna leh saltangin om uh hi taleh, eite in Pasian tawh kizopna nei thei dingin a hong kipiangsak hi. Tua hi-in Sabbath hong tunsialin eite in Pasian in Ama lim le meel sunin hong bawl mihing ihihna a tuam vilvelin a hong phawksak hi.

“Sabbath in piansakna phawkkikna limcing ahih mah bangin, Khrih i itna leh Ama vangliatna i pulaakna hong suak hi.” Ellen G. White, The Desire of Ages, p. 281.

Ni sagih sungin na khempeuh kipiangsak hi, cih upna in bang zahin thupi hiam, cih ngaihsun in. I hun ni sagih panin ni khat sung Pasian tungah piak ding thupiak phawk ding cih thu sangin a thupi bang om ding hiam? Piancil Bu sunga kigelh mah bangin i pianna taktak hong hilh Sabbath in bangzahin thupi hiam?

 

 

TUESDAY                                      August 24

AThak Tuahkhak Thute Thute

 

Sehnel gam sungah kum 40 sung a zin khit uh ciangin khangthakte in Egypt gam nuntak khuasakzia a mangngilhlam zuanta hi. Khangthakte phutkhak thute in a pu a pate uh tuah khak thute tawh kibang nawn lo hi. Amaute in a pu a pate uh uplahnate leh tua bangin up lohna hangin a tuah khak thute mukhin uh hi. A pu a pate uh mah bangin amaute in zong sehnel gam sungah khualzin uh hi. Amaute giahphual laizangah biakbuk koih uh a, Pasian ompihna meilompi in tua biakbuk tungah om amu uh hi. Tua meilompi in kikhiniin a pai ciangin amaute in giahphual panin dingkhia-in mundang zuanin dingkhia-pah uh hi. Tua meilompi in suun ciangin nilim bangin amaute liah a, zan ciangin meikhuampi bangin khuavak a taan hi. Hihte khempeuh

Pasian in tatsat lo-in amaute tungah itna leh a kepna a phawksak hi. Bang thu in Sabbath tawlngakna thu pulaak hiam? Pai. 16:14–31.

Mi tampite upna tawh kibang lo-in Pai. 16: 14- 31 in Sinai-ah ni sagih thukham kipia nai kei taleh a kipia khin bangin a kigelh ahi hi. Hih munah bang thupiang om hiam?

Pasian in nisimin Israel mite tungah a tuam vilvel an pia hi; hih in Ama piansak khempeuh Piangsakpa in kem hi, cih hong phawksak hi. Pasian in amaute kisapna khempeuh a pia hi. Nisimin a lamdang takin an ngah uh hi. A khamval ante nitum ciangin kimu nawn lo hi. A zingciang a dingin koihkhol le-uh muatgawpin nek theih ding hi lo hi. Ahizongin Friday ni hong tunciangin ni nih khamkhop ding kaikhawm uh hi. A zingciang Sabbath ni-in manna kia lo ahih manin, muat cih lo hi. Sabbath ni-in a lamdang takin tua manna in limci mahmah hi.

Israelte in tu-in biakbuk nei-in biakbukah biakpiakna leh biakna thukhun tuamtuam nei uh hi (Siampi Laibu leh Gamlakvakna). A kum tamkhin Moses in Israelte mimalin muhpih a, a beisa thute amaute tungah pulaakin, Pasian thukhamte amaute tungah a sawn hi ( Thkna. 5:6–22).

Hih khangthakte in Kamciam Gam sung nuamtakin luah thei uh hi. Israelte sungah makai ding kikhel hun tungta hi; a teek khin Moses in khangthakte masuan a makaih ding makai khat a teelsak ding hun hong tungta hi. A pu a pate uh mawhna sungah a lutkik lo dingin limtak vakkhak hi; tua hi-in Moses in amaute tungah Pasian Thukham hilhkik hi. Thukham Sawmte kihilhkik a, amaute in Canaan gam sungh nuamtakin a teeng thei ding uh hi, cih a mangngilh kei ding uh hi.

I sih leh Jesuh nihvei hong paikik hun kikal in hun sawt het lo ding hi. Tua hi-in Ama hong pai ding hun in nai mahmah hi. I lametna sangin zong Amah hong nai zaw kha ding hi. Koi bangin Sabbath zuihna in Pasian in eite ading a sep khempeuh hong phawksak banah Amah hong pai ciangin ei ading a sep ding thute hong hilh hiam?

