Sabbath Nitak
Tu Kaal Sung Sim Ding: Thkna. 1:29–31; Hos. 11:1. Mang.5:9; Thkna. 29:10–13; Pai. 19:5, 6; Rom. 6:1, 2; Mang.14:12; Rom. 10:3.
KAMNGAH: “Nangmah mah in Egypt tunga ka hihsa leh muvanlai kha tungah hong pua-in ka kiang kong tut na mu khin hi.” (Paikhiatna 19:4).
Naupangno sagih lakah khat in tuahsiatna hangin zato kipuak hi. Bawngnawi hai khat simloh bangmah dang nek ding nei lo uh hi. Bawngnawi hai khatval nei ngei lo hi. Hai khat a ngah uhteh a tate nih in hawmin dawnkhawm uh hi. A dawn masa in a vekin a dawnkhak loh ding kidawmtakin dawn kul hi. Tawlkhat khit ciangin zato-ah nuamtakin om thei a, zato siamahte’n hai gol mahmah dim khat bawngnawi hong tawi uh hi. Ama’n zong tua hai limtak en a, a vekpi-in dawn ngam lo-in bang zah ka dawn thei ding hiam ci-in zato siama nu dong hi. Siama nu in “ka ta aw, a vekin dawnkhin in,” dawngkik hi.” H. M. S. Richards, “Free Grace,” Voice of Prophecy News, June 1950, p. 4.
Hih naupangpa bangin nidang Israelte a kipan eite in zong hotkhiatna tuikhuk panin i duh zahzah a dawn thei ihi hi. Israelte in kum zalom tampi sung saltanna leh nenniamna panin Pasian hehpihna hangin suahtakna a ngah uh hi. Tua suahtakna sungah mawhna pan suahtakna zong kihel hi.
Tukaal Thusin A
Huamin Etna: Pasian in Israelte tawh a kizopna bang limcinna tawh pulaak hiam?
Koi bangin Egypt pan paikhiatna leh Sinai in hotkhiatna thu tawh kizawitawn
hiam? Sinai thuciam sungah thukham in bang panmun nei hiam?
SUNDAY May 9
Muvanlai-Khatungah
Minam khat ahihna uh tawh Israelte in Egypt biakna sungah kidiah khin uh a, kum za lom tampi sung tua bangin nungta ahih manin amau Pasian thu theihtelna, Ama deihna leh Ama hoihnate bangmah nei nawn lo uh hi. Koi bangin Topa in Ama kiangah Israelte tunpihkik hiam?
A masa-in Topa in Israelte a it takpi-na a kilangsak hi; lamdang takin a hotkhiatna tungtawnin Pasian in a mite a itna kilangsak hi. Amaute in Topa thuciam sungah itna tawh a nungta dingin Topa mahmah in lampi a honsak hi. Amasa-in Pasian in Sinai-ah amaute aitangin na lianpi asepnate a phawksak hi.
Topa in Egypt panin Sinai a tunpihna thu in bang thu nih hong hilh hiam? Israel hi taleh ei mahmah tungah Pasian in a mite tungah a lungsimpuak bang hong hilh hiam?
Pai. 19:4, Thkna. 32:10–12 ________________________________________
Thkna.. 1:29-31, Hos. 11:1 ________________________________________
Hih thupiangte in Pasian in eite cihmawhna khempeuh hong mutel ahihlam hong hilh hi. Late 103:13, 14 sim in. Muvanlai leh nulepa in tate pua-in aomna uh in Pasian in a mite nopsak nadingin a lunghimawhna thu hong hilh hi. Ama hong deihsakna bangin eite khempeuh a picing thei dingin lungduai takin hong huh hong panpih a, hong hu, tha hong guan hi.
“Ganhing dangte bang lo-in muvanlai in a tate pantahzia lamdang mahmah hi. Hih vasate in mualsangdawnah teng uh hi. A tanote limtak a lentheih nadingun a pite in amau pumpi tungah a tano pua uh a, Sinai mualdawn panin lenkhiatpihin tunglam a sang theithei-ah lenpihtoh khittteh a nuailamah a khiasuk hi. A tano ngeklai-in a len theih nai keileh a pi in a nuailam panin dawntuahin a pumpi tungah pua-kik hi. Tua bangin a pi in a tano lentheih nading pantahtah hi. Pasian hong hopihna aw in, “Kei mahmah in Egypt panin note kong pusuahpih hi.” George A. F. Knight, Theology of Narration (Grand Rapids, MI: William B. Eerdmans Publishing Company, 1976), p. 128.
