LESSON 13 September 18–24

 

Tawlngakna Nunungpen

 

Sabbath Nitak:

 

Tu Kaal Sung Sim Ding: Mang. 1:9–19; Matt. 24:4–8, 23– 31; Mang. 14:6–12; Heb. 11:13–16; Phil. 4:4–6.

 

KAMNGAH: “Lai Siangtho sungah, “ Pasian in amah a it mite adingin a bawlkholhsa nate in mittang tawh kimu ngeilo, bil tawh zong a kiza ngeilo, mihingte lungsim sungah zong a om ngeilote ahi hi,” ci-in a kigelh hi (1 Cor. 2:9).

Sia leh pha kidona sungah galdo-in om na hihlam na phawk ngei hiam? Biakna nei lo mi tampi in zong tua bangin a ngaihsut hun uh om thei hi. Sia leh pha, Khrih leh Satan in kido hi, cih i thei hi.

Tua hi-in nuntakna sungah thu nih i tuak tawntung hi. Khrih leh Satan kidona in mun khempeuh huam hi; vankhuanuai dongin sukha hi. Bang hang hiam cihleh hih kidona in vantung panin hong kipan kidona hi (Mang.12:7). Siatnate hangin eite in Pasian hong gelhsak suahtak nading lampi i mangngilh kha zel hi. Gal kidonate, gam sung buainate, gimna namcinte hangin cihmawhna i thuak hi. Ahi zongin Pasian hong lahkholh thute phawk lehang i pai-na lampi in bang hi-a, koi mun hong tunpih ding hi, cih i theithei hi.

Sia leh pha kidona lianpi in mimal in a phutkhak hi. Nisimin upna zia- etna i thuak hi. A hingtang a Jesuh dawn ding maw, ahih keileh thawhkikna masa sungah a kihel ding mite hi ding maw, cih pen i genkhol thei kei hi. Leitungah bangbang a piang zongin, zing leh thai-ah na tuah ding thu na theih loh hangin, a tawpna-ah leitung in hoihna tawh kidim ding hi, cih i thei hi.

 

SUNDAY                                               September 19

   Kamsangte Muhkholh Hun Bei-na

 

Nungzuite lak pan sihna thuak nunung pen John hi. A kikoihna mun in suangtumpi tung tuikulh khat hi; a sanggam behlehphung tawh kigamlatna mun hi. Kuama omlohna hih bang munah a om ciangin a lungsim sungah bang a om ding hiam? Koi bangin hih mun hong tung hiam? Hih mun in bang tawh kibang ding hiam? Amah in Jesuh van a kahtoh khit ciangin vantungmi nihte in, “ Galilee mite aw, bang hangin vantung ento na hi uh hiam? Jesuh in note kiang kila-in vantung a kahtoh na muh bangun note kiangah Amah mah hong pai kik ding hi” (Sawl. 1:11), ci-in awging zong a za hi.

Ahi zongin kum tampi bei khin Jesuh hong paikik nai lo hi. Tua kawmkalah nungzuite Jesuh thu tecipanna uh hangin thahna thuakin a nungta kuamah om nawn lo uh hi. Pawlpi zong a kipan tung ahih manin upna moi mahmahlai hi; tua banah bawlsiatna lianpi thuak uh hi. Pawl in pawl sung pan hi taleh pawl pua panin hi taleh langpanna om hi. John in gim, tawl leh lungleng khuangai mahmah kha ding hi. Tua bangin a om laitakin thakhat thu-in mangmuhna a ngah hi.

John in a mangmuhna panin khamuanna bang ngahin na um hiam?

Mang.1:9–19.

Jesuh in a nungzuite tungah, “ En un, leitung bei dongin keimah in note tawh kong om tawntung ding hi,” ci hi (Matt. 28:20). John in amah bek a omna munah hih kamciam phawk kha ding hi. John in Jesuh kilaakna thute amuh ciangin khamuanna nei-in, Jesuh in Alpha leh Omega, Amasa pen leh A Nunung pen ahihna thu thei ding hi. Tu-in Jesuh in hawlkhiat thuak nungzui John tungah a tuam vilvelin kilang hi.

