LESSON 13 June 19-25 THUCIAM THAK NUNNA

Sabbath Nitak

 Tukaal sung sim ding: 1 John 1:4; John 5:24; Rom. 3:24, 25; 2Kor. 5:21; 1 John 4:16; Mang. 2:11; 20:6, 14; 21:8.

 KAMNGAH: “Gutate pen a gu ding, a that ding, leh a siasak ding bekin hong pai hi. Kei ka hih leh tuute a nungta maimai bek hiloin nuntakna cingtaak a neihtheihna dingun a hong pai ka hi hi” (John 10:10).

Tu quarter sung thusin in thuciam thu vive hi. Thuciam a bulpi pen pulaak ding hi lehang, Pasian in mihingte a hong hotkhiatzia hi. A tawpkhakna thuciam a tangtun hun in hih leitung a thakin kipiangsak kik ding a, tua sungah tawntung nuntakna tawh nuntakna hi. Ahi zongin tu-in zong thuciam tawh kipawl tua thupha sungah a nungta thei ihi hi. Topa in tulaitak i nunna in a cingtaak nunna ahi dingin hong deih hi. Amah in tulaitak i nuntakna in a hoih peh hi dingin hong deih hi. Thuciam thupha i cih in tu-in hoihtakin gamta-in mailamah i ngah ding thupha bek hi lo-in, tu-in zong tawntung nunna upna tawh i ciam kha thei hi.

Tukaal sung i thusin in Pasian hehpihna tungtawnin a hong tung kamciamte i mu hi. Amah in i lungtang kongkhak hong kiu tawntung a, Amah hong lut dingin na lungsim kongkhak na hon hi. Tua ciangin Ama kamciamte tawh a kidim ihi hi. Tua nopsakna in a bei ngei lo nuamna hi ding hi.

Tukaal thusim a huamin etna: Banghangin lungdam ding ka hiam? Bang siksanin kamciamte tawh nungta ding ka hiam? Mawhna vangik panin a hong suakta sak thuciam in bang thuciam hi ding hiam? Lungtang thak tawh nungta cih in bang hi ding hiam?

 

 

SUNDAY      June 20

Lungdamna

“Hih thute ka hong gelhna a hang in a cingtaak lungdamna na ngah nading ahi hi” (1John 1:4). John pulaak thu ngaihsun in. Thuciam sungah a nungta mi hamphatna lianpi, lungdamna a hong kiciamna thu a hong hilh hi. Khristian khat ihihna zui-in tawmvei sung nopna (feeling) bek tawh kalsuan lo-in upna tawh kalsuan ding ihi hi. Upna in tawmvei sung nopna hi lo hi. Ahi zongin mihing in nuam thei, dah thei, lungsim puak khat tawh a nungta mite ihi hi. Hih bang thute pen mihing in a nial zawh ding hi lo hi. Ahi zongin nopna, dahna, lungsim puakzia khempeuh telsiam kisam hi. I nuamna, i dahna, i lungsim pen i ukzawh ding kisam hi. A kisapna zui-in a nuam thei, a dah thei ding kisam hi. Ahi zongin nuamna, dahna, na lungsim nial lecin mihing hihna a nial na hi ding hi. I gennop a thupi pen in a cingtaak nuamna tawh a nungta ding ihi hi. Nuamtheihna, dahtheihna nial hi lehang a cingtaak nuamna tawh i nungta thei kei ding hi.

1Jn. 1:4 sim in. John in Khristian masate lungdamna a kicing dingin bang lametna nei hi ding hiam? Bang hangin tua in a cingtaak nuamna guan ding hiam?

 ____________________________________________________________

 _____________________________________________________________

John in Nungzui sawm leh nih lakah nungzui khat hi; Khrih in kum thum leh a lang a nasep a pat a kipan Ama nungzui khat hi. Singlamteh tungah Khrih sihna, Gethsemane ah a gimna, mel kikhelna Mual tungah Jesuh vangliatna mukha hi. Tua hi-in a mit in Jesuh mu ahih manin a cingtaak lungdamna thu a gen dingin kilawm nungzui khat hi.

