LESSON 7 August 7–13

Tawldamna, Kizopna leh Damna

 

Sabbath Nitak

 

Tu Kaal Sung Sim Ding: Pian. 42:7–20, Matt.25:41–46, Pian. 42:21–24, Pian. 45:1–15, Luke 23:34, Pian. 50:15–21.

 

KAMNGAH: “Hih lai-ah kei nong zuak manun tu-in lungkham kei un. Nomau tungah kiheh tawm kei un. Bang hang hiam cih leh nuntakna a hu dingin note’ mai-ah Pasian in kei hong sawl hi.” (Pian. 45:5).

Palik khat in numei khat buansawm hi, ci-in mawhsakna thuak hi. Tua numei nu in palikte kigualhna munah hong pai-in tua palik maikawk hi. Palik pa nialna pen thuman hi leh kilawm hi taleh, numei nu in palik pa in ka tungah hong khial hi, ci-in kician takin pulaak hi. Tua hi-in palik pa thongkia hi. Mawh kei taleh kum 14 sung thonginn sungah a hun mawk bei hi. DNA sittelna-ah numei khialhna ahihlam kidawk hi.

Palik pa in thonginn panin a suahtak khit ciangin numei nu in vamu nuam hi. Tua numei nu hangin thonginn sungah kum tampi a hun mawkbeisak numei mai amu nuam ding hiam? Tua numei in palikpa mu dingin innkhan sungah na ngak hi.A hong pusuahkhiat ciangin ki-en tuak uh a, numei in ki-ip zo nawn lo-in khitui luangin kap hi.

Tua palik pa in numei nu khut la-in, a maitang en a, “ Na mawhna hong maisak ing,” ci-in pulaak hi. Tua bangin a hong gen ciangin ka um thei hi, ci- in dawngkik hi. “Ka muhdah hih mipa, si ding ka deih mipa in tu-in ka khialhna hong mai hi,” ci hi. Tua hun a kipan hehpihna thu ka theitel thei hi. Hehpihna thu ka theih a kipanin tawldamna ka ngah hi; damna ka ngah hi,” ci hi.

Tu kaal sungin mawhmaisakna leh a lunggim mi adingin tawldamna thu i pulaak ding hi.

 

 

SUNDAY                                     August 8 

Nunglam Thupiangte Enkik

 

A tawpna-ah Joseph in thu hoih mu semsem hi. Thonginn sung pan suakta  bek tham lo-in, Pharaoh mang a khiatna a pulaak khit ciangin, Egypt gam sungah vaisai lianpen (prime minister) panmunah kikoih hi (Pian. 41). Joseph in zi nei-in tapa zong nih nei hi (Pian.41:50–52). Egypt gam sung ansal khempeuh in an tawh kidim hi. Pasian genkholhsa om bangin kial tun kipan hi.

Ni khat ni ciangin Joseph sanggamte in Egypt gamah hong tung uh hi.

Joseph leh a sanggamte kimuhkikna thu sim in Pian. 42:7–20. Bang hangin tua bangin Joseph in amaute hopih hi ding hiam? A sanggamte tawh akimuhcilin Joseph in bang ngimna nei hiam?

Joseph in a sanggamte gitlohna thuhkik nuam hileh thukkik theih nading nei hi. Ahi zongin tua bangin amaute gitlohna thukkik lo-in a innkuanpihte ading lunghimawhna lianpi nei zaw hi. A pa bangci hiam cih lunghimawh hi. A pa a damlai hiam? Innkuan sungah buai-na a omom lai mah hiam, cih pen thei nuam hi. A sanggampa Benjamin zong a dam hiam cih thei nuam hi. A pa lungkimna leh deihna bangin Benjamin in hun khatlai-a Joseph dinmunah om hi. A sanggamte in Joseph amuhdah bangun Benjamin amudah uh hiam, cih thei nuam hi. Joseph in a innkuante omzia thei nuamin amaute a sittel phot hi.

Lai Siangtho thumaan zui hi lehang mi tawh kizopna-ah kuama tungah ngongtatna thumaan lo gamtatna i nei kei ding hi. Pasian mai-ah mimal khat ciat in manpha hi. Mimal khat ciat in tawntung nunna i ngah nadingin Jesuh in singlamteh tungah man a pia khin hi.