Pasian in mihingte a hong itna leh mihingte khatlekhat ki-itna tehkak in. Ama hong itna in midangte i itna a hong huzaap ding hi lo ahi hiam?
Na nuntakna sungah
Pasian in angsung khual lo-in eite hong itna a kilangsak thu na phawk hiam? Na
tuahkhak ngei thute ahi zongin, nangma ngaihsutna panin ahi zongin, na
kimlepaam ngeinate panin ahi zongin Pasian hong itna na muh thute ngaihsun in.
Tua thute na lawmte tungah hawmsawn in.
MONDAY
May 10
Hotkhiatnathuluanzia
“Tua ahih ciangin Israel mite’ tungah, ‘Kei pen Topa ka hi hi. Egypt mite’ na na sepna uh panin note kong paikhiatpih ding hi. Amau’ sal hihna panin note kong khahkhia ding a, a thahat ka khut zanin thukhenna nasep lian tawh note kong honkhia ding hi. 7Keima mi dingin note kong la ding a, kei pen note’ Pasian ka hi ding hi. Egypt mite’ sila hihna panin note a hong paikhiatpih pa, Topa na Pasian uh ka hihna note in na thei ding uh hi” (Pai. 6: 6,7)
Hih kammalte ngaihsun in. Pasian in mihingte tawh a hong kizopna thuciam tawh kisai bang thuguipi na mu hiam? Bang kammalte kipulaak kikkikhiam?
_______________________________________________________________
_________________________________________________________________
Israelte in Egypt gam saltanna panin a suahtakna uh leh Noah leh a innpihte in Tuicin panin a suahtaknate in Moses pulaak hotkhiatna thu hong hilh uh hi.Hih thupiang nihte in hotkhiatna thu sintheihna lam hong lak hi. Egypt panin Paikhiatna in hotkhiatna thuluanzia a phungpi hi. Pasian in Moses tungtawnin Israel mite tungah “ Keimah in note kong honkhia ding hi”(Pai. 6:6). Amah in “Keimah in note tanaubul tankhia pa ka hi ding hi” (go’el) ci hi.
“Tankhia”cih kammal in (Pai. 6:6) a innkuanpih khat in saltang ahi keileh leiba lohzawh lohna khat nei-in sila suak ding khat va tan cihna hi. Israel in amah tanaubul tankhia ding kuamah nei lo hi; ahi zongin Pasian mahmah in Israel tanaubul tankhia pa hong suak hi.” Bernard L. Ramm, His Way Out (Glendale, CA: Regal Books Division, G/L Publications, 1974), p. 50.
Koi bangin Pasian in a mi saltangte “tankhia” “leikik cih thu na thei hiam? Tua dingin bang a piakkhiat kul hiam? Tua in mihing manphatna bang pulaak hiam? (Mark 10:45, 1 Tim. 2:6, Mang. 5:9.)
_________________________________________________________________
_______________________________________________________________
Pai. 3:8 sungah “Pasian in Israelte tankhia dingin a hong tuaksuk hi” ci hi. Hih in Pasian in mihingte tawh a hong kizopna pulaak Hebrew kammal hi. Pasian in vantungah om a, eite in ihihleh leitungah i om hi. Pasian bek mah hong tuaksuk a, eite a hong honkhia in Amah hi. Tua hi-in Pasian in eite a hong tankhiat nadingin Jesuh mahmah hih leitungah mihingin hong suakin, hong nungta-in, gimna thuakin sihna thuakin sihna pan hingkik hi. “THU in mihing hong suakin eite lakah a hong nungta hi” (John 1:14), Pasian in mihing hong honkhia dingin leitungah hong nungta hi
TUESDAY May 11
Sinai Thuciam
Paikhiatna Bu sunga thu piang thumte i ngaihsut dingin thupi hi. Mual thum mah bangin Paikhiatna thu, biakbuk kilamna thu cihte in leitung thupiang bangin thupiang mawkmawkte hi lo hi. Thuciam kipatna thu Paikhiatna 19- 24 sungah kigelh a, Sinai Mual tungah kibawl thuciam thum kimu thei hi. Tua thuciam tawh kipawl thupiangte khat khit khat a banbanin kipulaak hi. Pai. 19-24 sung na simkhin zo kei zongin a nuai-a thupiangte kizopzia ngaihsun in.
