Sabbath Nitak:
Tu Kaal Sung Sim
Ding: Pian. 15:1–3, Isa. 25:8, 1Kor. 2:9, Mang. 22:1–5, 1Pet. 2:9, Pian.
11:4, 12:2.
KAMNGAH: “Hun bei dongin note a hong ompih tawntung ding ka hihna thu phawk ta un,” a ci hi” (Matt. 28:20).
Kum 10 a pha numei-no
khat in a pa tawh tuipi gei khatah hun nuam zangkhawm uh hi. Ni khat tuipi
sungah tuipek dingin pai uh hi. A pata-un tuipeksiam uh hi. Tawlkhat khit
ciangin tuinawl tawh kigamla uh hi. A pa in tuihual in a nihun a thukna lamah
kai suksuk ahihlam hong phawk hi. A tanu sam a, “ Mary, tuigei lamah huhna ngen
dingin va pai ning. Na gim ciangin thallup in. Tua hileh suun thapaai na om zo
ding hi. Nangma kiang kong pai kik ding hi,” ci hi.
Tuikia honkhia ding a kikoih mi kimkhat in tua numei-no honkhia dingin hong pai uh hi. Tuigei-a mite in numeino a honkhia zo ding hiam, cih thu za nuamin ngakin a om uh hi. Nai 4 sung bang tua numeino in tui tungah thallupin om hithiat amu uh hi. Amah honkhia dingin a pai mite lungdam kipaakin khitui luangin om uh a, numeino in lau hetlo-in om hithiat hi. Tua bangin om amuh ciangin numeino in lamdangsa hi. Amah honkhia dingin a pai mite tungah “ Ka pa in na thallamin om lecin suun thapaai tui tungah na om zo ding hi. Ka hong pai kik ding hi, cih hong kamciam tungah kinga-in a lungmuang ka hi hi,” ci-in a dawng kik hi. H. M. S. Richards, “When Jesus Comes Back,” Voice of Prophecy News, March 1949, p. 5.
Tukaal thusin a
huamin etpakna: Bang hangin Topa in Amah mah Abram kidalna luum suak thei hiam?
Koi bangin Abraham tungtawnin leitung minam khempeuh in thupha ngah ding hiam?
Thuciamna tawh kipawl kamciam lianpen in bang hi ding hiam?
SUNDAY April 25
Nangma Kidalna Luum
“Hih thute khit ciangin mang sungah Topa’ thu Abram’ tungah hong tung a, “Abram aw, lau kei in. Keimah in lauhuaina panin nang ka hong hu ding a, na thaman lian mahmah ding hi,” a ci hi” (Pian. 15:1).
Pian. 15:1–3. Bang thu siksanin tua thu kipia hiam? Bang hangin Topa in Abram tungah “Lau kei in,” ci-in hopih hi ding hiam? Abram in bang lau-na nei hi ding hiam?
_______________________________________________________________
_________________________________________________________________
Topa in Abram tungah “Keimah in nangma kidalna luum ka hi ding hi,” cih thu in manpha hi. Amaute kikal kizopna in mimal khat le khat kizopna bangin a kip kizopna hi, cih hong hilh hi. Tua bang mahin Topa in eite tawh kizopna deih hi.
Lai Siangtho sungah Pasian Mahmah in kidalna luum bangin a pulaak masakna hi; tua lo Lai Siangtho mundangte-ah zong tua bang mahin kipulaak kik hi (Thkna. 33:29, Late 18:30, Late 84:11, Late 144:2).
Pasian in kidalna luum ka hi, ci-in Amah leh amah a kipulaak ciangin a khiatna in bang hi ding hiam? Abram tungah a kigen thu pen ei ading hi nawn lo cih a om ding hiam? Tua kamciam ei adingin i la thei ding hiam? Hamsatna thuak kha lo ding cihna ahi ding hiam? Koi bangin ei adingin Pasian in i kidalna luumin hong om hiam? Koi bangin hih limcinna na tel hiam?