Ahi zongin John in a pulaak thute sungah amah leh amah kiliatsakna nei lo hi. A nungzui thu-um mite adingin Jesuh in a sep na khempeuhte hangin tu-in thu-um mite in khat le khat kizopna banah Pasian tawh kizopna a nei thei ihi hi. Jesuh Amah mah in tua kizopna lampi a hong honsak hi. Tua bangin Amah tawh kizopna hangin a gah in lungdamna hi. John in thu-um mite tungah a laikhak in Jesuh tawh kikhawlin, Amah tawh anne tuidawn khawmin, vantung Pa tawh nuamna kidim kizopna nei thei ihihna hong hilh hi. Pa Pasian in leitung mite a hong itna manin, Amah mah in Tapa tungtawnin a hong kipia hi.

John in ama tuak thute pulaak hi. Jesuh tawh mimal na kizopna in koi bang hiam? Koi bangin John bangin Topa sungah lungdam zaw semsem ding i hiam?

 

MONDAY         June 21      

Kisuanna Om Nawn Lo

 

“Ahi zongin tu-in ahih leh Khrih Jesuh tawh kipawlin a nungta mite pen mawhna thukhenna tawh kipelh hi” (Rom. 8:1).

Nungak khat in thahna thuak hi. Amah a that kithei zo lo hi. Palikte in a theihkhiat nadingun nungak nu kivui-na a hanah kuama theih loh dingin microphone khat koihsim uh hi. A kivui khit kha tampi paikhit nitak khat tangval khat hih nungak kivui-na ah hong pai hi. Khitui luangin khukdinin mawhmai-na deihin vakap hi. Palikte in hih tangvalpa kolbulh uh hi. Bang in hih tangvalpa han pai dingin sawl hi ding hiam? A mawhna kiphawk ahih manin tua in hanah a pai dingin hong tawsawn hi. Eite in hih tangvalpa bangin mi that ihi kei kha ding hi. Ahi zongin mawhna, kisuanna tawh kidim hi lo i hiam? Siatna i bawl pha kei zongin, na hoih sem dingin thei napi, i sem zo kei hi.

Jesuh leh thuciam thak sisan hangin i lungdam hi. Eite in kisuanna ukna nuai-ah a nungta ihi nawn kei hi. Rom. 8:1 in a gen bangin eite tungah mawhsakna a om nawn kei hi. Amah in Thukhenpa hi-in mawh hi, ci-in thukhen lo hi; kisuan nading bangmah a om nawn kei hi. Hih thu i zel nadingin koi bangin Rom. 8: 1 in hong theitelsak hiam? John 5:24; Rom. 3:24, 25; 2Kor. 5:21.

Thuciam sungah Topa tawh a nungta mite tungah kipia kamciam lian mahmah khat in eite in mawhna vangik pua-in kisuanna sungah a nungta hi nawn kei hi, cih kamciam hi. Bang hang hiam cihleh, Amah theitelin upna, kisikna leh thuman lampi i telleh, thuciam sisan in Pasian tawh kizopna a hong neisak hi. Tua bang mi puak mawhna vangik a kisuankhia hi. Satan in na mawhna, na siatna pulaakin Pasian in hong sang zo lo ding hi, ci-in i bil ah a hong huau-sim hi. Sehnel gamah Satan zia-etna a thuak Jesuh mah bangin, eite in zong Satan zia-etna i tuah ciangin Lai Siangtho siksanin ama hong zia-etna i do ding hi. Satan hong zia-etna i do nading galvan hoih mahmah khat in Romans 8:1 hi. Tua bangin i pulaak ciangin mawh nei lo mi ihi, ci-in a pulaak ihi kei hi. Ahi zongin i pulaak nop in Topa tawh a kizom mi in thuciam sungah nungta ihih manin, mawhsakna nuai-ah a nungta ihi nawn kei hi, cih a pulaak ihi zaw hi. Jesuh in eite adingin mawhna thaman a hong thuak khin a, tu-in Pa mai-ah ama sisan siksanin, i mawhna munah Ama dikna va pulaakin eite ading mawhthuumna nei hi.

 

Bangbang mawhna tawh a kidim mi khat na hih hangin Topa tung pan mawhmai ngahna in na nuntakna-ah bang kilamdanna a om hiam? Koi bangin na tungah a hong mawh mi khat tawh na kizopna in Topa tung pan mawhmai na ngahna a hong theitelsak hiam? Koi bangin mi tawh na kizopna a hong huzaap hiam?