John tungah Jesuh in Amah leh amah a kipulaak khit ciangin leitungah a piang ding thute a hilhkhol hi. Lamdangtakin pawlpi mailam tangthu ding khempeuh kipulaak hi. Pawlpi in a thuak ding bawlsiatna leh gimnate khit ciangin, hih thute a bei ciangin a piang ding John tungah a kilak thu in: “ Tu- in vantung thak leh leitung thak ka mu hi. Amasa vantung leh leitung in a beimang zo hi. Tua munah tuipi om lo hi. Keimah John in khuapi siangtho Jerusalem in vantung Pasian kiang panin a hong thuaksuk ka mu hi. Tua in a pasal adingin a kizemsa a om mothaknu tawh a kibang hi (Mang.21:1, 2).

John in ama tungah a kilang mailam huna a piang ding thute in Pasian ompihna leh Ama kamciamte sungah tawldamna a ngah hi.

Nuntakna in hamsa hi; lauhuai-na tawh kidim hi. Pasian in mailam hun thei khol hi; a tawpna-ah na khempeuh in hoihna tawh kidim ding hi, ci-in theihna in hong khamuangsak hiam?

 

 

MONDAY                                        September 20

A Bei Nading Hi-ta (Countdown)

 

Olives Mual tungah Jesuh in hun beikuan a thupiang dingte a nungzuite dotnate a dawnkikna-ah: ‘Hih thute bang hun ciangin hong tung ding hi, cih kote hong hilh in. Nong pai kik ding ciangin bang thute hong piang ding hiam? Leitung bei ding ciangin bang thu hong piang ding hiam? (Matt. 24:3). Jesus thuhilh a minthang mahmah - Matthew 24 in Ama hun a kipan Nihvei Kumkik leh leitung thak dongah tatsat lo-in thupiang dingte hong hilhkhol hi. Jesuh in a nungzuite tungah hun nununga hong piang ding genkholhna thute hilh hi; tua bangin a hilhkholhna a deihna in Amah a dawn dingin kigingkhol ding deihna hi. Leitung in kisia taleh Jesuh in Ama sungah tawldamna ngahin Ama itna a muang dingin hong deih hi.

Adventist-te in Daniel tunga kipia genkholhna cikmah hunin a om ngei nai lo gimna lianpi hong tung ding hi, cih thu i um hi (Dan. 12:1). Nihvei Kumkikna hong tun madeuhin a hong tung ding tua gimna lianpi adingin Jesuh in eite a kigingkhol dingin hong deih hi.

Jesuh hong paikik ciangin bang tawh kibang ding hiam? Koi bangin khemna tawh kipelh thei ding i hiam? Matthew 24:4–8, 23–31.

Hun bei ciangin Jesuh mahmah hong pai ding hi. Amah mahin hong hilhkhol hi; a thuhilhna khempeuh in Ama hong paikik ding hong hilh hi.

A nunung pen leitung mun khempeuh a kisuksiatin mihing giat bek in kigingkhol uh hi; amau bek mah suakta uh hi. Tuicin a tunlai-in leitung mite lamen lo-in a kisiat khit bangun Jesuh hong paikik ciangin zong mite lamet loh hunin hong pai dinga mi tampi in kisia ding uh hi (Matt. 24:37–39). Kuamah in Jesuh hong paikik ding hun thei lo hi mah taleh (Matt. 24:36), kimlepaam thupiangte in hun bei-in Jesuh hong pai ding hun bang ciang hong naita hi, cih hong hilh hi.

Genkholhna sungah eite tungah masuan hong kipia hi. I masuan in bang hi ding hiam? Matthew 24:9–14 bulphuh in.

Vankhuahuai buai-na sungah mihing in nuntakna nei khatin a nungta mawk maimai ihi kei hi. Leitung mun khempeuhah lungdamna thu lawptakin a puak kawikawi dingte ihi hi. Tua bangin nasepna-ah bawlsiatna in hong ngak hi.