______________________________________________________________
_________________________________________________________________
“Khrih in i kalsuanna khempeuh hong thei nuam mawkmawk hi lo-in nu in a ta ading a deihsakna sangin Topa hong deihsakna in lian zaw hi. I Honpa in gimna, gentheihna, simmawhna, leh sihna tawh a hong lei hi. Amah in nangmah a hong kem hi; nangmah a hong vil tawntung hi. Ama hutna sungah lungmuang takin na om ding hi. I thaneemna in vantung i Pa tawh kizopna a hong khaktan kei hi. Ahi zongin Khrih in eite ading mawhthuumna nei dingin sihna a hong thuak hi. Ellen G. White, Sons and Daughters of God, p. 77.
Rolando in a citak
Topa nungzui khat hi, cih pen a veng a paamte theih mi khat hi. Lamet khak loh
laitakin si hi. I kidalna luum Topa in koih ah om hi ding hiam? Ahih keileh
Topa in eite kidalna luum cih thu a khiatna in a tuam dang khat hi ding hiam?
Bang panin Pasian in eite hong hu dingin hong kamciam hiam? 1 Kor. 10:13.
MONDAY April 26
Messiah Hong Pai Ding Kamciam: Khen Masa
“Na suanlekhakte leilak leivui zah pha ding a, nitumna lam leh nisuahna lam, leilu lam leh leitaw lamah na kizelthang ding uh hi. Nang leh na suanlekhakte thupha kong piak bangin leitung minam khempeuh in thupha a ngahna dingun hong ngen ding uh hi’ (Pian. 28:14). “Khrih tawh na kipawl nak uh leh Abraham’ suante na hita uh a, Pasian’ hong khap thute a ngah ding na hi uh hi,” (Gal. 3:29).
Topa in Abraham tungah na suanlekhakte tungtawnin leitung minamte in thupha ngah ding uh hi, ci-in pulaak kikkik hi (Pian. 12:3, 18:18; 22:18). Hih a lamdang thuciam pen kipulaak kikkik hi. Bang hang hiam cihleh kamciam khempeuhte lak pan hih kamcian in a kip tawntung kamciam hi; hih kamciam in a dang kamciamte manpha-sak hi. Hih kamciam in Jew minam a hong khankhiat nading kamciam hi; amaute tungtawnin Topa in Ama hotkhiatna thu leitung minamte a hong hilh ding leh Ama hotkhiatna kilangsak ding hi. Ahi zongin hih kamciam in Jesuh sungah a hong tangtung ding ahi hi. Amah in Abraham panin a hong khangkhia hi. Amah in leitung mi khempeuh mawhna thaman pia dingin Singlamteh tungah sihna a hong thuak hi.
Tuicin khit ciangin leitung in tuicin tawh kihahsiang nawn lo ding hi, ci-in thuciam ngaihsun in. Jesuh sungah hotkhiatna lo-in hih thuciam in bang kimanna nei ding hiam? Jesuh sungah tawntung nunna lo-in kamciamte in khiatna nei ding hiam? Koi bangin Jesuh hangin Abraham tungtawnin minam khempeuh in thupha ngah ding uh hi, cih thu na tel hiam? Hih in a khiatna bang hi ding hiam?
_________________________________________________________________
__________________________________________________________________
Leitung Honpa hong khangkhia ding hi, cih Pasian kamciam in Ama kamciam khempeuh lakah a lian penpen kamciam hi. Tua thuciam a tangtun nadingin Honpa Mah in ahong sem hi. Jew ahi a Gentile ahi zongin Amah tawh a kizom mi in Abraham innkuanpih taktak hi; kamciam a luah mi ahi hi (Gal. 3:8, 9, 27–29). Gimna, sihna aom nawnlohna munah tawntung nunna tawh a nungta ding kamciam hi. Hih kamciam sangin a hoih zaw kamciam a om hiam?