Banghangin Jesuh mi simmawhna zawhthawhna tawh bawlnate leh kinawlkhinna cihte amah mah thuakna bangin ngaihsun hi ding hiam? Matthew 25:41–46.

Eite khempeuh in Jesuh sisan tawh a hong kileikhin ihi hi; thukhun tawh kituakin Ama tanu tapa ihi hi. Tua hi-in mi khat na simmawh leh Jesuh tungah a bawlmah na hi ding hi. Zi leh pasal kikal khat le khat kizawhthawh thu tawh kibawlna, zatkhiatlhnate hangin lungsim gimsak thei a tuamtuamte in innkuan sung susia hi. Tua bang gimnate in nupate kia bek in a siangsak thei kei ding uh hi. Tua hi-in tua bang buai-nate a huh thei dingte huhna kisam hi. Na innkuan sungah tua bang kisimmawhna khat peuh a omkhak leh hong huh thei ding mi kician khat huhna na zon ding kisam hi.

Innkuan sung buai-na neite adingin tua buai-nate zawhzawh nading Lai Siangtho in bang hong hilh hiam?

 

 

MONDAY                            August 9

Munbulhna (Setting the Stage)

 

Joseph in a sanggamte mawhna maisak hi; a maisak hun i thei kei hi. Ahi zongin a sanggamte tawh a kimuhma pekin maisak khin kha ding hi. Joseph in a sanggamte mawhna maisak lo hileh Egypt gam uk makai khat suak thei lo-in hehna thangpaihna tawh kidimin Topa tawh akizopna zong kisia ding hi.

Bawlsiatna a thuak mi tampi in a thuak uh hamsatnate kantan zo-in nuntakna nuam tawh khuasa thei kik uh hi; tua bang mite in amau a bawlsia mite mawhna maisak zo uh ahih manin, tua in nuntak nuamsakna ngah thei uh hi, cih kimu thei hi. Mawhmaisakna om kei leh, hehna thangpaihna tawh a nungta ihi ding hi. Mawhmaisakna in i tungah hong khialte sangin ei mahmah in hamphatna lianpi i ngah zaw hi.

Joseph in a sanggamte bawlsiatna, Dothan tuikhuk lui sungah a khiatna uh maisak hi taleh siatna tawh amaute nungta dingin a deih kei hi. A sanggamte kikhelna amu nuam hi

Joseph in a sanggamte kiho-na bang thu za hiam? Pian. 42:21–24. A sanggamte nunzia bang mukhia hiam?

Joseph leh a sanggamte kiho-na ah kamlet tungtawnin kiho uh hi. Tua hi-in Joseph sanggamte in Joseph ahihlam thei lo uh hi. Joseph in a sanggamte mawhthuumna za hi. A sanggamte in Joseph suamlum le-uh a pa uh tungah thuza sak ding kuamah om nawn lo ding hi cih ngaihsun uh hi.Amaute in Joseph mangmat tangthu thei nawn lo ding leh a pa uh maipha piak ngah thei nawn lo ding hi, ci-in ngaihsun uh hi. Ahi zongin amaute ngaihsutna bang lo-in Joseph a bawlsiat khit uh akipan lungnuam thei ngei lo uh hi bek tham lo-in kisuanna lungsim tawh kidim tawntung uh hi. Pasian thukhenna thuak kha dingin patau tawntung uh hi. Joseph in a sanggamte lungimna amuh ciangin amaute a hehpih hi. Amaute adingin a kap hi.

Joseph in kialpi kum sawtpi sung sawtlai ding hi, cih thei hi. Tua hi-in a sanggamte in an lei dingin a hong pai kik uh ciangin Benjamin zong a tonpih dingin vaikhak hi (Pian. 42:20). Joseph in amah tawh Simeon a om dingin galmat phot (Pian. 42:24).

Joseph in Benjamin nungta-lai hi, ci-in amuh ciangin, a sanggamte in Benjamin tungah hazatna lungsim a neilai uh hiam cih a sittel nadingin pawi khat bawlin a tuam vilvelin Benjamin maipha a lak hi (Pian. 43:34). Joseph sanggamte in hazat gamtatna bangmah kilangsak lo uh hi; ahi zongin Joseph in amaute kineihkhem hi kha ding hi, ci-in ngaihsun hi; khua bup zong khem zo khin uh hi (Pian. 34:13), a pa tungah zuau phuak uh hiam cih sittelna lianpi khat geelkik hi (Pian.37:31–34; 44.)