 

WEDNESDAY          August 25

  Tawlngak Ding A Dang Thu Siksan

 

Israelte in Jordan nisuahna lamah giahphualsat uh hi. Amaute in kumpi Bashan gamhuam khempeuh leh Amorites kumpi nihte zo khin uh hi. Hun dangte mah bangin tu-in zong hun thupi khat ngahkik uh hi; Moses in Israel khempeuh kaikhawm a, a pu a pate uh ading bek hi lo-in amaute adingin Sinai-ah Topa tawh a thuciam phawkkik dingin hilh hi. Tua thu a pulaak khit ciangin Thukham Sawmte leh a zui mite tunga thuphate genkik uh hi.

Pai. 20:8–11 leh Thkna.5:12–15 enkak in. Sabbath thupiak tawh kisai a kibang lo thu bang om hiam?

Pai. 20:8 sungah thukhamte in “phawk in” cih kammal tawh kipan uh hi. Thuhilhkikna 5:12 ah thukhamte in “zui un” cih tawh kipan hi. “Phawk” cih a kammal mahmah in thupiak hi pah hi (Thkna. 5:15). Hih munah Israelte in hun khatlai-in sila ahihna uh phawk ding uh hi. Tu-in amaute in ahihleh sila hihna panin suahtakna ngah khin uh hi; a lamdangtakin kihonkhia hi keileh amaute in sila hi ding uh hi. Sabbath thupiak in na khempeuh Piansakna thu phawk nading leh saltanna pan suahtakna a phawk nading uh ahi hi. Topa Pasian in Ama vangliatna tawh note ahong honkhia hi (Thkna. 5:15).

Hih thuman thutak in Israel mite tuahkhak thute mah pulaakkik hi. Kum sawmli khit ciangin tu-in amaute in Kamciam Gam a lut ding uh hi ta hi. A pu a pate un Egypt panin suahtakna ngah uh a, Kamciam Gam luah zo dingin cimawh uh hi. Amaute in vanglian Pasian leh Ama vangliatna kisam uh hi. Sabbath zuih ding ahang thupiak kibehlap hi. Bang hang hiam cihleh Pasian in suahtakna Pasian hi; Israelte in Sabbath a zui ding uh hi (Thkna. 5:15).

Piansakna thu in Sabbath thukham tawh kigamla lo hi. Piansakna phawk nading banah saltanna pan Israelte suahtakna phawk nading ahi hi (Thkna.5). Egypt saltanna pan suahtakna in Piancial sunga nate kipiansakcil mah bangin a thak piansakna khat mah hi. Israel in a suakta mi ahih manun Pasian piansak mi thak a suak uh hi ( Isa. 43:15). Paikhiatna mawhna sung pan suahtakna limcing hi; tua in hotkhiatna hi. Sabbath in Piansakna leh Hotkhiatna limcing hi. Tua hi-in Sabbath in Jesuh, hong Piansakpa leh hong Honpa hong hilh hi.

John 1:1–13 sim. Jesuh in hong Piangsakpa leh hong Honpa ahihna bang pulaak uh hiam?

 

 

THURSDAY                        August 26

  Sabbath Zuihna

 

Pasian in Ama mite in Sabbath ni zui dingin thupia hi. That kei in; gu kei in, cih thupiakte mah bangin Sabbath tawlngakna-ah zong bangci bangin tawlngak ding, Sabbath zuihzia ding kitel takin hong hilh lo hi.

Koi bangin Sabbath zui-in tawlnga ding i hiam? Sabbath ni lungsim puakzia ding in koi bang hi ding hiam? Late 92 leh Isaiah 58:13.

Sabbath tawlngakna in Piansakna leh Hotkhiatna hangin pawi-khaamna ahih manin Sabbath ni pen Topa sungah lungdam ni leh nopsak ni hi ding hi; dah ni hi lo ding hi. Ni sagih hong tun ciangin Sabbath a phawk ding hi panpan lo hi. Sabbath masa pen in piansak nate kizawhcil hun a kipan ahih mah bangin nipi kaal sung tawntung Sabbath i phawk ding banah geelkholhna kisam hi; tua hileh kaal sung nasepnate nusia-in Sabbath siangtho takin i zang thei ding hi. Friday ni hong tunsialin kigin ni ahih mah bangin Sabbath ni a tuam vilvelin zangin, nuam i sak ni ahih ding phawkin kiginkholh kisam hi (Mk. 15: 42)

               Siam. 19: 3 in Sabbath thupi-na bang hong hilh hiam?

Sabbath zuihna in innkuanpihte leh midang tawh kizopna hong huh hi. Pasian in innkuan leh mite tawh kizopna nei dingin hun hong pia hi. Sabbath ni-in nasemte leh ganhingte in zong tawlnga ding uh hi (Pai. 20:8–11). Sabbath leh innkuan in tonkhawm hi. Tawlngak hun leh innkuanin hun zatkhopna in thupi hi. Sabbath zuihna in thu-um mite in innkuan khat bangin Pasian biakhawm hi. Jesus in hih leitungah hong nuntaklai-in Sabbath hong tunsialin biakbukah pai-in biakpiakna pia hi (Siam. 23:3, Luke 4:16, leh Heb. 10:25.)