“ A tawpdongin kiptakin thuak in” cih thu in a khiatna bang hi ding hiam? Koi bangin kiptakin mainawt ding i hiam? Mi tampi in zia-etna sung pukin mangthangte bang hi lo-in, siatna sung i tun loh nadingin nisimin bang khensatna kisam hiam?

 

 

TUESDAY                                                                        September 21

Thupiak Bangin Mainawt

 

Genkholhna om bangin hong tangtung ding hi, ci-in hun nunung thupiangte in eima khut sungah om lo hi, ci-in khutzepin a mawkna-in hun beisak ding hi lo hi. Tua hi-in i lungsim puakzia ding in “genkholhnate khat khit khat tangtung a, hun nunung thupiangte a en hithiat ding hi lo-in, bang sem thei ding ka hiam, cih lungsim puak kisam hi.

Ahi zongin tuhun Christiante in tua bangin nungta lo hi. Mangmuhna 14 hong gen bangin Pasian thukhenna thu leh Jesuh hong pai kik ding thu mite tungah a pulaak ding ihi hi.

Mang. 14:6–12 sim in. Bang thu hong hilh hiam? Mite tungah i pulaak ding thu in bang thupuak hiam? Banghangin tua thupuak in zekai lo-in vagen ding thupuak hiam?

Adventists ihih mah bangin eite in “tulai thuman” ( 2Pet. 1:12)i gen ding om hi, ci-in a umte ihi hi. Tulai thuman i tangko ding thu in “Vantungmi thumte thupuak hi.” Hih thupuak in hun nununga a nungta eite in sapna ngah i hihna thugui hong hilh hi.

Tua thupuak in “tawntung lungdamna thu” cih thu tawh kipan hi. Hih thupuak in a lamdang thuthak – Khrih hong sihna leh sihna pan a thawhkikna thu hi. Eite lametna leh eite tawldamna in hih thu tungah kinga hi. Hih thupuak in “ Pasian thukhenna hun hong tung zo hi,” cih thu zong kihel hi (Mang. 14:7); hih thu in hun nunung sungah om ihihlam vanglian takin a hong lak hi. Hih thute khit ciangin “vantung leh leitung a piangsak Pa bia dingin sapna thu om hi. Hih thupiak in a lauhuai vauhilhkholhna – Babylon sunga a om mite in “sapi leh ama ciaptehna nei uh hi.” A tawpna-ah hun nununga Pasian mite hong kidawk hi: “ Hih thu-ah mi siangthote in lungduai takin thuakna aom hi; amaute in Pasian thukhamte leh Jesuh neih upna a nei mite ahi uh hi.”

Mang.14:11 sim in. Sapi leh ama milim bia mite in tawldamna nei lo ahihna thu bang kigen hiam?

Sapi leh ama milim bia mite adingin sun leh zan tawlngak hun nei lo uh hi lo hiam? Hih thu tawh kisai muhzia tuamtuam om taleh, mikim in a thukim uh thu khat in sapi leh ama milim bia mite in Pasian in Ama tungah a citak mite a piak tawldamna sungah tawldamna a ngah kei uh hi.

Bang hangin Vantungmi Thumte Thupuak in “tawntung lungdamna thu tawh kipan hi ding hiam? Bang hangin hih a lamdang thusiksanin vantungmi thumte thupuak pulaak ding kisam hiam? Koi bangin tawlngakna thu in lungdamna thu puak nasepna-ah a thupi hiam?

 

WEDNESDAY                  September 22

  Daihna sungah tawldamna (Rest in Peace)

 

Christiante in Khrih hong kumkik ding i ngak kum zalom tampi paikhin hi. Eite lametna bek hi lo, thu-um mi khempeuhte lametna in Khrih hong kumkik ding hi, cih lametna hi.

Hebrews 11:13–16 sim in. Nidang mite tung hi taleh eite tungah a lian mahmah bang kamciam hong kipia hiam?

