LESSON 1 June 26–July 2

Tawlngak Hun Nei Lo-in Nasemte

 

Sabbath Nitak

 

Tu Kaal Sung Sim Ding: Gen. 2:1–3, Jer.45:1–5, Exod. 20:11, 2 Sam. 7:12, Mark 6:30–32, Gen. 4:1–17.

 

KAMNGAH: “Ke’n ka lunggulh mahmah hi. Topa’ huangsung ka lunggulh mahmah a, ka lungsim le ka pumpi a nungta Pasian’ tungah lungdam mahmahin la a sa hi”(Late 84:2).

 

Tit tok, tit tok, tit tok. Kawm tunga naipi in gim leh tawl cih om lo-in mantakin paipai hi. Sabbath ni hong tun ding nai nih bek kisamlai, Mary in a inn sungteng amuhteh khuisa hi. Leengla tutna munteng in naupangte kimawlna vanzatteng sual tungah teek nee-nua hi; anhuan buk sung niin mahmah hi. a tanu tom pen uh Sarah in cina-n lupna tungah lumlai hi. Mary in Sabbath ni-in biakinn ah leengla muak dingin kisawl hi. Hun kipatma minutes 30 bang biakinn a tunkholh uh kisam hi. Sabbath ni pen buai tengtung sangin tawldam hithiat ding lunggulh hi.

 

Tua kawmkalah khua kim panin Mary pasal Josh in inn sung van kisam tuamtuamte valei-a pai hong tung thei lo hi. Lampi kikhak cip; pai nading mun awng lo hi. A kuama peuh vanlei hun kituak ngeingai hiam, cihnop phialin om hi. Josh in tawlngak hun kisam ing; hih bang tawh buai tengtung nuam keng, ci-in ngaihsun hi. Ahi zongin nuntakna i cih in hihte sangin lian zaw hi. I manlah tawntung hi; kinawh hi den mai! Mi tawh kiho-na, vai tuamtuam tawh vak suk vaktohna, nasepna tawh kibuai den hi. Nisim nuntak khuasakna, nasep kuan leh ciahnate-ah, lampi lamdungah i muh, i tuah thute hangin i

nuntakna-ah bang in thupi pen hiam, cih i phawk kha nawn kei hi.

Koi bangin manlahna leh buai-na lakah tawldamna i mu thei ding hiam?

 

 

SUNDAY                                             June 27

A Gim leh A Vul Nuntakna

 

Pian. 2:1–3 sim in. Bang hangin Pasian in i gim leh i tawl ma-in tawlngak ni ding bawl hi ding hiam?

 

Mihing in amah leh amah lungkham sinkham kiguanin a nuntak ma-in i nuntakna-ah i phawk ding Pasian in ciaptehna khat na bawl khin hi. Hih ni hong tun ciangin khawl hun hi ding a, nuamna tawh kidim ni hi dingin Pasian in tuamkoih hi. Hih ni hong tun ciangin bangmah sem lo-in tawlngak ni ding hi; hih ni in Pasian hong piakkhong singkung lopa, huih, tui, mihing hong piansakna leh a thupi penah na khempeuh Piangsak Pa tungah lungdamko dingin hong deih hi.

 

Adam leh Eve in Eden panin hawlkhiat thuak a kipan tuni dongin Sabbath sittelna a kizomsuak hi-in Sabbath in nuntakna khempeuh tawh kizom hi. Ni sagih a cinsialin Piansakna hangin Topa tungah lungdamko dingin a kisam phapha hi.

Tuhun ciangin nasepna-ah van zat tuamtuamte hangin tuma kum zanih hunte laisangin a tawldam zaw dingin kingaihsun hi. Ahi zongin tu-in tua bangin tawldamna tawm mahmah hi. Nasep loh sung nangawngin zong tawlnga hithiat cih om thei lo hi. Bangzahin nasep zo-in matun hi mah taleng, i mai-ah masuan tampi om hi; tuate a nung delhdelh i suak hi. Ihmut hun ding hun tam ngah lo mi tampi in caffeine tungah kinga uh hi. Mi tampi in cell phone hoih mahmah zangin, computer manlang mahmahte zang, internet hat mahmah kizang hi taleh manlah hi den uh hi. Hih a nuai-a Lai Siangtho munte in bang hangin tawlngakna in thupi hi, cih hong hilh uh hiam? Mark 6:31, Late 4:8, Pai. 23:12, Thkna. 5:14, and Matthew 11:28.