I lunggulh mawhna,
gimna om lo tawntung nunna thu in bang thu hong hilh hiam? Tawntung nunna a
lunggulh thei dingin hong kipiangsak ahi hiam? Na khat peuhpeuh deihtheihna pen
i pianpih ahi hiam?
TUESDAY April 27
Messiah Hong Pai Ding Kamciam: Khen Nihna
‘‘Nopna sungah a nungta dingin khual gamla zinkhiat kul hi; eima deihna mah panin paikhiat kul hi.” Thomas Browne. Hih thu in kum 1600 kimlai-a kigelh hi. Na thukim hiam, ahih keileh na thukimpih kei hiam? 1 Thess. 4:16–18 leh Mang. 3:12 siksan in.
Augustine in mihing pianzia hih bangin gelh hi: “Hih i nunna in siatna, gimna tawh kidim nunna hi; mihing in a piankhiat a kipan a si thei mihing, mawhna tawh a kidim ihi hi. Adam a kipan siatna, gimna, khitui luanna, lau-na dim nunna sung pan suahtak nading lampi i nei kei hi. Tua hi-in leitung nate itna in a mawkna, gu bangin siatna hong guan hi; tua bang nate khenlahna in dahna, lau-na, kilemlohna, kitotna, kidona, zuaukhemna, guktakna, buluhna, kiphatsakna, hazatna, huaihamna, mi thahna, naungek naupangte thahna, gitlohna, paaktatna, zia le tong hoih lohna khempeuh hong piang hi. Hihte khempeuh in a zumhuai mahmah tatzia hi. A kihhuai gamtatnate - numei pasal paktatnate, nulepa mawhna, ngei-na tawh kituak lo-in numei le pasal omkhopnate, mi buanna, a siangtho lo gamtatna tampite hong pusuak hi. Biakna langpanna, thuman langpanna, Pasian kihtak lohna, kamciam pelhna, i vengte tungah thuman lo-in gamtatna, mi khemna, zuauphuahna, a man lo teci pulaakna, gitloh gamtatnate, thukhen zumah a man lo-in thukhenna, hingimna, siatna sung panin suahtak nading lampi i lunggulh hi. Augustine of Hippo, City of God, Gerald G. 13 Walsh, S. J. trans. (New York: Doubleday & Co., 1958), book 22, chap. 22, p. 519.
Augustine in tum akum 150 val hunlai-in a gelh hi mah taleh tua bang siatnate in tuhun leitung khuahun paizia hong suak hi. Mihing nunzia a hoihlamin a kikhel a om mel lo hi phial hi. Tua hangin siatna panin suahtak nading i lunggulh hi. Tu-in hamsa taleh i mailam in nuamna tawh kidim ding hi.Pasian in Jesuh nunna, a sihna, sihna pan a thawhkikna leh vantung siampi a hong sepna tungtawnin Abraham tungah minam khempeuh in ama tungtawnin thupha ngah ding uh hi, cih thuciam tawh kipawl kamciam a tangtung ding hi.
A tung a i gen Augustine pulaak thu ngaihsun in. Tuhun leitung siatdan gelhkhia in. Tua bangmahin Khrih Jesuh sungah Pasian hong kamciamte zong gelhkhia in ( Isa. 25:8, 1Kor. 2:9, Mang. 22:2–5).
Pasian kamciamte
ngaihsun in. Tuate nuntakpih in. Tua hileh thuciam in na sungah a nungta hi
ding hi.
WEDNESDAY April 28
A Thahat Leh A Vanglian Minam
Pasian in Abraham thupha pia ding kamciam hi; tua banah a thahat a lian minam khat suak dingin kamciam hi (Pian. 18:18; 12:2; 46:3). Naupaai thei nawn lo ding numei tungah naupaai-in ta na nei ding hi, ci-in kamciam ngah uh hi; Abraham tungah ta nei dingin nupate tungah kamciam hi. Ahi zongin Abraham in hih kamciam a tangtun mukha lo hi. Isaac leh Jacob in zong amau nun sungin mu kha lo uh hi. Egypt gam a om sungin a tangtung ding thute zong Pasian in Jacob tungah a pulaak hi (Pian. 46:3) Jacob in tua thute mu kha lo hi. Ahi zongin a tawpna-ah Pasian kamciam in tangtung hi.
