LESSON 11 June 5-11 THUCIAM THAK BIAKBUK

  

Sabbath Nitak

Tu Kaal Sung Sim Ding: Pai. 25:8; Isa. 53:4–12; Heb. 10:4; 9:14; 8:1–6; 1 Tim. 2:5, 6.

KAMNGAH: “Thuciamna masa in a huamkhak mite, a mawhna panun a suahtak theihna ding uh ngeina om pen a si suak khinta ahih manin, Pasian’ sap mite in a ciamsa tawntung thupha a ngahtheihna dingun Khrih in thuciamna thak a hong vaihawm ahi hi” (Hebrews 9:15).

Kha tanglo nitak khat vantung in laitui vom bangin khuamial hi. Frank pai-na khua sung lampi in khuamial in tuamcip hi. Tawlkhatkhit ciangin a nunglam pan khe ding khat in amah zui hi, cih a thei hi. Tua pa in hopih a, “Nang, laikhen Frank na hi hiam? ci-in dong hi. 

“Hi mah ing. Koi bangin hong thei na hiam?

“Hong thei keng” ci-in tua mikhualpa in dawngkik hi. “Ahi zongin na sanggampa ka theih mahmah khat hi; na pumpi ka muh ciangin amah hong phawksak hi; na lampai, na tatzia khempeuh in khuamial sung nangawngin na sanggampa ka mu mah tawh kibang hi; a sanggampa na hihlam ka upmawh mah hi. Bang hang hiam cihleh ama’n sanggam khat ka nei hi,” hongci hi. Hih tangthu in Israelte biakbuk thu hong phawksak hi. Lai Siangtho hong gen bangin leitung biakbuk in a taktak biakbuk pulaak hi. Leitung biakbuk leh a sung a kisem nate in limcinna nei hi; Khrih hong sihna, vantung biakbukah siampi lian a sepna pulaak uh hi.

Tu Kaal Thusin A Huamin Etna: Bang hangin Pasian in Israelte in biakbuk lam dingin sawl hi ding hiam? Biakbuk in eite tangin hong si Khrih thu bang hong hilh hiam? Jesuh in vantungah ei adingin bang sem hiam 

 

SUNDAY                   June 6

Kizopna

 

“Keimah in note lakah omna ka bawl ding a, keimah in note kong kih kei ding hi. Keimah, note’ lakah omin note’ Pasian ka hi ding a, note, keima mite na hi ding uh hi” (Siam. 26:11, 12).

A kitel mahmah thu in thuciam lui ahi a thuciam thak ahi zongin, Topa in a mite tawh itna tawh kizopna kip nei ding lunggulh tawntung hi. Thuciam in tua kizopna thukhun picingsak hi. Kizopna in thuciam lui ahi a, thuciam thakah thupi hi. Ahi zongin tua kizopna a om theih nadingin khat le khat kiho-tuahna, khat le khat thu kizakna, kikawmna cihte kisam hi; a diakdiakin mawhna tawh kidim, a khial thei, muanlahna tawh kidim mihing in Pasian tawh kizopna kisam hi. Tua hangin Amah mah in lampi hong bawl hi; Amah mah in mihingin hong kilang ahih manin mihingte in amah tawh kizopna hoih nei thei ihi hi.

Pai. 25:8 sim in. Topa in Israelte’n biakbuk lam dingin sawl hi. Topa in bang deihna nei-a biakbuk lam ding sawl hi ding hiam?

 

_________________________________________________________

___________________________________________________________

 

Topa in bang deihna tawh biakbuk lam ding sawl hiam cih dawnna tawh kizomin a dang dotna khat in bang hangin Topa in a mite laizangah teeng nuam hi ding hiam? Hih tawh kisai-in a tunga kipulaaksa bangin Siam. 26: 11, 12 in hong hilh hi.A taktakin Topa in amaute laizangah teeng (biakbuk) ding hi;tua ciangin Amah in a mite kih nawn lo ding hi. Tua ciangin Amah in a mite tawh laipai-khawm ding a, amaute Pasian hi-in, amaute in Pasian tate hi ding uh h (Siam. 26:11, 12). Hih thute in pulaak thu ngaihsun in. Kizopna limgen mahmah hi uh hi.

