Shinell
Davis, 29
Amah
in Pasian hi
Ka tanu kum 10 Shakira in kahlei tung khat panin kia-in tua a kipan a nungzang nasa hi. Zatui ne, kimeksak taleh dam zolo hi. Nipi kaal khat sung val khin dam thei tuan lo hi. Tua ciangin zato-ah kilak dingin ka paipih uh hi. Siavuante in a natna ading zatui tampi hong pia uh hi.
Shakira in an ne thei nawn lo hi; a gil hong
gol semsem hi. Siavuante genna-ah a
natna pen cancer natna hi, ci uh hi. Kikhei ahih hangin Shakira a lungnuam
mahmah hi. Zato lum cina khempeuh lak pan a lungnuam pen dingin hanciam
hi.Siavuante’n zong it thei mahmah uh hi. Kum khat khit ciangin a cancer natna
damsiang hi, cih mu uh hi.
Inn a tun khit tawlkhat khit ciangin cancer
natna hong suak kik hi. Zato ah tawl khat sung ka om uh hi. “ Ka gilna, ka
nungna, ka khe na”ci-in tau tawntung hi. Natna tawh kidim hi. Siavuante in ki-at ding vaihawm uh hi.
“ Nu, kei ki-at nuam keng”
A nu in, “Ki-at kei lecin na natna dam lo ding hi,”
ci-in dawng kik hi. Shakira a ki-at khit kha khat khit ciangin si hi. Shakira
nu in hong zasak phetin zato lam zuanin ka pai vingveng hi. Zato ka tun ciangin
ka khitui hong luang hi. Shakira nu ahihleh kah lo hi.
“Nu aw, bang khialhna om hiam, ci-in sihvui
thugenna-ah dong hi. Anu in “Bang hangin kap lo-in om thei ding ka hiam? ci-in
dawngkik hi. Kha li khit ciangin, a nu
khe bawkgawp hi. Nipi kaal nih sung zato lum hi. Siavuante in lungkiat natna nei
hi, ci-in kibawl ding gen uh a, ahi zongin a Nu in nial in. Kha guk khit
ciangin a nu si hi.
Ka sanggamnu hong nusiat khit a sawt
lo-in ka nu in zong hong nusiat ciangin ka lungkia mahmah hi. Lungkhamna hong
khang semsem hi. Ka sanggamte khat Mark hong hawh thei pahpah a, hong hawhteh
nuam tuam kasa hi. Ka nu leh ka sanggamnu hong nusiatna hangin
dahna tawh ka kidim hi. Ka nu hong nusiat khit ciangin tua ka sanggampa
khat zong mawtaw tuahsiatna tawh hong nusia hi. Dahna, khitui luanna in hong
vukcip hi.
Ka lawmngaihpa khut, a awm, a nungzang
leh a pumpi tung khempeuhah tattoos tawh kidim hi. Tattoo pen na mahmah hi. Tua
bangin pumpi taksa natna hangin ka lungkhamna hong kiam dingin ka ngaihsun hi.
Ka nak tungah tattoo ka koih hi. Nak a tattoo tawh lungsim zo lo-in ka bil
tungah zong tattoo ka bawl hi. Tua banah ka awm ah zong ka bawlbeh hi. Ka pum
tung khempeuh a na tawh hong kidim hi.
Ni khat phone hong lutin na lawmngaihpa
tuikia-in hong sihsan hi, cih hong kigen a, ka um thei kei hi. Ka nu, ka sanggam
nu leh ka sanggampate ka phawkkik hi. Tu-in ka lawmgngaihpa in hong nusia
sawnsawn hi. Ka awng gawp nuam hi. Ka nasepnate ka zasak a, nasem kuan zo lo
ding cih ka zasak hi. Zato-ah pai a, ka lawmpa luang ka lakkhiat kul hi. Ka
nasepna pa in ka sanggamte tate khat Marc in hong dawn inteh, ci-in hong zasak
hi. “Aman hong paipih ding hi,” ci-in
hong zasak hi. Ka lawmngaihpa luang ka muh ciangin ka lungmang hi. Nuntak ding
ka ngap kei hi. Kha li khit ciangin nausia-in ka om hi. Ka nuntakna in khuamial
tawh kibang hi ahi zongin Marc hong
makaihna tawh ka masuan hong kihong zawdeuh hi. Nisim phialin hong hawh a, Lai
Siangtho thu hong sinpih hi.
“John
3:16 na sim ngei hiam, ci-in hong dong hi. “Pasian in leitung mite hong it
mahmah ahih manin a ta khat neihsun a hong pia hi. Amah a um mi khempeuh in
kisia lo-in tawntung nunna a ngah ding uh hi.” Ni khat March in a innah hong paipih hi. A pa tawh kiho-in ka
lunggimnate ka pulaak a, a nu le pa in limtak hong ngai uh hi. Tua khitteh, “
Gen nop thu khat peuhpeuh na neih ciangin hong hopih in, ci-in a phone nambat
hong pia hi. Pasian ading na hun pia in. Pasian in nang ading geelna khat nei
hi, ci-in tha hong pia hi.
Tua
a kipan March nulepa kiangah ka zawh zelzel hi. Amau tawh kiho nuam ka sa hi. Pasian thu a
hong hilh thute zaknop ka sa hi. Amau
tawh biakinn ah kikhawm dingin ka zui thei ding hiam ci-in ka dong hi. “ Hong
zui ve” ci-in ken zong zuih ding ka ngaihsun hi. Marc in ahihleh bangmah pau lo
hi.
Sabbath ni hong tungin Marc leh a
nulepa tawh biakinn ah pai-in ka kikhawm uh hi.
Tua bangin nipi khat khit nipi khat kikhopna-ah ka zui a, lungnopna ka
ngah semsem hi. Ka zak thugennate in ka nuntakna hong lawngkha mahmah hi. Ka
natnate hong kiam hi. Nisimin Lai Siangtho leh Sabbath School lesson ka simsim
hi; nuntak khuasakzia ding tampi hong lak ka mu hi. Sabbath ni khat thugensia
pa in Jesuh tungah kipia-in kituiphum nuam na om uhleh ci-in a pulaak ciangin
kei zong thakhatin ka ding pah a, kituiphum ding ka pulaak hi. Jesuh ading ka
nungta nuam hi; Marc zong kituiphum ding hong khensat hi.
Marc pen a kikhop loh kum 5 bang val
khinta, cih hong kigern a, tua bangin kituiphum a biakinn hong pai amuh uh
ciangin a nulepa in lungdamna tawh kidim uh hi. A nulepa in Marc kikhel
nadingin thungen tawntung uh hi. Ka kituiphum ni uh kibang hi. Kha 11 khit
ciangin ka kiteeng uh hi.
Khat veivei ciangin mi kimkhat
in, “ ka thuak hamsatnate thei kei
teh,”hong ci uh hi. Tua bangin hong kihopih ciangin ka thuak thute a banbanin
ka gen ciangin um ngam lo liangin, na takpi maw, ci-in hong dong phapha uh hi.
Tua bangin genthei takin na om khit ciangin nungta thei veve maw, ci-in hong
dong uh a, hih bangin ka om theihna pen Pasian hang bek mah hi,” ci-in ka
dawngkik hi. Pasian in nunna thak hong pia hi.
Tu quarter Sabbath School 13na sumpi
pen University of the Southern Carribean ah kipuak ding a, “Center of
Influence” ding kivaihawm a, hih mun panin Pasian nasem dingin thusin nading
kizang ding hi.
MUC in
tu quarter Sabbath School 13na sumpi minpuasakin Tuikhing pawlpi huang ki-umsak
hi.