Eite hong bawl Pasian in i pumpi in tawlngak kisam ahihlam thei mahmah hi. Amah in zan hun leh Sabbath a piangsak hi. Hih hunte in mihing in tawlngak hun a ngah nading uh ahi hi. Jesuh in eite nuntakna khempeuhah Topa hi, cih thei hi lehang tawlngakna hun pel lo a zang ding kisam ihihna i tel pha semsem ding hi. A taktakin Sabbath tawlnga ding hong sawl mawkmawk hi lo hi; thupiak hi. Manlahna tawh kidim na nunzia ngaihsun in. Pasian hong deihsak pumpi tawlngakna leh Ama tawh kizopna-ah tawldamna hoih zaw dingin bang na hih thei hiam?

 

 

MONDAY        June 28

 A Hawmpi Nuntakna

 

Ihmutcim lohna leh pumpi gimluatnate hamsa hi. Tua sangin a hamsa zaw in lunglen khua-ngaihna (“emotional empty.” ) hi. Ihmuhcim kei leh lungsim gim leh tawl in hong behlap thei hi; tua in lungkiatna hong tun thei hi. Baruch, Jeremiah zat lai-at pa Baruch in Babylonte in Jerusalem a suksiatma, buai-na leh patauhna tawh a kidimma Jerusalem kisiatnate thuakkha ding hi. Jer. 45:1–5 sim in. Bangci bangin Baruch in gimthuak hiam?

 

Pasian in nang bek in na thuak ding thu hong puak hileh, koi bangin na om diam? Baruch in Pasian tokhom tung panin tua bang thu ngah hi (Jer. 45:2). Tua bangin Baruch in Pasian tung pan thu a ngah hun in Jehoiakim in Judah gam a uk zawh a kum li-na, 605 ahih keileh 604 B.C hi ding hi. Jeremiah 45:3 in mihing in cimawh dongtuak mite thuakna pulaak hi. Tua hun a Baruch taamlawhnate kineihkhemna hi lo hi. A lungkiatna leh cihmawhin a omna thu limtak pulaak hi. Siatna tampi thuakin tampi mah thuaklai ding hi. Koi bangin Pasian in Baruch nat leh gimnate mu hiam? Jeremiah 45:4, 5 sim in. Pasian in Baruch thuaknate hangin Amah mah in thuak ahihna ngaihsun lehang Baruch thuakna sangin Pasian thuakna in lian zaw hi, cih kilang hi. Pasian in Jerusalem a pankhia Pa hi; Amah mah in susia ding hi ta hi; Amah in leenggahhuan bangin Israel a bawl hi (Isa. 5:1–7); Amah mah in hih huan zunglot khia ding a, gamdangah saltangin paipih ding hi ta hi. Topa in a mite tua bangin a nungta dingin deih lo hi. Ahi zongin tua bangin a thuak ding hun hong tungta hi; bang hang hiam cihleh amaute in Topa a langpan uh hi. Ahi zongin Baruch adingin gimna khuamial galah khuavak om hi. Kisiatna, saltanna leh supnate lakah Pasian in Baruch nunna kembit hi. Pasian in Baruch a makaihnate simkik in. Ei mahmah in a huampi- in i nuntakpih ding bang thupuak na mu hiam? Cihnopna-ah bangbang dinmun sung i tung zongin a tawpna-ah Pasian vangliatna bang kipulaak hiam?

 

TUESDAY                                                                                   June 29   

Thukhun Lui Hong Hilh Tawlngakna

 

I vekpi-in tawlngakna i kisam hi. Tua hangin Lai Siangtho sung khempeuhah tawlngakna thu kimu-kim hi. Pasian in nasem dingin hong bawl hi taleh tawlngak hun zong a kisam khat hi.

 

Hebrew Lai Siangtho sungah, gentehna-in nambat in tawlnga limcing om hi. Piansak ni sagih ni-in Pasian tawlngakna thu a kipulaakna-ah (Pian. 2: 2,3), “Shabbat” cih kammal kizang hi. Shabbat a khiatna in “nasem khawl, tawlnga, nasep loh ni cihna hi. Hih kammal panin Sabbath cih kammal hong piang hi. Hih kammal mah Pai. 5:5 kizangin “nasepna panin tawlngakna” a pulaak kammal hi. Moses in a mipihte nasepna pan tawlnga dingin a thupiak manin pharaoh hehna piangsak hi.