Tawlnga hithiat phot inla, Siam. 26:11, 12 leh Pai. 25:8 a malmalin encian in. Koi bangin Topa in a mite tawh kizop a lunggulhna pulaak hiam?

_________________________________________________________________

_________________________________________________________________

 

Topa in a mite tungah a pulaak thu “Keimah in note kong kih nawn kei ding hi” cih thu ngaihsun in. A mawh, a khial mite in biakbuk tungtawnin Topa santheih mi a suahtheihna biakbuk in bangci bang thu hi-a, biakbuk in bang sem hiam? Bang hangin thuciam a hong piankhiat nadingin biakbuk in thupi mahmah hi ding hiam?

 

MONDAY        June 7

Mawhna, Meihal Biakna, Saanna (Heb. 9:22)

 

Thuciam Lui sungte en lehang mawhnei mi in a mawhna leh a khialhnate a mai-nadingin ganhing tawh biakpiakna pen Topa thupiak hi. Israelte biakpiakzia a kicingin Siam 1-7 sungah kigelh hi. Meihal biakpiakna-ah sisan zatna leh sisan koihna mun a tuamciat hi. Sisan in Israelte biakpiakna khempeuh a gawmkhawm a thupi mahmah khat hi.

A mawh mi in thuciam palsat hi-in, Pasian leh mimawh mi a kilemkik nadingin thukhun om hi;a khial mi sih ding tangin ganhing tawh biakpiakna a piak kul hi. Tua bangin meihal biakpiakte in mawhna leh khialhna pan siantho ngah nadingin Pasian in lampi a bawlkholhsa ahi hi. Tua thukhunte in a mawh mi a siansak nading, ama mawhna leh khialhnate sisan thehna tungtawnin biakbuk sungah kisuahkhia-in a mawhna kisik mi in honkhia Topa tawh mimal kizopna a ngah kik thei hi.

Koi bangin zanni thusinna a nununglam a dotnate in tuni thusinna theitel ding hong huh hiam? Sisan tawh biakpiakna in bang genkholhna a thupi pulaak hiam? (Isa. 53:4–12, Heb. 10:4).

_______________________________________________________________

______________________________________________________________

 

Thuciam Lui hunlai-a ganhing tawh biakpiaknate in mawhnei mi mawhna leh a khialhnate hahsiang nadingin Pasian in a tuam vilvelin a koih ahi hi. Tua biakpiaknate in mawhnei dinmun kikhelsak hi;a si ding panin mawhmai-in thuciam om bangin Pasian leh mi tawh kizopna nei dinmun tungkik thei hi. Ahi zongin tua ganhing sihna in genkholhna khat nei hi. A taktakin tua ganhing khat sihna in mihingte mawhna leh khialhnate a maisak thei lo hi; mawhmai-sak ding kicinna nei lo hi. Hebrews laigelhpa in ama kammal tawh a pulaak thu in “Tua hi a, bawngtal sisan leh keel sisan in mawhna siangsakzo ngeilo hi” (Heb. 10:4) Tua hi-in ganhing tawh biakpiakna in Pasian-mihing hong suak Pasian sila a hong pai ding genkhol uh hi; Amah in leitung mite sih ding tangin sihna a hong thuak hi. Tua hangin thuciam siksanin mawhnei mi mawhna mai-in, ama kisikna Topa in sang hi.

Thuciam Lui meihal biakna a pia dingin kingaihsun in; biakbukah ganhing sisan tawh biakpiakna nei uh hi. Nuntak khuasak nadingin ganhing kikhawite, ngeina, nasepna khempeuh in mawhna hanga a beilawh van le nate ngaihsun in.

 

 

TUESDAY     June 8  

Mihingte Tang Dingin Sihna

 

“A siahuai tuhun sung panin eite a hong suahtaksakna dingin eite’ Pa Pasian’ deihna tawh kizui-in i mawhna hangin tua Jesuh Khrih amahmah a hong kipiatawm ahi hi” (Gal. 1:4). Thuciam Thak Bu sung a thu bulpi mahmah khat in Jesuh Khrih in leitung mawhna hangin sihna hong thuak hi, cih thu hi. Hih thu in hotkhiatna geelna a hong kipat nading a bulpi hi. Khrih hong sihna a nial upna in Khristian hihna a nial hi pah hi. Sisan omlo singlamteh in kuamah honkhia thei lo hi.