 

Mi tampi upna bangin i sih ciangin vantung kitungto pahpah hileh Pasian kamciamte in khiatna nei lo ding hi. Billy Graham si khin, tu-in vantungah a thaman sangta hi, ci-in gengen uh hi. Sihna in daihna sungah tawlnga (rest in peace) cih thu in misite in nuamtakin tawlnga hithiat uh maw, ahih keileh amaute in vantungah om uh a, leitung hong ensukin hong nuihsan lel uh hi ding hiam?

Koi bangin Jesuh in sihna pulaak hiam? John 11:11.

 

Misite in daihna sungah tawlnga taktak uh hi. “Thu-um mite adingin sihna in tawl khat sung ding bek hi. Khrih in hun tomno sung hi, ci hi. ‘Mi khat in ka thupiakte a zuih leh amah in a si nawn kei ding hi; sihna a thuak nawn kei ding hi. Christiante adingin sihna in ihmuhna hi; hun tomno sung gamdaihna leh khuamialna hi. Pasian sungah Khrih nunna tawh kiselcip hi; nunna hong pia Khrih in vangliatna tawh a hong pai ding hi.’ John 8:51, 52; Kol. 3:4.”—Ellen G. White, The Desire of Ages, p. 787.

 

Jesuh in sihna leh sihna pan thawhkikna kikal in khua-phawk lo ihmutna tawh genkak hi. (John 11:11, 14), tua hi-in thawhkik hun ciangin tatkhiat ngahte leh a mangthang ding mite in thaman ngah ding uh hi. (John 5:28, 29). Mihing in ama sih hun ding theikhol ahih manin kigingkhol ding kisam ahihna thu Jesuh in hong hilh hi.

 

Na it mi khat in a hong nusiat ciangin amah in tawlnga hi, cih thu in lungmuanna bang a hong pia hiam?

 

 

THURSDAY                                September 23

Topa sungah lungdam tawntung un

 

Khuttawi phone sungah a kizang mahmah ( apps ) khat in Google Maps hi. Global Position System (GPS) a kibawlma-in i pai-na munte i phawk nawn kei hi. Ahi zongin GPS hong pian a kipan i pai ngei lohna munah zong pai theih nading lampi hong lakin, i pai khitna sa munte zong ki-en kikkik thei hi. Tua bangmahin Pasian in mailam hunah a hong piang ding thute a genkholhna sungah lungmuangtakin om thei ding hong deih hi lo hiam?

Ahi zongin khat veivei ciangin a hong kihilhna bangin zui lo-in lamdot- tawnin i omteh lam kikhial thei hi. Tua bang hun ciangin maizumna i thuak hi. Philippians 4:4–6 sim in. Gimna, siatnate lakah nungta hi mah taleng,Paul in tawldamna mantak leh lungnopna mantak tawh nungta thei ihihna thu bang gen hiam?

 

Paul in a hong hilhna-ah gimna, hamsatnate sungah lungdam un, ci-in hong hanthawn hi lo hi. Topa sungah lungdam tawntung un, hongci zaw hi. Bangbang dinmunah i om zongin, bangbang gimna, hamsatna tawh kidim kha phial taleng, Pasian leh Ama hoihna, Ama hong itna, singlamteh tungah eite adingin a hong sihna tawh ngaihsunin kalsuan hi lehang, eite in Ama sungah nopna leh tawldamna mantak i ngah thei hi. Paul hong hilh thu in leitung hong piak theih loh tawldamna, lungnopna leh lametna thu hong hilh hi.

Tawldamna sungah “bang mahmah lunghimawhna nei lo” cih thu ngaihsut in. Hih leitungah tua bang thu a piang thei mah ding hiam, cih pen ngaihsut hamsa hi. Paul mahmah in zong lunghimawhna tampi nei hi. Ahi zongin i gensa om bangmahin itna tawh a kidim Pasian in na khempeuh ukin a tawpna- ah Ama ukna gam sungah hong honkhia ding hi, cih thu in i tuahkhak thute tungah zawhna hong ngahsak thei hi.