Nisimin manmanin nasepnate hangin hun kigak leh manlahnate hangin Sabbath tawlngakna, eite hong Bawlpa tawh kizopna mantak lunggulhna i nei hi. Sabbath phawk cih thu in nisim nasepnate khawl phot a, Pasian tawh hun zangkhawm a, Amah tawh i kizopna a phungvuh hi ding hang a, thupiak tawh kituakin Sabbath tawlngakna sungah a lut ihi ding hi.

Sabbath ni na zatzia in koi bang hiam? Sabbath na zuihna panin bang thupha na ngah hiam? Koi bangin Sabbath ni a siangtho-in na zang semsem thei ding hiam?

 

 

FRIDAY                      August 27

Ngaihsutbeh Ding: “Pasian in nate a piangsak Ama vangliatna phawk nading leh, Ama sepnate i muh nadingin Sababth hong pia hi. Sabbath in Piangsakpa vangliatna a en dingin hong sam hi. Nidangte sangin a siangtho tawlngak ni hong tunsialin kimlepaam piansak nate tungah Pasian in a gelh thute kantel ding kisam hi. Piansak nate limtakin kantel hi lehang Khrih ompihna kitel pha semsem ding hi; tua nate in Khrih hong itna leh Ama lungnopna a hong gen hi.” Ellen G. White, Christ’s Object Lessons, pp. 25, 26.

“Topa in Israel mite Egypt gam saltanna panin a hotkhiatna ahang thupi khat in amaute in Topa ni siangtho Sabbath ni a tawlngak theih nading uh ahi hi. . . tua thu hangin Moses leh Aaron in a siangtho Sabbath ni-in tawlngakna pankik uh ahih manin Pharaoh in amaute tawlngakna hangin mawhsakin, “note in amaute nasepna panin na tawlngaksak uh hi,” ci-in a lungkimlohna gen hi (Pai. 5:5). Hih in Moses leh Aaron in Egypt panin Sabbath tawlngakna kipan uh hi, cih hong lak hi.

“Sabbath tawlngakna in Egypt gam saltanna pan suahtakna hangin lungdamna phawk nading ni hi lo hi. Ahi zongin piansakna phawkkikna-in tawlngakna-ah Egypt gamah a saltan lai-un biakna suaktakna nei lo-in Sabbath tawlnga thei lo uh ahih manin saltanna pan a suahtak uh ciangin Sabbath tawlnga thei ahih manun lungdam uh hi. Tua hi-in saltanna pan a suahtak uh ciangin nengniam thuakte, mi zawng, tagahte, meigongte simmawh lo ding uh hi.” Appendix note in Ellen G. White, From Eternity Past, p. 549.

 

Kikup Ding Dotnate

 

1.       Adventist kimkhat a kipan Khristian kimkhat in Piansakna thu a gen uh ciangin theistic evolution – Pasian in mihing a kipan nate a golsa-in bawl lo-in amau thu-in damdamin hong piangkhia uh hi, ci-in gen uh hi. Koi bangin Sabbath in theistic evolution upna leh Seventh-day Adventist upna in tonkhawm thei lo ding hiam? Pasian Kammal in ni guk sungin Pasian in na khempeuh bawl khin hi, ci-in a hong hilh laitakin nate a pian nadingin kum mak za khat sawt hi, cih thu hi mawkleh ni sagih Sabbath in bang khiatna nei nawn ding hiam?

 

2.       Nipi kaal khat sungah ni khat peuhpeuh tawlngak ni-in zang peuh lehang phamawh lo hi, cih upna koi bangin na ngaihsun hiam? Ahih keileh Khrih in eite Sabbath tawlngakna hi khin ahih manin a tuamin tawlngak ni kisam nawn lo hi, cih upna koi bangin na ngaihsun hiam?

 

 

3.       Koi bangin Sabbath sianthosakna in suahtakna leh nopsakna hong phawksak hiam? Koi bangin Sabbath tawlngakna tungtawnin thukham zuihna tawh hotkhiatna ngahna ding ahihlohna leh suahta taktak lo-in omna tawh kipelh thei ding na hiam?

 

4.     Mi kimkhat in Ni sagih Sabbath tawlngakna in vantung tun nading lampi bangin ngaihsun uh hi. Ni sagih Sabbath ni tawlngakna in vantung tun nading hi lo napi, vantung a tung dingte in Sabbath tawlnga ding uh hi, cih thu koi bangin na ngaihsun hiam?