Gal. 1:4 sim inla, hih dotnate dawng in: Jesuh in Amah leh Amah kipia- tawm a hong si hiam? Kua adingin hong si hiam? Ama sihna in bang tangtun hiam?

_______________________________________________________________

______________________________________________________________

Mihingte tang dingin sihna in hotkhiatna hawmvai-na khempeuhte tawhtang hi. Bang hang hiam cihleh i mawhna hangin ei mahmah a si dingin kilawm ihi hi.Ahi zongin Khrih in Ama hong itna hangin “ I mawhnate hangin Amah mah a hong si hi” (Gal. 1:4) . Eite thuak ding a kilawm sihna Amah mah in hong thuak hi. Mawhneite sih tangin Khrih hong sihna in a lian mahmah thuthuk hi; hih thu panin thuman a dangte hong luangkhia hi. I lametna ahi na khempeuh bawl thakna, suahtakna, mawhmaisakna, paradise ah tawntung nunna cihte khempeuh in Jesuh nasepna tungah kinga hi; Ama nasep in i mawhnate hangin Amah mah a hong kipia hi. Hih thu lo-in i upna in kimanna nei lo hi. I lametna leh i muanna Jesuh singlamteh tungah kinga kha thei mah hi. Hotkhiatna in sisan, Khrih sisan tungtawn bekin hong pai hi.

Hih a nuai-a Lai Siangtho munte sim in. Matt. 26:28, Eph. 2:13; Heb. 9:14, 1 Pet. 1:19. Sisan thu bang pulaak uh hiam? Hotkhiatna geelna sungah sisan in bang sem hiam?

_____________________________________________________________

_______________________________________________________________

Kilawmna bangmah nei keng, Ka mawhna tam lua, Pasian mai-ah a om dingin kilawm keng, ci-in lau- na leh muanlahna sung pan …tu-in hih bangin na pulaak thei hi: “Mimawh ka hihlam ka kithei hi; tua hangin Honpa ka kisam hi…. hotkhiatna ka ngah nadingin bangmah dikna, phatna ka nei kei

hi; ahi zongin leitung mawhna a puakhia mawh nei lo Pasian Tuuno sisan in mawhna khempeuh panin hong siangsak thei Pasian mai-ah ka ki-ap hi. Hih bek mah ka ngen thei hi.” Ellen G. White, The Faith I Live By, p. 100.

Hih a tungdeuh a Ellen White laigelh ngaihsun in. Nangma kammal tawh gelhkhia in. Nuntakpih in. Na launa, na gimnate sungkhia inla, Ama kamciamte zong pulaak in. Thuciam thak sisan hangin lametna bang na nei hiam?

 

WEDNESDAY                     June 9

Thuciam Thak – Siampi Lianpa

 

Pasian in a mite tawh a teenkhopna leitung biakbuk in ganhingte tawh biakpiakna bulphuh hi. Ahi zongin meihal biakna-ah kizang tua ganhingte sihna in sihna mawkmawk hi lo hi. Siampipa in mawhnei mi aitangin tua ganhing sisan tawh biakbuk sungah mawhmai nading nasem hi. Ahi zongin tua biakpiakna khempeuh in limcinna nei hi; leitung ading Khrih sep ding khempeuh hong hilhkhol uh hi. Tua hi-in limcinnate in limcinna bek tawh maimang lo-in aom bangin Khrih in ei adingin singkhuam tungah a sihna in Ama nasep a nunung pen hi lo hi.

Thungetna leh ki-apna tawh Hebrews 8:1–6 sim in. Bang hangin tuni thusin thute in thupi hiam? Topa tung pan theihtelna ngen in. Tua khit ciangin na tel bangbangin nangma kam tawh gelhkhia in. Koi bangin Heb. 8: 1-6 in thuciam thak theihna hong huh hiam, nang le nang kidong in.