Bang hangin Topa in Abraham suanlekhak panin a tuam vilvel minam khat a khang khia dingin kamciam pia hi ding hiam? Topa in minam tuam khat khangkhia sak nuam hi ding hiam? Hih minam in a tangtun ding bang masuan nei hiam? Pai. 19:5, 6; Isaiah 60:1– 3 leh Thkna. 4:6–8 sim in. Na dawnnate a nuai-ah gelh in.
_________________________________________________________________
_________________________________________________________________
Israelte in Topa thupha nopna, cidamna, sianthona tungtawnin namdangte in Topa vazuan ding hi, cih pen Topa deihna hi. Piangsakpa thupiak a manna uh tawh kitonin thupha tawh tonkhawm ahihna midangte in mu ding uh hi. Amaute hangin minam dangte in a nungta Pasian bia ding uh hi (Isa. 56:7). Tua hi-in namdangte in Israel leh amau biak Pasian in Messiah, leitung Honpa ahihna a mu ding uh hi.
“Israelte teen nading mun Pasian in koihsak hi. A nungta Pasian bia nuam lo-in Ama na a sem nuam lo namdangte mun a luah ding uh hi. Namdangte in Israel mite tungtawnin Pasian in Ama zia le tong mu-in Amah vazuan ding uh hi. Leitungah hotkhiatna kipuak ding hi. Namdangte lakah mawhsut nadingin Khrih hong sihna kitawisang ding a, Amah a en mite in a nungta ding uh hi. Ellen G. White, Christ’s Object Lessons, p. 290.
Topa in Israel mite tungtawnin a sep thute leh tuhun i pawlpi tungtawnin a hong sepna na enkak thei hiam? A kibang bang thute na mu hiam? 1Peter 2:9.
THURSDAY April 29
“Na Min Ka Liansak Ding Hi”
“Thupha a ngah dingin minam lian khatin nang hong bawlin, thupha hong pia-in, na min kong liansak ding hi”(Pian.12:2).
Pian. 12:2 sungah kigelh bangin Pasian in Abram min liansak dingin kamciam hi; ama min in mun khempeuhah kizel ding hi. Mi khat in thumangin citak mahmah taleh, bang hangin Topa in mimawhte ading tua bangin nasem ding lunggulh hi ding hiam? Kua in min lian ngah dingin kilawm hiam? (Rom. 4:1–5, James 2:21–24.) Pasian in Abram a piak thupha in ama angsung hamphat nadingin a piak hiam? Ahih keileh tua lo a dang deihna lian zaw a om hiam?
______________________________________________________________
______________________________________________________________
Pian. 11:4 leh Pian.12:2 enkak in. Kibatlohna bang na mu hiam? Koi in gamtatna tawh hotkhiatna ngah ding limcing a, koi in upna tawh hotkhiatna limcing hiam? Hotkhiatna in eite dinmunah Khrih a hong om manin Pasian hehpihna a ngah thei ihi hi. Ahi zongin mihing in deihtelna nei a, tua hehpihna sang nuam kei lehang, hehpihna i ngah kei ding hi. I nuntakna sungah Khrih leh Satan kikal kido tawntung hi. Hih kido-na sungah nang le kei in koi lamah i om hiam cih pen mihing leh vantungmite in hong en tawntung uh hi (1Kor. 4:9). Tua hi-in eite in kua hi a, i gen thute leh i gamtatna in tawntung nunna maw, tungtawn manthanna hong tunpih thei hi.
I kampau, i gamtatnate a kipan i lungsim puak in Topa minphatna kilangsak thei hi; eite ading Topa sep khempeuh a pulaak thei hi. Tua ahih keileh Topa leh Ama mindai-na a piangsak thei hi. Tua hi-in Topa in Abraham tungah na min kong liansak ding hi, ci-in a kamciam in leitung minthanna kamciam hi lo hi. Pasian mai-ah minlian i cih in kiniamkhiatna, Ama thupiak manna, mite itna hi. Leitung mite in minliatna a cihte uh pen Pasian mai-ah minliatna hi pah lo hi.