“Topa hong pai ding hun naita hi,” cih thu a takpi mah ahi ding hiam? Amah in i kiang mahmahah hong tung ta hi – mitphiat kalsungin i nuntakna bei thei a, i khanlawh kik ciangin Jesuh hong kum hun hi ding hi.

Nuntakna in buai-na, gimna leh hamsatnate tawh kidim hi. Hihte tawh a kipelh thei sawltak Paul a kipan kuamah a om kei hi (2 Korinthians 11). Bangbang piang taleh ama hong hilh thu in Khrih sungah a hong kipia thute tawh tu mahmahin lungnopna leh tawldamna tawh a nungta thei ihi hi.

Philippians 4:4–6 simpha kik in. Bangbang hamsatna leh gimna na thuakkha zongin, koi bangin Paul kammalte tawh nungta thei ding na hiam?

 

FRIDAY               September 24

Ngaihsutbeh Ding: “I thungetnate Pasian in hong pia pahpah hileh i ut hi. I thungetna bangin ngah pahpah lo-in, Pasian in hong sittel photin thungetna hong piak loh ciangin lungkia-in i om kha zel hi; i thungetna bangin Pasian in hong piak loh ciangin lamet bei bangin i om kha zel hi. Ahi zongin Pasian in pilna khempeuh leh na khempeuh theihtelna tawh kidim ahih manin eite kitangsap hunhunin hong pia tawntung hi. Eite lunggulhna sangin a hoih zaw-in nasem tawntung hi. Tua ahih manin Ama pilna leh Ama hong itna i muang thei hi. Eite deihna bangin Aman in na hong sem dingin ngen lo zaw- in, i nuntakna-ah Ama deihna kicing dingin thungen ding ihi zaw hi. I deihna leh i ngaihsutna khempeuh in Ama deihna i ki-uksak ding ihi zaw hi.” Ellen G. White, Gospel Workers, p. 219.

“A sawt lo-in Jesuh hong pai dinga a tate hong honkhia dingin leh a si nawn lo ding nunna hong pia dingin hong pai hi. Hankhukte kihong ding a, a si mite in vangliatna tawh hong thokik ding uh a, “ Sihna aw na zawhna koi ah om hiam? Hankhuk aw, na zawhna koi ah om hiam, ci-in awng ding uh hi. Jesuh sungah a si i it khempeuh in si nawn lo ding nunna tawh hong thokik ding uh hi.” Ellen G. White, Counsels on Stewardship, p. 350.

 

Kikup Ding Dotnate

 

1.       Sia leh pha kido-na na thuakkhak thute ngaihsun in. Leitung khua hunpai ziate ngaihsun in. Na nunzia in koi bang hiam? Sia leh pha kidona tawh kipelh kua om hiam? Mite ngaihsutna sangin sia leh pha kidona in om takpi hi. Mi tampi in Satan om lo hi, ci uh hi. Bang hangin sia leh pha kido hi, cih theihtelna in leitung khuahun paiziate theitelna hong pia dingin thupi hiam? Bangci bangin sia leh pha kidona i theihtelzia in leitung i nuntak sung hong khamuangsak hiam?

 

2.       Genkholhna in hong hilh loh thute na ngaihsut leh genkholhna thute panin lam hong pialpih kha ding hi. Genkholhna a tangtung lo thute leh tua thute upna hangin bang buai-na om ngei hiam? Tua bang siatna thaang tawh kipelh thei ding na hiam?

 

3.       Mangmuhna 14:9–11 simkik inla, sapi leh ama ciaptehna a bia mite in gimna thuak uh hi, cih thu a khiatna in bang hi ding hiam?

 

4.       Pawl sungah a hong tung thei zel buai-na khat in Khrih hong kumkik nadingin mihing in sep theih nei hi, cih leh bangmah sep theih nei lo hi, cih thu hi. Bangbang hi taleh bang hangin Khrih hong pai ding thu leitung mun khempeuhah kizelsak ding thupi hiam?