 

___________________________________________________________

 

___________________________________________________________

 

___________________________________________________________

 

Leitung biakbukah siampipa in thuciam lui bangin nasem hi. Tua hi-in vantung biakbukah vantung siampipa in thuciam thak bangin nasem hi. Thuciam lui sung a limcinnate, lim le meelte leh a liim in (Heb. 8:5) tu-in thuciam thak sungah a taktak a tangtung hong suak hi. Tua banah eite sih tangin ganhing sihna hi nawn lo-in mawh nei lo Jesuh hong si hi; ganhing sisan hi nawn lo-in Jesuh sisan i nei hi; khut tawh kibawl biakbuk hi nawn lo-in biakbuk taktak, Topa in a bawl biakbuk i nei hi (Heb. 8:2). A khial, mawhna tawh kidim siampi hi nawn lo-in eite aitangin Jesuh in eite Siampi Lianpen hong suak hi. Hih thute siksanin Paul gen thute ngaihsun in: “A lian mahmah hotkhiatna thudon lo-in om lehang bangci bangin suakta thei ding i hi hiam? (Heb. 2:3).

Hih thu ngaihsun in: Jesuh in nang tangin mawhnei lo-in nungta hi; nang tang dingin si hi; Amah tu-in vantungah om hi; nang taangin nasem hi. Hihte khempeuh in mawhna hangin lauhuai sihna pan a hong hotkhiat nading ahi hi. Hih lungdamna thu a za nei lo mi khat tungah a gen dingin kiging in. Tuni thusinna siksanin bang na gen ding hiam? 

 

THURSDAY      June 10

Vantungah Hotkhiat Nasepna (Heb. 9:24)

 

 

Jesuh in eite tangdingin sihna a thuak khit ciangin vantungah Jesuh in ei ading a sep thute siksanin Hebrews 9:24 limtak ngaihsun in. Thu tampi gen ding om taleh i siksan nop thu in tu-in Khrih in Pasian mai-ah ei adingin va kilaak hi. Hih thu a khiatna ngaihsun in. Eite in mawhna tawh kidim ihih manin Pasian mai-ah om hi lehang Ama vangliatna hangin a beimang ding ihi hi. Mawhna tawh kidim, Pasian thukham palsatin siatna namcin tawh kidim hi mah taleng,Pasian mai-ah eite adingin a kilaak ding khat i nei hi. Pa mai-ah eite tang dingin Palaai khat i nei hi. Hih leitungah itna, mawhmai-sakna tawh kidimin a hong nungta Khrih in tu-in vantungah eite Palaai hi lo hiam? Hih in Jesuh sihna tawh a kizom toto lungdamna thu ahi hi. Jesuh in i mawhna thaman lohkhin banah Amah mah in Singlamteh tungah puakhia khin hi (1 Pet. 2:24), ahi zongin tu-in Amah in Pasian omna-ah om a, vantung leh leitung, Pasian leh mihing kikalah Palaai sem hi. Hih in hotkhiatna thu hong hilhcian hi. Jesuh in Pasian ahihna leh mihing ahihna (mawh nei lo mihing) bek in mawhna suksiat mihing leh Pasian kizop kitat a hong pehkik hi. Hotkhiatna sungah thu tampi kihel hi taleh, a thupi mahmah i phawk ding thu in Pa mai-ah eite adingin a va kilaak dingin tu-in Palaai i nei hi. Amah in i thuak gimnate, zia-etna leh natna khempeuh a thuak ngei hi. (Heb. 4:14, 15).

“Bang hang hiam cih leh Pasian khat bek om a, Pasian leh mite a hong kilemsak kik thei Khrih Jesuh khat bek om hi” (1 Tim. 2:5, 6). Jesuh dinmun nihte bang pulaak hiam? Koi bangin leitung biakbuk sunga biakpiaknate in tua thu nihte limcingkhol uh hiam?

 ______________________________________________________________

________________________________________________________________

A lungdamhuai mahmah Thuciam Thak thupuak in tu-in Jesuh hong sihna hangin a kisik mimawh mi adingin vantung Pa mai-ah Palaai khat nei hi; Amah in eite thalawh theih loh a kicing dikna a hong luahsak hi; tua dikna bek in Pasian mai-ah hong omsak hi. Jesuh in ama nunna leh Ama thuakna hangin tua a kicing dikna tawh kidim a, (Heb. 2:10), tua dikna mah in Pasian omna-ah omtheihna ngahin i mawhna khempeuh hong maisakin, mawhna tungah vangliatna a hong ngahsak hi. Tua hi keileh eite in lametna i nei kei ding a, thukhen ciangin lungmuan nading i nei thei kei ding hi. 