 

Thukham li-na sungah Pasian in Ama piansak nasepna pan tawlnga hi, cih a pulaakna-ah Hebrew laimal “nuakh” (Pai. 20:11, Thkna. 5:14) kizang hi. Hih kammal a khiatna in “tawlnga” cihna hi. Hih kammal mah Job 3:13 sungah zong tawlnga ci-in kigelh a, thuciam tawh kisai a kipulaakna-ah “khawl” cih kammal, Gam. 10: 36 leh 2 Kum. 2:15 ah zong Elijah vangliatna in Elisha tungah hong khawl (tawlnga) hi, ci-in kizang hi.

 

A dang kammal khat kizang in “shaqat” a khiatna in “tawlnga un,” “suakta- sak” “gamdai takin om” cihna hi. “Shaqat” kammal Joshua 11:23 in zangin, Joshua in gal a zawh khit ciangin leitang in galdona panin tawlnga hi, cih thu kipulaak hi. Hih kammal “shaqat” a khiatna kilemna ci-in Joshua leh Thukhente sungah kigelh hi.

 

“Raga” cih kammal in tawlngakna a pulaak kammal hi. Thuhilhkikna sungah Pasian langpan khak loh ding bang hang hiam cihleh tua bangin hi leh saltanna gamah tawldamna om lo ding hi, ci-in kihilhkhol hi (Thkna. 28:65). Hih kammal mah Jer. 50: 34 ah Topa in tawldamna hong pia thei ahihna thu hong hilh hi.

 

Thkna. 31:16 leh 2 Samuel 7:12 sim in. Bangci bang tawlngakna thute hong hilh hiam?

 

“Shakab” cih a khiatna in “kikhuangin lum” “ihmu” cihna hi. Pasian in David tawh a thuciamna-ah Pasian in mailam hunah Israel kumpi ding kamciam pia hi. Tua kamciam in Na nite cingin na pate kiang na zuat hun hong tung ding a, nangma khit ciangin na tapa in kumpi tokhom a luah ding hi (2 Sam. 7:12), ci hi.

 

I pulaaksa om bangin Hebrew laimal in tawlnga cih tawh kisai kammal tampi nei hi. Hih kammalte Lai Siangtho sunga kigelh tawlnga cih kammalte in a dang kammal khat leh nih tawh ahi zongin kizopna nei lo hi. Mimal khat kia ahih keileh mipi-in kitawlnga hi. Sabbath ni tawlngakna in Pasian sungah tawlngakna bek tawh ciangtan nei hi lo-in, pumpi taksa, mi tawh kizopna leh lungsim puak adingin thupha hi, cih hong hilh hi.

 

Sihna in ahihleh mihingte gal khat hi mah hi; ni khat ni ciangin hih sihna in beisiang ding hi. Hong nusia khinte hangin dahnin kapin om hi mah taleng, amaute in a tawlnga hi, cih thu tawh kihehnep ding banghangin thupi hiam?

 

 

WEDNESDAY                                      June 30

Thukhun Thak Hong Hilh Tawlngakna

 

Thukhun Thak sungah tawlnga cih kammal akimu mun mahmah khat in “anapauô” hi-in a khiatna in “tawlnga, tawldam, thaksuahkik” cihna hi. Jesuh thugenna a kithei mahmah “ Vangik pua-in a gim, a tawl mite aw, ka kiangah hong pai ta un. Tawldamna kong pia ding hi” (Matt. 26:45). Hih munah zong “anapauo” (tawldamna) kammal kizang hi. Korin pawlpi tungah a honpihna nunung penin Paul in ama naseppihte hong tung amuh ciangin amah mah in tha thak ngahin a lungdamna pulaak hi; hih munah zong (thaksuahkikna) “anapauo” kizang hi (1 Kor. 16:18).

 

Tawlnga cih kammal adingin a kizang a dang khat in “hçsychazô” hi. Hih kammal in Jesuh in hankhuk sungah tawlnga-in a om sung mahin a nungzuite in Sabbath ni-a tawlngakna a pulaak kammal hi (Luke 23:56). Tua banah “hesychazo” cih kammal in lungnuam takin om hithiata nuntakna (1 Thess. 4:11) leh mawhsakna thu tawh kipelhna – dai takin nunna a pulaak kammal hi (Sawl. 11:18).