 

TUESDAY                   June 22

Thuciam Thak Leh Lungsim Thak

 

“Na upna hangun note lungsim sungah Khrih hong tengin, itna thu-ah zung thuk khakin bulkip na neihna dingun thu ka ngen hi. Tua hi leh note in Pasian mi ahi midangte khempeuh tawh Khrih hong itna bangzah takin sau-in zai a, bangzah takin thukin sang ahi hiam, cih na theikhawm ding uh hi. Khrih hong itna a kicing takin theihkhit zawhloh ding ahi ta zongin note in thei-in, Pasian thu a cingin na theihna dingun thu ka hong ngetsak hi” (Eph. 3: 17- 19).

Tu quarter thusinna a masa lamah thuciam thak in Topa in i lungtang tungah thukham a hong gelhna hi, ci-in kipulaak hi (Jer. 31: 31- 33). I lungtang tungah thukham a om hi bek lo-in Khrih zong a hong teen ciangin, tua in mannei hi. Bang hang hiam cihleh Khrih leh Ama thukham in kinai takin kizopna nei uh hi. Tua hi-in i sungah Khrih thukham a om ciangin Khrih zong a hong teeng hi-in, thuciam thak hamphatna hangin lungtang thak i ngah hi. Bang hangin lungtang thak kisam hiam? Lungtang thak tawh a nungta mi sung panin bang kikhelna kimu thei ding hiam?

Eph. 3: 17 – 19 sim kik in. Paul in itna lamsang mahmah a, itna mah tawh nungta hi. Paul in a kip tawntung itna siksanin nunna kip, lungkipna tawh nuntakna pulaak hi. I upna in Pasian leh mite itna tungah a kinga ahih keileh a mawkna hi (Matt. 22:37–39, 1 Kor. 13). Hih itna in awngthawl sung pan hong piang khia ahi kei hi. Itna in Pasian kiang pan hong pai hi; Amah in mihingte hong it ahih manin itna nei thei ihi hi. Jesuh nunna in vantung itna hong hilh hi. Tua itna in i nunzia, i lungsim hong khel hi. Tua ciangin eite in mi thak hi-in, ngaihsutna, ngimna khempeuh hong kikhel hi. Pasian in eite hong it a, tua itna in i nunna a hong khel hi. Tua itna mah in midangte zong a hong itsak hi. Paul in eite sungah Pasian deihna kicing hi, ci-in a pulaak ciangin, Pasian it a, midangte zong a it theih hi, cih pulaak hi.

1John 4:16 sim in. Koi bangin Paul laigelh Eph.3:17–19 tawh kizopna nei hiam?

 

_________________________________________________________________

____________________________________________________________________

1John 4:16; Eph.3:17–19 na sim ciangin tua kamciamte a tangtun nadingin bang masuan na neihlam hong hilh hiam? Na kikhel ding a om hiam? Na sungah Pasian deihna a kicin nadingin a khaktan a om hiam? Eph. 3:19) Na kikhel ding a kisam thute gualsuk in. Na lawmte na kuppih nopleh pulaak inla, na kikhel huaite kikhel in. Kikhel nadingin koi bangin khat le khat kihuh thei ding i hiam? 

 

WEDNESDAY     June 23

Thuciam Thak Leh Tawntung Nunna

“Tua ciangin Jesuh in, “Keimah in a sisa mite thosakin a hingsak theipa ka hi hi. Kei hong um mi peuhmah a sih hangin nungta ding hi. A nungta-a kei hong um mite si ngei nawnlo ding hi. Hih thu na um hiam?” a ci hi (John 11:25, 26). Tawntung nunna in thunih pulaak hi. Ei thu-um mite in nuntakpih a bucing nuntakna tawh nungta uh a (Jn. 10:10), tuhun ading kamciamte tawh a nungta ihi hi. A thunihna-ah a si thei nawn lo nunna tawh a nungta ding ihi hi; thawhkikna kamciam a hong tangtung ding hi (John 5:28, 29; 6:39). Tua kamciam in hong pai ding hun sungah tangtung ding ahih manin ei Khristiante lametna khempeuh in manpha hi.