1. Topa in Israelte a hotkhiat khit ciangin amaute in Sinai hong tung uh a tua munah giahphualsat uh hi (Pai. 19:1, 2).
2. Pasian in Israel mite tawh thuciam bawl ding a vaihawmna (Pai. 19:3-6).
3. Israelte in thuciam a sanna thu (Pai.19:7, 8).
4. Thuciam ngahna biakpiak nadingin kiginkholhna (Pai. 19:9-25).
5. Thukham Sawm pulaakna (Pai. 20:1- 17).
6. Moses in thuciam bawlna-ah palaai (Pai. 20:18-21)
7. Thuciam kingakna thu guipite pulaakna (Pai. 20:22 - 23:22).
8. Thuciam kipsakna (Pai. 24:1-18).
Hih thuciam in hotkhiatna thu adingin thupi mahmah hi. Hih thuciam in
Lai Siangtho sunga thuciamte lakah thuciam a li-na hong suak hi. Hih thuciam ma-in Adam, Noah leh Abraham cihte tawh thuciam om khin hi). Hih thuciam in hun dangte sangin Pasian mahmah a hong kilakna thuciam hi. Bang hang hiam cihleh biakbuk a meihal biakna khempeuh a hong kipatna hong suak hi. Tua hi-in biakbuk tungtawnin Pasian in a mite tungah hotkhiatna thu na hilh a, amaute tungtawnin leitung mite in hotkhiatna thu mu thei ding uh hi.
Topa in Israelte taksa saltanna Egypt panin amaute honkhia hi mah taleh, tua suahtakna sangin a thuk zaw suahtakna thu Topa in amaute tungah a theisaknuam hi. Amah in mawhna sung panin amaute a honkhia-nuam hi; a tawpkhakna saltanna panin suahtak nadingin, biakbuk sung meihal biaknate limcinna leh genkholhnate’n a pulaak uh Messiah kipiakna tungtawnin kingah ding hi. Saltanna pan a suahtak khit uh a sawt lo-in thukham, biakbuk kilamzia ding leh biakpiakna thukhamte kihilhpah a, tuate tungtawnin Pasian in hotkhiatna thu hilh hi. Hih in thuciam a khiatna mantak leh thuciam deihna taktak hi. Thuciam in mimawhte hotkhiatna ding thuciam hi keileh tua thuciam in bangmah kimanna nei lo hi. Hih thuciam in Eden huan sung panin a kipan thuciam ahih mah bangin Sinai-a thuciam in zong hotkhiatna thuciam hi.
Bang hangin Pasian leh Israelte kikalah thuciam kisam hi ding hiam?
Thuciam in kizopna pulaak ahihna thu Thkna. 29: 10-13 sung enpha in.
WEDNESDAY May 12
Pasian Leh Israel
“Tua ahih ciangin tu-in note in ka thu mangin ka thuciamna na zuih uhleh mite khempeuh lak panin note pen keima mi na hi ding uh hi. Bang hang hiam cih leh leitung khempeuh keima a’ hi a, note pen keima siampi nasep a sem minam, le minam siangtho na hi ding uh hi. Israel mite tungah hih thute na gen ding ahi hi,” a ci hi (Pai.19:5, 6).
Moses pulaakna-ah Topa in Israel suanlekhakte tawh thuciam bawl ding pulaak hi. Topa in amaute a sap hangin amaute deihtelna tungah kinga hi. Topa tawh nasemkhawm dingin deihtel theihna nei uh hi. Egypt panin a hotkhiatna-ah amau utna lungsim zong kisam hi. Topa gen bangin kongkhak tungah sisan baangsak ding ci-in a sawl thu mang nuam kei le-uh amau thu hi; Topa sawl bangin sem kei leh uh a suahta mite lakah kihel kha lo ding uh hi. Thu hamsa hi lo hi.Hih munah zong Topa in amaute tungah “ Note in na ut uh a, na ut kei uh zongin note in keima teeltuam a manpha mite, siampi nam na hi ding uh hi,” ci lo hi. Tua bangin amau deihtelna kihel lo-in Topa in sem lo hi; tua bangin Topa in ama hatna tawh sawl hi lo ahihlam zong hong hilh hi.