 

Hebrews 4:4 sungah ni sagih ni-in piansakna panin Pasian tawlngakna thu hong hilh hi. Hih munah zong katapauô, Greek pau tawh kigelh Thukhun Lui sung a kammal kizang hi-in a khiatna in “ a sem nawn lo” “ khawlna” “ tawlnga” cihna hi. A lamdang veve khatah Thukhun Thak sunga kizang hih kammalte in Hebrew tawh kigelh Thukhun Lui sungah a om lo khat zong om lo hi.

 

Mark 6:30–32 sim in. Nasep ding maban tampi omlai hi napi-in, bang hangin Jesuh in a nungzuite tungah mun khatah pai-in tawlnga dingin sam hi ding hiam? Mark 6 sunga thupiangte a huampi-in ngaihsun in.

“Hong pai unla, tawlnga phot ding un” (Mark 6:31) cih thu in sapna hi lo hi; amaute zuih dingin thupiak ahi hi. Jesuh in a nungzuite pumpi taksa gimna tawlnate lunghimawh hi; amau lungnopna leh tawldam nading thupiak hi. Jesuh sawlna bangin amaute in nihta nihta-in kuankhia-in, tua panin Jesuh kiang hong tunkik uh hi (Mark 6:7). Amaute in lungdam kipak takin hong ciahkik uh hi ( Mark 6:30). Amaute in lungdamna tawh kidim uh hi. Lawpsapna leh lawhcinnate Jesuh tungah a pulaak kal ding hun ngaklah mahmah uh hi. Ahi zongin Jesuh in amaute in mun khatah pai-in tawlnga dingin thupia hi. Mark in hih bangin hilhcianna nei hi: “Tatsat lo-in mipi hong pai ahih manin annek hun ding om lo hi”( Mark 6:31). Nungzuite in tawlngak hun ding om man lo-in tatsat lo-in nasem uh hi. Jesuh in pumpi leh lungsim cidamna kul ahih manin tawlngak hun kisam hi, ci-in hong hilh hi.

Pawlpi siate leh upate ahih keileh Pasian nasem mi khat peuh in gimin tawlin a om loh nadingun bangci lampi tawh huh thei ding na hiam? Amaute nasepna hangin lungdam pulaakna leh a tawldam nadingun bang na huh thei hiam?

 

 

THURSDAY                                                          July  1  

Tawldamna Mu Lo A Vakvai Mi

 

Pian. 4:1–12 sim in. Bang thu in Cain a vakvai mi suaksak hiam? (Pian.

4:12)

 

Pasian in Abel biakpiakna thupi-sim a, Cain biakpiakna thupi-sim lohna thu kilang-tangtakin Lai Siangtho in pulaak lo hi (Pian. 4:4, 5). Ahi zongin Pasian in bang hangin Abel biakna sangin Cain biakna nial hi, cih thu i thei hi. Cain in Pasian mai-ah hong pai-in meihal biakpiakna tawh kisai ama lungkimlohna thute leh Pasian kamciam bangin biakpiakna a deihlohnate pulaak hi. Ama biakpiakna in mawhna hangin kisikna kihel lo hi. Tuhun mi tampi mah bangin Cain in Pasian geelkholhsak bangin biakpiakna pia dingin thaneem kisa hi; Honpa tungah kinga-in hotkhiatna ngah ding cih pen muang zo taktak lo hi. Cain in mihing kimuanna lampi tawn dingin khensat hi. Ama phatna suang hi.”Ellen G. White, Patriarchs and Prophets, p. 72.

 

Pasian in Cain in a vakvai mi khat suak ding hi, ci-in a pulaak ciangin, tua bangin a nungta dingin Pasian in a bawl hi lo hi; ahi zongin ama gamtatna leh a thuman lohna gah a at kik hi. Cain in Pasian sungah tawldamna mu lo ahih manin mundangah zong tawldamna taktak mu zo lo hi.

 

Hebrew kammal ah “thupi-sim” a khiatna in “ limtak en, limtak ngaihsun, kidawmin gamta” cihna hi (Pian. 4:4) Pasian in a thupi-sim, limtakin a et in biakpiakna vanzatte hi lo-in biakpiakna a pia mite lungsim puakzia hi. Pasian in Cain biakpiakna a sang loh manin Pasian in a khel, a gilo Pasian hi, cihna hi lo hi. Biakpiakna a pia-te lungsim puak, gamtat zia le tong, bang thu siksanin biakpiakna pia cihte Pasian in limtakin sittel hi. Sittel thukhenna- ah zong tua bangmah hi.