Tuhun leitungah a minthang a kiciapteh mite ngaihsun in. Video sung kineihsiamte, gam makai, neih le lamh haute zong hi kha thei ding hi. Bang in hih mite minthangsak hiam? Abraham minphatna tawh enkak in. Leitung in liatna ci-in a ciaptehnate in liatna taktak hi lo ahihlam na mu hiam? Leitung in liatna ci-in a ciapteh thute in liatna taktak na muhzia ahong huzaap hiam?
FRIDAY April 30
Ngaihsutbeh Ding: Ellen G. White, “Abraham in Canaan,” pp. 132–144 leh “The Test of Faith,” pp. 145– 155, in Patriarchs and Prophets.
“Abraham tungah sittelna in a thuak hak mahmah sittelna khat hi; ama kipiakkhiat in lian mahmah hi. Ahi zongin Pasian sapna zui dingin Abraham in tuantual lo hi. Pasian kamciam muangin, Ama thupiak a zui mi adingin a hoih pen dinmun Pasian in a geelsak hi. Ellen G. White, Patriarchs and Prophets, p. 126.
Abram in Canaan gam a lut ciangin Topa in ama tungah kilangh a, a khualzinna gam khempeuhte a suan le khakte luah dingin a piak ding thu a ciam khin zo hi (Pian. 12:7). Pasian in hih kamciam a pulaak kikkik hi (Pian. 13:14, 15, 17; 15:13, 16, 18; 17:8; 28:13, 15; 35:12). Kum zali khit ciangin tua kamciam a tangtung hi ( Pian.15:13, 16), Moses in saltanna Egypt gam panin bawngnawi leh khuaizu a luanna gamah a makaih ding hi, ci-in Topa in a pulaak hi (Pai. 3:8, 17; 6:8). Topa in hih kamciam mah Joshua tungah pulaak kik hi (Josh. 1:3), David hun ciangin tua kamciam a tangtunna kipanta hi (Pian. 15:18–21; 2 Sam. 8:1–14; 1 Kum. 4:21, 1Khang. 19:1–19).
Hebrews 11:9, 10, 13–16 sim in. Hihte in Abraham leh Topa tungah a citak mite luah Canaan pen limcinna ahih keileh mailam hunah amaute nopsak nading pulaak khol ahihna thei thei uh hi. A tawpna-ah Canaan in tatkhiat mite tawntung teen nading mun limcingkhol hi. Mawhna tawh kidim leitung pen tawntung teen nading mun hi thei lo hi. Nuntakna in manlang takin bei hi; nuntakna in tawm vei sung kimu-in a bei mang thei tuikhu bang hi (James 4:14). Upna sungah Abraham suanlekhak ihih mah bangin tawntung teen nading mun hih leitung a thakin kibawlpha ding hi. Eite in a kip tawntung khuapi a zuan ihi hi (Heb. 13:14). Siatna leh a kikhelkhel leitungah Khrih tawh a nungta mi in a kip tawntung ding hi.
Kikup Ding Dotnate:
1. Leitung thak hong piang ding kamciam in tuni nang le kei Khristian thuzuihna a hong huzaap hiam? Matt. 5:5; 2 Kor. 4:17, 18; Mang. 21:9, 10; 22:17.)
2. “A man a diktak liatna in Pasian thupiak tawh kituakin nuntak kalsuanna leh hotkhiat na nasepna-ah Amah tawh mapankhopna hi.” SDA Bible Commentary, vol. 1, p. 293. Hih in bang khiatna nei hiam?
Tomkaihna: Topa kamciamte in
thu-um mite adingin bangzahin a manpha kamciam hiam? Kamciam a tangtung diam?
Upna nei mi in tangtung ding hi, ci hi.