Jn. 10:10; Mang. 2:11; 20:6, 14; 21:8 kantel in. Jesuh in bang thu gen hiam? Koi ah tawntung nunna kimu hiam? Koi bangin Amah a um mite tungah Jesuh pulaak, amaute in si zongin a si nawn kei ding uh hi, cih thu na tel thei hiam?

Mihing a si lo ding kuamah om lo hi. Ahi zongin Jesuh in leitung sihna pen ihmu hi, ci hi; tawmvei sung ihmutna hi. Amah a um mite in sihna pan hong thokik ding uh hi. Jesuh hong pai kik ciangin a si mite in a si nawn lo dingin hong tho kik ding uh hi. Khrih nungzui a nungtalai mite in mitphiat sungin sihtheihna panin sih theih nawn lohna-ah kikhel ding uh hi.

Ama sungah a si mite hi taleh a nungtalai mite in a thokik pumpi-ah kikhel ding hi. Pasian mite in sihnawn lohna nunna pen tua hun ciangin ngah ding uh hi. Hankhuk in a tawpna hi lo hi, cih thu in bangzahin lungdamhuai hiam? A tawpna-ah tawntung ading nunna tawh a nungta ding ihi hi.

“Eite in Khrih tawh i kipawl theih nadingin Amah in eite tawh si-khat sa-khat a hong suak hi. Tua bangin Amah tawh kipawlna panin Khrih vangliatna tawh hi banah upna tawh Ama nunna in eima nunna hong suakin, hankhuk sung panin a tho kik ding ihi hi. Khrih zia le tong tawh a nungta mi sungah Khrih nungta-in tawntung nunna a ngah mi ahi hi. Kha Siangtho tawh Khrih in i sungah a hong nungta hi. Kha Siangtho in upna tawh i sungah hong nungta-in, tua ciangin tawntung nunna tawh nuntakna a kipan hi.” Ellen G. White, The Desire of Ages, p. 388.

Koi bangin tu-in tawntung nunna ngahna hangin hamphatna i ngah hiam? Koi bangin a dah a kap mite tungah lametna leh kamciamte na pulaak ding hiam?

THURSDAY   June 24

Thuciam Thak Leh Mission

“Tua ahih ciangin note pai un la, midang khempeuh, keima nungzui mi suaksakin, Pa min, Tapa min, leh Kha Siangtho min tawh tui sungah na phum un.Tua ciangin note tungah ka hong gen thute khempeuh a zuihna dingun na hilh un. Hun bei dongin note a hong ompih tawntung ding ka hihna thu phawk ta un,” a ci hi” (Matt. 28:19, 20).

South African laigelh Laurens Van Der Post in “ man nei lo nuntakna in vangik bang hi,” ci hi. Hih pen mi khempeuh in i tuah khak thu hi. Nuntakna in Pasian hong piakkhong hi a, ahi zongin mi tampi in bangci nuntak ding a kipan nuntakna in bang ngimna nei hiam cih thute thei lo uh hi. Tua bang nuntakna in laibu saal khatah laibu manpha mahmah kikoih napi kuamah in a simloh laibu tawh kibang ding hi. A tawpna-ah tua laibu in meitawhna bekin kizang hi. A manpha mahmah hi napi man nei lo-in a mawkna-in beimang hi. Thuciam thak sung a nungta Khristian khat in manpha takin a nuntak ding kisam hi. A nuntakna in manpha takin a nungta dingin mainawt ding hi. Mi mawh mi khempeuh adingin sihna thuakin sihna a zo Honpa a thei mi in tawntung nunna sungah a nungta ding uh a, lungdamna tawh a kidim uh hi. Matthew 28:19, 20 in thu-um mi tungah a hong piak nasep leh nuntakna mungtup hong hilh hi. Jesuh Khrih tawh nungta khawm ihih manin ama hotkhiatna thu kizelsak ding leh amah tawh a nungta khawm ihi hi. Bangzahin hamphatna lian hiam? Leitungah i sepna khempeuh in hih leitung tawh a bei khawm ding hi. Ahi zongin midangte tungah hotkhiat lungdamna thu i pulaak in tawntung kimang ding hi. Hotkhiat nasep leh a mungtup in bangzah in manpha hiam?