Pian. 45:1–15 sim in. Joseph in a sanggamte tungah a lungsim puak leh amaute mawhna a maisak lam bang pulaak hiam? Hih thupiang panin nuntakpih ding bang thu na thei hiam?

 

 

TUESDAY                                 August 10

Mawhmai leh Mangngilh?

 

Mawhmaisakna in a manlo-in thuakna khat, thukkik lo dingin khensatna, mawhsakna nusiatna hi. Dr. Marilyn Armour in Jew mite kibawlsiatna (Holocaust ) pan a suakta mite huhin nasem khat hi. Ama genna-ah “Mawhmaisakna i cih in a thuak mi-nu mi-pa khensatna tawh gamtatna hi, ci hi. Khensatna om lo-in maisak thei ziau cih om thei lo hi. Mawhmaisakna i cih in khialhna hangin a gah at kha lo hi, cih bang hi lo hi. Mawhmaisakna i cih in khialhna awlmawh lo cihna hi lo hi. Mawhmaisak i cih in thukkik nopna lungsim khempeuh Topa tungah ap, i hehna, thangpaihnate Amah tungah suankhia cihna hi. Tua hi keileh hehna, thangpaihna leh muhdahnate in i tungah siatna lianpi hong tun ding hi.

Mi mawhna i mawhsak ciangin eima tungah bang thu hong piang hiam? Matthew 18:21–35.

I tungah hong khial mite mawhna i maisakna siksan a bulpi in Khrih in eite mawhna hong maisak hi. Eite khempeuh in mi mawh ihi hi. Midang khat tungah a mawh hi bek lo-in Pasian tungah a mawh mite ihi hi.

Mawhna khempeuh in i Topa leh hong Bawlpa tungah mawhna hi; ahi zongin Jesuh sungah tua mawhna khempeuh panin mawhmai-na i ngah thei hi. Mawhmaisakna a ngah dingin i kilawm man hi lo-in, Pasian in eite a hong hehpihna hang bekin mawhmai-na ngah ihi hi. Hih thuman siangtho i pom ciangin Pasian kiang pan mawhmaisakna ngah ihi ding a, midangte mawhna zong i maisak ding hi. Midangte mawhna i maisak ciangin mawhmai-na ngah dingin a kilawm man uh hi lo-in, Pasian tung pan mawhmai-na ngah ihih manin midangte mawhna zong a maisak ding ihi zaw hi. Tua hi-in mawhmaisakna bangzah vei ngahhuai hiam?

I pulaaksa om bangin Joseph in a innkuanpihte hun hoih khat pia kik hi. A beisa huna kilangneihna, kimuhdahna cihte om nawn lo hi. Innkuan sungah khat le khat lungsim natna a piangsak thei thute tawh kidimin a om laiteng innkuan sung nuam thei ngei lo ding hi. Ahi zongin Joseph in a sanggamte tungah gitlohna tawh thukkik ding ngaihsun lo hi. Amaute gitlohnate kimangngilh bawlin, itna leh sanggam khat hihna siksan zaw hi. Joseph in gitlohna lungsim nei hileh a innkuan sung uh nuamkik thei nawn lo ding hi. “Pasian in a mawhnate maisakin a khialhnate a seelcipsak mite thupha

ngah ahi uh hi.

Topa in a mawhnate a ciamtehsak loh mipa, thupha ngah ahi hi,” a ci hi (Rom. 4: 7,8). Paul in Jesuh sungah bang thute hong kipia khin a, koi bangin hih a lamdang kamciam in i tungah hong khial mite tawh kizopzia hong huzaap ding hiam?

 

WEDNESDAY     Aug 11

    Nuntakpih Ding

 

I tungah hong mawhte mawhna i maisak nadingin i tungah siatna hong kibawl hi, cih i theihmasak kul hi. Hih pen hamsa hi; ahi zongin ka thuak siatna in bang hiam cih theimel loh sangin thei khia mahin maisak ding thupi hi. Hehna thangpaihna pen i pianpih khat hi; Pasian in zong sangsiam hi. Late sungah hih thu kimu thei hi.I tungah piang thusia-te, hehna lungkimlohnate suakta takin Pasian tungah i pulaak thei hi.