Pai. 19:5, 6 sim in. Koi bangin upna tawh hotkhiatna thu pansanin Topa pulaak thu na theitel hiam? Topa thupiakte nuntakpihna in hehpihna tawh hotkhiat ngahna nial ahi hiam? Koi bangin a nuai-a Lai Siangtho munte in hih dotnate hong theitelsak hiam? Rom. 3:19-24; Rom. 6:1, 2; Rom. 7:7; Mang. 14:12.
______________________________________________________________
______________________________________________________________
“Eite in Topa thupiak zuihna tawh hotkhiatna ngah ihi kei hi; bang hang hiam cihleh hotkhiatna in Pasian hong piakkhong taktak hi-in, upna tawh hotkhiatna ngah ihi hi. Ahi zongin thumanna in upna gah hi.” Ellen G. White, Steps to Christ, p. 61.
Topa in Israelte lamdang takin Egypt saltanna sung pan a suahtakpih bek tham lo-in a manpha Ama mi hi ding leh siampi nam hi dingin a lunggulhnate ngaihsun in. Tawlkhat sung suahtakna – Egyp pan suahtakna leh tawntung suahtakna tungah kinga-in Topa tawh kizopna panin Topa in amite dinmun sangah lamto-a, lungsim picinna leh gamtat hoih sungah a khangto dingin lamen hi; tua bangin nungta uh hileh namdangte lamdangsa ding uh hi. Pasian in amaute tungtawnin namdangte tungah hotkhiatna thu kizel ding ngimna nei hi.Amaute in tua sawlna a man ding uh kisam hi.
Koi bangin Topa tawh
mimal kizopna na nei hiam? Amah tawh na kizopna-ah bang thute na tuak khak
hiam? Koi bangin tuni thusin thute kilang thei hiam?
THURSDAY May 13
Kamciamte, Kamciamte . . . . (Pai. 19:8)
Amasa-in na khempeuh in hoihkim ding tawh kibang hi. Topa in a mite
honkhia hi; thuciam tawh kipawl kamciam zong pia hi; Topa in amaute tungah a piak thu khempeuh mang dingin amaute zong thukim uh hi. “ Vantungah kibawl thuciam hi lo hiam? A nuai-a Lai Siangthote sim in. Israelte in thuciam a dawnkikna uh bang hong hilh hiam?
Rom. 9:31, 32____________________________________________________
Rom. 10:3____________________________________________________
Heb. 4:1,
2__________________________________________________
Pasian in a hong sawl
bangbang sem ding leh Amah tawh kizopna khempeuh in upna tungah kinga hi. Upna
in a bulpi hi-in gamtatna in tua upna zui hi. Gamtatna in lungsim siangtho sung
pan hong phulkhia hi taleh, angsungkhual om lo gamtatna hi taleh gamtatna hoih
tawh kidim phial taleng siangtho Pasian mai-ah santhamcing hihna kingah thei hi
tuan lo hi. Israelte hunlai-in zongin tua bang mah hi-in tuhunin zong gamtat
hoihna in Pasian mai-ah santhamcing hong suaksak thei lo hi.
Ahi zongin Lai Siangtho in gamtat hoih ding limtakin hong hilh hi napi bang hangin gamtatna in Pasian mai-ah mi hoih hong suaksak thei hiam? Isa. 8 53:6; Isa. 64:6; Rom. 3:23.)