Pian. 4:13–17 sim inla, Cain in Pasian thukhenna amuhzia ngaihsun in.

Pasian kiang panin taikhia dingin a hanciam mi in tawldam ngei lo ding hi. Pasian hehpihna ngah dingin leitung van le nate, lawm leh gualte, ahih keileh manlahna tawh ngahsawm dingin i hanciam hi. Cain in ama minthan nading leh khuapi khat lam kipan hi. Hihte in minthanna leh zawhna khat hi. Ahi zongin Pasian kihel lo ahih manin Pasian a langpan minthanna leh khuapi khat hong suak hi. A tawpna-ah bangmah lo-in beimang hi.

 

I mawhna hangin gimthuakna om taleh singlamteh tungtawnin mawhmaisakna thu bangci bangin na sang thei hiam?

 

 

FRIDAY            July 2

Ngaihsutbeh Ding: Rabbis tuamtuamte in biakpiakna manphatna pen manlahna tungah khensat uh hi. Upna picinna pen pualam hoihna tungah koih uh hi. Tua hangin amaute in Pasian tawh kigamla uh hi; amau leh amau hoihna tungah kinga uh hi.Tua bang lauhuai-nate tu-in zong a omlai hi. Mi khat in Pasian ading nasepna-ah manlah tawntung hileh nasep lawhcing bangin kingaihsun hi. Hih bangte-ah mihing geelna leh lawhcinnate hangin lauhuai-na piangsak thei hi. Thungetna tawm, upna neu semsem thei hi. Nungzuite mah bangin Pasian tungah kinga dingin kimangngilh a, a hong honkhia ding i zong kha zel hi. Eite in tatsat lo-in Jesuh i mitsuan ding kisam hi; Ama vangliatna in hong zawhpih ding hi, cih i phawk ding kisam hi. A mangthang mite hotkhiat nasepna-ah hanciam theihzahin hanciamin nasepna- ah, ei mimal ading thungetna, Pasian Kammal tungah lungngaihna, Lai Siangtho kantelna hun kisam hi. Thungetna tampi leh Khrih dikna tawh kisiansuahna in nasep hong zawhpih ding hi; tua mah in a tawpna-ah lungkimna hong pia ding hi.” Ellen G. White, The Desire of Ages, p. 362.

 

 

Kikup Ding Dotnate

 

1.             Nasep manlahna, maban sep ding hauhluatna, tatsat lo-in mite ading hun piakna, mite pahtak dingin hanciamnate in a deihhuai pen hi lo banah Pasian hong sawl zong hi lo hi; tua bangin gamtatnate in pumpi taksa, lungsim ngaihsutna leh upna susia thei hi. Koi bangin na pawlpi in nasem a gimte adingin tawldamna, lunggimte lungnop a ngahna mun hi thei ding hiam?

 

2.             Tatsat lo-in Pasian ading nasepna leh na hoih semin kitaklahin hun tawlngak hun a om thei lo ding mah ahi diam? Jesuh leh a nungzuite thu – Mark 6:30–32 ngaihsun in. Hih thu in na nunzia ding bang hong hilh hiam? Na lawmte tawh kikum in.

 

3.             1899 kumin mawtaw a manlang penpen nai khat sungin tai 39.24 tungzo hi. Tu-in ahihleh tua sangin mawtawte in manlang zaw hi. Phone zatte, computer zatte tuma kum 100 laihunte tawh tehtheih ding hi nawn lo hi. Vanleng zong nidangte sangin manlang zaw vive hi. I gennop thu in nidanglai vanzatte sangin tuhun vanzatte in manlang zaw hi. Ahi zongin tatsat lo-in manlahin, a kisamzah tawlngak hun i nei thei tuan kei hi. Hih thute in mihing pianzia bang hong hilh a, bang hangin Pasian in a thupiakte sungah tawlngak hun thupi-in koih hi ding hiam?

 

4.             Mawhna a pianma Eden ah Sabbath tawlngakna om khin cihthu ngaihsun in. Lai Siangtho thuthuk hong hilhnop thu tampi a om banah mawhna om lohna, kicinna tawh kidim leitungah zong tawlngak hun in bangzahin thupi hi, cih hong hilh hiam?