Matt. 28: 19,20 sim kik in. Jesuh in bang hih dingin eite hong sawl hiam? Khrih hong thupiak bangin i sep zawh nadingin bang kamciam hong kipia hiam?

______________________________________________________________

______________________________________________________________

Thuciam Thak Khristian thu-um mi ihih mah bangin Topa in eite masuan ding a hong pia hi. Eite in kua hi a, bangbang nasem mi ihi zongin hotkhiat nasem dingin hong kisawl hi. Topa nasep na sungah na kihel hiam? Tu-a sangin a kihel zaw thei ding hi lo na hiam? Na lawmte tawh nasem khawm ding hi lo na hiam?

 

FRIDAY       June 25

Ngaihsutbeh Ding: Ellen G. White, “God’s People Delivered,” pp. 635–645, in The Great Controversy; “Rejoicing in the Lord,” pp. 115–126, in Steps to Christ.

“Pasian Tapa in siangtho-in amah in mawhna ahi a, ama mawhna hangin dahna a thuak ngei kei hi; mite mawhna hangin dahna a thuak tawntung hi. Bang hang hiam cihleh eite mawhna khempeuh in ama tungah kisuan hi. Amah in vantung lai -nat hehpihhna tawh mi tawh hong nungta khawm a, minam khempeuhte dinmunah a hong nungta hi. I mawhna hangin Amah in gimna a thuak hi. Mihing leh Pasian kikal kizopna lei a hong dawh hi.” Ellen G. White, Bible Echo and Signs of the Times, Aug. 1, 1892.

“Hong pai in, ka sanggam aw, na mawhna leh na gitnatlohna tawh hong pai in. Na mawhna vangik khempeuh Ama tungah suankhia in. Upna tawh Ama dikna pom in. Tu-in hong pai in. Hehpihna in a hong samlai hi. Na mawhna pulaak inla, mawhthuu in; kisikna tawh Amah va zuan in. Pasian in na mawhna hong maisak ding hi. Hun hoih na ngah paisan kei in. Hehpihna in a hong saplai aw za inla, sihna pan tho inla Khrih in Ama khuavak a hong taan ding hi. Mit tawh kimu thei lo vantung tawh tatsat lo-in kizopna a nei thei ihi hi. 

Tua hi-in kiphatsakna leh up lohna ki-uksak kei inla, hehpihna na nial kei ding hi. Tua hi keileh tawntung dahna sung na tung ding hi. ‘Anlak hun bei ta a, khuakhal hun a bei khin hi. Eite lah hotkhiat loh mi i suak kha ding hi. Ellen G. White, Testimonies for the Church, vol. 5, p. 353.

 

Kikup Ding Dotnate

1.      “Na khempeuh tawh kizopna nei ihihlam i phawk thei hi. Bangmah thei lo-in om a, a tawpna-ah bangmah hihzawhna i nei kei hi; tua hi-in i nuntakna in bitna nei lo hi; tua in lau-na hong guan hi,” ci-in Francisco José Moreno gen hi.” Between Faith and Reason: Basic Fear and the Human Condition (New York: Harper & Row, Publishers, 1977), p. 7.

Hih thu leh tukaal sung thusinna Ephesians 3:17–19 tawh enkak in. A kibang lo thu nih pulaak in.

2.    Eite in Jesuh sungah a lungdam dingin Pasian in kamciam hong pia hi. Lungdamna (joy) leh nopna (happiness) in kibang hiam? A lungdam tawntung ding hi lo i hiam? Tua bangin na nuntak keileh thu zuihna-ah a kisam khat om hi lo ding hiam? Koi bangin hih thute Jesuh nunzia in hong theitelsak hiam?

3.    “Pasian thu a kicingin theihna” cih thu (Eph. 3:19) ngaihsun in. A khiatna in bang hi ding hiam? Koi bangin i nuntakna in Pasian thu a kicingin theihna tawh kidim thei ding hiam?

 

Tomkaihna: Thuciam in thuthuk khat hi banah Khrih tawh mihing kizopna khempeuh zong huamkhin hi. Amah tawh kizopna panin tu-in a gah i at a, Khrih hong pai kik ciangin zong gah a at ding ihi hi.