_______________________________________________________________
____________________________________________________________________
Hebrewte in amau thumanna hangin gamtatna tawh hotkhiatna ngah ding sangkhial uh hi; gamtat hoihna pen hotkhiatna gah ahihlam phawk lo uh hi. Amaute in thukham tungtawnin diktansakna ngah ding hanciam uh hi; Pasian diktansakna ngah ding ngaihsun kha lo uh hi; Pasian diktansakna pen upna tawh kingah ahihlam thei lo uh hi. Sinai thuciam in thukham leh thuhilhna tampi gen a, hih thute in hehpihna hang a thuciam pulaak hi. Hih hehpihna thuciam in a khawngkhongin a hong kipia hi-in, a pom mite lungsim khelin thumanna-ah a makaih hi. Thumang dingin a hanciamna uh in khialhna hi lo hi (thuciam in thumang dang kal hi); a khialhna uh in bangci bang thumanna hiam cih ngaihsun kha lo-in, tua bangin thukham zuihna tawh diktansakna ngahin a ngaihsut uh ciangin thumang taktak hi lo uh hi. Hih thu pen amaute nunzia in pulaak hi.
Romans 10:3 limtak ngaihsunkawmsa-in sim in. Paul in bang thu pulaak hiam? Amau gamtatna tawh diktansakna ngah ding a hanciam mite tungah bang thu piang hiam? Bang hangin tua bangin hanciamnate in mawhna, diktat lohna leh langpanna-ah tunpih hi ding hiam? Nang le nang kisittel in. Eite zong amaute khekhap zui-in lauhuai dinmunah om kha hi lo i hiam?
FRIDAY May 14
Ngaihsutbeh Ding: Ellen G. White, “The Exodus,” pp. 3 281-290; “From the Red Sea to Sinai,” pp. 291-302; “The Law Given to Israel,” pp. 303-314, in Patriarchs and Prophets.
“Biakna thukhunte tungtawnin kawkbaang lo-in nuntak ding hanciamnate, eima hatna tawh hanciamin thukham hong kalh khempeuh tangtun zawhsawm ding hanciamnate in saaltanna khat hi. Abraham tungah thuciam sung bekah eite adingin lametna om hi. Hih thuciam in Khrih sungah upna tawh hehpihna thuciam hi. Abraham tungah a kigen hotkhiatna thu in tuhuna a kigen eite lamet hotkhiatna thu mah hi. Abraham in Jesuh mitsuan hi; Jesuh in eite upna Pankhia Pa leh eite upna mongdong a hong Tunpih Pa hi.” Ellen G. White Comments, The SDA Bible Commentary, vol. 6, p. 1077.
“Egypt gamah saltangin a om sungin Israel mi tampite in Pasian thukham bangmah thei nawn lo uh hi; milim biakna leh amaute ngei-nate tawh kidim uh hi. Pasian in amaute Sinai-ah paipihin amaute zakin a thukham a pulaak hi.” Ellen G. White, Patriarchs and Prophets, p. 334.
Kikup ding dotnate:
1. Bangci bangin kizopna thuciam in Israel mite adingin pumpi suahtakna leh upna thu-ah suahtakna lampi hi thei hiam? Siam. 26:3-13 leh Thuhilhkikna 28:1-15 enkak in.)
2. Pai. 19:5, 6 simkik in. Topa pulaak thu ciamteh in, “Leitung khempeuh in keima neihsa hi.” Bang hangin Topa in Israelte tawh thuciam a bawlna-ah tua thu pulaak hi ding hiam? Hih thu a khiatna, koi bangin Sabbath thuman in hong theitelsak hiam?
3.
Pasian hong hehpihna bek in i mawhnate hong maisak
hi, ci-in i thei hi. Koi bangin Pasian hehpihna in upna leh thumanna tawh
nuntakna-ah nasemin panmun nei hiam?
Tomkimcing: Pasian in Israelte
tawh Sinai-ah hehpihna thuciam bawl hi. Topa in amaute tungah Ama itna leh ama
kepna lamdang takin lak hi; Egypt saltanna pan a honkhia hi. Pasian in amaute
tawh thuciam bawl dingin sam a, tua in amaute suahtak nading ahi hi. Israelte
in Topa sapna zui uh hi napi itna tawh upna mantak nei zo lo uh hi. Amau
tangthute en lehang Pasian tawh amaute thuciam paizia thei lo-in gamtatna tawh
hotkhiat ngah dingin ngaihsun uh a, siatna sung tung uh hi. Eite in Israel
khekhap zui ding ihi kei hi. Mawhneite tungah hong kilang a lamdang hehpihna
nawlkhin ding hi lo hi.