Joseph tangthu en lehang a sanggamte amuh ciangin Joseph kap hi. A beisa hun a thuaksiatnate panin suakta theipah hi. Jesuh in singlamteh tungah a pulaak thu in bang hunin mawhmaisakna kisam hi, cih hong hilh hiam? Luke 23:34.

esuh in amaute mawhna a maisak nadingin amasa in amau mawhthumna ngak lo hi. I tungah hong khialte’n mawhna i maisak nadingin amau hong thuum hun ngak ding hi lo hi. I mawhmaisakna a san loh uh hangin amaute mawhna i maisak thei veve hi.

Luke 6:28 leh Matthew 5:44 in i tungah hong khialte tawh kizopzia ding bang hong hilh hiam?

Itna tawh kibang mahin mawhmaisakna in ut thu tawh kisai lo-in khensatna kisam masa hi. Na ut kei zongin mawhmaisak ding na khensat thei hi. Pasian in eima tha tawh khensat zo lo ding ihihlam hong thei hi; ahi zongin Pasian tawh na khempeuh a piang thei hi (Mark 10:27). Tua hangin i tungah khial mite adingin thungen dingin hong kisawl hi. I tungah hong khial mipa minu si khin kha mai thei hi; ahi zongin i tungah ahong khialhnate i maisak thei veve hi.

Mawhmaisak cih pen a thubaih hi lo hi. I thuak gimna, supna, natna, kisiatna lianpi piangsak khin hi. Ahi zongin i phal nakleh damna hong lutkik thei hi. Ahi zongin hehna, thangpaihna i vomlai-siah damna ngahhak mahmah ding hi.

Mawhmaisakna-ah etteh ding a hoih penpen in Singlamteh hi; Pasian mahmah in i mawhna a hong maisakna mun hi. Eite adingin Topa in gimna thuak taleh mi tampi in Amah nial lailai uh hi; ahi zongin Topa in amau mawhna maisak hi. Eite in zong tua bangin i tungah hong mawhte i maisak thei hi.

Kua mawhna na maisak ding a om hiam? Ama ading hi kei taleh nang adingin thu hoih hi lo ding hiam?

 

 

THURSDAY                                August 12

Mawhmai Khit Ciangin Tawldamna Ngah

 

Josephte innkuan in a tawpna-ah Egypt hong tung uh hi. Innkuan sung khat le khat kikalah thusim cih peuhmah om nawn lo hi. A sanggamte in namdangte tungah Joseph a zuak manun a mawhnate uh a pa tung pan mawhmai-na ngen khin kha ding uh hi. A tapa Joseph in thahna thuak hi, cih kimlai tu-in Egypt gam uk mangpi sem hi, cih thu a za hi. A beisa hunin gitlohna tawh khat le khat a kizopna kibawlpha-kik thei lo hi, cih thu in mawhna kimai sak thei lo hi, cihna hi lo hi.I tungah a hong khial mi khat kiangah vapai-in khitui luangin kapin amah vakawi ding piang thei khol lo ding hi. Ahi zongin laikhakin ahih keileh phone tawh hopih a kipan mawhmai-sakna i pulaak thei hi. Tua bangin lungsim natnate i hemkhia thei hi. Tha khat thu-in tua lungsim natna a bei thei kei zongin, lungsim damna mawhmai sakna lampi-ah a kalsuan thei hi.

Pian. 50:15–21 sim in. Joseph sanggamte in bang lunghimawhna nei uh hiam? Bang hangin tua bangin lunghimawh uh hi ding hiam? Tua bangin alau-na uh in amau lungsim puak bang pulaak hiam?

Joseph sanggamte in Egypt gamah kum sawm leh sagih sung teengkhin uh hi (Pian.47:28), Jacob a sih khit nungah Joseph in amaute tungah phu a lak khak ding amaute patau uh hi. Tu-in amaute in Joseph tungah a bawlzia- te uh khua nungphawk uh hi. A pa Jacob sih khit Joseph in amaute mawhna maisak khin ahihna thu tu-in a pulaakkik kul hi. Tua bangin pulaak kikna in a sanggamte ading leh Joseph adingin thu hoih hi zaw hi. Khialhna lian mahmah leh mawhmaisakna zong tam veipi mah pulaak kikkik kisam ding hi. A beisa huna tatsiatnate hangin lungsim natna a hong dawkkik ciangin eite in thakhatin thungetna tawh Pasian kiang zuan mawhmai-na nget phapha ding kisam hi.