Pasian mai-ah a om Pa in mihing hong suakin zia-etna thuak cih thu limtak ngaihsun in. Nang mahmah adingin bang khiatna nei hiam? Lametna bang hong guanin, tha ngahna bang hong ngahsak hiam?

 

 

FRIDAY         June 11

Ngaihsutbeh Ding: “A lian penpen vantungmi in zong a mangthang mihingte honkhia zo dingin kicinna a nei kei hi. Cherubim leh seraphim in Piangsak piak vangliatna tawh kidim uh a, ahi zongin Pasian kiangah mihing a hong tunpih thei dingin, mihing leh Pasian kikaalah Palai sem ding Pasian tawh kikim vangliatna nei Khat (Pasian) mah ahih kul hi. Amah in Pasian hihna khempeuh nei ding a, ciangtan nei lo Pasian mai-ah mihingte aitangin va dingin, a mangthang leitung mite tungah Pasian a hong lak dingin mihing dinmun a hong nei ding Amah bek mah in kicinna nei hi. Pasian leh mihing kikalah Palaai sem dingin Amah in mihing nunna tawh a hong nungta ding leh mihingte adingin a hong kikham ahih mah bangin mihing nunna a neih kul a, mihingte lakah a nungta ding hi. Pasian dinmun tawh hong pai ahih mah bangin Amah in Pasian nunna a neih kul a, ciangtan nei lo Nunna tawh kizopna a neih kul hi.” Ellen G. White, Selected Messages, book 1, p. 257.

“Jesuh in a thugen zomsuakin: Note in mite mai -ah keimah teci na hih uhleh ka Pa mail eh vantungmi siangthote mai-ah ka mi na hihna uh ka pulaak ding hi. Note in leitung mun khempeuhah keima teci na hi ding uh hi. Note tungtawnin ka thupha hehpihna luang ding a, leitung mite in damna a ngah ding uh hi. Tua hi-in vantungah note adingin palaai ka hi ding hi. Pa in note mawhna mu nawn lo-in Keima kicinna puan bangin na silh a hong mu ding hi. Keima tungtawnin vantung thupha in note tungah a hong tung ding hi. Keimah a hong upna hangin a mangthang mite adingin a gimna thuakin a nuntakna a kipia mi in tatkhiat mite nuamna leh vangliatna a ngah ding hi.” Ellen G. White, The Desire of Ages, p. 357.

 

Kikup Ding Dotnate:

 

1.      Romans 5:2, Ephesians 2:18, leh Ephesians 3:12 sim in. Jesuh tungtawnin Pa tawh i kizop theihna thu bang pulaak uh hiam? 

2.    Ellen G. White laigelh a tunga nihna bel sim kik in. Pasian leh mihing kikal palaai omzia a hong hilhna ciamteh in. Pa in ei a hong muh ciangin i mawhna, i kicinlohnate mu lo-in, tuate munah Khrih dikna a mu ding hi, cih thu na lawmte tawh kikum in.

3.    Tu kaal sung thusin siksanin, Khrih in vantung biakbukah siampi nasem hi, cih thu in bang thupina nei hiam, ci-in hong kidong hi leh koi bangin na dawng ding hiam? Khrih in vantung biakbukah siampi nasem hi, cih thu in nisim nuntakna-ah bang khiatna nei hiam?

 

Tomkaihna: Meihal biakna thuciam lui in thuciam thak tawh kilaih hi. Mawhna tawh kidim siampipa in ganhing sisan tawh leitung biakbuk sungah meihal biakpiakna pia nawn lo-in, tu-in ei adingin biakpiakna kicing, Jesuh i nei hi. Amah in vantung biakbuk Pa mai-ah ei adingin mawhthumna nei-a, hih in thuciam thak leh thuciam thak tawh kipawl kamciamte bulpi hi.