Pian. 50:20 sim in. Koi bangin Joseph sanggamte in ama tungah a bawlsiatnate Joseph in maisak thei hiam?

Joseph in ama nunna pen kialtunna sung pan a pa leh a sanggamte suahtak nadingin Pasian in a geelkholhsak hi, cih pen kiptakin um hi. Amaute innkuan in minam lian khat suak ding hi, cih Pasian kamciam a tangtun nading hi, cih um hi. Joseph in Pasian in a sanggamte gitlohna tungah ukna nei hi, cih a theihna hangin amaute mawhna maisaklah lo hi.

Joseph tangthu in a nuam innkuan tawh thukhup hi. Koi bangin a tawpna- ah thu hoih lo tawh a beite na ngaihsun hiam? Ahih keileh mawhna leh kido- na lianpi a bei ciangin mawhna khempeuh tungah thukhenna hun ciangin nuamna thu hong tung kik ding hi, ci-in na ngaihsun hiam? Koi bangin hih lametna in innkuan kisiate innkuan suak thei dingin hong huh hiam?

 

FRIDAY           August 13

Ngaihsutbeh Ding: “ Joseph in namdangte khut tungah a sanggamte zuakna a thuak bang mahin Khrih in zong a galte khut sungah A nungzui khat zuakna a thuak hi. Joseph in a man lo kimawhsakna thuakin ama gamtat hoihna hangin thongkiat thuak hi. Tua bangmahin Khrih in simmawhna nawlkhinna a thuak hi; bang hang hiam cihleh Amah in thumanin gamta-in, ama nunna nialin, mawhna thu hilh a, mawhna bangmah nei lopi a man lo teci thute hangin Khrih in sihna a thuak hi. Joseph in a man lo-in bawlsiatna, nenniamna thuak taleh lungduai takin thuak ngeungau hi. Amah in a sanggamte gitlohnate maisak dingin kigingsa-in a om hi. Joseph nunzia in leitung mite gitlohna leh bawlsiatna a thuak Honpa limcing hi. Khrih in Amah a that mite mawhna maisak banah Amah kiang zuanin mawhna kisik a mawhmai-na ngen mite mawhna a maisak hi.” Ellen G. White, Patriarchs and Prophets, pp. 239, 240.

“Mawhmai-sak lo lungsim in dikna a ngah thei kei hi. Midangte hehpih lo-in mawhmai sak lo mi in Pasian hehpihna a ngah kei ding hi. Pasian piak mawhmaisakna sungah mimawh mi in Mongnei lo Itna a nai semsem hi. Vantung hehpih itna in mawhnei mi sung hong lut ding a, ama sung panin midangte zong hehpih theihna itna a phulkhia ding hi. Khrih hehpihna a ngahkha mite sung panin Khrih hehpihna, itna, lainatnate mah hong kilangkhia ding hi.”—Ellen G. White, Christ’s Object Lessons, p. 251.

 

Kikup Ding Dotnate

 

1.  Mi khat in, “Mawhmaisak theihlohna pen guu dawnin ahi zongin midang khat na si ding hi, cih lametna tawh kibang hi,” ci hi. Hih thu a khiatna bang hi ding hiam?

2.       Joseph in a sanggamte tungah amah ahihna a pulaakpah lohna bang ngimna nei hi ding hiam? Ama leh a sanggamte tungah bang deihna nei hiam?

3.       Joseph nasemte khat in a sanggamte tungah Joseph bawlziate thuakpih kha ding hi (Pian. 44:1–12). Koi bangin mawhmaisakna in kimlepamte tungah huzaap nei hiam?

4.     “Pasian makaihna zui dingin a khensat lo mite Pasian in a makaih ngei kei hi. Pasian mite in a pat pan a mongdong mu thei uh hileh, vangliatna tawh kidim om ding mukhol thei uh hileh Amah tawh nasem khawm nuam lo-in aom kei ding uh hi.”Ellen G. White, The Desire of Ages, pp. 224, 225. Hih thu na ngaihsut kawmin na nunzia kisittel in. Hih thu in koi bangin na thuak hamsatnate leh gimnate hong nawktanpih thei ding hiam?